യേശു​വി​ന്റെ അത്ഭുത​ങ്ങ​ളിൽനി​ന്നുള്ള പാഠങ്ങൾ

“മൂന്നാം നാൾ ഗലീല​യി​ലെ കാനാ​വിൽ ഒരു കല്യാണം ഉണ്ടായി; . . . യേശു​വി​നെ​യും ശിഷ്യൻമാ​രെ​യും കല്യാ​ണ​ത്തി​ന്നു ക്ഷണിച്ചി​രു​ന്നു. വീഞ്ഞു പോരാ​തെ​വ​രി​ക​യാൽ യേശു​വി​ന്റെ അമ്മ അവനോ​ടു: അവർക്കു വീഞ്ഞു ഇല്ല എന്നു പറഞ്ഞു.” ഈ സംഭവം യേശു​വി​ന്റെ ആദ്യത്തെ അത്ഭുത​ത്തിന്‌ വേദി ഒരുക്കി.—യോഹ​ന്നാൻ 2:1-3.

യേശു​വി​ന്റെ ശ്രദ്ധ അർഹി​ക്കാഞ്ഞ, അപ്രധാ​ന​മായ, നിസ്സാ​ര​മായ ഒരു പ്രശ്‌ന​മാ​യി​രു​ന്നി​ല്ലേ അത്‌? “ആതി​ഥ്യോ​പ​ചാ​രം എന്നതു പൗരസ്‌ത്യ​ദേ​ശത്ത്‌ ഒരു പാവന കർമമാ​യി​രു​ന്നു . . . യഥാർഥ ആതി​ഥ്യോ​പ​ചാ​രം, പ്രത്യേ​കി​ച്ചും ഒരു വിവാ​ഹ​വി​രു​ന്നിൽ, സമൃദ്ധ​മായ ഭക്ഷണപാ​നീ​യങ്ങൾ ഉപലബ്ധ​മാ​ക്കു​ന്ന​തി​നെ അർഥമാ​ക്കി. ഒരു വിവാ​ഹ​വി​രു​ന്നിൽ ഭക്ഷണപാ​നീ​യ​ങ്ങ​ളു​ടെ ശേഖരം തീർന്നു​പോ​കു​ന്നതു കുടും​ബാം​ഗ​ങ്ങ​ളു​ടെ​യും യുവദ​മ്പ​തി​ക​ളും മുഖത്തു കരിവാ​രി​ത്തേ​ക്കു​ന്ന​തി​നു സമാന​മാ​യി​രു​ന്നു” എന്ന്‌ ഒരു ബൈബിൾ പണ്ഡിതൻ വിശദീ​ക​രി​ക്കു​ന്നു.

യേശു അതു​കൊ​ണ്ടു നടപടി സ്വീക​രി​ച്ചു. “യെഹൂ​ദൻമാ​രു​ടെ ശുദ്ധീ​ക​ര​ണ​നി​യമം അനുസ​രി​ച്ചു . . . ആറു കല്‌പാ​ത്രം” അവിടെ വെച്ചി​രി​ക്കു​ന്നത്‌ അവൻ നിരീ​ക്ഷി​ച്ചു. ഭക്ഷണം കഴിക്കു​ന്ന​തി​നു​മു​മ്പുള്ള ആചാര​പ്ര​കാ​ര​മുള്ള കഴുക്ക്‌ യഹൂദൻമാ​രു​ടെ​യി​ട​യിൽ പരമ്പരാ​ഗ​ത​മാ​യി​രു​ന്ന​തി​നാൽ സന്നിഹി​ത​രാ​യ​വ​രു​ടെ ആവശ്യങ്ങൾ നിറ​വേ​റ​റാൻ ധാരാളം വെള്ളം ആവശ്യ​മാ​യി​രു​ന്നു. “ഈ കല്‌പാ​ത്ര​ങ്ങ​ളിൽ വെള്ളം നിറപ്പിൻ” എന്ന്‌ അതിഥി​കളെ പരിച​രി​ക്കു​ന്ന​വ​രോട്‌ യേശു പറഞ്ഞു. യേശു “വിരു​ന്നു​വാ​ഴി” ആയിരു​ന്നില്ല, എങ്കിലും അവൻ നേരി​ട്ടും അധികാ​ര​ത്തോ​ടും​കൂ​ടെ സംസാ​രി​ച്ചു. വൃത്താന്തം ഇങ്ങനെ പറയുന്നു: “വീഞ്ഞാ​യി​ത്തീർന്ന വെള്ളം വിരു​ന്നു​വാ​ഴി രുചി​നോ​ക്കി.”—യോഹ​ന്നാൻ 2:6-9; മർക്കൊസ്‌ 7:3.

