നിങ്ങളു​ടെ സകല ഉത്‌ക​ണ്‌ഠ​ക​ളും യഹോ​വ​യു​ടെ​മേൽ ഇടുക

“ദൈവ​ത്തി​ന്റെ ബലമുള്ള കൈക്കീ​ഴു താണി​രി​പ്പിൻ. അവൻ നിങ്ങൾക്കാ​യി കരുതു​ന്ന​താ​ക​യാൽ നിങ്ങളു​ടെ സകല ചിന്താ​കു​ല​വും അവന്റെ​മേൽ ഇട്ടു​കൊൾവിൻ.”—1 പത്രൊസ്‌ 5:6, 7.

1. നമ്മെ ഉത്‌കണ്‌ഠ ബാധി​ച്ചേ​ക്കാ​വു​ന്ന​തെ​ങ്ങനെ, ഇതെങ്ങനെ ദൃഷ്ടാ​ന്തീ​ക​രി​ക്കാം?

ഉത്‌ക​ണ്‌ഠ​യ്‌ക്കു നമ്മുടെ ജീവി​തത്തെ കഠിന​മാ​യി ബാധി​ക്കാ​നാ​വും. റേഡി​യോ​യി​ലൂ​ടെ ഒഴുകി​യെ​ത്തുന്ന ഒരു ശ്രുതി​മ​ധുര സംഗീ​ത​ത്തി​നു ചില​പ്പോൾ നേരി​ടുന്ന തടസ്സവു​മാ​യി ഇതിനെ സാദൃ​ശ്യ​പ്പെ​ടു​ത്താ​വു​ന്ന​താണ്‌. റേഡി​യോ തരംഗ​ങ്ങളെ തടസ്സ​പ്പെ​ടു​ത്തുന്ന യാതൊ​ന്നും ഇടയ്‌ക്കു സംഭവി​ക്കു​ന്നി​ല്ലെ​ങ്കിൽ, ശ്രോ​താ​വിന്‌ ഇമ്പമാർന്ന സംഗീതം ആസ്വദി​ക്കാ​നും പ്രശാന്തത അനുഭ​വി​ക്കാ​നും കഴിയും. എന്നാൽ, തടസ്സം​ഹേ​തു​വാ​യുള്ള പരുക്കൻ ഇരച്ചി​ലി​നു നമ്മിൽ അസ്വസ്ഥ​ത​യും നിരാ​ശ​യും സൃഷ്ടി​ച്ചു​കൊണ്ട്‌ ഏററവും വശ്യമായ സംഗീ​ത​ത്തെ​പ്പോ​ലും വികല​മാ​ക്കാ​നാ​വും. നമ്മുടെ പ്രശാ​ന്ത​ത​യു​ടെ​മേൽ സമാന​മായ ഫലമു​ള​വാ​ക്കാൻ ഉത്‌ക​ണ്‌ഠ​യ്‌ക്കു സാധി​ക്കും. ജീവത്‌പ്ര​ധാ​ന​മായ കാര്യ​ങ്ങ​ളിൽ ശ്രദ്ധി​ക്കാൻ നമുക്കു പ്രയാ​സ​മാ​വും​വി​ധം നമ്മെ ഭാര​പ്പെ​ടു​ത്താൻ അതിനാ​വും. തീർച്ച​യാ​യും, ‘മനോ​വ്യ​സനം ഹേതു​വാ​യി മമനു​ഷ്യ​ന്റെ മനസ്സി​ടി​യു​ന്നു.’—സദൃശ​വാ​ക്യ​ങ്ങൾ 12:25.

2. “ജീവി​തോ​ത്‌ക​ണ്‌ഠ​കളെ”ക്കുറിച്ചു യേശു​ക്രി​സ്‌തു എന്തു പറഞ്ഞു?

² അമിത ഉത്‌കണ്‌ഠ നിമിത്തം ശ്രദ്ധാ​ശൈ​ഥി​ല്യ​ത്തി​ന​ടി​പ്പെ​ടുന്ന​തി​ന്റെ അപകട​ത്തെ​ക്കു​റി​ച്ചു യേശു​ക്രി​സ്‌തു സംസാ​രി​ക്കു​ക​യു​ണ്ടാ​യി. അന്ത്യനാ​ളു​ക​ളെ​ക്കു​റി​ച്ചുള്ള തന്റെ പ്രവച​ന​ത്തിൽ അവൻ ഉദ്‌ബോ​ധി​പ്പി​ച്ചു: “നിങ്ങളു​ടെ ഹൃദയം അതിഭ​ക്ഷ​ണ​ത്താ​ലും മദ്യപാ​ന​ത്താ​ലും ഉപജീ​വ​ന​ചി​ന്ത​ക​ളാ​ലും ഭാര​പ്പെ​ട്ടി​ട്ടു ആ ദിവസം നിങ്ങൾക്കു പെട്ടെന്നു കണി​പോ​ലെ വരാതി​രി​പ്പാൻ സൂക്ഷി​ച്ചു​കൊൾവിൻ. അതു സർവ്വഭൂ​ത​ല​ത്തി​ലും വസിക്കുന്ന ഏവർക്കും വരും. ആകയാൽ ഈ സംഭവി​പ്പാ​നുള്ള എല്ലാറ​റി​ന്നും ഒഴിഞ്ഞു​പോ​കു​വാ​നും മനുഷ്യ​പു​ത്രന്റെ മുമ്പിൽ നില്‌പാ​നും നിങ്ങൾ പ്രാപ്‌ത​രാ​കേ​ണ്ട​തി​ന്നു സദാകാ​ല​വും ഉണർന്നും പ്രാർത്ഥി​ച്ചും​കൊ​ണ്ടി​രി​പ്പിൻ.” (ലൂക്കൊസ്‌ 21:34-36) അമിത തീററ​യും മദ്യപാ​ന​വും മാനസി​ക​മ​ന്ദ​ത​യ്‌ക്കു കാരണ​മാ​കു​ന്ന​തു​പോ​ലെ, “ജീവി​തോ​ത്‌ക​ണ്‌ഠ​കളാ”ൽ ഭാര​പ്പെ​ടു​മ്പോൾ നമുക്കു നഷ്ടമാ​വുക വിവേ​ച​ന​യോ​ടെ കാര്യങ്ങൾ വിലയി​രു​ത്താ​നുള്ള നമ്മുടെ മാനസി​ക​പ്രാ​പ്‌തി​യാ​യി​രി​ക്കും. അതിന്റെ ഫലം വിപൽക്ക​ര​വു​മാ​യി​രി​ക്കും.

ഉത്‌ക​ണ്‌ഠ​യു​ടെ അർഥം

3. “ഉത്‌കണ്‌ഠ”യെ നിർവ​ചി​ച്ചി​രി​ക്കു​ന്ന​തെ​ങ്ങനെ, അതിന്റെ ചില കാരണ​ങ്ങ​ളേവ?

