ബൈബിൾ പുസ്‌തക നമ്പർ 13—1 ദിനവൃ​ത്താ​ന്തം

എഴുത്തുകാരൻ: എസ്രാ

എഴുതിയ സ്ഥലം: യെരു​ശ​ലേം (?)

എഴുത്തു പൂർത്തി​യാ​യത്‌: പൊ.യു.മു. ഏകദേശം 460

ഉൾപ്പെട്ടിരിക്കുന്ന കാലം: 1 ദിനവൃ​ത്താ​ന്തം 9:44-നുശേഷം: പൊ.യു.മു. 1077–1037

1. ഏതു വിധങ്ങ​ളി​ലാണ്‌ ഒന്നു ദിനവൃ​ത്താ​ന്തം ദിവ്യ​രേ​ഖ​യു​ടെ അത്യന്താ​പേ​ക്ഷി​ത​വും പ്രയോ​ജ​ന​പ്ര​ദ​വു​മായ ഒരു ഭാഗമാ​യി​രി​ക്കു​ന്നത്‌?

ഒന്നു ദിനവൃ​ത്താ​ന്തം വംശാ​വ​ലി​ക​ളു​ടെ ഒരു വിരസ​മായ പട്ടിക മാത്ര​മാ​ണോ? അതു കേവലം ശമൂവേൽ, രാജാ​ക്കൻമാർ എന്നീ പുസ്‌ത​ക​ങ്ങ​ളു​ടെ ആവർത്ത​ന​മാ​ണോ? അശേഷമല്ല! ദിവ്യ​രേ​ഖ​യു​ടെ പ്രകാ​ശ​ദാ​യ​ക​വും അത്യന്താ​പേ​ക്ഷി​ത​വു​മായ ഒരു ഭാഗമാ​ണി​വി​ടെ​യു​ള​ളത്‌—അതിന്റെ എഴുത്തി​ന്റെ നാളിൽ ജനത​യെ​യും അതിന്റെ ആരാധ​ന​യെ​യും പുനഃ​സം​ഘ​ടി​പ്പി​ക്കു​ന്ന​തിന്‌ അത്യന്താ​പേ​ക്ഷി​തം, അതെ, ഇപ്പോ​ഴത്തെ ഈ നാൾ ഉൾപ്പെടെ പിൽക്കാ​ല​നാ​ളു​ക​ളി​ലേ​ക്കു​ളള ആരാധ​നാ​മാ​തൃക കാണി​ച്ചു​ത​രു​ന്ന​തിന്‌ അത്യന്താ​പേ​ക്ഷി​ത​വും പ്രയോ​ജ​ന​പ്ര​ദ​വും​തന്നെ. ഒന്നു ദിനവൃ​ത്താ​ന്ത​ത്തിൽ എല്ലാ തിരു​വെ​ഴു​ത്തു​ക​ളി​ലും കാണ​പ്പെ​ടുന്ന യഹോ​വ​ക്കു​ളള അത്യന്തം മനോ​ഹ​ര​മായ സ്‌തു​തി​പ്ര​ക​ട​ന​ങ്ങ​ളിൽ ചിലത്‌ അടങ്ങി​യി​രി​ക്കു​ന്നു. അതു യഹോ​വ​യു​ടെ നീതി​യു​ളള രാജ്യ​ത്തി​ന്റെ വിശി​ഷ്ട​മായ പൂർവ​ദർശ​നങ്ങൾ നൽകുന്നു. ആ രാജ്യ​ത്തിൽ പ്രത്യാശ വെക്കുന്ന സകലരും പ്രയോ​ജ​ന​ക​ര​മാ​യി അതു പഠി​ക്കേ​ണ്ട​താണ്‌. ദിനവൃ​ത്താ​ന്ത​ങ്ങ​ളു​ടെ രണ്ടു പുസ്‌ത​ക​ങ്ങളെ യഹൂദൻമാ​രും ക്രിസ്‌ത്യാ​നി​ക​ളും ഒരു​പോ​ലെ യുഗങ്ങ​ളി​ലു​ട​നീ​ളം വിലമ​തി​ച്ചി​ട്ടുണ്ട്‌. ബൈബിൾവി​വർത്ത​ക​നായ ജറോം അവയെ “പഴയനി​യ​മ​ത്തി​ന്റെ ഒരു സാരസം​ഗ്രഹം” എന്നു പരിഗ​ണി​ക്കു​ക​യും “പരിശുദ്ധ എഴുത്തു​കൾ പരിചി​ത​മാ​ണെന്നു സങ്കൽപ്പി​ച്ചി​ട്ടു ദിനവൃ​ത്താ​ന്തം അറിയാൻപാ​ടി​ല്ലാ​തി​രി​ക്കു​ന്നവൻ തന്നേത്തന്നെ ചതിക്ക​മാ​ത്രം ചെയ്യത്ത​ക്ക​വണ്ണം അവ സമുന്നത പ്രാധാ​ന്യ​വും മൂല്യ​വു​മു​ള​ള​താ​ണെന്നു” തറപ്പി​ച്ചു​പ​റ​യു​ക​യും ചെയ്യത്ത​ക്ക​വണ്ണം അവയെ​സം​ബ​ന്ധിച്ച്‌ അദ്ദേഹ​ത്തിന്‌ ഉയർന്ന അഭി​പ്രാ​യ​മു​ണ്ടാ​യി​രു​ന്നു.a

2. ദിനവൃ​ത്താ​ന്തം എഴുതി​യത്‌ എന്തിനാ​യി​രു​ന്നു?

² ദിനവൃ​ത്താ​ന്ത​ങ്ങ​ളു​ടെ രണ്ടു പുസ്‌ത​കങ്ങൾ പ്രത്യ​ക്ഷ​ത്തിൽ ആദ്യം ഒരു പുസ്‌ത​ക​മോ ചുരു​ളോ ആയിരു​ന്നു. പിന്നീട്‌ അതു സൗകര്യ​ത്തി​നു​വേണ്ടി വിഭജി​ക്ക​പ്പെട്ടു. ദിനവൃ​ത്താ​ന്തം എഴുതി​യത്‌ എന്തിനാ​യി​രു​ന്നു? പശ്ചാത്തലം പരിചി​ന്തി​ക്കുക. ബാബി​ലോ​നി​ലെ പ്രവാസം ഏതാണ്ട്‌ 77 വർഷം മുമ്പ്‌ അവസാ​നി​ച്ചി​രു​ന്നു. യഹൂദൻമാർ തങ്ങളുടെ ദേശത്തു വീണ്ടും പാർപ്പു​റ​പ്പി​ച്ചു. എന്നിരു​ന്നാ​ലും, യെരു​ശ​ലേ​മിൽ പുനർനിർമി​ക്ക​പ്പെട്ട ആലയത്തി​ലെ യഹോ​വ​യു​ടെ ആരാധ​ന​യിൽനിന്ന്‌ അപകട​ക​ര​മായ ഒരു അകന്നു​മാ​റ​റ​ത്തി​ന്റെ പ്രവണത ഉണ്ടായി​രു​ന്നു. ന്യായാ​ധി​പൻമാ​രെ​യും ദൈവ​നി​യ​മ​ത്തി​ന്റെ (രാജാ​വി​ന്റെ നിയമ​ത്തി​ന്റെ​യും) ഉപദേ​ഷ്ടാ​ക്കൻമാ​രെ​യും നിയമി​ക്കു​ന്ന​തി​നും യഹോ​വ​യു​ടെ ആലയത്തെ മനോ​ഹ​ര​മാ​ക്കു​ന്ന​തി​നും പേർഷ്യ​യി​ലെ രാജാവ്‌ എസ്രായെ അധികാ​ര​പ്പെ​ടു​ത്തി​യി​രു​ന്നു. അധികാ​ര​മു​ളള ആളുകൾമാ​ത്രം പൗരോ​ഹി​ത്യ​ത്തിൽ സേവി​ക്കു​ന്നു​വെന്ന്‌ ഉറപ്പു​വ​രു​ത്താ​നും പുരോ​ഹി​തൻമാർക്ക്‌ ഉപജീ​വ​ന​മാർഗം കൊടു​ത്തി​രുന്ന ഗോ​ത്ര​പ​ര​മായ അവകാ​ശ​ങ്ങളെ സ്ഥിരീ​ക​രി​ക്കാ​നും കൃത്യ​മായ വംശാ​വ​ലി​പ്പ​ട്ടി​കകൾ ആവശ്യ​മാ​യി​രു​ന്നു. രാജ്യ​ത്തെ​സം​ബ​ന്ധിച്ച യഹോ​വ​യു​ടെ പ്രവച​ന​ങ്ങ​ളു​ടെ വീക്ഷണ​ത്തിൽ യഹൂദ​യു​ടെ​യും ദാവീ​ദി​ന്റെ​യും വംശപ​ര​മ്പ​ര​യു​ടെ വ്യക്തവും ആശ്രയ​യോ​ഗ്യ​വു​മായ ഒരു രേഖ ഉണ്ടായി​രി​ക്കു​ന്ന​തും മർമ​പ്ര​ധാ​ന​മാ​യി​രു​ന്നു.

3. (എ) എസ്രാ യഹൂദൻമാ​രിൽ എന്തു നിവേ​ശി​പ്പി​ക്കാൻ ആഗ്രഹി​ച്ചി​രു​ന്നു? (ബി) അവൻ യഹൂദ​യു​ടെ ചരിത്രം പ്രദീ​പ്‌ത​മാ​ക്കി​യത്‌ എന്തു​കൊണ്ട്‌, അവൻ നിർമ​ലാ​രാ​ധ​ന​യു​ടെ പ്രാധാ​ന്യം ഊന്നി​പ്പ​റ​ഞ്ഞ​തെ​ങ്ങനെ?

