കാർണി​യോ​ളൻ തേനീ​ച്ചകൾ തിര​ക്കൊ​ഴി​യാത്ത ജോലി​ക്കാർ

സ്ലോവേനിയയിലെ ഉണരുക! ലേഖകൻ

തേനീ​ച്ചകൾ പൊതു​വേ കഠിനാ​ധ്വാ​നി​ക​ളാണ്‌. എന്നിരു​ന്നാ​ലും, അവയിൽ ഒരിനം ഈ കാര്യ​ത്തിൽ വിശേ​ഷി​ച്ചും പ്രസിദ്ധി ആർജി​ച്ചി​ട്ടുണ്ട്‌. അവയാണ്‌ കാർണി​യോ​ളൻ തേനീ​ച്ചകൾ.a ഇപ്പോ​ഴത്തെ പടിഞ്ഞാ​റൻ സ്ലോ​വേ​നി​യ​യി​ലെ കാർണി​യോള ജില്ലയു​ടെ പേരി​ലാണ്‌ ഈ തേനീച്ച അറിയ​പ്പെ​ടു​ന്നത്‌. ആദ്യ​മൊ​ക്കെ, ഇവയെ ബാൾക്കൻ ഉപദ്വീ​പിൽ ഉടനീ​ള​വും അങ്ങു വടക്കു സ്ഥിതി​ചെ​യ്യുന്ന കാർപ്പാ​ത്തി​യൻ പർവതങ്ങൾ വരെയുള്ള പ്രദേ​ശ​ത്തും മാത്ര​മാണ്‌ കാണാൻ കഴിഞ്ഞി​രു​ന്നത്‌. എന്നാൽ, ഇന്ന്‌ തേനീ​ച്ച​വ​ളർത്ത​ലു​കാ​രു​ടെ ഇഷ്ടയി​ന​മായ കാർണി​യോ​ളൻ തേനീ​ച്ച​യു​ടെ കീർത്തി​ക്കൊ​പ്പം ഈ തേനീ​ച്ച​കൾത​ന്നെ​യും ഗോള​ത്തി​ന്റെ നാലു​കോ​ണി​ലും എത്തിയി​രി​ക്കു​ന്നു.

കാർണി​യോ​ളൻ തേനീ​ച്ച​യ്‌ക്ക്‌ ഇത്ര പ്രശസ്‌തി നേടി​ക്കൊ​ടു​ത്തി​രി​ക്കു​ന്നത്‌ എന്താണ്‌? ഒന്നാന്തരം തേൻ വൻതോ​തിൽ ഉത്‌പാ​ദി​പ്പി​ക്കു​ന്ന​തി​നു പുറമേ ഇവ രോഗ​ത്തോ​ടും തണുത്ത കാലാ​വ​സ്ഥ​യോ​ടും അങ്ങേയറ്റം പ്രതി​രോ​ധ​ശേഷി ഉള്ളവയാണ്‌. അതു​പോ​ലെ ഇക്കൂട്ടർ ശാന്തസ്വ​ഭാ​വി​ക​ളും അക്രമ​വാ​സന ഇല്ലാത്ത​വ​യു​മാണ്‌. ആദ്യ കോള​നി​യിൽനിന്ന്‌ പിരി​ഞ്ഞു​പോ​യി പുതിയ കോള​നി​കൾ സ്ഥാപി​ക്കാ​നുള്ള ഇതിന്റെ ചായ്‌വ്‌ വൻതോ​തി​ലുള്ള തേനീ​ച്ച​വ​ളർത്തൽ കൂടുതൽ ബുദ്ധി​മു​ട്ടാ​ക്കി​ത്തീർക്കുന്ന ഒരു ഘടകമാ​ണെ​ങ്കി​ലും നിർധാ​രണ പ്രജന​ന​ത്തി​ലൂ​ടെ (selective breeding) ഈ പ്രവണത കുറയ്‌ക്കാൻ കഴിഞ്ഞി​ട്ടുണ്ട്‌. എന്നാൽ കാർണി​യോ​ളൻ തേനീ​ച്ചകൾ തിരക്കി​ന്റെ കാര്യ​ത്തിൽ മറ്റു തേനീ​ച്ച​കളെ കടത്തി​വെ​ട്ടു​ന്ന​താ​യി പറയു​ന്നത്‌ എന്തു​കൊ​ണ്ടാണ്‌? ഇവ രാവിലെ മറ്റു തേനീ​ച്ച​ക​ളെ​ക്കാൾ നേര​ത്തേ​തന്നെ കൂട്ടിൽനി​ന്നു പുറത്തു​പോ​യി ജോലി തുടങ്ങു​ന്നു എന്നതാണ്‌ ഒരു സംഗതി. അതിനാൽ, തേൻ ഉത്‌പാ​ദ​ന​ത്തി​നാ​യി അവയ്‌ക്കു കൂടുതൽ പൂന്തേൻ—വളരെ ദൂരെ​നി​ന്നു​ള്ള​തു​പോ​ലും—കൂട്ടിൽ എത്തിക്കു​ന്ന​തി​നുള്ള സമയം കിട്ടുന്നു.

