പ്രായ​മുള്ള മാതാ​പി​താ​ക്ക​ളോ​ടു ദൈവി​ക​ഭക്തി ആചരിക്കൽ

“ആദ്യമാ​യി തങ്ങളുടെ സ്വന്തം കുടും​ബ​ത്തിൽ ദൈവി​ക​ഭക്തി ആചരി​ക്കാ​നും തങ്ങളുടെ മാതാ​പി​താ​ക്കൾക്കും വല്യമ്മ വല്യപ്പൻമാർക്കും തക്ക പ്രതി​ഫലം കൊടു​ത്തു​കൊ​ണ്ടി​രി​ക്കാ​നും [മക്കളോ മരുമ​ക്ക​ളോ] പഠിക്കട്ടെ, എന്തു​കൊ​ണ്ടെ​ന്നാൽ ഇതു ദൈവ​ദൃ​ഷ്ടി​യിൽ സ്വീകാ​ര്യ​മാണ്‌.”—1 തിമൊ​ഥെ​യോസ്‌ 5:4.

1, 2. (എ) വൃദ്ധ മാതാ​പി​താ​ക്ക​ളു​ടെ സംരക്ഷ​ണ​ത്തിന്‌ ബൈബിൾ ആരെ ഉത്തരവാ​ദി​ക​ളാ​ക്കു​ന്നു? (ബി) ഒരു ക്രിസ്‌ത്യാ​നി തന്റെ കടമയെ അവഗണി​ക്കു​ന്നത്‌ ഒരു ഗൗരവ​മുള്ള സംഗതി​യാ​യി​രി​ക്കു​ന്ന​തെ​ന്തു​കൊണ്ട്‌?

ഒരു കുട്ടി ആയിരു​ന്ന​പ്പോൾ നിങ്ങൾ അവരാൽ പോറ​റി​പ്പു​ലർത്ത​പ്പെട്ടു. ഒരു മുതിർന്ന​യാ​ളാ​യ​പ്പോൾ നിങ്ങൾ അവരുടെ ബുദ്ധി​യു​പ​ദേ​ശ​വും പിന്തു​ണ​യും തേടി. എന്നാൽ ഇപ്പോൾ അവർ വൃദ്ധരാ​യി​ത്തീർന്നി​രി​ക്കു​ന്നു, അവരെ പോറ​റാൻ ആരെങ്കി​ലും വേണം. അപ്പോ​സ്‌ത​ല​നായ പൗലോസ്‌ പറയുന്നു: “എന്നാൽ ഏതെങ്കി​ലും വിധവക്ക്‌ മക്കളോ മരുമ​ക്ക​ളോ ഉണ്ടെങ്കിൽ, ആദ്യമാ​യി തങ്ങളുടെ സ്വന്തം കുടും​ബ​ത്തിൽ ദൈവി​ക​ഭക്തി ആചരി​ക്കാ​നും തങ്ങളുടെ മാതാ​പി​താ​ക്കൾക്കും വല്യമ്മ വല്യപ്പൻമാർക്കും തക്ക പ്രതി​ഫലം കൊടു​ത്തു​കൊ​ണ്ടി​രി​ക്കാ​നും അവർ പഠിക്കട്ടെ, എന്തു​കൊ​ണ്ടെ​ന്നാൽ ഇതു ദൈവ​ദൃ​ഷ്ടി​യിൽ സ്വീകാ​ര്യ​മാ​കു​ന്നു. തീർച്ച​യാ​യും ഒരുവൻ സ്വന്തക്കാർക്കു​വേണ്ടി, വിശേ​ഷാൽ സ്വന്ത കുടും​ബാം​ഗ​ങ്ങൾക്കു​വേണ്ടി കരുതു​ന്നി​ല്ലെ​ങ്കിൽ അയാൾ വിശ്വാ​സം തള്ളിക്ക​ളഞ്ഞ്‌ വിശ്വാ​സ​മി​ല്ലാത്ത ഒരാ​ളെ​ക്കാൾ മോശ​മാ​യി​രി​ക്കു​ന്നു.”—1 തിമൊ​ഥെ​യോസ്‌ 5:4, 8.

² ഇന്ന്‌ ആയിര​ക്ക​ണ​ക്കിന്‌ യഹോ​വ​യു​ടെ സാക്ഷികൾ വൃദ്ധ മാതാ​പി​താ​ക്കളെ സംരക്ഷി​ക്കു​ന്നു. കേവലം “ദയ”യിൽനി​ന്നോ (ദ ലിവിംഗ്‌ ബൈബിൾ) “കടമ”യായി​ട്ടോ (യെരൂ​ശ​ലേം ബൈബിൾ) അല്ല, പിന്നെ​യോ ദൈവി​ക​ഭ​ക്തി​യിൽനിന്ന്‌ അതായത്‌ ദൈവ​ത്തോ​ടുള്ള ബഹുമാ​ന​ത്തിൽ നിന്ന്‌ ഇതു ചെയ്യുന്നു. തങ്ങളുടെ മാതാ​പി​താ​ക്കളെ ഞെരു​ക്ക​കാ​ലത്ത്‌ ഉപേക്ഷി​ക്കു​ന്നത്‌ ‘[ക്രിസ്‌തീയ] വിശ്വാ​സത്തെ തള്ളിക്ക​ള​യുന്ന’തിന്‌ സമാന​മാ​ണെന്ന്‌ അവർ തിരി​ച്ച​റി​യു​ന്നു.—തീത്തോസ്‌ 1:16 താരത​മ്യ​പ്പെ​ടു​ത്തുക.

നിങ്ങളു​ടെ സംരക്ഷക ‘ചുമട്‌ വഹിക്കുക’

3. ഒരുവന്റെ മാതാ​പി​താ​ക്ക​ളു​ടെ സംരക്ഷണം ഒരു യഥാർത്ഥ വെല്ലു​വി​ളി​യാ​യി​രി​ക്കാ​വു​ന്ന​തെ​ങ്ങനെ?

³ വിശേ​ഷി​ച്ചു പാശ്ചാത്യ രാജ്യ​ങ്ങ​ളിൽ പ്രായ​മുള്ള മാതാ​പി​താ​ക്ക​ളു​ടെ സംരക്ഷണം ഒരു യഥാർത്ഥ വെല്ലു​വി​ളി​യാ​യി​ത്തീർന്നി​രി​ക്കു​ന്നു. കുടും​ബങ്ങൾ പലപ്പോ​ഴും ശിഥി​ല​മാണ്‌. വിലകൾ അനിയ​ന്ത്രി​ത​മാ​യി ഉയർന്നി​രി​ക്കു​ന്നു. വീട്ടമ്മ​മാർക്കു മിക്ക​പ്പോ​ഴും ലൗകി​ക​ജോ​ലി​ക​ളുണ്ട്‌. പ്രായം ചെന്നു​കൊ​ണ്ടി​രി​ക്കുന്ന ഒരു പിതാ​വി​നെ​യോ മാതാ​വി​നെ​യോ പരിപാ​ലി​ക്കു​ന്നത്‌ അങ്ങനെ വമ്പിച്ച ഒരു കർത്തവ്യ​മാ​യി​രി​ക്കാൻ കഴിയും, വിശേ​ഷിച്ച്‌ ശുശ്രൂ​ഷി​ക്കുന്ന ആൾതന്നെ മേലാൽ ചെറു​പ്പ​മ​ല്ലാ​ത്ത​പ്പോൾ. “ഇപ്പോൾ ഞങ്ങൾ ഞങ്ങളുടെ 50-കളിലാണ്‌, സഹായ​മാ​വ​ശ്യ​മുള്ള മക്കളും മരുമ​ക്ക​ളും ഞങ്ങൾക്കുണ്ട്‌” എന്ന്‌ തന്റെ പിതാ​വി​നെ പരിപാ​ലി​ക്കാൻ പോരാ​ട്ടം കഴിച്ചു​കൊ​ണ്ടി​രി​ക്കുന്ന ഒരു സഹോ​ദരി പറയുന്നു.

