യഥാർഥ സമാധാ​നം അന്വേ​ഷി​ച്ചു പിന്തു​ട​രുക!

“ജീവനെ ആഗ്രഹി​ക്ക​യും ശുഭകാ​ലം കാണ്മാൻ ഇച്ഛിക്ക​യും ചെയ്യു​ന്നവൻ . . . ദോഷം വിട്ടകന്നു ഗുണം ചെയ്‌ക​യും സമാധാ​നം അന്വേ​ഷി​ച്ചു പിന്തു​ട​രു​ക​യും ചെയ്യട്ടെ.”—1 പത്രൊസ്‌ 3:10, 11.

1. യെശയ്യാ​വി​ന്റെ ഏതു വിഖ്യാത വാക്കു​കൾക്കു തീർച്ച​യാ​യും നിവൃ​ത്തി​യു​ണ്ടാ​കും?

“അവർ തങ്ങളുടെ വാളു​കളെ കൊഴു​ക്ക​ളാ​യും കുന്തങ്ങളെ വാക്കത്തി​ക​ളാ​യും അടിച്ചു​തീർക്കും; ജാതി ജാതിക്കു നേരെ വാളോ​ങ്ങു​ക​യില്ല; അവർ ഇനി യുദ്ധം അഭ്യസി​ക്ക​യും ഇല്ല.” (യെശയ്യാ​വു 2:4) ന്യൂ​യോർക്കു നഗരത്തി​ലെ ഐക്യ​രാ​ഷ്‌ട്ര ആസ്ഥാന​ത്തി​ന​രി​കെ ഈ വിഖ്യാത വാക്യം പ്രദർശി​പ്പി​ച്ചി​ട്ടു​ണ്ടെ​ങ്കി​ലും, ആ ലോക​സം​ഘടന അതു നിവർത്തി​ച്ചി​ട്ടി​ല്ലെ​ന്നു​ള്ളതു പകൽപോ​ലെ വ്യക്തം. എന്നിരു​ന്നാ​ലും, അതു യഹോ​വ​യാം ദൈവ​ത്തി​ന്റെ ഒരിക്ക​ലും പരാജ​യ​പ്പെ​ടാത്ത വചനത്തി​ന്റെ ഭാഗമാ​യ​തു​കൊണ്ട്‌ ആ പ്രഖ്യാ​പനം നിറ​വേ​റാ​തെ​പോ​കുന്ന പ്രശ്‌ന​മില്ല.—യെശയ്യാ​വു 55:10, 11.

2. യെശയ്യാ​വു 2:2, 3 പറയു​ന്ന​പ്ര​കാ​രം, “അന്ത്യകാ​ലത്തു” എന്തു സംഭവി​ക്കണം?