“തേനീ​ച്ച​വ​ളർത്ത​ലു​കാ​രു​ടെ ഒരു ജനത”

സ്ലോ​വേ​നി​യ​യ്‌ക്ക്‌ തേനീ​ച്ച​വ​ളർത്ത​ലി​ന്റെ സുദീർഘ​വും രസകര​വു​മായ ഒരു ചരി​ത്ര​മുണ്ട്‌. സ്ലോ​വേ​നി​യ​യി​ലെ ഒരു ജീവശാ​സ്‌ത്ര​ജ്ഞ​നായ യാനെസ്‌ ഗ്രി​ഗൊ​റി തന്റെ നാട്ടു​കാ​രെ “തേനീ​ച്ച​വ​ളർത്ത​ലു​കാ​രു​ടെ ഒരു ജനത” എന്നു​പോ​ലും വിളി​ക്കു​ക​യു​ണ്ടാ​യി. വാസ്‌ത​വ​ത്തിൽ, വിദഗ്‌ധ​രായ തേനീ​ച്ച​വ​ളർത്ത​ലു​കാ​രെന്ന നിലയിൽ പൊതു​യു​ഗം (പൊ.യു.) എട്ടാം നൂറ്റാ​ണ്ടിൽത്തന്നെ സ്ലോ​വേ​നി​യ​ക്കാർ പേരെ​ടു​ത്തി​രു​ന്നു. അന്നുമു​തൽ 1800-കൾ വരെയുള്ള കാലഘ​ട്ട​ത്തിൽ അവരുടെ തേനീ​ച്ച​ക്കൂ​ടു​കൾ മരങ്ങളു​ടെ പൊള്ള​യായ തായ്‌ത്ത​ടി​കൾ കൊണ്ട്‌ ഉണ്ടാക്കി​യവ ആയിരു​ന്നു. ചില സ്ലോ​വേ​നി​യൻ പ്രദേ​ശ​ങ്ങ​ളിൽ ഈ കൂടുകൾ അറിയ​പ്പെ​ട്ടി​രു​ന്നത്‌ കൊരീറ്റ അഥവാ തൊട്ടി​കൾ എന്നാണ്‌. എന്നിരു​ന്നാ​ലും, 15-ാം നൂറ്റാ​ണ്ടി​നോ​ട​ടുത്ത്‌ തടിമി​ല്ലു​ക​ളു​ടെ ആഗമന​ത്തോ​ടെ പഴയ മരത്തൊ​ട്ടി​കൾ, പലകകൾകൊ​ണ്ടു നിർമിച്ച കൂടു​കൾക്കു വഴിമാ​റാൻ തുടങ്ങി. ഈ കൂടു​ക​ളു​ടെ ദീർഘ​ച​തു​രാ​കൃ​തി നിമിത്തം തമാശ​രൂ​പേണ ഇവയെ ട്രൂഗെ അഥവാ ശവപ്പെട്ടി എന്നു വിളി​ച്ചി​രു​ന്നു.

