പുതിയ ഉടമ്പടി​യി​ലൂ​ടെ മഹത്തര​മായ അനു​ഗ്ര​ഹ​ങ്ങൾ

“യേശു . . . ആനുപാ​തി​ക​മാ​യി മെച്ചപ്പെട്ട ഒരു ഉടമ്പടി​യു​ടെ മധ്യസ്ഥ​നു​മാണ്‌.”—എബ്രായർ 8:6, NW.

1. ഏദെനിൽ വാഗ്‌ദാ​നം​ചെ​യ്യ​പ്പെട്ട ‘സ്‌ത്രീ​യു​ടെ സന്തതി’ ആരെന്നു തെളി​ഞ്ഞി​രി​ക്കു​ന്നു, അവന്റെ ‘കുതി​കാൽ തകർക്ക’പ്പെട്ട​തെ​ങ്ങനെ?

ആദാമും ഹവ്വായും പാപം ചെയ്‌ത​തി​നു​ശേഷം, ഹവ്വായെ വഞ്ചിച്ച സാത്താ​നു​മേൽ യഹോവ ഇങ്ങനെ പറഞ്ഞു​കൊണ്ട്‌ ന്യായ​വി​ധി പ്രഖ്യാ​പി​ച്ചു: “ഞാൻ നിനക്കും സ്‌ത്രീ​ക്കും നിന്റെ സന്തതി​ക്കും അവളുടെ സന്തതി​ക്കും തമ്മിൽ ശത്രു​ത്വം ഉണ്ടാക്കും. അവൻ നിന്റെ തല തകർക്കും; നീ അവന്റെ കുതി​കാൽ തകർക്കും.” (ഉല്‌പത്തി 3:15) ഏദെനിൽ വാഗ്‌ദാ​നം​ചെ​യ്യ​പ്പെട്ട സന്തതി അവസാനം പൊ.യു. 29-ൽ പ്രത്യ​ക്ഷ​പ്പെട്ടു. അത്‌ യേശു യോർദാൻ നദിയിൽ സ്‌നാ​പ​ന​മേ​റ്റ​പ്പോ​ഴാ​യി​രു​ന്നു. പൊ.യു. 33-ൽ അവൻ ദണ്ഡനസ്‌തം​ഭ​ത്തിൽ മരിച്ച​പ്പോൾ ആ പുരാതന പ്രവച​ന​ത്തി​ന്റെ ഒരു ഭാഗം നിവൃ​ത്തി​യേറി. സാത്താൻ സന്തതി​യു​ടെ ‘കുതി​കാൽ തകർത്തു.’

2. യേശു​വി​ന്റെ​തന്നെ വാക്കു​കൾപ്ര​കാ​രം, അവന്റെ മരണം മനുഷ്യ​വർഗ​ത്തിന്‌ എങ്ങനെ പ്രയോ​ജ​നം​ചെ​യ്യും?

² കഠോര വേദന​യു​ണ്ടാ​ക്കു​ന്ന​താ​യി​രു​ന്നെ​ങ്കി​ലും അതൊരു സ്ഥിരമായ മുറി​വ​ല്ലാ​യി​രു​ന്നു​വെ​ന്നത്‌ സന്തോ​ഷ​ക​രം​തന്നെ. യേശു മരിച്ച​വ​രിൽനിന്ന്‌ ഒരു അമർത്ത്യ ആത്മാവാ​യി ഉയിർപ്പി​ക്ക​പ്പെ​ടു​ക​യും സ്വർഗ​ത്തി​ലെ തന്റെ പിതാ​വി​ന്റെ അടുക്ക​ലേക്ക്‌ ആരോ​ഹണം ചെയ്യു​ക​യും ചെയ്‌തു. അവിടെ അവൻ തന്റെ ചൊരി​യ​പ്പെട്ട രക്തത്തിന്റെ മൂല്യം ‘അനേകർക്കു​വേ​ണ്ടി​യുള്ള മറുവി​ല​യാ​യി’ കൊടു​ത്തു. അങ്ങനെ അവന്റെ​തന്നെ വാക്കുകൾ സത്യമാ​യി ഭവിച്ചു: ‘മനുഷ്യ​പു​ത്രനെ ഉയർത്തേ​ണ്ട​താ​കു​ന്നു. അവനിൽ വിശ്വ​സി​ക്കുന്ന ഏവനും നിത്യ​ജീ​വൻ പ്രാപി​ക്കേ​ണ്ട​തി​ന്നു തന്നേ. തന്റെ ഏകജാ​ത​നായ പുത്ര​നിൽ വിശ്വ​സി​ക്കുന്ന ഏവനും നശിച്ചു​പോ​കാ​തെ നിത്യ​ജീ​വൻ പ്രാപി​ക്കേ​ണ്ട​തി​ന്നു ദൈവം അവനെ നല്‌കു​വാൻ തക്കവണ്ണം ലോകത്തെ സ്‌നേ​ഹി​ച്ചു.’ (മത്തായി 20:28; യോഹ​ന്നാൻ 3:14-16; എബ്രായർ 9:12-14) പുതിയ ഉടമ്പടിക്ക്‌ യേശു​വി​ന്റെ പ്രവച​ന​ത്തി​ന്റെ നിവൃ​ത്തി​യിൽ ഒരു മുഖ്യ​മായ പങ്കുണ്ട്‌.

പുതിയ ഉടമ്പടി

3. പുതിയ ഉടമ്പടി പ്രവർത്ത​ന​ത്തിൽ വന്നതായി ആദ്യം കാണ​പ്പെ​ട്ട​തെ​പ്പോൾ?

³ തന്റെ ചൊരി​യ​പ്പെട്ട രക്തം “[പുതിയ] ഉടമ്പടി​യു​ടെ രക്ത”മാണെന്ന്‌ യേശു തന്റെ മരണത്തിന്‌ അല്‌പം​മുമ്പ്‌ തന്റെ അനുഗാ​മി​ക​ളോ​ടു പറഞ്ഞു. (മത്തായി 26:28; ലൂക്കൊസ്‌ 22:20, പി.ഒ.സി. ബൈ.) സ്വർഗാ​രോ​ഹണം കഴിഞ്ഞ്‌ 10-ാം ദിവസം, യെരൂ​ശ​ലേ​മി​ലെ ഒരു മാളി​ക​മു​റി​യിൽ കൂടി​യി​രുന്ന ഏതാണ്ട്‌ 120 ശിഷ്യ​ന്മാ​രു​ടെ​മേൽ പരിശു​ദ്ധാ​ത്മാവ്‌ പകര​പ്പെ​ട്ട​പ്പോൾ പുതിയ ഉടമ്പടി പ്രവർത്ത​ന​ത്തിൽവ​ന്നത്‌ കാണ​പ്പെട്ടു. (പ്രവൃ​ത്തി​കൾ 1:15; 2:1-4) ഈ 120 ശിഷ്യ​ന്മാ​രെ പുതിയ ഉടമ്പടി​യി​ലേക്കു വരുത്തി​യത്‌ ന്യായ​പ്ര​മാണ ഉടമ്പടി​യെന്ന ‘ആദ്യത്തെ’ ഉടമ്പടി പഴയതാ​യെന്നു സൂചി​പ്പി​ച്ചു.—എബ്രായർ 8:13.

4. പഴയ ഉടമ്പടി ഒരു പരാജ​യ​മാ​യി​രു​ന്നോ? വിശദീ​ക​രി​ക്കുക.