³ “സാധാ​ര​ണ​മാ​യി ആസന്നമാ​യ​തോ സംഭവി​ക്കു​മെന്നു വിചാ​രി​ക്കു​ന്ന​തോ ആയ ഒരു അനർഥ​ത്തെ​ച്ചൊ​ല്ലി​യുള്ള വേദനാ​ജ​ന​ക​മോ ആശങ്കാ​ജ​ന​ക​മോ ആയ മാനസി​കാ​സ്വ​സ്ഥ​ത​യാ​യി” ഉത്‌ക​ണ്‌ഠയെ നിർവ​ചി​ച്ചി​രി​ക്കു​ന്നു. അതു “ഭീതി​ജ​ന​ക​മായ വേവലാ​തി​യോ ശ്രദ്ധയോ” ആണ്‌. കൂടാതെ, “(വിയർക്കൽ, പിരി​മു​റു​ക്കം, വർധിച്ച രക്തമി​ടിപ്പ്‌) എന്നിങ്ങ​നെ​യുള്ള ശാരീ​രിക ലക്ഷണങ്ങൾ, യാഥാർഥ്യ​ത്തെ​യും ഭീഷണി​യു​ടെ സ്വഭാ​വ​ത്തെ​യും സംബന്ധി​ച്ചുള്ള സംശയം, അത്‌ അഭിമു​ഖീ​ക​രി​ക്കാൻ തനിക്കു കഴിവി​ല്ലെന്ന സംശയം എന്നിവ സവി​ശേ​ഷ​ത​ക​ളാ​യുള്ള അസാധാ​ര​ണ​വും വ്യാകു​ല​പ്പെ​ടു​ത്തു​ന്ന​തു​മായ ഭയാശങ്ക”യുമാണ്‌. (വെബ്‌സ്‌റേ​റ​ഴ്‌സ്‌ നയന്ത്‌ ന്യൂ കൊളീ​ജി​യ​ററ്‌ ഡിക്‌ഷ്‌ണറി) അതു​കൊണ്ട്‌, ഉത്‌കണ്‌ഠ ഒരു സങ്കീർണ പ്രശ്‌ന​മാ​യി​ത്തീ​രാം. രോഗം, വാർധ​ക്യം പ്രാപി​ക്കൽ, കുററ​കൃ​ത്യ​ഭീ​തി, തൊഴിൽനഷ്ടം, ഒരുവന്റെ കുടും​ബ​ക്ഷേ​മ​ത്തെ​ക്കു​റി​ച്ചുള്ള വ്യാകു​ലത എന്നിവ​യെ​ല്ലാം അതിന്റെ പല കാരണ​ങ്ങ​ളിൽ ചിലതാണ്‌.

4. (എ) ആളുക​ളെ​യും അവരുടെ ഉത്‌ക​ണ്‌ഠ​ക​ളെ​യും കുറിച്ച്‌ എന്ത്‌ ഓർക്കു​ന്നതു നന്നായി​രി​ക്കും? (ബി) നമ്മെ ഉത്‌കണ്‌ഠ അലട്ടു​ന്നു​ണ്ടെ​ങ്കിൽ എന്തു ചെയ്യാ​നാ​വും?

⁴ ഉത്‌ക​ണ്‌ഠ​യ്‌ക്ക്‌ ഇടയാ​ക്കുന്ന പലവിധ അവസ്ഥക​ളോ സാഹച​ര്യ​ങ്ങ​ളോ ഉള്ളതു​പോ​ലെ, വ്യക്തമാ​യും ഉത്‌ക​ണ്‌ഠ​യു​ടെ തീവ്ര​ത​യ്‌ക്ക്‌ ഏററക്കു​റ​ച്ചി​ലു​ക​ളുണ്ട്‌. ഒരു സ്ഥിതി​വി​ശേ​ഷ​ത്തോട്‌ എല്ലാവ​രും ഒരേരീ​തി​യി​ലല്ല പ്രതി​ക​രി​ക്കു​ന്നത്‌. അതു​കൊണ്ട്‌, ഒരു പ്രത്യേക സംഗതി നമ്മെ ഒട്ടും വിഷമി​പ്പി​ക്കു​ന്നി​ല്ലെ​ങ്കിൽപ്പോ​ലും യഹോ​വയെ ആരാധി​ക്കുന്ന നമ്മുടെ ചില സഹകാ​രി​കൾക്ക്‌ അതു കടുത്ത ഉത്‌ക​ണ്‌ഠ​യ്‌ക്കു കാരണ​മാ​യി​രി​ക്കാ​മെന്നു നാം തിരി​ച്ച​റി​യേ​ണ്ട​തുണ്ട്‌. ദൈവ​വ​ച​ന​ത്തി​ലെ സ്വര​ച്ചേർച്ച​യും സൗകു​മാ​ര്യ​വുള്ള സത്യത്തിൻമേൽ നമുക്കു ശ്രദ്ധ പതിപ്പി​ക്കാ​നാ​വാത്ത ഘട്ടത്തോ​ളം ഉത്‌കണ്‌ഠ എത്തു​ന്നെ​ങ്കിൽ എന്തു ചെയ്യാൻ കഴിയും? യഹോ​വ​യു​ടെ പരമാ​ധി​കാ​ര​വും ക്രിസ്‌തീയ നിർമ​ല​ത​യും സംബന്ധിച്ച വാദവി​ഷ​യങ്ങൾ മനസ്സിൽ വ്യക്തമാ​യി നിലനിർത്താ​നാ​വാ​ത്ത​വി​ധം നാം ഉത്‌ക​ണ്‌ഠ​യാൽ ബാധി​ക്ക​പ്പെ​ടു​ന്നെ​ങ്കി​ലോ? സാഹച​ര്യ​ങ്ങൾ മാററി​യെ​ടു​ക്കാൻ നമുക്കു കഴിയി​ല്ലാ​യി​രി​ക്കാം. അതിനു​പ​കരം, ജീവി​ത​ത്തി​ന്റെ നീറുന്ന പ്രശ്‌നങ്ങൾ സൃഷ്ടിച്ച ക്രമാ​തീത ഉത്‌ക​ണ്‌ഠയെ നേരി​ടാൻ നാം തിരു​വെ​ഴുത്ത്‌ ആശയങ്ങൾ അന്വേ​ഷി​ക്കേ​ണ്ട​തുണ്ട്‌.

സഹായം ലഭ്യമാണ്‌

5. സങ്കീർത്തനം 55:22-നു ചേർച്ച​യിൽ നമുക്ക്‌ എങ്ങനെ പ്രവർത്തി​ക്കാം?

⁵ ക്രിസ്‌ത്യാ​നി​കൾക്ക്‌ ആത്മീയ സഹായം ആവശ്യ​മു​ള്ള​പ്പോൾ, ഉത്‌ക​ണ്‌ഠ​ക​ളാൽ ഭാര​പ്പെ​ട്ടി​രി​ക്കു​മ്പോൾ, അവർക്കു ദൈവ​വ​ച​ന​ത്തിൽനിന്ന്‌ ആശ്വാസം നേടാ​നാ​വും. അതു വിശ്വാ​സ​യോ​ഗ്യ​മായ മാർഗ​നിർദേശം പ്രദാനം ചെയ്യുന്നു. അങ്ങനെ അതു യഹോ​വ​യു​ടെ വിശ്വസ്‌ത ദാസൻമാർ എന്നനി​ല​യിൽ നാം തനിച്ചല്ല എന്നതി​നുള്ള അനേകം ഉറപ്പുകൾ നമുക്കു നൽകുന്നു. ഉദാഹ​ര​ണ​ത്തിന്‌, സങ്കീർത്ത​ന​ക്കാ​ര​നായ ദാവീദ്‌ പാടി: “നിന്റെ ഭാരം യഹോ​വ​യു​ടെ​മേൽ വെച്ചു​കൊൾക; അവൻ നിന്നെ പുലർത്തും; നീതി​മാൻ കുലു​ങ്ങി​പ്പോ​കു​വാൻ അവൻ ഒരുനാ​ളും സമ്മതി​ക്ക​യില്ല.” (സങ്കീർത്തനം 55:22) ഈ വാക്കു​ക​ളോ​ടുള്ള യോജി​പ്പിൽ നമുക്ക്‌ എങ്ങനെ പ്രവർത്തി​ക്കാ​നാ​വും? നമ്മുടെ സകല ഉത്‌ക​ണ്‌ഠ​ക​ളും വിഷമ​ങ്ങ​ളും ഭയങ്ങളും നിരാ​ശ​ക​ളും നമ്മുടെ സ്‌നേ​ഹ​നി​ധി​യായ സ്വർഗീയ പിതാ​വി​ന്റെ​മേൽ ഇട്ടു​കൊണ്ട്‌. സുരക്ഷാ​ബോ​ധ​വും ഹൃദയ​പ്ര​ശാ​ന്ത​ത​യും നമുക്കു ലഭിക്കാൻ ഇതു സഹായ​ക​മാ​വും.

