യെരൂ​ശ​ലേം—“മഹാരാ​ജാ​വി​ന്റെ നഗരം”

‘യെരൂ​ശ​ലേ​മി​നെ​ക്കൊ​ണ്ടു സത്യം ചെയ്യരുത്‌, അതു മഹാരാ​ജാ​വി​ന്റെ നഗരം ആകുന്നു.’—മത്തായി 5:34, 35.

1, 2. യെരൂ​ശ​ലേ​മി​നെ സംബന്ധിച്ച ഏതു സംഗതി ചിലരിൽ ആശയക്കു​ഴപ്പം സൃഷ്ടി​ച്ചേ​ക്കാം?

യെരൂ​ശ​ലേം. ആ പേര്‌ വ്യത്യസ്‌ത മതക്കാ​രായ ആളുക​ളിൽ ശക്തമായ വികാ​രങ്ങൾ ഉണർത്തു​ന്നു. വാസ്‌ത​വ​ത്തിൽ, ഈ പുരാതന നഗരത്തെ നമുക്കാർക്കും അവഗണി​ക്കാൻ കഴിയില്ല. കാരണം, അതു മിക്ക​പ്പോ​ഴും വാർത്ത​ക​ളിൽ സ്ഥാനം പിടി​ക്കു​ന്നു. എങ്കിലും, യെരൂ​ശ​ലേം എപ്പോ​ഴും സമാധാ​ന​ത്തി​ന്റെ ഒരു സ്ഥലമ​ല്ലെ​ന്നാ​ണു പല റിപ്പോർട്ടു​ക​ളും കാണി​ക്കുന്ന സങ്കടക​ര​മായ സംഗതി.

² ഇതു ചില ബൈബിൾ വായന​ക്കാ​രിൽ ആശയക്കു​ഴപ്പം സൃഷ്ടി​ച്ചേ​ക്കാം. പണ്ട്‌ യെരൂ​ശ​ലേ​മി​ന്റെ ഹ്രസ്വ നാമം ‘സമാധാ​നം’ എന്ന്‌ അർഥമുള്ള ശാലേം എന്നായി​രു​ന്നു. (ഉല്‌പത്തി 14:18; സങ്കീർത്തനം 76:2; എബ്രായർ 7:1, 2) അതു​കൊണ്ട്‌, ‘പ്രസ്‌തുത പേരുള്ള ഒരു നഗരത്തിൽ കഴിഞ്ഞ ഏതാനും ദശകങ്ങ​ളാ​യി സമാധാ​നം ഇല്ലാതി​രു​ന്നത്‌ എന്തു​കൊണ്ട്‌?’ എന്നു നിങ്ങൾ വിചാ​രി​ച്ചേ​ക്കാം.

3. യെരൂ​ശ​ലേ​മി​നെ കുറി​ച്ചുള്ള ആശ്രയ​യോ​ഗ്യ​മായ വിവരങ്ങൾ എവിടെ കണ്ടെത്താൻ കഴിയും?

³ ആ ചോദ്യ​ത്തിന്‌ ഉത്തരം കിട്ടാൻ നാം ചരി​ത്ര​ത്തി​ലേക്കു പിന്നോ​ട്ടു പോയി പുരാതന കാലത്തെ യെരൂ​ശ​ലേ​മി​നെ കുറിച്ച്‌ പഠി​ക്കേ​ണ്ട​തുണ്ട്‌. എന്നാൽ, ‘പുരാതന ചരി​ത്ര​ത്തെ​ക്കു​റി​ച്ചു പഠിക്കാ​നൊ​ന്നും ഞങ്ങൾക്കു സമയമില്ല’ എന്നു ചിലർ പറഞ്ഞേ​ക്കാം. എന്നിരു​ന്നാ​ലും, യെരൂ​ശ​ലേ​മി​ന്റെ ആദിമ ചരിത്രം സംബന്ധിച്ച സൂക്ഷ്‌മ പരിജ്ഞാ​ന​ത്തി​നു നമ്മെ​യെ​ല്ലാം സംബന്ധിച്ച്‌ മൂല്യ​മുണ്ട്‌. അതിന്റെ കാരണം പിൻവ​രുന്ന വാക്കു​ക​ളിൽ ബൈബിൾ സൂചി​പ്പി​ക്കു​ന്നു: “മുന്നെ​ഴു​തി​യി​രി​ക്കു​ന്നതു ഒക്കെയും നമ്മുടെ ഉപദേ​ശ​ത്തി​ന്നാ​യി​ട്ടു, നമുക്കു തിരു​വെ​ഴു​ത്തു​ക​ളാൽ ഉളവാ​കുന്ന സ്ഥിരത​യാ​ലും ആശ്വാ​സ​ത്താ​ലും പ്രത്യാശ ഉണ്ടാ​കേ​ണ്ട​തി​ന്നു തന്നേ എഴുതി​യി​രി​ക്കു​ന്നു.” (റോമർ 15:4) യെരൂ​ശ​ലേ​മി​നെ കുറി​ച്ചുള്ള ബൈബിൾ പരിജ്ഞാ​ന​ത്തിന്‌ നമുക്ക്‌ ആശ്വാസം പകരാൻ കഴിയും—അതേ, സമാധാന പ്രത്യാ​ശ​യും—ആ നഗരത്തിൽ മാത്രമല്ല, ഭൂമി​യിൽ എമ്പാടും.

‘യഹോ​വ​യു​ടെ സിംഹാ​സന’ത്തിന്റെ സ്ഥലം

4, 5. ദൈ​വോ​ദ്ദേ​ശ്യം നിവർത്തി​ക്കു​ന്ന​തിൽ ഒരു പ്രധാന പങ്കു വഹിക്കുന്ന സ്ഥാന​ത്തേക്കു യെരൂ​ശ​ലേ​മി​നെ കൊണ്ടു​വ​രു​ന്ന​തിൽ ദാവീദ്‌ എങ്ങനെ ഉൾപ്പെട്ടു?

⁴ പൊ.യു.മു. 11-ാം നൂറ്റാ​ണ്ടിൽ സുരക്ഷി​ത​വും സമാധാ​ന​പൂർണ​വു​മായ ഒരു രാജ്യ​ത്തി​ന്റെ തലസ്ഥാ​ന​മെന്ന നിലയിൽ യെരൂ​ശ​ലേം ലോക​പ്ര​ശ​സ്‌തി കൈവ​രി​ച്ചി​രു​ന്നു. യുവാ​വായ ദാവീ​ദി​നെ യഹോ​വ​യാം ദൈവം ആ പുരാതന ജനതയു​ടെ—ഇസ്രാ​യേ​ലി​ന്റെ—മേൽ രാജാ​വാ​യി അഭി​ഷേകം ചെയ്യിച്ചു. ഭരണ ആസ്ഥാനം യെരൂ​ശ​ലേ​മിൽ ആയിരു​ന്ന​തി​നാൽ ദാവീ​ദും അവന്റെ രാജകീയ പിൻഗാ​മി​ക​ളും ‘യഹോ​വ​യു​ടെ രാജാസന’ത്തിൽ അഥവാ ‘യഹോ​വ​യു​ടെ സിംഹാ​സന’ത്തിൽ ഇരിക്കാ​നി​ട​യാ​യി.—1 ദിനവൃ​ത്താ​ന്തം 28:5; 29:23.

