നിങ്ങൾക്ക്‌ എങ്ങനെ യഥാർഥ താഴ്‌മ പ്രകട​മാ​ക്കാം?

ദൈവ​ത്തി​ന്റെ ദൃഷ്ടി​യിൽ യഥാർഥ താഴ്‌മ​യ്‌ക്കു വലിയ മൂല്യ​മുണ്ട്‌. യാക്കോബ്‌ ഇങ്ങനെ എഴുതി: “ദൈവം നിഗളി​ക​ളോ​ടു എതിർത്തു​നി​ല്‌ക്ക​യും താഴ്‌മ​യു​ള്ള​വർക്കു കൃപ നല്‌കു​ക​യും ചെയ്യുന്നു.” (യാക്കോബ്‌ 4:6) ഇവിടെ യാക്കോബ്‌ എബ്രായ തിരു​വെ​ഴു​ത്തു​ക​ളിൽ അവതരി​പ്പി​ച്ചി​രി​ക്കുന്ന നിരവധി ആശയങ്ങളെ പരോ​ക്ഷ​മാ​യി പരാമർശി​ക്കുക ആയിരു​ന്നി​രി​ക്കാം. “യഹോവ ഉന്നത​നെ​ങ്കി​ലും താഴ്‌മ​യു​ള്ള​വനെ കടാക്ഷി​ക്കു​ന്നു; ഗർവ്വി​യെ​യോ അവൻ ദൂരത്തു​നി​ന്നു അറിയു​ന്നു.” “മനുഷ്യ​രു​ടെ നിഗളിച്ച കണ്ണുതാ​ഴും; പുരു​ഷ​ന്മാ​രു​ടെ ഉന്നതഭാ​വം കുനി​യും; യഹോവ മാത്രം അന്നാളിൽ ഉന്നതനാ​യി​രി​ക്കും.” “പരിഹാ​സി​കളെ [ദൈവം] പരിഹ​സി​ക്കു​ന്നു; എളിയ​വർക്കോ അവൻ കൃപ നല്‌കു​ന്നു.”—സങ്കീർത്തനം 138:6; യെശയ്യാ​വു 2:11; സദൃശ​വാ​ക്യ​ങ്ങൾ 3:34.

പത്രൊസ്‌ അപ്പൊ​സ്‌ത​ല​നും താഴ്‌മ പ്രകട​മാ​ക്കാൻ പ്രോ​ത്സാ​ഹി​പ്പി​ച്ചു. അവൻ എഴുതി: “എല്ലാവ​രും തമ്മിൽ തമ്മിൽ കീഴടങ്ങി താഴ്‌മ ധരിച്ചു​കൊൾവിൻ ദൈവം നിഗളി​ക​ളോ​ടു എതിർത്തു​നി​ല്‌ക്കു​ന്നു; താഴ്‌മ​യു​ള്ള​വർക്കോ കൃപ നല്‌കു​ന്നു.”—1 പത്രൊസ്‌ 5:5.

