സകലർക്കും വേണ്ടി​യുള്ള ഒരു ഗ്രന്ഥം

‘ദൈവ​ത്തി​ന്നു മുഖപ​ക്ഷ​മില്ല, ഏതു ജാതി​യി​ലും അവനെ ഭയപ്പെട്ടു നീതി പ്രവർത്തി​ക്കു​ന്ന​വനെ അവൻ അംഗീ​ക​രി​ക്കു​ന്നു.’—പ്രവൃ​ത്തി​കൾ 10:34, 35.

1. ബൈബി​ളി​നെ​ക്കു​റിച്ച്‌ എന്തു വിചാ​രി​ക്കു​ന്നു​വെന്നു ചോദി​ച്ച​പ്പോൾ ഒരു പ്രൊ​ഫസർ എങ്ങനെ പ്രതി​ക​രി​ച്ചു, അദ്ദേഹം എന്തു ചെയ്യാൻ തീരു​മാ​നി​ച്ചു?

ഒരു ഞായറാഴ്‌ച ഉച്ചതി​രി​ഞ്ഞുള്ള സമയം. ഒരു പ്രൊ​ഫസർ തന്റെ ഭവനത്തി​ലി​രി​ക്കു​ക​യാ​യി​രു​ന്നു. അന്നാ​രെ​ങ്കി​ലും സന്ദർശ​ക​രാ​യി എത്തുമെന്ന പ്രതീ​ക്ഷ​യൊ​ന്നും അദ്ദേഹ​ത്തി​നു​ണ്ടാ​യി​രു​ന്നില്ല. അപ്പോ​ഴാ​ണു നമ്മുടെ ഒരു ക്രിസ്‌തീയ സഹോ​ദരി അദ്ദേഹ​ത്തി​ന്റെ ഭവനം സന്ദർശി​ക്കു​ന്നത്‌. അവൾക്കു പറയാ​നു​ള്ളത്‌ അദ്ദേഹം ശ്രദ്ധി​ച്ചു​കേട്ടു. അവൾ സംസാ​രി​ച്ചത്‌ അദ്ദേഹ​ത്തി​നി​ഷ്ട​പ്പെട്ട വിഷയ​ങ്ങ​ളാ​യി​രു​ന്നു—മലിനീ​ക​ര​ണ​വും ഭൂമി​യു​ടെ ഭാവി​യും. എന്നാൽ ചർച്ചയ്‌ക്കി​ട​യിൽ അവൾ ബൈബിൾ എടുത്ത​പ്പോൾ അദ്ദേഹം സംശയാ​ലു​വാ​യി കാണ​പ്പെട്ടു. അതു​കൊണ്ട്‌ ബൈബി​ളി​നെ​ക്കു​റിച്ച്‌ എന്തു വിചാ​രി​ക്കു​ന്നു​വെന്ന്‌ അവൾ അദ്ദേഹ​ത്തോ​ടു ചോദി​ച്ചു.

“അതൊരു നല്ല പുസ്‌ത​കം​തന്നെ, ബുദ്ധി​മാ​ന്മാ​രായ ചില മനുഷ്യർ എഴുതി​യത്‌. എങ്കിലും ഗൗരവ​ബു​ദ്ധി​യോ​ടെ കാണേണ്ട ഒന്നല്ല ബൈബിൾ,” അദ്ദേഹം മറുപടി പറഞ്ഞു.

“താങ്കൾ എന്നെങ്കി​ലും ബൈബിൾ വായി​ച്ചി​ട്ടു​ണ്ടോ?” അവൾ ചോദി​ച്ചു.

അമ്പരന്നു​പോ​യ ആ പ്രൊ​ഫ​സർക്ക്‌, താൻ അതു വായി​ച്ചി​ട്ടി​ല്ലെന്നു സമ്മതി​ക്കേ​ണ്ടി​വന്നു.

അപ്പോൾ അവൾ ഇങ്ങനെ ചോദി​ച്ചു: “ഒരിക്ക​ലും വായി​ക്കാത്ത ഒരു ഗ്രന്ഥ​ത്തെ​ക്കു​റി​ച്ചു താങ്കൾക്ക്‌ ഒരു ഉറച്ച അഭി​പ്രാ​യം പറയാൻ എങ്ങനെ സാധി​ക്കും?”

നമ്മുടെ സഹോ​ദരി പറഞ്ഞതിൽ കഴമ്പു​ണ്ടാ​യി​രു​ന്നു. ബൈബിൾ വായിച്ച്‌ അതേക്കു​റിച്ച്‌ ഒരഭി​പ്രാ​യം രൂപ​പ്പെ​ടു​ത്തി​യെ​ടു​ക്കാൻ പ്രൊ​ഫസർ തീരു​മാ​നി​ച്ചു.

2, 3. അനേക​മാ​ളു​കൾക്കും ബൈബിൾ ഒരു അടഞ്ഞ പുസ്‌ത​ക​മാ​യി​രി​ക്കു​ന്ന​തെ​ന്തു​കൊണ്ട്‌, ഇതു നമുക്ക്‌ എന്തു വെല്ലു​വി​ളി ഉയർത്തു​ന്നു?

² ഇക്കാര്യ​ത്തിൽ പ്രൊ​ഫസർ തനിച്ചല്ല. വ്യക്തി​പ​ര​മാ​യി ഒരിക്ക​ലും ബൈബിൾ വായി​ച്ചി​ട്ടി​ല്ലെ​ങ്കി​ലും അനേക​മാ​ളു​കൾക്കും അതി​നെ​ക്കു​റി​ച്ചു വ്യക്തമായ അഭി​പ്രാ​യ​ങ്ങ​ളുണ്ട്‌. അവരുടെ കൈവശം ഒരു ബൈബിൾ ഉണ്ടായി​രു​ന്നേ​ക്കാം. അതിന്റെ സാഹി​ത്യ​പ​ര​മോ ചരി​ത്ര​പ​ര​മോ ആയ മൂല്യം അവർ അംഗീ​ക​രി​ക്കു​ക​യും ചെയ്യു​ന്നു​ണ്ടാ​കാം. എന്നാൽ അനേകർക്കും അതൊരു അടഞ്ഞ പുസ്‌ത​ക​മാണ്‌. ‘ബൈബിൾ വായി​ക്കാൻ എനിക്കു സമയമില്ല’ എന്നു ചിലർ പറഞ്ഞേ​ക്കാം. ‘അത്തര​മൊ​രു പുരാതന ഗ്രന്ഥം എങ്ങനെ​യാണ്‌ എന്റെ ജീവി​ത​ത്തിൽ പ്രസക്ത​മാ​കുക?’ എന്നു ചിലർ ചിന്തി​ച്ചേ​ക്കാം. അത്തരം വീക്ഷണ​ഗ​തി​കൾ നമു​ക്കൊ​രു യഥാർഥ വെല്ലു​വി​ളി​യാണ്‌. ബൈബിൾ ‘ദൈവ​ശ്വാ​സീ​യമാ’ണെന്നും ‘ഉപദേ​ശ​ത്തി​നു പ്രയോ​ജ​ന​മു​ള്ളതാ’ണെന്നും യഹോ​വ​യു​ടെ സാക്ഷികൾ ഉറപ്പായി വിശ്വ​സി​ക്കു​ന്നു. (2 തിമൊ​ഥെ​യൊസ്‌ 3:16, 17) എന്നാൽ ആളുക​ളു​ടെ വർഗീ​യ​മോ ദേശീ​യ​മോ വംശീ​യ​മോ ആയ പശ്ചാത്തലം ഏതായി​രു​ന്നാ​ലും തങ്ങൾ ബൈബിൾ പരി​ശോ​ധി​ക്കേ​ണ്ട​താ​ണെന്നു നമു​ക്കെ​ങ്ങനെ അവരെ ബോധ്യ​പ്പെ​ടു​ത്താ​നാ​കും?