തേൻ, മെഴുക്‌ എന്നിവ​യ്‌ക്കുള്ള ആവശ്യം ഏറിവ​രി​ക​യും തേനീ​ച്ച​വ​ളർത്തൽ വളരെ സാമ്പത്തിക പ്രാധാ​ന്യം കൈവ​രി​ക്കു​ക​യും ചെയ്‌തു. ദേശത്തെ ഭരണാ​ധി​കാ​രി​കൾപോ​ലും ഇതിൽ താത്‌പ​ര്യ​മെ​ടു​ക്കു​ക​യും തേനീ​ച്ച​വ​ളർത്ത​ലിൽ ഏർപ്പെ​ടു​ന്ന​തി​നുള്ള കുത്തകാ​വ​കാ​ശം തങ്ങൾക്ക്‌ ഇഷ്ടപ്പെട്ട ചില വ്യക്തി​കൾക്കു നൽകു​ക​യും ചെയ്‌തു. ഭരണാ​ധി​കാ​രി​കൾക്ക്‌ ഇതിൽ താത്‌പ​ര്യ​മു​ണ്ടാ​യി​രു​ന്നത്‌ എന്തു​കൊ​ണ്ടാ​ണെന്നു മനസ്സി​ലാ​ക്കാ​വു​ന്ന​തേ​യു​ള്ളൂ, കാരണം മെഴു​കു​തി​രി ഉത്‌പാ​ദി​പ്പി​ക്കു​ന്ന​തി​നു മെഴുക്‌ ആവശ്യ​മാ​യി​രു​ന്നു, പ്രത്യേ​കി​ച്ചും പള്ളിക​ളി​ലും സന്ന്യാസി മഠങ്ങളി​ലും ഉപയോ​ഗി​ക്കു​ന്ന​തിന്‌. കൂടാതെ ഭക്ഷണസാ​ധ​ന​ങ്ങ​ളിൽ മധുര​ത്തി​നാ​യി ചേർക്കാൻ അക്കാലത്തു ലഭ്യമായ ഏക വസ്‌തു തേൻ ആയിരു​ന്നു. 1500-കളിൽ കാർഷിക വിളയെന്ന നിലയി​ലുള്ള ബക്ക്‌വീ​റ്റി​ന്റെ ആഗമനം തേനീ​ച്ച​കൾക്ക്‌ ഒരു ശരത്‌കാല ഭക്ഷ്യക​ലവറ തുറന്നു. തത്‌ഫ​ല​മാ​യി തേൻ ഉത്‌പാ​ദനം പിന്നെ​യും കുതി​ച്ചു​യർന്നു. അധികം താമസി​യാ​തെ, കാർണി​യോ​ള​യിൽനി​ന്നു തേനും മെഴു​കും വലിയ തോതിൽ കയറ്റു​മതി ചെയ്യാൻ തുടങ്ങി. 1600-കളുടെ മധ്യ​ത്തോ​ടെ കാർണി​യോള, വർഷം തോറും ഓസ്‌ട്രി​യ​യി​ലെ സാൽസ്‌ബർഗി​ലേക്കു മാത്ര​മാ​യി “ആയിര​ക്ക​ണ​ക്കിന്‌ ക്വിന്റൽ” തേൻ കയറ്റി അയച്ചി​രു​ന്നു എന്നു 17-ാം നൂറ്റാ​ണ്ടി​ലെ ഒരു കാർണി​യോ​ളൻ പണ്ഡിത​നായ വാർവാ​സോർ റിപ്പോർട്ടു ചെയ്യു​ക​യു​ണ്ടാ​യി.b