³ പുനഃ​സ്ഥി​തീ​ക​രി​ക്ക​പ്പെട്ട യഹൂദൻമാ​രെ അവരുടെ വിരക്തി​യിൽനി​ന്നു തട്ടിയു​ണർത്തു​ന്ന​തി​നും അവർ തീർച്ച​യാ​യും യഹോ​വ​യു​ടെ ഉടമ്പടി​പ്ര​കാ​ര​മു​ളള സ്‌നേ​ഹ​ദ​യ​യു​ടെ അവകാ​ശി​ക​ളാ​ണെ​ന്നു​ളള തിരി​ച്ച​റിവ്‌ അവരിൽ ഉളവാ​ക്കു​ന്ന​തി​നും ആത്മാർഥ​മായ ആഗ്രഹ​മു​ള​ള​യാ​ളാ​യി​രു​ന്നു എസ്രാ. തന്നിമി​ത്തം ദിനവൃ​ത്താ​ന്ത​ങ്ങ​ളിൽ അവൻ ജനതയു​ടെ ചരി​ത്ര​ത്തി​ന്റെ​യും ഒന്നാം മനുഷ്യ​നായ ആദാമി​നോ​ളം പിമ്പോ​ട്ടു പോകുന്ന മനുഷ്യ​വർഗ​ത്തി​ന്റെ ഉത്ഭവത്തി​ന്റെ​യും ഒരു പൂർണ​വി​വ​രണം അവരുടെ മുമ്പാകെ നിരത്തി​വെച്ചു. കേന്ദ്ര ആശയം ദാവീ​ദി​ന്റെ രാജ്യ​മാ​യി​രു​ന്ന​തി​നാൽ അവൻ പത്തു​ഗോ​ത്ര​രാ​ജ്യ​ത്തി​ന്റെ തികച്ചും ഗുണക​ര​മ​ല്ലാഞ്ഞ രേഖ മിക്കവാ​റും പൂർണ​മാ​യി ഒഴിവാ​ക്കി​ക്കൊ​ണ്ടു യഹൂദ​യു​ടെ ചരി​ത്ര​ത്തെ​യാണ്‌ ഊന്നി​പ്പ​റ​ഞ്ഞത്‌. യഹൂദ​യി​ലെ ഏററവും മഹാൻമാ​രായ രാജാ​ക്കൻമാർ ആലയം നിർമി​ക്കു​ന്ന​തി​ലോ പുനഃ​സ്ഥാ​പി​ക്കു​ന്ന​തി​ലോ ഏർപ്പെ​ട്ടി​രി​ക്കു​ന്ന​താ​യും തീക്ഷ്‌ണ​മാ​യി ദൈവാ​രാ​ധ​ന​യിൽ മുന്നി​ട്ടു​നിൽക്കു​ന്ന​താ​യും അവൻ വരച്ചു​കാ​ട്ടി. രാജ്യ​ത്തി​ന്റെ മറിച്ചി​ടീ​ലി​ലേക്കു നയിച്ച മതപര​മായ പാപങ്ങളെ അവൻ ചൂണ്ടി​ക്കാ​ണി​ച്ചു, അതേസ​മയം ദൈവ​ത്തി​ന്റെ പുനഃ​സ്ഥാ​പ​ന​വാ​ഗ്‌ദ​ത്ത​ങ്ങളെ ദൃഢീ​ക​രി​ക്കു​ക​യും ചെയ്‌തു. അവൻ ആലയ​ത്തെ​യും അതിലെ പുരോ​ഹി​തൻമാ​രെ​യും ലേവ്യ​രെ​യും സംഗീ​ത​വി​ദ​ഗ്‌ധ​രെ​യും കുറി​ച്ചും മററു​മു​ളള അനേകം വിശദാം​ശ​ങ്ങ​ളിൽ ശ്രദ്ധ കേന്ദ്രീ​ക​രി​ച്ചു​കൊ​ണ്ടു നിർമ​ലാ​രാ​ധ​ന​യു​ടെ പ്രാധാ​ന്യം ഊന്നി​പ്പ​റഞ്ഞു. പ്രവാ​സ​ത്തിൽനി​ന്നു​ളള തങ്ങളുടെ മടങ്ങി​വ​ര​വി​ന്റെ കാരണ​ത്തിൽ—യെരു​ശ​ലേ​മി​ലെ യഹോ​വ​യു​ടെ ആരാധ​ന​യു​ടെ പുനഃ​സ്ഥാ​പ​ന​ത്തിൽ—കേന്ദ്രീ​ക​രിച്ച ഒരു ചരി​ത്ര​രേഖ ലഭിച്ചത്‌ ഇസ്രാ​യേ​ല്യർക്കു വളരെ പ്രോ​ത്സാ​ഹ​ക​ജ​ന​ക​മാ​യി​രു​ന്നി​രി​ക്കണം.

4. ദിനവൃ​ത്താ​ന്ത​ങ്ങ​ളു​ടെ എഴുത്തു​കാ​രൻ എസ്രാ ആണെന്നു​ള​ള​തി​നെ ഏതു തെളിവ്‌ അനുകൂ​ലി​ക്കു​ന്നു?

⁴ ദിനവൃ​ത്താ​ന്തം എഴുതി​യത്‌ എസ്രാ ആണെന്നു​ള​ള​തി​ന്റെ തെളിവ്‌ എന്താണ്‌? രണ്ടു ദിനവൃ​ത്താ​ന്ത​ത്തി​ന്റെ അവസാ​നത്തെ രണ്ടു വാക്യങ്ങൾ എസ്രാ​യു​ടെ തുടക്ക​ത്തി​ലെ രണ്ടു വാക്യങ്ങൾ തന്നെയാണ്‌. രണ്ടു ദിനവൃ​ത്താ​ന്തം അവസാ​നി​ക്കു​ന്നത്‌ എസ്രാ 1:3-ൽ പൂർത്തി​യാ​കുന്ന ഒരു വാക്യ​ത്തി​ന്റെ മധ്യത്തി​ലാണ്‌. അതു​കൊ​ണ്ടു ദിനവൃ​ത്താ​ന്ത​ങ്ങ​ളു​ടെ എഴുത്തു​കാ​രൻ എസ്രാ​യു​ടെ എഴുത്തു​കാ​രൻത​ന്നെ​യാ​യി​രു​ന്നിരി​ക്കണം. ദിനവൃ​ത്താ​ന്ത​ങ്ങ​ളി​ലെ​യും എസ്രാ​യി​ലെ​യും ശൈലി, ഭാഷ, വാചക​ഘടന, അക്ഷരവി​ന്യാ​സം എന്നിവ ഒന്നുത​ന്നെ​യാ​ണെ​ന്നു​ളള വസ്‌തു​ത​യാ​ലും ഇതു കൂടു​ത​ലാ​യി തെളി​യി​ക്ക​പ്പെ​ടു​ന്നു. ഈ രണ്ടു പുസ്‌ത​ക​ങ്ങ​ളി​ലെ ചില പ്രയോ​ഗങ്ങൾ മററു ബൈബിൾപു​സ്‌ത​ക​ങ്ങ​ളിൽ ഒന്നിലും കാണു​ന്നില്ല. എസ്രാ എന്ന പുസ്‌ത​ക​മെ​ഴു​തിയ എസ്രാ ദിനവൃ​ത്താ​ന്ത​ങ്ങ​ളും എഴുതി​യി​രി​ക്കണം. യഹൂദ​പാ​ര​മ്പ​ര്യം ഈ നിഗമ​നത്തെ പിന്താ​ങ്ങു​ന്നു.

5. എസ്രാ​യു​ടെ ആത്മീയ​വും ലൗകി​ക​വു​മായ യോഗ്യ​തകൾ ഏവയാ​യി​രു​ന്നു?

⁵ വിശ്വാ​സ്യ​വും കൃത്യ​വു​മായ ഈ ചരിത്രം സമാഹ​രി​ക്കാൻ എസ്രാ​യോ​ളം യോഗ്യ​ത​യു​ളള ആരും ഇല്ലായി​രു​ന്നു. “യഹോ​വ​യു​ടെ ന്യായ​പ്ര​മാ​ണം പരി​ശോ​ധി​പ്പാ​നും അതു അനുസ​രി​ച്ചു നടപ്പാ​നും യിസ്രാ​യേ​ലിൽ അതിന്റെ ചട്ടങ്ങളും വിധി​ക​ളും ഉപദേ​ശി​പ്പാ​നും എസ്രാ മനസ്സു​വെ​ച്ചി​രു​ന്നു.” (എസ്രാ 7:10) യഹോവ പരിശു​ദ്ധാ​ത്മാ​വു​മു​ഖാ​ന്തരം അവനെ സഹായി​ച്ചു. പേർഷ്യൻ ലോക​ഭ​ര​ണാ​ധി​കാ​രി എസ്രാ​യി​ലെ ദൈവി​ക​ജ്ഞാ​നത്തെ തിരി​ച്ച​റി​യു​ക​യും യഹൂദാ​ഭ​ര​ണ​പ്ര​ദേ​ശത്തു വിപു​ല​മായ സിവിൽ അധികാ​ര​ങ്ങ​ളോ​ടെ അവനെ നിയോ​ഗി​ക്കു​ക​യും ചെയ്‌തു. (എസ്രാ 7:12-26) അങ്ങനെ ദിവ്യ​വും സാമ്രാ​ജ്യ​പ​ര​വു​മായ അധികാ​ര​ത്താൽ സജ്ജനായി ലഭ്യമായ ഏററവും നല്ല പ്രമാ​ണ​ങ്ങ​ളിൽനി​ന്നു തന്റെ വിവരണം സമാഹ​രി​ക്കാൻ എസ്രാ​യ്‌ക്കു കഴിഞ്ഞു.

6. ദിനവൃ​ത്താ​ന്ത​ങ്ങ​ളു​ടെ കൃത്യ​ത​യിൽ നമുക്കു വിശ്വാ​സ​മു​ണ്ടാ​യി​രി​ക്കാൻ കഴിയു​ന്ന​തെ​ന്തു​കൊണ്ട്‌?