² യെശയ്യാ​വു 2:4-ൽ കാണുന്ന വാക്കുകൾ വാസ്‌ത​വ​ത്തിൽ ഒരു വിസ്‌മ​യാ​വ​ഹ​മായ പ്രവച​ന​ത്തി​ന്റെ, യഥാർഥ സമാധാ​ന​ത്തെ​ക്കു​റി​ച്ചുള്ള ഒരു പ്രവച​ന​ത്തി​ന്റെ, ഭാഗമാണ്‌—അതു നമ്മുടെ നാളിൽ നിവൃ​ത്തി​യേ​റു​ക​യു​മാണ്‌. മേലാൽ യുദ്ധങ്ങ​ളും യുദ്ധാ​യു​ധ​ങ്ങ​ളും ഉണ്ടായി​രി​ക്കു​ക​യി​ല്ലെന്ന പുളക​പ്ര​ദ​മായ ഭാവി​പ്ര​തീ​ക്ഷ​ക​ളെ​ക്കു​റി​ച്ചു പ്രഖ്യാ​പി​ക്കു​ന്ന​തി​നു​മുമ്പ്‌, പ്രവചനം പറയുന്നു: “അന്ത്യകാ​ലത്തു യഹോ​വ​യു​ടെ ആലയമുള്ള പർവ്വതം പർവ്വത​ങ്ങ​ളു​ടെ ശിഖര​ത്തിൽ സ്ഥാപി​ത​വും കുന്നു​കൾക്കു മീതെ ഉന്നതവു​മാ​യി​രി​ക്കും; സകലജാ​തി​ക​ളും അതി​ലേക്കു ഒഴുകി​ച്ചെ​ല്ലും. അനേക​വം​ശ​ങ്ങ​ളും ചെന്നു: വരുവിൻ, നമുക്കു യഹോ​വ​യു​ടെ പർവ്വത​ത്തി​ലേക്കു, യാക്കോ​ബിൻ ദൈവ​ത്തി​ന്റെ ആലയത്തി​ലേക്കു കയറി​ച്ചെ​ല്ലാം; അവൻ നമുക്കു തന്റെ വഴികളെ ഉപദേ​ശി​ച്ചു​ത​രി​ക​യും നാം അവന്റെ പാതക​ളിൽ നടക്കയും ചെയ്യും എന്നു പറയും. സീയോ​നിൽനി​ന്നു ഉപദേ​ശ​വും യെരൂ​ശ​ലേ​മിൽനി​ന്നു യഹോ​വ​യു​ടെ വചനവും പുറ​പ്പെ​ടും.”—യെശയ്യാ​വു 2:2, 3.

ആളുകൾക്കു സമാധാ​ന​പ്രി​യ​രാ​കാൻ കഴിയും

3. യുദ്ധ​പ്രേ​മി​യായ ഒരുവന്‌ എങ്ങനെ സമാധാ​ന​പ്രേ​മി​യാ​യി​ത്തീ​രാൻ കഴിയും?

³ ആളുകൾ യഹോ​വ​യു​ടെ വഴിക​ളിൽ പ്രബോ​ധി​പ്പി​ക്ക​പ്പെ​ട്ടാ​ലേ അവർക്കു സമാധാ​ന​പൂർണ​മായ ഗതി പിന്തു​ട​രാ​നാ​കു​വെ​ന്നതു ശ്രദ്ധി​ക്കുക. യഹോ​വ​യു​ടെ പഠിപ്പി​ക്ക​ലി​ന​നു​സൃ​ത​മായ പ്രതി​ക​ര​ണ​ത്തിന്‌ ഒരു വ്യക്തി​യു​ടെ ചിന്താ​രീ​തി​ക്കും പ്രവർത്ത​ന​വി​ധ​ത്തി​നും മാറ്റം വരുത്താ​നാ​കും, അങ്ങനെ യുദ്ധ​പ്രി​യ​നായ ഒരുവനു സമാധാ​ന​പ്രി​യ​നാ​യി​ത്തീ​രാൻ കഴിയും. ഈ മാറ്റം സാധ്യ​മാ​കു​ന്ന​തെ​ങ്ങ​നെ​യാണ്‌? റോമർ 12:2 പറയുന്നു: “ഈ ലോക​ത്തി​ന്നു അനുരൂ​പ​മാ​കാ​തെ നന്മയും പ്രസാ​ദ​വും പൂർണ്ണ​ത​യു​മുള്ള ദൈവ​ഹി​തം ഇന്നതെന്നു തിരി​ച്ച​റി​യേ​ണ്ട​തി​ന്നു മനസ്സു പുതുക്കി രൂപാ​ന്ത​ര​പ്പെ​ടു​വിൻ.” നാം ദൈവ​വ​ച​ന​ത്തി​ലെ തത്ത്വങ്ങ​ളും കൽപ്പന​ക​ളും​കൊ​ണ്ടു മനസ്സു നിറച്ച്‌ അതിനെ രൂപാ​ന്ത​ര​പ്പെ​ടു​ത്തു​ന്നു, അല്ലെങ്കിൽ മറ്റൊരു ദിശയിൽ അതിനെ പ്രചോ​ദി​പ്പി​ക്കു​ന്നു. പതിവാ​യി ദൈവ​വ​ചനം പഠിക്കു​ന്നത്‌ ഈ മാറ്റം വരുത്താൻ നമ്മെ സഹായി​ക്കും. കൂടാതെ നമ്മെ സംബന്ധിച്ച യഹോ​വ​യു​ടെ ഹിതം എന്താ​ണെന്നു നമുക്കു​തന്നെ ബോധ്യം വരുത്തു​ക​യും നാം പോ​കേ​ണ്ടുന്ന വഴി നമുക്കു വ്യക്തമാ​യി കാണി​ച്ചു​ത​രി​ക​യും ചെയ്യും.—സങ്കീർത്തനം 119:105.

