അധ്യായം പതിനഞ്ച്‌

ജനതകളെ സംബന്ധിച്ച യഹോ​വ​യു​ടെ നിർണയം

യെശയ്യാവു 14:24–19:25

1. അസീറി​യ​യ്‌ക്ക്‌ എതി​രെ​യുള്ള ഏതു ന്യായ​വി​ധി​യാണ്‌ യെശയ്യാവ്‌ രേഖ​പ്പെ​ടു​ത്തു​ന്നത്‌?

തന്റെ ജനത്തിന്റെ ദുഷ്ടത​യെ​പ്രതി അവരെ ശിക്ഷി​ക്കാൻ യഹോ​വ​യ്‌ക്കു രാഷ്‌ട്ര​ങ്ങളെ ഉപയോ​ഗി​ക്കാ​നാ​കും. എന്നുവ​രി​കി​ലും, ആ രാഷ്‌ട്ര​ങ്ങ​ളു​ടെ കൊടിയ ക്രൂര​ത​യ്‌ക്കും അഹങ്കാ​ര​ത്തി​നും സത്യാ​രാ​ധ​ന​യോ​ടുള്ള വിദ്വേ​ഷ​ത്തി​നും അവൻ അവയോ​ടു കണക്കു ചോദി​ക്കാ​തി​രി​ക്കു​ന്നില്ല. അതിനാൽ, ദീർഘ​കാ​ല​ത്തി​നു ശേഷം നിവൃ​ത്തി​യേ​റാ​നു​ള്ള​താ​ണെ​ങ്കിൽ പോലും “ബാബേ​ലി​നെ​ക്കു​റി​ച്ചു ദർശിച്ച പ്രവാ​ചകം” രേഖ​പ്പെ​ടു​ത്താ​നാ​യി യഹോവ യെശയ്യാ​വി​നെ നിശ്വ​സ്‌ത​നാ​ക്കു​ന്നു. (യെശയ്യാ​വു 13:1) യെശയ്യാ​വി​ന്റെ നാളിൽ ബാബി​ലോൺ ദൈവ​ജ​ന​ത്തിന്‌ ഒരു ഭീഷണി​യല്ല. ഇപ്പോൾ ദൈവ​ത്തി​ന്റെ ഉടമ്പടി​ജ​നത്തെ ദ്രോ​ഹി​ക്കു​ന്നത്‌ അസീറിയ ആണ്‌. അസീറിയ വടക്കേ രാജ്യ​മായ ഇസ്രാ​യേ​ലി​നെ​യും യഹൂദ​യു​ടെ മിക്ക പ്രദേ​ശ​ങ്ങ​ളെ​യും നശിപ്പി​ക്കു​ന്നു. എന്നാൽ അസീറി​യ​യു​ടെ ജയത്തിനു ദീർഘാ​യു​സ്സില്ല. യെശയ്യാവ്‌ ഇങ്ങനെ എഴുതു​ന്നു: “സൈന്യ​ങ്ങ​ളു​ടെ യഹോവ ആണയിട്ടു അരുളി​ച്ചെ​യ്യു​ന്നതു: ഞാൻ വിചാ​രി​ച്ച​തു​പോ​ലെ സംഭവി​ക്കും; . . . എന്റെ ദേശത്തു​വെച്ചു ഞാൻ അശ്ശൂരി​നെ തകർക്കും; എന്റെ പർവ്വത​ങ്ങ​ളിൽവെച്ചു അവനെ ചവിട്ടി​ക്ക​ള​യും; അങ്ങനെ അവന്റെ നുകം അവരു​ടെ​മേൽ നിന്നു നീങ്ങും; അവന്റെ ചുമടു അവരുടെ തോളിൽനി​ന്നു മാറി​പ്പോ​കും.” (യെശയ്യാ​വു 14:24, 25) യെശയ്യാവ്‌ ആ പ്രവചനം ഉച്ചരിച്ച്‌ അധിക​നാൾ കഴിയു​ന്ന​തി​നു മുമ്പ്‌, യഹൂദ​യു​ടെ മേലുള്ള അസീറി​യൻ ഭീഷണി നീങ്ങി​ക്കി​ട്ടു​ന്നു.

2, 3. (എ) പുരാതന നാളു​ക​ളിൽ ആർക്കെ​തി​രെ​യാണ്‌ യഹോവ തന്റെ കൈ നീട്ടു​ന്നത്‌? (ബി) ‘സകലജാ​തി​കൾ’ക്കും എതിരെ യഹോവ കൈ നീട്ടുന്നു എന്നതിന്റെ അർഥ​മെന്ത്‌?

² ദൈവത്തിന്റെ ഉടമ്പടി​ജ​ന​ത്തി​ന്റെ ശത്രു​ക്ക​ളായ മറ്റു രാഷ്‌ട്ര​ങ്ങ​ളു​ടെ കാര്യ​മോ? അവയും ന്യായം വിധി​ക്ക​പ്പെ​ടണം. യെശയ്യാവ്‌ ഇങ്ങനെ പ്രഖ്യാ​പി​ക്കു​ന്നു: “സർവ്വഭൂ​മി​യെ​യും കുറിച്ചു നിർണ്ണ​യി​ച്ചി​രി​ക്കുന്ന നിർണ്ണയം ഇതാകു​ന്നു; സകലജാ​തി​ക​ളു​ടെ​യും മേൽ നീട്ടി​യി​രി​ക്കുന്ന കൈ ഇതു തന്നേ. സൈന്യ​ങ്ങ​ളു​ടെ യഹോവ നിർണ്ണ​യി​ച്ചി​രി​ക്കു​ന്നു; അതു ദുർബ്ബ​ല​മാ​ക്കു​ന്ന​വ​നാർ? അവന്റെ കൈ നീട്ടി​യി​രി​ക്കു​ന്നു; അതു മടക്കു​ന്ന​വ​നാർ?” (യെശയ്യാ​വു 14:26, 27) ഇവിടെ പറഞ്ഞി​രി​ക്കുന്ന യഹോ​വ​യു​ടെ ‘നിർണയം’ അവന്റെ ദൃഢനി​ശ്ച​യത്തെ, അവന്റെ ആജ്ഞയെ സൂചി​പ്പി​ക്കു​ന്നു. (യിരെ​മ്യാ​വു 49:20, 30) ഈ വാക്യ​ത്തി​ലെ ദൈവ​ത്തി​ന്റെ “കൈ” അവൻ പ്രയോ​ഗി​ക്കുന്ന ശക്തിയെ അർഥമാ​ക്കു​ന്നു. യെശയ്യാ​വു 14-ാം അധ്യാ​യ​ത്തി​ന്റെ അവസാന വാക്യ​ങ്ങ​ളി​ലും 15 മുതൽ 19 വരെയുള്ള അധ്യാ​യ​ങ്ങ​ളി​ലും ഫെലി​സ്‌ത്യ, മോവാബ്‌, ദമ്മേ​ശെക്ക്‌ (ദമസ്‌കൊസ്‌), കൂശ്‌ (എത്യോ​പ്യ), മിസ്ര​യീം (ഈജി​പ്‌ത്‌) എന്നീ രാഷ്‌ട്ര​ങ്ങൾക്ക്‌ എതി​രെ​യാണ്‌ യഹോവ തന്റെ നിർണയം അറിയി​ക്കു​ന്നത്‌.

³ എങ്കിലും, യഹോവ തന്റെ കൈ “സകലജാ​തിക”ൾക്കും എതിരെ നീട്ടി​യി​രി​ക്കു​ന്ന​താ​യി യെശയ്യാവ്‌ പറയുന്നു. അക്കാര​ണ​ത്താൽ, യെശയ്യാ​വി​ലെ ഈ പ്രവച​ന​ങ്ങൾക്കു പുരാതന കാലത്ത്‌ പ്രാഥ​മിക നിവൃത്തി ഉണ്ടാ​യെ​ങ്കി​ലും തത്ത്വത്തിൽ അവ, ഭൂമി​യി​ലെ സകല രാഷ്‌ട്ര​ങ്ങൾക്കു​മെ​തി​രെ യഹോവ തന്റെ കൈ നീട്ടുന്ന ‘അന്ത്യകാ​ല​ത്തും’ ബാധക​മാണ്‌. (ദാനീ​യേൽ 2:44; 12:9; റോമർ 15:4; വെളി​പ്പാ​ടു 19:11, 19-21) സർവശ​ക്ത​നായ യഹോ​വ​യാം ദൈവം ദീർഘ​കാ​ലം മുമ്പു​തന്നെ തന്റെ നിർണയം വ്യക്തമാ​യും വെളി​പ്പെ​ടു​ത്തു​ന്നു. അവന്റെ നീട്ടിയ കൈ മടക്കാൻ ആർക്കും സാധ്യമല്ല.—സങ്കീർത്തനം 33:11; യെശയ്യാ​വു 46:10.

ഫെലി​സ്‌ത്യർക്കു നേരെ ‘പറക്കുന്ന അഗ്നിസർപ്പം’

4. ഫെലി​സ്‌ത്യക്ക്‌ എതി​രെ​യുള്ള യഹോ​വ​യു​ടെ പ്രഖ്യാ​പ​ന​ത്തി​ന്റെ ചില വിശദാം​ശങ്ങൾ ഏവ?

⁴ ഫെലിസ്‌ത്യരെ കുറി​ച്ചാ​ണു പ്രവാ​ചകൻ ആദ്യം പറയു​ന്നത്‌. “ആഹാസ്‌രാ​ജാ​വു മരിച്ച ആണ്ടിൽ ഈ പ്രവാ​ചകം ഉണ്ടായി: സകല​ഫെ​ലി​സ്‌ത്യ ദേശവു​മാ​യു​ള്ളോ​വേ, നിന്നെ അടിച്ച​വന്റെ വടി ഒടിഞ്ഞി​രി​ക്ക​കൊ​ണ്ടു നീ സന്തോ​ഷി​ക്കേണ്ടാ; സർപ്പത്തി​ന്റെ വേരിൽനി​ന്നു ഒരു അണലി പുറ​പ്പെ​ടും; അതിന്റെ ഫലം, പറക്കുന്ന അഗ്നിസർപ്പ​മാ​യി​രി​ക്കും.”—യെശയ്യാ​വു 14:28, 29.

5, 6. (എ) ഉസ്സീയാവ്‌ ഫെലി​സ്‌ത്യർക്ക്‌ ഒരു സർപ്പത്തെ പോലെ ആയിരി​ക്കു​ന്നത്‌ ഏതു വിധത്തിൽ? (ബി) ഫെലി​സ്‌ത്യക്ക്‌ എതിരെ ഹിസ്‌കീ​യാവ്‌ എങ്ങനെ​യു​ള്ളവൻ എന്നു തെളി​യു​ന്നു?

⁵ ഫെലിസ്‌ത്യരുടെ ഭീഷണി​യെ ചെറു​ത്തു​നിൽക്കാൻ പോന്നത്ര കരുത്ത​നാ​യി​രുന്ന ഉസ്സീയാ രാജാവ്‌ അവരെ സംബന്ധി​ച്ചി​ട​ത്തോ​ളം ഒരു സർപ്പത്തെ പോലെ ആയിരു​ന്നു. (2 ദിനവൃ​ത്താ​ന്തം 26:6-8) വാക്യ​ത്തിൽ പറയുന്ന ഉസ്സീയാ​വി​ന്റെ വടി ആ അയൽശ​ത്രു​വി​നെ പ്രഹരി​ച്ചു​കൊ​ണ്ടി​രു​ന്നു. ഉസ്സീയാവ്‌ മരിച്ച​പ്പോൾ—‘അവന്റെ വടി ഒടിഞ്ഞ​പ്പോൾ’—വിശ്വ​സ്‌ത​നായ യോഥാം ഭരണച്ചു​മതല ഏറ്റു. എങ്കിലും, ‘ജനം വഷളത്വം പ്രവർത്തി​ച്ചു​കൊ​ണ്ടി​രു​ന്നു.’ പിന്നീട്‌, ആഹാസ്‌ രാജാ​വാ​യ​പ്പോൾ സ്ഥിതി​വി​ശേ​ഷ​ത്തി​നു മാറ്റം വന്നു. യഹൂദ​യ്‌ക്കെ​തി​രെ സൈനിക ആക്രമണം നടത്തു​ന്ന​തിൽ ഫെലി​സ്‌ത്യർ വിജയി​ച്ചു. (2 ദിനവൃ​ത്താ​ന്തം 27:2; 28:17, 18) എന്നാൽ ഇപ്പോൾ കാര്യ​ങ്ങൾക്കു വീണ്ടും മാറ്റം വരുക​യാണ്‌. പൊ.യു.മു. 746-ലെ ആഹാസി​ന്റെ മരണത്തെ തുടർന്ന്‌ യുവാ​വായ ഹിസ്‌കീ​യാവ്‌ അധികാ​ര​മേൽക്കു​ന്നു. യഹൂദ​യു​ടെ​മേൽ തുടർന്നും ജയം നേടാ​മെന്ന ഫെലി​സ്‌ത്യ​രു​ടെ കണക്കു​കൂ​ട്ടൽ തീർത്തും അസ്ഥാന​ത്താ​യി​രി​ക്കും. ഹിസ്‌കീ​യാവ്‌ ഉഗ്രനായ ഒരു ശത്രു​വെന്നു തെളി​യു​ന്നു. ഉസ്സീയാ​വി​ന്റെ പിൻത​ല​മു​റ​ക്കാ​ര​നായ (അവന്റെ ‘വേരിൽ’നിന്നുള്ള “ഫലം”) ഹിസ്‌കീ​യാവ്‌ ഒരു ‘അഗ്നിസർപ്പം’ പോ​ലെ​യാണ്‌. ഒരു സർപ്പം മിന്നൽ വേഗത്തിൽ ശക്തിയാ​യി ആഞ്ഞു​കൊ​ത്തി ഉഗ്രവി​ഷം കുത്തി​വെ​ക്കു​ന്നതു പോ​ലെ​യാണ്‌ അവൻ പ്രവർത്തി​ക്കു​ന്നത്‌.