³ ബൈബിൾ പരി​ശോ​ധ​നാർഹ​മാ​ണെ​ന്ന​തി​ന്റെ ഏതാനും കാരണങ്ങൾ നമുക്കു ചർച്ച​ചെ​യ്യാം. അത്തരം ചർച്ച ശുശ്രൂ​ഷ​യിൽ കണ്ടുമു​ട്ടു​ന്ന​വ​രു​മാ​യി ന്യായ​വാ​ദം ചെയ്യാൻ നമ്മെ സജ്ജരാ​ക്കു​മെന്നു മാത്രമല്ല, ബൈബിൾ പറയു​ന്നത്‌ തങ്ങൾ പരിഗ​ണി​ക്കേ​ണ്ട​താ​ണെന്ന്‌ അവരെ ബോധ്യ​പ്പെ​ടു​ത്താ​നും ഒരുപക്ഷേ ഉതകി​യേ​ക്കാം. അതേസ​മയം, ബൈബിൾ, അത്‌ അവകാ​ശ​പ്പെ​ടു​ന്ന​തു​പോ​ലെ, നിശ്ചയ​മാ​യും “ദൈവ​ത്തി​ന്റെ വചനം” തന്നെയാ​ണെന്ന നമ്മു​ടെ​തന്നെ വിശ്വാ​സത്തെ ഈ പുനര​വ​ലോ​കനം ബലിഷ്‌ഠ​മാ​ക്കു​ക​യും ചെയ്യും.—എബ്രായർ 4:12.

ലോക​ത്തിൽ ഏറ്റവും വ്യാപ​ക​മാ​യി വിതരണം ചെയ്യ​പ്പെ​ട്ടി​രി​ക്കുന്ന പുസ്‌ത​കം

4. ലോക​ത്തിൽ ഏറ്റവും വ്യാപ​ക​മാ​യി വിതരണം ചെയ്യ​പ്പെ​ട്ടി​രി​ക്കുന്ന ഗ്രന്ഥം ബൈബി​ളാ​ണെന്നു പറയാ​വു​ന്ന​തെ​ന്തു​കൊണ്ട്‌?

⁴ ബൈബിൾ പരിഗ​ണ​നാർഹ​മാ​യി​രി​ക്കു​ന്ന​തി​ന്റെ ഒരു കാരണം അത്‌ മനുഷ്യ​ച​രി​ത്ര​ത്തിൽ ഏറ്റവും കൂടുതൽ വിതരണം ചെയ്യ​പ്പെ​ട്ടി​രി​ക്കു​ന്ന​തും ഏറ്റവും കൂടുതൽ ഭാഷക​ളി​ലേക്കു പരിഭാ​ഷ​പ്പെ​ടു​ത്ത​പ്പെ​ട്ടി​രി​ക്കു​ന്നതു​മായ പുസ്‌ത​ക​മാണ്‌ എന്നതാണ്‌. 500-ലധികം വർഷം​മുമ്പ്‌, കൈ​കൊ​ണ്ടു നിരത്താ​വുന്ന അച്ചുപ​യോ​ഗിച്ച്‌ നിർമിച്ച അതിന്റെ ആദ്യത്തെ അച്ചടിച്ച പതിപ്പ്‌ യോഹ​നസ്‌ ഗുട്ടൻബെർഗി​ന്റെ പ്രസ്സിൽനി​ന്നു പുറത്തി​റങ്ങി. അന്നുമു​തൽ 400 കോടി ബൈബി​ളു​കൾ മുഴു​വ​നാ​യോ ഭാഗി​ക​മാ​യോ അച്ചടി​ച്ചി​ട്ടു​ള്ള​താ​യി കണക്കാ​ക്ക​പ്പെ​ടു​ന്നു. 1996 ആയപ്പോ​ഴേ​ക്കും, ബൈബിൾ പൂർണ​മാ​യോ ഭാഗി​ക​മാ​യോ 2,167 ഭാഷക​ളി​ലേ​ക്കും ഉപഭാ​ഷ​ക​ളി​ലേ​ക്കും പരിഭാ​ഷ​പ്പെ​ടു​ത്ത​പ്പെ​ട്ടി​ട്ടുണ്ട്‌.a മാനവ​രാ​ശി​യു​ടെ 90 ശതമാ​ന​ത്തി​ല​ധി​കം പേർക്കും ബൈബിൾ ഭാഗി​ക​മാ​യെ​ങ്കി​ലും മാതൃ​ഭാ​ഷ​യിൽ ലഭ്യമാണ്‌. മതപര​മോ ലൗകി​ക​മോ ആയ വേറൊ​രു പുസ്‌ത​ക​വും ഇതിന​ടു​ത്തു​പോ​ലും വരുന്നില്ല!

5. ബൈബിൾ ലോക​മെ​മ്പാ​ടു​മുള്ള ആളുകൾക്കു ലഭ്യമാ​യി​രി​ക്ക​ണ​മെന്നു നാം പ്രതീ​ക്ഷി​ക്കേ​ണ്ട​തെ​ന്തു​കൊണ്ട്‌?

⁵ സ്ഥിതി​വി​വ​ര​ക്ക​ണ​ക്കു​കൾ മാത്രം​കൊണ്ട്‌ ബൈബിൾ ദൈവ​ത്തി​ന്റെ വചനമാ​ണെന്നു തെളി​യു​ന്നില്ല. എങ്കിലും, ദൈവ​നി​ശ്വ​സ്‌ത​മായ ഒരു ലിഖി​ത​രേഖ ലോക​മെ​മ്പാ​ടു​മുള്ള ആളുകൾക്കു ലഭ്യമാ​യി​രി​ക്കേ​ണ്ട​താ​ണെന്നു നാം നിശ്ചയ​മാ​യും പ്രതീ​ക്ഷി​ക്കും. എന്തുത​ന്നെ​യാ​യാ​ലും, “ദൈവ​ത്തി​ന്നു മുഖപ​ക്ഷ​മില്ല എന്നും ഏതു ജാതി​യി​ലും അവനെ ഭയപ്പെട്ടു നീതി പ്രവർത്തി​ക്കു​ന്ന​വനെ അവൻ അംഗീ​ക​രി​ക്കു​ന്നു” എന്നും ബൈബിൾതന്നെ പറയു​ന്നു​ണ്ട​ല്ലോ. (പ്രവൃ​ത്തി​കൾ 10:34, 35) മറ്റേ​തൊ​രു പുസ്‌ത​ക​ത്തിൽനി​ന്നും വ്യത്യ​സ്‌ത​മാ​യി, ബൈബിൾ ദേശീയ അതിർത്തി​കൾ കടക്കു​ക​യും വർഗീ​യ​വും വംശീ​യ​വു​മായ പ്രതി​ബ​ന്ധ​ങ്ങളെ മറിക​ട​ക്കു​ക​യും ചെയ്‌തി​രി​ക്കു​ന്നു. സത്യമാ​യും, സകലർക്കും വേണ്ടി​യുള്ള ഒരു ഗ്രന്ഥമാണ്‌ ബൈബിൾ!

പരിര​ക്ഷി​ക്ക​പ്പെ​ട്ടി​രി​ക്കു​ന്ന​തി​ന്റെ അനുപ​മ​ച​രി​ത്ര​മു​ള്ളത്‌

6, 7. ബൈബി​ളി​ന്റെ മൂല എഴുത്തു​കൾ ഇപ്പോ​ഴു​ള്ള​താ​യി അറിവി​ല്ലെ​ന്ന​തിൽ അതിശ​യി​ക്കാ​നി​ല്ലാ​ത്ത​തെ​ന്തു​കൊണ്ട്‌, ഇത്‌ എന്തു ചോദ്യ​മു​യർത്തു​ന്നു?

