സമാധാന ഫലം ഉളവാ​ക്കാൻക​ഴി​യുന്ന ശിക്ഷണം

“ഏതു ശിക്ഷണ​വും തൽക്കാലം സന്തോ​ഷ​ക​ര​മെന്നല്ല, ദു:ഖകര​മെ​ന്നാണ്‌ തോന്നു​ന്നത്‌; എന്നിരു​ന്നാ​ലും, അതിനാൽ പരിശീ​ലി​പ്പി​ക്ക​പ്പെ​ട്ട​വർക്ക്‌ പിന്നീട്‌ അത്‌ സമാധാ​ന​ഫലം, അതായത്‌ നീതി, വിളയി​ക്കു​ന്നു.”—എബ്രായർ 12:11.

1, 2. (എ) എബ്രായർ 12:9-11 അനുസ​രിച്ച്‌ ദൈവം സ്‌നേ​ഹ​പൂർവ്വം എന്തു പ്രദാനം ചെയ്യുന്നു? (ബി) ശിക്ഷണ​ത്തി​ന്റെ ഒരു ദൃഷ്ടാ​ന്ത​മെന്ത്‌, ഇതിൽ നിന്ന്‌ എന്തു ഫലമു​ണ്ടാ​കാൻ കഴിയും?

നിങ്ങളു​ടെ ബാല്യ​കാ​ല​ത്തി​ലേക്കു പിന്തി​രി​ഞ്ഞു ചിന്തി​ക്കുക. നിങ്ങളു​ടെ മാതാ​പി​താ​ക്കൾ നിങ്ങൾക്കു ശിക്ഷണം നൽകു​ന്നത്‌ ഓർമ്മി​ക്കാൻ കഴിയു​മോ? നമ്മിൽ മിക്കവർക്കും ഓർമ്മി​ക്കാൻ കഴിയും. എബ്രായർ 12:9-11-വരെ നാം വായി​ക്കുന്ന പ്രകാരം, ദൈവ​ത്തിൽ നിന്നുള്ള ശിക്ഷണ​ത്തെ​ക്കു​റി​ച്ചു പ്രസ്‌താ​വി​ച്ച​പ്പോൾ അപ്പോ​സ്‌ത​ല​നായ പൗലോസ്‌ അതിനെ ഒരു ദൃഷ്ടാ​ന്ത​മാ​യി ഉപയോ​ഗി​ച്ചു.

² നമ്മുടെ ആത്മീയ ജീവി​തത്തെ ബാധി​ക്കാൻ കഴിയുന്ന ദൈവ​ത്തി​ന്റെ പിതൃ​നിർവി​ശേ​ഷ​മായ ശിക്ഷണ​ത്തിന്‌ പലരൂ​പങ്ങൾ കൈ​ക്കൊ​ള്ളാൻ കഴിയും. ഒന്ന്‌ മേലാൽ ദൈവ​പ്ര​മാ​ണ​ങ്ങൾക്ക​നു​സൃ​ത​മാ​യി ജീവി​ക്കാ​നാ​ഗ്ര​ഹി​ക്കാത്ത അല്ലെങ്കിൽ അങ്ങനെ ചെയ്യാൻ വിസമ്മ​തി​ക്കുന്ന ഒരാളെ ക്രിസ്‌തീയ സഭയിൽനിന്ന്‌ പുറത്താ​ക്കാ​നുള്ള അവന്റെ ക്രമീ​ക​ര​ണ​മാണ്‌. അങ്ങനെ ശക്തമായി ശിക്ഷി​ക്ക​പ്പെ​ടുന്ന അല്ലെങ്കിൽ ശിക്ഷണം കൊടു​ക്ക​പ്പെ​ടുന്ന ഒരു വ്യക്തി അനുത​പി​ച്ചു തിരിഞ്ഞു വന്നേക്കാം. ഈ പ്രക്രി​യ​യിൽ വിശ്വ​സ്‌ത​രു​ടെ സഭയും ദൈവ​ത്തി​ന്റെ ഉന്നത പ്രമാ​ണ​ങ്ങ​ളോട്‌ അനുരൂ​പ​പ്പെ​ടു​ന്ന​തി​ന്റെ പ്രാധാ​ന്യം ഗ്രഹി​ക്കു​ന്ന​തി​നാൽ അവരും ശിക്ഷണം പ്രാപി​ക്കു​ന്നു.—1 തിമൊ​ഥെ​യോസ്‌ 1:20.

3. ചിലർ പുറത്താ​ക്ക​ലി​ന്റെ ആശയ​ത്തോട്‌ എങ്ങനെ പ്രതി​ക​രി​ക്കു​ന്നു?

³ ‘എന്നാൽ പുറത്താ​ക്കു​ക​യും പിന്നീട്‌ പുറത്താ​ക്ക​പ്പെ​ട്ട​യാ​ളോ​ടു സംസാ​രി​ക്കാ​തി​രി​ക്കു​ക​യും ചെയ്യു​ന്നത്‌ പരുഷ​മ​ല്ല​യോ?’ എന്ന്‌ ഒരാൾ ചോദി​ച്ചേ​ക്കാം. യഹോ​വ​യു​ടെ സാക്ഷി​ക​ളാ​യി​രുന്ന മാതാ​പി​താ​ക്ക​ളാൽ വളർത്ത​പ്പെട്ട ഒരു സ്‌ത്രീ ഉൾപ്പെട്ട അടുത്ത കാലത്തെ ഒരു കോട​തി​ക്കേ​സിൽ അങ്ങനെ​യുള്ള ഒരു വീക്ഷണം ഉയർന്നു​വന്നു. അവളുടെ മാതാ​പി​താ​ക്കൾ സഭയിൽ നിന്നു പുറത്താ​ക്ക​പ്പെ​ട്ടി​രു​ന്നു. അവൾ പുറത്താ​ക്ക​പ്പെ​ട്ടില്ല. എന്നാൽ സഭയിൽ നിന്ന്‌ പിൻമാ​റി​ക്കൊണ്ട്‌ ഒരു എഴുത്ത്‌ എഴുതി​യ​തി​നാൽ അവൾ സ്വമേ​ധയാ നിസ്സഹ​വ​സി​ച്ചു. അതിൻപ്ര​കാ​രം അവൾ മേലാൽ യഹോ​വ​യു​ടെ സാക്ഷി​ക​ളിൽപെട്ട ഒരുവ​ള​ല്ലെന്നു മാത്രം സഭയെ അറിയി​ച്ചു. അവൾ മാറി​പ്പാർത്തു. എന്നാൽ വർഷങ്ങൾക്കു​ശേഷം അവൾ മടങ്ങി​വ​രു​ക​യും സ്ഥലത്തെ സാക്ഷികൾ അവളു​മാ​യി സംഭാ​ഷണം നടത്തു​ക​യി​ല്ലെന്നു കണ്ടെത്തു​ക​യും ചെയ്‌തു. അതു​കൊണ്ട്‌ അവൾ കേസ്‌ കൊടു​ത്തു. ഇതിന്റെ പരിണ​ത​ഫ​ല​മെ​ന്താ​യി​രു​ന്നു, ഇതു നിങ്ങളെ എങ്ങനെ ബാധി​ച്ചേ​ക്കാം? സംഗതി ഉചിത​മാ​യി മനസ്സി​ലാ​ക്കു​ന്ന​തിന്‌, പുറത്താ​ക്കൽ എന്ന ബന്ധപ്പെട്ട വിഷയം സംബന്ധിച്ച്‌ ബൈബിൾ എന്തു പറയു​ന്നു​വെന്ന്‌ നമുക്കു നോക്കാം.

ഈ ഉറച്ച നില എന്തു​കൊണ്ട്‌?

4. ചില​പ്പോ​ഴൊ​ക്കെ സഭയിൽ എന്തു സംഭവി​ക്കു​ന്നു? (ഗലാത്യർ 6:1; യൂദാ 23)

⁴ മിക്ക സത്യ​ക്രി​സ്‌ത്യാ​നി​ക​ളും വിശ്വ​സ്‌ത​ത​യോ​ടെ ദൈവ​ത്തെ​യും അവന്റെ നീതി​യുള്ള നിയമ​ങ്ങ​ളെ​യും പിന്താ​ങ്ങു​ന്നു. (1 തെസ്സ​ലോ​നീ​ക്യർ 1:2-7; എബ്രായർ 6:10) എന്നാൽ, ചില​പ്പോൾ, ഒരു വ്യക്തി സത്യത്തി​ന്റെ പാതയിൽ നിന്ന്‌ വ്യതി​ച​ലി​ക്കു​ന്നു. ദൃഷ്‌ടാ​ന്ത​മാ​യി, ക്രിസ്‌തീയ മൂപ്പൻമാ​രിൽ നിന്നുള്ള സഹായം വകവെ​ക്കാ​തെ അയാൾ അനുതാ​പ​മെ​ന്യേ ദൈവ​നി​യ​മങ്ങൾ ലംഘി​ച്ചേ​ക്കാം. അല്ലെങ്കിൽ വ്യാ​ജോ​പ​ദേശം പഠിപ്പി​ക്കു​ന്ന​തി​നാ​ലോ സഭയോ​ടു നിസ്സഹ​വ​സി​ക്കു​ന്ന​തി​നാ​ലോ അയാൾ വിശ്വാ​സം ത്യജി​ച്ചേ​ക്കാം. അപ്പോൾ എന്തു ചെയ്യണം? അപ്പോ​സ്‌ത​ലൻമാർ ജീവി​ച്ചി​രു​ന്ന​പ്പോൾ പോലും അങ്ങനെ​യുള്ള കാര്യങ്ങൾ സംഭവി​ച്ചു; തന്നിമി​ത്തം ഇതു സംബന്ധിച്ച്‌ അവർ എന്ത്‌ എഴുതി​യെന്നു നമുക്കു കാണാം.