⁶ പുതിയ രാജാ​വി​നു ശരിക്കും ചേരുന്ന ഒരു വിവര​ണ​മാ​ണിത്‌. “[ഹിസ്‌കീ​യാവ്‌] ഫെലി​സ്‌ത്യ​രെ ഗസ്സയോ​ളം തോല്‌പി​ച്ചു; . . . അതിന്റെ പ്രദേ​ശത്തെ ശൂന്യ​മാ​ക്കി​ക്ക​ളഞ്ഞു.” (2 രാജാ​ക്ക​ന്മാർ 18:8) അസീറി​യൻ രാജാ​വായ സൻഹേ​രീ​ബി​ന്റെ വൃത്താ​ന്ത​ങ്ങ​ള​നു​സ​രിച്ച്‌, ഫെലി​സ്‌ത്യർ ഹിസ്‌കീ​യാ​വി​ന്റെ ഭരണത്തിൻ കീഴി​ലാ​കു​ന്നു. ഫെലി​സ്‌ത്യ ദേശം ക്ഷാമത്തി​ന്റെ പിടി​യിൽ അമരു​മ്പോൾ ‘എളിയവർ’—ദുർബ​ല​മായ യഹൂദാ രാജ്യം—സുരക്ഷി​ത​ത്വ​വും ഭൗതിക സമൃദ്ധി​യും ആസ്വദി​ക്കു​ന്നു.—യെശയ്യാ​വു 14:30, 31 വായി​ക്കുക.

7. യെരൂ​ശ​ലേ​മിൽ വന്നിരി​ക്കുന്ന രാജ​പ്ര​തി​നി​ധി​ക​ളോ​ടു ഹിസ്‌കീ​യാവ്‌ വിശ്വാ​സത്തെ പ്രതി​ഫ​ലി​പ്പി​ക്കുന്ന എന്തു വസ്‌തുത പറയേ​ണ്ട​തുണ്ട്‌?

⁷ ഇപ്പോൾ ബാബി​ലോ​ണിൽനി​ന്നു രാജ​പ്ര​തി​നി​ധി​കൾ യഹൂദ​യിൽ എത്തിയി​രി​ക്കു​ക​യാണ്‌—അസീറി​യ​യ്‌ക്ക്‌ എതിരെ ഒരു കൂട്ടു​കെട്ട്‌ ഉണ്ടാക്കുക എന്നതാ​യി​രി​ക്കാം അവരുടെ ഉദ്ദേശ്യം. അവർക്ക്‌ എന്തു മറുപടി നൽകണം? “ജാതി​ക​ളു​ടെ ദൂതന്മാർക്കു കിട്ടുന്ന മറുപടി” എന്തായി​രി​ക്കും? വിദേശ രാജ്യ​ങ്ങ​ളു​മാ​യി സഖ്യം ചേർന്നു​കൊണ്ട്‌ ഹിസ്‌കീ​യാവ്‌ സുരക്ഷി​ത​ത്വം തേടണ​മോ? വേണ്ട! പകരം അവൻ സന്ദേശ​വാ​ഹ​ക​രോട്‌ ഇങ്ങനെ പറയണം: “യഹോവ സീയോ​നെ സ്ഥാപി​ച്ചി​രി​ക്കു​ന്നു; അവിടെ അവന്റെ ജനത്തിലെ അരിഷ്ട​ന്മാർ ശരണം പ്രാപി​ക്കും.” (യെശയ്യാ​വു 14:32) രാജാവ്‌ യഹോ​വ​യിൽ പൂർണ​മാ​യി ആശ്രയി​ക്കണം. സീയോൻ നഗരത്തി​ന്റെ അടിസ്ഥാ​നം കെട്ടു​റ​പ്പു​ള്ള​താണ്‌. ഒരു പോറൽപോ​ലും ഏൽക്കാതെ ആ നഗരം അസീറി​യൻ ആക്രമ​ണത്തെ അതിജീ​വി​ക്കും.—സങ്കീർത്തനം 46:1-7.

8. (എ) ഇക്കാലത്ത്‌ ചില രാഷ്‌ട്രങ്ങൾ ഫെലി​സ്‌ത്യ​യെ പോലെ ആയിരു​ന്നി​ട്ടു​ള്ളത്‌ എങ്ങനെ? (ബി) പുരാതന കാലങ്ങ​ളി​ലെ പോലെ, തന്റെ ആധുനി​ക​കാല ജനത്തെ സംരക്ഷി​ക്കാൻ യഹോവ എന്തു ചെയ്‌തി​രി​ക്കു​ന്നു?

⁸ ഫെലിസ്‌ത്യയെ പോലെ ചില രാഷ്‌ട്രങ്ങൾ ഇന്ന്‌ ദൈവ​ത്തി​ന്റെ ആരാധ​കരെ ശക്തമായി എതിർക്കു​ന്നു. യഹോ​വ​യു​ടെ ക്രിസ്‌തീയ സാക്ഷി​കൾക്ക്‌ ജയിലു​ക​ളി​ലും തടങ്കൽപ്പാ​ള​യ​ങ്ങ​ളി​ലും കഴി​യേ​ണ്ടി​വ​ന്നി​ട്ടുണ്ട്‌. അവരുടെ പ്രവർത്തനം നിരോ​ധി​ക്ക​പ്പെ​ട്ടി​ട്ടുണ്ട്‌, അവരിൽ പലരും വധിക്ക​പ്പെ​ട്ടി​ട്ടുണ്ട്‌. ശത്രുക്കൾ ഇപ്പോ​ഴും ‘നീതി​മാ​ന്റെ പ്രാണന്നു വിരോ​ധ​മാ​യി കൂട്ടം​കൂ​ടു​ന്നു.’ (സങ്കീർത്തനം 94:21) ശത്രു​ക്കൾക്ക്‌ ഈ ക്രിസ്‌തീയ കൂട്ടം ‘എളിയ​വ​രും’ ‘ദരിദ്ര’രുമായി കാണ​പ്പെ​ട്ടേ​ക്കാം. എന്നിരു​ന്നാ​ലും, യഹോ​വ​യു​ടെ പിന്തു​ണ​യുള്ള അവർ ആത്മീയ സമൃദ്ധി അനുഭ​വി​ക്കു​മ്പോൾ അവരുടെ ശത്രുക്കൾ ക്ഷാമം അനുഭ​വി​ക്കു​ന്നു. (യെശയ്യാ​വു 65:13, 14; ആമോസ്‌ 8:11) ആധുനി​ക​കാല ഫെലി​സ്‌ത്യർക്കെ​തി​രെ യഹോവ തന്റെ കൈ നീട്ടു​മ്പോൾ ഈ ‘എളിയവർ’ സുരക്ഷി​ത​രാ​യി​രി​ക്കും. എവിടെ? യേശു മൂലക്കല്ല്‌ ആയിരി​ക്കുന്ന അടിസ്ഥാ​ന​ത്തിൽ പണിയ​പ്പെട്ട ‘ദൈവ​ത്തി​ന്റെ ഭവന’ത്തിൽ. (എഫെസ്യർ 2:19, 20) അവർ ‘സ്വർഗ്ഗീയ യെരൂ​ശ​ലേ​മി​ന്റെ,’ യേശു​ക്രി​സ്‌തു രാജാ​വാ​യുള്ള യഹോ​വ​യു​ടെ സ്വർഗീയ രാജ്യ​ത്തി​ന്റെ, സംരക്ഷ​ണ​ത്തിൻ കീഴിൽ ആയിരി​ക്കും.—എബ്രായർ 12:22; വെളി​പ്പാ​ടു 14:1.

മോവാബ്‌ നശിപ്പി​ക്ക​പ്പെ​ടു​ന്നു

9. അടുത്ത പ്രഖ്യാ​പനം ആർക്ക്‌ എതി​രെ​യാണ്‌, അവർ ദൈവ​ജ​ന​ത്തി​ന്റെ ശത്രു​ക്ക​ളെന്നു തെളി​ഞ്ഞി​രി​ക്കു​ന്നത്‌ എങ്ങനെ?

⁹ ഇസ്രായേലിന്റെ മറ്റൊരു അയൽരാ​ജ്യ​മാണ്‌ ചാവു​ക​ട​ലി​നു കിഴക്കാ​യി സ്ഥിതി ചെയ്യുന്ന മോവാബ്‌. ഫെലി​സ്‌ത്യ​രിൽനി​ന്നു വ്യത്യ​സ്‌ത​രാ​യി, മോവാ​ബ്യർ ഇസ്രാ​യേ​ല്യ​രു​മാ​യി ബന്ധമു​ള്ള​വ​രാണ്‌. കാരണം, അബ്രാ​ഹാ​മി​ന്റെ സഹോ​ദ​ര​പു​ത്ര​നായ ലോത്തി​ന്റെ പിൻത​ല​മു​റ​ക്കാ​രാണ്‌ അവർ. (ഉല്‌പത്തി 19:37) എന്നിട്ടും, മോവാ​ബ്യർ ഇസ്രാ​യേ​ല്യ​രോ​ടു ദീർഘ​കാ​ല​മാ​യി ശത്രു​ത​യി​ലാണ്‌. ഉദാഹ​ര​ണ​ത്തിന്‌, മോ​ശെ​യു​ടെ നാളു​ക​ളിൽ, ബിലെ​യാം എന്ന പ്രവാ​ചകൻ ഇസ്രാ​യേ​ല്യ​രെ ശപിക്കും എന്ന ധാരണ​യിൽ മോവാ​ബ്യ രാജാവ്‌ അവനെ കൂലി​ക്കെ​ടു​ത്തു. ആ ദൗത്യം പരാജ​യ​പ്പെ​ട്ട​പ്പോൾ, ഇസ്രാ​യേ​ല്യ​രെ കെണി​യിൽ പെടു​ത്താൻ മോവാബ്‌ അധാർമി​ക​ത​യും ബാൽ ആരാധ​ന​യും ആയുധ​മാ​ക്കി. (സംഖ്യാ​പു​സ്‌തകം 22:4-6; 25:1-5) അതു​കൊ​ണ്ടു​തന്നെ അടുത്ത​താ​യി, “മോവാ​ബി​നെ​ക്കു​റി​ച്ചുള്ള പ്രവാ​ചകം” രേഖ​പ്പെ​ടു​ത്താൻ യഹോവ യെശയ്യാ​വി​നെ നിശ്വ​സ്‌ത​നാ​ക്കു​ന്നു!—യെശയ്യാ​വു 15:1എ.

10, 11. മോവാ​ബിന്‌ എന്തു സംഭവി​ക്കും?

¹⁰ മോവാബിലെ ആർ, കീർ (കീർ-ഹരേ​ശെത്ത്‌), ദീബോൻ എന്നിങ്ങ​നെ​യുള്ള നിരവധി നഗരങ്ങൾക്കും സ്ഥലങ്ങൾക്കും എതി​രെ​യാണ്‌ യെശയ്യാ​വി​ന്റെ പ്രവചനം. (യെശയ്യാ​വു 15:1ബി, 2എ) മോവാ​ബ്യർ കീർ-ഹരേ​ശെ​ത്തി​ലെ മുന്തി​രി​യ​ട​ക​ളെ​ക്കു​റി​ച്ചു ദുഃഖി​ക്കും—ആ നഗരത്തി​ലെ പ്രധാന ഭക്ഷണം അതായി​രു​ന്നി​രി​ക്കാം. (യെശയ്യാ​വു 16:6, 7) മുന്തി​രി​കൃ​ഷി​ക്കു പേരു​കേട്ട സ്ഥലങ്ങളായ ശിബ്‌മ​യും യസേരും നശിച്ചു​പോ​കും. (യെശയ്യാ​വു 16:8-10) എഗ്ലത്ത്‌ശെ​ളീ​ശീയ—സാധ്യ​ത​യ​നു​സ​രിച്ച്‌ “മൂന്നു വയസ്സുള്ള പശുക്കി​ടാവ്‌” എന്ന്‌ അർഥം—വേദന​യോ​ടെ നിലവി​ളി​ക്കുന്ന കരുത്തുറ്റ ഒരു പശുക്കി​ടാ​വി​നെ പോലെ ആയിരി​ക്കും. (യെശയ്യാ​വു 15:5) വധിക്ക​പ്പെ​ടുന്ന മോവാ​ബ്യ​രു​ടെ രക്തത്താൽ “ദീമോ​നി​ലെ ജലാശ​യങ്ങൾ” നിറയവെ ദേശത്തി​ലെ പുല്ല്‌ ഉണങ്ങി​പ്പോ​കും. ‘നിമ്രീ​മി​ലെ ജലാശ​യങ്ങൾ വരണ്ടു​പോ​കും.’ ഇത്‌ ആലങ്കാ​രിക അർഥത്തിൽ ആയിരി​ക്കാം, അല്ലെങ്കിൽ സാധ്യ​ത​യ​നു​സ​രിച്ച്‌ ശത്രുക്കൾ തോടു​ക​ളിൽ ചിറ കെട്ടി വെള്ളം തടഞ്ഞു നിറു​ത്തു​ന്ന​തു​കൊണ്ട്‌ അക്ഷരീയ അർഥത്തി​ലു​മാ​കാം.—യെശയ്യാ​വു 15:6-9.

¹¹ മോവാബ്യർ വിലാപ വസ്‌ത്ര​മായ രട്ടുടു​ക്കും. അപമാ​ന​ത്തെ​യും വിലാ​പ​ത്തെ​യും സൂചി​പ്പി​ക്കാൻ അവർ തല മുണ്ഡനം ചെയ്യും. തീവ്ര ദുഃഖ​ത്തി​ന്റെ​യും നാണ​ക്കേ​ടി​ന്റെ​യും പ്രതീ​ക​മാ​യി അവർ താടി ‘കത്രി​ക്കും.’ (യെശയ്യാ​വു 15:2ബി-4) ഈ ന്യായ​വി​ധി​ക​ളു​ടെ നിവൃത്തി സംബന്ധിച്ച്‌ ഉറപ്പുള്ള യെശയ്യാ​വി​നു​തന്നെ ദുഃഖം തോന്നു​ന്നു. ഒരു കിന്നര​ത്തി​ന്റെ പ്രകമ്പിത തന്ത്രികൾ പോലെ, മോവാ​ബിന്‌ എതി​രെ​യുള്ള സന്ദേശം നിമിത്തം അവന്റെ ഹൃദയം അസ്വസ്ഥ​മാണ്‌.—യെശയ്യാ​വു 16:11, 12.