4, 5. (എ) സംരക്ഷ​ണ​ഭാ​രം മിക്ക​പ്പോ​ഴും ആരുമാ​യി പങ്കു​വെ​ക്കാൻ കഴിയു​മെന്ന്‌ ബൈബിൾ സൂചി​പ്പി​ക്കു​ന്നു? (ബി) യേശു​വി​ന്റെ നാളിൽ ചിലർ തങ്ങളുടെ മാതാ​പി​താ​ക്ക​ളോ​ടുള്ള ഉത്തരവാ​ദി​ത്ത​ത്തിൽനിന്ന്‌ ഒഴിഞ്ഞ​തെ​ങ്ങനെ?

⁴ ഉത്തരവാ​ദി​ത്ത​ത്തിൽ “മക്കൾക്കോ മരുമ​ക്കൾക്കോ” പങ്കു​ചേ​രാ​മെന്ന്‌ പൗലോസ്‌ സൂചി​പ്പി​ച്ചു. (1 തിമൊ​ഥെ​യോസ്‌ 5:4) ചില​പ്പോൾ, സന്തതികൾ പരിപാ​ല​ന​ത്തി​ലെ ‘തങ്ങളുടെ ചുമടു​വ​ഹി​ക്കാൻ’ മനസ്സി​ല്ലാ​ത്ത​വ​രാണ്‌. (ഗലാത്യർ 6:5 താരത​മ്യ​പ്പെ​ടു​ത്തുക.) “എന്റെ മൂത്ത സഹോ​ദരി സാഹച​ര്യ​ത്തിൽനിന്ന്‌ കൈ കഴുകി​മാ​റി” എന്ന്‌ ഒരു മൂപ്പൻ പരാതി പറയുന്നു. എന്നാൽ അങ്ങനെ​യുള്ള ഒരു ഗതി യഹോ​വക്കു പ്രസാ​ദ​മാ​യി​രി​ക്കു​മോ? ഒരിക്കൽ യേശു പരീശൻമാ​രോ​ടു പറഞ്ഞത്‌ ഓർക്കുക: “‘നിന്റെ അപ്പനെ​യും അമ്മയെ​യും ബഹുമാ​നി​ക്കുക’ എന്ന്‌ മോശെ പറഞ്ഞു . . . എന്നാൽ’” എന്നിൽ നിന്ന്‌ നിങ്ങൾക്ക്‌ പ്രയോ​ജനം കിട്ടേ​ണ്ട​താ​യി എനിക്കുള്ള എന്തും കൊർബ്ബാൻ (അതായത്‌ ദൈവ​ത്തി​നു നേർന്നി​രി​ക്കുന്ന വഴിപാട്‌) ആകുന്നു” എന്ന്‌ ഒരു പുരുഷൻ തന്റെ അപ്പനോ​ടോ അമ്മയോ​ടോ പറയു​ന്നു​വെ​ങ്കിൽ നിങ്ങൾ പറയു​ക​യാണ്‌’—അയാൾ തന്റെ അപ്പനോ അമ്മക്കോ വേണ്ടി യാതൊ​ന്നും ചെയ്യാൻ നിങ്ങൾ മേലാൽ അനുവ​ദി​ക്കു​ന്നില്ല, അങ്ങനെ നിങ്ങൾ നിങ്ങളു​ടെ പാരമ്പ​ര്യ​ത്താൽ ദൈവ​വ​ച​നത്തെ അസാധു​വാ​ക്കു​ന്നു.”—മർക്കോസ്‌ 7:10-13.

⁵ ഒരു യഹൂദൻ തന്റെ ദരിദ്ര മാതാ​പി​താ​ക്കളെ സഹായി​ക്കാൻ കൂട്ടാ​ക്കി​യി​ല്ലെ​ങ്കിൽ, അയാൾ തന്റെ വകകളെ “കൊർബ്ബാൻ”—ആലയ ഉപയോ​ഗ​ത്തിന്‌ മാററി വെച്ച ഒരു വഴിപാട്‌—ആയി പ്രഖ്യാ​പി​ക്കുക മാത്രം ചെയ്‌താൽ മതിയാ​യി​രു​ന്നു. (ലേവ്യാ​പു​സ്‌തകം 27:1-24 താരത​മ്യ​പ്പെ​ടു​ത്തുക.) എന്നിരു​ന്നാ​ലും, ഈ സങ്കൽപ്പിത വഴിപാട്‌ വിട്ടു​കൊ​ടു​ക്കാൻ ഉടനെ അയാളു​ടെ മേൽ നിർബ്ബ​ന്ധ​മി​ല്ലാ​യി​രു​ന്നു​വെന്ന്‌ പ്രകട​മാണ്‌. അങ്ങനെ അയാൾക്ക്‌ തന്റെ വകകൾ, അനിശ്ചി​ത​കാ​ലം കൈവശം വെക്കാ​നും (നിസ്സം​ശ​യ​മാ​യി ഉപയോ​ഗി​ക്കാ​നും) കഴിയു​മാ​യി​രു​ന്നു. എന്നാൽ അയാളു​ടെ മാതാ​പി​താ​ക്കൾക്ക്‌ സാമ്പത്തിക സഹായം ആവശ്യ​മാ​യി​വ​ന്നാൽ, തനിക്കു​ള്ള​തെ​ല്ലാം “കൊർബ്ബാൻ” ആയി ഭക്തിപൂർവ്വം പ്രഖ്യാ​പി​ക്കു​ന്ന​തി​നാൽ അയാൾക്ക്‌ തന്റെ കർത്തവ്യ​ത്തിൽനിന്ന്‌ ഒഴിഞ്ഞു മാറാൻ കഴിയു​മാ​യി​രു​ന്നു. യേശു ഈ വഞ്ചനയെ കുററം​വി​ധി​ച്ചു.

6. മാതാ​പി​താ​ക്ക​ളോ​ടുള്ള തങ്ങളുടെ കടമയിൽനിന്ന്‌ ഒഴിഞ്ഞു​മാ​റാൻ ഇക്കാലത്ത്‌ ചിലരെ എന്തു പ്രേരി​പ്പി​ച്ചേ​ക്കാം? ഇതു ദൈവ​ത്തി​നു പ്രസാ​ദ​മാ​ണോ?

⁶ തന്റെ കടമയെ ഒഴിവാ​ക്കാൻ വ്യർത്ഥ​മായ ഒഴിക​ഴി​വു​കളെ ഉപയോ​ഗി​ക്കുന്ന ഒരു ക്രിസ്‌ത്യാ​നി അങ്ങനെ ദൈവത്തെ വിഡ്‌ഢി​യാ​ക്കു​ന്നില്ല. (യിരെ​മ്യാവ്‌ 17:9, 10) സാമ്പത്തിക പ്രശ്‌ന​ങ്ങ​ളും, ക്ഷയിച്ചു​കൊ​ണ്ടി​രി​ക്കുന്ന ആരോ​ഗ്യ​വും സമാന സാഹച​ര്യ​ങ്ങ​ളും ഒരുവനു തന്റെ മാതാ​പി​താ​ക്കൾക്കു​വേണ്ടി ചെയ്യാൻ കഴിയു​ന്ന​തി​ന്റെ അളവിനെ അതിയാ​യി പരിമി​ത​പ്പെ​ടു​ത്തി​യേ​ക്കാം. എന്നിരു​ന്നാ​ലും, ചിലർ തങ്ങളുടെ മാതാ​പി​താ​ക്ക​ളു​ടെ ക്ഷേമ​ത്തെ​ക്കാ​ളു​പ​രി​യാ​യി കേവലം സ്വത്തു​ക്ക​ളെ​യും സമയ​ത്തെ​യും സ്വകാ​ര്യ​ത​യേ​യും വിലയി​രു​ത്തി​യേ​ക്കാം. എന്നിരു​ന്നാ​ലും, ദൈവ​വ​ചനം പ്രസം​ഗി​ക്കു​ന്ന​തും മാതാ​പി​താ​ക്ക​ളോ​ടുള്ള നമ്മുടെ നിഷ്‌ക്രി​യ​ത്വ​ത്താൽ അതിനെ “അസാധു” വാക്കു​ന്ന​തും എത്ര കാപട്യ​മാ​യി​രി​ക്കും!

കുടുംബ സഹകരണം

7. ഒരു വൃദ്ധപി​താ​വി​നോ മാതാ​വി​നോ പരിച​രണം കൊടു​ക്കു​ന്ന​തിൽ കുടും​ബ​ങ്ങൾക്ക്‌ എങ്ങനെ സഹകരി​ക്കാൻ കഴിയും?