യേശു​വി​ന്റെ ആദ്യത്തെ അത്ഭുത​ത്തി​ന്റെ രംഗവി​ധാ​നം വിവാ​ഹം​പോ​ലെ ഒരു സാധാരണ സംഭവ​മാ​യി​രു​ന്നെ​ന്നതു വിചി​ത്ര​മാ​യി തോന്നി​യേ​ക്കാം. എന്നാൽ ആ സംഭവം യേശു​വി​നെ​പ്പ​ററി വളരെ​യ​ധി​കം കാര്യങ്ങൾ വെളി​പ്പെ​ടു​ത്തു​ന്നു. അവൻ അവിവാ​ഹി​ത​നാ​യി​രു​ന്നു. പല സന്ദർഭ​ങ്ങ​ളി​ലും യേശു ഏകാകി​ത്വ​ത്തി​ന്റെ പ്രയോ​ജ​ന​ങ്ങ​ളെ​പ്പ​ററി തന്റെ ശിഷ്യൻമാ​രു​മാ​യി ചർച്ച നടത്തു​ക​യും ചെയ്‌തു. (മത്തായി 19:12) എന്നിരു​ന്നാ​ലും, ഒരു വിവാ​ഹ​വി​രു​ന്നി​ലെ അവന്റെ സാന്നി​ധ്യം അവൻ വിവാ​ഹ​ത്തിന്‌ എതിര​ല്ലാ​യി​രു​ന്നു​വെന്നു വ്യക്തമാ​ക്കി. അവൻ സന്തുലിത ചിന്താ​ഗ​തി​യു​ള്ള​വ​നാ​യി​രു​ന്നു, വിവാഹ ക്രമീ​ക​ര​ണത്തെ പിന്തു​ണ​യ്‌ക്കു​ന്ന​വ​നു​മാ​യി​രു​ന്നു; ദൈവ​ദൃ​ഷ്ടി​യിൽ മാന്യ​മായ ഒന്നായി അവൻ അതിനെ വീക്ഷിച്ചു.—താരത​മ്യം ചെയ്യുക: എബ്രായർ 13:4.

സഭാ ചിത്ര​കാ​രൻമാർ അവനെ പിൽക്കാ​ല​ങ്ങ​ളിൽ ചിത്രീ​ക​രി​ച്ച​മാ​തി​രി​യുള്ള അപ്രസ​ന്ന​നായ സന്ന്യാസി ആയിരു​ന്നില്ല യേശു. സ്‌പഷ്ട​മാ​യും അവൻ ആളുക​ളു​മാ​യി ഇടപഴ​കു​ന്നത്‌ ആസ്വദി​ച്ചു. അവൻ സാമൂ​ഹിക കൂടി​വ​ര​വു​കൾ വെറു​ത്തി​രു​ന്നില്ല. (താരത​മ്യം ചെയ്യുക: ലൂക്കൊസ്‌ 5:29.) അവന്റെ പ്രവൃ​ത്തി​കൾ അങ്ങനെ അവന്റെ അനുഗാ​മി​കൾക്ക്‌ ഒരു മാതൃ​ക​യാ​യി. നീതി​യെ​ന്നാൽ സന്തോ​ഷ​ര​ഹി​ത​രാ​യി​രി​ക്കുക എന്നാണ്‌ അർഥ​മെ​ന്ന​പോ​ലെ തന്റെ ശിഷ്യൻമാർ അനാവ​ശ്യ​മാ​യി ഗൗരവ​പ്ര​കൃ​ത​മു​ള്ള​വ​രോ വിഷണ്ണ​രോ ആയിക്കൂ​ടാ എന്ന്‌ അവൻ വ്യക്തി​പ​ര​മാ​യി പ്രകട​മാ​ക്കി. നേരേ​മ​റിച്ച്‌, “കർത്താ​വിൽ എപ്പോ​ഴും സന്തോ​ഷി​പ്പിൻ” എന്നു ക്രിസ്‌ത്യാ​നി​കൾ പിന്നീടു കൽപ്പി​ക്ക​പ്പെട്ടു. (ഫിലി​പ്പി​യർ 4:4) വിനോ​ദത്തെ ന്യായ​മായ പരിധി​ക്കു​ള്ളിൽ നിർത്താൻ ക്രിസ്‌ത്യാ​നി​കൾ ഇന്നു ശ്രദ്ധ ചെലു​ത്തു​ന്നു. അവർ ദൈവ​സേ​വ​ന​ത്തിൽ സന്തുഷ്ടി​യ​ട​യു​ന്നു, എന്നാൽ യേശു​വി​ന്റെ മാതൃക പിൻപ​റ​റി​ക്കൊണ്ട്‌ അവർ ചില​പ്പോ​ഴെ​ല്ലാം സാമൂ​ഹിക കൂടി​വ​ര​വി​ലൂ​ടെ ആനന്ദമ​നു​ഭ​വി​ക്കാൻ സമയം കണ്ടെത്തു​ന്നു.

യേശു​വി​ന്റെ ആർദ്ര​വി​കാ​ര​ങ്ങ​ളും നിരീ​ക്ഷി​ക്കുക. ഒരു അത്ഭുതം പ്രവർത്തി​ക്ക​ണ​മെന്ന യാതൊ​രു കടപ്പാ​ടി​ലു​മാ​യി​രു​ന്നില്ല അവൻ. ഇതി​നോ​ടുള്ള ബന്ധത്തിൽ നിവൃ​ത്തി​യേ​റേ​ണ്ടി​യി​രുന്ന ഒരു പ്രവച​ന​വു​മി​ല്ലാ​യി​രു​ന്നു. യേശു തന്റെ അമ്മയുടെ ജിജ്ഞാ​സ​യും വിവാ​ഹി​ത​രാ​കുന്ന ദമ്പതി​ക​ളു​ടെ അവസ്ഥയും തിരി​ച്ച​റി​ഞ്ഞ​തി​നാൽ പ്രേരി​ത​നാ​വു​ക​യാ​യി​രു​ന്നു. അവൻ അവരുടെ ചേതോ​വി​കാ​ര​ങ്ങളെ മാനി​ക്കു​ക​യും അവർക്കു നാണ​ക്കേട്‌ ഒഴിവാ​ക്കാൻ ആഗ്രഹി​ക്കു​ക​യും ചെയ്‌തു. ക്രിസ്‌തു​വിന്‌ നിങ്ങളിൽ—നിങ്ങളു​ടെ ദൈനം​ദിന പ്രശ്‌ന​ങ്ങ​ളിൽപ്പോ​ലും യഥാർഥ താത്‌പ​ര്യ​മു​ണ്ടെന്ന ആത്മവി​ശ്വാ​സം നട്ടുവ​ളർത്താൻ ഇതു നിങ്ങളെ സഹായി​ക്കു​ന്നി​ല്ലേ?—താരത​മ്യം ചെയ്യുക: എബായർ 4:14-16.