⁴ പഴയ ഉടമ്പടി ഒരു പരാജ​യ​മാ​യി​രു​ന്നോ? തീർച്ച​യാ​യും അല്ല. അതിന്റെ സ്ഥാനത്ത്‌ ഇപ്പോൾ മറ്റൊന്നു വന്നിരി​ക്കു​ന്ന​തി​നാൽ സ്വാഭാ​വിക ഇസ്രാ​യേൽ മേലാൽ ദൈവ​ത്തി​ന്റെ പ്രത്യേക ജനമ​ല്ലെ​ന്നത്‌ സത്യം​തന്നെ. (മത്തായി 23:38) ഇസ്രാ​യേൽ അനുസ​ര​ണ​ക്കേടു കാണി​ക്കു​ക​യും യഹോ​വ​യു​ടെ അഭിഷി​ക്തനെ തള്ളിക്ക​ള​യു​ക​യും ചെയ്‌ത​താണ്‌ അതിനു കാരണം. (പുറപ്പാ​ടു 19:5; പ്രവൃ​ത്തി​കൾ 2:22, 23) എന്നിരു​ന്നാ​ലും, ന്യായ​പ്ര​മാ​ണ​ത്തി​ന്റെ സ്ഥാനത്ത്‌ മറ്റൊന്നു വന്നെങ്കി​ലും, പ്രാബ​ല്യ​ത്തി​ലാ​യി​രുന്ന സമയത്ത്‌ അത്‌ ഏറെ കാര്യങ്ങൾ നിർവ​ഹി​ക്കു​ക​യു​ണ്ടാ​യി. നൂറ്റാ​ണ്ടു​ക​ളോ​ളം ദൈവത്തെ സമീപി​ക്കു​ന്ന​തി​നുള്ള മാർഗ​വും വ്യാജ​മ​ത​ത്തിൽനി​ന്നുള്ള സംരക്ഷ​ണ​വും അതു പ്രദാനം ചെയ്‌തു. അതിൽ പുതിയ ഉടമ്പടി​യു​ടെ പൂർവ ദർശനങ്ങൾ ഉൾക്കൊ​ണ്ടി​രു​ന്നു. അതിന്റെ ആവർത്തി​ച്ചുള്ള ബലിക​ളാ​ണെ​ങ്കി​ലോ മനുഷ്യ​നു പാപത്തിൽനി​ന്നും മരണത്തിൽനി​ന്നു​മുള്ള വിടുതൽ എത്രകണ്ട്‌ ആവശ്യ​മാ​ണെന്നു പ്രകട​മാ​ക്കി. നിശ്ചയ​മാ​യും, ന്യായ​പ്ര​മാ​ണം ‘ക്രിസ്‌തു​വി​ന്റെ അടുക്ക​ലേക്കു നമ്മെ നടത്തുന്ന ശിശു​പാ​ലക’നായി​രു​ന്നു. (ഗലാത്യർ 3:19, 24; റോമർ 3:20; 4:15; 5:12; എബ്രായർ 10:1, 2) എന്നിരു​ന്നാ​ലും, അബ്രാ​ഹാ​മി​നു വാഗ്‌ദാ​നം ചെയ്യപ്പെട്ട അനു​ഗ്രഹം പുതിയ ഉടമ്പടി​യി​ലൂ​ടെ​മാ​ത്രമേ പൂർണ​മാ​യി സാക്ഷാ​ത്‌ക്ക​രി​ക്ക​പ്പെ​ടു​മാ​യി​രു​ന്നു​ള്ളൂ.

അബ്രാ​ഹാ​മി​ന്റെ സന്തതി​മു​ഖാ​ന്തരം ജാതികൾ അനു​ഗ്ര​ഹി​ക്ക​പ്പെ​ടു​ന്നു

5, 6. അബ്രാ​ഹാ​മ്യ ഉടമ്പടി​യു​ടെ അടിസ്ഥാന, ആത്മീയ നിവൃ​ത്തി​യിൽ, അബ്രാ​ഹാ​മി​ന്റെ സന്തതി ആരാണ്‌, അവനി​ലൂ​ടെ അനു​ഗ്രഹം ലഭിച്ച ആദ്യത്തെ ജനത ഏത്‌?

⁵ യഹോവ അബ്രാ​ഹാ​മി​നോ​ടു വാഗ്‌ദാ​നം ചെയ്‌തു: “നിന്റെ സന്തതി മുഖാ​ന്തരം ഭൂമി​യി​ലുള്ള സകലജാ​തി​ക​ളും അനു​ഗ്ര​ഹി​ക്ക​പ്പെ​ടും.” (ഉല്‌പത്തി 22:18) പഴയ ഉടമ്പടി​ക്കു കീഴിൽ, സൗമ്യ​രായ അനേകം പരദേ​ശി​കൾ അബ്രാ​ഹാ​മി​ന്റെ ദേശീയ സന്തതി​യായ ഇസ്രാ​യേ​ലു​മാ​യുള്ള സഹവാ​സ​ത്തി​ലൂ​ടെ അനു​ഗ്ര​ഹി​ക്ക​പ്പെട്ടു. എന്നിരു​ന്നാ​ലും അതിന്റെ അടിസ്ഥാന ആത്മീയ നിവൃ​ത്തി​യിൽ അബ്രാ​ഹാ​മി​ന്റെ സന്തതി ഒരു പൂർണ മനുഷ്യ​നാ​യി​രു​ന്നു. ഇങ്ങനെ പറഞ്ഞു​കൊണ്ട്‌ പൗലൊസ്‌ അതു വിശദീ​ക​രി​ച്ചു: “അബ്രാ​ഹാ​മി​ന്നും അവന്റെ സന്തതി​കൾക്കും വാഗ്‌ദ​ത്തങ്ങൾ ലഭിച്ചു; സന്തതി​കൾക്കും എന്നു അനേക​രെ​ക്കു​റി​ച്ചല്ല, നിന്റെ സന്തതി​ക്കും എന്നു ഏകനെ​ക്കു​റി​ച്ച​ത്രേ പറയു​ന്നതു; അതു ക്രിസ്‌തു തന്നേ.”—ഗലാത്യർ 3:16.

⁶ അതേ, യേശു​വാണ്‌ അബ്രാ​ഹാ​മി​ന്റെ സന്തതി. സ്വാഭാ​വിക ഇസ്രാ​യേ​ലി​നു സാധ്യ​മാ​യി​രു​ന്ന​തി​നെ​ക്കാൾ വളരെ ശ്രേഷ്‌ഠ​മായ ഒരനു​ഗ്രഹം അവനി​ലൂ​ടെ ജനതകൾക്കു ലഭിക്കു​ന്നു. നിശ്ചയ​മാ​യും, ഈ അനു​ഗ്രഹം ലഭിക്കുന്ന ആദ്യത്തെ ജനത ഇസ്രാ​യേൽതന്നെ ആയിരി​ക്കു​മാ​യി​രു​ന്നു. പൊ.യു. 33-ലെ പെന്ത​ക്കോ​സ്‌തി​നു​ശേഷം ഉടനെ പത്രൊസ്‌ അപ്പോ​സ്‌തലൻ ഒരു കൂട്ടം യഹൂദ​ന്മാ​രോ​ടു പറഞ്ഞു: ‘“ഭൂമി​യി​ലെ സകലവം​ശ​ങ്ങ​ളും നിന്റെ സന്തതി​യിൽ അനു​ഗ്ര​ഹി​ക്ക​പ്പെ​ടും” എന്നു ദൈവം അബ്രാ​ഹാ​മി​നോ​ടു അരുളി നിങ്ങളു​ടെ പിതാ​ക്ക​ന്മാ​രോ​ടു ചെയ്‌ത നിയമ​ത്തി​ന്റെ​യും പ്രവാ​ച​ക​ന്മാ​രു​ടെ​യും മക്കൾ നിങ്ങൾ തന്നേ. നിങ്ങൾക്കു ആദ്യമേ ദൈവം തന്റെ ദാസനായ യേശു​വി​നെ എഴു​ന്നേ​ല്‌പി​ച്ചു ഓരോ​രു​ത്തനെ അവനവന്റെ അകൃത്യ​ങ്ങ​ളിൽനി​ന്നു തിരി​ക്കു​ന്ന​തി​നാൽ നിങ്ങളെ അനു​ഗ്ര​ഹി​ക്കേ​ണ്ട​തി​ന്നു അവനെ അയച്ചി​രി​ക്കു​ന്നു.’—പ്രവൃ​ത്തി​കൾ 3:25, 26.

