കുറ്റകൃ​ത്യ​ത്തി​നെ​തി​രെ പരാജ​യ​മ​ട​യുന്ന പോരാ​ട്ടം

“എല്ലാവ​രും ശ്രമം നടത്താൻ ഒരുക്ക​മാ​യി​രു​ന്നെ​ങ്കിൽ വളരെ പെട്ടെന്ന്‌ കുറ്റകൃ​ത്യ​ത്തെ നിയ​ന്ത്രി​ക്കാൻ കഴിയു​മാ​യി​രു​ന്നു” എന്ന്‌ മെ​ട്രോ​പോ​ളി​റ്റൻ പൊലീ​സി​ന്റെ ഒരു മുൻ തലവൻ പറഞ്ഞതാ​യി ഇംഗ്ലണ്ടി​ലെ ലിവർപൂൾ ഡെയ്‌ലി പോസ്റ്റ്‌ ഉദ്ധരി​ക്കു​ക​യു​ണ്ടാ​യി. തീർച്ച​യാ​യും, എല്ലാവ​രും നിയമം അനുസ​രി​ക്കു​ക​യാ​ണെ​ങ്കിൽ കുറ്റകൃ​ത്യം ഇല്ലാതാ​കും.

എങ്കിലും, മിക്ക സ്ഥലങ്ങളി​ലും കുറ്റകൃ​ത്യം വർധി​ച്ചു​വ​രു​ക​യാണ്‌. ആയിര​ക്ക​ണ​ക്കി​നു വർഷം മുമ്പ്‌ ഉച്ചരി​ക്ക​പ്പെട്ട വാക്കുകൾ നമ്മുടെ കാലത്തി​നു ബാധക​മാ​കു​ന്നു: “ഭൂമി ദൈവ​ത്തി​ന്റെ മുമ്പാകെ വഷളായി; ഭൂമി അതി​ക്ര​മം​കൊ​ണ്ടു നിറഞ്ഞി​രു​ന്നു.” (ഉല്‌പത്തി 6:11)—എതിർപേ​ജി​ലെ ചതുരം കാണുക.

കുറ്റകൃ​ത്യം ചെറിയ കാര്യ​ങ്ങ​ളിൽ തുടങ്ങു​ന്നു

ചെറിയ കാര്യ​ങ്ങ​ളി​ലെ നിയമ​ലം​ഘനം കൂടുതൽ വലിയ കാര്യ​ങ്ങ​ളിൽ നിയമം ലംഘി​ക്കു​ന്ന​തിന്‌ ഒരാളെ പരുവ​പ്പെ​ടു​ത്തു​ന്നു. ഈ വസ്‌തുത തന്റെ വിദ്യാർഥി​ക​ളു​ടെ മനസ്സിൽ പതിപ്പി​ക്കു​ന്ന​തി​നു​വേണ്ടി ഒരു അധ്യാ​പിക ഇങ്ങനെ വിശദീ​ക​രി​ച്ചു: “സ്‌കൂ​ളിൽ പെൻസിൽ മോഷ്ടി​ക്കു​ന്ന​തു​പോ​ലുള്ള പ്രവൃ​ത്തി​ക​ളിൽ ഏർപ്പെ​ടു​ന്ന​വ​രാണ്‌ ഭാവി​യിൽ ബാങ്കു​കൊ​ള്ള​ക്കാ​രാ​യി​ത്തീ​രു​ന്നത്‌.”