കാർണി​യോ​ളൻ തേനീ​ച്ച​യു​ടെ കീർത്തി പരക്കുന്നു

വർഷങ്ങ​ളി​ലൂ​ടെ, തേനീ​ച്ച​വ​ളർത്ത​ലി​ന്റെ ശാസ്‌ത്രീ​യ​വും കലാപ​ര​വു​മായ മേഖല​ക​ളി​ലേക്ക്‌ കാർണി​യോള പ്രധാ​ന​പ്പെട്ട ഒട്ടനവധി സംഭാ​വ​നകൾ നൽകി​യി​ട്ടുണ്ട്‌. വർഷങ്ങൾക്കു മുമ്പു​തന്നെ, അതായത്‌ 1770-ൽ, ചക്രവർത്തി​നി മരിയ തെരേസ അപ്പർ കാർണി​യോ​ള​യി​ലെ ഒരു തദ്ദേശ​വാ​സി​യായ ആന്റൺ യാൻഷാ​യെ, ഓസ്‌ട്രി​യ​യി​ലെ വിയന്ന​യിൽ തേനീ​ച്ച​വ​ളർത്തൽ പരിശീ​ലി​പ്പി​ക്കു​ന്ന​തി​നു പുതു​താ​യി സ്ഥാപിച്ച പരിശീ​ല​ന​സ്‌കൂ​ളി​ലേക്ക്‌ ആദ്യത്തെ അധ്യാ​പ​ക​നാ​യി നിയമി​ക്കു​ക​യു​ണ്ടാ​യി. 1800-കളുടെ അവസാ​ന​ത്തോ​ടെ, പ്രതി​കൂ​ല​സാ​ഹ​ച​ര്യ​ങ്ങളെ ചെറു​ത്തു​നിൽക്കാൻ കഴിവുള്ള കാർണി​യോ​ളൻ തേനീ​ച്ച​കൾക്ക്‌ പല പ്രദേ​ശ​ങ്ങ​ളി​ലു​മുള്ള തേനീ​ച്ച​വ​ളർത്ത​ലു​കാ​രു​ടെ ആവശ്യ​ങ്ങൾക്കൊത്ത്‌ ഉയരാൻ കഴിയു​മെന്നു തേനീച്ച ഗവേഷകർ തിരി​ച്ച​റി​ഞ്ഞു. ഈ കാലഘ​ട്ട​ത്തി​ലാണ്‌ കാർണി​യോ​ളൻ തേനീ​ച്ച​കൾക്ക്‌ ഈ പേരു ലഭിച്ച​തും ഇവ ലോക​മൊ​ട്ടാ​കെ വ്യാപി​ക്കാൻ തുടങ്ങി​യ​തും. വാസ്‌ത​വ​ത്തിൽ, 20-ാം നൂറ്റാ​ണ്ടി​ന്റെ പ്രാരം​ഭ​ത്തോ​ടെ കാർണി​യോ​ള​യിൽനിന്ന്‌, “ചരക്കു​തീ​വ​ണ്ടി​കൾ നിറയെ തേനീ​ച്ച​ക്കൂ​ടു​കൾ” മറ്റു സ്ഥലങ്ങളി​ലേക്കു കയറ്റി അയയ്‌ക്കാൻ തുടങ്ങി​യി​രു​ന്നു, കാർണി​യോ​ളൻ തേനീ​ച്ച​യു​ടെ ഒരു കുടും​ബം അടങ്ങി​യ​താ​യി​രു​ന്നു ഓരോ കൂടും.

ഇതേ കാലഘ​ട്ട​ത്തിൽത്ത​ന്നെ​യാണ്‌ പലകകൾകൊ​ണ്ടുള്ള പരമ്പരാ​ഗത തേനീ​ച്ച​ക്കൂ​ടിന്‌ ക്രാൻയിക്ക്‌ അഥവാ “കാർണി​യോ​ളൻ തേനീ​ച്ച​ക്കൂട്‌” എന്ന പേരു കിട്ടി​യത്‌. ഒരിക്കൽ അവയിൽ ഉണ്ടായി​രുന്ന അനന്യ​സാ​ധാ​ര​ണ​മായ ചിത്ര​ക​ല​യാണ്‌ ക്രാൻയിക്ക്‌ കൂടു​കൾക്കു വിശേ​ഷാൽ കൗതുകം പകരു​ന്നത്‌. (26-ാം പേജിലെ “തേനീ​ച്ച​ക്കൂ​ടി​ന്മേ​ലുള്ള പെയി​ന്റി​ങ്ങു​കൾ” എന്ന ചതുരം കാണുക.) ഇന്ന്‌ സ്ലോ​വേ​നി​യ​യിൽ 7,000-ലേറെ തേനീ​ച്ച​വ​ളർത്ത​ലു​കാർ 1,60,000-ത്തിലധി​കം തേനീ​ച്ച​ക്കൂ​ടു​കൾ പരിപാ​ലി​ക്കു​ന്നു. റഡോ​വ്‌ല്യട്‌സ പട്ടണത്തിൽ, സ്ലോ​വേ​നി​യ​യി​ലെ തേനീ​ച്ച​വ​ളർത്ത​ലി​ന്റെ ചരി​ത്ര​ത്തി​നു സമർപ്പി​ക്ക​പ്പെ​ട്ടി​രി​ക്കുന്ന ഒരു പ്രത്യേക തേനീ​ച്ച​വ​ളർത്തൽ മ്യൂസി​യം പോലു​മുണ്ട്‌.