ഓരോ കല്‌പാ​ത്ര​ത്തി​ലും വെള്ളം “രണ്ടോ മൂന്നോ പറ വീതം കൊള്ളു”മായി​രു​ന്ന​തി​നാൽ വലിയ അളവിൽ വീഞ്ഞു​ണ്ടാ​ക്കുന്ന അത്ഭുത​മാണ്‌ യേശു ചെയ്‌തത്‌—ഒരുപക്ഷേ 390 ലിററർ (105 ഗ്യാലൻ)! (യോഹ​ന്നാൻ 2:6) അത്രയും ഭീമമായ അളവിന്റെ ആവശ്യം എന്തായി​രു​ന്നു? യേശു ദൈവം കുററം​വി​ധി​ക്കുന്ന അമിത​മ​ദ്യ​പാ​നത്തെ പ്രോ​ത്സാ​ഹി​പ്പി​ക്കു​ക​യാ​യി​രു​ന്നില്ല. (എഫെസ്യർ 5:18) മറിച്ച്‌, അവൻ ദൈവ​സ​മാ​ന​മായ ഉദാരത പ്രകടി​പ്പി​ക്കു​ക​യാ​യി​രു​ന്നു. വീഞ്ഞ്‌ ഒരു സാധാരണ പാനീ​യ​മാ​യി​രു​ന്ന​തി​നാൽ അവശേ​ഷി​ക്കു​ന്നത്‌ മററു സന്ദർഭ​ങ്ങ​ളിൽ ഉപയോ​ഗി​ക്കാ​നാ​വു​മാ​യി​രു​ന്നു.—താരത​മ്യം ചെയ്യുക: മത്തായി 14:14-20; 15:32-37.

ആദിമ ക്രിസ്‌ത്യാ​നി​കൾ ഉദാര​ത​യു​ടെ കാര്യ​ത്തിൽ യേശു​വി​ന്റെ ദൃഷ്ടാന്തം അനുക​രി​ച്ചു. (താരത​മ്യം ചെയ്യുക: പ്രവൃ​ത്തി​കൾ 4:34, 35.) ‘കൊടു​ക്കു​ന്നത്‌ അഭ്യസി​ക്കു​വാൻ’ യഹോ​വ​യു​ടെ ജനം ഇന്ന്‌ സമാന​മാ​യി പ്രോ​ത്സാ​ഹി​പ്പി​ക്ക​പ്പെ​ടു​ക​യാണ്‌. (ലൂക്കൊസ്‌ 6:38) എന്നിരു​ന്നാ​ലും, യേശു​വി​ന്റെ ആദ്യത്തെ അത്ഭുതം പ്രാവ​ച​നി​ക​പ​ര​മാ​യും പ്രാധാ​ന്യ​മു​ള്ള​താണ്‌. അത്‌ ദൈവം ഉദാര​പൂർവം “മൃഷ്ട​ഭോ​ജ​ന​ങ്ങൾകൊ​ണ്ടും മട്ടൂറിയ വീഞ്ഞു​കൊ​ണ്ടും ഒരു വിരുന്നു കഴിക്കു”കയും സമ്പൂർണ​മാ​യി വിശപ്പു തുടച്ചു​മാ​റ​റു​ക​യും ചെയ്യുന്ന ഒരു ഭാവി​സ​മ​യ​ത്തേക്കു വിരൽ ചൂണ്ടു​ക​യാണ്‌.—യെശയ്യാ​വു 25:6.

എന്നുവ​രി​കി​ലും, യേശു പ്രവർത്തിച്ച ശാരീ​രിക സൗഖ്യം ഉൾപ്പെട്ട അത്ഭുത​ങ്ങളെ സംബന്ധി​ച്ചെന്ത്‌? അവയിൽനി​ന്നു നമുക്ക്‌ എന്തു പഠിക്കാൻ കഴിയും?

ശബത്തിൽ നൻമ ചെയ്യൽ

“എഴു​ന്നേ​ററു നിന്റെ കിടക്ക എടുത്തു നടക്ക.” 38 വർഷമാ​യി രോഗ​ബാ​ധി​ത​നായ ഒരുവ​നോ​ടുള്ള യേശു​വി​ന്റെ വാക്കു​ക​ളാ​യി​രു​ന്നു അത്‌. സുവി​ശേഷ വിവരണം ഇങ്ങനെ തുടരു​ന്നു: “ഉടനെ ആ മനുഷ്യൻ സൌഖ്യ​മാ​യി കിടക്ക എടുത്തു നടന്നു.” ഈ സംഭവ​വി​കാ​സ​ത്തിൽ എല്ലാവ​രു​മൊ​ന്നും ആനന്ദി​ത​രാ​യി​രു​ന്നില്ല എന്നത്‌ ആശ്ചര്യ​ജ​ന​ക​മാണ്‌. “യേശു ശബത്തിൽ അതു ചെയ്‌ക​കൊ​ണ്ടു യെഹൂ​ദൻമാർ അവനെ ഉപദ്ര​വി​ച്ചു” എന്ന്‌ ആ വൃത്താന്തം പറയുന്നു.—യോഹ​ന്നാൻ 5:1-9, 16.