ഇനി, ജോലി​സ്ഥ​ലത്ത്‌ മിക്ക​പ്പോ​ഴും എന്താണ്‌ സംഭവി​ക്കു​ന്നത്‌? ആളുകൾ ജോലി​ക്കു​പോ​കാ​തെ രോഗം നടിച്ച്‌ വീട്ടിൽ കുത്തി​യി​രി​ക്കു​ക​യും എന്നിട്ട്‌ തങ്ങൾ അർഹി​ക്കാത്ത ആനുകൂ​ല്യ​ങ്ങൾ സ്വീക​രി​ക്കു​ക​യും ചെയ്യുന്നു. സത്യസ​ന്ധ​മ​ല്ലാത്ത ഈ നടപടി ഇന്നു സാധാ​ര​ണ​മാണ്‌, നാം വിചാ​രി​ച്ചേ​ക്കാ​വു​ന്ന​തി​നെ​ക്കാൾ പോലും. ഉദാഹ​ര​ണ​ത്തിന്‌, ജർമനി​യി​ലെ ജോലി​ക്കാർ രോഗാ​വ​ധി​ക​ളു​ടെ 6 ശതമാനം ബുധനാ​ഴ്‌ച​ക​ളി​ലും 10 ശതമാനം ചൊവ്വാ​ഴ്‌ച​ക​ളി​ലും 16 ശതമാനം വ്യാഴാ​ഴ്‌ച​ക​ളി​ലും എന്നാൽ അതിലും വളരെ​ക്കൂ​ടിയ 31 ശതമാനം തിങ്കളാ​ഴ്‌ച​ക​ളി​ലും ഏറ്റവും ഉയർന്ന 37 ശതമാനം വെള്ളി​യാ​ഴ്‌ച​ക​ളി​ലും എടുക്കു​ന്നു! തിങ്കളാ​ഴ്‌ച​ക​ളി​ലും വെള്ളി​യാ​ഴ്‌ച​ക​ളി​ലും വാസ്‌ത​വ​ത്തിൽ ആളുകൾക്ക്‌ കൂടു​ത​ലാ​യി രോഗം പിടി​പെ​ടു​ന്നു​ണ്ടോ? അതോ ഇത്‌ മോഷ​ണ​ത്തി​ന്റെ മറ്റൊരു രൂപം മാത്ര​മാ​ണോ?

ആരാണ്‌ കുറ്റവാ​ളി​കൾ?

തീർച്ച​യാ​യും, സാധാ​ര​ണ​ക്കാ​രായ ആളുകൾ നടത്തുന്ന കുറ്റകൃ​ത്യ​ങ്ങൾ സാധാ​ര​ണ​ഗ​തി​യിൽ അധികാ​ര​സ്ഥാ​ന​ങ്ങ​ളി​ലി​രി​ക്കു​ന്നവർ നടത്തുന്ന കുറ്റകൃ​ത്യ​ങ്ങ​ളു​ടെ​യ​ത്ര​യും പ്രത്യാ​ഘാ​ത​മു​ള​വാ​ക്കാ​റില്ല. ഒരു രാഷ്‌ട്രീയ കുറ്റകൃ​ത്യം 1970-കളുടെ ആരംഭ​ത്തിൽ ഐക്യ​നാ​ടു​കളെ ഉലച്ചു. അതുമാ​യി ബന്ധപ്പെട്ട പേര്‌ ആംഗലേയ ഭാഷയു​ടെ ഭാഗം പോലു​മാ​യി​ത്തീ​ര​ത്ത​ക്ക​വി​ധം അത്രമാ​ത്രം ഭയങ്കര​മാ​യി​രു​ന്നു ആ കുറ്റകൃ​ത്യം.

ബാൺഹാർട്ട്‌ ഡിക്‌ഷ്‌ണറി ഓഫ്‌ ന്യൂ ഇംഗ്ലീഷ്‌ പറയു​ന്ന​ത​നു​സ​രിച്ച്‌ “വാട്ടർഗേറ്റ്‌” ഒരു “കുംഭ​കോ​ണം, പ്രത്യേ​കി​ച്ചും ഹാനി​ക​ര​മായ വിവര​ങ്ങ​ളോ നിയമ​വി​രു​ദ്ധ​മായ പ്രവർത്ത​ന​ങ്ങ​ളോ പൊതി​ഞ്ഞു​വെ​ക്കാ​നുള്ള ശ്രമം ഉൾപ്പെ​ടുന്ന ഒന്നാണ്‌.”a എന്നിട്ടത്‌ ഇങ്ങനെ കൂട്ടി​ച്ചേർക്കു​ന്നു: “വാട്ടർഗേറ്റ്‌ സംഭവം 1970-കളിലെ ഭാഷയു​ടെ​മേൽ ശക്തമായ ഒരു മുദ്ര പതിപ്പി​ച്ചു. ആ പദം പലതരം പദസൃ​ഷ്ടി​കൾക്ക്‌ ഇടയാക്കി. കൂടാതെ, കുംഭ​കോ​ണ​ത്തെ​യോ അഴിമ​തി​യെ​യോ സൂചി​പ്പി​ക്കു​ന്ന​തി​നാ​യി ഇംഗ്ലീ​ഷിൽ പദങ്ങളു​ടെ ഒടുവിൽ -ഗേറ്റ്‌ എന്ന്‌ ചേർത്തു​പ​യോ​ഗി​ക്കാ​നും തുടങ്ങി.”