6. ഫിലി​പ്പി​യർ 4:6, 7 പറയു​ന്ന​പ്ര​കാ​രം നമ്മുടെ കാര്യ​ത്തിൽ പ്രാർഥ​നക്ക്‌ എന്തു ചെയ്യാ​നാ​വും?

⁶ നമ്മുടെ സകല ഉത്‌ക​ണ്‌ഠ​യു​മുൾപ്പെ​ടെ​യുള്ള നമ്മുടെ ഭാരം യഹോ​വ​യു​ടെ​മേൽ ഇടണ​മെ​ങ്കിൽ ഹൃദയം​ഗ​മ​മാ​യി നിരന്തരം പ്രാർഥി​ക്കേ​ണ്ടത്‌ അനു​പേ​ക്ഷ​ണീ​യ​മാണ്‌. ഇതു നമുക്ക്‌ ആന്തരി​ക​സ​മാ​ധാ​നം കൈവ​രു​ത്തും. എന്തെന്നാൽ അപ്പോ​സ്‌ത​ല​നായ പൗലോസ്‌ ഇങ്ങനെ എഴുതി: “ഒന്നി​നെ​ക്കു​റി​ച്ചും വിചാ​ര​പ്പെ​ട​രുത്‌ [“ഉത്‌ക​ണ്‌ഠ​പ്പെ​ട​രുത്‌,” NW]; എല്ലാറ​റി​ലും പ്രാർത്ഥ​ന​യാ​ലും അപേക്ഷ​യാ​ലും നിങ്ങളു​ടെ ആവശ്യങ്ങൾ സ്‌തോ​ത്ര​ത്തോ​ടു​കൂ​ടെ ദൈവ​ത്തോ​ടു അറിയി​ക്ക​യ​ത്രേ വേണ്ടതു. എന്നാൽ സകലബു​ദ്ധി​യേ​യും കവിയുന്ന ദൈവ​സ​മാ​ധാ​നം നിങ്ങളു​ടെ ഹൃദയ​ങ്ങ​ളെ​യും നിനവു​ക​ളെ​യും ക്രിസ്‌തു​യേ​ശു​വി​ങ്കൽ കാക്കും.” (ഫിലി​പ്പി​യർ 4:6, 7) അങ്ങേയ​ററം പീഡനാ​ത്മ​ക​മായ സാഹച​ര്യ​ങ്ങ​ളിൽപ്പോ​ലും യഹോ​വ​യു​ടെ സമർപ്പിത ദാസൻമാർ അനുഭ​വി​ക്കുന്ന ഒരു അസാധാ​രണ പ്രശാ​ന്ത​ത​യാണ്‌ അനുപ​മ​മായ ഈ “ദൈവ​സ​മാ​ധാ​നം.” ദൈവ​വു​മാ​യുള്ള നമ്മുടെ വ്യക്തി​പ​ര​മായ അടുത്ത ബന്ധത്തിൽനിന്ന്‌ ഉത്ഭൂത​മാ​കു​ന്ന​താ​ണത്‌. നാം പരിശു​ദ്ധാ​ത്മാ​വി​നു​വേണ്ടി പ്രാർഥി​ക്കു​മ്പോൾ, നമ്മെ പ്രചോ​ദി​പ്പി​ക്കാൻ അതിനെ അനുവ​ദി​ക്കു​മ്പോൾ, നാം ജീവി​ത​ത്തി​ന്റെ സകല പ്രശ്‌ന​ങ്ങ​ളിൽനി​ന്നും മുക്തരാ​കു​ക​യി​ല്ലാ​യി​രി​ക്കാം, എന്നാൽ നാം ആത്മാവി​ന്റെ ഫലമായ സമാധാ​നം ആസ്വദി​ക്കു​ക​തന്നെ ചെയ്യും. (ലൂക്കൊസ്‌ 11:13; ഗലാത്യർ 5:22, 23) ഉത്‌കണ്‌ഠ നമ്മെ കീഴ്‌പെ​ടു​ത്തു​ന്നില്ല. എന്തെന്നാൽ യഹോവ തന്റെ സകല വിശ്വസ്‌ത ജനത്തെ​യും “നിർഭയം വസിക്കു”മാറാ​ക്കു​ന്നു​വെ​ന്നും നമുക്കു ശാശ്വ​ത​ദോ​ഷ​ത്തി​നി​ട​യാ​ക്കുന്ന യാതൊ​ന്നും ഭവിക്കാ​തി​രി​ക്കാൻ ശ്രദ്ധി​ക്കു​മെ​ന്നും നമുക്ക്‌ അറിയാം.—സങ്കീർത്തനം 4:8.

7. ഉത്‌ക​ണ്‌ഠയെ നേരി​ടാൻ സഹായി​ക്കു​ന്ന​തിൽ ക്രിസ്‌തീയ മൂപ്പൻമാർക്ക്‌ എന്തു പങ്കു വഹിക്കാ​നാ​വും?

⁷ നാം തിരു​വെ​ഴു​ത്തു​ക​ളെ​ക്കു​റി​ച്ചു ധ്യാനി​ക്കു​ക​യും പ്രാർഥ​ന​യിൽ ഉററി​രി​ക്കു​ക​യും ചെയ്യു​ന്നു​ണ്ടെ​ങ്കിൽപ്പോ​ലും അപ്പോ​ഴും ഉത്‌കണ്‌ഠ വിട്ടു​മാ​റു​ന്നി​ല്ലെ​ങ്കി​ലോ? (റോമർ 12:12) സഭയിലെ നിയമിത മൂപ്പൻമാ​രും നമ്മെ ആത്മീയ​മാ​യി സഹായി​ക്കാ​നുള്ള യഹോ​വ​യു​ടെ ഏർപ്പാ​ടിൽപ്പെ​ടു​ന്ന​താണ്‌. ദൈവ​വ​ചനം ഉപയോ​ഗി​ച്ചു​കൊ​ണ്ടും നമുക്കു​വേണ്ടി നമ്മോ​ടൊ​പ്പം പ്രാർഥി​ച്ചു​കൊ​ണ്ടും അവർക്കു നമ്മെ ആശ്വസി​പ്പി​ക്കാ​നും സഹായി​ക്കാ​നും കഴിയും. (യാക്കോബ്‌ 5:13-16) ദൈവ​ത്തി​ന്റെ ആട്ടിൻകൂ​ട്ട​ത്തി​നു മനസ്സോ​ടെ, ഉത്സാഹ​ത്തോ​ടെ, മാതൃ​കാ​പ​ര​മായ വിധത്തിൽ ഇടയവേല ചെയ്യാൻ അപ്പോ​സ്‌ത​ല​നായ പത്രോസ്‌ തന്റെ സഹമൂ​പ്പൻമാ​രെ ഉദ്‌ബോ​ധി​പ്പി​ക്കു​ക​യു​ണ്ടാ​യി. (1 പത്രൊസ്‌ 5:1-4) ആത്മാർഥ​മാ​യി നമ്മുടെ കാര്യ​ങ്ങ​ളിൽ ഏററവും താത്‌പ​ര്യം കാട്ടുന്ന ഈ മനുഷ്യർ നമ്മെ സഹായി​ക്കാൻ ആഗ്രഹി​ക്കു​ന്ന​വ​രാണ്‌. തീർച്ച​യാ​യും, മൂപ്പൻമാ​രു​ടെ സഹായ​ത്തിൽനി​ന്നു മുഴു​വ​നാ​യി പ്രയോ​ജനം നേടാൻ, സഭയിൽ ആത്മീയ​മാ​യി അഭിവൃ​ദ്ധി​നേടി മുന്നേ​റാൻ, നാമെ​ല്ലാ​വ​രും പത്രോ​സി​ന്റെ ഈ ബുദ്ധ്യു​പ​ദേശം ബാധക​മാ​ക്കേ​ണ്ട​യാ​വ​ശ്യ​മുണ്ട്‌: “ഇളയവരേ, മൂപ്പൻമാർക്കു കീഴട​ങ്ങു​വിൻ. എല്ലാവ​രും തമ്മിൽ തമ്മിൽ കീഴടങ്ങി താഴ്‌മ ധരിച്ചു​കൊൾവിൻ. ദൈവം നിഗളി​ക​ളോ​ടു എതിർത്തു​നി​ല്‌ക്കു​ന്നു; താഴ്‌മ​യു​ള്ള​വർക്കോ കൃപ നൽകുന്നു.”—1 പത്രൊസ്‌ 5:5.