ഒരു ജനപ്രിയ ചിഹ്നം

കാലങ്ങ​ളാ​യി, സ്ലോ​വേ​നി​യ​ക്കാർ തേനീ​ച്ചയെ കഠിനാ​ധ്വാ​ന​ത്തി​ന്റെ​യും പ്രാ​യോ​ഗിക ജ്ഞാനത്തി​ന്റെ​യും ചിഹ്നമാ​യി കരുതി​പ്പോ​രു​ന്നു. ഇപ്പോ​ഴത്തെ സ്ലോ​വേ​നി​യ​യിൽ 1693-ൽ സ്ഥാപി​ക്ക​പ്പെട്ട ആദ്യത്തെ ശാസ്‌ത്ര സംഘടന കഠിനാ​ധ്വാ​നി​ക​ളു​ടെ സംഘടന എന്നു വിളി​ക്ക​പ്പെട്ടു, തേനീ​ച്ച​യെ​യാണ്‌ അതിന്റെ ചിഹ്നമാ​യി തിര​ഞ്ഞെ​ടു​ത്തത്‌. അതിലെ അംഗങ്ങൾ തങ്ങളെ​ത്തന്നെ ലാറ്റി​നിൽ “തേനീ​ച്ചകൾ” എന്നർഥ​മുള്ള ആപിസ്‌ എന്നു വിളി​ക്കു​ക​പോ​ലും ചെയ്‌തു. സ്ലോ​വേ​നി​യ​ക്കാ​രെ സംബന്ധി​ച്ചി​ട​ത്തോ​ളം മിതവ്യ​യ​ത്തി​ന്റെ ഒരു ചിഹ്നമെന്ന നിലയിൽ തേനീച്ച സാമ്പത്തി​ക​ലോ​ക​ത്തും സ്ഥാനം കൈയ​ടക്കി. അക്കൗണ്ട്‌ ബുക്കിന്റെ പുറം​ച​ട്ട​യി​ലും ചില സ്ലോ​വേ​നി​യൻ നാണയ​ങ്ങ​ളു​ടെ പുറകി​ലും ഒരു തേനീ​ച്ച​യു​ടെ രൂപം കാണാൻ കഴിയും.

സ്ലോ​വേ​നി​യ​ക്കാർക്കു​തന്നെ കഠിനാ​ധ്വാ​നി​കൾ എന്ന കീർത്തി​യു​ള്ളത്‌ അവർക്ക്‌ തേനീ​ച്ച​ക​ളോട്‌ ഒരു പ്രത്യേക മമത തോന്നാൻ ഇടയാ​ക്കി​യി​ട്ടുണ്ട്‌. ഒരു സ്ലോ​വേ​നി​യൻ പഴമൊ​ഴി ഇപ്രകാ​ര​മാണ്‌, “തേനീ​ച്ച​കളെ നോക്കി അവയെ അനുക​രി​ക്കുക.” അതു​കൊണ്ട്‌ ഇനിയി​പ്പോൾ തിര​ക്കോ​ടെ പണി​യെ​ടു​ക്കുന്ന തേനീ​ച്ച​കളെ കാണു​ക​യോ അവയുടെ അധ്വാ​ന​ത്തി​ന്റെ മധുര​ഫ​ല​മായ മധു നുകരു​ക​യോ ചെയ്യു​മ്പോ​ഴെ​ല്ലാം കഠിനാ​ധ്വാ​നി​ക​ളായ കാർണി​യോ​ളൻ തേനീ​ച്ച​കളെ കുറിച്ച്‌ ഒരുപക്ഷേ നിങ്ങൾ ഓർത്തേ​ക്കാം. (g04 3/22)

[അടിക്കു​റി​പ്പു​കൾ]

[26-ാം പേജിലെ ചതുരം/ചിത്രങ്ങൾ]