നിയമം ഉയർത്തി​പ്പി​ടി​ക്കു​ന്ന​തിൽ മാതൃ​ക​ക​ളാ​യി​രി​ക്കേ​ണ്ട​വ​രു​ടെ ഇടയിൽപ്പോ​ലും കുറ്റകൃ​ത്യം വ്യാപ​ക​മാ​ണെന്ന്‌ അതിനു​ശേഷം അനേകം വാട്ടർഗേ​റ്റു​കൾ പ്രകട​മാ​ക്കി​യി​രി​ക്കു​ന്നു. ജപ്പാനിൽ രാഷ്‌ട്രീയ അഴിമതി വളരെ വ്യാപ​ക​മാ​യി​ത്തീർന്ന​തി​നാൽ അതിനെ ചെറു​ക്കു​ന്ന​തിന്‌ 1990-കളുടെ ആരംഭ​ത്തിൽ പുതിയ നിയമങ്ങൾ പാസ്സാ​ക്കേ​ണ്ടി​വന്നു. 1992-ൽ ബ്രസീ​ലി​ലെ പ്രസി​ഡൻറി​നെ അഴിമതി ആരോ​പ​ണ​ങ്ങ​ളു​ടെ പേരിൽ താഴെ​യി​റക്കി.

മാതാ​പി​താ​ക്കൾ, സ്‌കൂ​ള​ധ്യാ​പകർ, നിയമ​പാ​ലകർ എന്നിവ​രുൾപ്പെടെ അധികാ​ര​സ്ഥാ​ന​ങ്ങ​ളി​ലി​രി​ക്കു​ന്ന​വ​രു​ടെ തെറ്റായ പ്രവർത്ത​നങ്ങൾ സാധാ​ര​ണ​ജ​ന​ങ്ങളെ കുറ്റകൃ​ത്യ​ത്തി​നു പ്രേരി​പ്പി​ക്കു​ന്ന​തിൽ ഗണ്യമായ പങ്കു വഹിക്കു​ന്നു​വെ​ന്നതു സ്‌പഷ്ട​മല്ലേ?

ഉദ്ദേശ്യ​ശു​ദ്ധി മാത്രം പോരാ

ഗവൺമെൻറു​കൾ കുറ്റകൃ​ത്യ​ത്തെ തുടച്ചു​നീ​ക്കാൻ ആഗ്രഹി​ക്കു​ന്നു​വെ​ന്ന​തി​നോട്‌ മിക്കയാ​ളു​ക​ളും യോജി​ക്കും. എന്നാൽ, ഉദ്യോ​ഗ​ത്തിൽനി​ന്നു വിരമിച്ച ഒരു അധികാ​രി തന്റെ രാജ്യ​ത്തെ​ക്കു​റിച്ച്‌ ഇങ്ങനെ പറഞ്ഞു: “നീതി​യ​ന്ത്രത്തെ വേഗത്തി​ലും ഫലപ്ര​ദ​മാ​യും പ്രവർത്തി​പ്പി​ക്കു​ന്ന​തിന്‌ ഗവൺമെൻറ്‌ വളരെ കുറച്ചേ ചെയ്‌തി​ട്ടു​ള്ളൂ. വേണ്ടത്ര ജഡ്‌ജി​മാ​രില്ല, അതു​കൊണ്ട്‌ നമുക്കുള്ള കുറച്ചു​പേർ അത്യധ്വാ​നം ചെയ്‌തി​രി​ക്കു​ന്നു. പൊലീ​സി​ലാ​ണെ​ങ്കിൽ വേണ്ടത്ര ജോലി​ക്കാ​രും സജ്ജീക​ര​ണ​ങ്ങ​ളും ഇല്ല. പൊലീ​സു​കാർക്ക്‌ ചില​പ്പോൾ സമയത്ത്‌ ശമ്പളം കിട്ടു​ന്നില്ല. അതു​കൊണ്ട്‌ കൈക്കൂ​ലി വാങ്ങു​ന്ന​തിന്‌ അവർക്ക്‌ വളരെ​യ​ധി​കം പ്രലോ​ഭനം തോന്നു​ന്നു.”