ശബത്ത്‌ സകല​രെ​യും സംബന്ധി​ച്ചി​ട​ത്തോ​ളം വിശ്ര​മ​ത്തി​നും ആനന്ദത്തി​നു​മുള്ള ഒരു ദിനമാ​യി​രു​ന്നു. (പുറപ്പാ​ടു 20:8-11) യേശു​വി​ന്റെ നാളോ​ടെ അത്‌ മർദക​മായ, മനുഷ്യ​നിർമി​ത​മായ കുഴപ്പം​പി​ടിച്ച നിയമ​ങ്ങ​ളി​ലൊ​ന്നാ​യി മാറി​യി​രു​ന്നു. തൽമൂ​ദിൽ ശബത്ത്‌ നിയമ​ത്തെ​പ്പ​ററി സുദീർഘ​മാ​യി വിവരി​ക്കുന്ന ഭാഗങ്ങ​ളിൽ, “കാര്യാ​ദി​കൾ മതപര​മാ​യി മർമ​പ്ര​ധാ​ന​മു​ള്ള​താ​യി സഗൗരവം ചർച്ച​ചെ​യ്‌തി​രി​ക്കു​ന്നു. യുക്തി​ബോ​ധ​മുള്ള ഒരുവൻ അതു ഗൗരവ​മു​ള്ള​താ​യി പരിചി​ന്തി​ക്കാൻ വിരള​മായ സാധ്യതയേയുള്ളൂ” എന്ന്‌ പണ്ഡിത​നായ ആൽഫ്രഡ്‌ എഡേർഷിം എഴുതി. (യേശു​മി​ശി​ഹാ​യു​ടെ ജീവി​ത​വും കാലങ്ങ​ളും, [ഇംഗ്ലീഷ്‌]) ഒരു യഹൂദന്റെ ജീവി​ത​ത്തി​ന്റെ മിക്കവാ​റും എല്ലാ വശങ്ങ​ളെ​യും നിയ​ന്ത്രി​ക്കാൻപോ​ന്ന​വി​ധം നിസ്സാ​ര​മായ, ഐച്ഛി​ക​മായ നിയമ​ങ്ങൾക്ക്‌ റബ്ബിമാർ ജീവൻമരണ പ്രാധാ​ന്യം കൽപ്പിച്ചു. മിക്ക​പ്പോ​ഴും മനുഷ്യ വികാ​ര​ങ്ങൾക്കു തണുപ്പൻ അവഗണ​ന​യാ​ണു നൽകി​യി​രു​ന്നത്‌. ഒരു ശബത്ത്‌ നിയമം ഇപ്രകാ​രം കൽപ്പിച്ചു: “ഒരു മനുഷ്യ​ന്റെ​മേൽ ഒരു കെട്ടിടം തകർന്നു വീഴു​ക​യും അയാൾ അവി​ടെ​യു​ണ്ടോ ഇല്ലയോ, ജീവി​ച്ചി​രി​പ്പു​ണ്ടോ ഇല്ലയോ, അയാൾ ഒരു വിജാ​തീ​യ​നോ യഹൂദ​നോ എന്നീ കാര്യ​ങ്ങ​ളിൽ സംശയം തോന്നു​ന്ന​പക്ഷം അയാളു​ടെ മുകളിൽനിന്ന്‌ അവശി​ഷ്ടങ്ങൾ എടുത്തു​മാ​റ​റണം. അയാൾ ജീവി​ച്ചി​രി​ക്കു​ന്നു​വെന്നു കണ്ടെത്തി​യാൽ അത്‌ തീർച്ച​യാ​യും എടുത്തു​മാ​റ​റണം; എന്നാൽ [അയാൾ] മരി​ച്ചെ​ങ്കിൽ അവർ അയാളെ അവിടെ ഉപേക്ഷി​ക്കണം.”—ചെറു​പു​സ്‌തകം യോമ 8:7, ദ മിഷ്‌ന, ഹെർബർട്ട്‌ ഡാൻബി പരിഭാ​ഷ​പ്പെ​ടു​ത്തി​യത്‌.