തേനീച്ചക്കൂടിന്മേലുള്ള പെയി​ന്റി​ങ്ങു​കൾ

സ്ലോ​വേ​നി​യ​യിൽ സാധാരണ തേനീ​ച്ച​വ​ളർത്തൽ നടക്കു​ന്നി​ട​ങ്ങ​ളിൽ ദീർഘ​ച​തു​രാ​കൃ​തി​യി​ലുള്ള ഒരു അലമാ​ര​യി​ലെ വലിപ്പു​കൾ പോലെ തേനീ​ച്ച​ക്കൂ​ടു​കൾ ഒന്നിച്ച്‌ അടുക്കി​യി​രി​ക്കു​ന്നതു കാണാം. വലിപ്പു​ക​ളു​ടെ വീതി​കു​റഞ്ഞ ഭാഗം മുമ്പി​ലാ​യി​ട്ടാ​യി​രി​ക്കും ക്രമീ​ക​രി​ക്കുക. കൂടു​ക​ളു​ടെ മുൻവ​ശത്തെ പലകക​ളിൽ എണ്ണഛാ​യാ​ചി​ത്രങ്ങൾ രചിക്കുന്ന രീതി 1700-കളുടെ ആരംഭം മുതൽ 1900-കൾ വരെ തഴച്ചു​വ​ളർന്നി​രു​ന്നു. അനുപ​മ​മായ ഈ കലയുടെ ഏകദേശം 3,000 ഉദാഹ​ര​ണങ്ങൾ സംരക്ഷി​ക്ക​പ്പെ​ട്ടി​ട്ടു​ണ്ടെ​ങ്കി​ലും ഈ വർഷങ്ങ​ളി​ലു​ട​നീ​ളം നിർമി​ക്കു​ക​യും അലങ്കരി​ക്കു​ക​യും ചെയ്‌ത തേനീ​ച്ച​ക്കൂ​ടു​ക​ളു​ടെ എണ്ണത്തിന്റെ തീരെ ചെറിയ ശതമാ​നമേ ആകുന്നു​ള്ളൂ ഇത്‌.

പലകക​ളി​ലെ ഡി​സൈ​നു​കൾ മുഖ്യ​മാ​യും മതപര​മാണ്‌. “വിശു​ദ്ധ​ന്മാ​രു​ടെ” ചിത്ര​ങ്ങ​ളും ബൈബിൾ കഥാ ചിത്രീ​ക​ര​ണ​ങ്ങ​ളു​മൊ​ക്കെ അവയിൽ കാണാം. എന്നാൽ, മൃഗങ്ങ​ളു​ടെ​യും തങ്ങളുടെ തൊഴി​ലു​ക​ളിൽ ഏർപ്പെ​ട്ടി​രി​ക്കുന്ന ജനങ്ങളു​ടെ​യും ചിത്ര​ങ്ങ​ളും അതോ​ടൊ​പ്പം ഭാവനാ​ദീ​പ്‌ത​വും നർമരസം കലർന്ന​തു​മായ പല രംഗങ്ങ​ളും പെയി​ന്റി​ങ്ങിൽ ഉൾപ്പെ​ട്ടി​രു​ന്നു. ചില പെയി​ന്റി​ങ്ങു​കൾ കുടും​ബ​ബ​ന്ധ​ങ്ങളെ ചിത്രീ​ക​രി​ക്കു​ന്ന​വ​യാണ്‌. ഉദാഹ​ര​ണ​ത്തിന്‌, ഭർത്താ​വി​നെ മദ്യഷാ​പ്പിൽനി​ന്നു വീട്ടി​ലേക്കു വലിച്ചി​ഴച്ചു കൊണ്ടു​വ​രുന്ന ഒരു സ്‌ത്രീ​യു​ടെ ചിത്ര​മാണ്‌ ചിലത്‌. മറ്റു ചിലവ​യാ​കട്ടെ, രണ്ടു ചെകു​ത്താ​ന്മാർ ഒരു പരദൂ​ഷ​ണ​ക്കാ​രി​യു​ടെ നാവ്‌ ചാണക്ക​ല്ലിൽവെച്ച്‌ മൂർച്ച​വ​രു​ത്തു​ന്ന​തി​നെ ചിത്രീ​ക​രി​ക്കു​ന്നു.