⁷ വൃദ്ധ മാതാ​പി​താ​ക്കൾ ഉൾപ്പെ​ടുന്ന ഒരു പ്രതി​സന്ധി ഉണ്ടാകു​മ്പോൾ ഒരു കുടും​ബ​യോ​ഗം വിളി​ച്ചു​കൂ​ട്ടാൻ ചില വിദഗ്‌ദ്ധർ ശുപാർശ ചെയ്യുന്നു. ഉത്തരവാ​ദി​ത്ത​തിൽ അധിക​പ​ങ്കും ഒരു കുടും​ബാം​ഗം വഹി​ക്കേ​ണ്ട​തു​ണ്ടാ​യി​രി​ക്കാം. എന്നാൽ ശാന്തമാ​യും വസ്‌തു​നി​ഷ്‌ഠ​മാ​യും “രഹസ്യ​സം​സാര”ത്തിൽ ഏർപ്പെ​ടു​ന്ന​തി​നാൽ മിക്ക​പ്പോ​ഴും കുടും​ബ​ങ്ങൾക്ക്‌ ജോലി ഭാരത്തിൽ പങ്കുപ​റ​റാൻ വഴികൾ കണ്ടെത്താൻ കഴിയും. (സദൃശ​വാ​ക്യ​ങ്ങൾ 15:22) ദൂരെ താമസി​ക്കുന്ന ചിലർക്ക്‌ സാമ്പത്തിക സഹായം നൽകാ​നും കാലാ​കാ​ല​ങ്ങ​ളിൽ സന്ദർശനം നടത്താ​നും കഴി​ഞ്ഞേ​ക്കും. മററു ചിലർക്ക്‌ വീട്ടു​ജോ​ലി​കൾ ചെയ്‌തു​കൊ​ടു​ക്കാ​നോ വാഹന​സൗ​ക​ര്യം ഏർപ്പെ​ടു​ത്താ​നോ കഴി​ഞ്ഞേ​ക്കാം. എന്തിന്‌, കേവലം ക്രമമാ​യി മാതാ​പി​താ​ക്കളെ സന്ദർശി​ക്കാൻ സമ്മതി​ക്കു​ന്ന​തു​തന്നെ വില​യേ​റിയ ഒരു സംഭാ​വ​ന​യാ​യി​രി​ക്കാം. 80-കളിലുള്ള സഹോ​ദരി അവളുടെ മക്കളാ​ലുള്ള സന്ദർശ​ന​ങ്ങ​ളെ​ക്കു​റിച്ച്‌ “അത്‌ ഒരു റേറാ​ണിക്ക്‌ പോ​ലെ​യാ​ണെ”ന്നു പറയുന്നു.

8. (എ) മുഴു​സ​മ​യ​സേ​വ​ന​മ​നു​ഷ്‌ഠി​ക്കുന്ന കുടും​ബാം​ഗങ്ങൾ തങ്ങളുടെ മാതാ​പി​താ​ക്ക​ളു​ടെ സംരക്ഷ​ണ​ത്തിൽ പങ്കു​ചേ​രു​ന്ന​തിൽ നിന്ന്‌ ഒഴിവു​ള്ള​വ​രാ​ണോ? (ബി) മുഴു​സ​മ​യ​സേ​വ​ന​ത്തി​ലുള്ള ചിലർ മാതാ​പി​താ​ക്ക​ളോ​ടുള്ള കടപ്പാടു നിറ​വേ​റ​റാൻ എത്ര​ത്തോ​ളം ശ്രമി​ച്ചി​രി​ക്കു​ന്നു?

⁸ എന്നാൽ ഒരു കുടും​ബാം​ഗം മുഴു​സമയ സേവന​ത്തി​ലേർപ്പെ​ട്ടി​രി​ക്കു​മ്പോൾ കുടും​ബങ്ങൾ ഒരു വിഷമ​ക​ര​മായ പ്രശ്‌ന​ത്തെ​യാണ്‌ അഭിമു​ഖീ​ക​രി​ക്കു​ന്നത്‌. മുഴു സമയശു​ശ്രൂ​ഷകർ അങ്ങനെ​യുള്ള കടപ്പാ​ടു​ക​ളിൽ നിന്ന്‌ ഒഴിക​ഴി​വു പറഞ്ഞു മാറു​ന്നില്ല. ചിലർ തങ്ങളുടെ മാതാ​പി​താ​ക്ക​ളു​ടെ പരിപാ​ല​ന​ത്തി​നാ​യി അസാധാ​ര​ണ​ശ്ര​മങ്ങൾ നടത്തി​യി​ട്ടുണ്ട്‌. ഒരു സർക്കിട്ട്‌ മേൽവി​ചാ​രകൻ പറയുന്നു: “വിശേ​ഷാൽ മുഴു സമയ​സേ​വ​ന​ത്തി​ന്റെ ആവശ്യങ്ങൾ നിറ​വേ​റ​റാൻ ശ്രമി​ക്കു​മ്പോൾതന്നെ ഞങ്ങളുടെ മാതാ​പി​താ​ക്ക​ളു​ടെ പരിപാ​ലനം നിർവ്വ​ഹി​ക്കു​ന്നത്‌ ശാരീ​രി​ക​മാ​യും വൈകാ​രി​ക​മാ​യും എത്ര ക്ഷീണി​പ്പി​ക്കു​താ​യി​രി​ക്കാ​മെന്ന്‌ ഞങ്ങൾ ഒരിക്ക​ലും ചിന്തി​ച്ചി​രു​ന്നില്ല. തീർച്ച​യാ​യും, ഞങ്ങൾ ഞങ്ങളുടെ സഹിഷ്‌ണു​ത​യു​ടെ പരിധി​യി​ലെത്തി, ‘സാധാ​ര​ണ​യിൽ കവിഞ്ഞ ശക്തി’യുടെ ആവശ്യം തോന്നു​ക​യും ചെയ്‌തു.” (2 കൊരി​ന്ത്യർ 4:7) യഹോവ അങ്ങനെ​യു​ള്ള​വരെ നിലനിർത്തു​ന്ന​തിൽ തുടരട്ടെ.

9. മാതാ​പി​താ​ക്കളെ സംരക്ഷി​ക്കാൻ മുഴു​സ​മ​യ​സേ​വനം നിർത്തു​ക​യ​ല്ലാ​തെ ഗത്യന്ത​ര​മി​ല്ലാ​ഞ്ഞ​വർക്ക്‌ എന്തു പ്രോ​ത്സാ​ഹനം കൊടു​ക്കാൻ കഴിയും?

⁹ ചില സമയങ്ങ​ളിൽ, സകല സാദ്ധ്യ​ത​ക​ളും ആരാഞ്ഞ​ശേഷം, ഒരു കുടും​ബാം​ഗ​ത്തിന്‌ മുഴു സമയ​സേ​വനം വിടു​ക​യ​ല്ലാ​തെ ഗത്യന്ത​ര​മി​ല്ലാ​തെ വരുന്നു. അങ്ങനെ​യുള്ള ഒരാൾക്ക്‌ തന്റെ സേവന പദവികൾ വച്ചൊ​ഴി​യു​ന്നതു സംബന്ധിച്ച്‌ സമ്മി​ശ്ര​വി​ചാ​രങ്ങൾ ഉണ്ടായി​രി​ക്കാം. ‘രോഗി​യായ എന്റെ വൃദ്ധ മാതാ​വി​നെ പരിപാ​ലി​ക്കു​ക​യെ​ന്നത്‌ നമ്മുടെ ക്രിസ്‌തീയ ഉത്തരവാ​ദി​ത്ത​മാ​ണെന്ന്‌ ഞങ്ങൾക്ക​റി​യാം’ എന്ന്‌ ഒരു മുൻ മിഷനറി പറയുന്നു. ‘എന്നാൽ ചില​പ്പോൾ അത്‌ അസാധാ​ര​ണ​മാ​യി തോന്നു​ന്നു.’ എന്നിരു​ന്നാ​ലും, ‘ഭവനത്തിൽ ദൈവി​ക​ഭക്തി ആചരി​ക്കു​ന്നത്‌ ദൈവ​ദൃ​ഷ്ടി​യിൽ സ്വീകാ​ര്യ​മാണ്‌’ എന്നോർക്കുക. (1 തിമൊ​ഥെ​യോസ്‌ 5:4) “വിശു​ദ്ധൻമാ​രെ ശുശ്രൂ​ഷി​ച്ചി​ട്ടു​ള്ള​തി​ലും തുടർന്നു ശുശ്രൂ​ഷി​ക്കു​ന്ന​തി​ലും നിങ്ങളു​ടെ വേലയും അവന്റെ നാമ​ത്തോ​ടു നിങ്ങൾ കാണിച്ച സ്‌നേ​ഹ​വും മറക്കാൻ തക്കവണ്ണം ദൈവം നീതി​കെ​ട്ട​വനല്ല” എന്നും ഓർക്കുക. (എബ്രായർ 6:10) അനേകം വർഷത്തെ മുഴു സമയ​സേ​വ​ന​ത്തിൽനിന്ന്‌ വിരമിച്ച ഒരു ദമ്പതികൾ പറയുന്നു: ഞങ്ങൾ മുഴു​സ​മ​യ​ശു​ശ്രൂ​ഷ​യിൽ ആയിരി​ക്കേ​ണ്ടതു പ്രധാ​ന​മാ​യി​രു​ന്ന​തു​പോ​ലെ ഇപ്പോൾ ഞങ്ങളുടെ സ്വന്തക്കാ​രെ പരിപാ​ലി​ക്കേ​ണ്ടത്‌ പ്രധാ​ന​മാണ്‌, ആ വിധത്തി​ലാണ്‌ ഞങ്ങൾ അതിനെ വീക്ഷി​ക്കു​ന്നത്‌.”