താഴ്‌മ സംബന്ധിച്ച ക്രിസ്‌തു​വി​ന്റെ ദൃഷ്ടാന്തം

നിങ്ങൾ ഇങ്ങനെ ചോദി​ച്ചേ​ക്കാം, താഴ്‌മ​യു​ള്ളവർ ആയിരി​ക്കു​ന്ന​തിൽ എന്തു നന്മ അല്ലെങ്കിൽ പ്രയോ​ജനം ആണ്‌ ഉള്ളത്‌? യഥാർഥ ക്രിസ്‌ത്യാ​നി ആയിരി​ക്കാൻ ശ്രമി​ക്കുന്ന ഒരുവനെ സംബന്ധി​ച്ചി​ട​ത്തോ​ളം ഉത്തരം മൗലി​ക​മാണ്‌—താഴ്‌മ ഉണ്ടായി​രി​ക്കുക എന്നാൽ ക്രിസ്‌തു​വി​നെ​പ്പോ​ലെ ആയിരി​ക്കുക എന്നാണ്‌. സ്വർഗീയ മണ്ഡലത്തിൽ നിന്നു ഭൂമി​യിൽ വന്ന്‌ ദൂതന്മാ​രെ​ക്കാൾ താഴ്‌ന്ന വെറു​മൊ​രു മനുഷ്യൻ ആയിത്തീ​രാ​നുള്ള അസാധാ​രണ നിയമനം സ്വീക​രി​ച്ചു​കൊണ്ട്‌ യേശു തന്റെ താഴ്‌മ പ്രകട​മാ​ക്കി. (എബ്രായർ 2:7) അവൻ ദൈവ​പു​ത്രൻ ആയിരു​ന്നെ​ങ്കി​ലും അവന്റെ മതശ​ത്രു​ക്കൾ അവന്റെ മേൽ കുന്നിച്ച അപമാ​നങ്ങൾ അവൻ സഹിച്ചു. അസംഖ്യം വരുന്ന ദൂത ഗണങ്ങളെ വിളിച്ചു വരുത്താൻ കഴിയു​മാ​യി​രു​ന്നി​ട്ടും തന്റെ പരി​ശോ​ധ​ന​ക​ളു​ടെ സമയത്ത്‌ അവൻ അക്ഷോ​ഭ്യ​നാ​യി നില​കൊ​ണ്ടു.—മത്തായി 26:53.

ഒടുവിൽ, ദണ്ഡന സ്‌തം​ഭ​ത്തിൽ നിന്ദി​ത​നാ​യി തൂക്ക​പ്പെ​ട്ടി​ട്ടും യേശു തന്റെ പിതാ​വി​നോ​ടു വിശ്വ​സ്‌ത​നാ​യി തുടർന്നു. അതു​കൊണ്ട്‌ അവനെ കുറിച്ചു പൗലൊ​സിന്‌ ഇങ്ങനെ എഴുതാൻ കഴിഞ്ഞു: “ക്രിസ്‌തു​യേ​ശു​വി​ലു​മു​ണ്ടാ​യി​രുന്ന ഈ മാനസി​ക​ഭാ​വം നിങ്ങളിൽ നിലനിർത്തുക, അവൻ ദൈവ​രൂ​പ​ത്തിൽ സ്ഥിതി​ചെ​യ്യു​ക​യാ​യി​രു​ന്നി​ട്ടും ദൈവ​ത്തോ​ടു സമനാ​കേ​ണ്ട​തിന്‌ ഒരു പിടി​ച്ചെ​ടു​ക്ക​ലി​നു പരിഗണന കൊടു​ത്തില്ല. ഇല്ല, എന്നാൽ അവൻ തന്നെത്താൻ ശൂന്യ​മാ​ക്കി ഒരു ദാസരൂ​പ​മെ​ടു​ത്തു മമനു​ഷ്യ​ന്റെ സാദൃ​ശ്യ​ത്തി​ലാ​യി​ത്തീർന്നു. അതിലു​പരി, അവൻ മനുഷ്യ രൂപത്തിൽ ആയപ്പോൾ, അവൻ തന്നെത്തന്നെ താഴ്‌ത്തി മരണ​ത്തോ​ളം, അതേ ഒരു ദണ്ഡന സ്‌തം​ഭ​ത്തി​ലെ മരണ​ത്തോ​ളം അനുസ​രണം ഉള്ളവനാ​യി​ത്തീർന്നു.”—ഫിലി​പ്പി​യർ 2:5-8, NW.

അതു​കൊ​ണ്ടു നമുക്ക്‌ എങ്ങനെ​യാ​ണു യഥാർഥ താഴ്‌മ പ്രകട​മാ​ക്കാൻ കഴിയുക? പ്രാ​യോ​ഗിക ജീവി​ത​ത്തിൽ, അഹങ്കാ​ര​ത്തോ​ടെയല്ല മറിച്ചു താഴ്‌മ​യോ​ടെ നമുക്ക്‌ എങ്ങനെ പ്രതി​ക​രി​ക്കാൻ കഴിയും?