ഇത്തരം നിരർഥ​ക​മായ നിയമ​നി​ഷ്‌ഠയെ യേശു വീക്ഷി​ച്ചത്‌ എപ്രകാ​ര​മാണ്‌? ശബത്തിൽ സൗഖ്യ​മാ​ക്കി​യ​തി​നെ​പ്രതി വിമർശി​ച്ച​പ്പോൾ യേശു പറഞ്ഞു: “എന്റെ പിതാവു ഇന്നുവ​രെ​യും പ്രവർത്തി​ക്കു​ന്നു; ഞാനും പ്രവർത്തി​ക്കു​ന്നു.” (യോഹ​ന്നാൻ 5:17) സ്വയം സമ്പന്നനാ​കാൻ ലൗകിക ജോലി​യിൽ ഏർപ്പെ​ടു​ക​യാ​യി​രു​ന്നില്ല യേശു. മറിച്ച്‌, അവൻ ദൈ​വേഷ്ടം ചെയ്യു​ക​യാ​യി​രു​ന്നു. ശബത്തിൽ വിശുദ്ധ സേവനം തുടരാൻ ലേവ്യർക്ക്‌ അനുവാ​ദ​മു​ണ്ടാ​യി​രു​ന്ന​പോ​ലെ ദൈവ​നി​യമം ലംഘി​ക്കാ​തെ മിശിഹാ എന്നനി​ല​യിൽ തന്റെ ദൈവ​ദ​ത്ത​മായ നിയമനം ആധികാ​രി​ക​മാ​യി നിറ​വേ​റ​റാൻ യേശു​വിന്‌ കഴിയു​മാ​യി​രു​ന്നു.—മത്തായി 12:5.

ശബത്ത്‌ നാളിൽ നടത്തിയ സൗഖ്യ​മാ​ക്ക​ലു​കൾ യഹൂദ ശാസ്‌ത്രി​മാ​രും പരീശൻമാ​രും ‘അതിനീ​തി​മാൻമാ​രാ​ണെന്ന്‌’—തങ്ങളുടെ ചിന്തയിൽ കർക്കശ​രും സന്തുലിത മനോ​ഭാ​വ​മി​ല്ലാ​ത്ത​വ​രു​മാ​ണെന്ന്‌—തുറന്നു​കാ​ട്ടി. (സഭാ​പ്ര​സം​ഗി 7:16) സൽപ്ര​വൃ​ത്തി​കൾ ആഴ്‌ച​യിൽ ഏതാനും ദിനങ്ങ​ളിൽ ഒതുക്കി​നിർത്ത​ണ​മെ​ന്നത്‌ ദൈവ​ഹി​ത​മാ​യി​രു​ന്നില്ല; ശബത്ത്‌ കണ്ണും​പൂ​ട്ടി നിയമം പിന്തു​ട​രു​ന്ന​തി​നുള്ള ഒരു ദിനമാ​യി​രി​ക്കാ​നും ദൈവം ഉദ്ദേശി​ച്ചി​രു​ന്നില്ല. “മനുഷ്യൻ ശബ്ബത്ത്‌നി​മി​ത്തമല്ല; ശബ്ബത്ത്‌ മനുഷ്യൻനി​മി​ത്ത​മ​ത്രേ ഉണ്ടായതു” എന്ന്‌ യേശു മർക്കൊസ്‌ 2:27-ൽ പറഞ്ഞു. യേശു ആളുക​ളെ​യാ​ണു സ്‌നേ​ഹി​ച്ചത്‌ അല്ലാതെ നിരർഥ​ക​മായ നിയമ​ങ്ങ​ളെയല്ല.

തങ്ങളുടെ ചിന്താ​ഗ​തി​യിൽ അമിത​മാ​യി കർക്കശ​ര​ല്ലാ​തി​രി​ക്കു​ക​യും നിയമ​ത്തിൽ കടിച്ചു​തൂ​ങ്ങാ​തി​രി​ക്കു​ക​യും ചെയ്യു​ന്നത്‌ ഇന്നു ക്രിസ്‌ത്യാ​നി​കൾക്കു പ്രയോ​ജ​നം​ചെ​യ്യും. സഭയിൽ അധികാ​ര​സ്ഥാ​ന​ത്തു​ള്ളവർ മററു​ള്ള​വരെ അമിത​മായ മനുഷ്യ​നിർമിത നിയമ​ങ്ങ​ളാ​ലും വ്യവസ്ഥ​ക​ളാ​ലും ഞെരു​ക്കു​ന്ന​തിൽനിന്ന്‌ ഒഴിഞ്ഞു​നിൽക്കും. നൻമ ചെയ്യു​ന്ന​തിന്‌ അവസരം തേടാ​നും യേശു​വി​ന്റെ ദൃഷ്ടാന്തം നമ്മെ പ്രോ​ത്സാ​ഹി​പ്പി​ക്കു​ന്നു. ദൃഷ്ടാ​ന്ത​ത്തിന്‌, താൻ വീടു​തോ​റു​മുള്ള ശുശ്രൂ​ഷ​യി​ലോ ഒരു പ്രസംഗം നടത്തു​മ്പോ​ഴോ മാത്രമേ ബൈബിൾ സത്യങ്ങൾ പങ്കിടു​ക​യു​ള്ളൂ എന്ന്‌ ഒരു ക്രിസ്‌ത്യാ​നി ഒരിക്ക​ലും ന്യായ​വാ​ദം ചെയ്യു​ക​യില്ല. “നിങ്ങളി​ലുള്ള പ്രത്യാ​ശ​യെ​ക്കു​റി​ച്ചു ന്യായം ചോദി​ക്കുന്ന ഏവനോ​ടും . . . പ്രതി​വാ​ദം പറവാൻ എപ്പോ​ഴും ഒരുങ്ങി​യി​രി”ക്കുന്നവ​നാ​യി​രി​ക്കണം ക്രിസ്‌ത്യാ​നി എന്ന്‌ അപ്പോ​സ്‌ത​ല​നായ പത്രോസ്‌ പറയുന്നു. (1 പത്രൊസ്‌ 3:15) നൻമ ചെയ്യു​ന്ന​തിന്‌ ഒരു സമയപ​രി​ധി​യും ഇല്ല.

