അധ്യായം ഒന്ന്‌

ആധുനിക സന്ദേശ​വു​മാ​യി ഒരു പുരാതന പ്രവാ​ച​കൻ

യെശയ്യാവു 1:1

1, 2. (എ) ഇന്നത്തെ ലോക​ത്തി​ലെ സ്ഥിതി​വി​ശേഷം എത്ര ശോച​നീ​യ​മാണ്‌? (ബി) ഒരു അമേരി​ക്കൻ പാർല​മെന്റ്‌ അംഗം ഇന്നത്തെ സമൂഹ​ത്തി​ന്റെ അധഃപ​ത​നത്തെ കുറിച്ച്‌ ആശങ്ക പ്രകടി​പ്പി​ച്ചത്‌ എങ്ങനെ?

ഇക്കാലത്ത്‌ മാനവ​രാ​ശി​യെ ഗ്രസി​ച്ചി​രി​ക്കുന്ന പ്രശ്‌ന​ങ്ങ​ളിൽനി​ന്നു വിടുതൽ ലഭിക്കാൻ അതിയാ​യി ആഗ്രഹി​ക്കാ​ത്തവർ ആരാണു​ള്ളത്‌? എങ്കിലും, പലപ്പോ​ഴും നമ്മുടെ ആഗ്രഹങ്ങൾ സഫലമാ​കാ​റില്ല എന്നതാണു വാസ്‌തവം. സമാധാ​നത്തെ കുറിച്ചു നാം സ്വപ്‌നം കാണുന്നു, എന്നാൽ ജീവി​ക്കു​ന്ന​തോ യുദ്ധപ​ങ്കി​ല​മായ ഒരു ലോക​ത്തി​ലും. ക്രമസ​മാ​ധാ​നം ഉണ്ടായി​ക്കാ​ണാൻ തീവ്ര​മാ​യി അഭില​ഷി​ക്കുന്ന നമുക്ക്‌, അടിക്കടി ഏറിവ​രുന്ന കവർച്ച​യും ബലാത്സം​ഗ​വും കൊല​പാ​ത​ക​വും തടയാൻ കഴിയു​ന്നില്ല. അയൽക്കാ​രെ വിശ്വ​സി​ക്കാൻ നാം ആഗ്രഹി​ക്കു​ന്നെ​ങ്കി​ലും, വാതി​ലു​കൾ പൂട്ടാതെ കിടന്നു​റ​ങ്ങാൻ പറ്റാത്ത അവസ്ഥയി​ലാണ്‌ നാമിന്ന്‌. മക്കളെ അതിയാ​യി സ്‌നേ​ഹി​ക്കു​ക​യും അവരിൽ നല്ല മൂല്യങ്ങൾ വളർത്തി​യെ​ടു​ക്കാൻ ശ്രമി​ക്കു​ക​യും ചെയ്യുന്ന നമുക്ക്‌, അവർ ചീത്ത കൂട്ടു​കെ​ട്ടു​ക​ളിൽ അകപ്പെ​ടു​ന്നത്‌ പലപ്പോ​ഴും നിസ്സഹാ​യ​രാ​യി നോക്കി​നിൽക്കേ​ണ്ടി​വ​രു​ന്നു.