⁵ ദൈവ​ഭ​ക്ത​നായ ദാവീദ്‌—യഹൂദാ ഗോ​ത്ര​ത്തി​ലെ ഒരു ഇസ്രാ​യേ​ല്യൻ—വിഗ്ര​ഹാ​രാ​ധി​ക​ളായ യെബൂ​സ്യ​രിൽനിന്ന്‌ യെരൂ​ശ​ലേം പിടി​ച്ച​ടക്കി. അന്ന്‌ ആ നഗരം സ്ഥിതി ചെയ്‌തി​രു​ന്നത്‌ സീയോൻ എന്നു വിളി​ക്ക​പ്പെ​ടുന്ന ഒരു മലയിൽ മാത്ര​മാ​യി​രു​ന്നു. എന്നാൽ ആ പേര്‌ യെരൂ​ശ​ലേ​മി​ന്റെ​തന്നെ പര്യാ​യ​മാ​യി മാറി. ഇസ്രാ​യേ​ലു​മാ​യി ദൈവം നടത്തിയ ഉടമ്പടി​യെ സൂചി​പ്പി​ക്കുന്ന പെട്ടകം ദാവീദ്‌ പിൽക്കാ​ലത്ത്‌ യെരൂ​ശ​ലേ​മി​ലേക്കു മാറ്റി. അവിടെ അത്‌ ഒരു കൂടാ​ര​ത്തിൽ സൂക്ഷിച്ചു. അതിനു വർഷങ്ങൾക്കു മുമ്പ്‌ ആ വിശുദ്ധ പെട്ടക​ത്തി​നു മുകളി​ലുള്ള ഒരു മേഘത്തിൽനിന്ന്‌ ദൈവം മോശ​യോ​ടു സംസാ​രി​ച്ചി​രു​ന്നു. (പുറപ്പാ​ടു 25:1, 21, 22; ലേവ്യ​പു​സ്‌തകം 16:2; 1 ദിനവൃ​ത്താ​ന്തം 15:1-3) പെട്ടകം ദൈവ​ത്തി​ന്റെ സാന്നി​ധ്യ​ത്തെ പ്രതി​നി​ധാ​നം ചെയ്‌തു. കാരണം, യഹോവ ആയിരു​ന്നു ഇസ്രാ​യേ​ലി​ന്റെ യഥാർഥ രാജാവ്‌. അതു​കൊണ്ട്‌, രണ്ട്‌ അർഥത്തിൽ യഹോവ യെരൂ​ശ​ലേം നഗരത്തിൽനി​ന്നു ഭരിച്ചു എന്ന്‌ പറയാ​മാ​യി​രു​ന്നു.

6. ദാവീ​ദി​നെ​യും യെരൂ​ശ​ലേ​മി​നെ​യും സംബന്ധിച്ച്‌ യഹോവ എന്തു വാഗ്‌ദ​ത്ത​മാ​ണു നൽകി​യത്‌?

⁶ ദാവീ​ദി​ന്റെ രാജകീയ ഗൃഹത്തി​ലെ രാജ്യം സീയോ​നാൽ അഥവാ യെരൂ​ശ​ലേ​മി​നാൽ പ്രതി​നി​ധീ​ക​രി​ക്ക​പ്പെ​ട്ടി​രു​ന്നു. ആ രാജ്യം അവസാ​നി​ക്കു​ക​യി​ല്ലെന്ന്‌ യഹോവ അവനോ​ടു വാഗ്‌ദത്തം ചെയ്‌തു. അതിന്റെ അർഥം, ദൈവ​ത്തി​ന്റെ അഭിഷി​ക്തൻ—മിശിഹാ അഥവാ ക്രിസ്‌തു—എന്ന നിലയിൽ ദാവീ​ദി​ന്റെ ഒരു പിൻഗാ​മി നിത്യ ഭരണാ​വ​കാ​ശം കൈവ​ശ​മാ​ക്കും എന്നാണ്‌.a (സങ്കീർത്തനം 132:11-14; ലൂക്കൊസ്‌ 1:31-33) “യഹോ​വ​യു​ടെ സിംഹാ​സന”ത്തിന്റെ ഈ നിത്യ അവകാശി, കേവലം യെരൂ​ശ​ലേ​മി​ന്റെ മേൽ മാത്രമല്ല, സകല ജനതക​ളു​ടെ​യും മേൽ ഭരിക്കു​മെ​ന്നും ബൈബിൾ വെളി​പ്പെ​ടു​ത്തു​ന്നു.—സങ്കീർത്തനം 2:6-8; ദാനീ​യേൽ 7:13, 14.

7. ദാവീദ്‌ രാജാവ്‌ സത്യാ​രാ​ധന ഉന്നമി​പ്പി​ച്ചത്‌ എങ്ങനെ?

⁷ ദൈവ​ത്തി​ന്റെ അഭിഷി​ക്ത​നായ ദാവീദ്‌ രാജാ​വി​നെ സ്ഥാന​ഭ്ര​ഷ്ട​നാ​ക്കാ​നുള്ള ശ്രമങ്ങൾ ഫലിക്കാ​തെ പോയി. പകരം, ശത്രു​രാ​ജ്യ​ങ്ങൾ തോൽപ്പി​ക്ക​പ്പെട്ടു. വാഗ്‌ദത്ത ദേശത്തി​ന്റെ അതിരു​കൾ ദൈവ​നിർദേ​ശിത അളവോ​ളം വ്യാപി​പ്പി​ക്ക​പ്പെട്ടു. സത്യാ​രാ​ധന ഉന്നമി​പ്പി​ക്കു​ന്ന​തിന്‌ ദാവീദ്‌ ഈ സാഹച​ര്യ​ത്തെ ഉപയോ​ഗ​പ്പെ​ടു​ത്തി. ദാവീ​ദി​ന്റെ പല സങ്കീർത്ത​ന​ങ്ങ​ളും സീയോ​നി​ലെ യഥാർഥ രാജാ​വെന്ന നിലയിൽ യഹോ​വയെ വാഴ്‌ത്തു​ന്നുണ്ട്‌.—2 ശമൂവേൽ 8:1-15; സങ്കീർത്തനം 9:1, 11; 24:1, 3, 7-10; 65:1, 2; 68:1, 24, 29; 110:1, 2; 122:1-4.

8, 9. ശലോ​മോൻ രാജാ​വി​ന്റെ വാഴ്‌ച​ക്കാ​ലത്ത്‌ യെരൂ​ശ​ലേ​മിൽ സത്യാ​രാ​ധന വികാസം പ്രാപി​ച്ചത്‌ എങ്ങനെ?

⁸ ദാവീ​ദി​ന്റെ പുത്ര​നായ ശലോ​മോ​ന്റെ വാഴ്‌ച​ക്കാ​ലത്ത്‌ യഹോ​വ​യു​ടെ ആരാധന പുതിയ മാനങ്ങ​ളിൽ എത്തി​ച്ചേർന്നു. ശലോ​മോൻ യെരൂ​ശ​ലേ​മി​നെ വടക്കോട്ട്‌ വ്യാപി​പ്പിച്ച്‌ മോരീ​യാ പർവതം (ഇന്നത്തെ ശിലാ താഴി​ക​ക്കു​ടം സ്ഥിതി ചെയ്യുന്ന സ്ഥലം) കൂടി ഉൾപ്പെ​ടു​ത്തി. ഈ ഉയർന്ന സ്ഥലത്ത്‌ യഹോ​വ​യു​ടെ സ്‌തു​തി​ക്കാ​യി ഒരു ഗംഭീര ആലയം പണിയു​ന്ന​തി​നുള്ള പദവി​യും അദ്ദേഹ​ത്തിന്‌ ഉണ്ടായി​രു​ന്നു. ആ ആലയത്തി​ലെ അതിവി​ശുദ്ധ സ്ഥലത്താ​യി​രു​ന്നു നിയമ പെട്ടകം വെച്ചി​രു​ന്നത്‌.—1 രാജാ​ക്ക​ന്മാർ 6:1-38.