5, 6. (എ) ഗുരു​ത​ര​മായ പാപങ്ങൾ ചെയ്‌തിട്ട്‌ അനുത​പി​ക്കാ​ത്ത​വ​രോട്‌ ഇടപെ​ടു​ന്നതു സംബന്ധിച്ച്‌ നമുക്ക്‌ ഏത്‌ ജ്ഞാനപൂർവ്വ​ക​മായ ബുദ്ധി​യു​പ​ദേ​ശ​മുണ്ട്‌? (മത്തായി 18:17) (ബി) നാം ഏതു ചോദ്യ​ങ്ങളെ അഭിമു​ഖീ​ക​രി​ക്കു​ന്നു?

⁵ കൊരി​ന്തി​ലെ ഒരു മനുഷ്യൻ അനുതാ​പ​മി​ല്ലാ​തെ ദുർമ്മാർഗ്ഗി​യാ​യ​പ്പോൾ, പൗലോസ്‌ സഭയോട്‌ ഇങ്ങനെ പറഞ്ഞു: “ഒരു സഹോ​ദരൻ എന്നു വിളി​ക്ക​പ്പെ​ടു​ന്ന​വ​നാ​യി ഒരു ദുർവൃ​ത്ത​നോ ഒരു അത്യാ​ഗ്ര​ഹി​യോ ഒരു വിഗ്ര​ഹാ​രാ​ധി​യോ ഒരു വാവി​ഷ്‌ഠാ​ണ​ക്കാ​ര​നോ ഒരു അമിത മദ്യപാ​നി​യോ ഒരു പിടി​ച്ചു​പ​റി​ക്കാ​ര​നോ ആയ ഏതൊ​രു​വ​നോ​ടു​മുള്ള സംസർഗ്ഗം നിർത്തുക, അങ്ങനെ​യുള്ള ഒരു മനുഷ്യ​നോ​ടു​കൂ​ടെ ഭക്ഷണം കഴിക്കു​ക​പോ​ലും അരുത്‌.” (1 കൊരി​ന്ത്യർ 5:11-13) ഹുമന​യോസ്‌ പോലുള്ള വിശ്വാ​സ​ത്യാ​ഗി​ക​ളു​ടെ കാര്യ​ത്തി​ലും അങ്ങനെ വേണമാ​യി​രു​ന്നു: “ഒരു കക്ഷിപി​രി​വി​നു പ്രോൽസാ​ഹി​പ്പി​ക്കുന്ന ഒരു മനുഷ്യ​നെ സംബന്ധി​ച്ചാ​ണെ​ങ്കിൽ ഒന്നാമ​ത്തെ​യും രണ്ടാമ​ത്തെ​യും താക്കീ​തി​നു ശേഷം അയാളെ ത്യജി​ക്കുക; അങ്ങനെ​യുള്ള ഒരു മനുഷ്യൻ വഴിവി​ട്ടു തിരിഞ്ഞു പാപം ചെയ്യു​ന്നു​വെന്ന്‌ അറിഞ്ഞു​കൊ​ണ്ടു​തന്നെ.” (തീത്തോസ്‌ 3:10,11; 1 തിമൊ​ഥെ​യോസ്‌ 1:19,20) സഭയെ ത്യജി​ക്കുന്ന ഏവനെ സംബന്ധി​ച്ചും അങ്ങനെ​യുള്ള സഹവാ​സ​മൊ​ഴി​വാ​ക്കൽ ഉചിത​മാ​യി​രി​ക്കും: “അവർ നമ്മെ വിട്ടു​പോ​യി, എന്നാൽ അവർ നമ്മുടെ തരക്കാ​രാ​യി​രു​ന്നില്ല; എന്തെന്നാൽ അവർ നമ്മുടെ തരക്കാ​രാ​യി​രു​ന്നെ​ങ്കിൽ അവർ നമ്മോ​ടു​കൂ​ടെ വസിക്കു​മാ​യി​രു​ന്നു. എന്നാൽ എല്ലാവ​രും നമ്മുടെ തരക്കാ​ര​ല്ലെന്ന്‌ പ്രകട​മാ​ക്ക​പ്പെ​ടേ​ണ്ട​തിന്‌ അവർ പുറത്തു​പോ​യി.”—1 യോഹ​ന്നാൻ 2:18,19.

⁶ ആശിക്കാ​വു​ന്ന​ത​നു​സ​രിച്ച്‌, അങ്ങനെ​യുള്ള ഒരാളെ തിരികെ സ്വീക​രി​ക്കാൻ കഴിയ​ത്ത​ക്ക​വണ്ണം അയാൾ അനുത​പി​ക്കും. (പ്രവൃ​ത്തി​കൾ 3:19) എന്നാൽ അതിനി​ട​യിൽ ക്രിസ്‌ത്യാ​നി​കൾക്ക്‌ അയാളു​മാ​യി പരിമി​ത​മായ കൂട്ടായ്‌മ ആകാമോ, അതോ കർശന​മായ ഒഴിവാ​ക്കൽ ആവശ്യ​മാ​ണോ? ആണെങ്കിൽ എന്തു​കൊണ്ട്‌?

പൂർണ്ണ​മാ​യി ഛേദി​ക്ക​പ്പെ​ടു​ന്നു​വോ?

7. പാപി​ക​ളു​ടെ രണ്ടു വർഗ്ഗങ്ങൾ സംബന്ധിച്ച്‌ നമ്മുടെ പെരു​മാ​ററം എങ്ങനെ വ്യത്യ​സ്‌ത​പ്പെ​ട്ടി​രി​ക്കും?

⁷ ക്രിസ്‌ത്യാ​നി​കൾ ആളുക​ളിൽ നിന്ന്‌ മാറി​നിൽക്കു​ന്നില്ല. നമുക്ക്‌ അയൽക്കാ​രും കൂട്ടു​ജോ​ലി​ക്കാ​രും സഹപാ​ഠി​ക​ളും മററു​ള്ള​വ​രു​മാ​യി സാധാ​ര​ണ​ഗ​തി​യി​ലുള്ള സമ്പർക്ക​ങ്ങ​ളുണ്ട്‌, ചിലർ ‘ദുർവൃ​ത്ത​രോ അത്യാ​ഗ്ര​ഹി​ക​ളോ പിടി​ച്ചു​പ​റി​ക്കാ​രോ വ്യഗ്ര​ഹാ​രാ​ധി​ക​ളോ’ ആണെങ്കി​ലും അവരോ​ടു സാക്ഷീ​ക​രി​ക്കു​ക​യും ചെയ്യുന്നു. നമുക്ക്‌ അവരെ പൂർണ്ണ​മാ​യി ഒഴിവാ​ക്കാൻ കഴിക​യി​ല്ലെന്ന്‌ പൗലോസ്‌ പൗലോസ്‌ എഴുതി, ‘അല്ലെങ്കിൽ നാം ലോക വിട്ടു പോ​കേ​ണ്ടി​രും’. എന്നിരു​ന്നാ​ലും, അങ്ങനെ ജീവിച്ച ഒരു “സഹോദര”ന്റെ കാര്യ​ത്തിൽ വ്യത്യ​സ്‌ത​മാ​യി​രി​ക്ക​ണ​മെന്ന്‌ അവൻ നിർദ്ദേ​ശി​ച്ചു: “ഒരു സഹോ​ദരൻ എന്നു വിളി​ക്ക​പ്പെ​ടു​ന്ന​വ​നാ​യി [അത്തരം നടപടി​ക​ളി​ലേക്കു തിരികെ പോയി​രി​ക്കുന്ന] ഏതൊ​രു​വ​നോ​ടു​മുള്ള സംസർഗ്ഗം നിർത്തുക, അങ്ങനെ​യുള്ള ഒരു മനുഷ്യ​നോ​ടു​കൂ​ടെ ഭക്ഷണം കഴിക്കു​ക​പോ​ലു​മ​രുത്‌.”—1 കൊരി​ന്ത്യർ 5:9-11; മർക്കോസ്‌ 2:13-17.