² മനുഷ്യൻ അൽപ്പാ​യു​സ്സു​ള്ള​വ​നും “കഷ്ടസമ്പൂർണ്ണ​നും” ആണെന്ന ഇയ്യോ​ബി​ന്റെ പ്രസ്‌താ​വ​ന​യോ​ടു നമുക്കാർക്കും വിയോ​ജി​പ്പു കാണില്ല. (ഇയ്യോബ്‌ 14:1) അത്‌ ഇന്ന്‌ ഏറെ സത്യമാ​ണെന്നു പറയേ​ണ്ടി​യി​രി​ക്കു​ന്നു. കാരണം, മുമ്പെ​ങ്ങും കണ്ടിട്ടി​ല്ലാത്ത വിധത്തിൽ സമൂഹം ഇന്ന്‌ അധഃപ​തി​ച്ചു​കൊ​ണ്ടി​രി​ക്കു​ക​യാണ്‌. ഈ അവസ്ഥയെ കുറിച്ച്‌ ഒരു അമേരി​ക്കൻ പാർല​മെന്റ്‌ അംഗം ഇങ്ങനെ അഭി​പ്രാ​യ​പ്പെട്ടു: “ശീതയു​ദ്ധം അവസാ​നി​ച്ചെ​ങ്കി​ലും, ലോകം ഇന്ന്‌ വംശീ​യ​വും ഗോ​ത്ര​പ​ര​വും മതപര​വു​മായ പകവീ​ട്ട​ലി​ന്റെ​യും മൃഗീ​യ​ത​യു​ടെ​യും വിളനി​ല​മാ​യി മാറി​ക്ക​ഴി​ഞ്ഞി​രി​ക്കു​ന്നു. . . . ധാർമിക നിലവാ​ര​ങ്ങ​ളിൽ നാം വെള്ളം ചേർത്തി​രി​ക്കു​ന്നു. തത്‌ഫ​ല​മാ​യി, യുവജ​ന​ങ്ങ​ളിൽ അനേക​രും ആശയക്കു​ഴ​പ്പ​ത്തി​ലാണ്‌, അവർ നിരു​ത്സാ​ഹി​ത​രു​മാണ്‌. ഗുരു​ത​ര​മായ പ്രശ്‌ന​ങ്ങ​ളിൽ പെട്ട്‌ അവർ നട്ടംതി​രി​യു​ന്നു. മാതാ​പി​താ​ക്കൾ കുട്ടി​ക​ളോ​ടു കാണി​ക്കുന്ന അവഗണന, വിവാ​ഹ​മോ​ചനം, ശിശു​ദ്രോ​ഹം, കൗമാര ഗർഭധാ​രണം, പഠിത്തം നിറുത്തൽ, മയക്കു​മ​രു​ന്നു ദുരു​പ​യോ​ഗം, തെരു​ക്ക​ളിൽ നടമാ​ടുന്ന അക്രമം എന്നിവ​യു​ടെ​യെ​ല്ലാം തിക്തഫ​ലങ്ങൾ നാം ഇന്ന്‌ അനുഭ​വി​ക്കു​ക​യാണ്‌. ശീതയു​ദ്ധ​മെന്ന വൻഭൂ​ക​മ്പ​ത്തിൽ തകരാഞ്ഞ നമ്മുടെ ഭവനത്തെ ചിതൽ നശിപ്പി​ക്കു​ന്നതു പോ​ലെ​യാ​ണിത്‌.”

3. ഏതു ബൈബിൾ പുസ്‌തകം ഭാവി സംബന്ധിച്ച്‌ പ്രത്യാശ പകരുന്നു?

³ എങ്കിലും, പ്രത്യാ​ശ​യ്‌ക്കു വകയുണ്ട്‌. എന്തെന്നാൽ നമ്മുടെ നാളു​കൾക്കു പ്രത്യേ​കി​ച്ചും ബാധക​മാ​കുന്ന പ്രാവ​ച​നിക സന്ദേശങ്ങൾ പ്രഖ്യാ​പി​ക്കാൻ 2,700-ഓളം വർഷങ്ങൾക്കു മുമ്പ്‌ മധ്യപൂർവ ദേശത്തെ യെശയ്യാവ്‌ എന്ന മനുഷ്യ​നെ ദൈവം നിശ്വ​സ്‌ത​നാ​ക്കി. അവന്റെ പേരു വഹിക്കുന്ന ബൈബിൾ പുസ്‌ത​ക​ത്തിൽ ആ പ്രാവ​ച​നിക സന്ദേശങ്ങൾ കാണാം. എന്നാൽ യെശയ്യാവ്‌ ആരായി​രു​ന്നു? ഏകദേശം മൂവാ​യി​രം വർഷം മുമ്പ്‌ രേഖ​പ്പെ​ടു​ത്ത​പ്പെട്ട അവന്റെ പ്രവചനം ഇന്ന്‌ മാനവ​രാ​ശി​ക്കു പ്രകാ​ശ​മേ​കു​ന്നു എന്നു പറയാൻ കഴിയു​ന്നത്‌ എന്തു​കൊണ്ട്‌?