“സംഘടിത കുറ്റകൃ​ത്യ​ത്തെ കൈകാ​ര്യം ചെയ്യു​ന്ന​തി​ലുള്ള രാഷ്‌ട്ര​ത്തി​ന്റെ അപ്രാ​പ്‌തി”യെക്കു​റിച്ച്‌ ഇറ്റാലി​യൻ മാഗസി​നായ ലാ ചിവിൽറ്റാ കാറ്റോ​ലി​ക്കാ വിലപി​ക്കു​ന്നു. എന്നിട്ടത്‌ ഇങ്ങനെ പറയുന്നു: “കുറ്റകൃ​ത്യ​ത്തോ​ടു പോരാ​ടു​ന്ന​തിൽ നിയമ​പാ​ലക ഏജൻസി​കൾക്കും നീതി​ന്യാ​യ​വ​കു​പ്പി​നു​മുള്ള പ്രതി​ബദ്ധത അംഗീ​ക​രി​ക്ക​പ്പെ​ടു​ന്നു, എന്നാൽ അത്‌ സംഘടിത കുറ്റകൃ​ത്യ​ത്തി​ന്റെ​മേൽ യാതൊ​രു ഫലവും ഉളവാ​ക്കു​ന്നില്ല എന്നത്‌ പ്രകട​മാണ്‌; പ്രത്യുത, അതിന്റെ ആക്കവും ശക്തിയും കൂടി​വ​രി​ക​യാണ്‌.”

കുറ്റകൃ​ത്യ​ത്തോ​ടു പോരാ​ടുന്ന കാര്യ​ത്തിൽ ഗവൺമെൻറു​കൾക്ക്‌ ഉദ്ദേശ്യ​ശു​ദ്ധി​യു​ണ്ടാ​യ​തു​കൊണ്ട്‌ മതിയാ​കു​ന്നില്ല എന്നതു വ്യക്തം. കുടി​യേ​റ്റ​ത്തി​ന്റെ​യും നീതി​ന്യാ​യ കാര്യ​ങ്ങ​ളു​ടെ​യും യൂറോ​പ്യൻ കമ്മീഷ​ണ​റായ ആനീറ്റ ഗ്രാഡിൻ ഉചിത​മാ​യി​ത്തന്നെ പിൻവ​രു​ന്ന​പ്ര​കാ​രം അഭി​പ്രാ​യ​പ്പെട്ടു: “മയക്കു​മ​രു​ന്നു കള്ളക്കടത്ത്‌, മയക്കു​മ​രു​ന്നു വ്യാപാ​രം, വിദേ​ശി​കളെ അനധി​കൃ​ത​മാ​യി ഒരു രാജ്യ​ത്തേക്കു കടത്തു​ന്നത്‌, നിയമ​വി​രു​ദ്ധ​മായ കുടി​യേറ്റം, സംഘടിത കുറ്റകൃ​ത്യം, വഞ്ചന, അഴിമതി എന്നിവ​യ്‌ക്കെ​തി​രെ സഹകരി​ച്ചു പോരാ​ടു​ന്ന​തിന്‌ നമുക്ക്‌ കൂടുതൽ മെച്ചവും ഫലപ്ര​ദ​വു​മായ പ്രവർത്തന രീതികൾ ആവശ്യ​മാണ്‌.”

നിയമാ​ധി​കാ​രി​കൾ എത്ര​ത്തോ​ളം പ്രതി​ജ്ഞാ​ബ​ദ്ധ​രാണ്‌?