12. മോവാ​ബി​നെ​തി​രെ​യുള്ള യെശയ്യാ​വി​ന്റെ വാക്കുകൾ നിവൃ​ത്തി​യേ​റി​യത്‌ എങ്ങനെ?

¹² ഈ പ്രവചനം എപ്പോ​ഴാ​ണു നിവൃ​ത്തി​യേ​റുക? വളരെ പെട്ടെ​ന്നു​തന്നെ. “ഇതാകു​ന്നു യഹോവ പണ്ടു തന്നേ മോവാ​ബി​നെ​ക്കു​റി​ച്ചു അരുളി​ച്ചെയ്‌ത വചനം. ഇപ്പോൾ യഹോവ അരുളി​ച്ചെ​യ്യു​ന്ന​തോ: കൂലി​ക്കാ​രന്റെ ആണ്ടു​പോ​ലെ​യുള്ള മൂന്നു ആണ്ടിന്നകം മോവാ​ബി​ന്റെ മഹത്വം അവന്റെ സർവ്വമ​ഹാ​പു​രു​ഷാ​ര​ത്തോ​ടു​കൂ​ടെ തുച്ഛീ​ക​രി​ക്ക​പ്പെ​ടും; അവന്റെ ശേഷിപ്പു അത്യല്‌പ​വും അഗണ്യ​വും ആയിരി​ക്കും.” (യെശയ്യാ​വു 16:13, 14) ഇതിനു ചേർച്ച​യിൽ പൊ.യു.മു. എട്ടാം നൂറ്റാ​ണ്ടിൽ മോവാ​ബി​നു കനത്ത നാശം നേരി​ടു​ക​യും അതിലെ പല സ്ഥലങ്ങളും ആൾപ്പാർപ്പി​ല്ലാ​ത്തത്‌ ആയിത്തീ​രു​ക​യും ചെയ്‌തു എന്നതിനു പുരാ​വ​സ്‌തു​ശാ​സ്‌ത്ര​പ​ര​മായ തെളി​വുണ്ട്‌. തനിക്കു കപ്പം നൽകിയ ഭരണാ​ധി​കാ​രി​ക​ളിൽ മോവാ​ബി​ലെ സാലമാ​നു​വും ഉൾപ്പെ​ടു​ന്നു​വെന്ന്‌ തിഗ്ലത്ത്‌-പിലേസർ മൂന്നാമൻ പറയു​ക​യു​ണ്ടാ​യി. മോവാ​ബി​ലെ രാജാ​വായ കാമ്മു​സു​നാ​ദ്‌ബി സൻഹേ​രീ​ബി​നു കപ്പം കൊടു​ത്തി​രു​ന്നു. മോവാ​ബ്യ രാജാ​ക്ക​ന്മാ​രായ മുസൂ​രി​യും കാമാ​ഷാൽതു​വും തങ്ങളുടെ പ്രജകൾ ആയിരു​ന്ന​താ​യി അസീറി​യൻ സാമ്രാ​ട്ടു​ക​ളായ ഏസെർ-ഹദ്ദോ​നും അസ്‌ന​പ്പാ​രും (അശൂർബാ​നി​പ്പാൽ) പറഞ്ഞി​രി​ക്കു​ന്നു. നൂറ്റാ​ണ്ടു​കൾക്കു മുമ്പു​തന്നെ മോവാ​ബ്യ ജനത നാമാ​വ​ശേ​ഷ​മാ​യി. മോവാ​ബ്യ​രു​ടേ​തെന്നു കരുത​പ്പെ​ടുന്ന നഗരങ്ങ​ളു​ടെ ശൂന്യ​ശി​ഷ്‌ടങ്ങൾ കണ്ടെത്തി​യി​ട്ടുണ്ട്‌. എന്നാൽ, ഒരിക്കൽ ഇസ്രാ​യേ​ലി​ന്റെ ശത്രു​വാ​യി​രുന്ന ഈ പ്രബല ജനതയെ സംബന്ധിച്ച കാര്യ​മായ തെളി​വു​ക​ളൊ​ന്നും ഇതുവരെ കുഴി​ച്ചെ​ടു​ത്തി​ട്ടില്ല.

ആധുനി​ക​കാല ‘മോവാബ്‌’ നശിക്കു​ന്നു

13. ഇന്നത്തെ ഏതു സംഘട​നയെ മോവാ​ബി​നോട്‌ താരത​മ്യം ചെയ്യാൻ കഴിയും?

¹³ പുരാതന മോവാ​ബി​നു സമാന​മായ ഒരു ലോക​വ്യാ​പക സംഘടന ഇന്നുണ്ട്‌. ‘മഹാബാ​ബി​ലോ​ണി’ന്റെ പ്രമുഖ ഭാഗമായ ക്രൈ​സ്‌ത​വ​ലോ​ക​മാണ്‌ അത്‌. (വെളി​പ്പാ​ടു 17:5, NW) അബ്രാ​ഹാ​മി​ന്റെ പിതാ​വായ തേരഹി​ന്റെ പിൻത​ല​മു​റ​ക്കാ​രാ​യി​രു​ന്നു മോവാ​ബ്യ​രും ഇസ്രാ​യേ​ല്യ​രും. സമാന​മാ​യി ക്രൈ​സ്‌ത​വ​ലോ​കം, ഇന്നത്തെ അഭിഷിക്ത ക്രിസ്‌ത്യാ​നി​ക​ളു​ടെ സഭയെ​പ്പോ​ലെ ഒന്നാം നൂറ്റാ​ണ്ടി​ലെ ക്രിസ്‌തീയ സഭയിൽനി​ന്നു വന്നതാ​ണെന്ന്‌ അവകാ​ശ​പ്പെ​ടു​ന്നു. (ഗലാത്യർ 6:16) എന്നിരു​ന്നാ​ലും, ക്രൈ​സ്‌ത​വ​ലോ​കം മോവാ​ബി​നെ പോലെ ദുഷി​ച്ച​താണ്‌. അത്‌ ആത്മീയ അധാർമി​കത പ്രോ​ത്സാ​ഹി​പ്പി​ക്കു​ക​യും സത്യ​ദൈ​വ​മായ യഹോ​വ​യ്‌ക്കു പകരം മറ്റു ദൈവ​ങ്ങളെ ആരാധി​ക്കു​ക​യും ചെയ്യുന്നു. (യാക്കോബ്‌ 4:4; 1 യോഹ​ന്നാൻ 5:21) ഒരു കൂട്ടമെന്ന നിലയിൽ, ക്രൈ​സ്‌ത​വ​ലോ​ക​ത്തി​ലെ നേതാ​ക്ക​ന്മാർ രാജ്യ സുവാർത്ത പ്രസം​ഗി​ക്കു​ന്ന​വരെ എതിർക്കു​ന്നു.—മത്തായി 24:9, 14.

14. ആധുനി​ക​കാല ‘മോവാ​ബി’നെതിരെ യഹോവ നിർണയം നടത്തി​യി​രി​ക്കു​ന്നെ​ങ്കി​ലും, വ്യക്തികൾ എന്ന നിലയിൽ ആ സംഘട​ന​യി​ലെ അംഗങ്ങൾക്ക്‌ എന്തു പ്രത്യാ​ശ​യുണ്ട്‌?

¹⁴ ഒടുവിൽ മോവാബ്‌ സമ്പൂർണ​മാ​യി നശിപ്പി​ക്ക​പ്പെട്ടു. അതുതന്നെ ക്രൈ​സ്‌ത​വ​ലോ​ക​ത്തി​നും സംഭവി​ക്കും. അസീറി​യ​യ്‌ക്കു തുല്യ​മായ ഒരു ആധുനി​ക​കാല ഘടകത്തെ ഉപയോ​ഗി​ച്ചു​കൊണ്ട്‌ യഹോവ അവളെ ശൂന്യ​മാ​ക്കും. (വെളി​പ്പാ​ടു 17:16, 17) എങ്കിലും, ഈ ആധുനി​ക​കാല ‘മോവാ​ബി’ലെ ആളുകൾക്കു പ്രത്യാ​ശ​യുണ്ട്‌. മോവാ​ബി​നെ​തി​രെ പ്രവചനം നടത്തു​മ്പോൾത്തന്നെ, യെശയ്യാവ്‌ ഇങ്ങനെ പറയുന്നു: “അങ്ങനെ ദയയാൽ സിംഹാ​സനം സ്ഥിരമാ​യ്‌വ​രും; അതിന്മേൽ ദാവീ​ദി​ന്റെ കൂടാ​ര​ത്തിൽനി​ന്നു ഒരുത്തൻ ന്യായ​പാ​ലനം ചെയ്‌തും ന്യായ​ത​ല്‌പ​ര​നാ​യും നീതി നടത്തു​വാൻ വേഗത​യു​ള്ള​വ​നാ​യും നേരോ​ടെ ഇരിക്കും.” (യെശയ്യാ​വു 16:5) 1914-ൽ, ദാവീദ്‌ രാജാ​വി​ന്റെ വംശത്തി​ലുള്ള ഭരണാ​ധി​കാ​രി​യായ യേശു​വി​ന്റെ സിംഹാ​സനം യഹോവ സുസ്ഥി​ര​മാ​ക്കി. യേശു​വി​ന്റെ രാജത്വം യഹോ​വ​യു​ടെ സ്‌നേ​ഹ​ദ​യ​യു​ടെ ഒരു പ്രകട​ന​മാണ്‌. ദാവീദ്‌ രാജാ​വു​മാ​യുള്ള ദൈവ​ത്തി​ന്റെ ഉടമ്പടി​യു​ടെ നിവൃത്തി എന്ന നിലയിൽ അത്‌ എന്നേക്കും നിലനിൽക്കു​ക​യും ചെയ്യും. (സങ്കീർത്തനം 72:2; 85:10, 11; 89:3, 4; ലൂക്കൊസ്‌ 1:32) സൗമ്യ​രായ പലരും ആധുനി​ക​കാല ‘മോവാ​ബി’നെ ഉപേക്ഷി​ച്ചു​പോ​രു​ക​യും ജീവൻ പ്രാപി​ക്കു​ന്ന​തി​നാ​യി തങ്ങളെ​ത്തന്നെ യേശു​വി​നു കീഴ്‌പെ​ടു​ത്തു​ക​യും ചെയ്‌തി​രി​ക്കു​ന്നു. (വെളി​പ്പാ​ടു 18:4) യേശു “ജാതി​കൾക്കു ന്യായ​വി​ധി അറിയി​ക്കും” എന്നത്‌ അവർക്ക്‌ എത്രമാ​ത്രം ആശ്വാ​സ​പ്ര​ദ​മാണ്‌!—മത്തായി 12:17; യിരെ​മ്യാ​വു 33:15.

ദമ്മേ​ശെക്ക്‌ ഒരു ശൂന്യ​ശി​ഷ്‌ടം ആയിത്തീ​രു​ന്നു

15, 16. (എ) ദമ്മേ​ശെ​ക്കും ഇസ്രാ​യേ​ലും യഹൂദ​യ്‌ക്കെ​തി​രെ ഏതു ശത്രുതാ നിലപാ​ടു സ്വീക​രി​ക്കു​ന്നു, അതിന്റെ ഫലമായി ദമ്മേ​ശെ​ക്കിന്‌ എന്തു സംഭവി​ക്കു​ന്നു? (ബി) ദമ്മേ​ശെ​ക്കിന്‌ എതി​രെ​യുള്ള പ്രഖ്യാ​പ​ന​ത്തിൽ ആരെക്കൂ​ടി ഉൾപ്പെ​ടു​ത്തി​യി​രി​ക്കു​ന്നു? (സി) ഇസ്രാ​യേ​ലി​ന്റെ മാതൃ​ക​യിൽനിന്ന്‌ ഇന്നു ക്രിസ്‌ത്യാ​നി​കൾക്ക്‌ എന്തു പഠിക്കാൻ കഴിയും?

¹⁵ അടുത്തതായി യെശയ്യാവ്‌ “ദമ്മേ​ശെ​ക്കി​നെ​ക്കു​റി​ച്ചുള്ള പ്രവാ​ചകം” രേഖ​പ്പെ​ടു​ത്തു​ന്നു. (യെശയ്യാ​വു 17:1-6 വായി​ക്കുക.) ഇസ്രാ​യേ​ലി​നു വടക്കുള്ള ദമ്മേ​ശെക്ക്‌ “അരാമി​ന്നു തല” ആണ്‌. (യെശയ്യാ​വു 7:8) യഹൂദ​യി​ലെ ആഹാസ്‌ രാജാ​വി​ന്റെ വാഴ്‌ച​ക്കാ​ലത്ത്‌ ദമ്മേ​ശെ​ക്കി​ലെ രെസീൻ ഇസ്രാ​യേ​ലി​ലെ പേക്കഹു​മാ​യി കൂട്ടു​ചേർന്ന്‌ യഹൂദയെ ആക്രമി​ക്കു​ന്നു. എന്നിരു​ന്നാ​ലും, ആഹാസി​ന്റെ അഭ്യർഥ​ന​പ്ര​കാ​രം തിഗ്ലത്ത്‌-പിലേസർ മൂന്നാമൻ ദമ്മേ​ശെ​ക്കി​നോട്‌ യുദ്ധം ചെയ്‌ത്‌ അതിനെ കീഴട​ക്കു​ക​യും അതിലെ നിവാ​സി​ക​ളിൽ പലരെ​യും പ്രവാ​സി​ക​ളാ​യി കൊണ്ടു​പോ​കു​ക​യും ചെയ്യുന്നു. അതിനു​ശേഷം, ദമ്മേ​ശെക്ക്‌ യഹൂദ​യ്‌ക്ക്‌ ഭീഷണി​യേ അല്ലാതാ​കു​ന്നു.—2 രാജാ​ക്ക​ന്മാർ 16:5-9; 2 ദിനവൃ​ത്താ​ന്തം 28:5, 16.