പ്രക്ഷു​ബ്‌ധ​കാ​ലത്ത്‌ ഒരു നീതി​മാൻ

4. യെശയ്യാവ്‌ ആരായി​രു​ന്നു, യഹോ​വ​യു​ടെ പ്രവാ​ച​ക​നാ​യി അവൻ സേവി​ച്ചത്‌ ഏതു കാലഘ​ട്ട​ത്തിൽ?

⁴ ‘ആമോ​സി​ന്റെ മകൻ’a എന്നാണു തന്റെ പുസ്‌ത​ക​ത്തി​ന്റെ ആദ്യ വാക്യ​ത്തിൽത്തന്നെ യെശയ്യാവ്‌ സ്വയം പരിച​യ​പ്പെ​ടു​ത്തു​ന്നത്‌. കൂടാതെ, “യെഹൂ​ദാ​രാ​ജാ​ക്ക​ന്മാ​രായ ഉസ്സീയാ​വു, യോഥാം, ആഹാസ്‌, യെഹി​സ്‌കീ​യാ​വു [അഥവാ, ഹിസ്‌കീ​യാവ്‌] എന്നിവ​രു​ടെ കാലത്തു” താൻ ദൈവ​ത്തി​ന്റെ പ്രവാ​ച​ക​നാ​യി സേവി​ച്ചെ​ന്നും അവൻ പറയുന്നു. (യെശയ്യാ​വു 1:1) അതിന്റെ അർഥം യഹൂദാ രാജ്യത്ത്‌ കുറഞ്ഞത്‌ 46 വർഷ​മെ​ങ്കി​ലും ദൈവ​ത്തി​ന്റെ പ്രവാ​ച​ക​നാ​യി യെശയ്യാവ്‌ സേവി​ച്ചി​രു​ന്നു എന്നാണ്‌. അവൻ ശുശ്രൂഷ തുടങ്ങി​യത്‌ ഉസ്സീയാ​വി​ന്റെ വാഴ്‌ച​യു​ടെ അവസാ​ന​ത്തോ​ട​ടുത്ത്‌ പൊ.യു.മു. 778-ൽ ആയിരി​ക്കണം.

5, 6. യെശയ്യാ​വി​ന്റെ കുടും​ബ​ജീ​വി​തം സംബന്ധിച്ച്‌ എന്തു സത്യമാ​യി​രു​ന്നി​രി​ക്കണം, എന്തു​കൊണ്ട്‌?

⁵ മറ്റു പല പ്രവാ​ച​ക​ന്മാ​രിൽ നിന്നും വ്യത്യ​സ്‌ത​മാ​യി, യെശയ്യാ​വി​ന്റെ വ്യക്തിഗത ജീവി​തത്തെ കുറിച്ചു നമുക്കു കാര്യ​മാ​യി ഒന്നും അറിയില്ല. അവൻ വിവാ​ഹി​തൻ ആയിരു​ന്നെ​ന്നും ഭാര്യയെ “പ്രവാ​ചകി” എന്നു പരാമർശി​ച്ചി​രു​ന്നെ​ന്നും നമുക്ക​റി​യാം. (യെശയ്യാ​വു 8:3) യെശയ്യാ​വി​ന്റെ ദാമ്പത്യ​ജീ​വി​തം “അവന്റെ സേവന​ത്തോ​ടു പൊരു​ത്ത​പ്പെ​ട്ടി​രു​ന്നെന്നു മാത്രമല്ല അതുമാ​യി ഇഴുകി​ച്ചേർന്നി​രു​ന്നെ​ന്നും” ആ പരാമർശം സൂചി​പ്പി​ക്കു​ന്ന​താ​യി മക്ലി​ന്റോ​ക്കും സ്‌​ട്രോ​ങ്ങും തയ്യാറാ​ക്കിയ ബൈബി​ളി​നെ​യും ദൈവ​ശാ​സ്‌ത്ര​ത്തെ​യും പൗരോ​ഹി​ത്യ​ത്തെ​യും കുറിച്ചു പ്രതി​പാ​ദി​ക്കുന്ന സാഹി​ത്യ​വി​ജ്ഞാ​ന​കോ​ശം (ഇംഗ്ലീഷ്‌) പറയുന്നു. പുരാതന ഇസ്രാ​യേ​ലി​ലെ ദൈവ​ഭ​ക്ത​രായ ചില സ്‌ത്രീ​ക​ളു​ടേ​തി​നു സമാന​മാ​യി, യെശയ്യാ​വി​ന്റെ ഭാര്യ​യ്‌ക്കും ഒരു പ്രവാ​ചകി എന്നനി​ല​യി​ലുള്ള നിയമനം ഉണ്ടായി​രു​ന്നി​രി​ക്കാം.—ന്യായാ​ധി​പ​ന്മാർ 4:4; 2 രാജാ​ക്ക​ന്മാർ 22:14.