കുറ്റകൃ​ത്യ​ത്തോ​ടു പോരാ​ടു​ന്ന​തിൽ വാസ്‌ത​വ​ത്തിൽ അധികാ​രി​കൾ എത്ര​ത്തോ​ളം പ്രതി​ജ്ഞാ​ബ​ദ്ധ​രാ​ണെ​ന്നതു സംബന്ധിച്ച്‌ ചിലർ സംശയം പ്രകടി​പ്പി​ക്കു​ന്നു. എല്ലാവ​രും കുറഞ്ഞ​പക്ഷം പരസ്യ​മാ​യി​ട്ടെ​ങ്കി​ലും “അഴിമ​തി​യെ​യും സാമ്പത്തിക കുറ്റകൃ​ത്യ​ങ്ങ​ളെ​യും കുറ്റം​വി​ധി​ക്കു​ന്നു”വെന്ന്‌ ഒരു രാജ്യത്തെ മുൻ പൊലീസ്‌ ഇൻസ്‌പെക്ടർ ജനറൽ പറയുന്നു. എന്നാൽ, കുറ്റകൃ​ത്യ​ത്തെ​യും അഴിമ​തി​യെ​യും നിർമാർജ​നം​ചെ​യ്യാ​നുള്ള യഥാർഥ ആഗ്രഹം എല്ലാവർക്കു​മി​ല്ലെന്ന്‌ അദ്ദേഹം പറയുന്നു. കൈക്കൂ​ലി, വഞ്ചന, മോഷണം എന്നിവയെ മുന്നേ​റു​ന്ന​തി​നുള്ള സ്വീകാ​ര്യ മാർഗ​ങ്ങ​ളാ​യി പ്രത്യ​ക്ഷ​ത്തിൽ വീക്ഷി​ക്കുന്ന നിയമാ​ധി​കാ​രി​കൾ ഉൾപ്പെ​ടെ​യുള്ള ആളുക​ളു​ടെ എണ്ണം വർധി​ച്ചു​വ​രു​ക​യാണ്‌.

ഒരു കസ്റ്റംസ്‌ ഓഫീസർ പറഞ്ഞതു​പോ​ലെ, “കുറ്റകൃ​ത്യ​ങ്ങൾ ചെയ്യുന്ന” പലരും “ശിക്ഷകൂ​ടാ​തെ രക്ഷപ്പെ​ടു​ന്നത്‌” നിസ്സം​ശ​യ​മാ​യും കുറ്റകൃ​ത്യം വർധി​ച്ചു​വ​രു​ന്ന​തി​നുള്ള ഒരു കാരണ​മാണ്‌. ഉദാഹ​ര​ണ​ത്തിന്‌, ഒരു റഷ്യൻ പ്രസി​ദ്ധീ​ക​രണം “കുറ്റവാ​ളി​കൾ ശിക്ഷ ലഭിക്കാ​തെ വളരെ എളുപ്പ​ത്തിൽ രക്ഷപ്പെ​ട്ടു​പോ​കു​ന്നതി”നെക്കു​റിച്ച്‌ പറഞ്ഞിട്ട്‌ ഇങ്ങനെ കൂട്ടി​ച്ചേർക്കു​ന്നു: ഇത്‌ “അങ്ങേയറ്റം മൃഗീ​യ​മായ കുറ്റകൃ​ത്യ​ങ്ങൾ ചെയ്യാൻ സാധാരണ പൗരൻമാർക്കു പ്രചോ​ദനം നൽകു​ന്ന​താ​യി തോന്നു​ന്നു.” ഏതാണ്ട്‌ 3,000 വർഷം മുമ്പ്‌ ബൈബി​ളെ​ഴു​ത്തു​കാ​രൻ പ്രസ്‌താ​വി​ച്ച​തി​നോട്‌ തികച്ചും ചേർച്ച​യി​ലാണ്‌ ഇത്‌: “ദുഷ്‌പ്ര​വൃ​ത്തി​ക്കുള്ള ശിക്ഷാ​വി​ധി തൽക്ഷണം നടക്കാ​യ്‌ക​കൊ​ണ്ടു മനുഷ്യർ ദോഷം ചെയ്‌വാൻ ധൈര്യ​പ്പെ​ടു​ന്നു.”—സഭാ​പ്ര​സം​ഗി 8:11.