7. അബ്രാ​ഹാ​മി​ന്റെ സന്തതി​യായ യേശു​വി​ലൂ​ടെ ഏതെല്ലാം ജനതകൾ അനു​ഗ്ര​ഹി​ക്ക​പ്പെട്ടു?

⁷ താമസി​യാ​തെ, ശമര്യർക്കും പിന്നെ വിജാ​തീ​യർക്കും അനു​ഗ്രഹം നീട്ടി​ക്കൊ​ടു​ക്ക​പ്പെട്ടു. (പ്രവൃ​ത്തി​കൾ 8:14-17; 10:34-48) പൊ.യു. ഏതാണ്ട്‌ 50-നും 52-നുമി​ട​യിൽ പൗലൊസ്‌ ഏഷ്യാ​മൈ​ന​റി​ലുള്ള ഗലാത്യ​യി​ലെ ക്രിസ്‌ത്യാ​നി​കൾക്ക്‌ എഴുതി: ‘ദൈവം വിശ്വാ​സം​മൂ​ലം ജാതി​കളെ നീതീ​ക​രി​ക്കു​ന്നു എന്നു തിരു​വെ​ഴു​ത്തു മുൻക​ണ്ടി​ട്ടു: “നിന്നിൽ സകലജാ​തി​ക​ളും അനു​ഗ്ര​ഹി​ക്ക​പ്പെ​ടും” എന്നുള്ള സുവി​ശേഷം അബ്രാ​ഹാ​മി​നോ​ടു മുമ്പു​കൂ​ട്ടി അറിയി​ച്ചു. അങ്ങനെ വിശ്വാ​സി​കൾ വിശ്വാ​സി​യായ അബ്രാ​ഹാ​മി​നോ​ടു​കൂ​ടെ അനു​ഗ്ര​ഹി​ക്ക​പ്പെ​ടു​ന്നു.’ (ഗലാത്യർ 3:8, 9; ഉല്‌പത്തി 12:3) ഗലാത്യ​യി​ലെ അനേകം ക്രിസ്‌ത്യാ​നി​ക​ളും “ജാതി​കളാ”യിരു​ന്നെ​ങ്കി​ലും, വിശ്വാ​സം​നി​മി​ത്തം അവർ യേശു​വി​ലൂ​ടെ അനു​ഗ്ര​ഹി​ക്ക​പ്പെട്ടു. ഏതു വിധത്തിൽ?

8. പൗലൊ​സി​ന്റെ നാളിലെ ക്രിസ്‌ത്യാ​നി​ക​ളു​ടെ കാര്യ​ത്തിൽ, അബ്രാ​ഹാ​മി​ന്റെ സന്തതി​യി​ലൂ​ടെ അനു​ഗ്ര​ഹി​ക്ക​പ്പെ​ടു​ന്ന​തിൽ എന്ത്‌ ഉൾപ്പെ​ട്ടി​രു​ന്നു, അത്തരം അനു​ഗ്രഹം അവസാനം എത്ര പേർക്കു ലഭിക്കു​ന്നു?

⁸ വ്യത്യസ്‌ത പശ്ചാത്ത​ല​മുള്ള ഗലാത്യ ക്രിസ്‌ത്യാ​നി​ക​ളോ​ടു പൗലൊസ്‌ പറഞ്ഞു: “ക്രിസ്‌തു​വി​ന്നു​ള്ളവർ എങ്കിലോ നിങ്ങൾ അബ്രാ​ഹാ​മി​ന്റെ സന്തതി​യും വാഗ്‌ദ​ത്ത​പ്ര​കാ​രം അവകാ​ശി​ക​ളും ആകുന്നു.” (ഗലാത്യർ 3:29) ആ ഗലാത്യ​രു​ടെ കാര്യ​ത്തിൽ, അബ്രാ​ഹാ​മി​ന്റെ സന്തതി​യി​ലൂ​ടെ​യുള്ള അനു​ഗ്ര​ഹ​ത്തിൽ പുതിയ ഉടമ്പടി​യു​ടെ പങ്കാളി​ക​ളാ​കു​ന്ന​തും അബ്രാ​ഹാ​മി​ന്റെ സന്തതി​യിൽ യേശു​വി​ന്റെ സഹകാ​രി​കൾ, അതായത്‌ യേശു​വി​നോ​ടൊ​പ്പം കൂട്ടവ​കാ​ശി​കൾ ആകുന്ന​തും ഉൾപ്പെട്ടു. പുരാതന ഇസ്രാ​യേ​ലി​ന്റെ ജനസംഖ്യ നമുക്ക​റി​യില്ല. അവർ “കടൽക്ക​ര​യി​ലെ മണൽ പോലെ അസംഖ്യ​മാ​യി” എന്നുമാ​ത്രമേ നമുക്ക​റി​യൂ. (1 രാജാ​ക്ക​ന്മാർ 4:20) എന്നിരു​ന്നാ​ലും, ആത്മീയ സന്തതി​യിൽ യേശു​വി​ന്റെ സഹകാ​രി​കൾ ആത്യന്തി​ക​മാ​യി 1,44,000 പേരാ​ണെന്നു നമുക്ക​റി​യാം. (വെളി​പ്പാ​ടു 7:4; 14:1) ഈ 1,44,000 പേർ മനുഷ്യ​വർഗ​ത്തി​ലെ “സർവ്വ​ഗോ​ത്ര​ത്തി​ലും ഭാഷയി​ലും വംശത്തി​ലും ജാതി​യി​ലും”നിന്നു​ള്ള​വ​രാണ്‌. അബ്രാ​ഹാ​മ്യ ഉടമ്പടി​യു​ടെ അനു​ഗ്ര​ഹങ്ങൾ മറ്റുള്ള​വർക്കു സാധ്യ​മാ​ക്കു​ന്ന​തിൽ ഇവർ പങ്കുവ​ഹി​ക്കും.—വെളി​പ്പാ​ടു 5:9.

ഒരു പ്രവചനം നിവർത്തി​ക്ക​പ്പെ​ടു​ന്നു

9. പുതിയ ഉടമ്പടി​യി​ലു​ള്ള​വർക്ക്‌ യഹോ​വ​യു​ടെ ന്യായ​പ്ര​മാ​ണം അവരുടെ ഉള്ളിൽത്ത​ന്നെ​യു​ണ്ടാ​യി​രി​ക്കു​ന്ന​തെ​ങ്ങനെ?