⁶ ഈ പ്രവാചക ദമ്പതി​കൾക്കു ചുരു​ങ്ങി​യത്‌ രണ്ടു പുത്ര​ന്മാർ ഉണ്ടായി​രു​ന്നു. ഇരുവർക്കും പ്രാവ​ച​നിക അർഥമുള്ള പേരു​ക​ളാണ്‌ അവർ നൽകി​യത്‌. ദുഷ്‌ട രാജാ​വായ ആഹാസി​നെ ദൈവ​സ​ന്ദേ​ശങ്ങൾ അറിയി​ക്കാൻ പോയ​പ്പോൾ യെശയ്യാ​വി​നോ​ടൊ​പ്പം ആദ്യജാ​ത​നായ ശെയാർ-യാശൂ​ബും ഉണ്ടായി​രു​ന്നു. (യെശയ്യാ​വു 7:3) ഇതി​ന്റെ​യെ​ല്ലാം വെളി​ച്ച​ത്തിൽ, യെശയ്യാ​വും ഭാര്യ​യും മക്കളോ​ടൊ​പ്പം ദൈവത്തെ ആരാധി​ച്ചി​രു​ന്നു എന്നതു സ്‌പഷ്‌ട​മാണ്‌—ഇന്നത്തെ ഭാര്യാ​ഭർത്താ​ക്ക​ന്മാർക്ക്‌ എത്ര നല്ല മാതൃക!

7. യെശയ്യാ​വി​ന്റെ കാലത്ത്‌ യഹൂദ​യിൽ നിലവി​ലി​രുന്ന അവസ്ഥ വിവരി​ക്കുക.

⁷ യഹൂദാ രാജ്യ​ത്തി​ന്റെ ചരി​ത്ര​ത്തി​ലെ പ്രക്ഷു​ബ്‌ധ​മായ ഒരു കാലഘ​ട്ട​ത്തി​ലാണ്‌ യെശയ്യാ​വും കുടും​ബ​വും ജീവി​ച്ചി​രു​ന്നത്‌. ദേശത്ത്‌ അരാജ​ക​ത്വം നടമാടി, നീതി​പാ​ലകർ കോഴ വാങ്ങി ന്യായം മറിച്ചു​ക​ളഞ്ഞു, കാപട്യം മതസമു​ദാ​യ​ത്തി​ന്റെ ചട്ടക്കൂ​ടി​നെ ദുർബ​ല​മാ​ക്കി, എല്ലാ മലമു​ക​ളി​ലും ആളുകൾ വ്യാജ​ദേ​വ​ന്മാർക്കാ​യി ബലിപീ​ഠങ്ങൾ പണിതു, ചില രാജാ​ക്ക​ന്മാർ പോലും വ്യാജാ​രാ​ധ​ന​യ്‌ക്കു പ്രോ​ത്സാ​ഹ​ന​മേകി. ഉദാഹ​ര​ണ​ത്തിന്‌, ആഹാസ്‌ രാജാവ്‌ പ്രജക​ളു​ടെ ഇടയിൽ വിഗ്ര​ഹാ​രാ​ധന പ്രോ​ത്സാ​ഹി​പ്പി​ക്കുക മാത്രമല്ല, കനാന്യ ദേവനായ മോ​ലേ​ക്കി​നുള്ള ബലിയാ​യി സ്വന്തം മകനെ ‘അഗ്നി​പ്ര​വേശം’ നടത്തുക പോലും ചെയ്‌തു.b (2 രാജാ​ക്ക​ന്മാർ 16:3, 4; 2 ദിനവൃ​ത്താ​ന്തം 28:3, 4) ഇതെല്ലാം സംഭവി​ച്ച​തോ, യഹോ​വ​യു​മാ​യി ഉടമ്പടി ബന്ധത്തിൽ ആയിരുന്ന ഒരു ജനതയു​ടെ ഇടയി​ലും!—പുറപ്പാ​ടു 19:5-8.