അനുക​മ്പ​യു​ടെ കാര്യ​ത്തിൽ ഒരു പാഠം

മറെറാ​രു പ്രമുഖ അത്ഭുതം ലൂക്കൊസ്‌ 7:11-17-ൽ രേഖ​പ്പെ​ടു​ത്തി​യി​രി​ക്കു​ന്നു. വൃത്താന്തം പറയു​ന്ന​ത​നു​സ​രിച്ച്‌ യേശു “നയിൻ എന്ന ഒരു പട്ടണത്തി​ലേക്കു പോകു​മ്പോൾ അവന്റെ ശിഷ്യൻമാ​രും വളരെ പുരു​ഷാ​ര​വും കൂടെ പോയി.” ആധുനിക അറേബ്യ ഗ്രാമ​മായ നയീനി​ന്റെ തെക്കു​കി​ഴ​ക്കാ​യി ഈ നാളു​വരെ ശ്‌മശാ​ന​സ്ഥലം കാണാ​വു​ന്ന​താണ്‌. “അവൻ പട്ടണത്തി​ന്റെ വാതി​ലോ​ടു അടുത്ത​പ്പോൾ” ശബ്ദമു​ഖ​രി​ത​മായ ഒരു രംഗത്തെ അവൻ അഭിമു​ഖീ​ക​രി​ച്ചു. “മരിച്ചു​പോയ ഒരുത്തനെ പുറത്തു കൊണ്ടു​വ​രു​ന്നു; അവൻ അമ്മെക്കു ഏകജാ​ത​നായ മകൻ; അവളോ വിധവ ആയിരു​ന്നു. പട്ടണത്തി​ലെ ഒരു വലിയ പുരു​ഷാ​ര​വും അവളോ​ടു​കൂ​ടെ ഉണ്ടായി​രു​ന്നു.” പുരാതന കാലം​മു​തൽ ഇന്നോളം “ശവസം​സ്‌കാ​രം നടത്തുന്ന രീതി​യിൽ മാററം വന്നിട്ടില്ല” എന്ന്‌ എച്ച്‌. ബി. ട്രിസ്‌ട്രാം പറയുന്നു. “വിലപി​ക്കാൻ കൂലി​ക്കു​വാ​ങ്ങിയ സ്‌ത്രീ​കൾ മുമ്പിൽ, തൊട്ടു​പി​റ​കിൽ മററു സ്‌ത്രീ​കൾ, അവർക്കും പിറകിൽ ശവമഞ്ചം, ഇങ്ങനെ​പോ​കു​ന്നതു ഞാൻ കണ്ടിട്ടുണ്ട്‌. അങ്ങേയ​ററം ദുഃഖം പ്രകട​മാ​ക്കി​ക്കൊണ്ട്‌ അവർ കൈകൾ വീശി​യെ​റി​യു​ക​യും തലമുടി വലിച്ചു​പ​റി​ക്കു​ക​യും ദുഃഖ​ത്തി​ന്റെ വന്യമായ ചേഷ്ടകൾ കാണി​ക്കു​ക​യും മരണമടഞ്ഞ വ്യക്തി​യു​ടെ പേര്‌ അലറി​വി​ളി​ക്കു​ക​യും ചെയ്യുന്നു” എന്നും അദ്ദേഹം കൂട്ടി​ച്ചേർക്കു​ന്നു.—ബൈബിൾ നാടു​ക​ളി​ലെ പൂർവ​ദേശ ആചാരങ്ങൾ (ഇംഗ്ലീഷ്‌).

അത്തരം ശബ്ദമു​ഖ​രി​ത​മായ അലങ്കോ​ല​പ്പെട്ട അവസ്ഥയിൽ നടന്ന ദുഃഖി​ത​യായ ഒരു വിധവ​യു​ടെ മുഖത്തു വേദന തളം​കെട്ടി നിന്നി​രു​ന്നി​രി​ക്കണം. നേര​ത്തെ​തന്നെ ഭർത്താവു മരിച്ചു​പോയ ആ സ്‌ത്രീ തന്റെ മകനെ വീക്ഷി​ച്ചത്‌, ഗ്രന്ഥകാ​ര​നായ ഹെർബർട്ട്‌ ലോക്യ​റി​ന്റെ വാക്കു​ക​ളിൽ പറഞ്ഞാൽ, “തന്റെ വാർധ​ക്യ​കാ​ലത്തെ പിന്തു​ണ​യും ഏകാന്ത​ത​യ്‌ക്കുള്ള സാന്ത്വ​ന​വും കുടും​ബ​ത്തി​ന്റെ താങ്ങും തൂണു​മാ​യി​ട്ടാണ്‌. തന്റെ ഏക മകന്റെ നഷ്ടത്തോ​ടെ അവശേ​ഷിച്ച അവസാ​നത്തെ ആലംബ​വും അററ​പോ​ലെ​യാ​യി.” (ബൈബി​ളി​ലെ എല്ലാ അത്ഭുത​ങ്ങ​ളും) യേശു​വി​ന്റെ പ്രതി​ക​ര​ണ​മെ​ന്താ​യി​രു​ന്നു? ലൂക്കോ​സി​ന്റെ വാചാ​ല​മായ വാക്കു​ക​ളിൽ പറഞ്ഞാൽ: “അവളെ കണ്ടിട്ടു കർത്താവു മനസ്സലി​ഞ്ഞു (“സഹതാപം തോന്നി,” NW) അവളോ​ടു; കരയേണ്ടാ എന്നു പറഞ്ഞു.” “സഹതാപം തോന്നി” എന്ന പ്രയോ​ഗം “കുടലു​കൾ” എന്ന അക്ഷരീയ അർഥമുള്ള ഗ്രീക്കു പദത്തിൽനിന്ന്‌ എടുത്തി​ട്ടു​ള്ള​താണ്‌. അതിന്റെ അർഥം “ഉള്ളിന്റെ ഉള്ളിൽനി​ന്നും വൈകാ​രി​ക​മാ​യി പ്രേരി​ത​മാ​വുക” എന്നാണ്‌. (വൈൻസ്‌ എക്‌സ്‌പോ​സി​റ​ററി ഡിക്‌ഷ്‌നറി ഓഫ്‌ ഓൾഡ്‌ ആൻഡ്‌ ന്യൂ ടെസ്‌റ​റ​മെൻറ്‌ വേഡ്‌സ്‌) ഉവ്വ്‌, യേശു​വി​ന്റെ വികാ​രങ്ങൾ ശക്തമായി ഉണർത്ത​പ്പെ​ടു​ക​യു​ണ്ടാ​യി.