⁹ യെരൂ​ശ​ലേ​മിൽ കേന്ദ്രീ​കൃ​ത​മായ യഹോ​വ​യു​ടെ ആരാധ​ന​യ്‌ക്ക്‌ ഇസ്രാ​യേൽ ജനത മുഴു ഹൃദയ​ത്തോ​ടു കൂടിയ പിന്തുണ നൽകി​യ​പ്പോൾ അവർ സമാധാ​നം ആസ്വദി​ച്ചു. ഈ സ്ഥിതി​വി​ശേ​ഷത്തെ മനോ​ഹ​ര​മാ​യി വർണി​ച്ചു​കൊണ്ട്‌ തിരു​വെ​ഴു​ത്തു​കൾ ഇങ്ങനെ പ്രസ്‌താ​വി​ക്കു​ന്നു: “യെഹൂ​ദ​യും യിസ്രാ​യേ​ലും കടൽക്ക​ര​യി​ലെ മണൽ പോലെ അസംഖ്യ​മാ​യി​രു​ന്നു; അവർ തിന്നു​ക​യും കുടി​ക്ക​യും സന്തോ​ഷി​ക്ക​യും ചെയ്‌തു പോന്നു. . . . ചുറ്റു​മുള്ള ദിക്കിൽ ഒക്കെയും [ശലോ​മോന്‌] സമാധാ​നം ഉണ്ടായി​രു​ന്നു. യെഹൂ​ദ​യും യിസ്രാ​യേ​ലും . . . ഓരോ​രു​ത്തൻ താന്താന്റെ മുന്തി​രി​വ​ള്ളി​യു​ടെ കീഴി​ലും അത്തിവൃ​ക്ഷ​ത്തിൻ കീഴി​ലും നിർഭയം വസിച്ചു.”—1 രാജാ​ക്ക​ന്മാർ 4:20, 24, 25.

10, 11. ശലോ​മോ​ന്റെ വാഴ്‌ച​ക്കാ​ലത്തെ യെരൂ​ശ​ലേ​മി​നെ കുറിച്ച്‌ ബൈബിൾ പറയുന്ന കാര്യ​ങ്ങളെ പുരാ​വ​സ്‌തു​ശാ​സ്‌ത്രം സ്ഥിരീ​ക​രി​ക്കു​ന്നത്‌ എങ്ങനെ?

¹⁰ പുരാ​വ​സ്‌തു കണ്ടെത്ത​ലു​കൾ ശലോ​മോ​ന്റെ സമ്പദ്‌സ​മൃ​ദ്ധ​മായ വാഴ്‌ചയെ കുറി​ച്ചുള്ള ഈ വിവര​ണ​ത്തി​നു പിൻബ​ല​മേ​കു​ന്നു. ഇസ്രാ​യേൽ ദേശത്തി​ന്റെ പുരാ​വ​സ്‌തു​ശാ​സ്‌ത്രം (ഇംഗ്ലീഷ്‌) എന്ന ഗ്രന്ഥത്തിൽ പ്രൊ​ഫസർ യോഹാ​നാൻ ആഹാ​രോ​ണി ഇങ്ങനെ പ്രസ്‌താ​വി​ക്കു​ന്നു: “എല്ലായി​ട​ത്തു​നി​ന്നും രാജ​കൊ​ട്ടാ​ര​ത്തി​ലേക്ക്‌ ഒഴുകി​യെ​ത്തിയ സമ്പത്തും അതു​പോ​ലെ​തന്നെ തഴച്ചു​വ​ളർന്ന വാണി​ജ്യ​വും . . . ഭൗതിക സംസ്‌കാ​ര​ത്തി​ന്റെ എല്ലാ മണ്ഡലങ്ങ​ളി​ലും സത്വര​വും ശ്രദ്ധേ​യ​വു​മായ വിപ്ലവം സൃഷ്ടിച്ചു. . . . ഭൗതിക സംസ്‌കാ​ര​ത്തി​ലെ ഈ മാറ്റം . . . ആഡംബര സംഗതി​ക​ളിൽ മാത്രമല്ല, പ്രത്യേ​കിച്ച്‌ കളിമൺപാ​ത്ര നിർമാ​ണ​വി​ദ്യ​യി​ലും പ്രകട​മാണ്‌. . . . കളിമൺ പാത്ര​ങ്ങ​ളു​ടെ ഗുണവും അത്‌ ചുടുന്ന രീതി​യും വളരെ​യേറെ മെച്ച​പ്പെട്ടു.”

¹¹ സമാന​മാ​യി, ജെറി എം. ലാൻഡെയ്‌ ഇങ്ങനെ എഴുതി: “ശലോ​മോ​ന്റെ ഭരണത്തിൻ കീഴിൽ മൂന്നു പതിറ്റാ​ണ്ടു​കൾകൊണ്ട്‌ ഇസ്രാ​യേല്യ ഭൗതിക സംസ്‌കാ​ര​ത്തി​നു​ണ്ടായ പുരോ​ഗതി അതിനു മുമ്പത്തെ ഇരുന്നൂറ്‌ വർഷം​കൊണ്ട്‌ ഉണ്ടായ പുരോ​ഗ​തി​യെ​ക്കാ​ളും കൂടു​ത​ലാണ്‌. വലിയ കെട്ടി​ട​ങ്ങ​ളു​ടെ​യും കൂറ്റൻ മതിലു​ക​ളോ​ടു കൂടിയ വൻ നഗരങ്ങ​ളു​ടെ​യും അവശി​ഷ്ടങ്ങൾ, വളരെ നന്നായി നിർമിച്ച സമ്പന്നരു​ടെ ഭവനസ​ഞ്ച​യങ്ങൾ അടങ്ങിയ പാർപ്പിട മേഖല​ക​ളു​ടെ വ്യാപനം, കളിമൺപാ​ത്ര നിർമാ​താ​വി​ന്റെ​യും അയാളു​ടെ നിർമാണ രീതി​ക​ളു​ടെ​യും സാങ്കേ​തിക വൈദ​ഗ്‌ധ്യ​ത്തിൽ ഉണ്ടായ വൻ കുതി​ച്ചു​ക​യറ്റം എന്നിവ ശലോ​മോ​ന്യ കാലഘ​ട്ട​ത്തി​ലെ കുഴി​ച്ചെ​ടുത്ത വസ്‌തു​ക്ക​ളിൽ നാം കാണുന്നു. കൂടാതെ, വിദൂര സ്ഥലങ്ങളിൽനി​ന്നു കൊണ്ടു​വന്ന സാധനങ്ങൾ ഉപയോ​ഗി​ച്ചു നിർമിച്ച ശിൽപ്പ​ങ്ങ​ളു​ടെ അവശി​ഷ്ട​ങ്ങ​ളും നാം കാണുന്നു—സജീവ​മായ അന്തർദേ​ശീയ വാണി​ജ്യ​വും വിപണ​ന​വും നടന്നു എന്നതിന്റെ സൂചന​ക​ളാണ്‌ അവ.”—ദാവീ​ദി​ന്റെ ഗൃഹം (ഇംഗ്ലീഷ്‌).