⁶ എസ്രാ ഒരു അസാധാ​രണ ഗവേഷകൻ ആയിരു​ന്നു. അവൻ ആശ്രയ​യോ​ഗ്യ​രായ സമകാ​ലിക പ്രവാ​ച​കൻമാർ സമാഹ​രി​ച്ചി​രു​ന്ന​തും പൊതു​രേ​ഖ​ക​ളു​ടെ ഔദ്യോ​ഗി​ക​നിർമാ​താ​ക്ക​ളും സൂക്ഷി​പ്പു​കാ​രും സമാഹ​രി​ച്ചി​രു​ന്ന​തു​മായ പഴക്ക​മേ​റിയ യഹൂദ​ച​രി​ത്ര​ത്തി​ന്റെ രേഖക​ളിൽ അന്വേ​ഷണം നടത്തി. അവൻ പരി​ശോ​ധിച്ച എഴുത്തു​ക​ളിൽ ചിലത്‌ ഇസ്രാ​യേ​ലിൽനി​ന്നും യഹൂദ​യിൽനി​ന്നു​മു​ളള സംസ്ഥാ​ന​രേ​ഖ​ക​ളും വംശാ​വ​ലി​രേ​ഖ​ക​ളും പ്രവാ​ച​കൻമാർ എഴുതിയ ചരി​ത്ര​കൃ​തി​ക​ളും ഗോ​ത്ര​ത്ത​ല​വൻമാ​രോ കുടും​ബ​ത്ത​ല​വൻമാ​രോ കൈവ​ശം​വെ​ച്ചി​രുന്ന പ്രമാ​ണ​ങ്ങ​ളും ആയിരു​ന്നി​രി​ക്കാം. എസ്രാ അത്തരം വിവര​ങ്ങ​ളു​ടെ കുറഞ്ഞ​പക്ഷം 20 ഉറവുകൾ എടുത്തു​പ​റ​യു​ന്നു.b ഈ വ്യക്തമായ പരാമർശ​ങ്ങ​ളാൽ, ആഗ്രഹി​ക്കു​ന്ന​പക്ഷം ഈ ആധാര​ങ്ങളെ പരി​ശോ​ധി​ക്കു​ന്ന​തി​നു​ളള അവസരം എസ്രാ സത്യസ​ന്ധ​മാ​യി തന്റെ സമകാ​ലി​കർക്കു കൊടു​ത്തു. ഇത്‌ അവന്റെ വാക്കിന്റെ വിശ്വാ​സ്യ​ത​ക്കും പ്രാമാ​ണ്യ​ത​ക്കും അനുകൂ​ല​മായ വാദത്തി​നു ഗണ്യമാ​യി ശക്തി കൂട്ടുന്നു. ഇന്നു നമുക്ക്‌ എസ്രാ​യു​ടെ കാലത്തെ യഹൂദൻമാർക്കു​ണ്ടാ​യി​രുന്ന വിശ്വാ​സ​ത്തി​ന്റെ അതേ കാരണ​ത്താൽ ദിനവൃ​ത്താ​ന്ത​പു​സ്‌ത​ക​ത്തി​ന്റെ കൃത്യ​ത​യിൽ വിശ്വാ​സ​മു​ണ്ടാ​യി​രി​ക്കാൻ കഴിയും.

7. ദിനവൃ​ത്താ​ന്തം എഴുത​പ്പെ​ട്ടത്‌ എപ്പോ​ഴാ​യി​രു​ന്നു, അതു വിശ്വാ​സ്യ​മാ​ണെന്ന്‌ ആർ പരിഗ​ണി​ച്ചി​രു​ന്നു, അത്‌ ഏതു കാലഘ​ട്ടത്തെ ഉൾപ്പെ​ടു​ത്തു​ന്നു?

⁷ എസ്രാ പേർഷ്യൻരാ​ജാ​വായ അർഥഹ്‌ശ​ഷ്ടാവ്‌ ലോം​ഗി​മാ​ന​സി​ന്റെ ഏഴാം സംവത്സ​ര​ത്തിൽ, അതായത്‌ പൊ.യു.മു. 468-ൽ, “ബാബേ​ലിൽനി​ന്നു വന്ന”തുകൊ​ണ്ടും പൊ.യു.മു. 455-ലെ നെഹമ്യാ​വി​ന്റെ പ്രാധാ​ന്യ​മർഹി​ക്കുന്ന ആഗമനത്തെ എസ്രാ രേഖ​പ്പെ​ടു​ത്തു​ന്നി​ല്ലാ​ത്ത​തു​കൊ​ണ്ടും ഈ തീയതി​കൾക്കി​ട​യ്‌ക്കാ​യി​രി​ക്കണം ദിനവൃ​ത്താ​ന്തങ്ങൾ എഴുത​പ്പെ​ട്ടത്‌, മിക്കവാ​റും പൊ.യു.മു. ഏതാണ്ട്‌ 460-ൽ യെരു​ശ​ലേ​മിൽവെച്ച്‌. (എസ്രാ 7:1-7; നെഹെ. 2:1-18) എസ്രാ​യു​ടെ നാളിലെ യഹൂദൻമാർ ‘ദൈവ​നി​ശ്വ​സ്‌ത​വും പ്രയോ​ജ​ന​പ്ര​ദ​വു​മായ എല്ലാ തിരു​വെ​ഴു​ത്തി​ന്റെ​യും’ യഥാർഥ ഭാഗമാ​യി ദിനവൃ​ത്താ​ന്തത്തെ സ്വീക​രി​ച്ചു. അവർ അതിനെ ദീവ്‌റേ ഹായാ​മിം എന്നു വിളിച്ചു, അതിന്റെ അർഥം “ദിവസ​ങ്ങ​ളി​ലെ കാര്യങ്ങൾ,” അതായതു ദിവസ​ങ്ങ​ളു​ടെ അഥവാ കാലങ്ങ​ളു​ടെ ചരിത്രം എന്നാണ്‌. ഏതാണ്ട്‌ 200 വർഷത്തി​നു​ശേഷം, ഗ്രീക്ക്‌ സെപ്‌റ​റു​വ​ജിൻറി​ന്റെ വിവർത്ത​കൻമാ​രും ദിനവൃ​ത്താ​ന്തത്തെ കാനോ​നി​ക​മാ​യി ഉൾപ്പെ​ടു​ത്തി. അവർ പുസ്‌ത​കത്തെ രണ്ടു ഭാഗങ്ങ​ളാ​യി തിരി​ക്കു​ക​യും അതു ശമു​വേ​ലി​ന്റെ​യും രാജാ​ക്കൻമാ​രു​ടെ​യും അല്ലെങ്കിൽ അന്നത്തെ മുഴു​ബൈ​ബി​ളി​ന്റെ​യും അനുബ​ന്ധ​മാ​ണെന്നു സങ്കൽപ്പി​ച്ചു​കൊണ്ട്‌ അതിനെ “വിട്ടു​കളഞ്ഞ (പറയാ​തി​രുന്ന; ഒഴിവാ​ക്കിയ) കാര്യങ്ങൾ” എന്നർഥ​മു​ളള പാരാ​ലീ​പോ​മെനൻ എന്നു വിളി​ക്കു​ക​യും ചെയ്‌തു. ഈ പേർ വിശേ​ഷാൽ ഉചിത​മ​ല്ലെ​ങ്കി​ലും അവരുടെ പ്രവർത്തനം അവർ ദിനവൃ​ത്താ​ന്തത്തെ വിശ്വാ​സ്യ​വും നിശ്വ​സ്‌ത​വു​മായ തിരു​വെ​ഴു​ത്തു​ക​ളാ​യി കണക്കാ​ക്കി​യെന്നു തെളി​യി​ക്കു​ന്നു. ലാററിൻ വൾഗേ​ററ്‌ തയ്യാറാ​ക്കി​യ​പ്പോൾ, ജറോം ഇങ്ങനെ നിർദേ​ശി​ച്ചു: “നമുക്ക്‌ [അവയെ] കൂടുതൽ അർഥവ​ത്താ​യി മുഴു ദിവ്യ​ച​രി​ത്ര​ത്തി​ന്റെ​യും ക്രോ​ണി​ക്കോൺ എന്നു വിളി​ക്കാ​വു​ന്ന​താണ്‌.” ഇതിൽനി​ന്നാ​ണു “ക്രോ​ണി​ക്കിൾസ്‌” (ദിനവൃ​ത്താ​ന്തങ്ങൾ) എന്ന തലക്കെട്ട്‌ നിഷ്‌പ​ന്ന​മാ​യി​രി​ക്കു​ന്ന​തെന്നു തോന്നു​ന്നു. ദിനവൃ​ത്താ​ന്തം സംഭവങ്ങൾ നടന്ന ക്രമത്തി​ലു​ളള അവയുടെ ഒരു രേഖയാണ്‌. വംശാ​വ​ലി​കൾ പട്ടിക​പ്പെ​ടു​ത്തി​യ​ശേഷം ഒന്നു ദിനവൃ​ത്താ​ന്തം മുഖ്യ​മാ​യി ശ്രദ്ധപ​തി​പ്പി​ക്കു​ന്നതു പൊ.യു.മു. 1077 മുതൽ മരണം​വ​രെ​യു​ളള ദാവീ​ദു​രാ​ജാ​വി​ന്റെ കാലത്തി​ലാണ്‌.

ഒന്നു ദിനവൃ​ത്താ​ന്ത​ത്തി​ന്റെ ഉളളടക്കം

8. ഒന്നു ദിനവൃ​ത്താ​ന്തം ഏതു രണ്ടു വിഭാ​ഗ​ങ്ങ​ളാ​യി പിരി​യു​ന്നു?

⁸ ഒന്നു ദിനവൃ​ത്താ​ന്തം എന്ന ഈ പുസ്‌തകം സ്വാഭാ​വി​ക​മാ​യി രണ്ടു ഭാഗങ്ങ​ളാ​യി പിരി​യു​ന്നു: മുഖ്യ​മാ​യി വംശാ​വ​ലി​കൾ കൈകാ​ര്യം​ചെ​യ്യുന്ന ആദ്യത്തെ 9 അധ്യാ​യ​ങ്ങ​ളും ശൗലിന്റെ മരണം​മു​തൽ ദാവീ​ദി​ന്റെ വാഴ്‌ച​യു​ടെ അവസാ​നം​വ​രെ​യു​ളള 40 വർഷക്കാ​ലത്തെ സംഭവങ്ങൾ പ്രതി​പാ​ദി​ക്കുന്ന ഒടുവി​ലത്തെ 20 അധ്യാ​യ​ങ്ങ​ളും.

9. ദിനവൃ​ത്താ​ന്ത​ത്തി​ന്റെ എഴുത്തിന്‌ ഒരു പിൽക്കാ​ല​തീ​യ​തി​യെ അനുകൂ​ലി​ക്കാൻ കാരണ​മി​ല്ലാ​ത്തത്‌ എന്തു​കൊണ്ട്‌?