താഴ്‌മ​യുള്ള ഒരുവൻ പ്രതി​ക​രി​ക്കുന്ന വിധം

താഴ്‌മയെ നാം ഏർപ്പെ​ട്ടി​രി​ക്കുന്ന പ്രവർത്ത​ന​ത്തി​ന്റെ—അതു തൊഴി​ലോ ക്രിസ്‌തീയ സേവന​മോ ആയിരു​ന്നു​കൊ​ള്ളട്ടെ—പശ്ചാത്ത​ല​ത്തിൽ പരിചി​ന്തി​ക്കാം. ഒരു ജോലി വിജയ​പ്ര​ദ​മാ​യി നിർവ​ഹി​ക്കാൻ മേൽവി​ചാ​ര​ക​ന്മാ​രോ മാനേ​ജർമാ​രോ സൂപ്പർ​വൈ​സർമാ​രോ ആവശ്യ​മാ​യി​രി​ക്കാം. ആരെങ്കി​ലും തീരു​മാ​നങ്ങൾ എടു​ക്കേ​ണ്ട​തുണ്ട്‌. അപ്പോൾ നിങ്ങൾ എങ്ങനെ പ്രതി​ക​രി​ക്കും? നിങ്ങൾ ഇങ്ങനെ ചിന്തി​ക്കു​മോ, “എന്തു ചെയ്യണ​മെന്ന്‌ എന്നോടു പറയാൻ അയാൾ ആരാണ്‌? ഞാൻ അയാ​ളെ​ക്കാൾ ഏറെ വർഷം ഇവിടെ ജോലി ചെയ്‌തി​ട്ടുണ്ട്‌.” നിങ്ങൾ അഹങ്കാരി ആണെങ്കിൽ, കീഴ്‌പെ​ട്ടി​രി​ക്കേണ്ടി വരു​മ്പോൾ നിങ്ങൾ അസ്വസ്ഥ​നാ​കും. നേരേ​മ​റിച്ച്‌, താഴ്‌മ​യുള്ള ഒരുവൻ ‘ശാഠ്യ​ത്താ​ലോ ദുരഭി​മാ​ന​ത്താ​ലോ ഒന്നും ചെയ്യാതെ താഴ്‌മ​യോ​ടെ മററു​ള്ള​വനെ തന്നെക്കാൾ ശ്രേഷ്‌ഠൻ എന്നു എണ്ണും.’—ഫിലി​പ്പി​യർ 2:3.

നിങ്ങ​ളെ​ക്കാൾ പ്രായം കുറഞ്ഞ ഒരാളോ ഒരു സ്‌ത്രീ​യോ ഒരു നിർദേശം വയ്‌ക്കു​മ്പോൾ നിങ്ങൾ എങ്ങനെ​യാ​ണു പ്രതി​ക​രി​ക്കുക? നിങ്ങൾക്കു താഴ്‌മ​യു​ണ്ടെ​ങ്കിൽ നിങ്ങൾ അതു പരി​ശോ​ധി​ക്കു​ക​യെ​ങ്കി​ലും ചെയ്യും. നിങ്ങൾ അഹങ്കാരി ആണെങ്കിൽ, നിങ്ങൾ അതിൽ നീരസ​പ്പെ​ടു​ക​യോ ഉടനടി അതു നിരസി​ക്കു​ക​യോ ചെയ്യും. എന്തായി​രി​ക്കും നിങ്ങൾ കൂടുതൽ ഇഷ്ടപ്പെ​ടുക, നിങ്ങളെ നാശത്തി​ലേക്കു നയിക്കുന്ന പ്രശം​സ​യും മുഖസ്‌തു​തി​യു​മാ​ണോ അതോ നിങ്ങളെ പരിപു​ഷ്ടി​പ്പെ​ടു​ത്തുന്ന ആരോ​ഗ്യ​പ്ര​ദ​മായ ബുദ്ധ്യു​പ​ദേ​ശ​മാ​ണോ?—സദൃശ​വാ​ക്യ​ങ്ങൾ 27:9, NW; 29:5.