⁹ പുതിയ ഉടമ്പടി​യെ​ക്കു​റി​ച്ചു മുൻകൂ​ട്ടി​പ്പ​റ​യവേ യിരെ​മ്യാവ്‌ എഴുതി: “ഈ കാലം കഴിഞ്ഞ​ശേഷം ഞാൻ യിസ്രാ​യേൽഗൃ​ഹ​ത്തോ​ടു ചെയ്‌വാ​നി​രി​ക്കുന്ന നിയമം ഇങ്ങനെ​യാ​കു​ന്നു: ഞാൻ എന്റെ ന്യായ​പ്ര​മാ​ണം അവരുടെ ഉള്ളിലാ​ക്കി അവരുടെ ഹൃദയ​ങ്ങ​ളിൽ എഴുതും . . . എന്നു യഹോ​വ​യു​ടെ അരുള​പ്പാ​ടു.” (യിരെ​മ്യാ​വു 31:33) സ്‌നേ​ഹ​ത്താൽ പ്രചോ​ദി​ത​രാ​യി യഹോ​വയെ സേവി​ക്കു​ക​യെ​ന്നത്‌ പുതിയ ഉടമ്പടി​യി​ലു​ള്ള​വ​രു​ടെ ഒരു സവി​ശേ​ഷ​ത​യാണ്‌. (യോഹ​ന്നാൻ 13:35; എബ്രായർ 1:9) യഹോ​വ​യു​ടെ നിയമം അവരുടെ ഹൃദയ​ത്തിൽ എഴുതി​യി​രി​ക്കു​ന്നു. അവന്റെ ഹിതം നിവർത്തി​ക്കാൻ അവർ ഉത്‌ക​ട​മാ​യി ആഗ്രഹി​ക്കു​ന്നു. പുരാതന ഇസ്രാ​യേ​ലിൽ യഹോ​വ​യു​ടെ ന്യായ​പ്ര​മാ​ണത്തെ ആഴമായി സ്‌നേ​ഹി​ച്ചി​രുന്ന വിശ്വ​സ്‌ത​രായ ചിലരു​ണ്ടാ​യി​രു​ന്നു​വെ​ന്നത്‌ സത്യമാണ്‌. (സങ്കീർത്തനം 119:97) എന്നാൽ അനേക​രും അങ്ങനെ ചെയ്‌തില്ല. എന്നിട്ടും അവർ ആ ജനതയു​ടെ ഭാഗമാ​യി നില​കൊ​ണ്ടു. എന്നാൽ ദൈവ​ത്തി​ന്റെ നിയമം ഹൃദയ​ത്തിൽ എഴുത​പ്പെ​ടാ​തെ ആർക്കും പുതിയ ഉടമ്പടി​യിൽ നില​കൊ​ള്ളാ​നാ​കില്ല.

10, 11. പുതിയ ഉടമ്പടി​യി​ലു​ള്ള​വ​രു​ടെ കാര്യ​ത്തിൽ, യഹോവ ‘അവർക്കു ദൈവ​മാ​യി’രിക്കു​ന്നത്‌ ഏതു വിധത്തി​ലാണ്‌, അവരെ​ല്ലാം അവനെ അറിയു​ന്ന​തെ​ങ്ങനെ?

¹⁰ പുതിയ ഉടമ്പടി​യി​ലു​ള്ള​വ​രെ​ക്കു​റിച്ച്‌ യഹോവ കൂടു​ത​ലാ​യി ഇങ്ങനെ പറഞ്ഞു: “ഞാൻ അവർക്കു ദൈവ​മാ​യും അവർ എനിക്കു ജനമാ​യും ഇരിക്കും.” (യിരെ​മ്യാ​വു 31:33) പുരാതന ഇസ്രാ​യേ​ലിൽ അനേകർ ജാതി​ക​ളു​ടെ ദേവന്മാ​രെ ആരാധി​ച്ചു, അതേസ​മയം അവർ ഇസ്രാ​യേ​ല്യ​രാ​യി​ത്തന്നെ നില​കൊ​ള്ളു​ക​യും ചെയ്‌തു. പുതിയ ഉടമ്പടി​യു​ടെ അടിസ്ഥാ​ന​ത്തിൽ, യഹോവ സ്വാഭാ​വിക ഇസ്രാ​യേ​ലി​നെ തള്ളിക്ക​ള​ഞ്ഞിട്ട്‌ അതിന്റെ സ്ഥാനത്ത്‌ ഒരു ആത്മീയ ജനതയെ, ‘ദൈവ​ത്തി​ന്റെ ഇസ്രാ​യേലി’നെ സൃഷ്ടിച്ചു. (ഗലാത്യർ 6:16; മത്തായി 21:43; റോമർ 9:6-8) എന്നാൽ യഹോ​വ​യെ​മാ​ത്രമേ ആരാധി​ക്കാ​വൂ എന്ന നിബന്ധന പാലി​ക്കാ​ഞ്ഞാൽ ഒരുവനു മേലാൽ പുതിയ ആത്മീയ ജനതയു​ടെ ഭാഗമാ​യി​രി​ക്കാൻ കഴിയു​ക​യില്ല.

¹¹ “അവർ ആബാല​വൃ​ദ്ധം എല്ലാവ​രും എന്നെ അറിയും” എന്നു യഹോവ പറഞ്ഞു. (യിരെ​മ്യാ​വു 31:34) “യഹോവ ഗുണമോ ദോഷ​മോ ചെയ്‌ക​യില്ല” എന്നു പറഞ്ഞു​കൊണ്ട്‌ ഇസ്രാ​യേ​ലിൽ അനേക​രും യഹോ​വയെ അവഗണി​ച്ചു. (സെഫന്യാ​വു 1:12) ഒരുവൻ യഹോ​വയെ അവഗണി​ക്കു​ക​യോ നിർമ​ലാ​രാ​ധ​നയെ മലിന​പ്പെ​ടു​ത്തു​ക​യോ ചെയ്‌താൽ അവൻ അതോടെ ദൈവ​ത്തി​ന്റെ ഇസ്രാ​യേ​ലി​ന്റെ ഭാഗമ​ല്ലാ​താ​കും. (മത്തായി 6:24; കൊ​ലൊ​സ്സ്യർ 3:5) “തങ്ങളുടെ ദൈവത്തെ അറിയുന്ന ജന”മാണ്‌ ആത്മീയ ഇസ്രാ​യേ​ല്യർ. (ദാനീ​യേൽ 11:32) ‘ഏകസത്യ​ദൈ​വ​ത്തെ​യും യേശു​ക്രി​സ്‌തു​വി​നെ​യും അറിയു’ന്നതിൽ ആനന്ദം​കൊ​ള്ളു​ന്ന​വ​രാണ്‌ അവർ. (യോഹ​ന്നാൻ 17:3) അനുപ​മ​മായ വിധത്തിൽ, യേശു “[ദൈവത്തെ] വെളി​പ്പെ​ടു​ത്തി​യി​രി​ക്കുന്ന”തിനാൽ യേശു​വി​നെ അറിയു​ന്നത്‌ ദൈവ​ത്തെ​ക്കു​റി​ച്ചുള്ള അവരുടെ പരിജ്ഞാ​ന​ത്തി​ന്റെ ആഴം വർധി​പ്പി​ക്കു​ന്നു.—യോഹ​ന്നാൻ 1:18; 14:9-11.

12, 13. (എ) പുതിയ ഉടമ്പടി​യി​ലു​ള്ള​വ​രു​ടെ പാപങ്ങൾ യഹോവ എന്തിന്റെ അടിസ്ഥാ​ന​ത്തി​ലാ​ണു ക്ഷമിക്കു​ന്നത്‌? (ബി) പാപ​മോ​ച​ന​ത്തി​ന്റെ കാര്യ​ത്തിൽ, പുതിയ ഉടമ്പടി പഴയതി​നെ​ക്കാൾ ശ്രേഷ്‌ഠ​മാ​യി​രി​ക്കു​ന്ന​തെ​ങ്ങനെ?