8. സഹവാ​സ​മൊ​ഴി​വാ​ക്കൽ സംബന്ധിച്ച്‌ അപ്പോ​സ്‌ത​ല​നായ യോഹ​ന്നാൻ എന്തു ബുദ്ധി​യു​പ​ദേശം നൽകി?

⁸ അപ്പോ​സ്‌ത​ല​നായ യോഹ​ന്നാ​ന്റെ എഴുത്തു​ക​ളിൽ അങ്ങനെ​യു​ള്ള​വരെ എത്ര പൂർണ്ണ​മാ​യി ക്രിസ്‌ത്യാ​നി​കൾ ഒഴിവാ​ക്ക​ണ​മെന്ന്‌ ദൃഢീ​ക​രി​ക്കുന്ന സമാന​ബു​ദ്ധി​യു​പ​ദേശം നാം കാണുന്നു: “തള്ളിക്ക​ടന്നു പോകു​ന്ന​വ​നും ക്രിസ്‌തു​വി​ന്റെ ഉപദേ​ശ​ത്തിൽ നിലനിൽക്കാ​തി​രി​ക്കു​ന്ന​വ​നു​മായ ഏവനും ദൈവ​മില്ല . . . ആരെങ്കി​ലും നിങ്ങളു​ടെ അടുക്കൽ വരുക​യും ഈ ഉപദേശം കൊണ്ടു​വ​രാ​തി​രി​ക്കു​ക​യും ചെയ്യു​ന്നു​വെ​ങ്കിൽ, ഒരിക്ക​ലും അവനെ നിങ്ങളു​ടെ വീട്ടിൽ കൈ​ക്കൊ​ള്ളു​ക​യോ അവനു വന്ദനം പറയു​ക​യോ ചെയ്യരുത്‌. എന്തെന്നാൽ അവനു വന്ദനം പറയു​ന്നവൻ [ഗ്രീക്ക്‌, കൈറോ] അവന്റെ ദുഷ്ട​പ്ര​വൃ​ത്തി​ക​ളിൽ ഒരു പങ്കാളി​യാ​കു​ന്നു.”a—2 യോഹ​ന്നാൻ 9-11.

9, 10. യിസ്രാ​യേ​ലി​ലെ അനുതാ​പ​മി​ല്ലാത്ത നിയമ​ലം​ഘി​കൾക്ക്‌ എന്തു സംഭവി​ച്ചു, എന്തു​കൊണ്ട്‌? (ബി) അനുതാ​പ​മി​ല്ലാത്ത പാപം നിമിത്തം പുറത്താ​ക്ക​പ്പെ​ടുന്ന ആളുക​ളോട്‌ ഇടപെ​ടു​ന്ന​തി​നുള്ള ഇന്നത്തെ ക്രമീ​ക​രണം സംബന്ധിച്ച്‌ നാം എങ്ങനെ വിചാ​രി​ക്കണം? (2 പത്രോസ്‌ 2:20-22)

⁹ അങ്ങനെ​യുള്ള ദൃഢമായ നില ഇന്നു​പോ​ലും ഉചിത​മാ​യി​രി​ക്കു​ന്ന​തെ​ന്തു​കൊണ്ട്‌? ശരി, യിസ്രാ​യേ​ലി​നുള്ള ദൈവ​ത്തി​ന്റെ ന്യായ​പ്ര​മാ​ണ​ത്തിൽ അനുശാ​സി​ച്ചി​രുന്ന കഠിന​മായ ഛേദന​ത്തെ​ക്കു​റിച്ച്‌ ചിന്തി​ക്കുക. ഗൗരവ​മുള്ള വിവിധ കാര്യ​ങ്ങ​ളിൽ മന:പൂർവ്വ​ലം​ഘി​കളെ വധിച്ചി​രു​ന്നു. (ലേവ്യ​പു​സ്‌തകം 20:10; സംഖ്യാ​പു​സ്‌തകം 15:30,31) അതു സംഭവി​ച്ച​പ്പോൾ മററു​ള്ള​വർക്ക്‌, ബന്ധുക്കൾക്കു​പോ​ലും മരിച്ച നിയമ​ലം​ഘി​യോട്‌ മേലാൽ സംസാ​രി​ക്കാൻ കഴിയു​മാ​യി​രു​ന്നില്ല. (ലേവ്യ​പു​സ്‌തകം 19:1-4; ആവർത്തനം 13:1-5; 17:1-7) അന്നത്തെ വിശ്വസ്‌ത യിസ്രാ​യേ​ല്യർ നമ്മു​ടേ​തു​പോ​ലെ​യുള്ള വികാ​ര​ങ്ങ​ളോ​ടു​കൂ​ടി സാധാരണ മനുഷ്യ​രാ​യി​രു​ന്നെ​ങ്കി​ലും ദൈവം നീതി​മാ​നും സ്‌നേ​ഹ​വാ​നു​മാ​ണെ​ന്നും അവന്റെ ന്യായ​പ്ര​മാ​ണം അവരുടെ ധാർമ്മി​ക​വും ആത്മീയ​വു​മായ ശുദ്ധിയെ സംരക്ഷി​ക്കു​ന്നു​വെ​ന്നും അവർക്ക​റി​യാ​മാ​യി​രു​ന്നു. അതു​കൊണ്ട്‌, ദുഷ്‌പ്ര​വൃ​ത്തി​ക്കാ​രെ ഛേദി​ച്ചു​ക​ളു​യു​ന്ന​തി​നുള്ള അവന്റെ ക്രമീ​ക​രണം അടിസ്ഥാ​ന​പ​ര​മാ​യി നല്ലതും ശരിയു​മായ ഒരു കാര്യ​മാ​ണെന്ന്‌ അവർക്ക്‌ അംഗീ​ക​രി​ക്കാൻ കഴിയു​മാ​യി​രു​ന്നു.—ഇയ്യോബ്‌ 34:10-12.

¹⁰ അനുതാ​പ​മി​ല്ലാത്ത പാപം നിമിത്തം പുറത്താ​ക്ക​പ്പെട്ട ഒരാളു​മാ​യി കൂട്ടാ​യ്‌മക്കു വിസമ്മ​തി​ക്കാ​നുള്ള ദൈവ​ത്തി​ന്റെ ക്രമീ​ക​രണം നമുക്ക്‌ ജ്ഞാനപൂർവ്വ​ക​മായ ഒരു സംരക്ഷ​ണ​മാ​ണെന്ന്‌ നമുക്ക്‌ അത്രതന്നെ ഉറപ്പു​ണ്ടാ​യി​രി​ക്കാൻ കഴിയും. “നിങ്ങൾ പുളി​പ്പിൽ നിന്ന്‌ വിമു​ക്ത​രാ​യി​രി​ക്കാൻ തക്കവണ്ണം നിങ്ങൾ ഒരു പുതിയ പിണ്ഡമാ​യി​രി​ക്കേ​ണ്ട​തിന്‌ പഴയ പുളിപ്പു നീക്കി​ക്ക​യുക.” (1 കൊരി​ന്ത്യർ 5:7) മന:പൂർവ്വം നിസ്സഹ​വ​സിച്ച ആളുക​ളെ​യും ഒഴിവാ​ക്കു​ന്ന​തി​നാൽ ക്രിസ്‌ത്യാ​നി​കൾ വിമർശ​നാ​ത്മ​ക​മോ വിലമ​തി​പ്പി​ല്ലാ​ത്ത​തോ വിശ്വാ​സ​ത്യാ​ഗ​പരം പോലു​മോ ആയ സാദ്ധ്യ​മായ വീക്ഷണ​ങ്ങ​ളിൽ നിന്ന്‌ സംരക്ഷി​ക്ക​പ്പെ​ടു​ന്നു.—എബ്രായർ 12:15,16.

ബന്ധുക്കളെ സംബന്ധി​ച്ചെന്ത്‌?

11, 12. (എ) ഒരു ദുഷ്‌പ്ര​വൃ​ത്തി​ക്കാ​രൻ ഛേദി​ക്ക​പ്പെ​ടു​മ്പോൾ യിസ്രാ​യേ​ല്യ​ബ​ന്ധു​ക്ക​ളു​ടെ മേലുള്ള ഫലമെ​ന്താ​യി​രു​ന്നു? (ബി) അനുസ​ര​ണ​ത്തി​ന്റെ പ്രയോ​ജ​നങ്ങൾ വിശദ​മാ​ക്കുക.