പ്രതി​കൂ​ല​സ്ഥി​തി ഉയർത്തുന്ന വെല്ലു​വി​ളി​യെ നേരി​ടാൻ നിങ്ങൾക്കു കഴിയു​മോ? ഇയ്യോ​ബി​നെ പോലെ, പ്രയാസ സാഹച​ര്യ​ങ്ങളെ അഭിമു​ഖീ​ക​രി​ക്കാ​നും സഹിക്കാ​നും താഴ്‌മ നിങ്ങളെ സഹായി​ക്കും. നിങ്ങൾ അഹങ്കാ​രി​യാ​ണെ​ങ്കിൽ, വേദനാ​ജ​ന​ക​മായ സാഹച​ര്യ​ങ്ങൾ ഉടലെ​ടു​ക്കു​ക​യോ അവഗണി​ക്ക​പ്പെ​ട്ട​താ​യി തോന്നു​ക​യോ ചെയ്യു​മ്പോൾ നിരാ​ശ​പ്പെ​ടാ​നോ മത്സരി​ക്കാൻ പോലു​മോ നിങ്ങൾ പ്രവണത കാട്ടും.—ഇയ്യോബ്‌ 1:22; 2:10; 27:2-5.

താഴ്‌മ സ്‌നേ​ഹ​പൂർണ​വും ക്ഷമിക്കു​ന്ന​തു​മാണ്‌

“ക്ഷമിക്കണം. എനിക്കു തെറ്റു പറ്റി. നിങ്ങൾ പറഞ്ഞതാ​ണു ശരി,” എന്നൊക്കെ പറയാൻ ചിലർക്കു ബുദ്ധി​മു​ട്ടാണ്‌. എന്തു​കൊണ്ട്‌? തികഞ്ഞ അഹങ്കാരം! എന്നാൽ, ആത്മാർഥ​മായ ഒരു ഖേദ​പ്ര​ക​ടനം ഒട്ടുമി​ക്ക​പ്പോ​ഴും വൈവാ​ഹിക തർക്കങ്ങൾ എളുപ്പം അവസാ​നി​പ്പി​ച്ചേ​ക്കാം.

ഒരുവൻ നിങ്ങളെ വ്രണ​പ്പെ​ടു​ത്തു​മ്പോൾ ക്ഷമിക്കാൻ നിങ്ങൾ സന്നദ്ധനാ​ണോ? അതോ, കുറ്റക്കാ​ര​നെന്ന്‌ നിങ്ങൾ വിചാ​രി​ക്കുന്ന വ്യക്തി​യോ​ടു സംസാ​രി​ക്കാൻ കൂട്ടാ​ക്കാ​തെ ഒരുപക്ഷേ ദിവസ​ങ്ങ​ളോ മാസങ്ങ​ളോ പോലും അഹങ്കാരം നിമിത്തം നിങ്ങൾ നീരസം വെച്ചു​പു​ലർത്തു​മോ? തക്ക പ്രതി​കാ​രം ചെയ്യാ​നുള്ള ശ്രമത്തിൽ നിങ്ങൾ പക വെച്ചു​കൊ​ണ്ടി​രി​ക്കുക പോലും ചെയ്യു​മോ? പകയുടെ ഫലമായി ആളുകൾ കൊല​ചെ​യ്യ​പ്പെ​ട്ടി​ട്ടുണ്ട്‌. മറ്റു ചില കേസു​ക​ളിൽ, സ്വഭാ​വ​ഹത്യ ചെയ്യ​പ്പെ​ട്ടി​ട്ടുണ്ട്‌. അതേസ​മയം, താഴ്‌മ​യുള്ള വ്യക്തി സ്‌നേ​ഹ​വും ക്ഷമാശീ​ല​വും ഉള്ളവനാണ്‌. എന്തു​കൊണ്ട്‌? കാരണം സ്‌നേഹം വ്രണ​പ്പെ​ടു​ത്ത​ലി​ന്റെ കണക്കു സൂക്ഷി​ക്കു​ന്നില്ല. ഇസ്രാ​യേ​ല്യർ തങ്ങളുടെ അഹങ്കാരം ഉപേക്ഷി​ക്കുന്ന പക്ഷം അവരോ​ടു ക്ഷമിക്കാൻ യഹോവ സന്നദ്ധനാ​യി​രു​ന്നു. യേശു​വി​ന്റെ താഴ്‌മ​യുള്ള അനുഗാ​മി ക്ഷമിക്കാൻ സന്നദ്ധനാണ്‌, ആവർത്തി​ച്ചു​പോ​ലും!—യോവേൽ 2:12-14; മത്തായി 18:21, 22; 1 കൊരി​ന്ത്യർ 13:5.