¹² അവസാനം, യഹോവ ഇങ്ങനെ വാഗ്‌ദാ​നം ചെയ്‌തു: “ഞാൻ അവരുടെ അകൃത്യം മോചി​ക്കും; അവരുടെ പാപം ഇനി ഓർക്ക​യും ഇല്ല.” (യിരെ​മ്യാ​വു 31:34ബി) മോശ​യു​ടെ ന്യായ​പ്ര​മാ​ണ​ത്തിൽ ഇസ്രാ​യേ​ല്യർ അനുസ​രി​ക്കാൻ കൽപ്പി​ക്ക​പ്പെ​ട്ടി​രുന്ന നൂറു​ക​ണ​ക്കി​നു ലിഖിത നിബന്ധ​നകൾ ഉണ്ടായി​രു​ന്നു. (ആവർത്ത​ന​പു​സ്‌തകം 28:1, 2, 15) ന്യായ​പ്ര​മാ​ണം ലംഘി​ച്ച​വ​രെ​ല്ലാ​വ​രും തങ്ങളുടെ പാപ​മോ​ച​ന​ത്തി​നാ​യി ബലിക​ളർപ്പി​ച്ചി​രു​ന്നു. (ലേവ്യ​പു​സ്‌തകം 4:1-7; 16:1-31) ന്യായ​പ്ര​മാ​ണം അനുസ​രി​ച്ചു സ്വന്തം പ്രവൃ​ത്തി​ക​ളി​ലൂ​ടെ തങ്ങൾക്കു നീതീ​ക​രി​ക്ക​പ്പെ​ടാ​നാ​കു​മെന്ന്‌ അനേകം യഹൂദ​ന്മാ​രും വിശ്വ​സി​ക്കാ​നി​ട​യാ​യി. എന്നാൽ സ്വന്തം പ്രവൃ​ത്തി​ക​ളി​ലൂ​ടെ നീതി​മാ​ന്മാർ ആയിത്തീ​രാൻ തങ്ങൾക്കൊ​രി​ക്ക​ലും സാധി​ക്കു​ക​യി​ല്ലെന്നു ക്രിസ്‌ത്യാ​നി​കൾ തിരി​ച്ച​റി​യു​ന്നു. പാപം ചെയ്യു​ന്നത്‌ അവർക്ക്‌ ഒഴിവാ​ക്കാ​നാ​കില്ല. (റോമർ 5:12) പുതിയ ഉടമ്പടി​ക്കു കീഴിൽ, യേശു​വി​ന്റെ ബലിയു​ടെ അടിസ്ഥാ​ന​ത്തിൽമാ​ത്രമേ ദൈവ​മു​മ്പാ​കെ നീതി​നി​ഷ്‌ഠ​മാ​യൊ​രു നില ലഭിക്കൂ. എന്നിരു​ന്നാ​ലും, അത്തരം നില ദൈവ​ത്തിൽനി​ന്നുള്ള ദാനമാണ്‌, അനർഹ​ദ​യ​യാണ്‌. (റോമർ 3:20, 23, 24) യഹോവ അപ്പോ​ഴും തന്റെ ദാസരിൽനിന്ന്‌ അനുസ​രണം ആവശ്യ​പ്പെ​ടു​ന്നു. പുതിയ ഉടമ്പടി​യി​ലു​ള്ളവർ “ക്രിസ്‌തു​വി​ന്റെ നിയമ​ത്തിന്‌ അധീന”രാണെന്നു പൗലൊസ്‌ പറയുന്നു.—1 കൊരി​ന്ത്യർ 9:21, പി.ഒ.സി. ബൈബിൾ.

¹³ ക്രിസ്‌ത്യാ​നി​കൾക്കും പാപത്തി​നാ​യുള്ള ഒരു ബലിയുണ്ട്‌, അത്‌ ന്യായ​പ്ര​മാണ ഉടമ്പടി​യിൻകീ​ഴി​ലെ ബലിക​ളെ​ക്കാൾ അത്യന്തം മൂല്യ​മു​ള്ള​താണ്‌. പൗലൊസ്‌ എഴുതി: “[ന്യായ​പ്ര​മാ​ണ​ത്തിൻകീ​ഴിൽ] ഏതു പുരോ​ഹി​ത​നും ദിവസേന ശുശ്രൂ​ഷി​ച്ചും പാപങ്ങളെ പരിഹ​രി​പ്പാൻ ഒരുനാ​ളും കഴിയാത്ത അതേ യാഗങ്ങളെ കൂടക്കൂ​ടെ കഴിച്ചും​കൊ​ണ്ടു നില്‌ക്കു​ന്നു. യേശു​വോ പാപങ്ങൾക്കു വേണ്ടി ഏകയാഗം കഴിച്ചി​ട്ടു എന്നേക്കും ദൈവ​ത്തി​ന്റെ വലത്തു​ഭാ​ഗത്തു ഇരുന്നു.” (എബ്രായർ 10:11-13) പുതിയ ഉടമ്പടി​യി​ലെ ക്രിസ്‌ത്യാ​നി​കൾ യേശു​വി​ന്റെ ബലിയിൽ വിശ്വാ​സം പ്രകട​മാ​ക്കു​ന്ന​തു​കൊണ്ട്‌, യഹോവ അവരെ നീതി​മാ​ന്മാ​രാ​യി, പാപര​ഹി​ത​രാ​യി പ്രഖ്യാ​പി​ക്കു​ന്നു, അങ്ങനെ അവർ അവന്റെ ആത്മീയ പുത്ര​ന്മാ​രാ​യി അഭി​ഷേകം ചെയ്യ​പ്പെ​ടാ​നുള്ള നിലയി​ലാ​കു​ന്നു. (റോമർ 5:1; 8:33, 34; എബ്രായർ 10:14-18) മാനു​ഷിക അപൂർണ​ത​നി​മി​ത്തം പാപം​ചെ​യ്യു​മ്പോൾ, അവർക്കു യഹോ​വ​യോട്‌ ക്ഷമ യാചി​ക്കാ​വു​ന്ന​താണ്‌. യേശു​വി​ന്റെ ബലിയു​ടെ അടിസ്ഥാ​ന​ത്തിൽ യഹോവ അവരോ​ടു ക്ഷമിക്കു​ന്നു. (1 യോഹ​ന്നാൻ 2:1, 2) എന്നാൽ, മനഃപൂർവം പാപം​ചെ​യ്യു​ന്നതു ശീലമാ​ക്കി​യാൽ, അവർക്കു തങ്ങളുടെ നീതി​നി​ഷ്‌ഠ​മായ നിലയും പുതിയ ഉടമ്പടി​യി​ലെ പങ്കാളി​ക​ളാ​യി​രി​ക്കു​ന്ന​തി​ന്റെ പദവി​യും നഷ്ടപ്പെ​ടും.—എബ്രായർ 2:2, 3; 6:4-8; 10:26-31.

പഴയ ഉടമ്പടി​യും പുതിയ ഉടമ്പടി​യും

14. ന്യായ​പ്ര​മാണ ഉടമ്പടി​ക്കു കീഴിൽ ഏതു പരി​ച്ഛേദന ആവശ്യ​മാ​യി​രു​ന്നു? പുതിയ ഉടമ്പടി​ക്കു കീഴി​ലോ?