8. (എ) ഉസ്സീയാ​വും യോഥാ​മും എങ്ങനെ​യുള്ള മാതൃക വെച്ചു, ജനം അവരുടെ നേതൃ​ത്വം പിൻപ​റ്റി​യോ? (ബി) മത്സരി​ക​ളായ ജനത്തിന്റെ ഇടയിൽ യെശയ്യാവ്‌ ധീരത കാട്ടി​യത്‌ എങ്ങനെ?

⁸ എന്നാൽ, യെശയ്യാ​വി​ന്റെ സമകാ​ലി​ക​രിൽ ചിലർ സത്യാ​രാ​ധന ഉന്നമി​പ്പി​ക്കാൻ ശ്രമി​ച്ചി​രു​ന്നു. ചില രാജാ​ക്ക​ന്മാ​രും അവരിൽ ഉൾപ്പെ​ടും. അത്തര​മൊ​രു രാജാ​വാ​യി​രു​ന്നു ഉസ്സീയാവ്‌ (അസര്യാവ്‌ എന്നും വിളി​ക്ക​പ്പെ​ടു​ന്നു). അവൻ ‘യഹോ​വ​യ്‌ക്കു പ്രസാ​ദ​മു​ള്ളതു ചെയ്‌തെ’ങ്കിലും, അവന്റെ വാഴ്‌ച​ക്കാ​ലത്ത്‌ “ജനം പൂജാ​ഗി​രി​ക​ളിൽ യാഗം കഴിച്ചും ധൂപം കാട്ടി​യും പോന്നു.” (2 രാജാ​ക്ക​ന്മാർ 15:3, 4) ‘യഹോ​വെക്കു പ്രസാ​ദ​മു​ള്ളതു ചെയ്‌ത’ മറ്റൊരു രാജാ​വാണ്‌ യോഥാം. എന്നാൽ, അവന്റെ കാലത്തും ‘ജനം വഷളത്വം പ്രവർത്തി​ച്ചു​കൊ​ണ്ടി​രു​ന്നു.’ (2 ദിനവൃ​ത്താ​ന്തം 27:2) യെശയ്യാ​വി​ന്റെ പ്രവാചക ശുശ്രൂ​ഷ​യു​ടെ ഏറിയ കാലത്തും യഹൂദ​യി​ലെ ജനങ്ങളു​ടെ ആത്മീയ​വും ധാർമി​ക​വു​മായ അവസ്ഥ വളരെ പരിതാ​പ​ക​ര​മാ​യി​രു​ന്നു. ആളുകൾ പൊതു​വെ രാജാ​ക്ക​ന്മാ​രു​ടെ ക്രിയാ​ത്മക സ്വാധീ​നം അവഗണി​ച്ചു​ക​ളഞ്ഞു. അങ്ങനെ​യുള്ള മത്സരി​ക​ളായ ഒരു ജനത്തെ ദൈവ​ത്തി​ന്റെ സന്ദേശങ്ങൾ അറിയി​ക്കുക എന്നത്‌ തീർച്ച​യാ​യും ദുഷ്‌ക​ര​മാ​യി​രു​ന്നു. എന്നിരു​ന്നാ​ലും, “ഞാൻ ആരെ അയക്കേണ്ടു? ആർ നമുക്കു വേണ്ടി പോകും?” എന്നു യഹോവ ചോദി​ച്ച​പ്പോൾ യെശയ്യാവ്‌ മടിച്ചു​നിൽക്കാ​തെ “അടിയൻ ഇതാ അടിയനെ അയക്കേ​ണമേ” എന്നു പ്രതി​വ​ചി​ച്ചു.—യെശയ്യാ​വു 6:8.