⁶ മറ്റൊരു കാരണ​ത്താ​ലും ബൈബിൾ പരി​ശോ​ധന അർഹി​ക്കു​ന്നു. പ്രകൃ​തി​ജ​ന്യ​വും മാനു​ഷി​ക​വു​മായ പ്രതി​ബ​ന്ധ​ങ്ങളെ അതു തരണം ചെയ്‌തി​രി​ക്കു​ന്നു. കനത്ത വെല്ലു​വി​ളി​ക​ളു​ണ്ടാ​യി​രു​ന്നി​ട്ടും അതു പരിര​ക്ഷി​ക്ക​പ്പെട്ട ചരിത്രം ഇതിനെ മറ്റു പുരാതന ഗ്രന്ഥങ്ങൾക്കി​ട​യിൽ യഥാർഥ​ത്തിൽ അനുപ​മ​മാ​ക്കു​ന്നു.

⁷ ബൈബി​ളെ​ഴു​ത്തു​കാർ പപ്പൈ​റ​സി​ലും (ഇതേ പേരുള്ള ഒരു ഈജി​പ്‌ഷ്യൻ ചെടി​യിൽനിന്ന്‌ ഉണ്ടാക്കി​യത്‌) ചർമപ​ത്ര​ത്തി​ലും (മൃഗങ്ങ​ളു​ടെ തോൽകൊണ്ട്‌ ഉണ്ടാക്കി​യത്‌) മഷി​കൊ​ണ്ടാണ്‌ എഴുതി​യ​തെ​ന്നതു വ്യക്തമാണ്‌.b (ഇയ്യോബ്‌ 8:11) എന്നാൽ അത്തരം എഴുത്തു​സാ​മ​ഗ്രി​കൾക്കു പ്രകൃ​തി​ജന്യ ശത്രു​ക്ക​ളു​ണ്ടാ​യി​രു​ന്നു. പണ്ഡിത​നായ ഒസ്‌കാർ പാരറ്റ്‌ വിശദ​മാ​ക്കു​ന്നു: “എഴുതു​ന്ന​തി​നുള്ള ഈ രണ്ടു മാധ്യ​മ​ങ്ങ​ളും ഈർപ്പം, പൂപ്പൽ, പലതരം കീടങ്ങൾ തുടങ്ങി​യ​വ​യാ​ലൊ​ക്കെ ഒരു​പോ​ലെ നശിച്ചു​പോ​കു​ന്ന​വ​യാണ്‌. കടലാസ്‌, ബലമുള്ള തുകൽപോ​ലും, വായു​സ​മ്പർക്ക​ത്തി​ലോ നനവുള്ള മുറി​യി​ലോ ഇരിക്കു​മ്പോൾ എത്ര പെട്ടെന്നു നശിച്ചു​പോ​കു​ന്നു​വെന്ന്‌ അനുദിന അനുഭ​വ​ത്തിൽനി​ന്നു നമുക്ക​റി​യാം.” അതു​കൊണ്ട്‌ ബൈബി​ളി​ന്റെ മൂല എഴുത്തു​കൾ എവി​ടെ​യെ​ങ്കി​ലും ഉള്ളതായി അറിവി​ല്ലെ​ന്ന​തിൽ അതിശ​യി​ക്കാ​നില്ല; അവ പണ്ടുതന്നെ ജീർണി​ച്ചു​പോ​യി​രി​ക്കാം. എന്നാൽ മൂല ലിഖി​തങ്ങൾ പ്രകൃ​തി​ജന്യ ശത്രു​ക്കൾക്ക്‌ അടി​പ്പെ​ട്ടു​പോ​യെ​ങ്കിൽ, ബൈബി​ളെ​ഴു​ത്തു​കൾ നമ്മുടെ കാലം​വരെ നിലനി​ന്ന​തെ​ങ്ങനെ?

8. നൂറ്റാ​ണ്ടു​ക​ളാ​യി ബൈബി​ളെ​ഴു​ത്തു​കൾ പരിര​ക്ഷി​ക്ക​പ്പെ​ട്ടി​രി​ക്കു​ന്ന​തെ​ങ്ങനെ?

⁸ മൂല ലിഖി​തങ്ങൾ എഴുത​പ്പെ​ട്ട​തി​നു​ശേഷം ഉടൻതന്നെ കൈ​കൊ​ണ്ടു പകർത്തി​യെ​ഴു​തിയ പ്രതികൾ ഉണ്ടാക്കി​ത്തു​ടങ്ങി. വാസ്‌ത​വ​ത്തിൽ ന്യായ​പ്ര​മാ​ണ​വും തിരു​വെ​ഴു​ത്തി​ന്റെ മറ്റു ഭാഗങ്ങ​ളും പകർത്തി​യെ​ഴു​തു​ന്നത്‌ പുരാതന ഇസ്രാ​യേ​ലിൽ ഒരു തൊഴി​ലാ​യി​ത്തീർന്നു. ഉദാഹ​ര​ണ​ത്തിന്‌, പുരോ​ഹി​ത​നായ എസ്രായെ “മോശ​യു​ടെ ന്യായ​പ്ര​മാ​ണ​ത്തി​ന്റെ ഒരു വിദഗ്‌ധ പകർപ്പെ​ഴു​ത്തു​കാ​രൻ” എന്നു വിളി​ച്ചി​രി​ക്കു​ന്നു. (എസ്രാ 7:6, 11, NW; സങ്കീർത്തനം 45:1 താരത​മ്യം ചെയ്യുക.) എന്നാൽ പകർപ്പെ​ടു​ത്ത​തും നശ്വര വസ്‌തു​ക്ക​ളിൽത്ത​ന്നെ​യാ​യി​രു​ന്നു; കാല​ക്ര​മേണ അവയുടെ സ്ഥാനത്ത്‌ കൈ​കൊ​ണ്ടെ​ഴു​തിയ മറ്റു പകർപ്പു​കൾ ഉണ്ടാ​ക്കേ​ണ്ടി​വന്നു. പിന്നെ പകർപ്പു​ക​ളു​ടെ പകർപ്പെ​ടു​ക്ക​ലാ​യി. ഈ പ്രക്രിയ നൂറ്റാ​ണ്ടു​ക​ളോ​ളം തുടർന്നു. മനുഷ്യർ പൂർണ​ര​ല്ലാ​ത്ത​തു​കൊണ്ട്‌, പകർപ്പെ​ഴു​ത്തു​കാ​രു​ടെ തെറ്റുകൾ ബൈബിൾ പാഠത്തി​നു സാരമായ മാറ്റം വരുത്തി​യി​ട്ടു​ണ്ടോ? ഇല്ലെന്ന്‌ തെളി​വു​ക​ളു​ടെ കൂമ്പാരം പറയുന്നു!

9. മാസരി​റ്റു​കാ​രു​ടെ മാതൃക ബൈബിൾ പകർപ്പെ​ഴു​ത്തു​കാ​രു​ടെ അതീവ ശ്രദ്ധ​യെ​യും കൃത്യ​ത​യെ​യും ദൃഷ്ടാ​ന്തീ​ക​രി​ക്കു​ന്ന​തെ​ങ്ങനെ?