8, 9. ഒന്നു പത്രൊസ്‌ 5:6-11-ൽനിന്ന്‌ എന്ത്‌ ആശ്വാസം നേടാ​നാ​വും?

⁸ പത്രോസ്‌ ഇങ്ങനെ കൂട്ടി​ച്ചേർത്തു: “അവൻ തക്കസമ​യത്തു നിങ്ങളെ ഉയർത്തു​വാൻ ദൈവ​ത്തി​ന്റെ ബലമുള്ള കൈക്കീ​ഴു താണി​രി​പ്പിൻ. അവൻ നിങ്ങൾക്കാ​യി കരുതു​ന്ന​താ​ക​യാൽ നിങ്ങളു​ടെ സകല ചിന്താ​കു​ല​വും [“ഉത്‌കണ്‌ഠ,” NW] അവന്റെ​മേൽ ഇട്ടു​കൊൾവിൻ. നിർമ്മ​ദ​രാ​യി​രി​പ്പിൻ; ഉണർന്നി​രി​പ്പിൻ; നിങ്ങളു​ടെ പ്രതി​യോ​ഗി​യായ പിശാചു അലറുന്ന സിംഹം എന്നപോ​ലെ ആരെ വിഴുങ്ങേണ്ടു എന്നു തിരിഞ്ഞു ചുററി​ന​ട​ക്കു​ന്നു. ലോക​ത്തിൽ നിങ്ങൾക്കുള്ള സഹോ​ദ​ര​വർഗ്ഗ​ത്തി​ന്നു ആവക കഷ്ടപ്പാ​ടു​കൾ തന്നേ പൂർത്തി​യാ​യി വരുന്നു എന്നറിഞ്ഞു വിശ്വാ​സ​ത്തിൽ സ്ഥിരമു​ള്ള​വ​രാ​യി അവനോ​ടു എതിർത്തു നില്‌പിൻ. എന്നാൽ അല്‌പ​കാ​ല​ത്തേക്കു കഷ്ടം സഹിക്കുന്ന നിങ്ങളെ ക്രിസ്‌തു​വിൽ തന്റെ നിത്യ​തേ​ജ​സ്സി​ന്നാ​യി വിളി​ച്ചി​രി​ക്കുന്ന സർവ്വകൃ​പാ​ലു​വായ ദൈവം തന്നേ യഥാസ്ഥാ​ന​പ്പെ​ടു​ത്തി ഉറപ്പിച്ചു ശക്തീക​രി​ക്കും. ബലം എന്നെ​ന്നേ​ക്കും അവന്നു​ള്ളതു. ആമേൻ.”—1 പത്രൊസ്‌ 5:6-11.

⁹ ‘അവൻ നമുക്കാ​യി കരുതു​ന്ന​താ​ക​യാൽ നമ്മുടെ സകല ഉത്‌ക​ണ്‌ഠ​യും ദൈവ​ത്തി​ന്റെ​മേൽ ഇടാനാ​വു​മെന്നു’ തിരി​ച്ച​റി​യു​ന്നത്‌ എന്തൊരു ആശ്വാ​സ​മാണ്‌! പീഡന​വും മററു ദുരി​ത​ങ്ങ​ളും വരുത്തി​ക്കൊണ്ട്‌ യഹോ​വ​യു​മാ​യുള്ള നമ്മുടെ ബന്ധം തകർക്കാൻ പിശാചു നടത്തുന്ന പ്രവർത്ത​ന​ങ്ങ​ളാ​ണു നമ്മുടെ ഉത്‌ക​ണ്‌ഠ​യു​ടെ ഒരു കാരണ​മെ​ങ്കിൽ, നിർമ​ല​താ​പാ​ല​കരെ സംബന്ധിച്ച്‌ അതെല്ലാം ശുഭക​ര​മാ​യി പര്യവ​സാ​നി​ക്കു​മെന്ന്‌ അറിയു​ന്നത്‌ ആശ്ചര്യ​ക​ര​മല്ലേ? അതേ, കുറച്ചു സമയം സഹിച്ച​തി​നു​ശേഷം, അനർഹ​ദ​യ​യുള്ള ദൈവം നമ്മുടെ പരിശീ​ലനം അവസാ​നി​പ്പിച്ച്‌ നമ്മെ ഉറപ്പു​ള്ള​വ​രും ശക്തരു​മാ​ക്കി​ത്തീർക്കും.

10. ഉത്‌കണ്‌ഠ ലഘൂക​രി​ക്കാൻ നമ്മെ സഹായി​ക്കാ​നാ​വുന്ന ഏതു മൂന്നു ഗുണങ്ങ​ളെ​പ്പ​ററി 1 പത്രൊസ്‌ 5:6, 7 സൂചന തരുന്നു?

¹⁰ ഉത്‌ക​ണ്‌ഠയെ നേരി​ടാൻ നമ്മെ സഹായി​ക്കാ​നാ​വുന്ന മൂന്നു ഗുണഗ​ണ​ങ്ങ​ളെ​പ്പ​ററി 1 പത്രൊസ്‌ 5:6, 7 നമുക്കു സൂചന തരുന്നുണ്ട്‌. അതി​ലൊ​ന്നാണ്‌ താഴ്‌മ, അഥവാ “മനസ്സിന്റെ വിനയം,” [NW]. ക്ഷമയുടെ ആവശ്യം സൂചി​പ്പി​ക്കു​ന്ന​താണ്‌ 6-ാം വാക്യ​ത്തി​ലെ “തക്കസമ​യത്തു” എന്ന പ്രയോ​ഗം. ‘അവൻ നമുക്കാ​യി കരുതു​ന്ന​താ​ക​യാൽ’ ഉത്‌ക​ണ്‌ഠ​യെ​ല്ലാം നമുക്ക്‌ ഉറപ്പാ​യും ദൈവ​ത്തി​നു​മേൽ ഇടാനാ​വു​മെന്ന്‌ 7-ാം വാക്യം പ്രകട​മാ​ക്കു​ന്നു. തന്നെയു​മല്ല, യഹോ​വ​യിൽ സമ്പൂർണ വിശ്വാ​സ​മർപ്പി​ക്കാൻ ആ വാക്കുകൾ നമ്മെ പ്രോ​ത്സാ​ഹി​പ്പി​ക്കു​ക​യും ചെയ്യുന്നു. അതു​കൊണ്ട്‌, താഴ്‌മ, ക്ഷമ, ദൈവ​ത്തി​ലുള്ള സമ്പൂർണ ആശ്രയം എന്നിവ എങ്ങനെ​യാണ്‌ ഉത്‌കണ്‌ഠ ലഘൂക​രി​ക്കാൻ സഹായി​ക്കു​ന്ന​തെന്നു നമുക്കു നോക്കാം.

താഴ്‌മ സഹായി​ക്കുന്ന വിധം

11. ഉത്‌ക​ണ്‌ഠയെ നേരി​ടാൻ താഴ്‌മ നമ്മെ എങ്ങനെ സഹായി​ച്ചേ​ക്കാം?