4. ഒരുവൻ സമാധാ​ന​പൂർണ​മായ പുതു​വ്യ​ക്തി​ത്വം ധരിക്കു​ന്ന​തെ​ങ്ങനെ?

⁴ ബൈബിൾ സത്യം നമ്മുടെ ചിന്താ​രീ​തി​യെ മാത്രമല്ല, നമ്മുടെ പ്രവർത്ത​ന​ങ്ങ​ളെ​യും വ്യക്തി​ത്വ​ത്തെ​യും രൂപാ​ന്ത​ര​പ്പെ​ടു​ത്തു​ന്നു. അതു പൗലൊസ്‌ ഉദ്‌ബോ​ധി​പ്പി​ച്ചത്‌ ചെയ്യാൻ നമ്മെ സഹായി​ക്കു​ന്നു: “മുമ്പി​ലത്തെ നടപ്പു സംബന്ധി​ച്ചു ചതി​മോ​ഹ​ങ്ങ​ളാൽ വഷളാ​യി​പ്പോ​കുന്ന പഴയ മനുഷ്യ​നെ ഉപേക്ഷി​ച്ചു നിങ്ങളു​ടെ ഉള്ളിലെ ആത്മാവു സംബന്ധ​മാ​യി പുതുക്കം പ്രാപി​ച്ചു . . . നീതി​യി​ലും വിശു​ദ്ധി​യി​ലും ദൈവാ​നു​രൂ​പ​മാ​യി സൃഷ്ടി​ക്ക​പ്പെട്ട പുതു​മ​നു​ഷ്യ​നെ ധരിച്ചു​കൊൾവിൻ.” (എഫെസ്യർ 4:22-24) മനസ്സിനെ പ്രചോ​ദി​പ്പി​ക്കുന്ന ശക്തി ആന്തരി​ക​മാണ്‌. യഹോ​വ​യോ​ടും അവന്റെ നിയമ​ങ്ങ​ളോ​ടു​മുള്ള സ്‌നേഹം വളരു​മ്പോൾ, അതു രൂപാ​ന്ത​ര​പ്പെ​ടു​ക​യും ശക്തിയു​ള്ള​താ​യി​ത്തീ​രു​ക​യും ചെയ്യുന്നു, കൂടാതെ അതു നമ്മെ ആത്മീയ​ത​യു​ള്ള​വ​രും സമാധാ​ന​പ്രേ​മി​ക​ളു​മാ​ക്കു​ന്നു.

5. യേശു ശിഷ്യ​ന്മാർക്കു കൊടുത്ത “പുതിയ കല്‌പന” അവർക്കി​ട​യിൽ സമാധാ​നം ഊട്ടി​വ​ളർത്തു​ന്ന​തെ​ങ്ങനെ?