⁹ പകർപ്പെ​ഴു​ത്തു​കാർ വളരെ വിദഗ്‌ധ​രാ​യി​രു​ന്നു​വെന്നു മാത്രമല്ല, പകർത്തുന്ന വചന​ത്തോട്‌ അവർക്ക്‌ ആഴമായ ആദരവു​മു​ണ്ടാ​യി​രു​ന്നു. “പകർപ്പെ​ഴു​ത്തു​കാ​രൻ” എന്നതി​നുള്ള എബ്രാ​യ​പ​ദ​ത്തിന്‌ എണ്ണി​രേ​ഖ​പ്പെ​ടു​ത്തൽ എന്ന പരാമർശ​മുണ്ട്‌. പകർപ്പെ​ഴു​ത്തു​കാ​രു​ടെ അതീവ ശ്രദ്ധയും കൃത്യ​ത​യും ദൃഷ്ടാ​ന്തീ​ക​രി​ക്കു​ന്ന​തിന്‌ പൊ.യു. ആറാം നൂറ്റാ​ണ്ടി​നും പത്താം നൂറ്റാ​ണ്ടി​നു​മി​ട​യിൽ ജീവി​ച്ചി​രുന്ന, എബ്രായ തിരു​വെ​ഴു​ത്തു​ക​ളു​ടെ പകർപ്പെ​ഴു​ത്തു​കാ​രായ മാസരി​റ്റു​കാ​രു​ടെ കാര്യ​മെ​ടു​ക്കുക. പണ്ഡിത​നായ തോമസ്‌ ഹാർട്ട്‌വെൽ ഹോൺ പറയു​ന്ന​ത​നു​സ​രിച്ച്‌, “എബ്രായ തിരു​വെ​ഴു​ത്തു​ക​ളിൽ [എബ്രായ] അക്ഷരമാ​ല​യി​ലെ ഓരോ അക്ഷരവും എത്ര പ്രാവ​ശ്യം വരുന്നു​ണ്ടെ”ന്ന്‌ അവർ തിട്ട​പ്പെ​ടു​ത്തി​യി​രു​ന്നു. അതിന്റെ അർഥ​മെ​ന്താ​ണെന്നു ചിന്തി​ച്ചു​നോ​ക്കൂ! ഒരൊറ്റ അക്ഷരം​പോ​ലും വിട്ടു​പോ​കാ​തി​രി​ക്കാൻ, അർപ്പണ​ബോ​ധ​മുള്ള ഈ പകർപ്പെ​ഴു​ത്തു​കാർ പകർത്തി​യെ​ഴു​തി​യി​രുന്ന വാക്കുകൾ മാത്രമല്ല, അക്ഷരങ്ങ​ളും എണ്ണി​നോ​ക്കി​യി​രു​ന്നു. ഒരു പണ്ഡിതന്റെ കണക്കു​പ്ര​കാ​രം, എബ്രായ തിരു​വെ​ഴു​ത്തു​ക​ളി​ലെ 8,15,140 അക്ഷരങ്ങൾ അവർ എണ്ണുക​യു​ണ്ടാ​യി! ശുഷ്‌കാ​ന്തി​യോ​ടെ​യുള്ള അത്തരം ഉദ്യമം വലിയ അളവി​ലുള്ള കൃത്യത ഉറപ്പാക്കി.

10. ആധുനിക പരിഭാ​ഷകൾ ആധാര​മാ​യി എടുത്തി​ട്ടുള്ള എബ്രായ, ഗ്രീക്കു പാഠങ്ങൾ മൂല എഴുത്തു​കാ​രു​ടെ വാക്കു​ക​ളെ​ത്തന്നെ പുനരാ​വി​ഷ്‌ക​രി​ക്കു​ന്നു​വെ​ന്ന​തിന്‌ ശക്തമായ എന്തു തെളി​വുണ്ട്‌?

¹⁰ വാസ്‌ത​വ​ത്തിൽ, ആധുനിക പരിഭാ​ഷകൾ അവയുടെ ആധാര​മാ​യി എടുത്തി​ട്ടുള്ള എബ്രായ, ഗ്രീക്കു പാഠങ്ങൾ മൂല എഴുത്തു​കാ​രു​ടെ വാക്കു​ക​ളെ​ത്തന്നെ ശ്രദ്ധേ​യ​മായ വിശ്വാ​സ്യ​ത​യോ​ടെ പുനരാ​വി​ഷ്‌ക​രി​ച്ചി​രി​ക്കു​ന്നു​വെ​ന്ന​തിന്‌ ശക്തമായ തെളി​വുണ്ട്‌. നമ്മുടെ കാലം​വരെ അതിജീ​വി​ച്ചി​രി​ക്കുന്ന ബൈബിൾ കയ്യെഴു​ത്തു​പ്ര​തി​ക​ളു​ടെ ആയിര​ക്ക​ണ​ക്കി​നു പകർപ്പു​കൾ—എബ്രായ തിരു​വെ​ഴു​ത്തു​ക​ളു​ടെ പൂർണ​മോ ഭാഗി​ക​മോ ആയ 6,000-ത്തോള​വും ഗ്രീക്കു ഭാഷയി​ലുള്ള ക്രിസ്‌തീയ തിരു​വെ​ഴു​ത്തു​ക​ളു​ടെ 5,000-ത്തോള​വും പകർപ്പു​കൾ—അതിന്റെ തെളി​വാണ്‌. നിലവി​ലുള്ള അനേകം കയ്യെഴു​ത്തു​പ്ര​തി​ക​ളു​ടെ ശ്രദ്ധ​യോ​ടെ​യുള്ള ഒരു താരതമ്യ അപഗ്ര​ഥ​ന​ത്തി​ലൂ​ടെ പകർപ്പെ​ഴു​ത്തു​കാ​രു​ടെ തെറ്റുകൾ കണ്ടുപി​ടി​ക്കാ​നും മൂലവാ​ക്യ​ങ്ങൾ നിർണ​യി​ക്കാ​നും പാഠനി​രൂ​പ​കർക്കു സാധി​ക്കു​ന്നു. എബ്രായ തിരു​വെ​ഴു​ത്തു​ഭാ​ഗ​ങ്ങ​ളെ​ക്കു​റി​ച്ചു പറയവേ, പണ്ഡിത​നായ വില്യം എച്ച്‌. ഗ്രീൻ ഇങ്ങനെ പ്രസ്‌താ​വി​ച്ചു: “മറ്റൊരു പുരാതന ഗ്രന്ഥവും ഇത്ര കൃത്യ​മാ​യി പകർത്തി​യെ​ഴു​ത​പ്പെ​ട്ടി​ട്ടില്ല എന്നു ധൈര്യ​മാ​യി പറയാം.” ക്രിസ്‌തീയ ഗ്രീക്കു തിരു​വെ​ഴു​ത്തു​ക​ളെ​ക്കു​റി​ച്ചും അതു​പോ​ലെ ഉറപ്പിച്ചു പറയാ​വു​ന്ന​താണ്‌.

11. 1 പത്രൊസ്‌ 1:24, 25-ന്റെ വെളി​ച്ച​ത്തിൽ, ബൈബിൾ നമ്മുടെ നാൾവരെ അതിജീ​വി​ച്ചി​രി​ക്കു​ന്ന​തെ​ന്തു​കൊണ്ട്‌?

¹¹ മൂല എഴുത്തു​ക​ളു​ടെ സ്ഥാനത്ത്‌ കൈ​കൊ​ണ്ടെ​ഴു​തിയ പകർപ്പു​കൾ വന്നില്ലാ​യി​രു​ന്നെ​ങ്കിൽ, ബൈബി​ളും അതിന്റെ അമൂല്യ സന്ദേശ​വും എത്ര പെട്ടെന്ന്‌ മൺമറ​ഞ്ഞു​പോ​യേനേ! അതിന്റെ അതിജീ​വ​ന​ത്തിന്‌ ഒറ്റ കാരണ​മേ​യു​ള്ളൂ: യഹോ​വ​യാണ്‌ തന്റെ വചനത്തി​ന്റെ പരിപാ​ല​ക​നും സംരക്ഷ​ക​നും. 1 പത്രൊസ്‌ 1:24, 25-ൽ ബൈബിൾതന്നെ അതു പറയു​ന്നുണ്ട്‌: “സകലജ​ഡ​വും പുല്ലു​പോ​ലെ​യും അതിന്റെ ഭംഗി എല്ലാം പുല്ലിന്റെ പൂപോ​ലെ​യും ആകുന്നു; പുല്ലു​വാ​ടി, പൂവു​തിർന്നു​പോ​യി; കർത്താ​വി​ന്റെ വചനമോ എന്നേക്കും നിലനി​ല്‌ക്കു​ന്നു.”