¹¹ നാം താഴ്‌മ​യു​ള്ള​വ​രാ​ണെ​ങ്കിൽ, നമ്മെക്കാൾ അപാര​മാം ശ്രേഷ്‌ഠ​ത​യു​ള്ള​താണ്‌ ദൈവ​ത്തി​ന്റെ ചിന്തക​ളെന്നു നാം സമ്മതി​ക്കും. (യെശയ്യാ​വു 55:8, 9) യഹോ​വ​യു​ടെ സർവത​ല​സ്‌പർശി​യായ കാഴ്‌ച​പ്പാ​ടി​നോ​ടുള്ള താരത​മ്യ​ത്തിൽ നമ്മുടെ മാനസി​ക​പ്രാ​പ്‌തി പരിമി​തി​യു​ള്ള​താ​ണെന്ന്‌ അംഗീ​ക​രി​ക്കാൻ താഴ്‌മ നമ്മെ സഹായി​ക്കു​ന്നു. നീതി​മാ​നായ ഇയ്യോ​ബി​ന്റെ കാര്യ​ത്തിൽ പ്രകട​മാ​ക്ക​പ്പെ​ട്ട​തു​പോ​ലെ, നാം വിവേ​ചി​ച്ച​റി​യാത്ത കാര്യങ്ങൾ അവൻ കാണുന്നു. (ഇയ്യോബ്‌ 1:7-12; 2:1-6) “ദൈവ​ത്തി​ന്റെ ബലമുള്ള കൈക്കീ​ഴു” നമ്മെത്തന്നെ താഴ്‌ത്തു​മ്പോൾ, പരമാ​ധി​കാ​രി​യാ​യ​വ​നു​മാ​യുള്ള ബന്ധത്തിൽ നമ്മുടെ താഴ്‌ന്ന സ്ഥാനത്തെ നാം അംഗീ​ക​രി​ക്കു​ക​യാണ്‌. അതിന്റെ ഫലമോ, അവൻ അനുവ​ദി​ക്കുന്ന സാഹച​ര്യ​ങ്ങളെ നേരി​ടാൻ ഇതു നമ്മെ സഹായി​ക്കു​ന്നു. പെട്ടെ​ന്നുള്ള ഒരു ആശ്വാ​സ​ത്തി​നാ​യി നമ്മുടെ ഹൃദയങ്ങൾ കേഴു​ക​യാ​വാം. എന്നാൽ യഹോ​വ​യു​ടെ ഗുണങ്ങൾ പരിപൂർണ​മാ​യും സന്തുലി​ത​മാ​യ​തു​കൊണ്ട്‌, നമുക്കു​വേണ്ടി എപ്പോൾ, എങ്ങനെ പ്രവർത്തി​ക്ക​ണ​മെന്ന്‌ അവനു കൃത്യ​മാ​യി അറിയാം. അപ്പോൾ, ഉത്‌ക​ണ്‌ഠ​കളെ നേരി​ടാൻ അവൻ നമ്മെ സഹായി​ക്കു​മെന്ന ഉറപ്പോ​ടെ, നമുക്കു കൊച്ചു​കു​ട്ടി​ക​ളെ​പ്പോ​ലെ, യഹോ​വ​യു​ടെ കരുത്തു​ററ കരങ്ങളിൽ താഴ്‌മ​യോ​ടെ പിടി​ക്കാം.—യെശയ്യാ​വു 41:8-13.

12. നാം എബ്രായർ 13:5-ലെ വാക്കുകൾ താഴ്‌മ​യോ​ടെ ബാധക​മാ​ക്കു​മ്പോൾ അതു ഭൗതിക സുരക്ഷി​ത​ത്വ​ത്തെ​ക്കു​റി​ച്ചുള്ള ഉത്‌ക​ണ്‌ഠയെ എങ്ങനെ ബാധി​ച്ചേ​ക്കാം?

¹² ദൈവ​വ​ച​ന​ത്തിൽനി​ന്നുള്ള ബുദ്ധ്യു​പ​ദേശം ബാധക​മാ​ക്കാ​നുള്ള മനസ്സൊ​രു​ക്കം താഴ്‌മ​യിൽപ്പെ​ടു​ന്നുണ്ട്‌. മിക്ക​പ്പോ​ഴും ഉത്‌ക​ണ്‌ഠയെ ലഘൂക​രി​ക്കാൻ ദൈവ​വ​ച​ന​ത്തി​നു കഴിയും. ഉദാഹ​ര​ണ​ത്തിന്‌, ഭൗതിക കാര്യ​ങ്ങ​ളിൽ പരിധി​വിട്ട്‌ ഉൾപ്പെ​ട്ട​തി​ന്റെ​പേ​രിൽ ഉണ്ടായ​താ​ണു നമ്മുടെ ഉത്‌ക​ണ്‌ഠ​യെ​ങ്കിൽ, പൗലോ​സി​ന്റെ ഈ ബുദ്ധ്യു​പ​ദേ​ശ​ത്തെ​ക്കു​റി​ച്ചു ധ്യാനി​ക്കു​ന്നതു നന്നായി​രി​ക്കും: ‘നിങ്ങളു​ടെ നടപ്പു ദ്രവ്യാ​ഗ്ര​ഹ​മി​ല്ലാ​ത്ത​താ​യി​രി​ക്കട്ടെ; ഉള്ളതു​കൊ​ണ്ടു തൃപ്‌തി​പ്പെ​ടു​വിൻ; “ഞാൻ നിന്നെ ഒരുനാ​ളും കൈ വിടു​ക​യില്ല, ഉപേക്ഷി​ക്ക​യു​മില്ല” എന്നു ദൈവം തന്നേ അരുളി​ചെ​യ്‌തി​രി​ക്കു​ന്നു​വ​ല്ലോ.’ (എബ്രായർ 13:5) അത്തരം ബുദ്ധ്യു​പ​ദേശം താഴ്‌മ​യോ​ടെ ബാധക​മാ​ക്കി​ക്കൊണ്ട്‌, ഭൗതി​ക​സു​ര​ക്ഷി​ത​ത്വം സംബന്ധിച്ച വലിയ ഉത്‌ക​ണ്‌ഠ​യിൽനിന്ന്‌ അനേക​രും സ്വയം മുക്തി​നേ​ടി​യി​ട്ടുണ്ട്‌. അവരുടെ സാമ്പത്തിക സ്ഥിതി മെച്ച​പ്പെ​ട്ടി​രി​ക്കാ​നി​ട​യി​ല്ലെ​ങ്കി​ലും അത്‌ അവരുടെ ചിന്തകളെ ആത്മീയ ദോഷ​ത്തി​ലേക്കു നയിച്ചില്ല.

ക്ഷമയുടെ പങ്ക്‌

13, 14. (എ) ക്ഷമാപൂർവ​മായ സഹിച്ചു​നിൽപ്പു സംബന്ധിച്ച്‌, ഇയ്യോബ്‌ എന്ന മനുഷ്യൻ ഏതു മാതൃക വെച്ചു? (ബി) യഹോ​വ​ക്കാ​യി ക്ഷമാപൂർവം കാത്തി​രി​ക്കു​മ്പോൾ അതു നമുക്ക്‌ എന്തു കൈവ​രു​ത്തും?

¹³ ക്ഷമാപൂർവ​ക​മായ സഹിച്ചു​നിൽപ്പി​നെ സൂചി​പ്പി​ക്കു​ന്ന​താണ്‌ 1 പത്രൊസ്‌ 5:6-ലെ “തക്കസമ​യത്തു” എന്ന പ്രയോ​ഗം. ചില​പ്പോൾ ഒരു പ്രശ്‌നം കുറെ അധികം നാൾ നീണ്ടു​പോ​കു​ന്നു. അതിന്‌ ഉത്‌കണ്‌ഠ വർധി​പ്പി​ക്കാ​നാ​വും. അപ്പോ​ഴാ​ണു നാം യഹോ​വ​യു​ടെ കരങ്ങളിൽ കാര്യങ്ങൾ വിശേ​ഷി​ച്ചും ഏൽപ്പി​ക്കേ​ണ്ട​യാ​വ​ശ്യ​മു​ള്ളത്‌. ശിഷ്യ​നായ യാക്കോബ്‌ എഴുതി: “നോക്കൂ! സഹിച്ചു​നി​ന്ന​വരെ നാം സന്തുഷ്ട​രാ​യി പ്രഖ്യാ​പി​ക്കു​ന്നു. നിങ്ങൾ ഇയ്യോ​ബി​ന്റെ സഹിഷ്‌ണു​ത​യെ​ക്കു​റി​ച്ചു കേൾക്കു​ക​യും യഹോവ അവനോട്‌ അവസാനം എന്തു പ്രവർത്തി​ച്ചു​വെന്നു കാണു​ക​യും ചെയ്‌തി​രി​ക്കു​ന്നു. യഹോവ പ്രീതി​യിൽ വളരെ ആർദ്ര​ത​യു​ള്ള​വ​നും അനുക​മ്പ​യു​ള്ള​വ​നു​മാണ്‌.” (യാക്കോബ്‌ 5:11, NW) ഇയ്യോ​ബി​നു സാമ്പത്തിക നഷ്ടങ്ങളു​ണ്ടാ​യി, അവന്റെ പത്തു മക്കളും മരിച്ചു, ബീഭത്സ​മായ അസുഖം പിടി​പെട്ടു, വ്യാജ ആശ്വാ​സകർ തെററാ​യി കുററം​വി​ധി​ച്ചു. അത്തരം സാഹച​ര്യ​ങ്ങ​ളിൽ ചുരു​ങ്ങി​യ​പക്ഷം കുറ​ച്ചൊ​ക്കെ ഉത്‌കണ്‌ഠ സാധാ​ര​ണ​മാണ്‌.