തേനീ​ച്ച​ക്കൂ​ടി​ന്മേ​ലുള്ള പെയി​ന്റി​ങ്ങു​കൾ “സ്ലോ​വേ​നി​യൻ സാംസ്‌കാ​രിക പൈതൃ​ക​ത്തി​ന്റെ മുത്തുകൾ,” “പഴമക്കാ​രു​ടെ ജ്ഞാനം വിളി​ച്ചോ​തുന്ന ചിരപു​രാ​തന വിജ്ഞാ​ന​കോ​ശം,” “ഒരുപക്ഷേ സ്ലോ​വേ​നി​യ​ക്കാ​രു​ടെ ഏറ്റവും തനതായ കല” എന്നെല്ലാം പ്രകീർത്തി​ക്ക​പ്പെ​ട്ടി​രി​ക്കു​ന്നു. എന്നാൽ ഈ പെയി​ന്റി​ങ്ങു​കൾക്ക്‌ ഈച്ചകളെ സഹായി​ക്കുക എന്ന ലക്ഷ്യവും ഉണ്ടായി​രു​ന്നു. അതായത്‌, ഒരേ സ്ഥലത്തു​തന്നെ ഒരുപാ​ടു കൂടുകൾ ഉള്ള സ്ഥിതിക്ക്‌ തേനീച്ച വഴി​തെറ്റി മറ്റേ​തെ​ങ്കി​ലും കൂട്ടിൽ വന്നു കയറാൻ സാധ്യ​ത​യുണ്ട്‌, അങ്ങനെ സംഭവി​ച്ചാൽ നുഴഞ്ഞു കയറ്റക്കാ​ര​നാ​യി കരുതി മറ്റുള്ളവ അതിനെ വകവരു​ത്തും. അതിനാൽ, ഓരോ കൂടി​ന്റെ​യും മുൻവ​ശത്ത്‌ വ്യത്യ​സ്‌ത​മായ നിറപ്പ​കി​ട്ടാർന്ന ഡി​സൈ​നു​കൾ ഉള്ളത്‌ തേനീ​ച്ച​കളെ അവയുടെ സ്വന്തം കൂട്ടിൽ വന്നണയാൻ സഹായി​ക്കു​മെന്നു തേനീ​ച്ച​വ​ളർത്ത​ലു​കാർ വിശ്വ​സി​ച്ചി​രു​ന്നു.

[ചിത്രങ്ങൾ]

“ആദാമും ഹവ്വായും”

“യേശു യെരൂ​ശ​ലേ​മിൽ എത്തി​ച്ചേ​രു​ന്നു”

“ഈജി​പ്‌തി​ലേക്കു വിൽക്ക​പ്പെട്ട യോ​സേഫ്‌”

പലകകളിൽ പരമ്പരാ​ഗ​ത​മായ ചിത്ര​ര​ച​ന​ക​ളുള്ള സാധാരണ സ്ലോ​വേ​നി​യൻ തേനീ​ച്ച​ക്കൂ​ടു​ക​ളു​ടെ കൂട്ടം

[കടപ്പാട്‌]

തേനീച്ചക്കൂടുകളുടെ എല്ലാ ഫോട്ടോകളും: Z dovoljenjem upravitelja rojstne hiše pisatelja Josipa Jurčiča

[23-ാം പേജിലെ മാപ്പ്‌]

(പൂർണ​രൂ​പ​ത്തിൽ കാണു​ന്ന​തിന്‌ പ്രസി​ദ്ധീ​ക​രണം നോക്കുക)

ഓസ്‌ട്രിയ

ഇറ്റലി

സ്ലോവേനിയ

കാർണി​യോ​ള

ക്രൊയേഷ്യ

അഡ്രിയാറ്റിക്‌ കടൽ

[കടപ്പാട്‌]

ഭൂപടം: Mountain High Maps® Copyright © 1997 Digital Wisdom, Inc.

[24-ാം പേജിലെ ചിത്രം]

കാർണിയോളയിലെ വിഖ്യാ​ത​മായ തേനീ​ച്ച​യു​ടെ രൂപം വഹിക്കുന്ന സ്ലോ​വേ​നി​യൻ നാണയം

[25-ാം പേജിലെ ചിത്രം]

ശാന്തസ്വഭാവിയും അക്രമ​വാ​സന ഇല്ലാത്ത​തും എന്നനി​ല​യിൽ കാർണി​യോ​ളൻ തേനീച്ച പേരു​കേ​ട്ട​താണ്‌

[25-ാം പേജിലെ ചിത്രം]

ലാർവകൾ

[25-ാം പേജിലെ ചിത്രം]

പ്രായം കുറഞ്ഞ വേലക്കാ​രി തേനീ​ച്ച​ക​ളാൽ ചുറ്റപ്പെട്ട റാണി ഈച്ച

[കടപ്പാട്‌]

ഫോട്ടോ: യാനെസ്‌ ഗ്രി​ഗൊ​റി