മനുഷ്യ​വർഗ​ത്തി​ന്റെ ജീവദ്‌ഭാ​ഷ​ക​ളി​ലേക്ക്‌

12. നൂറ്റാ​ണ്ടു​ക​ളോ​ള​മുള്ള ആവർത്തി​ച്ചുള്ള പകർപ്പെ​ഴു​ത്തി​നു പുറമേ, ബൈബി​ളി​നു വേറേ എന്തു പ്രതി​ബന്ധം നേരിട്ടു?

¹² നൂറ്റാ​ണ്ടു​ക​ളോ​ള​മുള്ള പകർപ്പെ​ഴുത്ത്‌ ദുഷ്‌ക​രം​ത​ന്നെ​യാ​യി​രു​ന്നു. എന്നാൽ ബൈബി​ളി​നു മറ്റൊരു പ്രതി​ബ​ന്ധ​വും ഉണ്ടായി​രു​ന്നു—സമകാ​ലീന ഭാഷക​ളി​ലേ​ക്കുള്ള പരിഭാഷ. ആളുക​ളു​ടെ ഹൃദയ​ത്തിൽ എത്തി​ച്ചേ​ര​ണ​മെ​ങ്കിൽ ബൈബിൾ അവരുടെ ഭാഷക​ളിൽ ലഭ്യമാ​യി​രി​ക്കണം. എന്നിരു​ന്നാ​ലും, 1,100-ലധികം അധ്യാ​യ​ങ്ങ​ളും 31,000-ത്തിലധി​കം വാക്യ​ങ്ങ​ളു​മുള്ള ബൈബിൾ പരിഭാ​ഷ​പ്പെ​ടു​ത്തു​ക​യെ​ന്നത്‌ അത്ര എളുപ്പ​മുള്ള പണിയല്ല. എന്നിട്ടും, പലപ്പോ​ഴും മറിക​ട​ക്കാ​നാ​കാ​ത്ത​തെന്നു തോന്നിയ പ്രതി​ബ​ന്ധ​ങ്ങളെ നേരി​ട്ടു​കൊണ്ട്‌ നൂറ്റാ​ണ്ടു​ക​ളി​ലു​ട​നീ​ളം, അർപ്പി​ത​രായ പരിഭാ​ഷകർ സന്തോ​ഷ​പൂർവം പ്രസ്‌തുത വെല്ലു​വി​ളി ഏറ്റെടു​ക്കു​ക​യാ​യി​രു​ന്നു.

13, 14. (എ) 19-ാം നൂറ്റാ​ണ്ടി​ന്റെ ആദ്യഘ​ട്ട​ത്തിൽ ബൈബിൾ പരിഭാ​ഷ​ക​നായ റോബർട്ട്‌ മോഫ​റ്റിന്‌ ആഫ്രി​ക്ക​യിൽ എന്തു വെല്ലു​വി​ളി നേരിട്ടു? (ബി) ലൂക്കൊ​സി​ന്റെ സുവി​ശേഷം തങ്ങളുടെ ഭാഷയിൽ ലഭ്യമാ​യ​പ്പോൾ റ്റ്‌സ്വാന ഭാഷക്കാ​രായ ആളുകൾ പ്രതി​ക​രി​ച്ച​തെ​ങ്ങനെ?

¹³ ഉദാഹ​ര​ണ​ത്തിന്‌, ആഫ്രിക്കൻ ഭാഷക​ളി​ലേക്ക്‌ ബൈബിൾ പരിഭാ​ഷ​പ്പെ​ടു​ത്തി​യ​തെ​ങ്ങ​നെ​യെന്നു പരിചി​ന്തി​ക്കുക. 1800-ൽ, ഏതാണ്ട്‌ ഒരു ഡസൻ ലിഖിത ഭാഷകളേ ആഫ്രി​ക്ക​യി​ലെ​ങ്ങും ഉണ്ടായി​രു​ന്നു​ള്ളൂ. നൂറു​ക​ണ​ക്കി​നു മറ്റു സംസാര ഭാഷകൾക്കു ലിപി​യി​ല്ലാ​യി​രു​ന്നു. റോബർട്ട്‌ മോഫറ്റ്‌ എന്ന ബൈബിൾ പരിഭാ​ഷ​കനു നേരി​ടേ​ണ്ടി​വന്ന വെല്ലു​വി​ളി അങ്ങനെ​യു​ള്ള​താ​യി​രു​ന്നു. 1821-ൽ, 25 വയസ്സു​ള്ള​പ്പോൾ, മോഫറ്റ്‌ തെക്കനാ​ഫ്രി​ക്ക​യിൽ റ്റ്‌സ്വാന സംസാ​രി​ക്കു​ന്ന​വ​രു​ടെ ഇടയിൽ ഒരു ദൗത്യം ഏറ്റെടു​ത്തു. അവരുടെ അലിഖിത ഭാഷ പഠിക്കു​ന്ന​തി​നാ​യി അദ്ദേഹം ജനങ്ങളു​മാ​യി ഇഴുകി​ച്ചേർന്നു. ഭാഷാ​സ​ഹാ​യി​ക​ളോ നിഘണ്ടു​ക്ക​ളോ ഇല്ലാതി​രു​ന്നി​ട്ടും സ്ഥിരോ​ത്സാ​ഹം കൈ​വെ​ടി​യാഞ്ഞ മോഫറ്റ്‌ അവസാനം ആ ഭാഷ സ്വായ​ത്ത​മാ​ക്കുക മാത്രമല്ല, അതിനു ലിഖി​ത​രൂ​പം നൽകു​ക​യും ചെയ്‌തു. ചിലരെ അദ്ദേഹം റ്റ്‌സ്വാന ലിപി വായി​ക്കാൻ പഠിപ്പി​ക്കു​ക​യും ചെയ്‌തു. റ്റ്‌സ്വാ​ന​ക്കാർക്കി​ട​യിൽ എട്ടു വർഷം പ്രവർത്തി​ച്ച​തി​നു​ശേഷം 1829-ൽ മോഫറ്റ്‌ ലൂക്കൊ​സി​ന്റെ സുവി​ശേ​ഷ​ത്തി​ന്റെ പരിഭാഷ പൂർത്തി​യാ​ക്കി. പിൽക്കാ​ലത്ത്‌ അദ്ദേഹം ഇങ്ങനെ പറയു​ക​യു​ണ്ടാ​യി: “വിശുദ്ധ ലൂക്കൊ​സി​ന്റെ സുവി​ശേ​ഷ​ത്തി​ന്റെ പ്രതി​കൾക്കാ​യി ആളുകൾ നൂറു​ക​ണ​ക്കി​നു മൈൽ അകലെ​നി​ന്നു വന്നതായി ഞാനോർക്കു​ന്നു. . . . അവർ ലൂക്കൊ​സി​ന്റെ സുവി​ശേ​ഷ​ത്തി​ന്റെ ഭാഗങ്ങൾ വാങ്ങി, അതി​നെ​പ്രതി കരഞ്ഞു. അവരതു മാറോ​ട​ണച്ച്‌ നന്ദിസൂ​ച​ക​മാ​യി കണ്ണീർ പൊഴി​ച്ചു. ‘കണ്ണീരു​കൊ​ണ്ടു നിങ്ങൾ പുസ്‌ത​കങ്ങൾ ചീത്തയാ​ക്കും’ എന്ന്‌ എനിക്ക്‌ ഒടുവിൽ പലരോ​ടും പറയേ​ണ്ടി​വന്നു.” ലൂക്കൊ​സി​ന്റെ സുവി​ശേഷം വായി​ക്കുന്ന പലരെ​യും കണ്ട്‌ അവരുടെ കൈക​ളി​ലെ​ന്താ​ണെന്നു ചോദിച്ച ഒരു ആഫ്രി​ക്ക​ക്കാ​ര​നെ​ക്കു​റി​ച്ചും മോഫറ്റ്‌ പറഞ്ഞു. “ഇതു ദൈവ​വ​ച​ന​മാണ്‌” എന്നവർ പ്രതി​വ​ചി​ച്ചു. “അതു സംസാ​രി​ക്കു​മോ?” അദ്ദേഹം ചോദി​ച്ചു. “ഉവ്വ്‌, അതു ഹൃദയ​ത്തോ​ടു സംസാ​രി​ക്കും,” അവർ പറഞ്ഞു.