⁹ വംശാ​വ​ലി​കൾ (1:1–9:44). ഈ അധ്യാ​യങ്ങൾ ആദാം​മു​തൽ സെരു​ബ്ബാ​ബേ​ലി​ന്റെ പരമ്പര​വ​രെ​യു​ളള വംശാ​വലി പട്ടിക​പ്പെ​ടു​ത്തു​ന്നു. (1:1; 3:19-24) അനേകം വിവർത്ത​നങ്ങൾ സെരു​ബ്ബാ​ബേ​ലി​ന്റെ പരമ്പരയെ പത്താം തലമു​റ​യോ​ളം എത്തിക്കു​ന്നു. അവൻ പൊ.യു.മു. 537-ൽ യെരു​ശ​ലേ​മി​ലേക്കു മടങ്ങി​പ്പോ​യ​തി​നാൽ തെളി​വ​നു​സ​രിച്ച്‌ എസ്രാ എഴുത്തു പൂർത്തി​യാ​ക്കിയ പൊ.യു.മു. 460-ഓടെ ഇത്ര​യേറെ തലമു​റ​കൾക്കു ജനിക്കാൻ വേണ്ടത്ര സമയം ഉണ്ടായി​രി​ക്കു​മാ​യി​രു​ന്നില്ല. എന്നിരു​ന്നാ​ലും, ഈ ഭാഗത്ത്‌ എബ്രായ പാഠം അപൂർണ​മാണ്‌. പട്ടിക​പ്പെ​ടു​ത്തി​യി​രി​ക്കുന്ന മിക്കവ​രും സെരു​ബ്ബാ​ബേ​ലി​നോ​ടു ബന്ധപ്പെ​ട്ടി​രു​ന്നത്‌ എങ്ങനെ​യെന്നു തിട്ട​പ്പെ​ടു​ത്താൻ കഴിയു​ക​യു​മില്ല. അതു​കൊണ്ട്‌, ദിനവൃ​ത്താ​ന്ത​ത്തി​ന്റെ എഴുത്തിന്‌, ചിലർ ചെയ്യു​ന്ന​തു​പോ​ലെ ഒരു പിൽക്കാ​ല​തീ​യ​തി​യെ അനുകൂ​ലി​ക്കാൻ കാരണ​മില്ല.

10. (എ) ഏതു തലമു​റകൾ ആദ്യമാ​യി നൽകി​യി​രി​ക്കു​ന്നു? (ബി) യുക്ത്യാ​നു​സൃ​തം രണ്ടാം അധ്യാ​യ​ത്തി​ന്റെ തുടക്ക​ത്തിൽ ഏതു വംശാ​വലി രേഖ​പ്പെ​ടു​ത്തി​യി​രി​ക്കു​ന്നു? (സി) മററ്‌ ഏതു പട്ടികകൾ കൊടു​ത്തി​രി​ക്കു​ന്നു, എന്തിൽ അവസാ​നി​പ്പി​ച്ചു​കൊണ്ട്‌?

¹⁰ ആദ്യമാ​യി, ആദാം​മു​തൽ നോഹ​വ​രെ​യു​ളള പത്തു തലമു​റകൾ നൽക​പ്പെ​ടു​ന്നു, പിന്നീട്‌ അബ്രഹാം​വ​രെ​യു​ളള പത്തുത​ല​മു​റ​ക​ളും. അബ്രഹാ​മി​ന്റെ പുത്രൻമാ​രും അവരുടെ സന്തതി​ക​ളും; സേയീർ പർവത​പ്ര​ദേ​ശത്തു പാർത്ത ഏശാവി​ന്റെ​യും സേയീ​രി​ന്റെ​യും സന്തതി​പ​രമ്പര; ഏദോ​മി​ലെ ആദിമ​രാ​ജാ​ക്കൻമാർ എന്നിവ​രു​ടെ പട്ടിക നൽക​പ്പെ​ട്ടി​രി​ക്കു​ന്നു. എന്നിരു​ന്നാ​ലും, രണ്ടാം അധ്യാ​യം​മു​തൽ രേഖ ഇസ്രാ​യേ​ലി​ന്റെ അഥവാ യാക്കോ​ബി​ന്റെ സന്തതി​കളെ സംബന്ധി​ച്ചു​ള​ള​താണ്‌. അവരിൽനി​ന്നു വംശാ​വലി ആദ്യം യഹൂദ​യി​ലൂ​ടെ​യു​ള​ള​തും അനന്തരം ദാവീ​ദു​വ​രെ​യു​ളള പത്തു തലമു​റ​ക​ളു​ടേ​തും രേഖ​പ്പെ​ടു​ത്തു​ന്നു. (2:1-14) ലേവി​ഗോ​ത്ര​ത്തെ​യും മഹാപു​രോ​ഹി​തൻമാ​രെ​യും കുറി​ച്ചു​ളള പ്രത്യേക പ്രസ്‌താ​വ​ത്തോ​ടെ​യും ഒരു ബെന്യാ​മീ​ന്യ​നായ ശൗൽരാ​ജാ​വി​ന്റെ ഒരു അവതാ​രി​ക​യെ​ന്നോ​ണം ബെന്യാ​മീൻഗോ​ത്ര​ത്തി​ന്റെ ഒരു വംശാ​വ​ലി​യിൽ അവസാ​നി​പ്പി​ച്ചു​കൊ​ണ്ടും മററു ഗോ​ത്ര​ങ്ങൾക്കും പട്ടിക കൊടു​ക്കു​ന്നു. കൃത്യ​മായ അർഥത്തിൽ ചരി​ത്ര​പ​ര​മായ പ്രതി​പാ​ദനം തുടങ്ങു​ന്നതു ശൗൽരാ​ജാ​വു​മു​ത​ലാണ്‌. ചില​പ്പോൾ എസ്രാ​യു​ടെ വംശാ​വ​ലി​ക​ളും മററു ബൈബിൾഭാ​ഗ​ങ്ങ​ളും തമ്മിൽ വൈരു​ദ്ധ്യ​ങ്ങ​ളു​ണ്ടെ​ന്നും തോന്നി​യേ​ക്കാം. എന്നിരു​ന്നാ​ലും, ചിലയാ​ളു​കൾ മററു പേരു​ക​ളി​ലും അറിയ​പ്പെ​ട്ടി​രു​ന്നു​വെ​ന്നും ഭാഷയ്‌ക്കു മാററ​മു​ണ്ടാ​കു​ന്നു​വെ​ന്നും കാലത്തി​ന്റെ കടന്നു​പോ​ക്കി​നു ചില പേരു​ക​ളു​ടെ അക്ഷരവി​ന്യാ​സ​ത്തി​നു മാററം​വ​രു​ത്താൻ കഴിയു​മെ​ന്നും ഓർത്തി​രി​ക്കേ​ണ്ട​താണ്‌. ശ്രദ്ധാ​പൂർവ​ക​മായ പഠനം മിക്ക പ്രയാ​സ​ങ്ങ​ളും നീക്കം​ചെ​യ്യു​ന്നു.

11. വംശാ​വ​ലി​രേ​ഖ​യിൽ കോർത്തി​ണ​ക്കി​യി​രി​ക്കുന്ന മററു പ്രയോ​ജ​ന​പ്ര​ദ​മായ വിവര​ങ്ങ​ളു​ടെ ദൃഷ്ടാ​ന്തങ്ങൾ നൽകുക.

¹¹ എസ്രാ വ്യക്തമാ​ക്ക​ലി​നും പ്രധാ​ന​പ്പെട്ട ഓർമ​പ്പെ​ടു​ത്ത​ലു​കൾക്കും ഉതകുന്ന ചരി​ത്ര​പ​ര​വും ഭൂമി​ശാ​സ്‌ത്ര​പ​ര​വു​മായ വിജ്ഞാ​ന​ശ​ക​ലങ്ങൾ അവി​ടെ​യും ഇവി​ടെ​യും കോർത്തി​ണ​ക്കു​ന്നു. ദൃഷ്ടാ​ന്ത​ത്തിന്‌, രൂബേന്റെ സന്തതി​കളെ പട്ടിക​പ്പെ​ടു​ത്തു​മ്പോൾ എസ്രാ ഒരു പ്രധാ​ന​പ്പെട്ട വിജ്ഞാ​ന​ശ​കലം കൂട്ടി​ച്ചേർക്കു​ന്നു: “യിസ്രാ​യേ​ലി​ന്റെ ആദ്യജാ​ത​നായ രൂബേന്റെ പുത്രൻമാർ:—അവനല്ലോ ആദ്യജാ​തൻ; എങ്കിലും അവൻ തന്റെ പിതാ​വി​ന്റെ ശയ്യയെ അശുദ്ധ​മാ​ക്കി​യ​തു​കൊ​ണ്ടു അവന്റെ ജ്യേഷ്‌ഠാ​വ​കാ​ശം യിസ്രാ​യേ​ലി​ന്റെ മകനായ യോ​സേ​ഫി​ന്റെ പുത്രൻമാർക്കു ലഭിച്ചു; വംശാ​വലി ജ്യേഷ്‌ഠാ​വ​കാ​ശ​പ്ര​കാ​രം എണ്ണുവാ​നു​ള​ളതല്ല. യെഹൂദാ തന്റെ സഹോ​ദ​രൻമാ​രെ​ക്കാൾ പ്രബല​നാ​യ്‌തീർന്നു. അവനിൽനി​ന്നു പ്രഭു ഉത്ഭവിച്ചു; ജ്യേഷ്‌ഠാ​വ​കാ​ശ​മോ യോ​സേ​ഫി​നു ലഭിച്ചു.” (5:1, 2) ഈ ചുരു​ക്കം​ചില വാക്കു​ക​ളിൽ വളരെ​യ​ധി​കം വിശദീ​ക​രി​ക്ക​പ്പെ​ട്ടി​രി​ക്കു​ന്നു. കൂടാതെ, ദിനവൃ​ത്താ​ന്ത​ത്തിൽനി​ന്നു​മാ​ത്ര​മാ​ണു യോവാ​ബും അമാസ​യും അബീശാ​യി​യു​മെ​ല്ലാം ദാവീ​ദി​ന്റെ സഹോ​ദ​രീ​പു​ത്രൻമാ​രാ​ണെന്നു നാം മനസ്സി​ലാ​ക്കു​ന്നത്‌, അവരെ ചുററി​പ്പ​റ​റി​യു​ളള വിവിധ സംഭവങ്ങൾ വിലമ​തി​പ്പോ​ടെ മനസ്സി​ലാ​ക്കു​ന്ന​തിന്‌ അതു നമ്മെ സഹായി​ക്കു​ന്നു.—2:16, 17.

12. ശൗലിന്റെ മരണത്തി​ന്റെ സാഹച​ര്യ​ങ്ങൾ ഏവ?