¹⁴ ഏതു​പ്ര​കാ​ര​ത്തി​ലും, ക്ഷമാപൂർവ​മായ സഹിച്ചു​നിൽപ്പിൽ ഇയ്യോബ്‌ മാതൃ​ക​യാ​യി​രു​ന്നു. വിശ്വാ​സ​ത്തി​ന്റെ ഒരു കഠിന പരി​ശോ​ധ​ന​യ്‌ക്കു നാം വിധേ​യ​മാ​യി​രി​ക്കു​ക​യാ​ണെ​ങ്കിൽ, അവൻ ചെയ്‌ത​തു​പോ​ലെ ആശ്വാ​സ​ത്തി​നാ​യി നാം കാത്തി​രി​ക്കേ​ണ്ട​തു​ണ്ടാ​യി​രി​ക്കാം. എന്നാൽ അവസാനം ദൈവം അവനെ ദുരി​ത​ങ്ങ​ളിൽനി​ന്നു മോചി​പ്പി​ച്ചു​കൊ​ണ്ടും സമൃദ്ധ​മാ​യി പ്രതി​ഫലം കൊടു​ത്തു​കൊ​ണ്ടും അവനു​വേണ്ടി പ്രവർത്തി​ക്കു​ക​തന്നെ ചെയ്‌തു. (ഇയ്യോബ്‌ 42:10-17) യഹോ​വ​ക്കാ​യി ക്ഷമാപൂർവം കാത്തി​രി​ക്കു​ന്നതു നമ്മുടെ സഹിഷ്‌ണുത വളർത്തു​ക​യും അവനോ​ടുള്ള നമ്മുടെ ഭക്തിയു​ടെ ആഴം വെളി​പ്പെ​ടു​ത്തു​ക​യും ചെയ്യും.—യാക്കോബ്‌ 1:2-4.

യഹോ​വ​യി​ലുള്ള ആശ്രയം

15. യഹോ​വ​യിൽ നാം സമ്പൂർണ​മാ​യി ആശ്രയി​ക്കേ​ണ്ടത്‌ എന്തു​കൊണ്ട്‌?

¹⁵ ‘അവൻ നമുക്കാ​യി കരുതു​ന്ന​താ​ക​യാൽ നമ്മുടെ സകല ഉത്‌ക​ണ്‌ഠ​യും ദൈവ​ത്തി​ന്റെ​മേൽ ഇടാൻ’ പത്രോസ്‌ ഉദ്‌ബോ​ധി​പ്പി​ച്ചു. (1 പത്രൊസ്‌ 5:7) അതു​കൊണ്ട്‌, യഹോ​വ​യിൽ സമ്പൂർണ ആശ്രയം വെക്കാൻ നമുക്കു കഴിയും, കഴി​യേ​ണ്ട​താണ്‌. സദൃശ​വാ​ക്യ​ങ്ങൾ 3:5, 6 പറയുന്നു: “പൂർണ്ണ​ഹൃ​ദ​യ​ത്തോ​ടെ യഹോ​വ​യിൽ ആശ്രയിക്ക; സ്വന്ത വിവേ​ക​ത്തിൽ ഊന്നരു​തു. നിന്റെ എല്ലാവ​ഴി​ക​ളി​ലും അവനെ നിനെ​ച്ചു​കൊൾക; അവൻ നിന്റെ പാതകളെ നേരെ​യാ​ക്കും.” കഴിഞ്ഞ​കാല അനുഭ​വ​ങ്ങ​ളു​ടെ​പേ​രിൽ, ഉത്‌ക​ണ്‌ഠാ​കു​ല​രായ ചിലർക്കു മററു മനുഷ്യ​രിൽ ആശ്രയ​മർപ്പി​ക്കാൻ ബുദ്ധി​മു​ട്ടുണ്ട്‌. എന്നാൽ നമ്മുടെ ജീവന്റെ ഉറവും ജീവൻ നിലനിർത്തു​ന്ന​വ​നു​മായ നമ്മുടെ സ്രഷ്ടാ​വിൽ ആശ്രയം വെക്കാൻ നമുക്കു തീർച്ച​യാ​യും കാരണ​മുണ്ട്‌. ചില സംഗതി​ക​ളോ​ടു നാം എങ്ങനെ പ്രതി​ക​രി​ക്കു​മെന്നു നമുക്കു നിശ്ചയ​മി​ല്ലാ​യി​രി​ക്കാം. എങ്കിലും ദുരന്ത​ങ്ങ​ളിൽനി​ന്നു നമ്മെ രക്ഷിക്കാൻ നമുക്ക്‌ എല്ലായ്‌പോ​ഴും യഹോ​വ​യിൽ ആശ്രയി​ക്കാ​നാ​വും.—സങ്കീർത്തനം 34:18, 19; 36:9; 56:3, 4.

16. ഭൗതി​ക​വ​സ്‌തു​ക്കളെ സംബന്ധി​ച്ചുള്ള ഉത്‌ക​ണ്‌ഠ​യെ​ക്കു​റി​ച്ചു യേശു​ക്രി​സ്‌തു എന്തു പറഞ്ഞു?