യേശു​വി​ന്റെ സ്വന്തം അമ്മയും സാധ്യ​ത​യ​നു​സ​രിച്ച്‌ ഈ സമയത്തു വിധവ​യാ​യി​രു​ന്നു. അതു​കൊണ്ട്‌ തന്റെ വളർത്തു​പി​താ​വായ യോ​സേ​ഫി​നെ മരണത്തിൽ നഷ്ടപ്പെ​ട്ട​തു​മൂ​ലം ആ ദുഃഖം അവന്‌ ഒരുപക്ഷേ അറിയാ​മാ​യി​രു​ന്നു. (താരത​മ്യം ചെയ്യുക: യോഹ​ന്നാൻ 19:25-27.) ആ വിധവ​യ്‌ക്ക്‌ യേശു​വി​നോ​ടു കേണ​പേ​ക്ഷി​ക്കേണ്ടി വന്നില്ല. മോ​ശൈക ന്യായ​പ്ര​മാ​ണ​പ്ര​കാ​രം, ശവത്തെ തൊടു​ന്നത്‌ ഒരുവനെ അശുദ്ധ​നാ​ക്കു​മാ​യി​രു​ന്നി​ട്ടും സ്വമന​സ്സാ​ലെ “അവൻ അടുത്തു​ചെന്നു ശവമഞ്ചം തൊട്ടു.” (സംഖ്യാ​പു​സ്‌തകം 19:11) തന്റെ അത്ഭുത ശക്തിമൂ​ലം യേശു​വിന്‌ അശുദ്ധി​യു​ടെ മൂലകാ​രണം തുടച്ചു​ക​ള​യാൻ കഴിയു​മാ​യി​രു​ന്നു! “ബാല്യ​ക്കാ​രാ എഴു​ന്നേല്‌ക്ക എന്നു ഞാൻ നിന്നോ​ടു പറയുന്നു എന്നു അവൻ പറഞ്ഞു. മരിച്ചവൻ എഴു​ന്നേ​ററു ഇരുന്നു സംസാ​രി​പ്പാൻ തുടങ്ങി; അവൻ അവനെ അമ്മെക്കു ഏല്‌പി​ച്ചു​കൊ​ടു​ത്തു.”

അനുക​മ്പ​യു​ടെ എത്രയോ പ്രചോ​ദി​ത​മായ പാഠം! ഈ “അന്ത്യകാ​ലത്തു” പ്രബല​മാ​യി​രി​ക്കുന്ന സ്‌നേ​ഹ​ശൂ​ന്യ​മായ, തണുപ്പൻ മനോ​ഭാ​വം ക്രിസ്‌ത്യാ​നി​കൾ അനുക​രി​ക്ക​രുത്‌. (2 തിമൊ​ഥെ​യൊസ്‌ 3:1-5) അതിനു നേരേ വിപരീ​ത​മാ​യി 1 പത്രൊസ്‌ 3:8 ഇങ്ങനെ പ്രബോ​ധി​പ്പി​ക്കു​ന്നു: ‘തീർച്ചെക്കു എല്ലാവ​രും ഐക്യ​മ​ത്യ​വും സഹതാ​പ​വും സഹോ​ദ​ര​പ്രീ​തി​യും മനസ്സലി​വും . . . ഉള്ളവരാ​യി​രി​പ്പിൻ.’ നമുക്കു പരിച​യ​മുള്ള ഒരാൾക്കു മരണമോ ഗുരു​ത​ര​മായ രോഗ​മോ ഉണ്ടാകു​മ്പോൾ ഒരു പുനരു​ത്ഥാ​നം നടത്തു​ന്ന​തി​നോ രോഗി​യെ സൗഖ്യ​മാ​ക്കു​ന്ന​തി​നോ നമുക്കു കഴിയു​ക​യില്ല. എങ്കിലും അവിടെ ആയിരുന്ന്‌ അവരോ​ടൊ​പ്പം വിലപി​ച്ചു​കൊണ്ട്‌ പ്രാ​യോ​ഗി​ക​മായ സഹായ​വും സാന്ത്വ​ന​വും പ്രദാനം ചെയ്യാൻ നമുക്കു കഴിയും.—റോമർ 12:15.