¹⁴ തങ്ങൾ ന്യായ​പ്ര​മാ​ണ​ത്തിൻ കീഴി​ലാ​ണെ​ന്ന​തി​നുള്ള ഒരടയാ​ള​മാ​യി പഴയ ഉടമ്പടി​യി​ലെ പുരു​ഷ​ന്മാർ പരി​ച്ഛേ​ദ​ന​യേ​റ്റി​രു​ന്നു. (ലേവ്യ​പു​സ്‌തകം 12:2, 3; ഗലാത്യർ 5:3) ക്രിസ്‌തീയ സഭ ആരംഭി​ച്ച​തി​നു​ശേഷം, യഹൂ​ദേതര ക്രിസ്‌ത്യാ​നി​ക​ളും പരി​ച്ഛേ​ദ​ന​യേൽക്ക​ണ​മെന്നു ചിലർക്കു തോന്നി. എന്നാൽ അതിന്റെ ആവശ്യ​മി​ല്ലെന്ന്‌ യെരൂ​ശ​ലേ​മി​ലെ അപ്പോ​സ്‌ത​ല​ന്മാ​രും മൂപ്പന്മാ​രും ദൈവ​വ​ച​ന​ത്തി​ന്റെ​യും പരിശു​ദ്ധാ​ത്മാ​വി​ന്റെ​യും സഹായ​ത്തോ​ടെ ഗ്രഹിച്ചു. (പ്രവൃ​ത്തി​കൾ 15:1, 5, 28, 29) ഏതാനും വർഷങ്ങൾക്കു​ശേഷം പൗലൊസ്‌ പറഞ്ഞു: “പുറമെ യെഹൂ​ദ​നാ​യവൻ യെഹൂ​ദനല്ല; പുറമെ ജഡത്തി​ലു​ള്ളതു പരി​ച്ഛേ​ദ​ന​യു​മല്ല; അകമെ യെഹൂ​ദ​നാ​യ​വ​ന​ത്രേ യെഹൂദൻ; അക്ഷരത്തി​ലല്ല ആത്മാവി​ലുള്ള ഹൃദയ​പ​രി​ച്ഛേ​ദ​ന​യ​ത്രേ പരി​ച്ഛേദന.” (റോമർ 2:28, 29) സ്വാഭാ​വിക യഹൂദ​ന്മാ​രു​ടെ കാര്യ​ത്തി​ലാ​യാ​ലും അക്ഷരീയ പരി​ച്ഛേ​ദ​ന​യ്‌ക്കു യഹോ​വ​യു​ടെ ദൃഷ്ടി​യിൽ കൂടു​ത​ലായ ആത്മീയ മൂല്യ​മി​ല്ലാ​യി​രു​ന്നു. പുതിയ ഉടമ്പടി​യി​ലു​ള്ള​വരെ സംബന്ധി​ച്ചി​ട​ത്തോ​ളം ജഡത്തിനല്ല, ഹൃദയ​ത്തി​നാണ്‌ പരി​ച്ഛേ​ദ​ന​യേൽക്കേ​ണ്ടത്‌. അവരുടെ ചിന്തയി​ലും അഭിലാ​ഷ​ങ്ങ​ളി​ലും പ്രചോ​ദ​ന​ത്തി​ലും യഹോ​വയെ അപ്രീ​തി​പ്പെ​ടു​ത്തു​ന്ന​തോ അവന്റെ ദൃഷ്ടി​യിൽ അശുദ്ധ​മോ ആയ എന്തെങ്കി​ലു​മു​ണ്ടെ​ങ്കിൽ അതെല്ലാം ഛേദി​ച്ചു​ക​ള​യണം.a ഇപ്രകാ​രം ചിന്താ​രീ​തി​ക്കു മാറ്റം​വ​രു​ത്താൻ പരിശു​ദ്ധാ​ത്മാ​വി​ന്റെ ശക്തിക്കു സാധി​ക്കു​മെ​ന്ന​തി​നു ജീവി​ക്കുന്ന സാക്ഷ്യ​മാ​യി ഇന്ന്‌ അനേക​രുണ്ട്‌.—1 കൊരി​ന്ത്യർ 6:9-11; ഗലാത്യർ 5:22-24; എഫെസ്യർ 4:22-24.

15. രാജകീയ ഭരണാ​ധി​പ​ത്യ​ത്തി​ന്റെ കാര്യ​ത്തിൽ സ്വാഭാ​വിക ഇസ്രാ​യേ​ലി​നെ​യും ദൈവ​ത്തി​ന്റെ ഇസ്രാ​യേ​ലി​നെ​യും എങ്ങനെ താരത​മ്യ​പ്പെ​ടു​ത്താം?

¹⁵ ന്യായ​പ്ര​മാണ ഉടമ്പടി ക്രമീ​ക​ര​ണ​ത്തിൽ, യഹോവ ഇസ്രാ​യേ​ലി​ന്റെ രാജാ​വാ​യി​രു​ന്നു. കാല​ക്ര​മ​ത്തിൽ അവൻ യെരൂ​ശ​ലേ​മി​ലെ മാനു​ഷ​രാ​ജാ​ക്ക​ന്മാ​രി​ലൂ​ടെ തന്റെ പരമാ​ധി​കാ​രം പ്രയോ​ഗി​ച്ചു. (യെശയ്യാ​വു 33:22) യഹോവ ആത്മീയ ഇസ്രാ​യേ​ലി​ന്റെ അഥവാ ദൈവ​ത്തി​ന്റെ ഇസ്രാ​യേ​ലി​ന്റെ രാജാ​വു​മാണ്‌. പൊ.യു. 33 മുതൽ അവൻ ‘സ്വർഗ്ഗ​ത്തി​ലും ഭൂമി​യി​ലും സകല അധികാ​ര​വും’ ലഭിച്ചി​രി​ക്കുന്ന യേശു​ക്രി​സ്‌തു​വി​ലൂ​ടെ ഭരണം നടത്തി​യി​രി​ക്കു​ന്നു. (മത്തായി 28:18; എഫെസ്യർ 1:19-23; കൊ​ലൊ​സ്സ്യർ 1:13, 14) ഇന്ന്‌, ദൈവ​ത്തി​ന്റെ ഇസ്രാ​യേൽ യേശു​വി​നെ 1914-ൽ സ്ഥാപി​ത​മായ ദൈവ​ത്തി​ന്റെ സ്വർഗീയ രാജ്യ​ത്തി​ന്റെ രാജാ​വാ​യി അംഗീ​ക​രി​ക്കു​ന്നു. ഹിസ്‌കി​യാവ്‌, യോശീ​യാവ്‌ എന്നിവ​രെ​ക്കാ​ളും പുരാതന ഇസ്രാ​യേ​ലി​ലെ വിശ്വ​സ്‌ത​രായ മറ്റു രാജാ​ക്ക​ന്മാ​രെ​ക്കാ​ളും അത്യന്തം മെച്ചപ്പെട്ട രാജാ​വാണ്‌ യേശു.—എബ്രായർ 1:8, 9; വെളി​പ്പാ​ടു 11:15.

16. ദൈവ​ത്തി​ന്റെ ഇസ്രാ​യേൽ ഏതുതരം പുരോ​ഹി​ത​വർഗ​മാണ്‌?