¹⁶ ദൈവ​ത്തിൽ ആശ്രയം വെക്കു​ന്ന​തിൽ അവന്റെ പുത്ര​നായ യേശു​ക്രി​സ്‌തു​വി​നെ അനുസ​രി​ക്കു​ന്ന​തും ഉൾപ്പെ​ടു​ന്നു. പിതാ​വിൽനി​ന്നു പഠിച്ച സംഗതി​ക​ളാണ്‌ അവൻ പഠിപ്പി​ച്ചത്‌. (യോഹ​ന്നാൻ 7:16) യഹോ​വയെ സേവി​ച്ചു​കൊണ്ട്‌ ‘സ്വർഗ്ഗ​ത്തിൽ നിക്ഷേപം സ്വരൂ​പി​ക്കാൻ’ യേശു തന്റെ ശിഷ്യൻമാ​രെ ഉദ്‌ബോ​ധി​പ്പി​ച്ചു. എന്നാൽ ഭക്ഷണം, വസ്‌ത്രം, പാർപ്പി​ടം എന്നിവ​യുൾപ്പെ​ടുന്ന ഭൗതി​കാ​വ​ശ്യ​ങ്ങളെ സംബന്ധി​ച്ചോ? “നിങ്ങൾ വിചാ​ര​പ്പെ​ട​രു​തു, [‘ഉത്‌ക​ണ്‌ഠാ​കു​ല​രാ​കു​ന്നതു നിർത്തുക,’ NW]” എന്നു യേശു ബുദ്ധ്യു​പ​ദേ​ശി​ച്ചു. ദൈവം പക്ഷികളെ തീററി​പ്പോ​റ​റു​ന്നു​വെന്ന്‌ അവൻ സൂചി​പ്പി​ച്ചു. അവൻ പുഷ്‌പ​ങ്ങളെ മനോ​ജ്ഞ​മാ​യി അണിയി​ക്കു​ന്നു. ഇവയെ​ക്കാ​ളെ​ല്ലാം മൂല്യ​മി​ല്ലേ ദൈവ​ത്തി​ന്റെ മാനു​ഷ​ദാ​സൻമാർക്ക്‌? തീർച്ച​യാ​യും ഉണ്ട്‌. അതു​കൊണ്ട്‌, “മുമ്പെ അവന്റെ രാജ്യ​വും [ദൈവ​ത്തി​ന്റെ] നീതി​യും അന്വേ​ഷി​പ്പിൻ; അതോ​ടു​കൂ​ടെ ഇതൊ​ക്കെ​യും നിങ്ങൾക്കു കിട്ടും” എന്നു യേശു ഉദ്‌ബോ​ധി​പ്പി​ച്ചു. “അതു​കൊ​ണ്ടു നാളെ​ക്കാ​യി വിചാ​ര​പ്പെ​ട​രു​തു; നാളത്തെ ദിവസം തനിക്കാ​യി വിചാ​ര​പ്പെ​ടു​മ​ല്ലോ; അതതു ദിവസ​ത്തി​ന്നു അന്നന്നത്തെ ദോഷം മതി” എന്ന്‌ അവൻ തുടർന്നു​പ​റ​യു​ക​യും ചെയ്‌തു. (മത്തായി 6:20, 25-34) അതേ, നമുക്കു ഭക്ഷണവും വസ്‌ത്ര​വും പാർപ്പി​ട​വും ആവശ്യ​മാണ്‌. എന്നാൽ യഹോ​വ​യിൽ ആശ്രയി​ക്കു​ന്നെ​ങ്കിൽ, ഈ വക സംഗതി​ക​ളെ​ക്കു​റി​ച്ചു നാം അനാവ​ശ്യ​മാ​യി വ്യാകു​ല​പ്പെ​ടു​ക​യില്ല.

17. മുമ്പെ രാജ്യം അന്വേ​ഷി​ക്കേ​ണ്ട​തി​ന്റെ ആവശ്യം നമുക്ക്‌ എങ്ങനെ ദൃഷ്ടാ​ന്തീ​ക​രി​ക്കാ​നാ​വും?

¹⁷ മുമ്പേ രാജ്യം അന്വേ​ഷി​ക്കാൻ, നാം ദൈവ​ത്തിൽ ആശ്രയം വെക്കു​ക​യും നമ്മുടെ മുൻഗ​ണ​നകൾ അതതിന്റെ ക്രമത്തിൽ വെക്കു​ക​യും വേണം. ശ്വാ​സോ​ച്ഛ്വാ​സ​ത്തി​നു​വേ​ണ്ടുന്ന യന്ത്രസാ​മ​ഗ്രി​ക​ളൊ​ന്നും കൂടാതെ മുത്തു​ച്ചി​പ്പി തേടി ഒരു മുങ്ങൽകാരൻ വെള്ളത്തി​ന​ടി​യി​ലേക്കു മുങ്ങാ​ങ്കു​ഴി​യി​ട്ടേ​ക്കാം. ഇത്‌ അയാളു​ടെ കുടും​ബത്തെ തീററി​പ്പോ​റ​റാ​നുള്ള ഉപാധി​യാണ്‌. തീർച്ച​യാ​യും പ്രാധാ​ന്യ​മുള്ള ഒരു മുൻഗ​ണ​ന​തന്നെ! എന്നാൽ എന്തിനാ​ണു കൂടുതൽ പ്രാധാ​ന്യം? വായു​വിന്‌! ശ്വാസ​കോ​ശ​ങ്ങ​ളിൽ വായു നിറക്കാൻ അയാൾ മുടക്കം​കൂ​ടാ​തെ വെള്ളത്തി​നു മുകളിൽ വന്നേ തീരൂ. വായു​വി​നാ​ണു കൂടുതൽ പ്രാധാ​ന്യ​മുള്ള മുൻഗണന. അതു​പോ​ലെ, ജീവി​ത​ത്തി​ലെ അത്യാ​വശ്യ സാധനങ്ങൾ ഉണ്ടാക്കാൻ നാം ഏതെങ്കി​ലും തരത്തിൽ ഈ വ്യവസ്ഥി​തി​യിൽ ഉൾപ്പെ​ടേ​ണ്ടി​വ​ന്നേ​ക്കാം. എന്നുവ​രി​കി​ലും, ആത്മീയ കാര്യ​ങ്ങൾക്ക്‌ ഒന്നാം സ്ഥാനം ലഭിക്കണം. കാരണം നമ്മുടെ കുടും​ബ​ത്തി​ന്റെ ജീവൻതന്നെ ആശ്രയി​ച്ചി​രി​ക്കു​ന്നത്‌ ഈ സംഗതി​ക​ളി​ലാണ്‌. ഭൗതിക സംഗതി​ക​ളെ​ക്കു​റി​ച്ചുള്ള അനാവശ്യ ഉത്‌കണ്‌ഠ ഒഴിവാ​ക്കാൻ നമുക്കു ദൈവ​ത്തിൽ സമ്പൂർണ ആശ്രയം ഉണ്ടായി​രി​ക്കണം. അതിലു​പരി, ‘കർത്താ​വി​ന്റെ വേലയിൽ ധാരാളം ചെയ്യാ​നു​ണ്ടാ​യി​രി​ക്കുന്ന’തും ഉത്‌കണ്‌ഠ ലഘൂക​രി​ക്കാൻ സഹായി​ക്കും. എന്തെന്നാൽ “യഹോ​വ​യി​ങ്കലെ സന്തോഷം” നമ്മുടെ ശക്തിദുർഗ​മാണ്‌.”—1 കൊരി​ന്ത്യർ 15:58, NW; നെഹെ​മ്യാ​വു 8:10.

നിങ്ങളു​ടെ ഉത്‌കണ്‌ഠ യഹോ​വ​യിൽ ഇടുന്ന​തിൽ തുടരുക

18. ഉത്‌ക​ണ്‌ഠ​ക​ളെ​ല്ലാം യഹോ​വ​യിൽ ഇടുന്നതു നമ്മെ വാസ്‌ത​വ​ത്തിൽ സഹായി​ക്കു​മെ​ന്ന​തിന്‌ എന്തു തെളി​വുണ്ട്‌?