¹¹ ദുഷ്‌പ്ര​വൃ​ത്തി​ക്കാ​രെ ഛേദി​ച്ചു​ക​ള​യു​ന്നതു സംബന്ധിച്ച തന്റെ നീതി​യുള്ള നിയമങ്ങൾ നിറ​വേ​റ​റു​ന്ന​തിൽ മിക്ക​പ്പോ​ഴും ബന്ധുക്കൾ ഉൾപ്പെ​ടു​ന്നു​വെ​ന്നും അവരെ ബാധി​ക്കു​ന്നു​വെ​ന്നും തീർച്ച​യാ​യും ദൈവം തിരി​ച്ച​റി​യു​ന്നുണ്ട്‌. മേൽ പ്രസ്‌താ​വി​ച്ച​തു​പോ​ലെ, ഒരു യിസ്രാ​യേല്യ ദുഷ്‌പ്ര​വൃ​ത്തി​ക്കാ​രൻ നിഗ്ര​ഹി​ക്ക​പ്പെ​ട്ട​പ്പോൾ മേലാൽ കുടും​ബ​സ​ഹ​വാ​സം സാദ്ധ്യ​മാ​യി​രു​ന്നില്ല. യഥാർത്ഥ​ത്തിൽ, ഒരു പുത്രൻ അമിത​മ​ദ്യ​പാ​നി​യും അതിഭ​ക്ഷ​ക​നു​മാ​യി​രു​ന്നെ​ങ്കിൽ അവന്റെ മാതാ​പി​താ​ക്കൾ അവനെ ന്യായാ​ധി​പൻമാ​രു​ടെ മുമ്പാകെ കൊണ്ടു​വ​ര​ണ​മാ​യി​രു​ന്നു. അവൻ അനുതാ​പ​മി​ല്ലാ​ത്ത​വ​നാ​യി​രു​ന്നെ​ങ്കിൽ ‘യിസ്രാ​യേ​ലി​ന്റെ മദ്ധ്യത്തിൽ നിന്ന്‌ വഷളത്തം നീക്കി​ക്ക​ള​യേ​ണ്ട​തിന്‌’ നീതി​പൂർവ്വ​ക​മായ അവന്റെ വധത്തിൽ മാതാ​പി​താ​ക്കൾ പങ്കെടു​ക്ക​ണ​മാ​യി​രു​ന്നു. (ആവർത്തനം 21:18-21) ഇത്‌ അവർക്ക്‌ എളുപ്പ​മാ​യി​രി​ക്കു​ക​യി​ല്ലെന്ന്‌ നിങ്ങൾക്ക്‌ മനസ്സി​ലാ​ക്കാൻ കഴിയും . ദുഷ്‌പ്ര​വൃ​ത്തി​ക്കാ​രന്റെ സഹോ​ദ​രൻമാ​രും സഹോ​ദ​രി​മാ​രും അല്ലെങ്കിൽ വല്യമ്മ വല്യപ്പൻമാ​രും എങ്ങനെ വിചാ​രി​ച്ചു​വെ​ന്നും സങ്കൽപ്പി​ക്കുക. എന്നിരു​ന്നാ​ലും, തങ്ങളുടെ നീതി​മാ​നായ ദൈവ​ത്തോ​ടുള്ള വിശ്വ​സ്‌ത​തയെ കുടുംബ പ്രിയ​ത്തി​നു​പ​രി​യാ​യി കരുതു​ന്നത്‌ അവർക്ക്‌ ജീവര​ക്താ​ക​ര​മാ​യി​രി​ക്കാൻ കഴിയു​മാ​യി​രു​ന്നു.

¹² മോശ​യി​ലൂ​ടെ​യുള്ള ദൈവ​ത്തി​ന്റെ നേതൃ​ത്വ​ത്തി​നെ​തി​രെ നടന്ന മൽസര​ത്തി​ലെ ഒരു നേതാ​വാ​യി​രുന്ന കോര​ഹി​ന്റെ ദൃഷ്ടാന്തം ഓർക്കുക. തന്റെ പൂർണ്ണ നീതി​യിൽ കോരഹ്‌ മരി​ക്കേ​ണ്ട​താ​ണെന്ന്‌ യഹോവ കണ്ടു. എന്നാൽ വിശ്വ​സ്‌ത​രായ എല്ലാവ​രും ഇങ്ങനെ ബുദ്ധി​യു​പ​ദേ​ശി​ക്ക​പ്പെട്ടു: “ഈ ദുഷ്ട മനുഷ്യ​രു​ടെ കൂടാ​ര​ങ്ങ​ളു​ടെ മുമ്പിൽ നിന്ന്‌ ദയവായി മാറി നിൽക്കുക, അവരുടെ സകല പാപത്തി​ലും നിങ്ങൾ തുടച്ചു നീക്ക​പ്പെ​ടാ​തി​രി​ക്കേ​ണ്ട​തിന്‌ അവർക്കുള്ള യാതൊ​ന്നി​നെ​യും തൊട​രുത്‌” ദൈവ​ത്തി​ന്റെ മുന്നറി​യി​പ്പി​നെ സ്വീക​രി​ക്കാഞ്ഞ ബന്ധുക്കൾ മൽസരി​ക​ളോ​ടു​കൂ​ടെ മരണമ​ടഞ്ഞു. എന്നാൽ കോര​ഹി​ന്റെ ബന്ധുക്ക​ളിൽ ചിലർ ജ്ഞാനപൂർവ്വം യഹോ​വ​യോ​ടു വിശ്വ​സ്‌ത​രാ​യി​രി​ക്കു​ന്ന​തി​നെ തെര​ഞ്ഞെ​ടു​ത്തു. അത്‌ അവരുടെ ജീവനെ രക്ഷിക്കു​ക​യും ഭാവി അനു​ഗ്ര​ഹ​ങ്ങ​ളി​ലേക്കു നയിക്കു​ക​യും ചെയ്‌തു.—സംഖ്യാ​പു​സ്‌തകം 16:16-33; 26:9-11; 2 ദിനവൃ​ത്താ​ന്തം 20:19.

13. ഒരു അടുത്ത കുടും​ബാം​ഗം പുറത്താ​ക്ക​പ്പെ​ടു​മ്പോൾ അല്ലെങ്കിൽ അയാൾ നിസ്സഹ​വ​സി​ക്കു​മ്പോൾ വിശ്വസ്‌ത ക്രിസ്‌ത്യാ​നി​കൾ എങ്ങനെ പ്രതി​ക​രി​ക്കും?

¹³ ക്രിസ്‌തീയ സഭയിൽ നിന്നുള്ള ഛേദന​ത്തിൽ സത്വര​മുള്ള മരണം ഉൾപ്പെ​ടു​ന്നില്ല, തന്നിമി​ത്തം കുടും​ബ​ബ​ന്ധങ്ങൾ തുടരു​ന്നു. അതു​കൊണ്ട്‌, പുറത്താ​ക്ക​പ്പെ​ടുന്ന അല്ലെങ്കിൽ നിസ്സഹ​വ​സി​ക്കുന്ന ഒരു മനുഷ്യൻ തന്റെ ക്രിസ്‌തീയ ഭാര്യ​യോ​ടും വിശ്വസ്‌ത മക്കളോ​ടും കൂടെ പിന്നെ​യും വീട്ടിൽ വസി​ച്ചേ​ക്കാം. അയാളു​ടെ പ്രവർത്ത​ന​ഗ​തി​യാൽ അയാൾ അവർ തമ്മിലു​ണ്ടാ​യി​രുന്ന ആത്മീയ ബന്ധത്തിനു മാററം വരുത്തി​യെന്ന്‌ ഭാര്യ​യും മക്കളും തിരി​ച്ച​റി​യാൻ ദൈവ​ത്തി​ന്റെ ന്യായ​വി​ധി​ക​ളോ​ടും സഭയുടെ നടപടി​യോ​ടു​മുള്ള ആദരവ്‌ പ്രേരി​പ്പി​ക്കും. എന്നിരു​ന്നാ​ലും, അയാളു​ടെ പുറത്താ​ക്കൽ തങ്ങളുടെ രക്തബന്ധ​ങ്ങ​ളെ​യോ ദാമ്പത്യ​ബ​ന്ധ​ത്തെ​യോ അവസാ​നി​പ്പി​ക്കു​ന്നി​ല്ലാ​ത്ത​തു​കൊണ്ട്‌ സാധാ​ര​ണ​ഗ​തി​യി​ലുള്ള കുടും​ബ​പ്രി​യ​ങ്ങൾക്കും ഇടപെ​ട​ലു​കൾക്കും തുടരാൻ കഴിയും.

14. നമ്മുടെ അടുത്ത കുടും​ബ​വൃ​ത്ത​ത്തി​നു പുറത്തെ ഒരു പുറത്താ​ക്ക​പ്പെട്ട അഥവാ നിസ്സഹ​വ​സിച്ച ബന്ധുവു​മാ​യുള്ള നമ്മുടെ സമ്പർക്കത്തെ ഏതു ദിവ്യ​ബു​ദ്ധി​യു​പ​ദേശം സ്വാധീ​നി​ക്കണം?