¹² ശൗലിന്റെ അവിശ്വ​സ്‌തത അവന്റെ മരണത്തിൽ കലാശി​ക്കു​ന്നു (10:1-14). ഗിൽബോ​വ​പർവ​ത​ത്തിൽ ഫെലി​സ്‌ത്യർ ആക്രമണം ശക്തി​പ്പെ​ടു​ത്തു​ന്ന​തു​മു​തൽ വിവരണം തുടങ്ങു​ന്നു. യോനാ​ഥാൻ ഉൾപ്പെടെ ശൗലിന്റെ മൂന്നു പുത്രൻമാർ കൊല്ല​പ്പെ​ടു​ന്നു. പിന്നീടു ശൗലിനു മുറി​വേൽക്കു​ന്നു. ശത്രു​വി​നാൽ പിടി​ക്ക​പ്പെ​ടാൻ ആഗ്രഹി​ക്കാ​തെ അവൻ തന്റെ ആയുധ​വാ​ഹ​കനെ ഇങ്ങനെ പ്രേരി​പ്പി​ക്കു​ന്നു: “ഈ അഗ്രചർമ്മി​കൾ വന്നു എന്നെ അവമാ​നി​ക്കാ​തി​രി​ക്കേ​ണ്ട​തി​ന്നു നിന്റെ വാൾ ഊരി എന്നെ കുത്തുക.” ആയുധ​വാ​ഹകൻ വിസമ്മ​തി​ക്കു​മ്പോൾ ശൗൽ സ്വയം കൊല്ലു​ന്നു. ഇങ്ങനെ ശൗൽ “യഹോ​വ​യു​ടെ വചനം പ്രമാ​ണി​ക്കാ​യ്‌ക​യാ​ലും വെളി​ച്ച​പ്പാ​ട​ത്തി​യോ​ടു അരുള​പ്പാ​ടു ചോദി​ച്ച​തി​നാ​ലും മരി​ക്കേ​ണ്ടി​വന്നു. അവൻ യഹോ​വ​യോ​ടു അരുള​പ്പാ​ടു ചോദി”ച്ചില്ല. (10:4, 13, 14) യഹോവ രാജ്യം ദാവീ​ദി​നു കൊടു​ക്കു​ന്നു.

13. ദാവീദ്‌ രാജ്യ​ത്തിൽ എങ്ങനെ അഭിവൃ​ദ്ധി​പ്രാ​പി​ക്കു​ന്നു?

¹³ ദാവീദ്‌ രാജത്വ​ത്തിൽ സ്ഥിര​പ്പെ​ടു​ന്നു (11:1–12:40). കാല​ക്ര​മ​ത്തിൽ 12 ഗോ​ത്രങ്ങൾ ഹെ​ബ്രോ​നിൽ ദാവീ​ദി​ന്റെ അടുക്കൽ സമ്മേളിച്ച്‌ അവനെ സകല ഇസ്രാ​യേ​ലിൻമേ​ലും രാജാ​വാ​യി അഭി​ഷേകം ചെയ്യുന്നു. അവൻ സീയോൻ പിടി​ച്ച​ട​ക്കു​ക​യും ‘സൈന്യ​ങ്ങ​ളു​ടെ യഹോവ തന്നോ​ടു​കൂ​ടെ ഉണ്ടായി​രു​ന്ന​തി​നാൽ മേൽക്കു​മേൽ പ്രബല​നാ​യി​ത്തീ​രു​ക​യും ചെയ്യുന്നു.’ (11:9) വീരൻമാർക്കു സൈന്യ​ത്തി​ന്റെ ചുമതല ഏൽപ്പി​ച്ചു​കൊ​ടു​ക്കു​ന്നു, അവർ മുഖേന യഹോവ “വലി​യോ​രു ജയം” നൽകി രക്ഷിക്കു​ന്നു. (11:14) ദാവീ​ദി​നെ രാജാ​വാ​ക്കു​ന്ന​തി​നു യുദ്ധവീ​രൻമാർ ഒരു പൂർണ ഹൃദയ​ത്തോ​ടെ തടിച്ചു​കൂ​ടു​മ്പോൾ അവനു സംഘടി​ത​മായ പിന്തുണ ലഭിക്കു​ന്നു. ഇസ്രാ​യേ​ലിൽ ഉത്സവവും ആനന്ദവു​മുണ്ട്‌.

14. ദാവീദ്‌ ഫെലി​സ്‌ത്യ​രു​മാ​യു​ളള യുദ്ധത്തിൽ എങ്ങനെ വിജയി​ക്കു​ന്നു, വിശ്വാ​സ​പ്ര​ചോ​ദ​ക​മായ ഏത്‌ അവസരം സന്തോ​ഷ​ക​ര​മായ ഗീതം ഉയർത്തു​ന്നു?

¹⁴ ദാവീ​ദും യഹോ​വ​യു​ടെ പെട്ടക​വും (13:1–16:36). ദാവീദ്‌ ദേശീയ നേതാ​ക്കൻമാ​രു​മാ​യി ആലോചന കഴിക്കു​ന്നു, അവർ കിര്യ​ത്ത്‌യെ​യാ​രീ​മിൽനി​ന്നു യെരു​ശ​ലേ​മി​ലേക്കു പെട്ടകം കൊണ്ടു​വ​രു​ന്ന​തി​നു സമ്മതി​ക്കു​ന്നു, ഏതാണ്ട്‌ 70 വർഷമാ​യി അത്‌ അവി​ടെ​യാണ്‌. വഴിമ​ധ്യേ ദൈവ​ത്തി​ന്റെ നിർദേ​ശങ്ങൾ അനാദ​ര​വോ​ടെ അവഗണി​ച്ച​തു​കൊണ്ട്‌ ഉസ്സാ മരിക്കു​ന്നു, പെട്ടകം ഓബേദ്‌-ഏദോ​മി​ന്റെ വീട്ടിൽ കുറച്ചു​കാ​ല​ത്തേക്ക്‌ ഇരിക്കു​ന്നു. (സംഖ്യ. 4:15) ഫെലി​സ്‌ത്യർ തങ്ങളുടെ ആക്രമണം പുനരാ​രം​ഭി​ക്കു​ന്നു, എന്നാൽ ദാവീദ്‌ രണ്ടു​പ്രാ​വ​ശ്യം ബാൽപെ​രാ​സീ​മി​ലും ഗിബെ​യോ​നി​ലും അവരെ തകർത്തു തോൽപ്പി​ക്കു​ന്നു. ദാവീ​ദി​ന്റെ നിർദേ​ശ​പ്ര​കാ​രം ലേവ്യർ ഇപ്പോൾ യെരു​ശ​ലേ​മി​ലേക്കു പെട്ടകം സുരക്ഷി​ത​മാ​യി നീക്കു​ന്ന​തി​നു ദിവ്യാ​ധി​പ​ത്യ​ന​ട​പ​ടി​ക്രമം അനുസ​രി​ക്കു​ന്നു, അവിടെ പെട്ടകം ദാവീദ്‌ അതിനു​വേണ്ടി അടിച്ച കൂടാ​ര​ത്തിൽ നൃത്ത​ത്തോ​ടും സന്തോ​ഷ​ത്തോ​ടും​കൂ​ടെ വെക്കുന്നു. യാഗാർപ്പ​ണ​വും ഗാനവും നടക്കുന്നു. ദാവീ​ദു​തന്നെ ആ അവസര​ത്തി​നു​വേണ്ടി ഒരു സ്‌തു​തി​ഗീ​തം രചിക്കു​ന്നു. അതിന്റെ മഹത്തായ പാരമ്യം ഈ പ്രതി​പാ​ദ്യ​വി​ഷ​യ​ത്തിൽ എത്തുന്നു: “സ്വർഗ്ഗം ആനന്ദി​ക്കട്ടെ; ഭൂമി ഉല്ലസി​ക്കട്ടെ; യഹോവ വാഴുന്നു എന്നു ജാതി​ക​ളു​ടെ മദ്ധ്യേ ഘോഷി​ക്കട്ടെ.” (1 ദിന. 16:31) എത്ര ഉത്തേജ​ക​വും വിശ്വാ​സ​പ്ര​ചോ​ദ​ക​വു​മായ അവസരം! പിന്നീടു ദാവീ​ദി​ന്റെ ഈ ഗീതം പുതിയ ഗീതങ്ങ​ളു​ടെ അടിസ്ഥാ​ന​മാ​യി അനുരൂ​പ​പ്പെ​ടു​ത്തു​ന്നു, അവയി​ലൊ​ന്നാ​ണു സങ്കീർത്തനം 96. മറെറാ​ന്നു സങ്കീർത്തനം 105-ന്റെ ആദ്യത്തെ 15 വാക്യ​ങ്ങ​ളിൽ രേഖ​പ്പെ​ടു​ത്തി​യി​രി​ക്കു​ന്നു.

15. ഏതു വിശി​ഷ്ട​മായ വാഗ്‌ദ​ത്ത​ത്തോ​ടെ യഹോവ ഏകീകൃ​താ​രാ​ധ​ന​ക്കു​വേണ്ടി ഒരു ആലയം പണിയാ​നു​ളള ദാവീ​ദി​ന്റെ ആഗ്രഹ​ത്തിന്‌ ഉത്തരം കൊടു​ക്കു​ന്നു?