10. (എ) ചിലർ അകാലത്ത്‌ മുഴു​സ​മ​യ​സേ​വനം നിർത്തി​യി​രി​ക്കാ​വു​ന്ന​തെ​ന്തു​കൊണ്ട്‌? (ബി) കുടും​ബങ്ങൾ മുഴു സമയ​സേ​വ​നത്തെ വീക്ഷി​ക്കേ​ണ്ട​തെ​ങ്ങനെ?

¹⁰ ഒരുപക്ഷേ, തങ്ങളുടെ ബന്ധുക്കൾ ‘നിങ്ങൾ ജോലി​ക​ളാ​ലും കുടും​ബ​ങ്ങ​ളാ​ലും ബന്ധിതരല്ല, നിങ്ങൾക്ക്‌ ഡാഡി​യെ​യും മമ്മി​യെ​യും നോക്ക​രു​തോ?’ എന്ന്‌ ന്യായ​വാ​ദം ചെയ്‌ത​തു​കൊണ്ട്‌ ചിലർ അകാല​ത്തിൽ മുഴു​സ​മ​യ​സേ​വനം വിട്ടു​പോ​യി​ട്ടുണ്ട്‌. എന്നിരു​ന്നാ​ലും, പ്രസം​ഗ​വേ​ല​യല്ലേ ഇന്നു ചെയ്യ​പ്പെ​ടുന്ന ഏററവും അടിയ​ന്തി​ര​മായ വേല? (മത്തായി 24:14; 28:19, 20) അങ്ങനെ, മുഴു​സ​മ​യ​സേ​വ​ന​ത്തി​ലു​ള്ളവർ മർമ്മ​പ്ര​ധാ​ന​മായ ഒരു വേലയാ​ണു ചെയ്യു​ന്നത്‌. (1 തിമൊ​ഥെ​യോസ്‌ 4:16) ചില സാഹച​ര്യ​ങ്ങ​ളിൽ ദൈവ​സേ​വ​ന​ത്തിന്‌ കുടും​ബ​കാ​ര്യ​ങ്ങളെ അപേക്ഷിച്ച്‌ മുൻഗ​ണ​ന​യു​ണ്ടാ​യി​രി​ക്കാ​മെന്ന്‌ യേശു​വും സൂചി​പ്പി​ച്ചു.

11, 12. (എ) “മരിച്ചവർ തങ്ങളുടെ മരിച്ച​വരെ കുഴി​ച്ചി​ടട്ടെ” എന്ന്‌ യേശു ഒരു മനുഷ്യ​നെ ബുദ്ധി​യു​പ​ദേ​ശി​ച്ച​തെ​ന്തു​കൊണ്ട്‌? (ബി) ഒരു അംഗം മുഴു സമയ​സേ​വ​ന​ത്തി​ലാ​യി​രി​ക്കു​മ്പോൾ ചില കുടും​ബങ്ങൾ എന്തു ക്രമീ​ക​ര​ണങ്ങൾ ചെയ്‌തി​ട്ടുണ്ട്‌?

¹¹ ദൃഷ്ടാ​ന്ത​മാ​യി, “ആദ്യം പോയി എന്റെ അപ്പനെ കുഴി​ച്ചി​ടാൻ അനുവ​ദി​ച്ചാ​ലും” എന്നു പറഞ്ഞു​കൊണ്ട്‌ ഒരു മനുഷ്യൻ യേശു​വി​ന്റെ അനുഗാ​മി​യാ​കാ​നുള്ള ക്ഷണം നിരസി​ച്ച​പ്പോൾ” [ആത്മീയ​മാ​യി] മരിച്ചവർ തങ്ങളുടെ മരിച്ച​വരെ കുഴി​ച്ചി​ടട്ടെ, എന്നാൽ നീ പോയി എല്ലായി​ട​ത്തും ദൈവ​രാ​ജ്യം ഘോഷി​ക്കുക” എന്ന്‌ യേശു മറുപടി പറഞ്ഞു. (ലൂക്കോസ്‌ 9:59, 60) യഹൂദൻമാർ മരിച്ച​വരെ മരണദി​വ​സ​ത്തിൽതന്നെ കുഴി​ച്ചി​ടു​ന്ന​തു​കൊണ്ട്‌, ആ മമനു​ഷ്യ​ന്റെ പിതാവ്‌ യഥാർത്ഥ​ത്തിൽ മരിച്ചി​രി​ക്കാ​നി​ട​യില്ല. ആ മനുഷ്യൻ തന്റെ രോഗി​യായ പിതാ​വി​ന്റെ മരണം വരെ പിതാ​വി​നോ​ടു​കൂ​ടെ കഴിയാൻ ആഗ്രഹി​ച്ചി​രി​ക്കാൻ സാദ്ധ്യ​ത​യുണ്ട്‌. എന്നിരു​ന്നാ​ലും, ഈ ആവശ്യം സാധി​ക്കാൻ സ്‌പഷ്ട​മാ​യി മററു ബന്ധുക്കൾ ഉണ്ടായി​രു​ന്ന​തു​കൊണ്ട്‌ “എല്ലായി​ട​ത്തും ദൈവ​രാ​ജ്യം ഘോഷി​ക്കാൻ” യേശു ആ മനുഷ്യ​നെ പ്രോ​ത്സാ​ഹി​പ്പി​ച്ചു.

¹² അങ്ങനെ​തന്നെ എല്ലാ അംഗങ്ങ​ളും സഹകരി​ക്കു​മ്പോൾ, മുഴു സമയ​സേ​വ​ന​ത്തി​ലുള്ള ഒരാൾക്ക്‌, മുഴു​സ​മ​യ​സേ​വനം വിടാ​തെ​തന്നെ മാതാ​പി​താ​ക്ക​ളു​ടെ പരിപാ​ല​ന​ത്തിൽ പങ്കെടു​ക്കു​ന്ന​തിന്‌ മിക്ക​പ്പോ​ഴും ക്രമീ​ക​രണം ചെയ്യാൻ കഴിയു​മെന്ന്‌ ചില കുടും​ബങ്ങൾ കണ്ടെത്തി​യി​ട്ടുണ്ട്‌. ദൃഷ്ടാ​ന്ത​മാ​യി, ചില മുഴു​സമയ ശുശ്രൂ​ഷകർ വാരാ​ന്ത്യ​ങ്ങ​ളി​ലോ അവധി​ക്കാ​ല​ങ്ങ​ളി​ലോ തങ്ങളുടെ മാതാ​പി​താ​ക്കളെ സഹായി​ക്കു​ന്നു. പ്രായ​മുള്ള കുറേ മാതാ​പി​താ​ക്കൾ തങ്ങളുടെ ഭാഗത്ത്‌ ഗണ്യമായ ആത്മത്യാ​ഗ​ത്തോ​ടെ തങ്ങളുടെ മക്കൾ മുഴു​സ​മ​യ​സേ​വ​ന​ത്തിൽ നിലനിൽക്കാൻ നിർബ്ബ​ന്ധി​ച്ചി​ട്ടു​ണ്ടെ​ന്നു​ള്ളത്‌ കൗതു​ക​ക​ര​മാണ്‌. രാജ്യ​തൽപ്പ​ര്യ​ങ്ങളെ ഒന്നാമതു വെക്കു​ന്ന​വരെ യഹോവ സമൃദ്ധ​മാ​യി അനു​ഗ്ര​ഹി​ക്കു​ന്നു.—മത്തായി 6:33.