താഴ്‌മ​യു​ള്ള വ്യക്തി ‘മറ്റുള്ള​വ​രോ​ടു ബഹുമാ​നം കാണി​ക്കു​ന്ന​തിൽ മുൻകൈ എടുക്കു​ന്നു.’ (റോമർ 12:10, NW) ന്യൂ ഇൻഡ്യ ബൈബിൾ വേർഷ​നിൽ അത്‌ ഇങ്ങനെ വായി​ക്ക​പ്പെ​ടു​ന്നു: “തങ്ങളേ​ക്കാൾ അധികം മറ്റുള്ള​വരെ ബഹുമാ​നി​ക്കു​വിൻ.” നിങ്ങൾ മറ്റുള്ള​വരെ പ്രശം​സി​ക്കു​ക​യും അവരുടെ പ്രാപ്‌തി​ക​ളെ​യും വാസന​ക​ളെ​യും വിലമ​തി​ക്കു​ക​യും ചെയ്യാ​റു​ണ്ടോ? അതോ, അവരുടെ സത്‌പേ​രി​നു കളങ്കം ചാർത്തുന്ന ഒരു ന്യൂന​ത​യാ​ണോ നിങ്ങൾ എപ്പോ​ഴും കണ്ടെത്തു​ന്നത്‌? അതേ, മറ്റുള്ള​വരെ ആത്മാർഥ​മാ​യി പ്രശം​സി​ക്കാൻ നിങ്ങൾക്കാ​വു​മോ? ഇക്കാര്യ​ത്തിൽ നിങ്ങൾക്കു ബുദ്ധി​മു​ട്ടു​ണ്ടെ​ങ്കിൽ, ഒരുപക്ഷേ വ്യക്തി​പ​ര​മായ അരക്ഷി​ത​ബോ​ധ​വും അഹങ്കാ​ര​വും ആയിരി​ക്കാം നിങ്ങളു​ടെ പ്രശ്‌നം.

അഹങ്കാരി അക്ഷമനാണ്‌. താഴ്‌മ​യു​ള്ളവൻ സഹിഷ്‌ണു​ത​യും ദീർഘ​ക്ഷ​മ​യും ഉള്ളവനാണ്‌. നിങ്ങളോ? അസുഖ​ക​ര​മാ​യി തോന്നുന്ന ഏതു പെരു​മാ​റ്റ​വും നിങ്ങളെ അലോ​സ​ര​പ്പെ​ടു​ത്തു​മോ? അത്തരം പ്രതി​ക​രണം ദീർഘ​ക്ഷ​മ​യ്‌ക്കു നേർ വിപരീ​ത​മാണ്‌. നിങ്ങൾക്കു താഴ്‌മ ഉണ്ടെങ്കിൽ, നിങ്ങൾ നിങ്ങ​ളെ​ത്തന്നെ വളരെ ഗൗരവ​മാ​യി എടുക്കില്ല. യേശു​വി​ന്റെ ശിഷ്യ​ന്മാർ തങ്ങളെ​ത്തന്നെ വളരെ ഗൗരവ​മാ​യി എടുത്ത​പ്പോൾ എന്തു സംഭവി​ച്ചെന്ന്‌ ഓർമി​ക്കുക—ആരായി​രി​ക്കണം ഏറ്റം പ്രധാനി എന്നതിനെ കുറിച്ച്‌ അവർക്കി​ട​യിൽ ചൂടു​പി​ടിച്ച തർക്കമു​ണ്ടാ​യി. തങ്ങൾ എല്ലാവ​രും “പ്രയോ​ജനം ഇല്ലാത്ത ദാസന്മാർ” ആണെന്നു​ള്ളത്‌ അവർ മറന്നു​പോ​യി!—ലൂക്കൊസ്‌ 17:10; 22:24; മർക്കൊസ്‌ 10:35-37, 41.