¹⁴ പുറത്താ​ക്ക​പ്പെ​ട്ട​തോ നിസ്സഹ​വ​സി​ച്ച​തോ ആയ വ്യക്തി അടുത്ത കുടും​ബ​വൃ​ത്ത​ത്തി​നും ഭവനത്തി​നും പുറത്തു വസിക്കുന്ന ഒരു ബന്ധു ആണെങ്കിൽ സാഹച​ര്യം വ്യത്യ​സ്‌ത​മാണ്‌. ബന്ധുവു​മാ​യി മിക്കവാ​റും യാതൊ​രു സമ്പർക്ക​വു​മി​ല്ലാ​തി​രി​ക്കുക സാദ്ധ്യ​മാ​യി​രി​ക്കാം. സമ്പർക്ക​മാ​വ​ശ്യ​മാ​ക്കി​ത്തീർക്കുന്ന ചില കുടും​ബ​കാ​ര്യ​ങ്ങൾ ഉണ്ടെങ്കിൽ തന്നെ “ഒരു സഹോ​ദരൻ എന്നു വിളി​ക്ക​പ്പെ​ട്ട​വ​നാ​യി ഒരു ദുർവൃ​ത്ത​നോ ഒരു അത്യാ​ഗ്ര​ഹി​യോ [ഗുരു​ത​ര​മായ മറെറാ​രു പാപം സംബന്ധിച്ച്‌ കുററ​ക്കാ​ര​നോ] ആയ ഏതൊ​രു​വ​നോ​ടു​മുള്ള സംസർഗ്ഗം നിർത്തുക . . . അങ്ങനെ​യുള്ള ഒരു മനുഷ്യ​നോ​ടു​കൂ​ടെ ഭക്ഷണം കഴിക്കു​ക​പോ​ലു​മ​രുത്‌” എന്ന ദിവ്യ​ത​ത്വ​ത്തി​നു ചേർച്ച​യാ​യി ആ സമ്പർക്കത്തെ ഏററവും കുറഞ്ഞ​താ​ക്കി നിർത്തണം.—1 കൊരി​ന്ത്യർ 5:11.

15. അങ്ങനെ​യുള്ള സന്ദർഭ​ങ്ങ​ളിൽ ബന്ധുക്കൾക്ക്‌ വികാ​ര​ങ്ങ​ളു​ടെ സ്വാധീ​നത്തെ എങ്ങനെ നിയ​ന്ത്രി​ക്കാൻ കഴിയും? (സങ്കീർത്തനം 15:1-5; മർക്കോസ്‌ 10:29,30)

¹⁵ വല്യമ്മ വല്യപ്പൻമാർക്ക്‌ തങ്ങളുടെ കൊച്ചു​മ​ക്ക​ളോ​ടുള്ള സ്‌നേഹം പോ​ലെ​യുള്ള വികാ​ര​ങ്ങ​ളും കുടും​ബ​ബ​ന്ധ​ങ്ങ​ളും നിമിത്തം ഇതു പ്രയാ​സ​മാ​യി​രി​ക്കാം, അതു മനസ്സി​ലാ​ക്കാ​വു​ന്ന​താണ്‌. എന്നാൽ ഇത്‌ 21-ാം പേജിൽ ഉദ്ധരിച്ച സഹോ​ദരി പ്രസ്‌താ​വി​ച്ച​തു​പോ​ലെ ദൈവ​ത്തോ​ടുള്ള വിശ്വ​സ്‌ത​ത​യു​ടെ ഒരു പരി​ശോ​ധ​ന​യാണ്‌. പുറത്താ​ക്ക​പ്പെട്ട ബന്ധു അങ്ങനെ വരുത്തി​ക്കൂ​ട്ടിയ സങ്കടവും വേദന​യും അനുഭ​വ​പ്പെ​ടുന്ന ഏതൊ​രാൾക്കും കോര​ഹി​ന്റെ ബന്ധുക്കൾ വെച്ച ദൃഷ്ടാ​ന്ത​ത്തിൽ നിന്ന്‌ ആശ്വാ​സ​വും പ്രോൽസാ​ഹ​ന​വും തേടാ​വു​ന്ന​താണ്‌.—സങ്കീർത്തനം 84:10-12.b

കോടതി വിധി

16-18. നേരത്തെ പറഞ്ഞ കോട​തി​ക്കേ​സിൽ ഏതു തീരു​മാ​ന​ത്തിൽ എത്തി, കോടതി കൂടു​ത​ലായ എന്ത്‌ അഭി​പ്രാ​യം പറഞ്ഞു?

¹⁶ സഭയിൽ നിസ്സഹ​വ​സി​ച്ചു​കൊണ്ട്‌ വിശ്വാ​സം ത്യജി​ക്കാൻ തീരു​മാ​നി​ച്ച​ശേഷം തന്നോടു മുൻപ​രി​ച​യ​ക്കാർ സംഭാ​ഷണം നടത്തു​ക​യി​ല്ലാ​ഞ്ഞ​തു​കൊണ്ട്‌ അന്ധാളിച്ച സ്‌ത്രീ ഉൾപ്പെട്ട കോട​തി​ക്കേ​സി​ന്റെ പരിണത ഫലം അറിയാൻ നിങ്ങളാ​ഗ്ര​ഹി​ച്ചേ​ക്കാം.

¹⁷ കേസ്‌ വിചാ​ര​ണക്കു പോകു​ന്ന​തി​നു മുൻപ്‌ ഒരു ഫെഡറൽ ഡിസ്‌ട്രി​ക്‌ററ്‌ കോടതി സത്വരം അവൾക്കെ​തി​രായ വിധി അനുവ​ദി​ച്ചു. സഭാപ​ര​മായ ശിക്ഷണ​കാ​ര്യ​ങ്ങ​ളിൽ കോട​തി​കൾ ഉൾപ്പെ​ടു​ന്നില്ല എന്ന ആശയത്തിൽ അധിഷ്‌ഠി​ത​മാ​യി​രു​ന്നു ആ വിധി. അപ്പോൾ അവർ അപ്പീൽ കൊടു​ത്തു. ഫെഡറൽ അപ്പീൽ കോടതിയിലെc ഏകകണ്‌ഠ​മായ വിധി (യു. എസ്സ്‌. ഭരണഘ​ട​ന​യു​ടെ) ഒന്നാം ഭേദഗ​തി​യി​ലെ അവകാ​ശ​ങ്ങ​ളു​ടെ വിശാ​ല​മായ കാരണ​ങ്ങ​ളി​ല​ധി​ഷ്‌ഠി​ത​മാ​യി​രു​ന്നു: “സഹവാ​സ​മൊ​ഴി​വാ​ക്കാൽ യഹോ​വ​യു​ടെ സാക്ഷി​ക​ളു​ടെ വിശ്വാ​സ​ത്തി​ന്റെ ഒരു ഭാഗമാ​യി​രി​ക്കു​ന്ന​തു​കൊണ്ട്‌ ഐക്യ​നാ​ടു​ക​ളു​ടെ ഭരണഘ​ട​ന​യി​ലെ ‘യഥേഷ്ട വിശ്വാ​സാ​ചരണ’ത്തിന്റെ വ്യവസ്ഥ . . . [അവളെ] വിജയി​ക്കു​ന്ന​തിൽ നിന്ന്‌ തടയുന്നു. പ്രതി​കൾക്ക്‌ സഹവാ​സ​മൊ​ഴി​വാ​ക്കൽ നടപടി പ്രാ​യോ​ഗി​ക​മാ​ക്കു​ന്ന​തിന്‌ ഭരണഘ​ട​നാ​പ​ര​മാ​യി സംരക്ഷി​ക്ക​പ്പെ​ടുന്ന അവകാ​ശ​മുണ്ട്‌. അതനു​സ​രിച്ച്‌, ഞങ്ങൾ” ഡിസ്‌ട്രി​ക്‌ററ്‌ കോട​തി​യു​ടെ മുൻവി​ധി​യെ “സ്ഥിരീ​ക​രി​ക്കു​ന്നു.”