¹⁶ ഇസ്രാ​യേൽ ഒരു രാജ്യം മാത്ര​മാ​യി​രു​ന്നില്ല, അവർക്ക്‌ ഒരു അഭിഷിക്ത പൗരോ​ഹി​ത്യ​വു​മു​ണ്ടാ​യി​രു​ന്നു. പൊ.യു. 33-ൽ സ്വാഭാ​വിക ഇസ്രാ​യേ​ലി​ന്റെ സ്ഥാനത്ത്‌ ദൈവ​ത്തി​ന്റെ ഇസ്രാ​യേൽ വരുക​യും അവർ യഹോ​വ​യു​ടെ “ദാസൻ” അതായത്‌ അവന്റെ “സാക്ഷികൾ” ആയിത്തീ​രു​ക​യും ചെയ്‌തു. (യെശയ്യാ​വു 43:10) യെശയ്യാ​വു 43:21-ലും പുറപ്പാ​ടു 19:5, 6-ലും രേഖ​പ്പെ​ടു​ത്തി​യി​രി​ക്കുന്ന ഇസ്രാ​യേ​ലി​നോ​ടുള്ള യഹോ​വ​യു​ടെ വാക്കുകൾ അന്നുമു​തൽ ദൈവ​ത്തി​ന്റെ ആത്മീയ ഇസ്രാ​യേ​ലി​നു ബാധക​മാ​യി. ദൈവ​ത്തി​ന്റെ പുതിയ ആത്മീയ ജനത ഇപ്പോൾ ‘യഹോ​വ​യു​ടെ സൽഗു​ണ​ങ്ങളെ ഘോഷി​പ്പാൻ’ ബാധ്യ​സ്ഥ​രായ “തിര​ഞ്ഞെ​ടു​ക്ക​പ്പെട്ട ഒരു ജാതി​യും രാജകീ​യ​പു​രോ​ഹി​ത​വർഗ്ഗ​വും വിശു​ദ്ധ​വം​ശ​വും [“വിശുദ്ധ ജനതയും,” NW] സ്വന്തജ​ന​വും” ആയിരി​ക്കു​ക​യാണ്‌. (1 പത്രൊസ്‌ 2:9) സ്‌ത്രീ​പു​രു​ഷ​ന്മാ​രുൾപ്പെടെ ദൈവ​ത്തി​ന്റെ ഇസ്രാ​യേ​ലി​ലെ സകലരും ഒരു കൂട്ടായ പുരോ​ഹി​ത​വർഗ​മാണ്‌. (ഗലാത്യർ 3:28, 29) അബ്രാ​ഹാ​മി​ന്റെ സന്തതി​യു​ടെ ഉപഭാ​ഗ​മെന്ന നിലയിൽ ഇപ്പോൾ അവർ ഇങ്ങനെ പറയുന്നു: “ജാതി​കളേ, അവന്റെ ജനത്തോ​ടു​കൂ​ടെ ഉല്ലസി​പ്പിൻ.” (ആവർത്ത​ന​പു​സ്‌തകം 32:43) ആത്മീയ ഇസ്രാ​യേ​ലിൽപ്പെ​ട്ട​വ​രാ​യി ഇപ്പോൾ ഭൂമി​യിൽ ശേഷി​ക്കു​ന്ന​വ​രാണ്‌ “വിശ്വ​സ്‌ത​നും വിവേ​കി​യു​മായ അടിമ.” (മത്തായി 24:45-47, NW) അവരോ​ടു​കൂ​ടെ സഹവസി​ക്കു​ന്നെ​ങ്കി​ലേ ദൈവ​ത്തി​നു സ്വീകാ​ര്യ​മായ വിശു​ദ്ധ​സേ​വനം അർപ്പി​ക്കാ​നാ​കൂ.

ദൈവ​രാ​ജ്യം—അന്തിമ നിവൃത്തി

17. പുതിയ ഉടമ്പടി​യി​ലു​ള്ള​വർക്ക്‌ ഏതു പുതിയ ജനനമുണ്ട്‌?

¹⁷ പൊ.യു.മു. 1513-നുശേഷം ജനിച്ച ഇസ്രാ​യേ​ല്യർ ജനനം​കൊ​ണ്ടു​തന്നെ ന്യായ​പ്ര​മാണ ഉടമ്പടി​യി​ലാ​യി. യഹോവ പുതിയ ഉടമ്പടി​യി​ലേക്ക്‌ എടുക്കു​ന്ന​വർക്കും ഒരു ജനനമുണ്ട്‌—അവരുടെ കാര്യ​ത്തിൽ അത്‌ ആത്മീയ ജനനമാ​ണെ​ന്നു​മാ​ത്രം. പിൻവ​രു​ന്ന​പ്ര​കാ​രം പറഞ്ഞ​പ്പോൾ യേശു അത്‌ പരീശ​നായ നിക്കോ​ദേ​മൊ​സി​നോ​ടു സൂചി​പ്പി​ച്ചു: “ആമേൻ, ആമേൻ, ഞാൻ നിന്നോ​ടു പറയുന്നു; പുതു​താ​യി ജനിച്ചില്ല എങ്കിൽ ദൈവ​രാ​ജ്യം കാൺമാൻ ആർക്കും കഴിക​യില്ല.” (യോഹ​ന്നാൻ 3:3) പൊ.യു. 33 പെന്ത​ക്കോ​സ്‌തി​ലെ 120 ശിഷ്യ​ന്മാ​രാണ്‌ ഇങ്ങനെ പുതു​താ​യി ജനിച്ച ആദ്യത്തെ അപൂർണ മനുഷ്യർ. പുതിയ ഉടമ്പടി​ക്കു​കീ​ഴിൽ നീതി​മാ​ന്മാ​രാ​യി പ്രഖ്യാ​പി​ക്ക​പ്പെട്ട്‌, തങ്ങളുടെ രാജകീയ അവകാ​ശ​ത്തി​ന്റെ “മുന്ന​മേ​യുള്ള ഒരു അച്ചാര”മായി അവർക്കു പരിശു​ദ്ധാ​ത്മാ​വി​നെ ലഭിച്ചു. (എഫെസ്യർ 1:14, NW) അവർ “ആത്മാവി​നാൽ ജനിച്ച്‌” ദൈവ​ത്തി​ന്റെ ദത്തുപു​ത്ര​ന്മാ​രാ​യി​ത്തീർന്നു. അത്‌ അവരെ യേശു​വി​ന്റെ സഹോ​ദ​ര​ന്മാ​രും അങ്ങനെ “ക്രിസ്‌തു​വി​ന്നു കൂട്ടവ​കാ​ശി​ക​ളും” ആക്കിത്തീർത്തു. (യോഹ​ന്നാൻ 3:6; റോമർ 8:16, 17) അവർ “വീണ്ടും ജനിച്ചു”വെന്നത്‌ അത്ഭുതാ​വ​ഹ​മായ പ്രതീ​ക്ഷ​കൾക്കു വഴിതു​റന്നു.

18. വീണ്ടും ജനിക്കു​ന്നത്‌ പുതിയ ഉടമ്പടി​യി​ലു​ള്ള​വർക്ക്‌ അത്ഭുത​ക​ര​മായ ഏതു പ്രതീ​ക്ഷ​കൾക്ക്‌ അവസര​മൊ​രു​ക്കു​ന്നു?