ഗവൺമെൻറു​കൾ കുറ്റകൃ​ത്യ​ത്തി​നെ​തി​രെ​യുള്ള പോരാ​ട്ട​ത്തിൽ പരാജ​യ​മ​ട​യു​ക​യാ​ണെന്നു പറഞ്ഞാൽ അത്‌ അതിശ​യോ​ക്തി​യല്ല. ജർമൻ പത്രമായ റൈനി​ഷെർ മെർകൂർ ഇങ്ങനെ അഭി​പ്രാ​യ​പ്പെ​ടു​ന്നു: “അക്രമാ​സ​ക്ത​മായ കുറ്റകൃ​ത്യ​ങ്ങ​ളു​ടെ വർധന​വി​നെ​ക്കു​റി​ച്ചുള്ള പൊതു​ജന ഭയം ആഴത്തിൽ വേരൂ​ന്നി​യ​താണ്‌. രാഷ്‌ട്രീയ പാർട്ടി​കൾക്കി​ട​യിൽ സാധാരണ നടക്കുന്ന ചേരി​പ്പോ​രോ സ്ഥിതി​വി​ശേഷം വിചാ​രി​ക്കുന്ന അത്രയും മോശമല്ല എന്നു സൂചി​പ്പി​ക്കുന്ന സ്ഥിതി​വി​വ​ര​ക്ക​ണ​ക്കു​ക​ളോ അതിനെ ലഘൂക​രി​ക്കു​ക​യില്ല.”

കുറ്റകൃ​ത്യം, വിചാ​രി​ക്കുന്ന അത്രയും രൂക്ഷമല്ല എന്നതി​നെ​ക്കാൾ മറിച്ചാ​യി​രി​ക്കാ​നാണ്‌ കൂടുതൽ സാധ്യത. എങ്കിലും ശുഭാ​പ്‌തി​വി​ശ്വാ​സ​ത്തി​നി​ട​മുണ്ട്‌. കുറ്റകൃ​ത്യ​മി​ല്ലാത്ത ഒരു ലോകം എന്നത്തേ​തി​ലും സമീപ​മാണ്‌. നിങ്ങൾക്ക്‌ അതു കാണുക സാധ്യ​മാ​യേ​ക്കാം. എന്തു​കൊ​ണ്ടാണ്‌ ഞങ്ങൾ അങ്ങനെ പറയു​ന്ന​തെന്ന്‌ അടുത്ത ലേഖനം ചർച്ച​ചെ​യ്യും.

[അടിക്കു​റിപ്പ്‌]

[6-ാം പേജിലെ ആകർഷ​ക​വാ​ക്യം]

അനേകരും മുന്നേ​റു​ന്ന​തി​നുള്ള ഒരു സ്വീകാ​ര്യ മാർഗ​മാ​യി കുറ്റകൃ​ത്യ​ത്തെ വീക്ഷി​ക്കു​ന്നു

[5-ാം പേജിലെ ചതുരം]

അക്രമം നിറഞ്ഞ ഒരു ഭൂമി

ബ്രസീൽ: “അക്രമ​ത്തി​ന്റെ വർധി​ച്ചു​വ​രുന്ന തിരത്ത​ള്ള​ലിൽ പ്രതി​ഷേ​ധി​ച്ചു​കൊണ്ട്‌, തങ്ങളുടെ നഗരത്തെ പിടി​ച്ച​ട​ക്കി​യി​രി​ക്കുന്ന കുറ്റകൃ​ത്യ​ത്തിൽ ഭയവും കോപ​വും പ്രകടി​പ്പി​ച്ചു​കൊണ്ട്‌, ലക്ഷക്കണ​ക്കി​നാ​ളു​കൾ [റിയോ ഡി ജനിറോ പട്ടണത്തി​ന്റെ] ഹൃദയ​ഭാ​ഗത്തെ തെരു​വു​ക​ളിൽ തടിച്ചു​കൂ​ടി.”—ഇന്റർനാ​ഷണൽ ഹെറാൾഡ്‌ ട്രിബ്യൂൺ.