¹⁶ ദമ്മേശെക്കിന്‌ എതി​രെ​യുള്ള യഹോ​വ​യു​ടെ പ്രഖ്യാ​പ​ന​ത്തിൽ അവിശ്വസ്‌ത വടക്കേ രാജ്യ​ത്തിന്‌ എതി​രെ​യുള്ള ന്യായ​വി​ധി​യും ഉൾപ്പെ​ടു​ന്നു. അതിനു കാരണം ഇസ്രാ​യേൽ ദമ്മേ​ശെ​ക്കു​മാ​യി സഖ്യം ചേർന്ന​താ​കാം. (യെശയ്യാ​വു 17:3-6) അത്‌ കൊയ്‌ത്തു​കാ​ലത്ത്‌ കതിരു​ക​ളിൽ ധാന്യം വളരെ കുറവുള്ള ഒരു വയൽ പോ​ലെ​യോ ഒലിവു​പ​ഴങ്ങൾ മിക്കവ​യും കുലു​ക്കി​പ്പ​റിച്ച ശേഷമുള്ള ഒരു ഒലിവു​വൃ​ക്ഷം പോ​ലെ​യോ ആയിത്തീ​രും. (യെശയ്യാ​വു 17:4-6) യഹോ​വ​യ്‌ക്കു തങ്ങളെ​ത്തന്നെ സമർപ്പി​ച്ചി​രി​ക്കു​ന്ന​വരെ സംബന്ധി​ച്ചി​ട​ത്തോ​ളം എത്ര ഗൗരവ​മായ ഒരു മുന്നറി​യിപ്പ്‌! അനന്യ​ഭക്തി നിഷ്‌കർഷി​ക്കുന്ന യഹോവ ആളുക​ളു​ടെ ഹൃദയം​ഗ​മ​മായ വിശുദ്ധ സേവനം മാത്രമേ സ്വീക​രി​ക്കു​ന്നു​ള്ളൂ. ഇസ്രാ​യേ​ല്യ​രെ​പ്പോ​ലെ തങ്ങളുടെ സഹോ​ദ​ര​ങ്ങൾക്ക്‌ എതിരെ തിരി​യു​ന്ന​വരെ അവൻ വെറു​ക്കു​ന്നു.—പുറപ്പാ​ടു 20:5; യെശയ്യാ​വു 17:10, 11; മത്തായി 24:48-50.

യഹോ​വ​യി​ലുള്ള സമ്പൂർണ വിശ്വാ​സം

17, 18. (എ) ഇസ്രാ​യേ​ലി​ലെ ചിലർ യഹോ​വ​യു​ടെ പ്രഖ്യാ​പ​ന​ങ്ങ​ളോ​ടു പ്രതി​ക​രി​ക്കു​ന്നത്‌ എങ്ങനെ, എന്നാൽ ആളുക​ളു​ടെ പൊതു​വായ പ്രതി​ക​രണം എന്ത്‌? (ബി) ഇന്നത്തെ സംഭവങ്ങൾ ഹിസ്‌കീ​യാ​വി​ന്റെ നാളി​ലേ​തി​നോ​ടു സമാന​മാ​യി​രി​ക്കു​ന്നത്‌ എങ്ങനെ?

¹⁷ യെശയ്യാവ്‌ തുടർന്ന്‌ ഇപ്രകാ​രം പറയുന്നു: “അന്നാളിൽ മനുഷ്യൻ തന്റെ കൈപ്പ​ണി​യായ ബലിപീ​ഠ​ങ്ങ​ളി​ലേക്കു തിരി​യാ​തെ​യും തന്റെ വിരലു​ക​ളാൽ ഉണ്ടാക്കിയ അശേരാ​വി​ഗ്ര​ഹ​ങ്ങ​ളെ​യും സൂര്യ​സ്‌തം​ഭ​ങ്ങ​ളെ​യും നോക്കാ​തെ​യും തന്റെ സ്രഷ്ടാ​വി​ങ്ക​ലേക്കു തിരി​ക​യും അവന്റെ കണ്ണു യിസ്രാ​യേ​ലി​ന്റെ പരിശു​ദ്ധനെ നോക്കു​ക​യും ചെയ്യും.” (യെശയ്യാ​വു 17:7, 8) അതേ, ഇസ്രാ​യേ​ലി​ലുള്ള ചിലർ യഹോ​വ​യു​ടെ മുന്നറി​യി​പ്പിൻ പ്രഖ്യാ​പ​ന​ത്തി​നു ചെവി​കൊ​ടു​ക്കു​ന്നു. ഉദാഹ​ര​ണ​ത്തിന്‌, തങ്ങളോ​ടൊ​പ്പം പെസഹാ ആഘോ​ഷി​ക്കു​ന്ന​തി​നാ​യി ഹിസ്‌കീ​യാവ്‌ ഇസ്രാ​യേൽ നിവാ​സി​കൾക്കു ക്ഷണം വെച്ചു​നീ​ട്ടു​മ്പോൾ ചില ഇസ്രാ​യേ​ല്യർ അനുകൂ​ല​മാ​യി പ്രതി​ക​രി​ച്ചു​കൊണ്ട്‌ ശുദ്ധാ​രാ​ധ​ന​യിൽ തങ്ങളുടെ സഹോ​ദ​ര​ങ്ങ​ളോ​ടു ചേരാ​നാ​യി യഹൂദ​യി​ലേക്കു യാത്ര തിരി​ക്കു​ന്നു. (2 ദിനവൃ​ത്താ​ന്തം 30:1-12) എന്നിരു​ന്നാ​ലും, ഇസ്രാ​യേൽ നിവാ​സി​ക​ളിൽ മിക്കവ​രും ക്ഷണം വെച്ചു​നീ​ട്ടുന്ന സന്ദേശ​വാ​ഹ​കരെ പരിഹ​സി​ക്കു​ക​യാ​ണു ചെയ്യു​ന്നത്‌. ആ രാജ്യം ഇപ്പോൾ വിശ്വാ​സ​ത്യാ​ഗ​ത്തിൽ ആമഗ്നമാണ്‌. അക്കാര​ണ​ത്താൽ, ആ ദേശത്തിന്‌ യഹോവ നിർണ​യി​ച്ച​തു​പോ​ലെ​തന്നെ സംഭവി​ക്കു​ന്നു. അസീറിയ ഇസ്രാ​യേൽ നഗരങ്ങളെ നശിപ്പി​ക്കു​ന്നു, ദേശം പാഴാ​യും മേച്ചിൽപ്പു​റങ്ങൾ ഊഷര​മാ​യും തീരുന്നു.—യെശയ്യാ​വു 17:9-11 വായി​ക്കുക.

¹⁸ ഇസ്രായേൽ വിശ്വാ​സ​ത്യാ​ഗം ഭവിച്ച ഒരു ജനത ആയിരു​ന്നു. സത്യാ​രാ​ധ​ന​യി​ലേക്കു മടങ്ങി​വ​രാൻ ആ ജനതയി​ലെ ആളുകളെ സഹായി​ക്കു​ന്ന​തി​നു ഹിസ്‌കീ​യാവ്‌ ഒരു ശ്രമം നടത്തു​ക​യു​ണ്ടാ​യി. സമാന​മാ​യി, ഇന്ന്‌ വിശ്വാ​സ​ത്യാ​ഗം ഭവിച്ച ക്രൈ​സ്‌ത​വ​ലോ​ക​ത്തി​ലെ ആളുകളെ സഹായി​ക്കാൻ സത്യ​ക്രി​സ്‌ത്യാ​നി​കൾ ശ്രമം നടത്തുന്നു. 1919 മുതൽ ‘ദൈവ​ത്തി​ന്റെ ഇസ്രാ​യേലി’ൽ നിന്നുള്ള സന്ദേശ​വാ​ഹകർ ക്രൈ​സ്‌ത​വ​ലോ​ക​ത്തി​ലെ ആളുക​ളു​ടെ അടുക്ക​ലേക്കു ചെന്ന്‌ സത്യാ​രാ​ധ​ന​യിൽ പങ്കുപ​റ്റാൻ അവരെ ക്ഷണിക്കു​ന്നു. (ഗലാത്യർ 6:16) എന്നാൽ അവരിൽ മിക്കവ​രും ആ ക്ഷണം നിരസി​ച്ചി​രി​ക്കു​ന്നു. പലരും ആ സന്ദേശ​വാ​ഹ​കരെ പരിഹ​സി​ച്ചി​രി​ക്കു​ന്നു. എങ്കിലും, ക്രൈ​സ്‌ത​വ​ലോ​ക​ത്തി​ലെ ചില ആളുകൾ അനുകൂ​ല​മാ​യി പ്രതി​ക​രി​ച്ചി​ട്ടുണ്ട്‌. ഇപ്പോൾ അവരുടെ സംഖ്യ ദശലക്ഷങ്ങൾ വരും. അവർ ‘യിസ്രാ​യേ​ലി​ന്റെ പരിശു​ദ്ധനെ നോക്കു​ന്ന​തിൽ,’ അവനാൽ പഠിപ്പി​ക്ക​പ്പെ​ടു​ന്ന​തിൽ ആനന്ദി​ക്കു​ന്നു. (യെശയ്യാ​വു 54:13) അശുദ്ധ​മായ ബലിപീ​ഠ​ങ്ങ​ളി​ലെ ആരാധന—മനുഷ്യ​നിർമിത ദൈവ​ങ്ങ​ളോ​ടുള്ള ഭക്തിയും അവയി​ലുള്ള ആശ്രയ​വും—ഉപേക്ഷിച്ച്‌ അവർ യഹോ​വ​യി​ലേക്ക്‌ ആകാം​ക്ഷ​യോ​ടെ തിരി​യു​ന്നു. (സങ്കീർത്തനം 146:3, 4) യെശയ്യാ​വി​ന്റെ സമകാ​ലി​ക​നായ മീഖായെ പോലെ, അവരിൽ ഓരോ​രു​ത്ത​നും ഇങ്ങനെ പറയുന്നു: “ഞാനോ യഹോ​വ​യി​ങ്ക​ലേക്കു നോക്കും; എന്റെ രക്ഷയുടെ ദൈവ​ത്തി​ന്നാ​യി കാത്തി​രി​ക്കും; എന്റെ ദൈവം എന്റെ പ്രാർത്ഥന കേൾക്കും.”—മീഖാ 7:7.

19. യഹോവ ആരെ ശാസി​ക്കും, അത്‌ അവർക്ക്‌ എന്ത്‌ അർഥമാ​ക്കും?

¹⁹ മർത്യനിൽ ആശ്രയി​ക്കു​ന്ന​വ​രിൽനിന്ന്‌ എത്രയോ വ്യത്യ​സ്‌തം! അക്രമ​വും പ്രക്ഷു​ബ്‌ധ​ത​യും ഈ അന്ത്യകാ​ലത്തു മാനവ​രാ​ശി​യെ പിടി​ച്ചു​ല​യ്‌ക്കു​ന്നു. അശാന്ത​രും മത്സരി​ക​ളു​മായ മനുഷ്യ​സ​മൂ​ഹ​മാ​കുന്ന “കടൽ” അതൃപ്‌തി​യും വിപ്ലവ​വും നുരച്ചു​ത​ള്ളു​ന്നു. (യെശയ്യാ​വു 57:20; വെളി​പ്പാ​ടു 8:8, 9; 13:1) ബഹളം കൂട്ടുന്ന ഈ ആളുകളെ യഹോവ “ശാസി​ക്കും.” പ്രശ്‌നങ്ങൾ ഉണ്ടാക്കുന്ന സകല സംഘട​ന​ക​ളെ​യും വ്യക്തി​ക​ളെ​യും അവന്റെ സ്വർഗീയ രാജ്യം നീക്കി​ക്ക​ള​യും. അവർ “പതിർപോ​ലെ​യും കൊടു​ങ്കാ​റ​റിൻമു​മ്പിൽ ചുഴന്നു​പ​റ​ക്കുന്ന പൊടി​പോ​ലെ​യും പാറി​പ്പോ​കും.”—യെശയ്യാ​വു 17:12, 13; വെളി​പ്പാ​ടു 16:14, 16.

20. രാഷ്‌ട്രങ്ങൾ തങ്ങളെ ‘കൊള്ള’യിടു​ന്നെ​ങ്കി​ലും, സത്യ​ക്രി​സ്‌ത്യാ​നി​കൾക്ക്‌ എന്തു ബോധ്യ​മുണ്ട്‌?

²⁰ അതിന്റെ ഫലമോ? യെശയ്യാവ്‌ ഇങ്ങനെ പറയുന്നു: “സന്ധ്യാ​സ​മ​യത്തു ഇതാ, ഭീതി! പ്രഭാ​ത​ത്തി​ന്നു മുമ്പെ അവൻ ഇല്ലാ​തെ​യാ​യി! ഇതു നമ്മെ കൊള്ള​യി​ടു​ന്ന​വ​രു​ടെ ഓഹരി​യും നമ്മോടു പിടി​ച്ചു​പ​റി​ക്കു​ന്ന​വ​രു​ടെ പങ്കും ആകുന്നു.” (യെശയ്യാ​വു 17:14) പലരും യഹോ​വ​യു​ടെ ജനത്തെ കൊള്ള​യി​ടു​ക​യും അവരോ​ടു നിർദ​യ​മാ​യി, അനാദ​ര​വോ​ടെ ഇടപെ​ടു​ക​യും ചെയ്യുന്നു. ലോക​ത്തി​ലെ മുഖ്യ​ധാ​രാ മതങ്ങളു​ടെ ഭാഗമ​ല്ലാ​ത്ത​തി​നാൽ—അവർ അതിന്‌ ആഗ്രഹി​ക്കു​ന്നു​മില്ല—മുൻവി​ധി​യുള്ള വിമർശ​കർക്കും മതഭ്രാ​ന്ത​രായ ശത്രു​ക്കൾക്കും എളുപ്പം ആക്രമി​ക്കാ​വു​ന്ന​വ​രാ​യി സത്യ​ക്രി​സ്‌ത്യാ​നി​കൾ കാണ​പ്പെ​ടു​ന്നു. എന്നാൽ സകല കഷ്‌ട​ത​ക​ളും അവസാ​നി​ക്കാൻ പോകുന്ന ‘പ്രഭാതം’ അതി​വേഗം അടുത്തു​വ​രു​ക​യാ​ണെന്ന്‌ ദൈവ​ജ​ന​ത്തിന്‌ അറിയാം.—2 തെസ്സ​ലൊ​നീ​ക്യർ 1:6-9; 1 പത്രൊസ്‌ 5:6-11.