¹⁸ പുതിയ ഉടമ്പടി​ക്കു മാധ്യസ്ഥം വഹിക്കവേ, പിൻവ​രു​ന്ന​പ്ര​കാ​രം പറഞ്ഞു​കൊണ്ട്‌ യേശു തന്റെ അനുഗാ​മി​ക​ളു​മാ​യി കൂടു​ത​ലായ ഒരു ഉടമ്പടി ചെയ്‌തു: “എന്റെ പിതാവു എനിക്കു രാജ്യം നിയമി​ച്ചു​ത​ന്ന​തു​പോ​ലെ ഞാൻ നിങ്ങൾക്കും നിയമി​ച്ചു​ത​രു​ന്നു.” (ലൂക്കൊസ്‌ 22:29) ദാനീ​യേൽ 7:13, 14, 22, 27-ൽ (NW) രേഖ​പ്പെ​ടു​ത്തി​യി​രി​ക്കുന്ന ശ്രദ്ധേ​യ​മായ ദർശന​ത്തി​ന്റെ നിവൃ​ത്തി​ക്കുള്ള വഴി​യൊ​രു​ക്കു​ന്ന​താണ്‌ ഈ രാജ്യ ഉടമ്പടി. “പുരാ​ത​ന​മേ​യു​ള്ളവ”നായ യഹോ​വ​യാം ദൈവ​ത്തിൽനി​ന്നും “മനുഷ്യ​പു​ത്ര​നെ​പ്പോ​ലെ​യുള്ള ഒരുവ”ന്‌ രാജകീ​യാ​ധി​കാ​രം ലഭിക്കു​ന്നതു ദാനീ​യേൽ കണ്ടു. പിന്നെ ദാനീ​യേൽ “വിശു​ദ്ധ​ന്മാർ രാജ്യം ഏറ്റെടു​ക്കുന്ന”തു കണ്ടു. “മനുഷ്യ​പു​ത്ര​നെ​പ്പോ​ലെ​യുള്ള” ഒരുവൻ യേശു​വാണ്‌. 1914-ൽ അവൻ യഹോ​വ​യാം ദൈവ​ത്തിൽനി​ന്നു സ്വർഗീയ രാജ്യം സ്വീക​രി​ച്ചു. അവനോ​ടൊ​പ്പം രാജ്യം പങ്കു​വെ​ക്കുന്ന “വിശു​ദ്ധ​ന്മാർ” അവന്റെ ആത്മാഭി​ഷിക്ത ശിഷ്യ​ന്മാ​രാണ്‌. (1 തെസ്സ​ലൊ​നീ​ക്യർ 2:11) എങ്ങനെ?

19, 20. (എ) പുതിയ ഉടമ്പടി​യി​ലു​ള്ള​വ​രു​ടെ കാര്യ​ത്തിൽ, അബ്രാ​ഹാ​മി​നോ​ടുള്ള യഹോ​വ​യു​ടെ വാഗ്‌ദാ​ന​ത്തിന്‌ അന്തിമ​വും മഹനീ​യ​വു​മായ എന്തു നിവൃ​ത്തി​യുണ്ട്‌? (ബി) കൂടു​ത​ലായ ഏതു ചോദ്യം പരിചി​ന്തി​ക്കാ​നുണ്ട്‌?

¹⁹ മരണാ​ന​ന്തരം, ഈ അഭിഷി​ക്തർ സ്വർഗ​ത്തിൽ യേശു​വി​നോ​ടൊ​പ്പം രാജാ​ക്ക​ന്മാ​രും പുരോ​ഹി​ത​ന്മാ​രു​മാ​യി സേവി​ക്കേ​ണ്ട​തിന്‌ അവനെ​പ്പോ​ലെ, അമർത്ത്യ ആത്മസൃ​ഷ്ടി​ക​ളാ​യി ഉയിർപ്പി​ക്ക​പ്പെ​ടു​ന്നു. (1 കൊരി​ന്ത്യർ 15:50-53; വെളി​പ്പാ​ടു 20:4, 6) എന്തൊരു മഹനീയ പ്രത്യാശ! “അവർ” കേവലം കനാൻദേ​ശത്തല്ല, “ഭൂമി​യു​ടെ​മേൽ രാജാ​ക്ക​ന്മാ​രാ​യി വാഴേ​ണ്ട​താ​കു​ന്നു.” (വെളി​പ്പാ​ടു 5:10, NW) അവർ “ശത്രു​ക്ക​ളു​ടെ പട്ടണങ്ങളെ കൈവ​ശ​മാ​ക്കു”മോ? (ഉല്‌പത്തി 22:17) ഉവ്വ്‌, തികച്ചും നിർണാ​യ​ക​മായ ഒരു വിധത്തിൽ ശത്രു​ത​പു​ലർത്തുന്ന മതവേ​ശ്യ​യായ മഹാബാ​ബി​ലോ​ന്റെ നാശത്തി​നു സാക്ഷ്യം വഹിക്കു​ക​യും പുനരു​ത്ഥാ​നം പ്രാപിച്ച ഈ അഭിഷി​ക്തർ യേശു​വി​നോ​ടൊ​പ്പം ജാതി​കളെ “ഇരിമ്പു​കോൽകൊ​ണ്ടു” മേയി​ക്കു​ക​യും സാത്താന്റെ തല തകർക്കു​ക​യും ചെയ്യു​മ്പോ​ഴാ​യി​രി​ക്കും അവരത്‌ കൈവ​ശ​മാ​ക്കു​ന്നത്‌. അങ്ങനെ ഉല്‌പത്തി 3:15-ലെ പ്രവച​ന​ത്തി​ന്റെ അവസാന ഭാഗം നിവർത്തി​ക്കു​ന്ന​തിൽ അവരും പങ്കുകാ​രാ​കും.—വെളി​പ്പാ​ടു 2:26, 27; 17:14; 18:20, 21; റോമർ 16:20.

²⁰ അബ്രാ​ഹാ​മ്യ ഉടമ്പടി​യി​ലും പുതിയ ഉടമ്പടി​യി​ലും ഉൾപ്പെ​ടു​ന്നത്‌ ഈ 1,44,000 വിശ്വസ്‌ത ദേഹികൾ മാത്ര​മാ​ണോ എന്നു നാം ചോദി​ച്ചേ​ക്കാം? അല്ല, ഈ ഉടമ്പടി​ക​ളിൽ നേരിട്ട്‌ ഉൾപ്പെ​ടാ​ത്ത​വ​രും അവരി​ലൂ​ടെ അനു​ഗ്ര​ഹി​ക്ക​പ്പെ​ടും. നാം അത്‌ അടുത്ത ലേഖന​ത്തിൽ പരിചി​ന്തി​ക്കു​ന്ന​താണ്‌.

[അടിക്കു​റിപ്പ്‌]

നിങ്ങൾ ഓർമി​ക്കു​ന്നു​വോ?

□ പുതിയ ഉടമ്പടി പ്രവർത്ത​ന​ത്തിൽ വന്നതായി ആദ്യം കാണ​പ്പെ​ട്ട​തെ​പ്പോൾ?

□ പഴയ ഉടമ്പടി​യി​ലൂ​ടെ എന്തു നിർവ​ഹി​ക്ക​പ്പെട്ടു?

□ അബ്രാ​ഹാ​മി​ന്റെ പ്രമു​ഖ​സ​ന്തതി ആരാണ്‌, ആ സന്തതി​യി​ലൂ​ടെ ജനതകൾ ഏതു ക്രമത്തിൽ അനു​ഗ്ര​ഹി​ക്ക​പ്പെട്ടു?

□ 1,44,000 പേരുടെ കാര്യ​ത്തിൽ, അബ്രാ​ഹാ​മ്യ ഉടമ്പടി​യു​ടെ​യും പുതിയ ഉടമ്പടി​യു​ടെ​യും അന്തിമ നിവൃ​ത്തി​യെന്ത്‌?

[15-ാം പേജിലെ ചിത്രം]

പുതിയ ഉടമ്പടി​യി​ലു​ള്ള​വർക്ക്‌ പഴയ ഉടമ്പടി​യി​ലു​ള്ള​വ​രെ​ക്കാൾ ഗഹന​മേ​റിയ അർഥമുള്ള പാപ​മോ​ച​ന​മാ​ണു​ള്ളത്‌