യേശു ചെയ്‌ത വികാ​രോ​ദ്ദീ​പ​ക​മായ ഈ പുനരു​ത്ഥാ​ന​വും ഭാവി​യി​ലേക്കു വിരൽ ചൂണ്ടുന്നു—“കല്ലറക​ളിൽ ഉള്ളവർ എല്ലാവ​രും അവന്റെ ശബ്ദം കേട്ടു . . . പുനരു​ത്ഥാ​നം ചെയ്‌വാ​നുള്ള” ഒരു ഭാവി സമയ​ത്തേക്കു തന്നെ! (യോഹ​ന്നാൻ 5:28, 29) വേർപെ​ട്ടു​പോയ അമ്മമാ​രും പിതാ​ക്കൻമാ​രും കുട്ടി​ക​ളും സുഹൃ​ത്തു​ക്ക​ളും തങ്ങളുടെ കല്ലറക​ളിൽനി​ന്നു തിരി​ച്ചെ​ത്തു​മ്പോൾ ഭൂവ്യാ​പ​ക​മാ​യി സന്തപ്‌തർ വ്യക്തി​പ​ര​മാ​യി യേശു​വി​ന്റെ അനുകമ്പ അനുഭ​വി​ച്ച​റി​യും!

അത്ഭുത​ങ്ങ​ളി​ലെ പാഠങ്ങൾ

തീർച്ച​യാ​യും യേശു​വി​ന്റെ അത്ഭുതങ്ങൾ ശക്തിയു​ടെ കോൾമ​യിർകൊ​ള്ളി​ക്കുന്ന പ്രകട​ന​ങ്ങ​ളെ​ക്കാൾ കവിഞ്ഞ​താ​യി​രു​ന്നു. അവ ദൈവത്തെ മഹത്വ​പ്പെ​ടു​ത്തി, ‘ദൈവത്തെ മഹത്വീ​ക​രി​ക്കാൻ’ പ്രേരി​ത​രാ​യി​രി​ക്കുന്ന ക്രിസ്‌ത്യാ​നി​കൾക്കു മാതൃക ഇട്ടു​കൊണ്ട്‌. (റോമർ 15:5) നൻമ ചെയ്യുക, ഉദാര​മ​നോ​ഭാ​വം കാട്ടുക, അനുകമ്പ പ്രകടി​പ്പി​ക്കുക എന്നിവ ചെയ്യാൻ അവ പ്രോ​ത്സാ​ഹ​ന​മേകി. അതി​നെ​ക്കാ​ളെ​ല്ലാം പ്രധാ​ന​മാ​യി അവ ക്രിസ്‌തു​വി​ന്റെ സഹസ്രാബ്ദ വാഴ്‌ച​യിൽ നടത്താൻപോ​കുന്ന വീര്യ​പ്ര​വൃ​ത്തി​ക​ളു​ടെ ഒരു മുൻവീ​ക്ഷ​ണ​മാ​യി ഉതകി.

ഭൂമി​യി​ലാ​യി​രു​ന്ന​പ്പോൾ യേശു താരത​മ്യേന ചുരു​ങ്ങിയ ഇടങ്ങളിൽ തന്റെ വീര്യ​പ്ര​വൃ​ത്തി​കൾ നടത്തി. (മത്തായി 15:24) മഹനീയ രാജാവ്‌ എന്നനി​ല​യിൽ അവന്റെ അധികാ​രാ​തിർത്തി ഭൂവ്യാ​പ​ക​മാ​യി​ത്തീ​രും! (സങ്കീർത്തനം 72:8) പണ്ട്‌ അവൻ മുഖാ​ന്തരം അത്ഭുത​ക​ര​മായ സൗഖ്യ​മാ​ക്ക​ലു​ക​ളും പുനരു​ത്ഥാ​ന​വും പ്രാപി​ച്ചവർ ഒടുവിൽ മരിച്ചു​പോ​യി. അവന്റെ സ്വർഗീയ ഭരണത്തിൻകീ​ഴിൽ പാപവും മരണവും പൂർണ​മാ​യി മാററി​ക്ക​ള​ഞ്ഞു​കൊണ്ട്‌ നിത്യ​ജീ​വനു വഴി തുറക്കും. (റോമർ 6:23; വെളി​പ്പാ​ടു 21:3, 4) അതേ, യേശു​വി​ന്റെ അത്ഭുതങ്ങൾ ഒരു മഹനീയ ഭാവി​യി​ലേക്കു വിരൽ ചൂണ്ടുന്നു. അതിന്റെ ഒരു ഭാഗമാ​യി​ത്തീ​രാൻ യഹോ​വ​യു​ടെ സാക്ഷികൾ ദശലക്ഷ​ങ്ങളെ സഹായി​ച്ചി​രി​ക്കു​ന്നു. ആ സമയം വന്നെത്തു​ന്ന​തു​വരെ, ഉടൻ സംഭവി​ക്കാൻപോ​കു​ന്നവ സംബന്ധിച്ച്‌ എത്ര മഹത്തായ മുൻമാ​തൃ​ക​യാണ്‌ യേശു​വി​ന്റെ അത്ഭുതങ്ങൾ പ്രദാനം ചെയ്‌തി​രി​ക്കു​ന്നത്‌!

[7-ാം പേജിലെ ചിത്രം]

യേശു വെള്ളം വീഞ്ഞാക്കി മാററു​ന്നു