യഹോ​വ​യ്‌ക്ക്‌ എത്യോ​പ്യ​യു​ടെ തിരു​മുൽക്കാഴ്‌ച

21, 22. അടുത്ത​താ​യി ഏതു രാഷ്‌ട്ര​ത്തി​നാ​ണു ന്യായ​വി​ധി സന്ദേശം ലഭിക്കു​ന്നത്‌, യെശയ്യാ​വി​ന്റെ നിശ്വസ്‌ത മൊഴി​കൾ നിവൃ​ത്തി​യേ​റു​ന്നത്‌ എങ്ങനെ?

²¹ ചുരുങ്ങിയത്‌ രണ്ട്‌ സന്ദർഭ​ങ്ങ​ളി​ലെ​ങ്കി​ലും മിസ്ര​യീ​മി​നു തെക്കുള്ള കൂശ്‌ (എത്യോ​പ്യ) യഹൂദ​യ്‌ക്ക്‌ എതിരെ സൈനിക ആക്രമണം നടത്തു​ക​യു​ണ്ടാ​യി. (2 ദിനവൃ​ത്താ​ന്തം 12:2, 3; 14:1, 9-15; 16:8) ഇപ്പോൾ യെശയ്യാവ്‌ ആ ജനതയു​ടെ​മേൽ ന്യായ​വി​ധി ഉച്ചരി​ക്കു​ന്നു: “അയ്യോ, കൂശിലെ നദികൾക്ക​രി​കെ ചിറകു കിരു​കി​രു​ക്കു​ന്ന​തും കടൽവ​ഴി​യാ​യി വെള്ളത്തി​ന്മേൽ ഞാങ്ങണ​കൊ​ണ്ടുള്ള തോണി​ക​ളിൽ ദൂതന്മാ​രെ അയക്കു​ന്ന​തും ആയ ദേശമേ!” (യെശയ്യാ​വു 18:1-6 വായി​ക്കുക.)a കൂശിനെ ‘മുറിച്ച്‌ ചെത്തിക്കള’യേണ്ടതാ​ണെന്ന്‌ യഹോവ കൽപ്പി​ക്കു​ന്നു.

²² പൊ.യു.മു. എട്ടാം നൂറ്റാ​ണ്ടി​ന്റെ രണ്ടാം പകുതി​യിൽ എത്യോ​പ്യ ഈജി​പ്‌തി​നെ കീഴട​ക്കു​ക​യും തുടർന്ന്‌ 60 വർഷ​ത്തോ​ളം അതിന്മേൽ ഭരണം നടത്തു​ക​യും ചെയ്‌ത​താ​യി ലൗകിക ചരിത്രം നമ്മോടു പറയുന്നു. ഈജി​പ്‌തി​ന്റെ മേലുള്ള എത്യോ​പ്യൻ അധീശ​ത്വം അവസാ​നി​പ്പി​ക്കാൻ അസീറി​യൻ ചക്രവർത്തി​മാ​രായ ഏസെർ-ഹദ്ദോ​നി​നും അശൂർബാ​നി​പ്പാ​ലി​നും സാധിച്ചു. ഈജി​പ്‌തി​ലെ തിബ്‌സി​നെ ആക്രമി​ച്ചു​കൊണ്ട്‌ അശൂർബാ​നി​പ്പാൽ നൈൽ താഴ്‌വര പ്രദേശം അസീറി​യൻ അധീന​ത​യി​ലാ​ക്കി. (യെശയ്യാ​വു 20:3-6 കൂടി കാണുക.) ആധുനിക കാലം സംബന്ധി​ച്ചെന്ത്‌?

23. ആധുനി​ക​കാല ‘എത്യോ​പ്യ’ എന്തി​നോ​ടു ചേർന്നു പ്രവർത്തി​ക്കു​ന്നു, അതു നശിപ്പി​ക്ക​പ്പെ​ടു​ന്നത്‌ എന്തു​കൊണ്ട്‌?

²³ ‘അന്ത്യകാ​ലത്തെ’ കുറി​ച്ചുള്ള ദാനീ​യേ​ലി​ന്റെ പ്രവച​ന​ത്തിൽ, എത്യോ​പ്യ​യും ലിബി​യ​യും (ലൂബ്യ) ആക്രമ​ണ​കാ​രി​യായ ‘വടക്കെ​ദേ​ശ​ത്തി​ലെ രാജാ​വി​ന്റെ’ “അനുചാ​രിക”ളായി സേവി​ക്കു​ന്നു​വെന്നു പറഞ്ഞി​രി​ക്കു​ന്നു. (ദാനീ​യേൽ 11:40-43) എത്യോ​പ്യ “മാഗോ​ഗ്‌ദേ​ശ​ത്തി​ലെ ഗോഗി​ന്റെ” സൈന്യ​ത്തി​ന്റെ ഭാഗമാ​യി​രി​ക്കു​ന്ന​താ​യും ബൈബിൾ പറയുന്നു. (യെഹെ​സ്‌കേൽ 38:2-5, 8) വടക്കേ ദേശത്തി​ലെ രാജാവ്‌ ഉൾപ്പെ​ടെ​യുള്ള ഗോഗി​ന്റെ സൈന്യ​ങ്ങൾ യഹോ​വ​യു​ടെ വിശുദ്ധ ജനതയെ ആക്രമി​ക്കു​മ്പോൾ അവർ നശിപ്പി​ക്ക​പ്പെ​ടും. അതു​കൊണ്ട്‌, തന്റെ പരമാ​ധി​കാ​രത്തെ എതിർക്കു​ന്ന​തി​നാൽ ആധുനി​ക​കാല ‘കൂശി’നു (എത്യോ​പ്യ) നേരെ​യും യഹോവ തന്റെ കൈ നീട്ടും.—യെഹെ​സ്‌കേൽ 38:21-23; ദാനീ​യേൽ 11:44.

24. ഏതു വിധങ്ങ​ളി​ലാണ്‌ യഹോ​വ​യ്‌ക്കു രാഷ്‌ട്ര​ങ്ങ​ളിൽനിന്ന്‌ “തിരു​മുൽക്കാഴ്‌ച” ലഭിച്ചി​രി​ക്കു​ന്നത്‌?

²⁴ എന്നാൽ പ്രവചനം ഇങ്ങനെ​യും പറയുന്നു: “ആ കാലത്തു ദീർഘ​കാ​യ​ന്മാ​രും മൃദു​ചർമ്മി​ക​ളും ആയ ജാതി . . . സൈന്യ​ങ്ങ​ളു​ടെ യഹോ​വ​യു​ടെ നാമമുള്ള സ്ഥലമായ സീയോൻപർവ്വ​ത​ത്തി​ലേക്കു സൈന്യ​ങ്ങ​ളു​ടെ യഹോ​വെക്കു തിരു​മുൽക്കാഴ്‌ച കൊണ്ടു​വ​രും.” (യെശയ്യാ​വു 18:7) രാഷ്‌ട്രങ്ങൾ യഹോ​വ​യു​ടെ പരമാ​ധി​കാ​രത്തെ അംഗീ​ക​രി​ക്കു​ന്നി​ല്ലെ​ങ്കി​ലും, യഹോ​വ​യു​ടെ ജനത്തിനു സഹായ​ക​മാ​കുന്ന വിധത്തിൽ അവ ചില​പ്പോ​ഴൊ​ക്കെ പ്രവർത്തി​ച്ചി​ട്ടുണ്ട്‌. ചില ദേശങ്ങ​ളിൽ, അധികാ​രി​കൾ യഹോ​വ​യു​ടെ വിശ്വസ്‌ത ആരാധ​ക​രു​ടെ അവകാ​ശങ്ങൾ ഉയർത്തി​പ്പി​ടി​ക്കുന്ന നിയമങ്ങൾ നടപ്പി​ലാ​ക്കു​ക​യും അവർക്ക്‌ അനുകൂ​ല​മാ​യി കോടതി വിധികൾ പുറ​പ്പെ​ടു​വി​ക്കു​ക​യും ചെയ്‌തി​ട്ടുണ്ട്‌. (പ്രവൃ​ത്തി​കൾ 5:29; വെളി​പ്പാ​ടു 12:15, 16) വേറെ തരത്തി​ലുള്ള തിരു​മുൽക്കാ​ഴ്‌ച​ക​ളും ഉണ്ട്‌. “രാജാ​ക്ക​ന്മാർ നിനക്കു കാഴ്‌ച കൊണ്ടു​വ​രും. . . . മിസ്ര​യീ​മിൽനി​ന്നു മഹത്തുക്കൾ വരും; കൂശ്‌ വേഗത്തിൽ തന്റെ കൈകളെ ദൈവ​ത്തി​ങ്ക​ലേക്കു നീട്ടും.” (സങ്കീർത്തനം 68:29-31) ഇന്ന്‌, ആധുനി​ക​കാല ‘കൂശ്യർ’—യഹോ​വയെ ഭയപ്പെ​ടുന്ന ദശലക്ഷ​ക്ക​ണ​ക്കി​നു വ്യക്തികൾ—ആരാധ​ന​യു​ടെ രൂപത്തിൽ “തിരു​മുൽക്കാഴ്‌ച” കൊണ്ടു​വ​രി​ക​യാണ്‌. (മലാഖി 1:11) ഭൂമി​യി​ലെ​ങ്ങും രാജ്യ​ത്തി​ന്റെ സുവാർത്ത പ്രസം​ഗി​ക്കു​ക​യെന്ന ബൃഹത്തായ വേലയിൽ അവർ പങ്കുപ​റ്റു​ക​യാണ്‌. (മത്തായി 24:14; വെളി​പ്പാ​ടു 14:6, 7) യഹോ​വ​യ്‌ക്കുള്ള എത്ര ഉത്‌കൃ​ഷ്‌ഠ​മായ തിരു​മുൽക്കാഴ്‌ച!—എബ്രായർ 13:15.

ഉരുകുന്ന ഹൃദയ​വു​മാ​യി ഈജി​പ്‌ത്‌

25. യെശയ്യാ​വു 19:1-11-ന്റെ നിവൃ​ത്തി​യാ​യി, പുരാതന ഈജി​പ്‌തിന്‌ എന്തു സംഭവി​ക്കു​ന്നു?

²⁵ യഹൂദയുടെ തെക്കുള്ള അയൽരാ​ജ്യ​മായ ഈജി​പ്‌ത്‌ ദൈവ​ത്തി​ന്റെ ഉടമ്പടി ജനതയു​മാ​യി ദീർഘ​കാ​ല​മാ​യി ശത്രു​ത​യി​ലാണ്‌. യെശയ്യാ​വു 19-ാം അധ്യാ​യ​ത്തിൽ യെശയ്യാ​വി​ന്റെ കാലത്തെ ഈജി​പ്‌തി​ന്റെ ദുഷിച്ച അവസ്ഥയെ കുറി​ച്ചുള്ള വിവരണം അടങ്ങി​യി​രി​ക്കു​ന്നു. ഈജി​പ്‌തിൽ ആഭ്യന്തര യുദ്ധം നടക്കു​ക​യാണ്‌, ‘പട്ടണം പട്ടണ​ത്തോ​ടും രാജ്യം രാജ്യ​ത്തോ​ടു യുദ്ധം ചെയ്യുന്നു.’ (യെശയ്യാ​വു 19:2, 13, 14) ശത്രു​ത​യി​ലാ​യി​രുന്ന രാജവം​ശങ്ങൾ ഒരേ സമയത്ത്‌ രാജ്യ​ത്തി​ന്റെ വിവിധ ഭാഗങ്ങ​ളിൽ ഭരണം നടത്തി​യി​രു​ന്ന​തി​ന്റെ തെളി​വു​കൾ ചരി​ത്ര​കാ​ര​ന്മാർ നിരത്തു​ന്നു. ഈജി​പ്‌തി​ലെ ‘മിത്ഥ്യാ​മൂർത്തി​ക​ളോ മന്ത്രവാ​ദിക’ളോ ഈജി​പ്‌തു​കാർ വളരെ അഹങ്കരി​ക്കുന്ന അവരുടെ ജ്ഞാനമോ ഒന്നും “ക്രൂര​യ​ജ​മാ​നന്റെ കയ്യിൽ”നിന്ന്‌ അവളെ രക്ഷിക്കു​ന്നില്ല. (യെശയ്യാ​വു 19:3, 4) അസീറിയ, ബാബി​ലോൺ, പേർഷ്യ, ഗ്രീസ്‌, റോം തുടങ്ങിയ രാഷ്‌ട്രങ്ങൾ ഒന്നിനു പുറകെ ഒന്നായി ഈജി​പ്‌തി​നെ കീഴട​ക്കു​ന്നു. ആ സംഭവ​ങ്ങ​ളെ​ല്ലാം യെശയ്യാ​വു 19:1-11-ലെ പ്രവച​ന​ങ്ങ​ളു​ടെ നിവൃ​ത്തി​യാണ്‌.