സമാധാ​ന​ത്തിൽ നിന്ന്‌ വിനാ​ശ​ത്തി​ലേക്ക്‌

12, 13. യെരൂ​ശ​ലേ​മിൽ സത്യാ​രാ​ധ​ന​യു​ടെ ഉന്നമനം നിലച്ചു​പോ​യത്‌ എങ്ങനെ?

¹² യഹോ​വ​യു​ടെ വിശുദ്ധ മന്ദിരം സ്ഥിതി ചെയ്‌തി​രുന്ന നഗരമായ യെരൂ​ശ​ലേ​മി​ന്റെ സമാധാ​ന​വും സമൃദ്ധി​യും ഉചിത​മായ പ്രാർഥനാ വിഷയങ്ങൾ ആയിരു​ന്നു. ദാവീദ്‌ എഴുതി: “യെരൂ​ശ​ലേ​മി​ന്റെ സമാധാ​ന​ത്തി​ന്നാ​യി പ്രാർത്ഥി​പ്പിൻ; നിന്നെ സ്‌നേ​ഹി​ക്കു​ന്നവർ സ്വൈ​ര​മാ​യി​രി​ക്കട്ടെ. നിന്റെ കൊത്ത​ള​ങ്ങ​ളിൽ സമാധാ​ന​വും നിന്റെ അരമന​ക​ളിൽ സ്വൈ​ര​വും ഉണ്ടാകട്ടെ. എന്റെ സഹോ​ദ​ര​ന്മാ​രും കൂട്ടാ​ളി​ക​ളും നിമിത്തം നിന്നിൽ സമാധാ​നം ഉണ്ടാകട്ടെ എന്നു ഞാൻ പറയും.” (സങ്കീർത്തനം 122:6-8) ആ സമാധാ​ന​പൂർണ​മായ നഗരത്തിൽ ഗംഭീ​ര​മായ ആലയം നിർമി​ക്കു​ന്ന​തി​നുള്ള പദവി ശലോ​മോ​നു ലഭി​ച്ചെ​ങ്കി​ലും, അവൻ കാലാ​ന്ത​ര​ത്തിൽ അനേകം പുറജാ​തീയ സ്‌ത്രീ​കളെ വിവാഹം ചെയ്‌തു. അക്കാലത്തെ വ്യാജ ദൈവ​ങ്ങ​ളു​ടെ ആരാധന ഉന്നമി​പ്പി​ക്കു​ന്ന​തിന്‌ അവർ അവനെ വാർധ​ക്യ​കാ​ലത്തു വശീക​രി​ച്ചു. ഈ വിശ്വാ​സ​ത്യാ​ഗ​ത്തി​നു മുഴു ജനതയു​ടെ മേലും ദുഷി​പ്പി​ക്കുന്ന ഫലമാണ്‌ ഉണ്ടായി​രു​ന്നത്‌. തന്മൂലം ആ നഗരത്തി​നും അതിലെ നിവാ​സി​കൾക്കും യഥാർഥ സമാധാ​നം നഷ്ടപ്പെട്ടു.—1 രാജാ​ക്ക​ന്മാർ 11:1-8; 14:21-24.

¹³ ശലോ​മോ​ന്റെ പുത്ര​നായ രെഹ​ബെ​യാ​മി​ന്റെ വാഴ്‌ച​യു​ടെ ആരംഭ​ത്തിൽ പത്തു ഗോ​ത്രങ്ങൾ മത്സരിച്ച്‌ വടക്കേ ഇസ്രാ​യേൽ രാജ്യം രൂപീ​ക​രി​ച്ചു. അവരുടെ വിഗ്ര​ഹാ​രാ​ധന നിമിത്തം ആ രാജ്യത്തെ മറിച്ചി​ടാൻ ദൈവം അസ്സീറി​യയെ അനുവ​ദി​ച്ചു. (1 രാജാ​ക്ക​ന്മാർ 12:16-30) തെക്കേ രണ്ടു-ഗോത്ര രാജ്യ​ത്തി​ന്റെ കേന്ദ്രം തുടർന്നും യെരൂ​ശ​ലേം ആയിരു​ന്നു. എന്നാൽ, കാല​ക്ര​മേണ അവരും സത്യാ​രാ​ധ​ന​യിൽനി​ന്നു വീണു​പോ​യി. തന്മൂലം, ആ വഴിപി​ഴച്ച നഗരത്തെ പൊ.യു.മു. 607-ൽ നശിപ്പി​ക്കാൻ ദൈവം ബാബി​ലോ​ന്യ​രെ അനുവ​ദി​ച്ചു. 70 വർഷ​ത്തോ​ളം യഹൂദാ പ്രവാ​സി​കൾ ബാബി​ലോ​നിൽ അടിമകൾ എന്ന നിലയിൽ കഷ്ടം അനുഭ​വി​ച്ചു. പിന്നീട്‌ ദൈവ​ത്തി​ന്റെ കരുണ​യാൽ യെരൂ​ശ​ലേ​മി​ലേക്കു മടങ്ങി​വന്ന്‌ സത്യാ​രാ​ധന പുനഃ​സ്ഥി​തീ​ക​രി​ക്കാൻ അവർക്ക്‌ അനുവാ​ദം ലഭിച്ചു.—2 ദിനവൃ​ത്താ​ന്തം 36:15-21.

14, 15. ഇസ്രാ​യേ​ല്യ​രു​ടെ ബാബി​ലോ​ന്യ പ്രവാ​സ​ത്തി​നു ശേഷം യെരൂ​ശ​ലേം വീണ്ടും എങ്ങനെ​യാണ്‌ ഒരു പ്രമുഖ സ്ഥാന​ത്തേക്കു വന്നത്‌, എന്നാൽ എന്തു മാറ്റ​ത്തോ​ടെ?

¹⁴ 70 വർഷം ശൂന്യ​മാ​യി കിടന്ന​പ്പോൾ തകർന്ന കെട്ടി​ട​ങ്ങ​ളിൽ പാഴ്‌ച്ചെ​ടി​കൾ വളർന്നി​രി​ക്കാം. യെരൂ​ശ​ലേ​മി​ന്റെ മതിൽ തകർന്നു​പോ​യി. കവാട​ങ്ങ​ളു​ടെ​യും അവയെ താങ്ങി​നിർത്തി​യി​രുന്ന സ്‌തം​ഭ​ങ്ങ​ളു​ടെ​യും സ്ഥാനത്ത്‌ വൻ വിടവു​കൾ ഉണ്ടായി. എങ്കിലും തിരി​ച്ചെ​ത്തിയ യഹൂദ​ന്മാർ ധൈര്യം സംഭരി​ച്ചു. മുമ്പത്തെ ആലയം സ്ഥിതി ചെയ്‌തി​രുന്ന സ്ഥലത്ത്‌ അവർ ഒരു യാഗപീ​ഠം പണിത്‌ യഹോ​വ​യ്‌ക്ക്‌ ദിവസ​വും യാഗങ്ങൾ അർപ്പി​ക്കാൻ തുടങ്ങി.