മാതാ​പി​താ​ക്കൾ വീട്ടി​ലേക്ക്‌ വരു​മ്പോൾ “ജ്ഞാനവും” “വിവേ​ച​ന​യും”

13. മാതാ​പി​താ​ക്കൾ തങ്ങളുടെ മക്കളോ​ടു​കൂ​ടെ പാർക്കാൻ ക്ഷണിക്ക​പ്പെ​ടു​മ്പോൾ ഏതു പ്രശ്‌നങ്ങൾ വികാസം പ്രാപി​ച്ചേ​ക്കാം?

¹³ തന്റെ വിധവ​യായ മാതാവ്‌ തന്റെ വിശ്വാ​സി​ക​ളായ ബന്ധുക്ക​ളോ​ടു​കൂ​ടെ താമസി​ക്കാൻ യേശു ഏർപ്പാടു ചെയ്‌തു. (യോഹ​ന്നാൻ 19:25-27) അനേകം സാക്ഷികൾ തങ്ങളുടെ വീട്ടിൽവന്നു പാർക്കാൻ തങ്ങളുടെ മാതാ​പി​താ​ക്കളെ അതു​പോ​ലെ ക്ഷണിച്ചി​ട്ടുണ്ട്‌—അവർ തൽഫല​മാ​യി അനേകം സന്തോ​ഷ​പ്ര​ദ​മായ സമയങ്ങ​ളും അനു​ഗ്ര​ഹ​ങ്ങ​ളും അനുഭ​വി​ച്ചി​ട്ടുണ്ട്‌. എന്നിരു​ന്നാ​ലും, പൊരു​ത്ത​പ്പെ​ടാത്ത ജീവി​ത​രീ​തി​കൾ, പരിമി​ത​മായ സ്വകാ​ര്യത, അനുദിന ശുശ്രൂ​ഷ​യു​ടെ സമ്മർദ്ദം എന്നിവ മിക്ക​പ്പോ​ഴും മാതാ​പി​താ​ക്കളെ വീട്ടിൽ കൊണ്ടു​വ​രു​ന്നത്‌ ബന്ധപ്പെട്ട എല്ലാവർക്കും മടുപ്പു​ള​വാ​ക്കു​ന്നു. “അമ്മയുടെ ശുശ്രൂഷ എന്നെ കൂടുതൽ പിരി​മു​റു​ക്ക​മു​ള്ള​വ​ളാ​ക്കി”യെന്ന്‌ ആൻ പറയുന്നു, അവളുടെ അമ്മായി​യ​മ്മ​യ്‌ക്ക്‌ ആൽസീ​മേ​ഴ്‌സ്‌ രോഗ​മാണ്‌. “ചില​പ്പോൾ എന്റെ ക്ഷമപോ​ലും നഷ്ടപ്പെട്ട്‌ മമ്മി​യോട്‌ ഞാൻ ദയയി​ല്ലാ​തെ സംസാ​രി​ക്കു​ന്നു—അത്‌ എന്നെ വളരെ കുററ​ബോ​ധ​മു​ള്ള​വ​ളാ​ക്കു​ന്നു.”

14, 15. ഈ സാഹച​ര്യ​ങ്ങ​ളിൽ “ജ്ഞാന”ത്തിനും “വിവേചന”യ്‌ക്കും ഒരു കുടും​ബത്തെ ‘കെട്ടു​പണി’ ചെയ്യാൻ എങ്ങനെ സഹായി​ക്കാൻ കഴിയും?

¹⁴ “ജ്ഞാനത്താൽ ഒരു ഭവനം പണിയ​പ്പെ​ടും, വിവേ​ച​ന​യാൽ അത്‌ ദൃഢമാ​യി സ്ഥാപി​ത​മെന്നു തെളി​യും” എന്ന്‌ ശലോ​മോൻ പറയു​ക​യു​ണ്ടാ​യി. (സദൃശ​വാ​ക്യ​ങ്ങൾ 24:3) ദൃഷ്ടാ​ന്ത​മാ​യി, ആൻ തന്റെ അമ്മായി​യ​മ്മ​യു​ടെ പ്രശ്‌ന​ത്തെ​ക്കു​റിച്ച്‌ കൂടുതൽ ഗ്രാഹ്യം നേടാൻ ശ്രമിച്ചു. “അമ്മക്ക്‌ ഒരു രോഗ​മു​ണ്ടെ​ന്നും ഉദ്ദേശ്യ​പൂർവ്വം നടിക്കു​ന്ന​ത​ല്ലെ​ന്നും ഞാൻ മനസ്സിൽ പിടി​ക്കു​ന്നു.” എന്നാലും, “നമു​ക്കെ​ല്ലാം അനേകം പ്രാവ​ശ്യം പ്രമാദം പററുന്നു, ഒരുവന്‌ വാക്കിൽ പ്രമാദം പററു​ന്നി​ല്ലെ​ങ്കിൽ, അവൻ ഒരു പൂർണ്ണ​മ​നു​ഷ്യ​നാ​കു​ന്നു.” (യാക്കോബ്‌ 3:2) എന്നാൽ ഭിന്നതകൾ ഉണ്ടാകു​മ്പോൾ നീരസം വളരാ​നോ കോപം ജ്വലി​ക്കാ​നോ അനുവ​ദി​ക്ക​രുത്‌. (എഫേസ്യർ 4:31, 32) ഒരു കുടും​ബ​മെ​ന്ന​നി​ല​യിൽ കാര്യങ്ങൾ സംസാ​രി​ച്ചു​തീർക്കു​ക​യും വിട്ടു​വീ​ഴ്‌ച​ക​ളോ പൊരു​ത്ത​പ്പെ​ടു​ത്ത​ലു​ക​ളോ വരുത്താൻ മാർഗ്ഗങ്ങൾ ആരായു​ക​യും ചെയ്യുക.

¹⁵ ഫലപ്ര​ദ​മാ​യി ആശയവി​നി​യമം ചെയ്യാൻ വിവേ​ച​ന​യും ഒരുവനെ സഹായി​ക്കു​ന്നു. (സദൃശ​വാ​ക്യ​ങ്ങൾ 20:5) ഒരുപക്ഷേ, പിതാ​വി​നോ മാതാ​വി​നോ പുതിയ വീട്ടിലെ ദിനച​ര്യ​യോ​ടു പൊരു​ത്ത​പ്പെ​ടാൻ പ്രയാ​സ​മു​ണ്ടാ​യി​രി​ക്കാം. അല്ലെങ്കിൽ, തെററായ വിവേ​ച​ന​യാൽ പിതാവ്‌ നിസ്സഹ​ക​രി​ക്കാൻ പ്രവണത കാട്ടുന്നു. ചില സാഹച​ര്യ​ങ്ങ​ളിൽ തികച്ചും ദൃഢമാ​യി സംസാ​രി​ക്കു​ക​യ​ല്ലാ​തെ ഗത്യന്ത​ര​മി​ല്ലാ​യി​രി​ക്കാം. (ഉല്‌പത്തി 43:6-11 താരത​മ്യ​പ്പെ​ടു​ത്തുക.) “പാടി​ല്ലെന്നു പറയു​ന്നി​ല്ലെ​ങ്കിൽ, അമ്മ തന്റെ പണം മുഴുവൻ ചെലവാ​ക്കും” എന്ന്‌ ഒരു സഹോ​ദരി പറയുന്നു. എന്നാൽ തനിക്ക്‌ തന്നോ​ടുള്ള തന്റെ അമ്മയുടെ പ്രിയത്തെ പ്രയോ​ജ​ന​പ്പെ​ടു​ത്താ​മെന്ന്‌ ചില സമയങ്ങ​ളിൽ ഒരു മൂപ്പൻ കണ്ടെത്തു​ന്നു. “പലപ്പോ​ഴും ന്യായ​വാ​ദം പരാജ​യ​പ്പെ​ടു​മ്പോൾ ‘അമ്മേ, ദയവായി എനിക്കു​വേണ്ടി ഇതു ചെയ്യു​മോ’ എന്നു മാത്രം ഞാൻ പറയുന്നു, അമ്മ കേൾക്കു​ന്നു.”