26. വലിയ നിവൃ​ത്തി​യിൽ, ആധുനി​ക​കാല ‘ഈജി​പ്‌തി​ലെ’ നിവാ​സി​കൾ യഹോ​വ​യു​ടെ ന്യായ​വി​ധി നിർവ​ഹ​ണ​ത്തോട്‌ എങ്ങനെ പ്രതി​ക​രി​ക്കും?

²⁶ ബൈബിൾ മിക്ക​പ്പോ​ഴും ഈജി​പ്‌തി​നെ സാത്താന്റെ ലോക​ത്തി​ന്റെ പ്രതീ​ക​മാ​യാണ്‌ ചിത്രീ​ക​രി​ക്കു​ന്നത്‌. (യെഹെ​സ്‌കേൽ 29:3; യോവേൽ 3:19; വെളി​പ്പാ​ടു 11:8) അതു​കൊണ്ട്‌, യെശയ്യാവ്‌ അറിയി​ക്കുന്ന ‘മിസ്ര​യീ​മി​നെ [ഈജി​പ്‌തി​നെ] കുറി​ച്ചുള്ള പ്രവാ​ച​ക​ത്തിന്‌’ ഒരു വലിയ നിവൃത്തി ഉണ്ടോ? തീർച്ച​യാ​യും! വാസ്‌ത​വ​ത്തിൽ, സകലരും ആ പ്രവച​ന​ത്തി​ലെ പ്രാരംഭ വാക്കു​കൾക്ക്‌ ഗൗരവ​മായ ശ്രദ്ധ നൽകേ​ണ്ട​തുണ്ട്‌: “യഹോവ വേഗത​യു​ള്ളോ​രു മേഘത്തെ വാഹന​മാ​ക്കി മിസ്ര​യീ​മി​ലേക്കു വരുന്നു; അപ്പോൾ മിസ്ര​യീ​മി​ലെ മിത്ഥ്യാ​മൂർത്തി​കൾ അവന്റെ സന്നിധി​യി​ങ്കൽ നടുങ്ങു​ക​യും മിസ്ര​യീ​മി​ന്റെ ഹൃദയം അതിന്റെ ഉള്ളിൽ ഉരുകു​ക​യും ചെയ്യും.” (യെശയ്യാ​വു 19:1) സാത്താന്റെ സംഘട​ന​യ്‌ക്കെ​തി​രെ യഹോവ പെട്ടെ​ന്നു​തന്നെ നടപടി​യെ​ടു​ക്കു​മ്പോൾ ഈ വ്യവസ്ഥി​തി​യു​ടെ ദൈവങ്ങൾ ഒന്നിനും കൊള്ളാ​ത്ത​വ​യാ​ണെന്നു തെളി​യും. (സങ്കീർത്തനം 96:5; 97:7) ഭയം നിമിത്തം ‘മിസ്ര​യീ​മി​ന്റെ ഹൃദയം ഉരുകും.’ ആ കാലം യേശു മുൻകൂ​ട്ടി പറയു​ക​യു​ണ്ടാ​യി: “കടലി​ന്റെ​യും ഓളത്തി​ന്റെ​യും മുഴക്കം​നി​മി​ത്തം ഭൂമി​യി​ലെ ജാതി​കൾക്കു നിരാ​ശ​യോ​ടു കൂടിയ പരി​ഭ്രമം ഉണ്ടാകും. . . . ഭൂലോ​ക​ത്തി​ന്നു എന്തു ഭവിപ്പാൻ പോകു​ന്നു എന്നു പേടി​ച്ചും നോക്കി​പ്പാർത്തും​കൊ​ണ്ടു മനുഷ്യർ നിർജ്ജീ​വ​ന്മാർ ആകും.”—ലൂക്കൊസ്‌ 21:25, 26.

27. ഈജി​പ്‌തിൽ എന്തെല്ലാം ആഭ്യന്തര പ്രശ്‌നങ്ങൾ ഉണ്ടാകു​മെന്ന്‌ മുൻകൂ​ട്ടി പറയ​പ്പെട്ടു, അത്‌ ഇന്നു നിവൃ​ത്തി​യേ​റു​ന്നത്‌ എങ്ങനെ?

²⁷ ന്യായവിധി നിർവ​ഹ​ണ​ത്തി​ലേക്കു നയിക്കുന്ന സമയത്തെ കുറിച്ച്‌ യഹോവ പ്രാവ​ച​നി​ക​മാ​യി ഇങ്ങനെ പറയുന്നു: “ഞാൻ മിസ്ര​യീ​മ്യ​രെ മിസ്ര​യീ​മ്യ​രോ​ടു കലഹി​പ്പി​ക്കും; അവർ ഓരോ​രു​ത്തൻ താന്താന്റെ സഹോ​ദ​ര​നോ​ടും ഓരോ​രു​ത്തൻ താന്താന്റെ കൂട്ടു​കാ​ര​നോ​ടും പട്ടണം പട്ടണ​ത്തോ​ടും രാജ്യം രാജ്യ​ത്തോ​ടും യുദ്ധം ചെയ്യും.” (യെശയ്യാ​വു 19:2) 1914-ൽ ദൈവ​രാ​ജ്യം സ്ഥാപി​ക്ക​പ്പെ​ട്ടതു മുതൽ യേശു​വി​ന്റെ “സാന്നി​ധ്യ​ത്തി​ന്റെ അടയാള”മെന്ന നിലയിൽ രാഷ്‌ട്രങ്ങൾ തമ്മിലും ജനതകൾ തമ്മിലു​മുള്ള യുദ്ധങ്ങൾ വർധി​ച്ചി​രി​ക്കു​ന്നു. വർഗീയ കൂട്ട​ക്കൊല, രക്തപങ്കി​ല​മായ വംശഹത്യ, ‘വർഗീയ വെടി​പ്പാ​ക്കൽ’ തുടങ്ങി​യവ ഈ അന്ത്യനാ​ളു​ക​ളിൽ ദശലക്ഷ​ങ്ങ​ളു​ടെ ജീവൻ അപഹരി​ച്ചി​രി​ക്കു​ന്നു. അന്ത്യം അടുത്തു​വ​രവെ, അത്തരം “കൊടിയ വേദനകൾ” വർധി​ക്കു​കയേ ഉള്ളൂ.—മത്തായി 24:3, 7, 8, NW.

28. ന്യായ​വി​ധി ദിവസ​ത്തിൽ വ്യാജ​മ​ത​ങ്ങൾക്ക്‌ എന്തു ചെയ്യാൻ കഴിയില്ല?

²⁸ “മിസ്ര​യീ​മി​ന്റെ ചൈത​ന്യം അതിന്റെ ഉള്ളിൽ ഒഴിഞ്ഞു​പോ​കും; ഞാൻ അതിന്റെ ആലോ​ച​നയെ നശിപ്പി​ക്കും; അപ്പോൾ അവർ മിത്ഥ്യാ​മൂർത്തി​ക​ളോ​ടും മന്ത്രവാ​ദി​ക​ളോ​ടും വെളി​ച്ച​പ്പാ​ട​ന്മാ​രോ​ടും ലക്ഷണം പറയു​ന്ന​വ​രോ​ടും അരുള​പ്പാ​ടു ചോദി​ക്കും.” (യെശയ്യാ​വു 19:3) മോശെ ഫറവോ​ന്റെ മുമ്പാകെ വന്നപ്പോൾ ഈജി​പ്‌തി​ലെ പുരോ​ഹി​ത​ന്മാർ യഹോ​വ​യു​ടെ ശക്തി​യോ​ടു കിടപി​ടി​ക്കാ​നാ​കാ​തെ ലജ്ജിത​രാ​ക്ക​പ്പെട്ടു. (പുറപ്പാ​ടു 8:18, 19; പ്രവൃ​ത്തി​കൾ 13:8; 2 തിമൊ​ഥെ​യൊസ്‌ 3:8) സമാന​മാ​യി, ന്യായ​വി​ധി ദിവസ​ത്തിൽ വ്യാജ​മ​ത​ങ്ങൾക്ക്‌ ഈ വ്യവസ്ഥി​തി​യെ രക്ഷിക്കാ​നാ​വില്ല. (യെശയ്യാ​വു 47:1, 11-13 താരത​മ്യം ചെയ്യുക.) ഒടുവിൽ ഈജി​പ്‌ത്‌ “ഒരു ക്രൂര​യ​ജ​മാ​നന്റെ,” അസീറി​യ​യു​ടെ കീഴി​ലാ​കു​ന്നു. (യെശയ്യാ​വു 19:4) അത്‌ ഇപ്പോ​ഴത്തെ വ്യവസ്ഥി​തി​യു​ടെ ഇരുണ്ട ഭാവിയെ മുൻനി​ഴ​ലാ​ക്കു​ന്നു.

29. യഹോ​വ​യു​ടെ ദിവസം വരു​മ്പോൾ, രാഷ്‌ട്രീ​യ​ക്കാർക്കു സഹായി​ക്കാൻ കഴിയു​മോ?

²⁹ എന്നാൽ രാഷ്‌ട്രീയ നേതാ​ക്ക​ന്മാ​രു​ടെ കാര്യ​മോ? അവർക്കു സഹായി​ക്കാ​നാ​കു​മോ? “സോവ​നി​ലെ പ്രഭു​ക്ക​ന്മാർ കേവലം ഭോഷ​ന്മാ​ര​ത്രേ; ഫറവോ​ന്റെ ജ്ഞാന​മേ​റിയ മന്ത്രി​മാ​രു​ടെ ആലോചന ഭോഷ​ത്വ​മാ​യി തീർന്നി​രി​ക്കു​ന്നു.” (യെശയ്യാ​വു 19:5-11 വായി​ക്കുക.) ന്യായ​വി​ധി ദിവസ​ത്തിൽ മനുഷ്യ ഉപദേ​ഷ്‌ടാ​ക്ക​ന്മാർ സഹായി​ക്കും എന്നു പ്രതീ​ക്ഷി​ക്കു​ന്നത്‌ എത്ര മൗഢ്യ​മാ​യി​രി​ക്കും! അവർക്കു ലോക​ത്തി​ലെ മുഴു ജ്ഞാനവും ഉണ്ടെന്നു​വ​രി​കി​ലും ദൈവിക ജ്ഞാനം ഇല്ല. (1 കൊരി​ന്ത്യർ 3:19) ലോക​ത്തി​ലു​ള്ളവർ യഹോ​വയെ തള്ളിക്ക​ളഞ്ഞ്‌ ശാസ്‌ത്ര​ത്തി​ലേ​ക്കും തത്ത്വജ്ഞാ​ന​ത്തി​ലേ​ക്കും സമ്പത്തി​ലേ​ക്കും സുഖ​ഭോ​ഗ​ങ്ങ​ളി​ലേ​ക്കും വ്യാജ​ദൈ​വാ​രാ​ധ​ന​യി​ലേ​ക്കും തിരി​ഞ്ഞി​രി​ക്കു​ന്നു. അതിനാൽ അവർക്കു ദൈ​വോ​ദ്ദേ​ശ്യ​ങ്ങൾ സംബന്ധിച്ച പരിജ്ഞാ​ന​മില്ല. വഞ്ചിത​രായ അവർ ആശയക്കു​ഴ​പ്പ​ത്തി​ലാണ്‌, അവരുടെ പ്രവൃ​ത്തി​കൾ വ്യർഥ​മാണ്‌. (യെശയ്യാ​വു 19:12-15 വായി​ക്കുക.) “ജ്ഞാനികൾ ലജ്ജിച്ചു ഭ്രമിച്ചു പിടി​പെ​ട്ടു​പോ​കും; അവർ യഹോ​വ​യു​ടെ വചനം ധിക്കരി​ച്ചു​ക​ള​ഞ്ഞു​വ​ല്ലോ; അവർക്കു എന്തൊരു ജ്ഞാനമു​ള്ളു?”—യിരെ​മ്യാ​വു 8:9.

യഹോ​വ​യ്‌ക്ക്‌ ഒരു അടയാ​ള​വും സാക്ഷ്യ​വും

30. ഏതു വിധത്തിൽ ‘യഹൂദാ​ദേശം മിസ്ര​യീ​മി​നു ഭയങ്കര​മാ​യി​രി​ക്കും’?

³⁰ എന്നാൽ, ‘ഈജി​പ്‌തി’ലെ നേതാ​ക്ക​ന്മാർ “സ്‌ത്രീ​കൾക്കു തുല്യ​രാ​യി” ബലഹീ​ന​രാ​ണെ​ങ്കി​ലും, ദൈവിക ജ്ഞാനം തേടുന്ന ചിലർ ഇപ്പോ​ഴും അവി​ടെ​യുണ്ട്‌. യഹോ​വ​യു​ടെ അഭിഷി​ക്ത​രും അവരുടെ സഹകാ​രി​ക​ളും ‘ദൈവ​ത്തി​ന്റെ സൽഗു​ണ​ങ്ങളെ ഘോഷി​ക്കു​ന്നു.’ (യെശയ്യാ​വു 19:16; 1 പത്രൊസ്‌ 2:9) സാത്താന്റെ സംഘട​ന​യു​ടെ ആസന്നമായ അന്ത്യത്തെ കുറിച്ച്‌ തങ്ങളാ​ലാ​വും വിധം അവർ മുന്നറി​യി​പ്പു കൊടു​ക്കു​ന്നു. അത്തര​മൊ​രു സ്ഥിതി​വി​ശേ​ഷ​ത്തി​ലേക്കു നോക്കി​ക്കൊണ്ട്‌ യെശയ്യാവ്‌ ഇപ്രകാ​രം പറയുന്നു: “യെഹൂ​ദാ​ദേശം മിസ്ര​യീ​മി​ന്നു ഭയങ്കര​മാ​യി​രി​ക്കും; അതിന്റെ പേർ പറഞ്ഞു​കേൾക്കു​ന്ന​വ​രൊ​ക്കെ​യും സൈന്യ​ങ്ങ​ളു​ടെ യഹോവ അതിന്നു വിരോ​ധ​മാ​യി നിർണ്ണ​യിച്ച നിർണ്ണ​യം​നി​മി​ത്തം ഭയപ്പെ​ടും.” (യെശയ്യാ​വു 19:17) യഹോ​വ​യു​ടെ വിശ്വസ്‌ത സന്ദേശ​വാ​ഹകർ ആളുക​ളോ​ടു സത്യം ഘോഷി​ക്കു​ന്നു. യഹോവ മുൻകൂ​ട്ടി പറഞ്ഞി​രി​ക്കുന്ന ബാധകൾ അറിയി​ക്കു​ന്ന​തും അതിൽ ഉൾപ്പെ​ടു​ന്നു. (വെളി​പ്പാ​ടു 8:7-12; 16:2-12) ലോക​ത്തി​ലെ മതനേ​താ​ക്ക​ന്മാ​രെ അത്‌ അസ്വസ്ഥ​രാ​ക്കു​ന്നു.