¹⁵ അതൊരു നല്ല തുടക്ക​മാ​യി​രു​ന്നു. എന്നാൽ പുനഃ​സ്ഥി​തീ​ക​രി​ക്ക​പ്പെട്ട ആ യെരൂ​ശ​ലേം വീണ്ടും ഒരിക്ക​ലും ദാവീദ്‌ രാജാ​വി​ന്റെ ഒരു പിൻഗാ​മി സിംഹാ​സ​ന​ത്തിൽ ഇരിക്കുന്ന ഒരു രാജ്യ​ത്തി​ന്റെ തലസ്ഥാ​ന​ന​ഗരി ആകുമാ​യി​രു​ന്നില്ല. പകരം, ആ യഹൂദ​ന്മാ​രെ ഭരിച്ചത്‌ ബാബി​ലോ​നെ ജയിച്ച​ട​ക്കി​യവർ നിയമിച്ച ഒരു ഗവർണർ ആയിരു​ന്നു. അവർ തങ്ങളുടെ പേർഷ്യൻ അധിപ​ന്മാർക്കു ചുങ്കം കൊടു​ക്കു​ക​യും വേണമാ​യി​രു​ന്നു. (നെഹെ​മ്യാ​വു 9:34-37) “ചവിട്ടി​ക്കള”യപ്പെട്ട അവസ്ഥയിൽ ആയിരു​ന്നെ​ങ്കി​ലും ഭൂമി​യിൽ യഹോ​വ​യാം ദൈവ​ത്തി​ന്റെ പ്രത്യേക പ്രീതി ഉണ്ടായി​രുന്ന ഏക നഗരം യെരൂ​ശ​ലേം ആയിരു​ന്നു. (ലൂക്കൊസ്‌ 21:24) നിർമല ആരാധ​ന​യു​ടെ കേന്ദ്രം എന്ന നിലയിൽ, ദാവീദ്‌ രാജാ​വി​ന്റെ ഒരു പിൻഗാ​മി​യി​ലൂ​ടെ മുഴു ഭൂമി​യി​ലും പരമാ​ധി​കാ​രം പ്രയോ​ഗി​ക്കാ​നുള്ള ദൈവ​ത്തി​ന്റെ അവകാ​ശ​ത്തെ​യും അതു പ്രതി​നി​ധാ​നം ചെയ്‌തു.

വ്യാജ​മ​ത​ക്കാ​രായ അയൽക്കാർ എതിർക്കു​ന്നു

16. ബാബി​ലോ​നിൽനി​ന്നു മടങ്ങി​യെ​ത്തിയ യഹൂദ​ന്മാർ യെരൂ​ശ​ലേ​മി​ന്റെ പുനഃ​സ്ഥി​തീ​ക​രണം നിർത്തി​വെ​ച്ചത്‌ എന്തു​കൊണ്ട്‌?

¹⁶ പ്രവാ​സ​ത്തിൽനിന്ന്‌ യെരൂ​ശ​ലേ​മി​ലേക്ക്‌ മടങ്ങിവന്ന യഹൂദ​ന്മാർ താമസി​യാ​തെ പുതിയ ആലയത്തി​നുള്ള അടിസ്ഥാ​ന​മി​ട്ടു. എന്നാൽ അവരുടെ അയൽക്കാ​രായ വ്യാജമത ആരാധകർ പേർഷ്യൻ രാജാ​വായ അർഥഹ്‌ശ​ഷ്ടാ​വിന്‌ ദൂഷണ​പ​ര​മായ ഒരു കത്ത്‌ അയച്ചു. യഹൂദ​ന്മാർ രാജാ​വി​നോ​ടു മറുക്കു​മെന്ന്‌ അവർ അതിൽ പറഞ്ഞി​രു​ന്നു. തത്‌ഫ​ല​മാ​യി, അർഥഹ്‌ശ​ഷ്ടാവ്‌ യെരൂ​ശ​ലേ​മി​ലെ കൂടു​ത​ലായ നിർമാണ പ്രവർത്ത​നങ്ങൾ നിരോ​ധി​ച്ചു. നിങ്ങൾ അന്ന്‌ ആ നഗരത്തിൽ ജീവി​ച്ചി​രി​പ്പു​ണ്ടാ​യി​രു​ന്നു എന്നു സങ്കൽപ്പി​ക്കുക. എങ്കിൽ യെരൂ​ശ​ലേ​മി​ന്റെ ഭാവി എന്താകു​മെന്നു നിങ്ങൾ ചിന്തി​ക്കു​മാ​യി​രു​ന്നു. സംഭവി​ച്ചതു നോക്കുക, യഹൂദ​ന്മാർ ആലയ നിർമാ​ണം നിർത്തി​വെച്ച്‌ ഭൗതിക അനുധാ​വ​ന​ങ്ങ​ളിൽ മുഴുകി.—എസ്രാ 4:11-24; ഹഗ്ഗായി 1:2-6.

17, 18. യഹോവ എന്തു മുഖാ​ന്ത​ര​ത്താ​ലാണ്‌ യെരൂ​ശ​ലേം പുനർനിർമി​ക്ക​പ്പെ​ടു​ന്നു എന്ന്‌ ഉറപ്പു വരുത്തി​യത്‌?

¹⁷ ദൈവ​ത്തി​ന്റെ ജനത മടങ്ങി​വന്ന്‌ ഏതാണ്ട്‌ 17 വർഷം കഴിഞ്ഞ​പ്പോൾ അവരുടെ ചിന്തയെ നേരേ​യാ​ക്കാൻ അവൻ പ്രവാ​ച​ക​ന്മാ​രായ ഹഗ്ഗായി​യെ​യും സെഖര്യാ​വി​നെ​യും എഴു​ന്നേൽപ്പി​ച്ചു. അനുതാ​പം തോന്നിയ യഹൂദ​ന്മാർ ആലയ പുനർനിർമാ​ണം ഏറ്റെടു​ത്തു. അതിനി​ടെ, ദാര്യാ​വേശ്‌ പേർഷ്യ​യു​ടെ രാജാ​വാ​യി​ത്തീർന്നു. യെരൂ​ശ​ലേ​മി​ലെ ആലയം പുനർനിർമി​ക്കാ​നുള്ള കോ​രെശ്‌ രാജാ​വി​ന്റെ കൽപ്പന അദ്ദേഹം ഉറപ്പു വരുത്തി. ദാര്യാ​വേശ്‌ യഹൂദ​ന്മാ​രു​ടെ അയൽക്കാർക്ക്‌ ഒരു കത്ത്‌ അയച്ചു. അതിൽ ‘യെരൂ​ശ​ലേ​മിൽനിന്ന്‌ അകന്നു​നിൽക്കാൻ’ അവർക്കു മുന്നറി​യി​പ്പു നൽകിയ രാജാവ്‌, നിർമാ​ണം പൂർത്തി​യാ​ക്കേ​ണ്ട​തിന്‌ രാജാ​വി​ന്റെ നികു​തി​യിൽനിന്ന്‌ സാമ്പത്തിക സഹായം നൽകാ​നും ആവശ്യ​പ്പെട്ടു.—എസ്രാ 6:1-13.