16. ഒരു സ്‌നേ​ഹ​വാ​നായ ഭർത്താവ്‌ തന്റെ ഭാര്യ​യോട്‌ “വിവേചന” പ്രകട​മാ​ക്കേ​ണ്ട​തെ​ന്തു​കൊണ്ട്‌? അയാൾക്ക്‌ അത്‌ എങ്ങനെ ചെയ്യാൻ കഴിയും?

¹⁶ സംരക്ഷണ ഭാരത്തി​ല​ധി​ക​വും വഹിക്കു​ന്നതു ഭാര്യ​യാ​ക​യാൽ വിവേ​ച​ന​യുള്ള ഒരു ഭർത്താവ്‌ അവൾ വൈകാ​രി​ക​മാ​യും ശാരീ​രി​ക​മാ​യും ആത്മീയ​മാ​യും ക്ഷീണി​ത​യാ​കാ​തെ സൂക്ഷി​ക്കും. സദൃശ​വാ​ക്യ​ങ്ങൾ 24:10 പറയുന്നു: “അരിഷ്ട​നാ​ളിൽ നീ നിരു​ത്സാ​ഹി​ത​നെന്നു പ്രകട​മാ​ക്കി​യി​രി​ക്കു​ന്നു​വോ? നിന്റെ ശക്തി തുച്ഛമാ​യി​രി​ക്കും.” തന്റെ ഭാര്യ​യു​ടെ ഉത്സാഹത്തെ പുതു​ക്കാൻ ഒരു ഭർത്താ​വിന്‌ എന്തു ചെയ്യാൻ കഴിയും? “എന്റെ ഭർത്താവു വീട്ടിൽവ​ന്നാ​ലു​ടനെ എന്നെ ചുററി​പ്പി​ടി​ക്കു​ക​യും താൻ എന്നെ എത്ര വിലമ​തി​ക്കു​ന്നു​വെന്ന്‌ എന്നോടു പറയു​ക​യും ചെയ്യും. അദ്ദേഹത്തെ കൂടാതെ എനിക്ക്‌ ഇതു സാധി​ക്കു​മാ​യി​രു​ന്നില്ല!” (എഫേസ്യർ 5:25, 28, 29) അയാൾക്ക്‌ തന്റെ ഇണയോ​ടൊത്ത്‌ ബൈബിൾ പഠിക്കാ​നും ക്രമമാ​യി അവളോ​ടൊ​ത്തു പ്രാർത്ഥി​ക്കാ​നും കഴിയും. അതെ, ഈ പ്രയാസ സാഹച​ര്യ​ങ്ങ​ളിൽപോ​ലും ഒരു കുടും​ബ​ത്തിന്‌ “കെട്ടു​പണി” ചെയ്യ​പ്പെ​ടാൻ കഴിയും.

നഴ്‌സിംഗ്‌ ഹോം പരിച​ര​ണം

17, 18. (എ) ചില കുടും​ബങ്ങൾ എന്തു നടപടി സ്വീക​രി​ക്കാൻ നിർബ്ബ​ന്ധി​ത​രാ​യി? (ബി) അങ്ങനെ​യുള്ള കേസു​ക​ളിൽ, പ്രായ​പൂർത്തി​യായ മക്കൾക്ക്‌ പൊരു​ത്ത​പ്പെ​ടാൻ തങ്ങളുടെ മാതാ​പി​താ​ക്കളെ എങ്ങനെ സഹായി​ക്കാൻ കഴിയും?

¹⁷ ഒരു വാർദ്ധ​ക്യ​രോഗ വിദഗ്‌ദ്ധൻ പറയുന്നു: “ഒരു കുടും​ബ​ത്തിന്‌ [മാതാ​പി​താ​ക്കളെ] വീട്ടിൽ പരിച​രി​ക്കാ​നുള്ള വൈദ​ഗ്‌ദ്ധ്യ​മോ പണമോ ഇല്ലാത്ത ഒരു ഘട്ടം വരുന്നു.” ഒരു ഭർത്താവു പറയു​ന്ന​പ്ര​കാ​രം “ദിവസ​ത്തി​ന്റെ 24 മണിക്കൂ​റും അമ്മയെ പരിര​ക്ഷിച്ച്‌ എന്റെ ഭാര്യ​യു​ടെ ആരോ​ഗ്യം തകർന്ന ഒരു ഘട്ടത്തി​ലെത്തി. അമ്മയെ ഒരു നഴ്‌സിംഗ്‌ ഹോമി​ലാ​ക്കാ​തെ ഗത്യന്ത​ര​മി​ല്ലെ​ന്നു​വന്നു. എന്നാൽ ഇത്‌ ചെയ്‌തത്‌ ഞങ്ങൾക്ക്‌ മർമ്മ​ഭേ​ദ​ക​മാ​യി​രു​ന്നു.”

¹⁸ ഈ സാഹച​ര്യ​ങ്ങ​ളിൽ ലഭ്യമായ ഏററവും നല്ല പരിച​രണം നഴ്‌സിംഗ്‌ ഹോം പരിച​ര​ണ​മാ​യി​രി​ക്കാം. എന്നിരു​ന്നാ​ലും, അങ്ങനെ​യുള്ള സ്ഥലങ്ങളി​ലാ​ക്ക​പ്പെ​ടുന്ന പ്രായ​മു​ള്ളവർ മിക്ക​പ്പോ​ഴും അന്ധാളി​ക്കു​ക​യും സംഭ്രാ​ന്ത​രാ​ക​യും തങ്ങൾ ഉപേക്ഷി​ക്ക​പ്പെ​ട്ടി​രി​ക്കു​ന്നു​വെന്നു വിചാ​രി​ക്കു​ക​യും ചെയ്യുന്നു. “ഞങ്ങൾ ഇതു ചെയ്യേ​ണ്ടി​വ​ന്ന​തെ​ന്തു​കൊ​ണ്ടെന്ന്‌ അമ്മയോട്‌ ഞങ്ങൾ ശ്രദ്ധാ​പൂർവ്വം വിശദീ​ക​രി​ച്ചു” എന്ന്‌ ഗ്രെററാ എന്നു പേരുള്ള ഒരു സഹോ​ദരി പറയുന്നു. “ഇപ്പോൾ അമ്മ പൊരു​ത്ത​പ്പെ​ടാൻ പഠിച്ചി​രി​ക്കു​ന്നു, നഴ്‌സിംഗ്‌ ഹോമി​നെ തന്റെ ഭവനമാ​യി വീക്ഷി​ക്കു​ന്നു.” നിരന്തര സന്ദർശ​ന​ങ്ങ​ളും പൊരു​ത്ത​പ്പെ​ടു​ത്ത​ലി​ലൂ​ടെ മാതാ​പി​താ​ക്കൾക്ക്‌ ആശ്വാസം പകരു​ക​യും അവരോ​ടുള്ള നിങ്ങളു​ടെ സ്‌നേ​ഹ​ത്തി​ന്റെ ആത്മാർത്ഥ​തയെ തെളി​യി​ക്കു​ക​യും ചെയ്യുന്നു. (2 കൊരി​ന്ത്യർ 8:8 താരത​മ്യ​പ്പെ​ടു​ത്തുക.) ദൂരം ഒരു പ്രശ്‌ന​മാ​യി​രി​ക്കു​ന്ന​ടത്ത്‌ ടെല​ഫോൺ വിളി​ക​ളി​ലൂ​ടെ​യും കത്തുക​ളി​ലൂ​ടെ​യും കാലി​ക​മായ സന്ദർശ​ന​ങ്ങ​ളി​ലൂ​ടെ​യും സമ്പർക്കം പുലർത്തുക. (2 യോഹ​ന്നാൻ 12 താരത​മ്യ​പ്പെ​ടു​ത്തുക.) എന്നിരു​ന്നാ​ലും, ലൗകി​ക​രു​ടെ ഇടയിലെ താമസ​ത്തിന്‌ സ്‌പഷ്ട​മായ ന്യൂന​ത​ക​ളുണ്ട്‌. നിങ്ങളു​ടെ ‘ആത്മീയാ​വ​ശ്യ​ങ്ങ​ളെ​ക്കു​റി​ച്ചു ബോധ​മു​ണ്ടാ​യി​രി​ക്കുക.’ (മത്തായി 5:3) “ഞങ്ങൾ അമ്മക്ക്‌ വായി​ക്കാ​നുള്ള വക കൊടു​ക്കു​ക​യും സാദ്ധ്യ​മാ​കു​ന്ന​ട​ത്തോ​ളം ആത്മീയ​കാ​ര്യ​ങ്ങൾ ചർച്ച ചെയ്യാൻ ശ്രമി​ക്കു​ക​യും ചെയ്യുന്നു” എന്ന്‌ ഗ്രെററാ പറയുന്നു.