ഒരു രക്ഷാസ​ന്ദേ​ശം

9. യെശയ്യാവ്‌ എന്ന പേരിന്റെ അർഥ​മെന്ത്‌, അത്‌ അവന്റെ പുസ്‌ത​ക​ത്തി​ന്റെ പ്രതി​പാ​ദ്യ വിഷയ​വു​മാ​യി എങ്ങനെ ബന്ധപ്പെ​ട്ടി​രി​ക്കു​ന്നു?

⁹ യെശയ്യാവ്‌ എന്ന പേരിന്റെ അർഥം “യഹോ​വ​യു​ടെ രക്ഷ” എന്നാണ്‌. വ്യക്തമാ​യും, അവന്റെ സന്ദേശ​ത്തി​ന്റെ വിഷയ​വും അതുത​ന്നെ​യാ​ണെന്നു പറയാം. യെശയ്യാ​വി​ന്റെ പ്രവച​ന​ങ്ങ​ളിൽ ചിലതു ന്യായ​വി​ധി​യെ കുറി​ച്ചു​ള്ള​താ​ണെ​ന്നതു ശരിതന്നെ. എങ്കിലും, രക്ഷ എന്ന വിഷയം അവയിൽ തെളിഞ്ഞു നിൽക്കു​ന്ന​താ​യി കാണാം. യഹോവ തക്കസമ​യത്ത്‌ ബാബി​ലോ​ണി​യൻ അടിമ​ത്ത​ത്തിൽനിന്ന്‌ ഇസ്രാ​യേ​ല്യ​രെ വിടു​വി​ക്കു​ക​യും ഒരു ശേഷിപ്പ്‌ സീയോ​നിൽ മടങ്ങി​യെത്തി ആ ദേശത്തെ അതിന്റെ പൂർവ മഹത്ത്വ​ത്തി​ലേക്കു പുനഃ​സ്ഥാ​പി​ക്കാൻ അനുവ​ദി​ക്കു​ക​യും ചെയ്യു​മെ​ന്നുള്ള സന്ദേശം യെശയ്യാവ്‌ ആവർത്തി​ക്കു​ന്നു. തന്റെ പ്രിയ നഗരമായ യെരൂ​ശ​ലേ​മി​ന്റെ പുനഃ​സ്ഥാ​പ​നത്തെ കുറി​ച്ചുള്ള പ്രവച​നങ്ങൾ അറിയി​ക്കാ​നും എഴുതി​വെ​ക്കാ​നും ലഭിച്ച പദവി യെശയ്യാ​വിന്‌ ഏറ്റവും സന്തോഷം കൈവ​രു​ത്തി എന്നതിൽ തെല്ലും സംശയ​മില്ല!

10, 11. (എ) യെശയ്യാ പുസ്‌ത​ക​ത്തിൽ നാം തത്‌പ​ര​രാ​യി​രി​ക്കേ​ണ്ടത്‌ എന്തു​കൊണ്ട്‌? (ബി) യെശയ്യാ പുസ്‌തകം മിശി​ഹാ​യി​ലേക്കു ശ്രദ്ധ ക്ഷണിക്കു​ന്നത്‌ എങ്ങനെ?