¹⁴ അനേകം ആഫ്രി​ക്ക​ക്കാർക്കും ലിഖി​ത​മാർഗ​ത്തി​ലൂ​ടെ ആശയവി​നി​യമം നടത്താൻ ആദ്യമാ​യി അവസര​മൊ​രു​ക്കി​യത്‌ മോഫ​റ്റി​നെ​പ്പോ​ലെ​യുള്ള അർപ്പി​ത​രായ പരിഭാ​ഷ​ക​രാ​യി​രു​ന്നു. എന്നാൽ ആ പരിഭാ​ഷകർ ആഫ്രിക്കൻ ജനതയ്‌ക്ക്‌ അതിലും മൂല്യ​വ​ത്തായ ദാനം നൽകി—അവരുടെ മാതൃ​ഭാ​ഷ​യി​ലുള്ള ബൈബിൾ. അതിലു​മു​പരി, മോഫറ്റ്‌ റ്റ്‌സ്വാ​ന​ക്കാർക്കു ദിവ്യ​നാ​മം പരിച​യ​പ്പെ​ടു​ത്തി. തന്റെ പരിഭാ​ഷ​യി​ലു​ട​നീ​ളം അദ്ദേഹം ആ നാമം ഉപയോ​ഗി​ക്കു​ക​യും ചെയ്‌തു.c അതിനാൽ, റ്റ്‌സ്വാ​ന​ക്കാർ ബൈബി​ളി​നെ “യഹോ​വ​യു​ടെ വായ്‌” എന്നാണ്‌ പരാമർശി​ച്ചത്‌.—സങ്കീർത്തനം 83:18.

15. ബൈബിൾ ഇന്നും ജീവനു​ള്ള​താ​യി​രി​ക്കു​ന്ന​തെ​ന്തു​കൊണ്ട്‌?

¹⁵ ലോക​ത്തി​ന്റെ പലഭാ​ഗ​ങ്ങ​ളി​ലു​മുള്ള മറ്റു പരിഭാ​ഷ​കർക്കും സമാന​മായ പ്രതി​ബ​ന്ധങ്ങൾ നേരിട്ടു. ജീവൻ പണയ​പ്പെ​ടു​ത്തി​ക്കൊ​ണ്ടു​പോ​ലും ചിലർ ബൈബിൾ പരിഭാ​ഷ​പ്പെ​ടു​ത്തി. ഒന്നോർത്തു നോക്കുക: എബ്രാ​യ​യി​ലും ഗ്രീക്കി​ലും മാത്ര​മാണ്‌ ബൈബിൾ ലഭ്യമാ​യി​രു​ന്ന​തെ​ങ്കിൽ, ദീർഘ​നാൾമു​മ്പേ അതു “മൃത”മായി​പ്പോ​കു​മാ​യി​രു​ന്നു, എന്തെന്നാൽ കാല​ക്ര​മ​ത്തിൽ ആളുകൾ ഈ ഭാഷകൾ മിക്കവാ​റും വിസ്‌മ​രി​ച്ചു. ഭൂമി​യു​ടെ അനേകം ഭാഗങ്ങ​ളി​ലും അവയെ​ക്കു​റിച്ച്‌ ഒരറി​വും ഉണ്ടായി​രു​ന്നില്ല. എന്നിട്ടും ബൈബിൾ ജീവ​നോ​ടി​രി​ക്കു​ന്നു, എന്തെന്നാൽ വേറേ ഏതൊരു പുസ്‌ത​ക​ത്തിൽനി​ന്നും വ്യത്യ​സ്‌ത​മാ​യി, അതിന്‌ ലോക​മെ​മ്പാ​ടു​മുള്ള ആളുക​ളോട്‌ അവരുടെ സ്വന്തം ഭാഷയിൽ “സംസാ​രി​ക്കാൻ” സാധി​ക്കും. തത്‌ഫ​ല​മാ​യി, “[അതിന്റെ] വിശ്വാ​സി​ക​ളിൽ” അതിന്റെ സന്ദേശം “പ്രവർത്തി​ച്ചു​കൊ​ണ്ടി​രി​ക്കു​ന്നു.” (1 തെസ്സ​ലൊ​നീ​ക്യർ 2:13, NW) ദ ജെറു​സ​ലേം ബൈബിൾ ഈ വാക്കുകൾ ഇങ്ങനെ പരിഭാ​ഷ​പ്പെ​ടു​ത്തി​യി​രി​ക്കു​ന്നു: “അതു വിശ്വ​സി​ക്കുന്ന നിങ്ങൾക്കി​ട​യിൽ അത്‌ ഇപ്പോ​ഴും ജീവി​ക്കു​ന്നൊ​രു ശക്തിയാണ്‌.”

ആശ്രയ​യോ​ഗ്യം

16, 17. (എ) ബൈബിൾ ആശ്രയ​യോ​ഗ്യ​മാ​യി​രി​ക്ക​ണ​മെ​ങ്കിൽ, എന്തു തെളി​വു​ണ്ടാ​യി​രി​ക്കണം? (ബി) ബൈബി​ളെ​ഴു​ത്തു​കാ​ര​നായ മോശ​യു​ടെ നിഷ്‌ക​പടത ദൃഷ്ടാ​ന്തീ​ക​രി​ക്കുന്ന ഒരു ഉദാഹ​രണം നൽകുക.

¹⁶ ‘ബൈബിൾ യഥാർഥ​ത്തിൽ ആശ്രയ​യോ​ഗ്യ​മാ​ണോ?’ എന്നു ചിലർ സംശയി​ച്ചേ​ക്കാം. ‘യഥാർഥ​ത്തിൽ ജീവി​ച്ചി​രു​ന്ന​വ​രെ​യും വാസ്‌ത​വ​ത്തിൽ ഉണ്ടായി​രുന്ന സ്ഥലങ്ങ​ളെ​യും ശരിക്കും സംഭവിച്ച കാര്യ​ങ്ങ​ളെ​യും കുറി​ച്ചാ​ണോ അതു പരാമർശി​ക്കു​ന്നത്‌?’ ശ്രദ്ധാ​ലു​ക്ക​ളും സത്യസ​ന്ധ​രു​മായ എഴുത്തു​കാർ എഴുതി​യ​താ​ണെ​ന്ന​തി​നു തെളി​വു​ണ്ടെ​ങ്കി​ലേ നമുക്ക​തി​നെ ആശ്രയി​ക്കാൻ കഴിയു​ക​യു​ള്ളൂ. ഇതു നമുക്കു ബൈബിൾ പരി​ശോ​ധി​ക്കു​ന്ന​തി​നുള്ള മറ്റൊരു കാരണം പ്രദാനം ചെയ്യുന്നു: അതു കൃത്യ​ത​യു​ള്ള​തും ആശ്രയ​യോ​ഗ്യ​വു​മാ​ണെ​ന്നു​ള്ള​തിന്‌ ഈടുറ്റ തെളി​വുണ്ട്‌.