¹⁵ ദാവീ​ദും യഹോ​വ​യു​ടെ ആലയവും (16:37–17:27). ഇപ്പോൾ ഇസ്രാ​യേ​ലിൽ ഒരു അസാധാ​ര​ണ​ക്ര​മീ​ക​രണം നിലവിൽവ​രു​ന്നു. ഉടമ്പടി​യു​ടെ പെട്ടകം യെരു​ശ​ലേ​മിൽ ഒരു കൂടാ​ര​ത്തിൽ ഇരിക്കു​ന്നു, അവിടെ ആസാഫും അവന്റെ സഹോ​ദ​രൻമാ​രും ശുശ്രൂ​ഷി​ക്കു​ന്നു, അതേസ​മയം യെരു​ശ​ലേ​മിന്‌ ഏതാനും കിലോ​മീ​ററർ വടക്കു​പ​ടി​ഞ്ഞാ​റു മാറി ഗിബെ​യോ​നിൽ മഹാപു​രോ​ഹി​ത​നായ സാദോ​ക്കും അവന്റെ സഹോ​ദ​രൻമാ​രും സമാഗ​മ​ന​കൂ​ടാ​ര​ത്തിൽ നിർദി​ഷ്ട​യാ​ഗങ്ങൾ അർപ്പി​ച്ചു​കൊ​ണ്ടി​രി​ക്കു​ന്നു. യഹോ​വ​യു​ടെ ആരാധ​നയെ ഉന്നതമാ​ക്കു​ക​യും ഏകീക​രി​ക്കു​ക​യും ചെയ്യു​ന്ന​തിൽ എല്ലായ്‌പോ​ഴും തത്‌പ​ര​നാ​യി യഹോ​വ​യു​ടെ ഉടമ്പടി​യു​ടെ പെട്ടക​ത്തി​നു​വേണ്ടി ഒരു ആലയം പണിയാ​നു​ളള ആഗ്രഹം ദാവീദ്‌ പ്രകട​മാ​ക്കു​ന്നു. എന്നാൽ ദാവീദല്ല, അവന്റെ പുത്ര​നാ​ണു തനിക്കു​വേണ്ടി ഒരു ആലയം പണിയു​ന്ന​തെ​ന്നും ഒരു പിതാവ്‌ ഒരു പുത്ര​നോ​ടെ​ന്ന​പോ​ലെ സ്‌നേ​ഹദയ പ്രകട​മാ​ക്കി​ക്കൊ​ണ്ടു താൻ “അവന്റെ സിംഹാ​സനം എന്നേക്കും സ്ഥിരമാ​ക്കു”മെന്നും യഹോവ പ്രസ്‌താ​വി​ക്കു​ന്നു. (17:11-13) യഹോ​വ​യാ​ലു​ളള ഈ അത്ഭുത​ക​ര​മായ വാഗ്‌ദത്തം—ഒരു നിത്യ​രാ​ജ്യ​ത്തി​നു​വേ​ണ്ടി​യു​ളള ഈ ഉടമ്പടി—ദാവീ​ദി​ന്റെ ഹൃദയത്തെ തരളി​ത​മാ​ക്കു​ന്നു. യഹോ​വ​യു​ടെ നാമം “എന്നേക്കും സ്ഥിര​പ്പെട്ടു മഹത്വ​പ്പെടു”ന്നതിനും അവന്റെ അനു​ഗ്രഹം ദാവീ​ദി​ന്റെ ഗൃഹത്തിൻമേൽ ഉണ്ടായി​രി​ക്കു​ന്ന​തി​നും അപേക്ഷി​ക്കു​ന്ന​തിൽ അവന്റെ നന്ദി കവി​ഞ്ഞൊ​ഴു​കു​ന്നു.—17:24.

16. യഹോവ ദാവീ​ദു​മു​ഖാ​ന്തരം ഏതു വാഗ്‌ദാ​നം നിറ​വേ​റ​റു​ന്നു, എന്നാൽ ദാവീദ്‌ എങ്ങനെ പാപം​ചെ​യ്യു​ന്നു?

¹⁶ ദാവീ​ദി​ന്റെ ദിഗ്വി​ജ​യങ്ങൾ (18:1–21:17). ദാവീ​ദു​മു​ഖേന യഹോവ ഇപ്പോൾ മുഴു വാഗ്‌ദ​ത്ത​ദേ​ശ​വും അബ്രഹാ​മി​ന്റെ സന്തതി​കൾക്കു കൊടു​ക്കു​മെ​ന്നു​ളള വാഗ്‌ദത്തം നിറ​വേ​റ​റു​ന്നു. (18:3) ആക്രമ​ണ​ങ്ങ​ളു​ടെ ഒരു സത്വര​പ​ര​മ്പ​ര​യിൽ, പോകു​ന്ന​ട​ത്തൊ​ക്കെ​യും യഹോവ “ദാവീ​ദി​നു രക്ഷ” കൊടു​ക്കു​ന്നു. (18:6, NW) തകർപ്പൻ സൈനി​ക​വി​ജ​യ​ങ്ങ​ളിൽ ദാവീദ്‌ ഫെലി​സ്‌ത്യ​രെ കീഴട​ക്കു​ന്നു, മോവാ​ബ്യ​രെ സംഹരി​ക്കു​ന്നു, സോബാ​ത്യ​രെ തോൽപ്പി​ക്കു​ന്നു, സിറി​യ​ക്കാ​രെ കപ്പം കൊടു​ക്കാൻ നിർബ​ന്ധി​ത​രാ​ക്കു​ന്നു, ഏദോ​മി​നെ​യും അമ്മോ​നെ​യും അതു​പോ​ലെ​തന്നെ അമാ​ലേ​ക്കി​നെ​യും ജയിച്ച​ട​ക്കു​ക​യും ചെയ്യുന്നു. എന്നിരു​ന്നാ​ലും, ഇസ്രാ​യേ​ലി​നെ എണ്ണാനും അങ്ങനെ പാപം​ചെ​യ്യാ​നും സാത്താൻ ദാവീ​ദി​നെ പ്രേരി​പ്പി​ക്കു​ന്നു. യഹോവ ശിക്ഷയാ​യി ഒരു മഹാമാ​രി അയയ്‌ക്കു​ന്നു​വെ​ങ്കി​ലും 70,000 പേർ വധിക്ക​പ്പെ​ട്ട​ശേഷം കരുണാ​പൂർവം ഒർന്നാന്റെ കളത്തിങ്കൽ വിപത്തിന്‌ അറുതി​വ​രു​ത്തു​ന്നു.

17. യഹോ​വ​യു​ടെ ആലയം പണിയു​ന്ന​തി​നു ദാവീദ്‌ എന്ത്‌ ഒരുക്കം നടത്തുന്നു, അവൻ ശലോ​മോ​നെ എങ്ങനെ പ്രോ​ത്സാ​ഹി​പ്പി​ക്കു​ന്നു?

¹⁷ ആലയത്തി​നു​വേ​ണ്ടി​യു​ളള ദാവീ​ദി​ന്റെ ഒരുക്കം (21:18–22:19). ദാവീ​ദി​നു ഗാദി​ലൂ​ടെ “യെബൂ​സ്യ​നായ ഒർന്നാന്റെ കളത്തിൽ യഹോ​വെക്കു ഒരു യാഗപീ​ഠം പണി”യാൻ ദൂതനിർദേശം ലഭിക്കു​ന്നു. (21:18) ഒർന്നാ​നിൽനി​ന്നു സ്ഥലം വിലയ്‌ക്കു വാങ്ങി​യ​ശേഷം ദാവീദ്‌ അനുസ​ര​ണ​പൂർവം അവിടെ യാഗങ്ങൾ അർപ്പി​ക്കു​ക​യും യഹോ​വയെ വിളി​ച്ച​പേ​ക്ഷി​ക്കു​ക​യും ചെയ്യുന്നു, അവൻ “ആകാശ​ത്തിൽനി​ന്നു ഹോമ​പീ​ഠ​ത്തിൻമേൽ തീ ഇറക്കി” അദ്ദേഹ​ത്തിന്‌ ഉത്തരം കൊടു​ക്കു​ന്നു. (21:26) യഹോ​വ​യു​ടെ ആലയം അവിടെ പണിയാൻ അവൻ ആഗ്രഹി​ക്കു​ന്നു​വെന്നു ദാവീദ്‌ നിഗമനം ചെയ്യുന്നു. “എന്റെ മകൻ ശലോ​മോൻ ചെറു​പ്പ​വും ഇളം​പ്രാ​യ​വു​മു​ള​ളവൻ ആകുന്നു; യഹോ​വെ​ക്കാ​യി പണി​യേ​ണ്ടുന്ന ആലയമോ കീർത്തി​യും ശോഭ​യും​കൊ​ണ്ടു സർവ്വ​ദേ​ശ​ങ്ങൾക്കും അതിമ​ഹ​ത്വ​മു​ള​ള​താ​യി​രി​ക്കണം. ആകയാൽ ഞാൻ അതിന്നു തക്കവണ്ണം വട്ടംകൂ​ട്ടും” എന്നു പറഞ്ഞു​കൊണ്ട്‌ അവൻ നിർമാ​ണ​വ​സ്‌തു​ക്കൾക്കു രൂപം കൊടു​ക്കാ​നും അവ കൂട്ടി​വ​രു​ത്താ​നും തുടക്ക​മി​ടു​ന്നു. (22:4, 5) താൻ യുദ്ധങ്ങ​ളും രക്തച്ചൊ​രി​ച്ചി​ലും നടത്തിയ ഒരാളാ​യ​തു​കൊണ്ട്‌ ആലയം പണിക​ഴി​പ്പി​ക്കാൻ യഹോവ തന്നെ അനുവ​ദി​ച്ചി​ട്ടി​ല്ലെന്ന്‌ അവൻ ശലോ​മോ​നോ​ടു വിശദീ​ക​രി​ക്കു​ന്നു. “ഉത്സാഹി​ച്ചു പ്രവർത്തി​ച്ചു​കൊൾക; യഹോവ നിന്നോ​ടു​കൂ​ടെ ഇരിക്കു​മാ​റാ​കട്ടെ” എന്നു പറഞ്ഞു​കൊ​ണ്ടു തന്റെ ഉദ്യമ​ത്തിൽ ധൈര്യ​വും ബലവു​മു​ള​ള​വ​നാ​യി​രി​ക്കാൻ അവൻ തന്റെ പുത്രനെ ഉദ്‌ബോ​ധി​പ്പി​ക്കു​ന്നു.—22:16.

18. എന്തു​ദ്ദേ​ശ്യ​ത്തിൽ ഒരു ജനസംഖ്യ എടുക്കു​ന്നു?

¹⁸ ദാവീദ്‌ യഹോ​വ​യു​ടെ ആരാധ​ന​ക്കു​വേണ്ടി ക്രമീ​ക​ര​ണം​ചെ​യ്യു​ന്നു (23:1–29:30). ഒരു ജനസംഖ്യ എടുക്കു​ന്നു, ഈ പ്രാവ​ശ്യം പുരോ​ഹി​തൻമാ​രു​ടെ​യും ലേവ്യ​രു​ടെ​യും സേവന​ങ്ങ​ളു​ടെ പുനഃ​സം​ഘ​ട​ന​ക്കു​വേണ്ടി ദൈ​വേ​ഷ്ട​പ്ര​കാ​രം​തന്നെ. തിരു​വെ​ഴു​ത്തു​ക​ളിൽ മറെറ​വി​ടെ​യും കാണു​ന്ന​തി​നെ​ക്കാ​ള​ധി​കം വിസ്‌ത​രിച്ച്‌ ഇവിടെ ലേവ്യ​സേ​വ​നങ്ങൾ വർണി​ക്ക​പ്പെ​ട്ടി​രി​ക്കു​ന്നു. രാജ​സേ​വ​ന​ത്തി​ന്റെ വിഭാ​ഗങ്ങൾ പിന്നീടു വിവരി​ക്ക​പ്പെ​ടു​ന്നു.

19. ഏതു വാക്കു​ക​ളോ​ടെ ദാവീദ്‌ ശലോ​മോ​നെ നിയോ​ഗി​ക്കു​ന്നു, അവൻ എന്തു പ്ലാനുകൾ കൊടു​ക്കു​ന്നു, അവൻ ഏതു മഹനീ​യ​മായ മാതൃക വെക്കുന്നു?

