കഥ 3
ആദ്യത്തെ പുരുഷനും സ്‌ത്രീയും
ഈ ചിത്രത്തിൽ എന്തെങ്കിലും വ്യത്യാസം ഉള്ളതായി ശ്രദ്ധിച്ചോ? ഇതിൽ ആളുകളുണ്ട്‌, ശരിയല്ലേ? ഇവരാണ്‌ ആദ്യത്തെ പുരുഷനും സ്‌ത്രീയും. ആരാണ്‌ അവരെ സൃഷ്ടിച്ചത്‌? ദൈവം. അവന്റെ പേര്‌ എന്താണെന്ന്‌ അറിയാമോ? യഹോവ. യഹോവ പുരുഷന്‌ ആദാമെന്നും സ്‌ത്രീക്ക്‌ ഹവ്വായെന്നും പേരിട്ടു.
യഹോവയാം ദൈവം ആദാമിനെ ഉണ്ടാക്കിയത്‌ എങ്ങനെയാണെന്ന്‌ അറിയേണ്ടേ? അവൻ നിലത്തുനിന്ന്‌ കുറെ പൊടി എടുത്ത്‌ അതുകൊണ്ട്‌ യാതൊരു കുറ്റമോ കുറവോ ഇല്ലാത്ത ഒരു ശരീരം, ഒരു മനുഷ്യശരീരം ഉണ്ടാക്കി. എന്നിട്ട്‌ അവൻ ആ മനുഷ്യന്റെ മൂക്കിലേക്ക്‌ ഊതി; അപ്പോൾ ആദാം ജീവനുള്ളവനായിത്തീർന്നു.
യഹോവയാം ദൈവം ആദാമിന്‌ ഒരു ജോലി കൊടുത്തു. എല്ലാത്തരം മൃഗങ്ങൾക്കും പേരിടുക എന്നതായിരുന്നു അത്‌. അവയ്‌ക്കെല്ലാം ഏറ്റവും നല്ല പേരുകൾ തിരഞ്ഞെടുക്കാനായി ആദാം വളരെക്കാലം മൃഗങ്ങളെ സൂക്ഷിച്ചു നോക്കി പഠിച്ചിട്ടുണ്ടായിരിക്കണം. ഏതായാലും മൃഗങ്ങൾക്കു പേരിട്ടുകൊണ്ടിരുന്നപ്പോൾ ആദാം ഒരു കാര്യം ശ്രദ്ധിച്ചു. അത്‌ എന്താണെന്ന്‌ അറിയാമോ?
എല്ലാ മൃഗങ്ങളുടെയും കൂട്ടത്തിൽ ആണും പെണ്ണും ഉണ്ടായിരുന്നു. അച്ഛൻ ആനകളും അമ്മ ആനകളും ഉണ്ടായിരുന്നു; സിംഹത്തിന്റെ കൂട്ടത്തിലും ഉണ്ടായിരുന്നു അച്ഛനും അമ്മയും. എന്നാൽ ആദാമിന്‌ മാത്രം ഒരു ഇണ ഉണ്ടായിരുന്നില്ല. അതുകൊണ്ട്‌ യഹോവ ആദാം ഉറങ്ങാൻ ഇടയാക്കി, ചുറ്റും നടക്കുന്നതൊന്നും അറിയാതെ ബോധംകെട്ടതുപോലുള്ള ഉറക്കം. എന്നിട്ട്‌ അവന്റെ വശത്തുനിന്ന്‌ ഒരു വാരിയെല്ല്‌ എടുത്തു. അതുപയോഗിച്ച്‌ യഹോവ ഒരു സ്‌ത്രീയെ ഉണ്ടാക്കി, അവൾ അവന്റെ ഭാര്യയായിത്തീർന്നു.
ആദാമിന്‌ എത്ര സന്തോഷമായിക്കാണും അല്ലേ? ഹവ്വായുടെ കാര്യമോ? അത്ര ഭംഗിയുള്ള ഒരു തോട്ടത്തിൽ ജീവിക്കാൻ കഴിഞ്ഞതിൽ അവൾക്കും എന്ത്‌ സന്തോഷം തോന്നിക്കാണും! ഇപ്പോൾ അവർക്കു മക്കളെ ജനിപ്പിക്കുന്നതിനും സന്തോഷത്തിൽ ഒരുമിച്ചു ജീവിക്കുന്നതിനും കഴിയുമായിരുന്നു.
ആദാമും ഹവ്വായും എന്നേക്കും ജീവിക്കണം എന്നതായിരുന്നു യഹോവയുടെ ആഗ്രഹം. അവർ മുഴുഭൂമിയെയും ഏദെൻതോട്ടം പോലെ ഭംഗിയുള്ളതാക്കണം എന്ന്‌ അവൻ ആഗ്രഹിച്ചു. ഇതു ചെയ്യുന്നതിനെക്കുറിച്ചു ചിന്തിച്ചപ്പോൾ ആദാമും ഹവ്വായും എത്ര സന്തോഷിച്ചിരിക്കണം! ഭൂമിയെ സുന്ദരമായ ഒരു തോട്ടം ആക്കുന്നതിൽ പങ്കുപറ്റാൻ നിങ്ങൾ ഇഷ്‌ടപ്പെടുമായിരുന്നോ? പക്ഷേ ആദാമിന്റെയും ഹവ്വായുടെയും സന്തോഷം അധികം നീണ്ടുനിന്നില്ല. കാരണം നമുക്കു കണ്ടുപിടിക്കാം.