¹⁸ തങ്ങൾ മടങ്ങി​വ​ന്ന​തി​ന്റെ 22-ാം വർഷം യഹൂദ​ന്മാർ ആലയ നിർമാ​ണം പൂർത്തി​യാ​ക്കി. നാഴി​ക​ക്ക​ല്ലായ ഈ സംഭവം വലിയ സന്തോ​ഷ​ത്തോ​ടെ ആഘോ​ഷി​ക്കേണ്ട ഒന്നാ​ണെന്നു മനസ്സി​ലാ​ക്കാ​വു​ന്ന​തേ​യു​ള്ളൂ. എന്നാൽ യെരൂ​ശ​ലേ​മും അതിന്റെ മതിലു​ക​ളും അധിക​വും ശൂന്യ​മാ​യി കിടന്നി​രു​ന്നു. ‘ദേശാ​ധി​പ​തി​യായ നെഹെ​മ്യാ​വി​ന്റെ​യും ശാസ്‌ത്രി​യായ എസ്രാ പുരോ​ഹി​ത​ന്റെ​യും കാലത്ത്‌’ ആ നഗരത്തിന്‌ ആവശ്യ​മായ ശ്രദ്ധ ലഭിച്ചു. (നെഹെ​മ്യാ​വു 12:26, 27) വ്യക്തമാ​യും, പൊ.യു.മു. അഞ്ചാം നൂറ്റാ​ണ്ടി​ന്റെ അവസാനം ആയപ്പോ​ഴേ​ക്കും പുരാതന ലോക​ത്തി​ലെ ഒരു പ്രമുഖ നഗരമെന്ന നിലയിൽ യെരൂ​ശ​ലേ​മി​ന്റെ പുനർനിർമാ​ണം പൂർത്തി​യാ​യി​രു​ന്നു.

മിശിഹാ പ്രത്യ​ക്ഷ​പ്പെ​ടു​ന്നു!

19. യെരൂ​ശ​ലേ​മി​ന്റെ അനുപമ സ്ഥാനത്തെ മിശിഹാ അംഗീ​ക​രി​ച്ചത്‌ എങ്ങനെ?

¹⁹ നമുക്കു കുറെ നൂറ്റാ​ണ്ടു​കൾ പിന്നിട്ട്‌, സാർവ​ത്രിക പ്രാധാ​ന്യ​മുള്ള ഒരു സംഭവ​ത്തി​ലേക്ക്‌, യേശു​ക്രി​സ്‌തു​വി​ന്റെ ജനനത്തി​ലേക്ക്‌ വരാം. “കർത്താ​വായ ദൈവം അവന്റെ പിതാ​വായ ദാവീ​ദി​ന്റെ സിംഹാ​സനം അവന്നു കൊടു​ക്കും. . . . അവന്റെ രാജ്യ​ത്തി​ന്നു അവസാനം ഉണ്ടാക​യില്ല” എന്ന്‌ യഹോ​വ​യാം ദൈവ​ത്തി​ന്റെ ദൂതൻ യേശു​വി​ന്റെ കന്യാ​മാ​താ​വി​നോ​ടു പറഞ്ഞി​രു​ന്നു. (ലൂക്കൊസ്‌ 1:32, 33) വർഷങ്ങൾക്കു ശേഷം യേശു തന്റെ പ്രസി​ദ്ധ​മായ ഗിരി​പ്ര​ഭാ​ഷണം നടത്തി. അതിൽ അവൻ പല വിഷയങ്ങൾ സംബന്ധി​ച്ചു പ്രോ​ത്സാ​ഹ​ന​വും ബുദ്ധ്യു​പ​ദേ​ശ​വും നൽകി. ദൃഷ്ടാ​ന്ത​ത്തിന്‌, ദൈവ​ത്തോ​ടുള്ള കടപ്പാ​ടു​കൾ നിർവ​ഹി​ക്കാൻ മാത്രമല്ല, പിന്നെ​യോ കഴമ്പി​ല്ലാത്ത ശപഥം ചെയ്യൽ നടത്താ​തി​രി​ക്കാൻ ശ്രദ്ധി​ക്കാ​നും അവൻ ശ്രോ​താ​ക്കളെ പ്രോ​ത്സാ​ഹി​പ്പി​ച്ചു. യേശു ഇങ്ങനെ പറഞ്ഞു: “കള്ളസ്സത്യം ചെയ്യരു​തു എന്നും സത്യം ചെയ്‌തതു കർത്താ​വി​ന്നു നിവർത്തി​ക്കേണം എന്നും പൂർവ്വൻമാ​രോ​ടു അരുളി​ച്ചെ​യ്‌തതു നിങ്ങൾ കേട്ടി​ട്ടു​ണ്ട​ല്ലോ. ഞാനോ നിങ്ങ​ളോ​ടു പറയു​ന്നതു: അശേഷം സത്യം ചെയ്യരു​തു; സ്വർഗ്ഗ​ത്തെ​ക്കൊ​ണ്ടു അരുതു, അതു ദൈവ​ത്തി​ന്റെ സിംഹാ​സനം; ഭൂമി​യെ​ക്കൊ​ണ്ടു അരുതു, അതു അവന്റെ പാദപീ​ഠം; യെരൂ​ശ​ലേ​മി​നെ​ക്കൊ​ണ്ടു അരുതു, അതു മഹാരാ​ജാ​വി​ന്റെ നഗരം.” (മത്തായി 5:33-35) യെരൂ​ശ​ലേ​മിന്‌ നൂറ്റാ​ണ്ടു​ക​ളാ​യി ഉണ്ടായി​രുന്ന അതിന്റെ അനുപമ സ്ഥാനത്തെ യേശു അംഗീ​ക​രി​ച്ചു എന്നത്‌ ശ്രദ്ധേ​യ​മാണ്‌. അതേ, അതു “മഹാരാ​ജാ​വി​ന്റെ നഗരം” ആയിരു​ന്നു.

20, 21. യെരൂ​ശ​ലേ​മിൽ വസിച്ചി​രുന്ന പലരു​ടെ​യും മനോ​ഭാ​വ​ത്തിൽ എന്തു വലിയ മാറ്റമു​ണ്ടാ​യി?

²⁰ തന്റെ ഭൗമിക ജീവി​ത​ത്തി​ന്റെ അവസാ​ന​ത്തോ​ട​ടുത്ത്‌ യെരൂ​ശ​ലേ​മി​ലെ നിവാ​സി​ക​ളു​ടെ മുമ്പാകെ യേശു തന്നെത്തന്നെ അഭിഷിക്ത രാജാ​വെന്ന നിലയിൽ അവതരി​പ്പി​ച്ചു. പുളക​പ്ര​ദ​മായ ആ സംഭവ​ത്തോ​ടുള്ള പ്രതി​ക​ര​ണ​മാ​യി പലരും സന്തോ​ഷ​പൂർവം ഇങ്ങനെ ആർത്തു: “കർത്താ​വി​ന്റെ നാമത്തിൽ വരുന്നവൻ വാഴ്‌ത്ത​പ്പെ​ട്ടവൻ: വരുന്ന​തായ രാജ്യം, നമ്മുടെ പിതാ​വായ ദാവീ​ദി​ന്റെ രാജ്യം വാഴ്‌ത്ത​പ്പെ​ടു​മാ​റാ​കട്ടെ.”—മർക്കൊസ്‌ 11:1-10; യോഹ​ന്നാൻ 12:12-15.