¹⁸ കോട​തി​യു​ടെ അഭി​പ്രാ​യം തുടർന്നു: “സഹവാ​സ​മൊ​ഴി​വാ​ക്കൽ കാനോ​നിക വാക്യം സംബന്ധിച്ച യഹോ​വ​യു​ടെ സാക്ഷി​ക​ളു​ടെ വ്യാഖ്യാ​നത്തെ തുടർന്ന്‌ അവർ സ്വീക​രി​ക്കുന്ന ഒരു നടപടി​യാണ്‌. ഞങ്ങൾക്ക്‌ ആ വാക്യത്തെ പുനർവ്യാ​ഖ്യാ​നം ചെയ്യാൻ സ്വാത​ന്ത്ര്യ​മില്ല . . . പ്രതി​കൾക്ക്‌ തങ്ങളുടെ മതവി​ശ്വാ​സ​ങ്ങ​ളു​ടെ യഥേഷ്ട ആചരണ​ത്തി​നുള്ള അവകാ​ശ​മുണ്ട്‌ . . . കോട​തി​കൾ സാധാ​ര​ണ​മാ​യി ഒരു സഭയുടെ അംഗങ്ങ​ളു​ടെ (അല്ലെങ്കിൽ മുൻ അംഗങ്ങ​ളു​ടെ) ഇടയിലെ ബന്ധങ്ങളെ സൂക്ഷ്‌മ​മാ​യി പരി​ശോ​ധി​ക്കു​ന്നില്ല. സഭകൾ അംഗങ്ങ​ളു​ടെ​മേ​ലോ മുൻ അംഗങ്ങ​ളു​ടെ മേലോ ശിക്ഷണം ഏർപ്പെ​ടു​ത്തു​മ്പോൾ അവർക്ക്‌ വലിയ പ്രവർത്ത​ന​സ്വാ​ത​ന്ത്ര്യം നൽക​പ്പെ​ടു​ന്നു. ‘വിശ്വാ​സ​ത്തിൽപ്പെട്ട അംഗങ്ങളെ മാത്രം ബാധി​ക്കുന്ന മതപ്ര​വർത്ത​നങ്ങൾ, ഏതി​ലെ​ങ്കി​ലും മിക്കവാ​റും എത്ര പൂർണ്ണ​സ്വ​ത​ന്ത്ര​മാ​യി​രി​ക്കാ​മോ അത്ര പൂർണ്ണ സ്വത​ന്ത്ര​മാ​ണെ​ന്നും സ്വത​ന്ത്ര​മാ​യി​രി​ക്കേ​ണ്ട​താ​ണെ​ന്നു​മുള്ള [മുൻ യു. എസ്‌. സുപ്രീം കോടതി] ജസ്‌റ​റീസ്‌ ജാക്‌സന്റെ വീക്ഷണ​ത്തോട്‌ ഞങ്ങൾ യോജി​ക്കു​ന്നു’ . . . [അവൾ] ഉപേക്ഷി​ക്കാൻ തീരു​മാ​നിച്ച സഭിയി​ലെ അംഗങ്ങൾ മേലാൽ അവളോ​ടു സഹവസി​ക്കാ​നാ​ഗ്ര​ഹി​ക്കു​ന്നി​ല്ലെന്ന്‌ തീരു​മാ​നി​ച്ചി​രി​ക്കു​ന്നു. ആ തീരു​മാ​നം എടുക്കാൻ അവർക്കു സ്വാത​ന്ത്ര്യ​മു​ണ്ടെന്ന്‌ ഞങ്ങൾ കരുതു​ന്നു”.

19, 20. സഭയിൽ നിന്ന്‌ പുറത്താ​ക്ക​പ്പെ​ടുന്ന ഒരു വ്യക്തി കോടി​തി​യിൽ പണപര​മായ നഷ്ടപരി​ഹാ​രം ഈടാ​ക്കാ​നുള്ള സ്ഥാനത്ത​ല്ലാ​ത്ത​തെ​ന്തു​കൊണ്ട്‌?

¹⁹ മുൻപ​രി​ച​യ​ക്കാർ തന്നോടു സംഭാ​ഷി​ക്കു​ന്നി​ല്ലെന്നു തീരു​മാ​നി​ച്ച​തി​നാൽ സ്‌ത്രീക്ക്‌ പ്രയാസം തോന്നി​യാൽ പോലും “തൊട്ട​റി​യാൻ കഴിയാ​ത്ത​തോ വൈകാ​രി​ക​മോ ആയ പരിക്കു​കൾക്ക്‌ നഷ്ടപരി​ഹാ​രം ഈടാ​ക്കാൻ അവളെ അനുവ​ദി​ക്കു​ന്നത്‌ യഹോ​വ​യു​ടെ സാക്ഷി​കൾക്ക്‌ യഥേഷ്ട​മ​താ​നു​ച​ര​ണ​ത്തിന്‌ ഭരണഘ​ട​നാ​വി​രു​ദ്ധ​മാ​യി പരിമി​തി വരുത്തു​മെന്ന്‌ അപ്പീൽ കോടതി സമ്മതിച്ചു പറഞ്ഞു . . . യഥേഷ്ട മതാച​ര​ണ​ത്തി​ന്റെ ഭരണഘ​ട​നാ​പ​ര​മായ ഉറപ്പ്‌, സകല പൗരൻമാർക്കു​മുള്ള മതവ്യ​ത്യാ​സ​ത്തി​ന്റെ അവകാ​ശത്തെ ഭദ്രമാ​ക്കാൻ സമുചി​ത​മാ​യി കൊടു​ക്കേണ്ട വിലയെന്ന നിലയിൽ [അവൾ] അനുഭ​വി​ക്കു​ന്ന​തരം ഉപദ്ര​വ​ങ്ങളെ സമുദാ​യം പൊറു​ക്കേ​ണ്ട​താ​വ​ശ്യ​മാ​ക്കി​ത്തീർക്കു​ന്നു.” ഒരർത്ഥ​ത്തിൽ, ഈ വിധി പുറ​പ്പെ​ടു​വി​ക്ക​പ്പെ​ട്ട​ശേഷം അതിന്‌ കൂടുതൽ ഘനം ഉണ്ടായി​ട്ടുണ്ട്‌. എങ്ങനെ? ഈ സ്‌ത്രീ പിന്നീട്‌ കേസ്‌ വിചാരണ ചെയ്യു​ന്ന​തി​നും ഒരുപക്ഷേ അവൾക്കെ​തി​രായ തീരു​മാ​നത്തെ മറിക്കു​ന്ന​തി​നു​മാ​യി രാജ്യത്തെ അത്യു​ന്ന​ത​കോ​ട​തി​യോട്‌ അപേക്ഷി​ച്ചു. എന്നാൽ 1987 നവംബ​റിൽ ഐക്യ​നാ​ടു​ക​ളി​ലെ സുപ്രീം കോടതി അങ്ങനെ ചെയ്യു​ന്ന​തി​നു വിസമ്മ​തി​ച്ചു.

²⁰ അതു​കൊണ്ട്‌, പുറത്താ​ക്ക​പ്പെ​ട്ട​തോ നിസ്സഹ​വ​സി​ച്ച​തോ ആയ ഒരു വ്യക്തിക്ക്‌ സഹവാ​സ​മൊ​ഴി​വാ​ക്കു​ന്നു​വെന്ന കാരണ​ത്താൽ ഒരു നിയമ കോട​തി​യിൽ യഹോ​വ​യു​ടെ സാക്ഷി​ക​ളിൽ നിന്ന്‌ നഷ്ടപരി​ഹാ​രം ഈടാ​ക്കാൻ കഴിക​യി​ല്ലെന്ന്‌ ഈ പ്രധാ​ന​പ്പെട്ട കേസ്‌ തീരു​മാ​നി​ച്ചു.d സഭ നമു​ക്കെ​ല്ലാം ദൈവ​വ​ച​ന​ത്തിൽ വായി​ക്കാൻ കഴിയുന്ന പൂർണ്ണ​നിർദ്ദേ​ശ​ങ്ങ​ളോ​ടു പ്രതി​വർത്തി​ക്കു​ക​യും അത്‌ ബാധക​മാ​ക്കു​ക​യും ചെയ്യു​ന്ന​തു​കൊണ്ട്‌ വ്യക്തി തന്റെ സ്വന്ത പ്രവർത്ത​ന​ങ്ങ​ളാൽ വരുത്ത​പ്പെട്ട നഷ്ടമാണ്‌ അനുഭ​വി​ക്കു​ന്നത്‌.

ശിക്ഷണം—അനേകർക്കു പ്രയോ​ജനം കിട്ടുന്നു

21. പുറത്താ​ക്ക​ലി​നെ വീക്ഷി​ക്കു​ന്ന​തിൽ സമനില ആവശ്യ​മാ​യി​രി​ക്കു​ന്ന​തെ​ന്തു​കൊണ്ട്‌?

²¹ സഭയിൽ നിന്നുള്ള പുറത്താ​ക്ക​ലി​നെ​ക്കു​റിച്ച്‌ കേൾക്കു​മ്പോൾ പുറത്തുള്ള ചിലർ മേലാൽ ക്രിസ്‌തീയ സഭയിലെ അംഗങ്ങ​ളോ​ടു സംഭാ​ഷി​ക്കാൻ കഴിയാത്ത ദുഷ്‌പ്ര​വൃ​ത്തി​ക്കാ​ര​നോ​ടു സഹതപി​ക്കാൻ ചായ്‌വു കാണി​ക്കു​ന്നു. എന്നാൽ അങ്ങനെ​യുള്ള സഹതാപം അസ്ഥാന​ത്തല്ലേ? ദുഷ്‌പ്ര​വൃ​ത്തി​ക്കാ​ര​നും മററു​ള്ള​വർക്കും കിട്ടാൻ സാദ്ധ്യ​ത​യുള്ള പ്രയോ​ജ​ന​ത്തെ​ക്കു​റി​ച്ചു ചിന്തി​ക്കുക.