ചൈന: “ഗുണ്ടകൾ ചൈന​യിൽ വീണ്ടും തലപൊ​ക്കു​ക​യാണ്‌. വലിയ കുറ്റകൃ​ത്യ​ങ്ങൾ അനിയ​ന്ത്രി​ത​മാ​യി​രി​ക്കു​ന്ന​താ​യി കാണ​പ്പെ​ടു​ന്നു. . . . കുറ്റകൃ​ത്യ​സം​ഘ​ങ്ങ​ളും ‘രഹസ്യ സമൂഹ​ങ്ങ​ളും’ പൊലീ​സിന്‌ എണ്ണാൻ കഴിയു​ന്ന​തി​ലും വേഗത്തിൽ വർധി​ക്കു​ക​യാ​ണെന്ന്‌ ചൈന​യി​ലെ വിദഗ്‌ധർ പറയുന്നു.”—ദ ന്യൂ​യോർക്ക്‌ ടൈംസ്‌.

ജർമനി: “അക്രമ​ത്തി​ലേക്കു തിരി​യാ​നുള്ള സന്നദ്ധത​യ്‌ക്കും അക്രമ​ത്തിന്‌ ഒരുവനെ പ്രേരി​പ്പി​ക്കുന്ന സാഹച​ര്യ​ത്തി​നും ഇടയ്‌ക്കുള്ള വിടവ്‌ ക്രമാ​നു​ഗ​ത​മാ​യി കുറഞ്ഞു​വ​ന്നി​രി​ക്കു​ന്നു. അതു​കൊണ്ട്‌, അക്രമം ഒരു ദൈനം​ദിന സംഭവ​മാ​യി​ത്തീർന്നി​രി​ക്കു​ന്നത്‌ അതിശ​യ​ക​രമല്ല.”—റൈനി​ഷെർ മെർകൂർ.

ഗ്രേറ്റ്‌ ബ്രിട്ടൻ: “ആളുക​ളി​പ്പോൾ കൂടുതൽ എളുപ്പ​ത്തിൽ അക്രമ​ത്തി​ലേക്കു തിരി​യു​ന്നു. അപരാധി മറ്റേ​തൊ​രു മാർഗ​വും അവലം​ബി​ക്കു​ന്ന​തി​നു മുമ്പെ അക്രമ​ത്തി​ലേക്കു തിരി​യു​ന്ന​തി​നുള്ള സാധ്യത വർധി​ച്ചു​വ​രി​ക​യാണ്‌.”—ദി ഇൻഡി​പ്പെൻഡൻറ്‌.

അയർലൻഡ്‌: “മാഫിയ സ്റ്റൈലി​ലുള്ള കുറ്റകൃ​ത്യ​സം​ഘങ്ങൾ ഡബ്ലിന്റെ ഉൾഭാ​ഗ​ത്തും ഏറെ ദരി​ദ്ര​മായ അതിന്റെ പടിഞ്ഞാ​റൻ പ്രാന്ത​പ്ര​ദേ​ശ​ങ്ങ​ളി​ലും വേരു​പി​ടി​ച്ചി​രി​ക്കു​ന്നു. കുറ്റകൃ​ത്യ​സം​ഘങ്ങൾ കൂടുതൽ സായു​ധ​രാ​യി​ത്തീർന്നു​കൊ​ണ്ടി​രി​ക്കു​ന്നു.”—ദി ഇക്കണോ​മിസ്റ്റ്‌.

മെക്‌സിക്കോ: “വളരെ ഹ്രസ്വ​മായ കാലഘ​ട്ടം​കൊണ്ട്‌ കുറ്റകൃ​ത്യം ഞെട്ടി​ക്കും​വി​ധം ശീഘ്ര​മാ​യി വർധി​ച്ചി​രി​ക്കു​ന്നു.”—ദ വാൾ സ്‌ട്രീറ്റ്‌ ജേർണൽ.

നൈജീരിയ: “പൊലീസ്‌ വക്താവായ ശ്രീ. ഫ്രാങ്ക്‌ ഓഡിറ്റ പറയു​ന്ന​ത​നു​സ​രിച്ച്‌, കുടും​ബം, ദേവാ​ല​യങ്ങൾ, മുസ്ലീം​പ​ള്ളി​കൾ, സ്‌കൂ​ളു​കൾ, ക്ലബ്ബുകൾ എന്നിവ കുറ്റകൃ​ത്യ​ത്തിൽനി​ന്നു യുവജ​ന​ങ്ങളെ തടയുക എന്ന അവയുടെ കർത്തവ്യ​ത്തിൽ പരാജ​യ​മ​ട​ഞ്ഞി​രി​ക്കു​ന്നു.”—ഡെയ്‌ലി ചാമ്പ്യൻ.