¹⁷ സത്യസ​ന്ധ​രായ എഴുത്തു​കാർ കേവലം വിജയ​ങ്ങ​ളും കഴിവു​ക​ളും മാത്രമല്ല പരാജ​യ​ങ്ങ​ളും ദൗർബ​ല്യ​ങ്ങ​ളും രേഖ​പ്പെ​ടു​ത്തും. ബൈബി​ളെ​ഴു​ത്തു​കാർ നവോ​ന്മേ​ഷ​പ്ര​ദ​മായ അത്തരം നിഷ്‌ക​പടത പ്രകട​മാ​ക്കി. ഉദാഹ​ര​ണ​ത്തിന്‌, മോശ​യു​ടെ സത്യസന്ധത പരിചി​ന്തി​ക്കുക. മോശ​യു​ടെ ഒന്നും ഒളിക്കാ​തെ​യുള്ള റിപ്പോർട്ടു​ക​ളിൽ ചിലതാണ്‌ തനിക്കു വാഗ്‌ചാ​തു​ര്യ​മി​ല്ലാ​ത്ത​തി​നാൽ ഇസ്രാ​യേ​ലി​ന്റെ നായക​നാ​കാ​നുള്ള തന്റെ അയോ​ഗ്യത (പുറപ്പാ​ടു 4:10); ഗുരു​ത​ര​മായ തെറ്റു ചെയ്‌ത​തി​നെ​ത്തു​ടർന്ന്‌ വാഗ്‌ദ​ത്ത​ദേ​ശ​ത്തേക്കു പ്രവേ​ശി​ക്കു​ന്ന​തിന്‌ അനുമതി നിഷേ​ധി​ക്ക​പ്പെ​ട്ടത്‌ (സംഖ്യാ​പു​സ്‌തകം 20:9-12; 27:12-14); മത്സരി​ക​ളായ ഇസ്രാ​യേ​ല്യ​രു​മാ​യി സഹകരിച്ച്‌ സ്വർണ കാളക്കു​ട്ടി​യെ ഉണ്ടാക്കിയ സ്വന്തം സഹോ​ദ​ര​നായ അഹരോ​നു പറ്റിയ പിഴവ്‌ (പുറപ്പാ​ടു 32:1-6); സഹോ​ദ​രി​യായ മിര്യാ​മി​ന്റെ മത്സരവും അവൾക്കു ലഭിച്ച ലജ്ജാക​ര​മായ ശിക്ഷയും (സംഖ്യാ​പു​സ്‌തകം 12:1-3, 10); മച്ചുന​ന്മാ​രായ നാദാ​ബി​ന്റെ​യും അബീഹൂ​വി​ന്റെ​യും ദൈവ​നി​ന്ദാ​ക​ര​മായ പ്രവൃ​ത്തി​കൾ (ലേവ്യ​പു​സ്‌തകം 10:1, 2); ദൈവ​ത്തി​ന്റെ സ്വന്തം ജനം ആവർത്തി​ച്ചു​ന​ട​ത്തിയ പരാതി​ക​ളും പിറു​പി​റു​പ്പു​ക​ളും. (പുറപ്പാ​ടു 14:11, 12; സംഖ്യാ​പു​സ്‌തകം 14:1-10) അങ്ങനെ ആത്മാർഥ​വും സത്യസ​ന്ധ​വു​മാ​യി വിവരങ്ങൾ രേഖ​പ്പെ​ടു​ത്തി​യത്‌ സത്യ​ത്തോ​ടുള്ള ഒരു യഥാർഥ താത്‌പ​ര്യ​ത്തെ​യല്ലേ സൂചി​പ്പി​ക്കു​ന്നത്‌? തങ്ങളുടെ പ്രിയ​പ്പെ​ട്ട​വ​രു​ടെ​യും സ്വജന​ത്തി​ന്റെ​യും തങ്ങളു​ടെ​ത​ന്നെ​യും പോരാ​യ്‌മകൾ രേഖ​പ്പെ​ടു​ത്താൻ ബൈബി​ളെ​ഴു​ത്തു​കാർ മനസ്സൊ​രു​ക്കം കാണി​ച്ചു​വെ​ന്നത്‌ അവരുടെ എഴുത്തു​ക​ളിൽ വിശ്വാ​സ​മർപ്പി​ക്കാൻ മതിയായ കാരണ​മല്ലേ?

18. ബൈബി​ളെ​ഴു​ത്തു​കാ​രു​ടെ എഴുത്തു​കളെ വിശ്വാ​സ​യോ​ഗ്യ​മാ​യി തിരി​ച്ച​റി​യി​ക്കു​ന്ന​തെന്ത്‌?

¹⁸ ബൈബി​ളെ​ഴു​ത്തു​കാ​രു​ടെ പൂർവാ​പ​ര​യോ​ജിപ്പ്‌ അവരുടെ എഴുത്തു​കളെ വിശ്വാ​സ​യോ​ഗ്യ​മാ​യി തിരി​ച്ച​റി​യി​ക്കു​ന്നു. 1,600-ലധികം വർഷം​കൊണ്ട്‌ 40 പുരു​ഷ​ന്മാർ എഴുതി​യ​താ​യി​രു​ന്നി​ട്ടും ചെറിയ വിശദാം​ശ​ങ്ങ​ളു​ടെ കാര്യ​ത്തിൽപ്പോ​ലും അവർക്കു പരസ്‌പ​ര​യോ​ജി​പ്പു​ണ്ടെ​ന്നത്‌ വാസ്‌ത​വ​ത്തിൽ ശ്രദ്ധേ​യ​മാണ്‌. എന്നാൽ ഒത്തുക​ളി​യു​ണ്ടോ എന്നു തോന്നി​പ്പി​ക്കു​ന്ന​വി​ധം കോർത്തി​ണ​ക്കി​യ​തൊ​ന്നു​മല്ല ഈ യോജിപ്പ്‌. മറിച്ച്‌ വ്യത്യസ്‌ത വിശദാം​ശ​ങ്ങ​ളു​ടെ ഈ യോജി​പ്പിൽ ആസൂ​ത്ര​ണ​മി​ല്ലാ​യ്‌മ​യാണ്‌ ദൃശ്യ​മാ​കു​ന്നത്‌; പലപ്പോ​ഴും ഈ യോജിപ്പ്‌ യാദൃ​ച്ഛി​ക​മാ​ണെന്നു വ്യക്തം.

19. യേശു​വി​ന്റെ അറസ്റ്റി​നെ​ക്കു​റി​ച്ചുള്ള സുവി​ശേ​ഷ​വി​വ​ര​ണങ്ങൾ വ്യക്തമാ​യും മനഃപൂർവം കെട്ടി​ച്ച​മ​ച്ച​ത​ല്ലാത്ത പൂർവാ​പ​ര​യോ​ജിപ്പ്‌ വെളി​പ്പെ​ടു​ത്തു​ന്ന​തെ​ങ്ങനെ?