ഫ്രഞ്ച്‌ എഴുത്തു​കാ​ര​നായ വോൾട്ടയർ താഴ്‌മയെ “ആത്മാവി​ന്റെ വിനയം” എന്നും “അഹങ്കാ​ര​ത്തി​ന്റെ മറുമ​രുന്ന്‌” എന്നും വർണിച്ചു. അതേ, താഴ്‌മ മനസ്സിന്റെ എളിമ​യാണ്‌. താഴ്‌മ​യു​ള്ളവൻ വിനീത മനോ​ഭാ​വ​മു​ള്ള​വ​നാണ്‌, അഹങ്കാ​രി​യല്ല. അയാൾ ആഴമായ ആദരവും മര്യാ​ദ​യും ഉള്ളവനാണ്‌.

താഴ്‌മ​യു​ള്ള​വർ ആയിരി​ക്കാൻ പരി​ശ്ര​മി​ക്കേ​ണ്ടത്‌ എന്തു​കൊണ്ട്‌? എന്തെന്നാൽ താഴ്‌മ​യ്‌ക്ക്‌ ദൈവാം​ഗീ​കാ​ര​മുണ്ട്‌. അതു ദിവ്യ മാർഗ​ദർശനം നേടാൻ നമ്മെ സഹായി​ക്കു​ന്നു. ഭാഗി​ക​മാ​യി ദാനീ​യേ​ലി​ന്റെ താഴ്‌മ നിമിത്തം യഹോവ അവനെ “ഏററവും പ്രിയനാ”യ ഒരുവ​നാ​യി വീക്ഷി​ക്കു​ക​യും ഒരു ദർശന​വു​മാ​യി ഒരു ദൂതനെ അവന്റെ അടുക്ക​ലേക്ക്‌ അയയ്‌ക്കു​ക​യും ചെയ്‌തു! (ദാനീ​യേൽ 9:23; 10:11, 19) താഴ്‌മ അനേകം പ്രതി​ഫ​ലങ്ങൾ കൈവ​രു​ത്തു​ന്നു. അതു നിങ്ങളെ സ്‌നേ​ഹി​ക്കുന്ന യഥാർഥ സുഹൃ​ത്തു​ക്കളെ പ്രദാനം ചെയ്യുന്നു. അതിലു​പ​രി​യാ​യി, അതു യഹോ​വ​യു​ടെ അനു​ഗ്രഹം കൈവ​രു​ത്തു​ന്നു. “താഴ്‌മെ​ക്കും യഹോ​വ​ഭ​ക്ഷി​ക്കും ഉള്ള പ്രതി​ഫലം ധനവും മാനവും ജീവനും ആകുന്നു.”—സദൃശ​വാ​ക്യ​ങ്ങൾ 22:4.

[7-ാം പേജിലെ ചിത്രം]

താഴ്‌മയോടുകൂടിയ ഒരു ക്ഷമാപണ വാക്കിന്‌ ജീവിതം കൂടുതൽ സുഗമ​മാ​ക്കാൻ കഴിയും