¹⁹ തന്റെ സംഭവ​ബ​ഹു​ല​മായ വാഴ്‌ച​യു​ടെ അവസാ​ന​ത്തോ​ട​ടു​ത്തു ദാവീദ്‌ “യഹോ​വ​യു​ടെ സഭ”യായ മുഴു​ജ​ന​ത​യു​ടെ​യും പ്രതി​നി​ധി​കളെ, കൂട്ടി​വ​രു​ത്തു​ന്നു. (28:8) രാജാവ്‌ എഴു​ന്നേ​റ​റു​നിൽക്കു​ന്നു. “എന്റെ സഹോ​ദ​രൻമാ​രും എന്റെ ജനവു​മാ​യു​ളേ​ളാ​രേ, എന്റെ വാക്കു കേൾപ്പിൻ.” അനന്തരം അവൻ തന്റെ ഹൃദയാ​ഭി​ലാ​ഷ​മായ ‘സത്യ​ദൈ​വ​ത്തി​ന്റെ ആലയ’ത്തെക്കു​റിച്ച്‌ അവരോ​ടു സംസാ​രി​ക്കു​ന്നു. അവരുടെ സാന്നി​ധ്യ​ത്തിൽ അവൻ ശലോ​മോ​നെ നിയോ​ഗി​ക്കു​ന്നു: “നീയോ എന്റെ മകനേ, ശലോ​മോ​നേ, നിന്റെ അപ്പന്റെ ദൈവത്തെ അറിക​യും അവനെ പൂർണ്ണ​ഹൃ​ദ​യ​ത്തോ​ടും നല്ല മനസ്സോ​ടും കൂടെ സേവി​ക്ക​യും ചെയ്‌ക; യഹോവ സർവ്വഹൃ​ദ​യ​ങ്ങ​ളെ​യും പരി​ശോ​ധി​ക്ക​യും വിചാ​ര​ങ്ങ​ളും നിരൂ​പ​ണ​ങ്ങ​ളും എല്ലാം ഗ്രഹി​ക്ക​യും ചെയ്യുന്നു; നീ അവനെ അന്വേ​ഷി​ക്കു​ന്നു എങ്കിൽ അവനെ കണ്ടെത്തും; ഉപേക്ഷി​ക്കു​ന്നു എങ്കിലോ, അവൻ നിന്നെ എന്നേക്കും തളളി​ക്ക​ള​യും. ആകയാൽ സൂക്ഷി​ച്ചു​കൊൾക; വിശു​ദ്ധ​മ​ന്ദി​ര​മാ​യോ​രു ആലയം പണിവാൻ യഹോവ നിന്നെ തിര​ഞ്ഞെ​ടു​ത്തി​രി​ക്കു​ന്നു; ധൈര്യ​പ്പെട്ടു അതു നടത്തി​ക്കൊൾക.” (28:2, 9, 10, 12) അവൻ യഹോ​വ​യിൽനി​ന്നു നിശ്വ​സ്‌ത​ത​യാൽ ലഭിച്ച ശിൽപ്പ​സം​ബ​ന്ധ​മായ പ്ലാനുകൾ ഇളം​പ്രാ​യ​ക്കാ​ര​നായ ശലോ​മോ​നെ ഏൽപ്പി​ക്കു​ക​യും നിർമാ​ണ​പ​ദ്ധ​തി​ക്കു വ്യക്തി​പ​ര​മായ ഒരു വമ്പിച്ച പണത്തുക സംഭാവന കൊടു​ക്കു​ക​യും ചെയ്യുന്നു—ഈ ഉദ്ദേശ്യ​ത്തിൽ അവൻ സ്വരൂ​പി​ച്ചി​രുന്ന 3,000 താലന്തു സ്വർണ​വും 7,000 താലന്തു വെളളി​യും. ഇത്ര വിശി​ഷ്ട​മായ മാതൃക തങ്ങളുടെ മുമ്പാകെ ഉണ്ടായി​രു​ന്ന​തു​കൊ​ണ്ടു പ്രഭു​ക്കൻമാ​രും ജനവും 5,000 താലന്തും 10,000 തങ്കക്കാ​ശും വിലയു​ളള സ്വർണ​വും 10,000 താലന്തു വിലയു​ളള വെളളി​യും അതു​പോ​ലെ​തന്നെ ധാരാളം ഇരുമ്പും ചെമ്പും സംഭാ​വ​ന​ചെ​യ്‌തു​കൊ​ണ്ടു പ്രതി​ക​രി​ക്കു​ന്നു.c (29:3-7) ഈ പദവി​യി​ങ്കൽ ജനം സന്തോ​ഷ​ഭ​രി​ത​രാ​യി​ത്തീ​രു​ന്നു.

20. ദാവീ​ദി​ന്റെ അന്തിമ​പ്രാർഥ​ന​യിൽ ഏതു ശ്രേഷ്‌ഠ​മായ ഉച്ചനി​ല​ക​ളിൽ എത്തുന്നു?

²⁰ ദാവീദു പിന്നീടു യഹോ​വയെ പ്രാർഥ​ന​യിൽ സ്‌തു​തി​ക്കു​ക​യും ഈ ധാരാ​ള​മായ വഴിപാ​ടു​ക​ളെ​ല്ലാം യഥാർഥ​ത്തിൽ അവന്റെ കരത്തിൽനി​ന്നാ​ണു വന്നതെന്നു സമ്മതി​ച്ചു​പ​റ​യു​ക​യും ജനത്തിൻമേ​ലും ശലോ​മോ​ന്റെ​മേ​ലും അവന്റെ തുടർന്നു​ളള അനു​ഗ്ര​ഹ​ത്തി​നാ​യി അപേക്ഷി​ക്കു​ക​യും ചെയ്യുന്നു. ദാവീ​ദി​ന്റെ ഈ അന്തിമ​പ്രാർഥന യഹോ​വ​യു​ടെ രാജ്യ​ത്തെ​യും അവന്റെ മഹത്തായ നാമ​ത്തെ​യും ഉന്നതമാ​ക്കു​ന്ന​തിൽ ശ്രേഷ്‌ഠ​മായ ഉച്ചനി​ല​ക​ളി​ലെ​ത്തു​ന്നു: “ഞങ്ങളുടെ പിതാ​വായ യിസ്രാ​യേ​ലിൻ ദൈവ​മായ യഹോവേ, നീ എന്നും എന്നേക്കും വാഴ്‌ത്ത​പ്പെ​ട്ടവൻ. യഹോവേ, മഹത്വ​വും ശക്തിയും തേജസ്സും യശസ്സും മഹിമ​യും നിനക്കു​ള​ളതു; സ്വർഗ്ഗ​ത്തി​ലും ഭൂമി​യി​ലു​മു​ള​ള​തൊ​ക്കെ​യും നിനക്കു​ള​ള​ത​ല്ലോ. യഹോവേ, രാജത്വം നിനക്കു​ള​ള​താ​കു​ന്നു; നീ സകലത്തി​ന്നും മീതെ തലവനാ​യി​രി​ക്കു​ന്നു. ധനവും ബഹുമാ​ന​വും നിങ്കൽനി​ന്നു വരുന്നു; നീ സർവ്വവും ഭരിക്കു​ന്നു; ശക്തിയും ബലവും നിന്റെ കൈയിൽ ഇരിക്കു​ന്നു; സകല​ത്തെ​യും വലുതാ​ക്കു​ന്ന​തും ശക്തീക​രി​ക്കു​ന്ന​തും നിന്റെ പ്രവൃ​ത്തി​യാ​കു​ന്നു. ആകയാൽ ഞങ്ങളുടെ ദൈവമേ, ഞങ്ങൾ നിനക്കു സ്‌തോ​ത്രം​ചെ​യ്‌തു നിന്റെ മഹത്വ​മു​ളള നാമത്തെ സ്‌തു​തി​ക്കു​ന്നു.—29:10-13.

21. ഒന്നു ദിനവൃ​ത്താ​ന്തം ഏത്‌ ഉന്നതമായ മട്ടിൽ അവസാ​നി​ക്കു​ന്നു?

²¹ ശലോ​മോൻ രണ്ടാം​പ്രാ​വ​ശ്യം അഭി​ഷേ​കം​ചെ​യ്യ​പ്പെ​ടു​ക​യും വാർധ​ക്യം പ്രാപി​ച്ചു​കൊ​ണ്ടി​രുന്ന ദാവീ​ദി​നു പകരം ‘യഹോ​വ​യു​ടെ സിംഹാ​സന’ത്തിൽ ഇരുന്നു​തു​ട​ങ്ങു​ക​യും ചെയ്യുന്നു. 40 വർഷത്തെ വാഴ്‌ച​ക്കു​ശേഷം ദാവീദ്‌ “നന്നാ വയസ്സു​ചെ​ന്ന​വ​നും ധനവും ജ്ഞാനവും തികഞ്ഞ​വ​നു​മാ​യി” മരിക്കു​ന്നു. (29:23, 28) അനന്തരം എസ്രാ ഒരു സമുന്നത മട്ടിൽ ഒന്നു ദിനവൃ​ത്താ​ന്തം ഉപസം​ഹ​രി​ക്കു​ക​യും ജനതക​ളു​ടെ സകല രാജ്യ​ങ്ങൾക്കു​മു​പ​രി​യാ​യി ദാവീ​ദി​ന്റെ രാജ്യ​ത്തി​ന്റെ മികവി​നെ ഊന്നി​പ്പ​റ​യു​ക​യും ചെയ്യുന്നു.

എന്തു​കൊ​ണ്ടു പ്രയോ​ജ​ന​പ്ര​ദം

22. എസ്രാ​യു​ടെ സഹ ഇസ്രാ​യേ​ല്യർ ഒന്നു ദിനവൃ​ത്താ​ന്ത​ത്താൽ എങ്ങനെ പ്രോ​ത്സാ​ഹി​ത​രാ​യി?