31. (എ) പുരാതന നാളു​ക​ളിൽ ഈജി​പ്‌തി​ലെ നഗരങ്ങ​ളിൽ “കനാൻഭാഷ” സംസാ​രി​ക്ക​പ്പെ​ട്ടത്‌ എങ്ങനെ? (ബി) ആധുനിക കാലത്ത്‌ അവിടെ അതു സംസാ​രി​ക്ക​പ്പെ​ടു​ന്നത്‌ എങ്ങനെ?

³¹ ഈ പ്രസം​ഗ​വേ​ല​യു​ടെ അത്ഭുത​ക​ര​മായ ഫലം എന്താണ്‌? “അന്നാളിൽ മിസ്ര​യീം​ദേ​ശ​ത്തുള്ള അഞ്ചു പട്ടണങ്ങൾ കനാൻഭാഷ സംസാ​രി​ച്ചു സൈന്യ​ങ്ങ​ളു​ടെ യഹോ​വ​യോ​ടു സത്യം​ചെ​യ്യും; ഒന്നിന്നു സൂര്യ​ന​ഗരം (ഈർ ഹഹേ​രെസ്‌) [“ശൂന്യ​മാ​ക്ക​ലി​ന്റെ നഗരം,” NW] എന്നു പേർ വിളി​ക്ക​പ്പെ​ടും.” (യെശയ്യാ​വു 19:18) ഈജി​പ്‌തി​ലെ നഗരങ്ങ​ളി​ലേക്ക്‌ ഓടി​പ്പോയ യഹൂദ​ന്മാർ അവിടെ എബ്രായ ഭാഷ സംസാ​രി​ച്ച​പ്പോൾ പുരാതന നാളു​ക​ളിൽ ഈ പ്രവച​ന​ത്തി​നു നിവൃത്തി ഉണ്ടായി. (യിരെ​മ്യാ​വു 24:1, 8-10; 41:1-3; 42:9-43:7; 44:1) ഇന്ന്‌, ആധുനി​ക​കാല ‘ഈജി​പ്‌തി’ന്റെ പ്രദേ​ശത്ത്‌ ബൈബിൾ സത്യമാ​കുന്ന “നിർമല ഭാഷ” സംസാ​രി​ക്കാൻ പഠിച്ചി​ട്ടു​ള്ളവർ ഉണ്ട്‌. (സെഫന്യാ​വു 3:9, NW) അഞ്ചു പ്രതീ​കാ​ത്മക നഗരങ്ങ​ളിൽ ഒന്നിനെ വിളി​ച്ചി​രി​ക്കു​ന്നത്‌ “ശൂന്യ​മാ​ക്ക​ലി​ന്റെ നഗരം” എന്നാണ്‌. അതിന്റെ അർഥം, സാത്താന്റെ സംഘട​നയെ തുറന്നു​കാ​ട്ടു​ക​യും ‘ശൂന്യ​മാ​ക്കു​ക​യും’ ചെയ്യു​ന്നത്‌ “നിർമല ഭാഷ”യിൽ ഉൾപ്പെ​ടു​ന്നു എന്നാണ്‌.

32. (എ) ഈജി​പ്‌ത്‌ ദേശത്തി​ന്റെ മധ്യത്തി​ലുള്ള ‘യാഗപീ​ഠം’ എന്താണ്‌? (ബി) അഭിഷി​ക്തർ ഒരു ‘തൂൺ’ പോലെ ഈജി​പ്‌തി​ന്റെ അതിർത്തി​യിൽ ആയിരി​ക്കു​ന്നത്‌ എങ്ങനെ?

³² യഹോവയുടെ ജനത്തിന്റെ സാക്ഷീ​കരണ പ്രവർത്ത​ന​ത്തി​ന്റെ ഫലമായി, അവന്റെ മഹാനാ​മം ആളുകൾ അറിയാൻ ഇടയാ​കും. “അന്നാളിൽ മിസ്ര​യീം​ദേ​ശ​ത്തി​ന്റെ നടുവിൽ യഹോ​വെക്കു ഒരു യാഗപീ​ഠ​വും അതിന്റെ അതൃത്തി​യിൽ യഹോ​വെക്കു ഒരു തൂണും ഉണ്ടായി​രി​ക്കും.” (യെശയ്യാ​വു 19:19) ദൈവ​വു​മാ​യി ഉടമ്പടി ബന്ധത്തിൽ ആയിരി​ക്കുന്ന അഭിഷിക്ത ക്രിസ്‌ത്യാ​നി​ക​ളു​ടെ സ്ഥാനത്തെ കുറി​ച്ചാണ്‌ ഈ വാക്കുകൾ പറയു​ന്നത്‌. (സങ്കീർത്തനം 50:5) അവർ ‘ഒരു യാഗപീ​ഠം’ എന്ന നിലയിൽ തങ്ങളുടെ യാഗങ്ങൾ അർപ്പി​ക്കു​ക​യാണ്‌; ‘സത്യത്തി​ന്റെ തൂണും അടിസ്ഥാ​ന​വും’ എന്ന നിലയിൽ അവർ യഹോ​വ​യ്‌ക്കു സാക്ഷ്യം വഹിക്കു​ക​യാണ്‌. (1 തിമൊ​ഥെ​യൊസ്‌ 3:15; റോമർ 12:1; എബ്രായർ 13:15, 16) തങ്ങളുടെ സഹകാ​രി​ക​ളായ ‘വേറെ ആടുക’ളോ​ടൊ​പ്പം അവർ “ദേശത്തി​ന്റെ നടുവിൽ,” അതായത്‌ 230-ലധികം രാജ്യ​ങ്ങ​ളി​ലും ദ്വീപു​ക​ളി​ലും, നിൽക്കു​ന്ന​താ​യി കാണ​പ്പെ​ടു​ന്നു. എന്നാൽ, അവർ ഈ “ലോക​ത്തി​ന്റെ ഭാഗമല്ല.” (യോഹ​ന്നാൻ 10:16; 17:15, 16, NW) പ്രതീ​കാ​ത്മ​ക​മാ​യി പറഞ്ഞാൽ, ഈ അഭിഷി​ക്തർ തങ്ങളുടെ സ്വർഗീയ പ്രതി​ഫലം പ്രാപി​ക്കാൻ ഈ ലോക​ത്തി​നും ദൈവ​രാ​ജ്യ​ത്തി​നും ഇടയ്‌ക്കുള്ള അതിർത്തി​യിൽ ഒരുങ്ങി​നിൽക്കു​ക​യാണ്‌.

33. അഭിഷി​ക്തർ ഏതു വിധങ്ങ​ളി​ലാണ്‌ ‘ഈജി​പ്‌തിൽ’ “ഒരു അടയാ​ള​വും ഒരു സാക്ഷ്യ​വും” ആയിരി​ക്കു​ന്നത്‌?

³³ യെശയ്യാവ്‌ തുടരു​ന്നു: “അതു മിസ്ര​യീം​ദേ​ശത്തു [ഈജി​പ്‌തിൽ] സൈന്യ​ങ്ങ​ളു​ടെ യഹോ​വെക്കു ഒരു അടയാ​ള​വും ഒരു സാക്ഷ്യ​വും ആയിരി​ക്കും; പീഡക​ന്മാർ നിമിത്തം അവർ യഹോ​വ​യോ​ടു നിലവി​ളി​ക്കും; അവൻ അവർക്കു ഒരു രക്ഷകനെ അയക്കും; അവൻ പൊരു​തു അവരെ വിടു​വി​ക്കും.” (യെശയ്യാ​വു 19:20) “ഒരു അടയാ​ള​വും ഒരു സാക്ഷ്യ​വും” എന്ന നിലയിൽ അഭിഷി​ക്തർ പ്രസം​ഗ​വേ​ല​യിൽ നേതൃ​ത്വ​മെ​ടു​ക്കു​ക​യും ഈ വ്യവസ്ഥി​തി​യിൽ യഹോ​വ​യു​ടെ നാമം മഹത്ത്വ​പ്പെ​ടു​ത്തു​ക​യും ചെയ്യുന്നു. (യെശയ്യാ​വു 8:18; എബ്രായർ 2:13) ലോക​ത്തി​ലു​ട​നീ​ളം മർദി​ത​രു​ടെ നിലവി​ളി ഉയർന്നു കേൾക്കാം. എന്നാൽ, മനുഷ്യ ഗവൺമെ​ന്റു​കൾക്ക്‌ അവരെ സഹായി​ക്കാൻ കഴിയു​ന്നില്ല. എന്നിരു​ന്നാ​ലും സൗമ്യ​രായ സകല​രെ​യും വിടു​വി​ക്കാൻ യഹോവ ഒരു മഹാ രക്ഷകനെ, രാജാ​വായ യേശു​ക്രി​സ്‌തു​വി​നെ അയയ്‌ക്കും. ഈ അന്ത്യനാ​ളു​കൾ അർമ​ഗെ​ദോൻ യുദ്ധത്തിൽ അവയുടെ പാരമ്യ​ത്തിൽ എത്തു​മ്പോൾ, ദൈവ​ഭയം ഉള്ളവർക്ക്‌ അവൻ സമാശ്വാ​സ​വും നിത്യാ​നു​ഗ്ര​ഹ​ങ്ങ​ളും കൈവ​രു​ത്തും.—സങ്കീർത്തനം 72:2, 4, 7, 12-14.

34. (എ) “മിസ്ര​യീ​മ്യർ” എങ്ങനെ യഹോ​വയെ അറിയാൻ ഇടയാ​കും, അവർ അവന്‌ എന്തു യാഗവും വഴിപാ​ടും കഴിക്കും? (ബി) യഹോവ എപ്പോൾ ‘മിസ്ര​യീ​മി​നെ’ അടിക്കും, തുടർന്ന്‌ എന്തു സൗഖ്യ​മാ​ക്കൽ നടക്കും?

³⁴ എല്ലാ തരത്തി​ലും പെട്ട ആളുകൾ സൂക്ഷ്‌മ പരിജ്ഞാ​നം നേടു​ക​യും രക്ഷ പ്രാപി​ക്കു​ക​യും ചെയ്യുക എന്നത്‌ ദൈവ​ഹി​ത​മാണ്‌. (1 തിമൊ​ഥെ​യൊസ്‌ 2:4) അതു​കൊണ്ട്‌, യെശയ്യാവ്‌ ഇപ്രകാ​രം എഴുതു​ന്നു: “അങ്ങനെ യഹോവ മിസ്ര​യീ​മി​ന്നു തന്നെ വെളി​പ്പെ​ടു​ത്തു​ക​യും മിസ്ര​യീ​മ്യർ അന്നു യഹോ​വയെ അറിഞ്ഞു യാഗവും വഴിപാ​ടും കഴിക്ക​യും യഹോ​വെക്കു ഒരു നേർച്ച നേർന്നു അതിനെ നിവർത്തി​ക്ക​യും ചെയ്യും. യഹോവ മിസ്ര​യീ​മി​നെ അടിക്കും; അടിച്ചി​ട്ടു അവൻ വീണ്ടും അവരെ സൌഖ്യ​മാ​ക്കും; അവർ യഹോ​വ​യി​ങ്ക​ലേക്കു തിരി​ക​യും അവൻ അവരുടെ പ്രാർത്ഥന കേട്ടു അവരെ സൌഖ്യ​മാ​ക്കു​ക​യും ചെയ്യും.” (യെശയ്യാ​വു 19:21, 22) “മിസ്ര​യീ​മ്യർ,” സാത്താന്റെ ലോക​ത്തി​ലെ സകല ജനതക​ളി​ലും നിന്നുള്ള ആളുകൾ, യഹോ​വയെ അറിയു​ക​യും “അവന്റെ നാമത്തെ ഏററു പറയുന്ന അധരഫലം” എന്ന യാഗം അവന്‌ അർപ്പി​ക്കു​ക​യും ചെയ്യും. (എബ്രായർ 13:15) യഹോ​വ​യ്‌ക്കു തങ്ങളെ​ത്തന്നെ സമർപ്പി​ച്ചു​കൊണ്ട്‌ അവർ ഒരു നേർച്ച നേരു​ക​യും വിശ്വസ്‌ത സേവന​ത്തി​ന്റേ​തായ ഒരു ജീവി​ത​ഗതി പിൻപ​റ്റി​ക്കൊണ്ട്‌ അതു നിറ​വേ​റ്റു​ക​യും ചെയ്യുന്നു. അർമ​ഗെ​ദോൻ യുദ്ധത്തിൽ ഈ വ്യവസ്ഥി​തി​യെ ‘അടിച്ച’ശേഷം മനുഷ്യ​വർഗത്തെ സൗഖ്യ​മാ​ക്കാൻ യഹോവ തന്റെ രാജ്യത്തെ ഉപയോ​ഗി​ക്കും. യേശു​വി​ന്റെ സഹസ്രാബ്‌ദ വാഴ്‌ച​ക്കാ​ലത്ത്‌ മനുഷ്യ​വർഗം ആത്മീയ​വും മാനസി​ക​വും ധാർമി​ക​വും ശാരീ​രി​ക​വു​മായ പൂർണത കൈവ​രി​ക്കും. അതേ, അവർ എല്ലാ അർഥത്തി​ലും സൗഖ്യം പ്രാപി​ച്ചി​രി​ക്കും!—വെളി​പ്പാ​ടു 22:1, 2.