¹⁰ ന്യായവിധിയുടെയും രക്ഷയു​ടെ​യും ഈ സന്ദേശങ്ങൾ നമ്മെ എങ്ങനെ ബാധി​ക്കു​ന്നു? രണ്ടു-ഗോത്ര രാജ്യ​മായ യഹൂദ​യു​ടെ മാത്രം പ്രയോ​ജ​ന​ത്തി​നു വേണ്ടിയല്ല യെശയ്യാവ്‌ പ്രവചി​ക്കു​ന്നത്‌ എന്നതു സന്തോ​ഷ​ക​ര​മാണ്‌. അവന്റെ സന്ദേശ​ങ്ങൾക്കു നമ്മുടെ നാളി​ലും വളരെ പ്രസക്തി​യുണ്ട്‌. ദൈവ​രാ​ജ്യം മുഖാ​ന്തരം ഭൂമി​യിൽ വരാനി​രി​ക്കുന്ന മഹത്തായ അനു​ഗ്ര​ഹ​ങ്ങ​ളു​ടെ അതീവ ഹൃദ്യ​മായ ഒരു വാങ്‌മയ ചിത്ര​മാണ്‌ യെശയ്യാവ്‌ അവതരി​പ്പി​ക്കു​ന്നത്‌. അവൻ എഴുതിയ കാര്യ​ങ്ങ​ളിൽ ഏറെയും ദൈവ​രാ​ജ്യ​ത്തി​ന്റെ രാജാ​വാ​യി ഭരണം നടത്താ​നി​രുന്ന മുൻകൂ​ട്ടി പറയപ്പെട്ട മിശി​ഹാ​യെ സംബന്ധി​ച്ചു​ള്ള​താണ്‌. (ദാനീ​യേൽ 9:25; യോഹ​ന്നാൻ 12:41) യേശു, യെശയ്യാവ്‌ എന്നീ പേരുകൾ ഫലത്തിൽ ഒരേ ആശയം തന്നെയാണ്‌ എടുത്തു​കാ​ണി​ക്കു​ന്നത്‌. “യഹോവ രക്ഷയാ​കു​ന്നു” എന്നാണ്‌ യേശു എന്ന പേരിന്റെ അർഥം.

¹¹ യെശയ്യാവിന്റെ കാലത്തിന്‌ ഏഴു നൂറ്റാ​ണ്ടു​കൾക്കു ശേഷമാണ്‌ യേശു ജനിക്കു​ന്നത്‌. എങ്കിലും, മിശി​ഹാ​യെ കുറിച്ച്‌ യെശയ്യാ പുസ്‌ത​ക​ത്തി​ലുള്ള പ്രവച​നങ്ങൾ വളരെ വിശദ​വും കൃത്യ​ത​യു​ള്ള​തു​മാണ്‌. അവ വായി​ച്ചാൽ യേശു​വി​ന്റെ ഭൗമിക ജീവി​തത്തെ കുറി​ച്ചുള്ള ഒരു ദൃക്‌സാ​ക്ഷി വിവരണം ആണെന്നേ തോന്നൂ. അക്കാര​ണ​ത്താൽ യെശയ്യാ പുസ്‌ത​കത്തെ ചില​പ്പോ​ഴൊ​ക്കെ “അഞ്ചാമത്തെ സുവി​ശേഷം” എന്നു വിളി​ക്കാ​റു​ള്ള​താ​യി ഒരു പണ്ഡിതൻ അഭി​പ്രാ​യ​പ്പെട്ടു. മിശിഹാ ആരാ​ണെന്നു വ്യക്തമാ​ക്കാൻ യേശു​വും അപ്പൊ​സ്‌ത​ല​ന്മാ​രും ഏറ്റവു​മ​ധി​കം പരാമർശിച്ച ബൈബിൾ പുസ്‌തകം യെശയ്യാവ്‌ ആണെന്ന​തിൽ ഒട്ടും അതിശ​യി​ക്കാ​നില്ല.

12. നാം യെശയ്യാ പുസ്‌തകം ഉത്സാഹ​ത്തോ​ടെ പരി​ശോ​ധി​ക്കേ​ണ്ടത്‌ എന്തു​കൊണ്ട്‌?