²² എസ്രാ​യു​ടെ സഹ ഇസ്രാ​യേ​ല്യർ അവന്റെ പുസ്‌ത​ക​ത്തിൽനി​ന്നു വളരെ​യ​ധി​കം പ്രയോ​ജനം നേടി. പുതു​മ​യും ശുഭാ​പ്‌തി​വി​ശ്വാ​സ​വു​മു​ളള വീക്ഷണ​ത്തോ​ടു​കൂ​ടിയ ഈ ഹ്രസ്വ​ച​രി​ത്രം ലഭിച്ച​തി​നാൽ അവർ ദാവീ​ദു​രാ​ജാ​വു​മാ​യു​ളള രാജ്യ ഉടമ്പടി​യോ​ടു​ളള യഹോ​വ​യു​ടെ വിശ്വ​സ്‌ത​ത​നി​മി​ത്ത​വും അവന്റെ സ്വന്തനാ​മ​ത്തി​നു​വേ​ണ്ടി​യും തങ്ങളോ​ടു കാണി​ക്കുന്ന സ്‌നേ​ഹ​നിർഭ​ര​മായ കരുണയെ വിലമ​തി​ച്ചു. പ്രോ​ത്സാ​ഹി​ത​രാ​യി പുതു​ക്ക​പ്പെട്ട തീക്ഷ്‌ണ​ത​യോ​ടെ അവർക്കു യഹോ​വ​യു​ടെ നിർമ​ലാ​രാ​ധന ഏറെറ​ടു​ക്കാൻ കഴിഞ്ഞു. പുനർനിർമി​ക്ക​പ്പെട്ട ആലയത്തിൽ വംശാ​വ​ലി​കൾ കാർമി​ക​ത്വം വഹിക്കുന്ന പുരോ​ഹി​തൻമാ​രി​ലു​ളള അവരുടെ വിശ്വാ​സത്തെ ബലിഷ്‌ഠ​മാ​ക്കി.

23. മത്തായി​യും ലൂക്കൊ​സും സ്‌തേ​ഫാ​നോ​സും ഒന്നു ദിനവൃ​ത്താ​ന്തത്തെ എങ്ങനെ നന്നായി ഉപയോ​ഗി​ച്ചു?

²³ ഒന്നു ദിനവൃ​ത്താ​ന്തം ആദിമ ക്രിസ്‌തീ​യ​സ​ഭ​ക്കും വലിയ പ്രയോ​ജ​ന​മു​ള​ള​താ​യി​രു​ന്നു. മത്തായി​ക്കും ലൂക്കൊ​സി​നും യേശു​ക്രി​സ്‌തു “ദാവീ​ദി​ന്റെ പുത്ര​നും” നിയമ​പ​ര​മായ അവകാ​ശ​മു​ളള മിശി​ഹാ​യു​മാ​ണെന്നു വ്യക്തമാ​യി സ്ഥാപി​ക്കു​ന്ന​തിന്‌ അതിലെ വംശാ​വ​ലി​കളെ ഉപയോ​ഗ​പ്പെ​ടു​ത്താൻ കഴിഞ്ഞു. (മത്താ. 1:1-16; ലൂക്കൊ. 3:23-38) തന്റെ അന്തിമ​സാ​ക്ഷ്യ​ത്തെ ഉപസം​ഹ​രി​ച്ച​പ്പോൾ സ്‌തേ​ഫാ​നോസ്‌ യഹോ​വ​ക്കു​വേണ്ടി ഒരു ആലയം പണിയാ​നു​ളള ദാവീ​ദി​ന്റെ അപേക്ഷ​യെ​ക്കു​റി​ച്ചും ശലോ​മോൻ നിർമാ​ണം നടത്തു​ന്ന​തി​നെ​ക്കു​റി​ച്ചും പ്രസ്‌താ​വി​ച്ചു. അനന്തരം അവൻ “അത്യു​ന്നതൻ കൈപ്പ​ണി​യാ​യ​തിൽ വസിക്കു​ന്നില്ല” എന്നു പ്രകട​മാ​ക്കി, ശലോ​മോ​ന്റെ നാളിലെ ആലയം വളരെ മഹത്തര​മായ സ്വർഗീ​യ​കാ​ര്യ​ങ്ങളെ ചിത്രീ​ക​രി​ച്ച​താ​യി സൂചി​പ്പി​ച്ചു​കൊ​ണ്ടു​തന്നെ.—പ്രവൃ. 7:45-50.

24. ദാവീ​ദി​ന്റെ തിളക്ക​മു​ളള മാതൃ​ക​യിൽനിന്ന്‌ എന്ത്‌ ഇന്നു നമുക്കു പകർത്താ​വു​ന്ന​താണ്‌?

²⁴ ഇന്നു സത്യ​ക്രി​സ്‌ത്യാ​നി​കളെ സംബന്ധി​ച്ചെന്ത്‌? ഒന്നു ദിനവൃ​ത്താ​ന്തം നമ്മുടെ വിശ്വാ​സത്തെ പരിപു​ഷ്ടി​പ്പെ​ടു​ത്തു​ക​യും ഉത്തേജി​പ്പി​ക്കു​ക​യും ചെയ്യേ​ണ്ട​താണ്‌. ദാവീ​ദി​ന്റെ തിളക്ക​മാർന്ന മാതൃ​ക​യിൽ നമുക്കു പകർത്താൻ കഴിയുന്ന വളരെ​യ​ധി​കം കാര്യ​ങ്ങ​ളുണ്ട്‌. യഹോ​വ​യോട്‌ എപ്പോ​ഴും ആലോചന കഴിക്കു​ന്ന​തിൽ അവിശ്വ​സ്‌ത​നായ ശൗലിൽനിന്ന്‌ അവൻ എത്ര വ്യത്യ​സ്‌ത​നാ​യി​രു​ന്നു! (1 ദിന. 10:13, 14; 14:13, 14; 17:16; 22:17-19) യഹോ​വ​യു​ടെ പെട്ടകം യെരു​ശ​ലേ​മി​ലേക്കു കൊണ്ടു​വ​രു​ന്ന​തി​ലും, തന്റെ സ്‌തു​തി​ഗീ​ത​ങ്ങ​ളി​ലും, ലേവ്യരെ സേവന​ത്തി​നാ​യി സംഘടി​പ്പി​ച്ച​തി​ലും, യഹോ​വ​ക്കു​വേണ്ടി മഹത്തായ ഒരു ആലയം പണിയാ​നു​ളള തന്റെ അപേക്ഷ​യി​ലും യഹോ​വ​യും അവന്റെ ആരാധ​ന​യു​മാ​യി​രു​ന്നു തന്റെ മനസ്സിൽ ഒന്നാമ​താ​യി ഉണ്ടായി​രു​ന്ന​തെന്നു ദാവീദു പ്രകട​മാ​ക്കി. (16:23-29) അവൻ പരാതി​ക്കാ​ര​നാ​യി​രു​ന്നില്ല. അവൻ തനിക്കാ​യി പ്രത്യേക പദവികൾ തേടാതെ യഹോ​വ​യു​ടെ ഇഷ്ടം ചെയ്യാൻ മാത്ര​മാ​ണു ശ്രമി​ച്ചത്‌. അങ്ങനെ, യഹോവ ആലയനിർമാ​ണം അവന്റെ പുത്രനെ ഏൽപ്പി​ച്ച​പ്പോൾ അവൻ മുഴു​ഹൃ​ദ​യ​ത്തോ​ടെ തന്റെ പുത്രനെ പ്രബോ​ധി​പ്പി​ക്കു​ക​യും തന്റെ മരണ​ശേഷം തുടങ്ങാ​നി​രുന്ന പണിക്കു​വേണ്ടി ഒരുങ്ങു​ന്ന​തി​നു തന്റെ സമയവും ഊർജ​വും സ്വത്തും കൊടു​ക്കു​ക​യും ചെയ്‌തു. (29:3, 9) തീർച്ച​യാ​യും ഭക്തിയു​ടെ ഒരു വിശി​ഷ്ട​മാ​തൃക!—എബ്രാ. 11:32.

25. യഹോ​വ​യു​ടെ നാമവും രാജ്യ​വും സംബന്ധിച്ച എന്തു വിലമ​തി​പ്പിന്‌ ഒന്നു ദിനവൃ​ത്താ​ന്തം നമ്മെ ഉത്തേജി​പ്പി​ക്കേ​ണ്ട​താണ്‌?

²⁵ ഇനി പരകോ​ടീ​യ​മായ സമാപന അധ്യാ​യ​ങ്ങ​ളുണ്ട്‌. യഹോ​വയെ സ്‌തു​തി​ക്കു​ന്ന​തി​നും അവന്റെ “മനോ​ഹ​ര​മായ നാമത്തെ” മഹത്ത്വീ​ക​രി​ക്കു​ന്ന​തി​നും ദാവീദ്‌ ഉപയോ​ഗിച്ച മഹനീ​യ​മായ ഭാഷ യഹോ​വ​യു​ടെ​യും ക്രിസ്‌തു​മൂ​ല​മു​ളള അവന്റെ രാജ്യ​ത്തി​ന്റെ​യും മഹത്ത്വ​ങ്ങളെ അറിയി​ക്കു​ന്ന​തി​നു​ളള നമ്മുടെ ആധുനി​ക​നാ​ളി​ലെ പദവി​യോ​ടു​ളള സന്തോ​ഷ​ക​ര​മായ വിലമ​തി​പ്പു നമ്മിൽ ഉത്തേജി​പ്പി​ക്കേ​ണ്ട​താണ്‌. (1 ദിന. 29:10-13, NW) നാം അവന്റെ സേവന​ത്തിൽ നമ്മേത്തന്നെ പകരു​ന്ന​തി​നാൽ യഹോ​വ​യു​ടെ നിത്യ​രാ​ജ്യ​ത്തി​നു​വേണ്ടി നാം നന്ദി പ്രകട​മാ​ക്കു​മ്പോൾ നമ്മുടെ വിശ്വാ​സ​വും സന്തോ​ഷ​വും എക്കാല​വും ദാവീ​ദി​ന്റേ​തു​പോ​ലെ​യാ​യി​രി​ക്കട്ട. (17:16-27) സത്യമാ​യി, ഒന്നു ദിനവൃ​ത്താ​ന്തം യഹോ​വ​യു​ടെ ഉദ്ദേശ്യ​ങ്ങ​ളു​ടെ കോരി​ത്ത​രി​പ്പി​ക്കുന്ന കൂടു​ത​ലായ വെളി​പ്പെ​ടു​ത്ത​ലു​ക​ളു​ടെ പ്രതീ​ക്ഷ​യോ​ടെ നമ്മെ വിട്ടു​കൊ​ണ്ടു സന്തതി​മു​ഖാ​ന്ത​ര​മു​ളള യഹോ​വ​യു​ടെ രാജ്യ​മെന്ന ബൈബിൾവി​ഷയം എന്നെ​ത്തേ​തി​ലും മനോ​ഹ​ര​മാ​യി തിളങ്ങാൻ ഇടയാ​ക്കു​ന്നു.

[അടിക്കു​റി​പ്പു​കൾ]