‘എന്റെ ജനം അനു​ഗ്ര​ഹി​ക്ക​പ്പെ​ടു​മാ​റാ​കട്ടെ’

35, 36. യെശയ്യാ​വു 19:23-25-ന്റെ നിവൃത്തി എന്ന നിലയിൽ, പുരാതന നാളു​ക​ളിൽ ഈജി​പ്‌തും അസീറി​യ​യും ഇസ്രാ​യേ​ലും തമ്മിൽ എങ്ങനെ​യുള്ള ബന്ധങ്ങൾ നിലവിൽ വന്നു?

³⁵ തുടർന്ന്‌ പ്രവാ​ചകൻ ശ്രദ്ധേ​യ​മായ ഒരു സംഭവ​വി​കാ​സം മുൻകൂ​ട്ടി കാണുന്നു: “അന്നാളിൽ മിസ്ര​യീ​മിൽനി​ന്നു അശ്ശൂരി​ലേക്കു ഒരു പെരു​വഴി ഉണ്ടാകും; അശ്ശൂര്യർ മിസ്ര​യീ​മി​ലേ​ക്കും മിസ്ര​യീ​മ്യർ അശ്ശൂരി​ലേ​ക്കും ചെല്ലും; മിസ്ര​യീ​മ്യർ അശ്ശൂര്യ​രോ​ടു​കൂ​ടെ ആരാധന കഴിക്കും. അന്നാളിൽ യിസ്രാ​യേൽ ഭൂമി​യു​ടെ മദ്ധ്യേ ഒരു അനു​ഗ്ര​ഹ​മാ​യി മിസ്ര​യീ​മി​നോ​ടും അശ്ശൂരി​നോ​ടും​കൂ​ടെ മൂന്നാ​മ​താ​യി​രി​ക്കും. സൈന്യ​ങ്ങ​ളു​ടെ യഹോവ അവരെ അനു​ഗ്ര​ഹി​ച്ചു; എന്റെ ജനമായ മിസ്ര​യീ​മും എന്റെ കൈക​ളു​ടെ പ്രവൃ​ത്തി​യായ അശ്ശൂരും എന്റെ അവകാ​ശ​മായ യിസ്രാ​യേ​ലും അനു​ഗ്ര​ഹി​ക്ക​പ്പെ​ടു​മാ​റാ​കട്ടെ എന്നു അരുളി​ച്ചെ​യ്യും.” (യെശയ്യാ​വു 19:23-25) അതേ, ഒരിക്കൽ മിസ്ര​യീ​മും അസീറി​യ​യും തമ്മിൽ സൗഹൃ​ദ​ബന്ധം നിലവിൽ വരും. എങ്ങനെ?

³⁶ കഴിഞ്ഞ കാലങ്ങ​ളിൽ യഹോവ മറ്റു ജനതക​ളിൽനി​ന്നു തന്റെ ജനത്തെ രക്ഷിച്ച​പ്പോൾ, ആലങ്കാ​രി​ക​മാ​യി പറഞ്ഞാൽ അവൻ അവർക്കു വേണ്ടി സ്വാത​ന്ത്ര്യ​ത്തി​ലേ​ക്കുള്ള പെരു​വ​ഴി​കൾ പണിതു. (യെശയ്യാ​വു 11:16; 35:8-10; 49:11-13; യിരെ​മ്യാ​വു 31:21) ബാബി​ലോൺ പരാജ​യ​പ്പെ​ട്ട​ശേഷം അവി​ടെ​നി​ന്നും അതു​പോ​ലെ അസീറിയ, ഈജി​പ്‌ത്‌ തുടങ്ങിയ ഇടങ്ങളിൽനി​ന്നും പ്രവാ​സി​കൾ വാഗ്‌ദത്ത ദേശ​ത്തേക്കു തിരികെ വന്നപ്പോൾ ആ പ്രവച​ന​ത്തിന്‌ ഒരു ചെറിയ നിവൃത്തി ഉണ്ടായി. (യെശയ്യാ​വു 11:11) ആധുനിക നാളിലെ കാര്യ​മെ​ടു​ത്താ​ലോ?

37. ‘അശ്ശൂരി​നും മിസ്ര​യീ​മി​നും’ ഇടയിൽ ഒരു പെരു​വഴി ഉണ്ടായി​രു​ന്നാ​ലെ​ന്നതു പോലെ ദശലക്ഷങ്ങൾ ഇന്നു ജീവി​ക്കു​ന്നത്‌ എങ്ങനെ?

³⁷ ഇന്ന്‌ ആത്മാഭി​ഷിക്ത ഇസ്രാ​യേ​ല്യ​രു​ടെ ശേഷിപ്പ്‌ “ഭൂമി​യു​ടെ മദ്ധ്യേ ഒരു അനുഗ്രഹ”മാണ്‌. അവർ സത്യാ​രാ​ധന ഉന്നമി​പ്പി​ക്കു​ക​യും ലോക​ത്തി​ലെ സകല രാഷ്‌ട്ര​ങ്ങ​ളി​ലെ​യും ആളുക​ളോ​ടു രാജ്യ​സ​ന്ദേശം ഘോഷി​ക്കു​ക​യും ചെയ്യുന്നു. അവയിൽ ചില രാഷ്‌ട്രങ്ങൾ അസീറി​യയെ പോലെ വളരെ സ്വേച്ഛാ​ധി​പത്യ സ്വഭാ​വ​മു​ള്ള​വ​യാണ്‌. മറ്റു ചില രാഷ്‌ട്ര​ങ്ങ​ളാ​കട്ടെ, ദാനീ​യേൽ പ്രവചനം വ്യക്തമാ​ക്കുന്ന പ്രകാരം ഒരിക്കൽ ‘തെക്കേ​ദേ​ശത്തെ രാജാവ്‌’ ആയിരുന്ന ഈജി​പ്‌തി​നെ പോലെ കൂടുതൽ സ്വാത​ന്ത്ര്യം അനുവ​ദി​ക്കു​ന്ന​വ​യാണ്‌. (ദാനീ​യേൽ 11:5, 8) സ്വേച്ഛാ​ധി​പത്യ സ്വഭാ​വ​മുള്ള രാഷ്‌ട്ര​ങ്ങ​ളി​ലെ​യും കൂടുതൽ സ്വാത​ന്ത്ര്യം അനുവ​ദി​ക്കുന്ന രാഷ്‌ട്ര​ങ്ങ​ളി​ലെ​യും ദശലക്ഷ​ക്ക​ണ​ക്കിന്‌ ആളുകൾ സത്യാ​രാ​ധന സ്വീക​രി​ച്ചി​ട്ടുണ്ട്‌. അങ്ങനെ, സകല ജനതക​ളി​ലും നിന്നു​ള്ളവർ ‘ആരാധന കഴിക്കു​ന്ന​തിൽ’ ഏകീകൃ​തർ ആയിത്തീർന്നി​രി​ക്കു​ന്നു. അവരുടെ ഇടയിൽ ദേശീ​യ​ത്വ​പ​ര​മായ ഭിന്നതകൾ ഇല്ല, അവർ അന്യോ​ന്യം സ്‌നേ​ഹി​ക്കു​ന്നു. അതു​കൊണ്ട്‌ ‘അശ്ശൂര്യർ മിസ്ര​യീ​മി​ലേ​ക്കും മിസ്ര​യീ​മ്യർ അശ്ശൂരി​ലേ​ക്കും ചെല്ലുന്നു’ എന്നു വാസ്‌ത​വ​മാ​യി പറയാൻ കഴിയും. ഒരിട​ത്തു​നിന്ന്‌ മറ്റൊ​രി​ട​ത്തേക്ക്‌ ഒരു പെരു​വഴി ഉള്ളതു​പോ​ലെ​യാണ്‌ അത്‌.—1 പത്രൊസ്‌ 2:17.

38. (എ) ഇസ്രാ​യേൽ “മിസ്ര​യീ​മി​നോ​ടും അശ്ശൂരി​നോ​ടും​കൂ​ടെ മൂന്നാ​മ​താ​യി​രി​ക്കു”ന്നത്‌ എങ്ങനെ? (ബി) ‘എന്റെ ജനം അനു​ഗ്ര​ഹി​ക്ക​പ്പെ​ടു​മാ​റാ​കട്ടെ’ എന്ന്‌ യഹോവ പറയു​ന്നത്‌ എന്തു​കൊണ്ട്‌?

³⁸ ഇസ്രായേൽ “മിസ്ര​യീ​മി​നോ​ടും അശ്ശൂരി​നോ​ടും​കൂ​ടെ മൂന്നാ​മ​താ​യി​രി​ക്കു”ന്നത്‌ എങ്ങനെ​യാണ്‌? “അന്ത്യകാല”ത്തിന്റെ ആരംഭ​ഘ​ട്ട​ത്തിൽ ഭൂമി​യിൽ യഹോ​വയെ സേവി​ച്ചി​രുന്ന മിക്കവ​രും ‘ദൈവ​ത്തി​ന്റെ ഇസ്രാ​യേലി’ലെ അംഗങ്ങൾ ആയിരു​ന്നു. (ദാനീ​യേൽ 12:9; ഗലാത്യർ 6:16) 1930-കൾ മുതൽ, ഭൗമിക പ്രത്യാ​ശ​യുള്ള “വേറെ ആടുക”ളുടെ ഒരു മഹാപു​രു​ഷാ​രം രംഗ​പ്ര​വേശം ചെയ്‌തി​രി​ക്കു​ന്നു. (യോഹ​ന്നാൻ 10:16എ; വെളി​പ്പാ​ടു 7:9) ഈജി​പ്‌തും അസീറി​യ​യും മുൻനി​ഴ​ലാ​ക്കിയ ജനതക​ളിൽനി​ന്നു വരുന്ന അവർ യഹോ​വ​യു​ടെ ആരാധ​നാ​ല​യ​ത്തി​ലേക്കു പ്രവഹി​ക്കു​ക​യും തങ്ങളോ​ടു ചേരാൻ മറ്റുള്ള​വരെ ക്ഷണിക്കു​ക​യും ചെയ്യുന്നു. (യെശയ്യാ​വു 2:2-4) തങ്ങളുടെ അഭിഷിക്ത സഹോ​ദ​ര​ന്മാ​രെ പോ​ലെ​തന്നെ അവരും പ്രസം​ഗ​പ്ര​വർത്ത​ന​ത്തിൽ ഏർപ്പെ​ടു​ക​യും സമാന​മായ പരി​ശോ​ധ​നകൾ സഹിച്ചു​നിൽക്കു​ക​യും വിശ്വ​സ്‌ത​ത​യും നിർമ​ല​ത​യും പ്രകട​മാ​ക്കു​ക​യും ഒരേ ആത്മീയ മേശയി​ങ്കൽനി​ന്നു ഭക്ഷിക്കു​ക​യും ചെയ്യുന്നു. തീർച്ച​യാ​യും, അഭിഷി​ക്ത​രു​ടെ​യും ‘വേറെ ആടുകളു’ടെയും കാര്യ​ത്തിൽ “ഒരാട്ടിൻകൂ​ട്ട​വും ഒരിട​യ​നും” എന്ന വാക്കുകൾ സത്യമാണ്‌. (യോഹ​ന്നാൻ 10:16ബി) അവർ പ്രകട​മാ​ക്കുന്ന തീക്ഷ്‌ണ​ത​യും സഹിഷ്‌ണു​ത​യും കണക്കി​ലെ​ടു​ക്കു​മ്പോൾ, അവരുടെ പ്രവർത്തനം യഹോ​വയെ പ്രസാ​ദി​പ്പി​ക്കു​ന്നു​വോ എന്ന കാര്യ​ത്തിൽ ആർക്കെ​ങ്കി​ലും സംശയി​ക്കാൻ കാരണ​മു​ണ്ടോ? ‘എന്റെ ജനം അനു​ഗ്ര​ഹി​ക്ക​പ്പെ​ടു​മാ​റാ​കട്ടെ’ എന്ന്‌ അവൻ അവരെ ആശീർവ​ദി​ക്കു​ന്ന​തിൽ തെല്ലും അതിശ​യി​ക്കാ​നില്ല!

[അടിക്കു​റിപ്പ്‌]

[191-ാം പേജിലെ ചിത്രം]

ഫെലിസ്‌ത്യ യോദ്ധാ​ക്കൾ ശത്രു​ക്കളെ തുരത്തു​ന്നു (പൊ.യു.മു. 12-ാം നൂറ്റാ​ണ്ടി​ലെ ഈജി​പ്‌ഷ്യൻ ശിൽപ്പ​വേല)

[192-ാം പേജിലെ ചിത്രം]

ഒരു മോവാ​ബ്യ യോദ്ധാ​വി​ന്റെ അഥവാ ദേവന്റെ ശിലാ​ശിൽപ്പം (പൊ.യു.മു. 11-ാം നൂറ്റാ​ണ്ടി​നും പൊ.യു.മു. 8-ാം നൂറ്റാ​ണ്ടി​നും ഇടയ്‌ക്ക്‌)

[196-ാം പേജിലെ ചിത്രം]

ഒരു സിറിയൻ യോദ്ധാവ്‌ കുതി​ര​പ്പു​റത്തു സവാരി ചെയ്യുന്നു (പൊ.യു.മു. 9-ാം നൂറ്റാണ്ട്‌)

[198-ാം പേജിലെ ചിത്രം]

മത്സരികളായ മനുഷ്യ​സ​മൂ​ഹ​മാ​കുന്ന “കടൽ” അതൃപ്‌തി​യും വിപ്ലവ​വും നുരച്ചു​ത​ള്ളു​ന്നു

[203-ാം പേജിലെ ചിത്രം]

ഈജിപ്‌തിലെ പുരോ​ഹി​ത​ന്മാർക്ക്‌ യഹോ​വ​യു​ടെ ശക്തി​യോ​ടു കിടപി​ടി​ക്കാ​നാ​യില്ല