¹⁸ ആത്മീയ ലക്ഷ്യത്തിൽ വ്യക്തമാ​യി ദൃഷ്ടി​പ​തി​പ്പി​ച്ചു നില​കൊ​ള്ളാൻ, നാം നമ്മുടെ ഉത്‌കണ്‌ഠ യഹോ​വ​യു​ടെ​മേൽ ഇടുന്ന​തിൽ തുടരണം. തന്റെ ദാസൻമാർക്കു​വേണ്ടി അവൻ വാസ്‌ത​വ​ത്തിൽ കരുതു​ന്നു​വെന്ന്‌ എല്ലായ്‌പോ​ഴും ഓർക്കുക. ഒരു ദൃഷ്ടാന്തം പറയാം: ഭർത്താവ്‌ അവിശ്വ​സ്‌തത കാണി​ച്ച​തു​കൊണ്ട്‌ ഒരു ക്രിസ്‌തീയ സ്‌ത്രീ ക്രമാ​തീ​ത​മാ​യി ഉത്‌ക​ണ്‌ഠാ​കു​ല​യാ​യി. അങ്ങനെ, ഉറങ്ങാൻപോ​ലും സാധ്യ​മ​ല്ലാ​താ​യി. (താരത​മ്യം ചെയ്യുക: സങ്കീർത്തനം 119:28.) എന്നിരു​ന്നാ​ലും കിടക്ക​യി​ലാ​യി​രി​ക്കു​മ്പോൾ അവൾ തന്റെ ഉത്‌ക​ണ്‌ഠ​യെ​ല്ലാം യഹോ​വ​യു​ടെ​മേൽ ഇട്ടു. താനും തന്റെ രണ്ടു കൊച്ചു പെൺകു​ട്ടി​ക​ളും അനുഭ​വി​ക്കു​ക​യാ​യി​രുന്ന മനോ​വേ​ദ​ന​യെ​ക്കു​റിച്ച്‌ അവൾ ഹൃദയം തുറന്ന്‌ അവനോ​ടു പറയു​മാ​യി​രു​ന്നു. ആശ്വാ​സ​ത്തി​നാ​യി ഉള്ളുരു​കി ഉറക്കെ പ്രാർഥി​ച്ച​ശേഷം അവൾക്ക്‌ എല്ലായ്‌പോ​ഴും ഉറങ്ങാൻ സാധി​ക്കു​മാ​യി​രു​ന്നു. എന്തെന്നാൽ, തന്നെയും കുട്ടി​ക​ളെ​യും യഹോവ പരിപാ​ലി​ക്കു​മെന്ന വിശ്വാ​സം അവൾക്കു​ണ്ടാ​യി​രു​ന്നു. തിരു​വെ​ഴു​ത്തു​പ​ര​മാ​യി വിവാ​ഹ​മോ​ചനം നേടിയ ഈ സ്‌ത്രീ ഒരു മൂപ്പനെ വിവാഹം ചെയ്‌ത്‌ ഇപ്പോൾ സന്തുഷ്ട​യാ​യി കഴിയു​ക​യാണ്‌.

19, 20. (എ) ഉത്‌ക​ണ്‌ഠയെ നേരി​ടാ​നാ​വുന്ന ഏതാനും വിധങ്ങ​ളേവ? (ബി) നമ്മുടെ ഉത്‌ക​ണ്‌ഠകൾ സംബന്ധി​ച്ചു നാം എന്തു ചെയ്യു​ന്ന​തിൽ തുടരണം?

¹⁹ യഹോ​വ​യു​ടെ ജനം എന്നനി​ല​യിൽ, ഉത്‌ക​ണ്‌ഠയെ നേരി​ടാൻ നമുക്കു വ്യത്യസ്‌ത വിധങ്ങ​ളുണ്ട്‌. ദൈവ​വ​ചനം ബാധക​മാ​ക്കു​ന്നതു വിശേ​ഷാൽ സഹായ​ക​മാണ്‌. സഹായ​ക​വും നവോൻമേ​ഷ​പ്ര​ദ​വു​മായ ലേഖനങ്ങൾ പ്രസി​ദ്ധീ​ക​രി​ക്കുന്ന വീക്ഷാ​ഗോ​പു​ര​വും ഉണരുക!യും ഉൾപ്പെടെ, “വിശ്വ​സ്‌ത​നും വിവേ​കി​യു​മായ അടിമ”യിലൂടെ ദൈവം പ്രദാനം ചെയ്യുന്ന സമ്പന്നമായ ആത്മീയ ഭക്ഷണം നമുക്കുണ്ട്‌. (മത്തായി 24:45-47, NW) ദൈവ​ത്തി​ന്റെ പരിശു​ദ്ധാ​ത്മാ​വി​ന്റെ സഹായ​വു​മുണ്ട്‌. സ്ഥിരവും തീക്ഷ്‌ണ​വു​മായ പ്രാർഥ​ന​യും നമുക്കു വലിയ പ്രയോ​ജ​നങ്ങൾ കൈവ​രു​ത്തു​ന്നു. ആത്മീയ സഹായ​വും ആശ്വാ​സ​വും പ്രദാനം ചെയ്യാൻ നിയമിത ക്രിസ്‌തീയ മൂപ്പൻമാർ തയ്യാറു​ള്ള​വ​രും മനസ്സൊ​രു​ക്ക​മു​ള്ള​വ​രു​മാണ്‌.

²⁰ നമ്മെ കുഴക്കി​യേ​ക്കാ​വുന്ന ഉത്‌ക​ണ്‌ഠയെ നേരി​ടാൻ നമ്മു​ടെ​തന്നെ താഴ്‌മ​യും ക്ഷമയും അത്യന്തം പ്രയോ​ജനം ചെയ്യും. വിശേ​ഷാൽ പ്രാധാ​ന്യ​മു​ള്ളതു യഹോ​വ​യി​ലുള്ള സമ്പൂർണ ആശ്രയ​മാണ്‌. എന്തെന്നാൽ നമുക്ക്‌ അവന്റെ സഹായ​വും നിർദേ​ശ​വും ലഭിക്കു​മ്പോൾ നമ്മുടെ വിശ്വാ​സം കെട്ടി​പ്പെ​ടു​ക്ക​പ്പെ​ടു​ന്നു. ഫലമോ, അനാവ​ശ്യ​മാ​യി കുഴങ്ങു​ന്ന​വ​രാ​യി​ത്തീ​രു​ന്ന​തിൽനി​ന്നു ദൈവ​ത്തി​ലുള്ള വിശ്വാ​സം നമ്മെ തടയും. (യോഹ​ന്നാൻ 14:1) മുമ്പേ രാജ്യം അന്വേ​ഷി​ക്കാ​നും കർത്താ​വി​ന്റെ ആഹ്ലാദ​ക​ര​മായ വേലയിൽ തിര​ക്കോ​ടെ ഏർപ്പെ​ടാ​നും വിശ്വാ​സം നമ്മെ പ്രേരി​പ്പി​ക്കും. ഉത്‌ക​ണ്‌ഠയെ നേരി​ടാൻ അതു നമ്മെ സഹായി​ക്കു​ക​യും ചെയ്യും. അത്തരം പ്രവൃത്തി ദൈവ​ത്തി​ന്റെ സ്‌തു​തി​കൾ നിത്യ​മാ​യി പാടു​ന്ന​വ​രു​ടെ ഇടയിൽ നമ്മെ സുരക്ഷാ​ബോ​ധ​മു​ള്ള​വ​രാ​ക്കും. (സങ്കീർത്തനം 104:33) അതു​കൊണ്ട്‌, നമുക്കു തുടർന്നും നമ്മുടെ ഉത്‌കണ്‌ഠ യഹോ​വ​യു​ടെ​മേൽ ഇടാം.

നിങ്ങൾ എങ്ങനെ പ്രതി​ക​രി​ക്കും?

◻ ഉത്‌ക​ണ്‌ഠയെ എങ്ങനെ നിർവ​ചി​ക്കാം?

◻ നമുക്ക്‌ ഉത്‌ക​ണ്‌ഠയെ നേരി​ടാ​നാ​വുന്ന ചില വിധങ്ങ​ളേവ?

◻ ഉത്‌കണ്‌ഠ ലഘൂക​രി​ക്കാൻ താഴ്‌മ​യും ക്ഷമയും സഹായി​ക്കു​ന്ന​തെ​ങ്ങനെ?

◻ ഉത്‌ക​ണ്‌ഠയെ നേരി​ടു​ന്ന​തിൽ, യഹോ​വ​യി​ലുള്ള സമ്പൂർണ ആശ്രയം മർമ​പ്ര​ധാ​ന​മാ​യി​രി​ക്കു​ന്ന​തെ​ന്തു​കൊണ്ട്‌?

◻ നാം നമ്മുടെ ഉത്‌ക​ണ്‌ഠ​ക​ളെ​ല്ലാം യഹോ​വ​യിൽ ഇടുന്ന​തിൽ തുട​രേ​ണ്ടത്‌ എന്തു​കൊണ്ട്‌?

[24-ാം പേജിലെ ചിത്രം]

“ഉത്‌ക​ണ്‌ഠാ​കു​ല​രാ​കു​ന്നതു നിർത്തുക” എന്നു യേശു പറഞ്ഞ​തെ​ന്തു​കൊ​ണ്ടെന്നു നിങ്ങൾക്ക്‌ അറിയാ​മോ?