22, 23. പുറത്താ​ക്ക​പ്പെട്ട വ്യക്തി​കളെ സംബന്ധിച്ച നമ്മുടെ വീക്ഷണ​ത്തിൽ ദൈവത്തെ അനുസ​രി​ക്കു​ന്ന​തി​ന്റെ പ്രാധാ​ന്യ​വും മൂല്യ​വും വിശദ​മാ​ക്കുക.

²² ദൃഷ്ടാ​ന്ത​മാ​യി, 21-ാം പേജിൽ, തന്റെ പുറത്താ​ക്ക​പ്പെട്ട സഹോ​ദ​രി​യായ മാർഗ​ര​റ​റി​നോ​ടുള്ള ‘സകല സഹവാ​സ​വും പൂർണ്ണ​മാ​യും വിച്‌ഛേ​ദി​ക്കാ​നുള്ള’ തന്റെ തീരു​മാ​ന​ത്തെ​ക്കു​റിച്ച്‌ ലിനെ​ററ്‌ ചെയ്‌ത പ്രസ്‌താ​വന നാം കണ്ടു. അവളും അവളുടെ ക്രിസ്‌തീയ ബന്ധുക്ക​ളും ‘യഹോ​വ​യു​ടെ വഴിയാണ്‌ ഏററം നല്ല’തെന്ന്‌ വിശ്വ​സി​ച്ചു. അത്‌ അങ്ങനെ​ത​ന്നെ​യാണ്‌!

²³ ലിനറ​റി​ന്റെ സഹോ​ദരി പിന്നീട്‌ അവളോട്‌ ഇങ്ങനെ പറഞ്ഞു: ‘നിങ്ങൾ പുറത്താ​ക്ക​ലി​നെ നിസ്സാ​ര​മാ​യി വീക്ഷി​ച്ചി​രു​ന്നെ​ങ്കിൽ ഞാൻ ഇത്ര വേഗം പുന:സ്ഥിതീ​ക​ര​ണ​ത്തി​നുള്ള നടപടി​കൾ സ്വീക​രി​ക്കു​മാ​യി​രു​ന്നി​ല്ലെന്ന്‌ എനിക്ക​റി​യാം. പ്രിയ​പ്പെ​ട്ട​വ​രിൽ നിന്നും സഭയോ​ടുള്ള അടുത്ത സമ്പർക്ക​ത്തിൽ നിന്നു​മുള്ള പൂർണ്ണ​മായ ഛേദനം അനുത​പി​ക്കു​ന്ന​തി​നുള്ള ഒരു ശക്തമായ ആഗ്രഹം ഉളവാക്കി. എന്റെ ഗതി എത്ര തെററാ​യി​രു​ന്നു​വെ​ന്നും യഹോ​വക്കു പുറം​തി​രി​ഞ്ഞു​ക​ള​യു​ന്നത്‌ എത്ര ഗൗരവ​ത​ര​മാ​ണെ​ന്നും ഞാൻ തിരി​ച്ച​റി​ഞ്ഞു.’

24. പുറത്താ​ക്ക​ലി​നോ​ടുള്ള ഒരു സഹോ​ദ​രി​യു​ടെ പ്രതി​ക​രണം അവളെ​യും മററു​ള്ള​വ​രെ​യും എങ്ങനെ ബാധിച്ചു?

²⁴ മറെറാ​രു കേസിൽ ലൗറി​യു​ടെ മാതാ​പി​താ​ക്കൻമാർ സഭയിൽ നിന്ന്‌ പുറത്താ​ക്ക​പ്പെട്ടു. എന്നിട്ടും അവൾ പറയുന്നു: ‘അവരു​മാ​യുള്ള എന്റെ സഹവാസം ഒരിക്ക​ലും നിന്നില്ല, പിന്നെ​യോ വർദ്ധി​ക്കു​ക​യാ​ണു​ണ്ടാ​യത്‌. കാലം കടന്നു​പോ​യ​തോ​ടെ ഞാൻ കൂടുതൽ കൂടുതൽ നിഷ്‌ക്രി​യ​യാ​യി. ഞാൻ മീററിം​ഗു​കൾക്ക്‌ ഹാജരാ​കുക പോലു​മി​ല്ലാത്ത ഘട്ടത്തി​ലെത്തി.’ പിന്നീട്‌ അവൾ 1 കൊരി​ന്ത്യർ 5:11-13-ലെയും 2 യോഹ​ന്നാൻ 9-11-ലെയും ബുദ്ധി​യു​പ​ദേ​ശത്തെ ഊന്നി​പ്പറഞ്ഞ 1982 ജനുവ​രി​യി​ലെ​യും ഫെബ്രു​വ​രി​യി​ലെ​യും വീക്ഷാ​ഗോ​പു​ര​ത്തി​ലെ വിവരങ്ങൾ വായിച്ചു. “അത്‌ എന്നിൽ ഒരു ലൈററ്‌ ബൾബ്‌ കത്തിയ​തു​പോ​ലെ​യാ​യി​രു​ന്നു” എന്ന്‌ അവൾ എഴുതു​ന്നു. ‘ഞാൻ ചില മാററങ്ങൾ അറിഞ്ഞി​രു​ന്നു. ഇപ്പോൾ എനിക്ക്‌ മത്തായി 10:34-36-ന്റെ അർത്ഥം മെച്ചമാ​യി മനസ്സി​ലാ​ക്കാൻ കഴിയും. എന്റെ തീരു​മാ​നം അംഗീ​ക​രി​ക്കു​ന്നത്‌ എന്റെ കുടും​ബ​ത്തിന്‌ എളുപ്പ​മാ​യി​രു​ന്നില്ല, കാരണം അഞ്ചു വയസ്സുള്ള എന്റെ പുത്രൻ ഏക ആൺകുട്ടി ആണ്‌, അവർ അവനെ അത്യന്തം സ്‌നേ​ഹി​ക്കു​ന്നു.’ അങ്ങനെ​യുള്ള സഹവാ​സ​നഷ്ടം മാർഗ​ര​റ​റി​ന്റെ കാര്യ​ത്തി​ലെ​ന്ന​പോ​ലെ മാതാ​പി​താ​ക്ക​ളു​ടെ ഹൃദയത്തെ സ്‌പർശി​ക്കു​മെന്ന്‌ ആശിക്ക​പ്പെ​ടു​ന്നു. അതിനും പുറമേ, ഈ ശിക്ഷണം ലൗറിയെ സഹായി​ച്ചു: ‘ഞാൻ വീണ്ടും വയൽശു​ശ്രൂ​ഷ​യിൽ ഏർപ്പെ​ടു​ന്നു. എന്റെ മാററം നിമിത്തം എന്റെ വിവാ​ഹ​വും കുടും​ബ​വും ഏറെ ശക്തമാണ്‌, ഞാനും അങ്ങനെ​തന്നെ.’

25. പുന:സ്ഥിതീ​ക​രി​ക്ക​പ്പെട്ട ഒരു ആളിന്‌ ദൈവ​ത്തി​ന്റെ ശിക്ഷണ​ത്തോട്‌ എന്തു വീക്ഷണ​മു​ണ്ടാ​യി​രു​ന്നു?

²⁵ അല്ലെങ്കിൽ പുറത്താ​ക്ക​പ്പെ​ട്ടിട്ട്‌ പിന്നീട്‌ പുന:സ്ഥിതീ​ക​രി​ക്ക​പ്പെട്ട ഒരാളു​ടെ വിചാ​രങ്ങൾ പരിചി​ന്തി​ക്കുക. സാൻഡി ഇങ്ങനെ എഴുതി: ‘ശാസന​യും പുറത്താ​ക്ക​ലും സംബന്ധിച്ച്‌ വളരെ സഹായ​ക​മാ​യി​രുന്ന [മേൽ പ്രസ്‌താ​വിച്ച] ലേഖന​ങ്ങൾക്കു​വേണ്ടി നിങ്ങൾക്കു നന്ദിപ​റ​യാൻ ഞാൻ ആഗ്രഹി​ക്കു​ന്നു. തന്റെ സ്ഥാപനത്തെ ശുദ്ധമാ​ക്കി സൂക്ഷി​ക്കാൻ തക്കവണ്ണം യഹോവ തന്റെ ജനത്തെ സ്‌നേ​ഹി​ക്കു​ന്ന​തിൽ ഞാൻ സന്തുഷ്ട​യാണ്‌. പുറത്തു​ള്ള​വർക്കു പരുഷ​മെന്നു തോന്നി​യേ​ക്കാ​വു​ന്നത്‌ യഥാർത്ഥ​ത്തിൽ ആവശ്യ​വും ചെയ്യേണ്ട സ്‌നേ​ഹ​പൂർവ്വ​ക​മായ സംഗതി​യു​മാണ്‌. നമ്മുടെ സ്വർഗ്ഗീയ പിതാവ്‌ സ്‌നേ​ഹ​മു​ള്ള​വ​നും ക്ഷമിക്കു​ന്ന​വ​നു​മായ ഒരു ദൈവ​മാ​യി​രി​ക്കു​ന്ന​തിൽ എനിക്കു നന്ദിയുണ്ട്‌.’

