നിങ്ങൾക്ക്‌ അറിയാ​മോ?

എബ്രാ​യ​തി​രു​വെ​ഴു​ത്തു​ക​ളിൽ പരാമർശി​ച്ചി​ട്ടുള്ള “കുറഞ്ഞത്‌ 50 പേരെ​ങ്കി​ലും” കഴിഞ്ഞ​കാ​ലത്ത്‌ ജീവി​ച്ചി​രു​ന്ന​വ​രാ​ണെ​ന്ന​തിന്‌ മതിയായ തെളി​വു​ക​ളു​ണ്ടെന്ന്‌ പുരാ​വസ്‌തു​ശാസ്‌ത്ര​ജ്ഞ​ന്മാ​രു​ടെ ആധുനി​ക​ക​ണ്ടെ​ത്ത​ലു​കൾ വ്യക്തമാ​ക്കു​ന്ന​താ​യി ഇതി​നെ​ക്കു​റി​ച്ചുള്ള ഒരു ലേഖന​ത്തിൽ (Biblical Archaeology Review) പ്രസി​ദ്ധീ​ക​രി​ച്ചി​ട്ടുണ്ട്‌. ഇവരിൽ, യെഹൂ​ദ​യി​ലും ഇസ്രാ​യേ​ലി​ലും ഉണ്ടായി​രുന്ന 14 രാജാ​ക്ക​ന്മാർ ഉൾപ്പെ​ടു​ന്നു: ദാവീ​ദി​നെ​യും ഹിസ്‌കീ​യാ​വി​നെ​യും പോലെ പ്രശസ്‌ത​രായ വ്യക്തി​ക​ളും മെനഹേം, പേക്കഹ്‌ പോ​ലെ​യുള്ള അത്ര പ്രശസ്‌ത​ര​ല്ലാ​ത്ത​വ​രും. മാത്രമല്ല, ഈ പട്ടിക​യിൽ അഞ്ച്‌ ഫറവോ​ന്മാ​രും, അസീറിയ (അശ്ശൂർ), ബാബി​ലോ​ണിയ, മോവാബ്‌, പേർഷ്യ, സിറിയ എന്നിവി​ട​ങ്ങ​ളി​ലെ 19 രാജാ​ക്ക​ന്മാ​രും ഉണ്ട്‌. കഴിഞ്ഞ കാലത്ത്‌ ഭരിച്ചി​രുന്ന ഇത്തരം ഏകാധി​പ​തി​കൾ മാത്രമല്ല ബൈബിൾരേ​ഖ​യി​ലും പുരാ​വസ്‌തു​രേ​ഖ​യി​ലും ഉള്ളത്‌. അത്ര പ്രശസ്‌ത​ര​ല്ലാത്ത മഹാപു​രോ​ഹി​ത​ന്മാർ, പകർപ്പെ​ഴു​ത്തു​കാർ, മറ്റ്‌ ഉദ്യോ​ഗ​സ്ഥ​ന്മാർ തുടങ്ങി​യ​വ​രും ഇതിലുണ്ട്‌.

ഈ വ്യക്തി​ക​ളെ​ല്ലാം ജീവി​ച്ചി​രു​ന്നു​വെ​ന്ന​തിന്‌, “വേണ്ടത്ര തെളി​വു​ക​ളു​ണ്ടെന്ന്‌ പണ്ഡിത​ന്മാർ അംഗീ​ക​രി​ക്കുന്ന”തായി ആ ലേഖനം പ്രസ്‌താ​വി​ക്കു​ന്നു. അതു​പോ​ലെ, ക്രിസ്‌ത്യൻ ഗ്രീക്ക്‌ തിരു​വെ​ഴു​ത്തു​ക​ളും പല ചരി​ത്ര​പു​രു​ഷ​ന്മാ​രെ​ക്കു​റിച്ച്‌ പരാമർശി​ക്കു​ന്നുണ്ട്‌. അവരിൽ ചിലരായ ഹെരോ​ദാവ്‌, പൊന്തി​യൊസ്‌ പീലാ​ത്തൊസ്‌, തിബെ​ര്യൊസ്‌, കയ്യഫാവ്‌, സെർഗ്യൊസ്‌ പൗലോസ്‌ എന്നിവർ ചരി​ത്ര​വ്യ​ക്തി​ക​ളാ​ണെന്നു സ്ഥാപി​ക്കു​ന്ന​തിന്‌ ആവശ്യ​മായ പുരാ​വസ്‌തു​തെ​ളി​വു​ക​ളു​മുണ്ട്‌.