ഫിലിപ്പീൻസ്‌: “തങ്ങൾക്ക്‌ വീട്ടി​ലോ തെരു​വി​ലോ സുരക്ഷി​ത​ത്വം തോന്നു​ന്നി​ല്ലെന്ന്‌ ഫിലി​പ്പീൻസി​ലെ ഓരോ പത്തു കുടും​ബ​ങ്ങ​ളി​ലും ആറു വീതം പറയുന്നു.”—ഏഷ്യാ​വീക്ക്‌.

റഷ്യ: “സോവി​യറ്റ്‌ നാളു​ക​ളിൽ ലോക​ത്തി​ലെ ഏറ്റവും സുരക്ഷി​ത​മായ നഗരങ്ങ​ളി​ലൊ​ന്നാ​യി​രു​ന്ന​തി​നെ മാഫിയ സമാന കുറ്റകൃ​ത്യ​സം​ഘങ്ങൾ ഫലത്തിൽ ഒരു കുറ്റകൃ​ത്യ​കേ​ന്ദ്ര​മാ​ക്കി​ത്തീർത്തി​രി​ക്കു​ന്നു. . . . ‘ഞാൻ 17 വർഷമാ​യി റോന്തു​ചു​റ്റു​ന്നെ​ങ്കി​ലും,’ പൊലീസ്‌ ലെഫ്‌റ്റെ​നൻറ്‌ ഗെനാഡി ഗ്രോ​ഷി​കോവ്‌ പറയുന്നു, ‘മോസ്‌കോ​യിൽ ഇത്രയ​ധി​കം കുറ്റകൃ​ത്യം ഞാൻ ഒരിക്ക​ലും കണ്ടിട്ടില്ല. ഇത്രയും ദുഷ്ടത​യും ഞാൻ കണ്ടിട്ടില്ല.’”—ടൈം.

ദക്ഷിണാഫ്രിക്ക: “കടിഞ്ഞാ​ണി​ല്ലാത്ത, ഫലത്തിൽ അനിയ​ന്ത്രി​ത​മായ അക്രമം ഞങ്ങളെ ഓരോ​രു​ത്ത​രെ​യും, ഞങ്ങൾ ചെയ്യുന്ന ഓരോ കാര്യ​ത്തെ​യും ഭീഷണി​പ്പെ​ടു​ത്തു​ന്നു—കാര്യ​മാ​യി​ട്ടെ​ന്തെ​ങ്കി​ലും ചെയ്‌തേ പറ്റൂ.”—ദ സ്റ്റാർ.

തായ്‌വാൻ: “തായ്‌വാ​നിൽ . . . വർധി​ച്ചു​വ​രുന്ന കൊള്ള​യും ആക്രമ​ണ​ങ്ങ​ളും കൊല​പാ​ത​ക​ങ്ങ​ളും അറിയാ​തെ​തന്നെ സമൂഹ​ത്തി​ന്റെ ഭാഗമാ​യി​ത്തീർന്നി​രി​ക്കു​ന്നു . . . തീർച്ച​യാ​യും, കുറ്റകൃ​ത്യ നിരക്കു​കൾ ക്രമേണ വർധി​ച്ചു​വ​രി​ക​യാണ്‌. ചില കേസു​ക​ളിൽ അവ പാശ്ചാത്യ രാജ്യ​ങ്ങ​ളു​ടേ​തി​നെ കടത്തി​വെ​ട്ടു​ന്നു.”—ദ ന്യൂ​യോർക്ക്‌ ടൈംസ്‌.

ഐക്യനാടുകൾ: “യു.എസ്‌. ആണ്‌ വ്യവസാ​യ​വ​ത്‌കൃത ലോക​ത്തി​ലെ ഏറ്റവും അക്രമാ​സ​ക്ത​മായ രാഷ്‌ട്രം. . . . മറ്റൊരു വ്യവസാ​യ​വ​ത്‌കൃത രാഷ്‌ട്ര​വും അതിന്റെ അടു​ത്തെ​ങ്ങു​മെ​ത്തില്ല.”—ടൈം.