26. ശിക്ഷണം സ്വീക​രി​ക്കു​ന്ന​തിൽ നിന്ന്‌ ഏതു നീതി​ഫലം ഉളവാ​ക്കാൻ കഴിയും? (സങ്കീർത്തനം 94:10,12)

²⁶ അങ്ങനെ അനുതാ​പ​മി​ല്ലാത്ത ദുഷ്‌പ്ര​വൃ​ത്തി​ക്കാ​രനെ സഭയിൽ നിന്ന്‌ പുറത്താ​ക്ക​ണ​മെ​ന്നാ​വ​ശ്യ​പ്പെ​ടുന്ന നമ്മുടെ ദൈവം, പാപി അനുത​പി​ച്ചു തിരിഞ്ഞു വരുന്നു​വെ​ങ്കിൽ അയാളെ സഭയിൽ പുന:സ്ഥിതീ​ക​രി​ക്കാൻ കഴിയു​മെ​ന്നും സ്‌നേ​ഹ​പൂർവ്വം കാണിച്ചു തരുന്നു. (നിസ്സഹ​വ​സിച്ച ഒരു വ്യക്തി​ക്കും സമാന​മാ​യി വീണ്ടും സഭയുടെ ഭാഗമാ​യി​ത്തീ​രാൻ അപേക്ഷി​ക്കാൻ കഴിയും.) അതിനു ശേഷം ക്രിസ്‌ത്യാ​നി​കൾക്ക്‌ അയാളെ ആശ്വസി​പ്പി​ക്കാൻ കഴിയും, അവർ അയാ​ളോ​ടുള്ള തങ്ങളുടെ സ്‌നേ​ഹത്തെ സ്ഥിരീ​ക​രി​ക്കും. (2 കൊരി​ന്ത്യർ 2:5-11; 7:8-13) സത്യമാ​യി അതു പൗലോസ്‌ എഴുതി​യ​തു​പോ​ലെ തന്നെയാണ്‌: “ഏതു ശിക്ഷണ​വും തൽക്കാലം സന്തോ​ഷ​ക​ര​മെന്നല്ല, ദു:ഖകര​മെ​ന്നാ​ണു തോന്നു​ന്നത്‌. എന്നിരു​ന്നാ​ലും, അതിനാൽ പരിശീ​ലി​പ്പി​ക്ക​പ്പെ​ട്ട​വർക്ക്‌ പിന്നീട്‌ അത്‌ സമാധാ​ന​ഫലം, അതായത്‌ നീതി, വിളയി​ക്കു​ന്നു.”—എബ്രായർ 12:11. (w88 4/15)

[അടിക്കു​റി​പ്പു​കൾ]

ഓർമ്മിക്കാനുള്ള പോയിൻറു​കൾ

◻ സഭയിൽ നിന്നുള്ള പുറത്താ​ക്ക​ലിന്‌ ഏതു വിധങ്ങ​ളിൽ ശിക്ഷണ​ത്തി​ന്റെ ഒരു രൂപമാ​യി​രി​ക്കാൻ കഴിയും?

◻ പുറത്താ​ക്ക​പ്പെട്ട ആളുക​ളോ​ടുള്ള ഒരു ക്രിസ്‌ത്യ​നി​യു​ടെ പെരു​മാ​റ​റ​വും ലോക​ത്തി​ലെ പാപി​ക​ളോ​ടുള്ള അയാളു​ടെ പെരു​മാ​റ​റ​വും തമ്മിൽ വ്യത്യാ​സ​മു​ള്ള​തെ​ന്തു​കൊണ്ട്‌?

◻ ഒരു ബന്ധു പുറത്താ​ക്ക​പ്പെ​ടു​ന്നു​വെ​ങ്കിൽ പോലും ഏതു തിരു​വെ​ഴു​ത്തു നിർദ്ദേശം ഓർക്കണം?

◻ നിസ്സഹ​വ​സിച്ച ഒരു വ്യക്തി കൊടുത്ത കേസിൽ ഒരു അപ്പീൽ കോടതി ഏതു തീരു​മാ​ന​ത്തി​ലെത്തി?

◻ പുറത്താ​ക്കൽ സംബന്ധിച്ച ചില വ്യക്തി​പ​ര​മായ പ്രസ്‌താ​വ​ന​ക​ളിൽ നിന്ന്‌ നമുക്ക്‌ എന്തു പഠിക്കാൻ കഴിയും?

[21-ാം പേജിലെ ആകർഷ​ക​വാ​ക്യം]

[പുറത്താ​ക്ക​പ്പെട്ട എന്റെ സഹോ​ദ​രി​യായ] മാർഗ​ര​റ​റു​മാ​യുള്ള സകല സഹവാ​സ​ത്തിൽ നിന്നും ഞങ്ങളേ​ത്തന്നെ പൂർണ്ണ​മാ​യി വിച്‌ഛേ​ദി​ച്ചത്‌ യഹോ​വ​യു​ടെ ക്രമീ​ക​ര​ണ​ത്തോ​ടുള്ള ഞങ്ങളുടെ വിശ്വ​സ്‌ത​തയെ പരി​ശോ​ധി​ച്ചു. അത്‌ ഞങ്ങൾ യഹോ​വ​യു​ടെ വഴിയാണ്‌ ഏററം നല്ലതെന്ന്‌ യഥാർത്ഥ​മാ​യി വിശ്വ​സി​ക്കു​ന്നു​വെന്നു പ്രകട​മാ​ക്കാൻ ഞങ്ങളുടെ കുടും​ബ​ത്തിന്‌ അവസരം നൽകി.”—ലിനെ​ററ്‌.

[25-ാം പേജിലെ ചതുരം]

സഭാ ബഹിഷ്‌ക്ക​രണം—എന്തു ഫലം?

അപ്പോ​സ്‌ത​ലൻമാ​രു​ടെ കാല​ത്തോ​ട​ടു​ത്തുള്ള സഭാപു​റ​ത്താ​ക്ക​ലി​ന്റെ ഔചി​ത്യ​ത്തെ​യും ഫലത്തെ​യും സംബന്ധിച്ച്‌ ഇംഗ്ലീഷ്‌ ചരി​ത്ര​കാ​ര​നായ എഡ്വേർഡ്‌ ഗിബ്ബൺ എഴുതി:

“പൊതു സമ്മത​ത്തോ​ടെ സ്ഥാപി​ത​മാ​യി​രി​ക്കുന്ന ചട്ടങ്ങളെ ത്യജി​ക്കു​ക​യോ ലംഘി​ക്കു​ക​യോ ചെയ്യു​ന്ന​വരെ സമുദാ​യ​ത്തി​ന്റെ സംസർഗ്ഗ​ത്തിൽ നിന്നും പ്രയോ​ജ​ന​ങ്ങ​ളിൽ നിന്നും ബഹിഷ്‌ക്ക​രി​ക്കു​ന്നത്‌ ഏതു സമുദാ​യ​ത്തി​ന്റെ​യും സംശയ​മററ അവകാ​ശ​മാണ്‌. . . . സഭാബ​ഹി​ഷ്‌ക്ക​ര​ണ​ത്തി​ന്റെ പരിണ​ത​ഫ​ലങ്ങൾ ഭൗമി​ക​വും ആത്മീയ​വു​മായ സ്വഭാ​വ​ത്തി​ലു​ള്ള​താ​യി​രു​ന്നു. അത്‌ ആർക്കെ​തി​രെ പ്രഖ്യാ​പി​ക്ക​പ്പെ​ട്ടോ ആ ക്രിസ്‌ത്യാ​നിക്ക്‌ വിശ്വ​സ്‌ത​രു​ടെ അർപ്പണ​ങ്ങ​ളി​ലെ ഏതു പങ്കും നിഷേ​ധി​ക്ക​പ്പെട്ടു. മതപര​വും സ്വകാ​ര്യ​വു​മായ സൗഹൃ​ദ​ബ​ന്ധങ്ങൾ അഴിക്ക​പ്പെട്ടു.”