19. (എ) നഴ്‌സിംഗ്‌ ഹോമി​ലെ സംരക്ഷണം തെര​ഞ്ഞെ​ടു​ക്കു​ന്ന​തി​ലും പരി​ശോ​ധി​ക്കു​ന്ന​തി​ലും എന്തു ശ്രദ്ധ ചെലു​ത്തണം? (ബി) മാതാ​പി​താ​ക്കളെ സംരക്ഷി​ക്കു​ന്ന​തിന്‌ പരമാ​വധി പ്രവർത്തി​ക്കു​ന്നത്‌ ഒരു ക്രിസ്‌ത്യാ​നിക്ക്‌ എങ്ങനെ പ്രയോ​ജനം ചെയ്യുന്നു?

¹⁹ ഐക്യ​നാ​ടു​ക​ളി​ലെ 406 നഴ്‌സിംഗ്‌ ഹോമു​ക​ളെ​ക്കു​റി​ച്ചുള്ള ഒരു പഠനത്തെ സംബന്ധിച്ച്‌ ദ വാൾ സ്‌ട്രീ​ററ ജേണൽ റിപ്പോർട്ടു ചെയ്‌തു. അതിൽ “ഏതാണ്ട്‌ അഞ്ചിൽ ഒന്ന്‌ അന്തേവാ​സി​കൾക്ക്‌ അപകട സാദ്ധ്യ​ത​യു​ള്ള​താ​ണെ​ന്നും ഏതാണ്ടു പകുതി​ക്കു മാത്രമേ ഏററവും കുറഞ്ഞ നിലവാ​ര​ങ്ങ​ളെ​ങ്കി​ലും ഉണ്ടായി​രു​ന്നു​ള്ളു​വെ​ന്നും കണ്ടെത്ത​പ്പെട്ടു.” അങ്ങനെ​യുള്ള റിപ്പോർട്ടു​കൾ പരിതാ​പ​ക​ര​മാ​യി സാധാ​ര​ണ​മാ​ണെന്ന്‌ പറയാൻ സങ്കടമുണ്ട്‌. അതു​കൊണ്ട്‌ നഴ്‌സിംഗ്‌ ഹോം സംരക്ഷണം ആവശ്യ​മാ​ണെ​ങ്കിൽ ഒന്നു തെര​ഞ്ഞെ​ടു​ക്കു​ന്ന​തിൽ ശ്രദ്ധ ചെലു​ത്തുക. അത്‌ ശുചി​ത്വ​മു​ള്ള​തും നന്നായി സൂക്ഷി​ക്കു​ന്ന​തും യോഗ്യ​ത​യു​ള്ളവർ ജോലി ചെയ്യു​ന്ന​തും ഭവനാ​ന്ത​രീ​ക്ഷ​മു​ള്ള​തും മതിയായ ഭക്ഷണം കിട്ടു​ന്ന​ട​വു​മാ​ണോ​യെ​ന്ന​റി​യാൻ വ്യക്തി​പ​ര​മാ​യി സന്ദർശി​ക്കുക. നിങ്ങളു​ടെ മാതാ​പി​താ​ക്കൾക്ക്‌ കൊടു​ക്കുന്ന പരിച​ര​ണത്തെ സാദ്ധ്യ​മാ​കു​ന്ന​ട​ത്തോ​ളം അടുത്തു പരി​ശോ​ധി​ക്കുക. ഒരുപക്ഷേ, ലൗകിക വിശേ​ഷ​ദി​വ​സ​ങ്ങ​ളോ​ടോ വിനോ​ദ​ത്തോ​ടോ ഉള്ള ബന്ധത്തിൽ വികാസം പ്രാപി​ച്ചേ​ക്കാ​വുന്ന വിഷമ​ക​ര​മായ സാഹച​ര്യ​ങ്ങൾ ഒഴിവാ​ക്കാൻ അവരെ സഹായി​ച്ചു​കൊണ്ട്‌ അവരുടെ വക്താക്ക​ളാ​യി​രി​ക്കുക. നിലവി​ലുള്ള സാഹച​ര്യ​ങ്ങ​ളിൽ നിങ്ങളു​ടെ മാതാ​പി​താ​ക്കൾക്ക്‌ അത്യുത്തമ സംരക്ഷണം കൊടു​ക്കാൻ പരമാ​വധി ശ്രമി​ക്കു​ന്ന​തി​നാൽ മററു വിധത്തിൽ നിങ്ങളെ ശല്യ​പ്പെ​ടു​ത്താ​വുന്ന കുററ​ബോ​ധ​ങ്ങ​ളിൽ നിന്ന്‌ നിങ്ങൾക്കു നിങ്ങ​ളേ​ത്തന്നെ മോചി​പ്പി​ക്കാൻ കഴിയും.—2 കൊരി​ന്ത്യർ 1 12 താരത​മ്യ​പ്പെ​ടു​ത്തുക.

സന്തോ​ഷ​ത്തോ​ടെ കൊടു​ക്കു​ന്നവർ, സന്തോ​ഷ​ത്തോ​ടെ സ്വീക​രി​ക്കു​ന്ന​വർ

20. മക്കൾ സന്തോ​ഷ​ത്തോ​ടെ കൊടു​ക്കു​ന്ന​വ​രാ​യി​രി​ക്കു​ന്നത്‌ പ്രധാ​ന​മാ​യി​രി​ക്കു​ന്ന​തെ​ന്തു​കൊണ്ട്‌?

²⁰ തന്റെ മാതാ​പി​താ​ക്കളെ സംരക്ഷി​ക്കു​ന്നതു സംബന്ധിച്ച്‌ ഒരു ക്രിസ്‌തീയ വനിത പറയുന്നു: “അതു പ്രയാ​സ​മാ​യി​രു​ന്നു. ഞാൻ അവർക്കു​വേണ്ടി പാചകം ചെയ്യു​ക​യും ശുചീ​ക​രണം നടത്തു​ക​യും കരച്ചിൽ രോഗത്തെ കൈകാ​ര്യം ചെയ്യു​ക​യും ഷീററു​കൾ മലമൂ​ത്ര​ങ്ങ​ളാൽ മലിന​മാ​കു​മ്പോൾ മാററി വിരി​ക്കു​ക​യും ചെയ്യേ​ണ്ടി​യി​രു​ന്നു.” “എന്നാൽ ഞങ്ങൾ അവർക്കു​വേണ്ടി എന്തെല്ലാം ചെയ്‌തോ അതെല്ലാം സന്തോ​ഷ​പൂർവ്വം, ഉല്ലാസ​പൂർവ്വം, ആണു ചെയ്‌തത്‌. അവരെ ശുശ്രൂ​ഷി​ക്കു​ന്നത്‌ ഞങ്ങൾക്ക്‌ അനിഷ്ട​മാ​ണെന്ന്‌ അവർ വിചാ​രി​ക്കു​വാൻ ഒരിക്ക​ലും അനുവ​ദി​ക്കാ​തി​രി​ക്കു​ന്ന​തിന്‌ ഞങ്ങൾ കഠിന​ശ്രമം ചെയ്‌തു” എന്ന്‌ അവളുടെ ഭർത്താവു പറയുന്നു. (2 കൊരി​ന്ത്യർ 9:7) പ്രായ​മു​ള്ളവർ മിക്ക​പ്പോ​ഴും സഹായം സ്വീക​രി​ക്കാൻ വിമു​ഖ​രാണ്‌. മററു​ള്ള​വർക്കു ഭാരമാ​യി​ത്തീ​രാൻ അവർ ആഗ്രഹി​ക്കു​ന്നില്ല. അങ്ങനെ നിങ്ങൾ പ്രകട​മാ​ക്കുന്ന മനോ​ഭാ​വം നിർണ്ണാ​യ​ക​മാണ്‌.