¹² ‘ഒരു രാജാവു നീതി​യോ​ടെ വാഴു’കയും പ്രഭു​ക്ക​ന്മാർ ന്യായ​ത്തോ​ടെ അധികാ​രം നടത്തു​ക​യും ചെയ്യാ​നി​രി​ക്കുന്ന ‘പുതിയ ആകാശ​ത്തെ​യും പുതിയ ഭൂമി’യെയും കുറി​ച്ചുള്ള മനോ​ജ്ഞ​മായ ഒരു വർണന യെശയ്യാ​വു എന്ന ബൈബിൾ പുസ്‌ത​ക​ത്തിൽ കാണാം. (യെശയ്യാ​വു 32:1, 2; 65:17, 18; 2 പത്രൊസ്‌ 3:13) മിശി​ഹാ​യായ യേശു സിംഹാ​സനസ്ഥ രാജാ​വെന്ന നിലയിൽ ഭരിക്കുന്ന ദൈവ​രാ​ജ്യം വെച്ചു​നീ​ട്ടുന്ന ഹൃദ​യോ​ഷ്‌മ​ള​മായ അനു​ഗ്ര​ഹ​ങ്ങ​ളി​ലേക്ക്‌ ആ ബൈബിൾ പുസ്‌തകം വിരൽചൂ​ണ്ടു​ന്നു. “[യഹോ​വ​യു​ടെ] രക്ഷ” അടുത്തി​രി​ക്കു​ന്നു എന്ന ആനന്ദക​ര​മായ പ്രതീക്ഷ നമുക്ക്‌ എത്ര പ്രോ​ത്സാ​ഹ​ന​മേ​കു​ന്ന​താണ്‌! (യെശയ്യാ​വു 25:9; 40:28-31) അതിനാൽ, യെശയ്യാ​വു എന്ന പുസ്‌ത​ക​ത്തിൽ അടങ്ങി​യി​രി​ക്കുന്ന അമൂല്യ സന്ദേശം നമുക്ക്‌ ഉത്സാഹ​ത്തോ​ടെ പരി​ശോ​ധി​ക്കാം. അങ്ങനെ ചെയ്യവെ, ദൈവ​ത്തി​ന്റെ വാഗ്‌ദാ​ന​ങ്ങ​ളി​ലുള്ള നമ്മുടെ വിശ്വാ​സം ഏറെ ബലിഷ്‌ഠ​മാ​യി​ത്തീ​രും. അതോ​ടൊ​പ്പം, യഹോവ നിശ്ചയ​മാ​യും രക്ഷയുടെ ദൈവ​മാണ്‌ എന്ന നമ്മുടെ ബോധ്യ​വും വർധി​ക്കും.

[അടിക്കു​റി​പ്പു​കൾ]

[7-ാം പേജിലെ ചതുരം/ചിത്രം]

യെശയ്യാവ്‌ ആരായി​രു​ന്നു?

പേരിന്റെ അർഥം: “യഹോ​വ​യു​ടെ രക്ഷ”

കുടുംബ പശ്ചാത്തലം: വിവാ​ഹി​തൻ, ചുരു​ങ്ങി​യത്‌ രണ്ടു പുത്ര​ന്മാ​രു​ടെ പിതാവ്‌

സ്വന്തനാട്‌: യെരൂ​ശ​ലേം

സേവനകാലം: ചുരു​ങ്ങി​യത്‌ 46 വർഷം, പൊ.യു.മു. 778 മുതൽ പൊ.യു.മു. 732 വരെയുള്ള കാലത്താ​യി​രി​ക്കാ​നാ​ണു സാധ്യത

യഹൂദയിലെ സമകാ​ലിക രാജാ​ക്ക​ന്മാർ: ഉസ്സീയാവ്‌, യോഥാം, ആഹാസ്‌, ­ഹിസ്‌കീയാവ്‌

സമകാലിക പ്രവാ​ച​ക​ന്മാർ: മീഖാ, ഹോശേയ, ഓദേദ്‌

[6-ാം പേജിലെ ചിത്രം]

യെശയ്യാ​വും ഭാര്യ​യും മക്കളോ​ടൊ​പ്പം ദൈവത്തെ ആരാധി​ച്ചു