²¹ എന്നാൽ, യേശു​വി​നെ​തി​രെ തിരി​യാ​നുള്ള യെരൂ​ശ​ലേ​മി​ലെ മതനേ​താ​ക്ക​ന്മാ​രു​ടെ പ്രേര​ണ​യ്‌ക്കു വഴങ്ങാൻ ആ ജനത്തിന്‌ ഒരു ആഴ്‌ച പോലും വേണ്ടി​വ​ന്നില്ല. ദൈവ​ത്തി​ന്റെ മുമ്പാ​കെ​യുള്ള അംഗീ​കൃ​ത​നില യെരൂ​ശ​ലേം നഗരത്തി​നും ആ ജനതയ്‌ക്ക്‌ ഒന്നാ​കെ​യും നഷ്ടപ്പെ​ടു​മെന്ന്‌ യേശു മുന്നറി​യി​പ്പു നൽകി. (മത്തായി 21:23, 33-45; 22:1-7) ഉദാഹ​ര​ണ​ത്തിന്‌, യേശു പ്രഖ്യാ​പി​ച്ചു: “യെരൂ​ശ​ലേമേ, യെരൂ​ശ​ലേമേ, പ്രവാ​ച​ക​ന്മാ​രെ കൊല്ലു​ക​യും നിന്റെ അടുക്കൽ അയച്ചി​രി​ക്കു​ന്ന​വരെ കല്ലെറി​യു​ക​യും ചെയ്യു​ന്ന​വളേ, കോഴി തന്റെ കുഞ്ഞു​ങ്ങളെ ചിറകിൻ കീഴിൽ ചേർക്കും​പോ​ലെ നിന്റെ മക്കളെ ചേർത്തു​കൊൾവാൻ എനിക്കു എത്രവട്ടം മനസ്സാ​യി​രു​ന്നു; നിങ്ങൾക്കോ മനസ്സാ​യില്ല. നിങ്ങളു​ടെ ഭവനം ശൂന്യ​മാ​യ്‌തീ​രും.” (മത്തായി 23:37, 38) പൊ.യു. 33-ലെ പെസഹാ സമയത്ത്‌ യേശു​വി​ന്റെ ശത്രുക്കൾ അവനെ യെരൂ​ശ​ലേ​മി​നു വെളി​യിൽവെച്ച്‌ അന്യാ​യ​മാ​യി വധിച്ചു. എന്നിരു​ന്നാ​ലും, യഹോവ തന്റെ അഭിഷി​ക്തനെ ഉയിർപ്പിച്ച്‌ സ്വർഗീയ സീയോ​നി​ലെ അമർത്യ ആത്മജീവൻ നൽകി മഹത്ത്വീ​ക​രി​ച്ചു. നമു​ക്കെ​ല്ലാം പ്രയോ​ജനം നേടാ​വുന്ന ഒരു നേട്ടമാണ്‌ അത്‌.—പ്രവൃ​ത്തി​കൾ 2:32-36.

22. യേശു​വി​ന്റെ മരണ​ശേഷം യെരൂ​ശ​ലേ​മി​നെ സംബന്ധിച്ച പല പരാമർശ​ങ്ങ​ളും എന്തിനാ​ണു ബാധക​മാ​കു​ന്നത്‌?

²² സീയോ​നെ​ക്കു​റിച്ച്‌ അഥവാ യെരൂ​ശ​ലേ​മി​നെ​ക്കു​റിച്ച്‌ ഉള്ള നിവൃ​ത്തി​യേ​റാത്ത മിക്ക പ്രവച​ന​ങ്ങ​ളും അക്കാലം മുതൽ സ്വർഗീയ ക്രമീ​ക​ര​ണ​ങ്ങൾക്ക്‌, അഥവാ യേശു​വി​ന്റെ അഭിഷിക്ത അനുഗാ​മി​കൾക്ക്‌, ബാധക​മാ​കു​ന്ന​താ​യി മനസ്സി​ലാ​ക്കാ​വു​ന്ന​താണ്‌. (സങ്കീർത്തനം 2:6-8; 110:1-4; യെശയ്യാ​വു 2:2-4; 65:17, 18; സെഖര്യാ​വു 12:3; 14:12, 16, 17) യേശു​വി​ന്റെ മരണ​ശേഷം എഴുത​പ്പെട്ട “യെരൂ​ശ​ലേം” അഥവാ “സീയോൻ” എന്ന പല പരാമർശ​ങ്ങൾക്കും വ്യക്തമാ​യും പ്രതീ​കാ​ത്മക അർഥമാണ്‌ ഉള്ളത്‌. അവ ആ അക്ഷരീയ നഗരത്തി​നോ സ്ഥലത്തി​നോ ബാധക​മാ​കു​ന്നില്ല. (ഗലാത്യർ 4:26; എബ്രായർ 12:22; 1 പത്രൊസ്‌ 2:6; വെളി​പ്പാ​ടു 3:12; 14:1; 21:2, 10) യെരൂ​ശ​ലേം മേലാൽ “മഹാരാ​ജാ​വി​ന്റെ നഗരം” അല്ല എന്നുള്ള​തി​ന്റെ അവസാന തെളിവ്‌ ഉണ്ടായത്‌ പൊ.യു. 70-ൽ ആണ്‌. ആ വർഷം, ദാനീ​യേ​ലും യേശു​ക്രി​സ്‌തു​വും പ്രവചി​ച്ചി​രു​ന്നതു പോലെ റോമൻ സൈന്യ​ങ്ങൾ അതിനെ ശൂന്യ​മാ​ക്കി. (ദാനീ​യേൽ 9:26; ലൂക്കൊസ്‌ 19:41-44) ഒരിക്കൽ യഹോ​വ​യാം ദൈവ​ത്തിൽനിന്ന്‌ ഭൗമിക യെരൂ​ശ​ലേ​മി​നു ലഭിച്ചി​രുന്ന പ്രത്യേക പ്രീതി​യി​ലേക്ക്‌ അതു പിൽക്കാ​ലത്തു പുനഃ​സ്ഥി​തീ​ക​രി​ക്ക​പ്പെ​ടു​മെന്ന്‌ ബൈബിൾ എഴുത്തു​കാ​രോ യേശു​വോ മുൻകൂ​ട്ടി പറഞ്ഞില്ല.—ഗലാത്യർ 4:25; എബ്രായർ 13:14.

ശാശ്വത സമാധാ​ന​ത്തി​ന്റെ മുൻവീ​ക്ഷ​ണം

23. യെരൂ​ശ​ലേ​മി​ന്റെ കാര്യ​ത്തിൽ നാം ഇപ്പോ​ഴും തത്‌പരർ ആയിരി​ക്കേ​ണ്ടത്‌ എന്തു​കൊണ്ട്‌?

²³ ഭൗമിക യെരൂ​ശ​ലേ​മി​ന്റെ ആദിമ ചരിത്രം പരി​ശോ​ധി​ച്ചി​രി​ക്കെ, ശലോ​മോ​ന്റെ സമാധാ​ന​പൂർണ​മായ വാഴ്‌ച​ക്കാ​ലത്ത്‌ ആ നഗരം അതിന്റെ പേരിനെ—“ഇരട്ട സമാധാ​ന​ത്തി​ന്റെ അവകാശം [അടിസ്ഥാ​നം]”—അന്വർഥ​മാ​ക്കി എന്നത്‌ ഒരുവനു നിഷേ​ധി​ക്കാൻ കഴിയില്ല. എന്നാൽ, പറുദീ​സ​യാ​യി മാറിയ ഭൂമി​യിൽ ജീവി​ക്കാൻ പോകുന്ന ദൈവ​ദാ​സ​ന്മാർ താമസി​യാ​തെ ആസ്വദി​ക്കാ​നി​രി​ക്കുന്ന സമാധാ​ന​വും സമൃദ്ധി​യും സംബന്ധിച്ച ഒരു പൂർവ വീക്ഷണം മാത്രം ആയിരു​ന്നു അത്‌.—ലൂക്കൊസ്‌ 23:43.