21. (എ) മാതാ​പി​താ​ക്കൾക്ക്‌ എങ്ങനെ സന്തോ​ഷ​ത്തോ​ടെ സ്വീക​രി​ക്കു​ന്ന​വ​രാ​യി​രി​ക്കാൻ കഴിയും? (ബി) മാതാ​പി​താ​ക്കൾ തങ്ങളുടെ വാർദ്ധക്യ കാല​ത്തേക്ക്‌ ആസൂ​ത്രണം ചെയ്യു​ന്നത്‌ ജ്ഞാനമാ​യി​രി​ക്കു​ന്ന​തെ​ന്തു​കൊണ്ട്‌?

²¹ അതേസ​മയം മാതാ​പി​താ​ക്കൾ പ്രകട​മാ​ക്കുന്ന മനോ​ഭാ​വ​വും പ്രധാ​ന​മാണ്‌. “ഞാൻ അമ്മക്കു​വേണ്ടി ചെയ്‌ത​തൊ​ന്നും ഒരിക്ക​ലും പോരാ​യി​രു​ന്നു” എന്ന്‌ ഒരു സഹോ​ദരി അനുസ്‌മ​രി​ക്കു​ന്നു. അതു​കൊണ്ട്‌, മാതാ​പി​താ​ക്കളേ, ന്യായ​ബോ​ധ​മി​ല്ലാ​ത്ത​വ​രോ അമിത​മായ ആവശ്യം ഉന്നയി​ക്കു​ന്ന​വ​രോ ആകാതി​രി​ക്കുക. ഏതായാ​ലും, “മക്കൾ മാതാ​പി​താ​ക്കൾക്കു​വേ​ണ്ടി​യല്ല, മാതാ​പി​താ​ക്കൾ മക്കൾക്കു​വേ​ണ്ടി​യാണ്‌ ചരതി​ക്കേ​ണ്ടത്‌” എന്ന്‌ ബൈബിൾ പറയുന്നു. (2 കൊരി​ന്ത്യർ 12:14) ചില മാതാ​പി​താ​ക്കൾ തങ്ങളുടെ വകകൾ ധൂർത്ത​ടി​ക്കു​ക​യും അവരുടെ മക്കൾക്ക്‌ ഒരു അനാവ​ശ്യ​ഭാ​ര​മാ​യി​ത്തീ​രു​ക​യും ചെയ്യുന്നു. എന്നിരു​ന്നാ​ലും, സദൃശ​വാ​ക്യ​ങ്ങൾ 13:22 പറയുന്നു: “നല്ലവൻ പുത്രൻമാ​രു​ടെ പുത്രൻമാർക്കു​വേണ്ടി ഒരു അവകാശം വെച്ചേ​ക്കു​ന്നു.” അതു​കൊണ്ട്‌, മാതാ​പി​താ​ക്കൾക്ക്‌ സാദ്ധ്യ​മാ​കുന്ന അളവിൽ തങ്ങളുടെ വാർദ്ധ​ക്യ​കാ​ല​ത്തി​നു​വേണ്ടി മുന്നമേ ആസൂ​ത്രണം ചെയ്യാ​നും ഫണ്ടുകൾ മാററി​വെ​ക്കാ​നും സ്വന്തം സംരക്ഷ​ണ​ത്തി​നു​വേണ്ടി ചില ക്രമീ​ക​ര​ണങ്ങൾ ചെയ്യാ​നും കഴിയും.—സദൃശ​വാ​ക്യ​ങ്ങൾ 21:5.

22. ഒരു വ്യക്തി തന്റെ വൃദ്ധ മാതാ​പി​താ​ക്കളെ സംരക്ഷി​ക്കാൻ ചെലു​ത്തുന്ന ശ്രമങ്ങളെ എങ്ങനെ വീക്ഷി​ക്കണം?

²² ഒരുവന്റെ മാതാ​പി​താ​ക്ക​ളു​ടെ പരിപാ​ലനം “തക്ക പ്രതി​ഫലം” ആണെന്ന്‌ പറഞ്ഞ​പ്പോൾ പൗലോസ്‌ നന്നായി​ത്തന്നെ പ്രസ്‌താ​വി​ച്ചു. (1 തിമൊ​ഥെ​യോസ്‌ 5:4) ഒരു സഹോ​ദരൻ പറയു​ന്ന​തു​പോ​ലെ, “അമ്മ എന്നെ 20 വർഷം പരിപാ​ലി​ച്ചു. അതി​നോ​ടു താരത​മ്യ​പ്പെ​ടു​ത്തു​മ്പോൾ ഞാൻ എന്തു ചെയ്‌തു?” വൃദ്ധ മാതാ​പി​താ​ക്ക​ളുള്ള എല്ലാ ക്രിസ്‌ത്യാ​നി​ക​ളും സമാന​മാ​യി ‘ഭവനത്തിൽ ദൈവി​ക​ഭക്തി ആചരി​ക്കാൻ’ പ്രേരി​ത​രാ​കട്ടെ, അവർ ദൈവ​ത്താൽ സമൃദ്ധ​മാ​യി അനു​ഗ്ര​ഹി​ക്ക​പ്പെ​ടു​മെന്ന്‌ അറിഞ്ഞു​കൊ​ണ്ടു​തന്നെ. തങ്ങളുടെ മാതാ​പി​താ​ക്കൻമാ​രെ ബഹുമാ​നി​ക്കു​ന്ന​വ​രോട്‌: ”നിങ്ങൾ ഭൂമി​യിൽ ദീർഘ​നാൾ നിലനിൽക്കു”മെന്ന്‌ അവനാണ്‌ വാഗ്‌ദാ​നം ചെയ്യു​ന്നത്‌.—എഫേസ്യർ 6:3. (w87 6/1)

ഓർമ്മിക്കേണ്ട പോയിൻറു​കൾ

◻ യേശു​വി​ന്റെ നാളിൽ ചിലർ തങ്ങളുടെ മാതാ​പി​താ​ക്ക​ളോ​ടുള്ള ഉത്തരവാ​ദി​ത്ത​ത്തിൽനിന്ന്‌ ഒഴിഞ്ഞു​മാ​റാൻ ശ്രമി​ച്ച​തെ​ങ്ങനെ?

◻ പ്രായ​മുള്ള മാതാ​പി​താ​ക്കളെ ആർ സംരക്ഷി​ക്കണം, എന്തു​കൊണ്ട്‌?

◻ മാതാ​പി​താ​ക്കൾ വീട്ടിൽ താമസി​ക്കാൻ വരു​മ്പോൾ കുടും​ബ​ങ്ങൾക്ക്‌ എന്തു പ്രശ്‌നങ്ങൾ അനുഭ​വ​പ്പെ​ട്ടേ​ക്കാം, അവയെ എങ്ങനെ തരണം ചെയ്യാൻ കഴിയും?

◻ നഴ്‌സിംഗ്‌ ഹോം സംരക്ഷണം ആവശ്യ​മാ​യി​രി​ക്കാ​വു​ന്ന​തെ​ന്തു​കൊണ്ട്‌? അതി​നോട്‌ പൊരു​ത്ത​പ്പെ​ടാൻ മാതാ​പി​താ​ക്കളെ എങ്ങനെ സഹായി​ക്കാൻ കഴിയും?

[18-ാം പേജിലെ ചിത്രം]

മാതാപിതാക്കളുടെ സംരക്ഷ​ണ​ത്തിൽ എങ്ങനെ പങ്കു​ചേ​രാ​മെന്ന്‌ ചർച്ച​ചെ​യ്യാൻ ഒരു കുടും​ബ​യോ​ഗം നടത്താ​വു​ന്ന​താണ്‌

[20-ാം പേജിലെ ചിത്രം]

നഴ്‌സിംഗ്‌ ഹോം സംരക്ഷണം ആവശ്യ​മാ​ണെ​ങ്കിൽ പ്രായ​മേ​റി​യ​വ​രു​ടെ വൈകാ​രി​ക​വും ആത്മീയ​വു​മായ ക്ഷേമത്തിന്‌ ക്രമമായ സന്ദർശ​നങ്ങൾ അത്യന്താ​പേ​ക്ഷി​ത​മാണ്‌