¹⁹ ദൃഷ്ടാ​ന്ത​ത്തിന്‌, യേശു​വി​നെ അറസ്റ്റു​ചെയ്‌ത രാത്രി​യിൽ നടന്ന ഒരു സംഭവ​മെ​ടു​ക്കാം. ശിഷ്യ​ന്മാ​രിൽ ഒരുവൻ വാളൂരി മഹാപു​രോ​ഹി​തന്റെ ദാസനെ വെട്ടി അയാളു​ടെ ചെവി അറുത്തു എന്ന്‌ നാലു സുവി​ശേ​ക​ന്മാ​രും രേഖ​പ്പെ​ടു​ത്തു​ന്നു. എന്നാൽ ലൂക്കൊസ്‌ മാത്രമേ യേശു “അവന്റെ കാതു തൊട്ടു സൌഖ്യ​മാ​ക്കി” എന്നു പറയു​ന്നു​ള്ളൂ. (ലൂക്കൊസ്‌ 22:51) എന്നാൽ അതല്ലേ ‘വൈദ്യ​നായ പ്രിയ ലൂക്കൊസ്‌’ എന്നറി​യ​പ്പെ​ടുന്ന എഴുത്തു​കാ​ര​നിൽനി​ന്നു നാം പ്രതീ​ക്ഷി​ക്കു​ന്നത്‌? (കൊ​ലൊ​സ്സ്യർ 4:14) സന്നിഹി​ത​രാ​യി​രുന്ന ശിഷ്യ​ന്മാ​രിൽ വാളെ​ടുത്ത്‌ പ്രയോ​ഗി​ച്ചത്‌ പത്രൊസ്‌ ആയിരു​ന്നു​വെന്ന്‌ യോഹ​ന്നാ​ന്റെ വിവരണം നമ്മോടു പറയുന്നു—വീണ്ടു​വി​ചാ​ര​മി​ല്ലാ​ത്ത​വ​നും എടുത്തു​ചാ​ട്ട​ക്കാ​ര​നു​മാണ്‌ പത്രൊസ്‌ എന്നതി​നാൽ ഈ വസ്‌തു​ത​യിൽ അതിശ​യി​ക്കാ​നില്ല. (യോഹ​ന്നാൻ 18:10; മത്തായി 16:22, 23-ഉം യോഹ​ന്നാൻ 21:7, 8-ഉം താരത​മ്യം ചെയ്യുക.) അപ്രധാ​ന​മെന്നു തോന്നുന്ന ഒരു വിശദാം​ശം യോഹ​ന്നാൻ റിപ്പോർട്ടു​ചെ​യ്യു​ന്നു. “ആ ദാസന്നു മല്‌ക്കൊസ്‌ എന്നു പേർ.” യോഹ​ന്നാൻ മാത്രം ആ മമനു​ഷ്യ​ന്റെ പേർ നൽകു​ന്ന​തെ​ന്തു​കൊണ്ട്‌? യോഹ​ന്നാ​ന്റെ വിവര​ണ​ത്തിൽ, സന്ദർഭ​വ​ശാൽ അവൻ നടത്തുന്ന ഒരു പരാമർശ​ത്തിൽ അതിനുള്ള വിശദീ​ക​ര​ണ​മുണ്ട്‌—യോഹ​ന്നാൻ “മഹാപു​രോ​ഹി​തന്നു പരിച​യ​മു​ള്ളവ”നായി​രു​ന്നു. അവൻ മഹാപു​രോ​ഹി​തന്റെ വീട്ടു​കാർക്കും പരിച​യ​ക്കാ​ര​നാ​യി​രു​ന്നു; അവിടു​ത്തെ ദാസന്മാർക്ക്‌ അവനെ​യും അവന്‌ അവരെ​യും പരിയ​ച​യ​മു​ണ്ടാ​യി​രു​ന്നു.d (യോഹ​ന്നാൻ 18:10, 15, 16) അതിനാൽ പരി​ക്കേ​റ്റ​യാ​ളു​ടെ പേർ പറയു​ന്നത്‌ യോഹ​ന്നാ​നെ സംബന്ധി​ച്ചി​ട​ത്തോ​ളം തികച്ചും സ്വാഭാ​വി​ക​മാ​യി​രു​ന്നു. എന്നാൽ വ്യക്തമാ​യും മറ്റു സുവി​ശേ​ഷ​കർക്ക്‌ അയാൾ അപരി​ചി​ത​നാ​യി​രു​ന്ന​തു​കൊണ്ട്‌ അവർ അതു ചെയ്യു​ന്നില്ല. ഈ വിശദാം​ശ​ങ്ങ​ളി​ലെ പൊരു​ത്തം ശ്രദ്ധേ​യ​മാ​ണെ​ങ്കി​ലും മനഃപൂർവം വരുത്തി​യ​ത​ല്ലെന്നു വ്യക്തമാണ്‌. ബൈബി​ളി​ലു​ട​നീ​ളം സമാന​മായ ദൃഷ്ടാ​ന്തങ്ങൾ അനവധി​യാണ്‌.

20. പരമാർഥ​ഹൃ​ദയർ ബൈബി​ളി​നെ​ക്കു​റിച്ച്‌ എന്തറി​യേ​ണ്ട​തുണ്ട്‌?

²⁰ അതു​കൊണ്ട്‌ നമുക്കു ബൈബി​ളിൽ ആശ്രയി​ക്കാ​നാ​കു​മോ? തീർച്ച​യാ​യും! ബൈബി​ളെ​ഴു​ത്തു​കാ​രു​ടെ നിഷ്‌ക​പ​ട​ത​യും ബൈബി​ളി​ന്റെ ആന്തരിക യോജി​പ്പും അതു സത്യമാ​ണെന്നു വ്യക്തമാ​യി പ്രതി​ധ്വ​നി​പ്പി​ക്കു​ന്നു. തങ്ങൾക്കു ബൈബി​ളിൽ ആശ്രയി​ക്കാ​നാ​കു​മെന്ന്‌ പരമാർഥ​ഹൃ​ദയർ അറി​യേ​ണ്ട​തുണ്ട്‌, എന്തെന്നാൽ അത്‌ “സത്യത്തി​ന്റെ ദൈവ​മായ യഹോവ”യുടെ നിശ്വ​സ്‌ത​വ​ച​ന​മാണ്‌. (സങ്കീർത്തനം 31:5, NW) ബൈബിൾ സകലർക്കും വേണ്ടി​യുള്ള ഗ്രന്ഥമാ​ണെ​ന്ന​തിന്‌ വേറെ​യും കാരണ​ങ്ങ​ളുണ്ട്‌. നാം അത്‌ അടുത്ത ലേഖന​ത്തിൽ പരിചി​ന്തി​ക്കു​ന്ന​താ​യി​രി​ക്കും.

[അടിക്കു​റി​പ്പു​കൾ]

നിങ്ങൾ എങ്ങനെ ഉത്തരം പറയും?

□ ബൈബിൾ ലോക​ത്തി​ലെ​ല്ലാ​വർക്കും ലഭ്യമായ ഒരു ഗ്രന്ഥമാ​യി​രി​ക്ക​ണ​മെന്നു നാം പ്രതീ​ക്ഷി​ക്കേ​ണ്ട​തെ​ന്തു​കൊണ്ട്‌?

□ ബൈബിൾ കൃത്യ​മാ​യി പരിര​ക്ഷി​ക്ക​പ്പെ​ട്ടി​രി​ക്കു​ന്നു​വെ​ന്ന​തിന്‌ എന്തു തെളി​വുണ്ട്‌?

□ ബൈബിൾ പരിഭാ​ഷ​കർക്ക്‌ എന്തെല്ലാം പ്രതി​ബ​ന്ധങ്ങൾ നേരിട്ടു?

□ ബൈബി​ളെ​ഴു​ത്തു​കളെ വിശ്വാ​സ​യോ​ഗ്യ​മാ​യി തിരി​ച്ച​റി​യി​ക്കു​ന്ന​തെന്ത്‌?