24. ശലോ​മോ​ന്റെ വാഴ്‌ച​ക്കാ​ലത്ത്‌ ഉണ്ടായി​രുന്ന അവസ്ഥക​ളിൽനി​ന്നു നമുക്ക്‌ എന്തു പഠിക്കാൻ കഴിയും?

²⁴ ശലോ​മോൻ രാജാ​വി​ന്റെ വാഴ്‌ച​ക്കാ​ലത്തു നിലവി​ലി​രുന്ന അവസ്ഥകളെ പ്രതി​ഫ​ലി​പ്പി​ക്കു​ന്ന​താണ്‌ 72-ാം സങ്കീർത്തനം. എന്നാൽ ആ മനോഹര ഗീതത്തിൽ മിശിഹാ ആയ യേശു​ക്രി​സ്‌തു​വി​ന്റെ സ്വർഗീയ ഭരണത്തിൻ കീഴിൽ മനുഷ്യ​വർഗ​ത്തി​നു ലഭിക്കാ​നി​രി​ക്കുന്ന അനു​ഗ്ര​ഹങ്ങൾ സംബന്ധി​ച്ചും പ്രവചി​ക്ക​പ്പെ​ട്ടി​രി​ക്കു​ന്നു. അവനെ​ക്കു​റിച്ച്‌ സങ്കീർത്ത​ന​ക്കാ​രൻ പാടി: “അവന്റെ കാലത്തു നീതി​മാ​ന്മാർ തഴെക്കട്ടെ; ചന്ദ്രനു​ള്ളേ​ട​ത്തോ​ളം സമാധാ​ന​സ​മൃ​ദ്ധി ഉണ്ടാകട്ടെ. . . . അവൻ നിലവി​ളി​ക്കുന്ന ദരി​ദ്ര​നെ​യും സഹായ​മി​ല്ലാത്ത എളിയ​വ​നെ​യും വിടു​വി​ക്കു​മ​ല്ലോ. എളിയ​വ​നെ​യും ദരി​ദ്ര​നെ​യും അവൻ ആദരി​ക്കും; ദരി​ദ്ര​ന്മാ​രു​ടെ ജീവനെ അവൻ രക്ഷിക്കും. അവരുടെ പ്രാണനെ അവൻ പീഡയിൽനി​ന്നും സാഹസ​ത്തിൽനി​ന്നും വീണ്ടെ​ടു​ക്കും; അവരുടെ രക്തം അവന്നു വില​യേ​റി​യ​താ​യി​രി​ക്കും. ദേശത്തു പർവ്വത​ങ്ങ​ളു​ടെ മുകളിൽ ധാന്യ​സ​മൃ​ദ്ധി​യു​ണ്ടാ​കും.”—സങ്കീർത്തനം 72:7, 8, 12-14, 16.

25. യെരൂ​ശ​ലേ​മി​നെ​ക്കു​റി​ച്ചു കൂടുതൽ മനസ്സി​ലാ​ക്കാൻ നാം ആഗ്രഹി​ക്കേ​ണ്ടത്‌ എന്തു​കൊണ്ട്‌?

²⁵ യെരൂ​ശ​ലേ​മി​ലും ഭൂമി​യു​ടെ മറ്റു ഭാഗങ്ങ​ളി​ലും ഉള്ള ദൈവ​സ്‌നേ​ഹി​കൾക്ക്‌ ആ വചനങ്ങൾ എത്രമാ​ത്രം ആശ്വാ​സ​വും പ്രത്യാ​ശ​യു​മാണ്‌ നൽകു​ന്നത്‌! ദൈവ​ത്തി​ന്റെ മിശി​ഹൈക രാജ്യ​ത്തിൻ കീഴിൽ ഭൂവ്യാ​പക സമാധാ​നം ആസ്വദി​ക്കു​ന്ന​വ​രു​ടെ കൂട്ടത്തിൽ നിങ്ങൾക്കും ആയിരി​ക്കാൻ സാധി​ക്കും. യെരൂ​ശ​ലേ​മി​ന്റെ ഭൂതകാ​ലത്തെ കുറി​ച്ചുള്ള അറിവിന്‌ മനുഷ്യ​വർഗത്തെ സംബന്ധിച്ച ദൈ​വോ​ദ്ദേ​ശ്യം മനസ്സി​ലാ​ക്കാൻ നമ്മെ സഹായി​ക്കാ​നാ​കും. യഹൂദ​ന്മാർ ബാബി​ലോ​ന്യ പ്രവാ​സ​ത്തിൽനി​ന്നു മടങ്ങി​വ​ന്ന​തി​നു ശേഷമുള്ള ഏഴും എട്ടും പതിറ്റാ​ണ്ടു​ക​ളിൽ ഉണ്ടായ സംഭവ​ങ്ങളെ കേന്ദ്രീ​ക​രി​ക്കു​ന്ന​താ​ണു പിൻവ​രുന്ന ലേഖനങ്ങൾ. മഹാ രാജാ​വായ യഹോ​വ​യാം ദൈവ​ത്തി​നു സ്വീകാ​ര്യ​മായ ആരാധന അർപ്പി​ക്കാൻ ആഗ്രഹി​ക്കുന്ന സകലർക്കും അത്‌ ആശ്വാസം പ്രദാനം ചെയ്യുന്നു.

[അടിക്കു​റി​പ്പു​കൾ]

നിങ്ങൾ ഓർമി​ക്കു​ന്നു​വോ?

◻ യെരൂ​ശ​ലേം എങ്ങനെ​യാണ്‌ യഹോ​വ​യു​ടെ സിംഹാ​സ​ന​ത്തി​ന്റെ സ്ഥലം ആയിത്തീർന്നത്‌?

◻ സത്യാ​രാ​ധന ഉന്നമി​പ്പി​ക്കു​ന്ന​തിൽ എന്തു പ്രധാന പങ്കാണു ശലോ​മോൻ വഹിച്ചത്‌?

◻ യെരൂ​ശ​ലേം യഹോ​വ​യു​ടെ ആരാധനാ കേന്ദ്രം അല്ലാതാ​യി എന്ന്‌ നാം അറിയു​ന്നത്‌ എങ്ങനെ?

◻ യെരൂ​ശ​ലേ​മി​നെ​ക്കു​റിച്ച്‌ കൂടുതൽ പഠിക്കു​ന്ന​തിൽ നമുക്കു താത്‌പ​ര്യ​മു​ള്ളത്‌ എന്തു​കൊണ്ട്‌?

[10-ാം പേജിലെ ചിത്രം]

ദാവീദിന്റെ നഗരം തെക്കേ കുന്നി​ലാ​യി​രു​ന്നു, എന്നാൽ ശലോ​മോൻ ആ നഗരത്തെ വടക്കോ​ട്ടു വ്യാപി​പ്പി​ക്കു​ക​യും ആലയം നിർമി​ക്കു​ക​യും ചെയ്‌തു

[കടപ്പാട]

Pictorial Archive (Near Eastern History) Est.

[8-ാം പേജിലെ ചിത്ര​ത്തിന്‌ കടപ്പാട]

Pictorial Archive (Near Eastern History) Est.