ബൈബി​ളിൽ പറഞ്ഞി​രി​ക്കുന്ന ദേശങ്ങ​ളിൽ ഇപ്പോൾ സിംഹ​ങ്ങ​ളൊ​ന്നും ഇല്ലെങ്കി​ലും, ആ മൃഗ​ത്തെ​ക്കു​റിച്ച്‌ പരാമർശി​ക്കുന്ന 150 തിരു​വെ​ഴു​ത്തു​ക​ളെ​ങ്കി​ലു​മുണ്ട്‌. അതിനാൽ, ബൈബി​ളെ​ഴു​ത്തു​കാർക്ക്‌ ഈ മൃഗം വളരെ പരിചി​ത​മാ​യി​രു​ന്നു​വെ​ന്നാണ്‌ ഇത്‌ സൂചി​പ്പി​ക്കു​ന്നത്‌. മിക്ക പരാമർശ​ങ്ങ​ളും ആലങ്കാ​രി​കാർഥ​ത്തി​ലാണ്‌ പറഞ്ഞി​രി​ക്കു​ന്ന​തെ​ങ്കി​ലും സിംഹ​വു​മാ​യി നേരി​ട്ടുള്ള ഏറ്റുമു​ട്ട​ലു​ക​ളും രേഖ​പ്പെ​ടു​ത്തി​യി​ട്ടുണ്ട്‌. ഉദാഹ​ര​ണ​ത്തിന്‌ ശിം​ശോൻ, ദാവീദ്‌, ബെനാ​യാവ്‌ എന്നിവർ സിംഹ​ങ്ങളെ കൊന്ന​താ​യി പറഞ്ഞി​രി​ക്കു​ന്നു. (ന്യായാ​ധി​പ​ന്മാർ 14:5, 6; 1 ശമൂവേൽ 17:34, 35; 2 ശമൂവേൽ 23:20) നേരെ​മ​റിച്ച്‌, സിംഹം ചിലരെ ആക്രമി​ച്ചു കൊന്ന​താ​യും ബൈബി​ളിൽ രേഖയുണ്ട്‌.—1 രാജാ​ക്ക​ന്മാർ 13:24; 2 രാജാ​ക്ക​ന്മാർ 17:25.

പുരാതന നാളു​ക​ളിൽ ഏഷ്യയി​ലെ സിംഹങ്ങൾ (പാന്തറ ലിയോ പെർസിക്ക) ഏഷ്യാ​മൈനർ, ഗ്രീസ്‌ തുടങ്ങി പലസ്‌തീൻ, സിറിയ, മെസൊ​പ്പൊ​ട്ടേ​മിയ, വടക്കു​കി​ഴക്കൻ ഇന്ത്യ വരെ സ്വൈ​ര​വി​ഹാ​രം നടത്തി​യി​രു​ന്നു. ഭയത്തോ​ടെ​യും ബഹുമാ​ന​ത്തോ​ടെ​യും വീക്ഷി​ച്ചി​രുന്ന ഈ മൃഗം പൗരസ്‌ത്യ​ക​ല​ക​ളിൽ ഇടം​നേ​ടി​യി​രു​ന്നു. കൂടാതെ, പുരാതന ബാബി​ലോ​ണി​ലുള്ള ഘോഷ​യാ​ത്രാ​വീ​ഥി​ക​ളിൽ മിനു​സ​മാർന്ന ചെങ്കൽച്ചു​വ​രു​കൾക്ക്‌ സിംഹ​ങ്ങ​ളു​ടെ മനോ​ഹ​ര​മായ ചിത്ര​ര​ച​നകൾ അഴകേ​കി​യി​ട്ടുണ്ട്‌.

12-ാം നൂറ്റാ​ണ്ടി​ന്റെ അവസാ​ന​ത്തോ​ടെ കുരി​ശു​യു​ദ്ധ​ങ്ങ​ളിൽ ഏർപ്പെ​ട്ടി​രുന്ന പടയാ​ളി​കൾ പലസ്‌തീ​നി​ലുള്ള സിംഹ​ങ്ങളെ വേട്ടയാ​ടി​യി​രു​ന്ന​താ​യി റിപ്പോർട്ട്‌ ചെയ്‌തി​രി​ക്കു​ന്നു. എന്നാൽ, 1300 കഴിഞ്ഞ​തോ​ടെ ആ പ്രദേ​ശ​ങ്ങ​ളിൽ സിംഹങ്ങൾ ഇല്ലാതാ​യി. എന്നാൽ, 19-ാം നൂറ്റാ​ണ്ടു​വരെ മെസൊ​പ്പൊ​ട്ടേ​മി​യ​യി​ലും സിറി​യ​യി​ലും, 20-ാം നൂറ്റാ​ണ്ടി​ന്റെ തുടക്ക​ത്തിൽ ഇറാനി​ലും ഇറാഖി​ലും അവ ഉണ്ടായി​രു​ന്ന​താ​യി സൂചന​ക​ളുണ്ട്‌. ▪(w15-E 05/01)