⁵ ഈ രൂപാ​ന്ത​രീ​ക​ര​ണ​ത്തി​ന്റെ ആവശ്യം, യേശു ശിഷ്യ​ന്മാ​രു​മൊ​ത്തു തന്റെ അവസാന മണിക്കൂ​റു​കൾ ചെലവ​ഴി​ക്കുന്ന സമയത്ത്‌ അവർക്കു കൊടുത്ത പ്രബോ​ധ​ന​ത്തിൽ കാണാം: “നിങ്ങൾ തമ്മിൽ തമ്മിൽ സ്‌നേ​ഹി​ക്കേണം എന്നു പുതി​യോ​രു കല്‌പന ഞാൻ നിങ്ങൾക്കു തരുന്നു; ഞാൻ നിങ്ങളെ സ്‌നേ​ഹി​ച്ച​തു​പോ​ലെ നിങ്ങളും തമ്മിൽ തമ്മിൽ സ്‌നേ​ഹി​ക്കേണം എന്നു തന്നേ. നിങ്ങൾക്കു തമ്മിൽ തമ്മിൽ സ്‌നേഹം ഉണ്ടെങ്കിൽ നിങ്ങൾ എന്റെ ശിഷ്യൻമാർ എന്നു എല്ലാവ​രും അറിയും.” (യോഹ​ന്നാൻ 13:34, 35) സമ്പൂർണ ഐക്യ​ത്തിൽ ശിഷ്യ​ന്മാ​രെ ഒന്നിച്ചു​നിർത്തു​ന്നത്‌ ഈ ക്രിസ്‌തു​സ​മാന, നിസ്വാർഥ സ്‌നേ​ഹ​മാണ്‌. (കൊ​ലൊ​സ്സ്യർ 3:14) ഈ ‘പുതിയ കൽപ്പന’ സ്വീക​രിച്ച്‌ അതനു​സ​രി​ച്ചു ജീവി​ക്കാൻ മനസ്സൊ​രു​ക്ക​മു​ള്ളവർ മാത്രമേ ദൈവം വാഗ്‌ദാ​നം ചെയ്യുന്ന സമാധാ​നം ആസ്വദി​ക്കു​ക​യു​ള്ളൂ. ഇന്ന്‌ ഇതു ചെയ്യുന്ന ഏതെങ്കി​ലും ആളുക​ളു​ണ്ടോ?

6. ലോക​ത്തി​ലെ ആളുക​ളിൽനി​ന്നു വ്യത്യ​സ്‌ത​രാ​യി യഹോ​വ​യു​ടെ സാക്ഷികൾ സമാധാ​നം ആസ്വദി​ക്കു​ന്ന​തെ​ന്തു​കൊണ്ട്‌?

⁶ തങ്ങളുടെ ലോക​വ്യാ​പക സഹോ​ദ​ര​വർഗ​ത്തി​നി​ട​യിൽ സ്‌നേഹം പ്രകട​മാ​ക്കാൻ യഹോ​വ​യു​ടെ സാക്ഷികൾ ശ്രമി​ക്കു​ന്നു. ലോക​ത്തി​ലെ എല്ലാ ജനതക​ളിൽനി​ന്നു​മാ​യി വന്നവ​രെ​ങ്കി​ലും, രാഷ്‌ട്രീ​യ​മോ മതപര​മോ ആയ കടുത്ത സമ്മർദ​മു​ണ്ടാ​യാൽപ്പോ​ലും അവർ ലോക​ത്തി​ന്റെ വിവാ​ദ​ങ്ങ​ളിൽ ഉൾപ്പെ​ടു​ന്നില്ല. ഒരു ഏകീകൃത ജനമെന്ന നിലയിൽ, അവർ യഹോ​വ​യാൽ പഠിപ്പി​ക്ക​പ്പെ​ടു​ന്നു. അവർ സമാധാ​നം ആസ്വദി​ക്കു​ന്നു. (യെശയ്യാ​വു 54:13) രാഷ്‌ട്രീയ പോരാ​ട്ട​ങ്ങ​ളിൽ അവർ നിഷ്‌പക്ഷത പാലി​ക്കു​ന്നു, അവർ യുദ്ധങ്ങ​ളിൽ പങ്കെടു​ക്കു​ന്നു​മില്ല. മുമ്പ്‌ അക്രമാ​സക്ത സ്വഭാ​വ​മു​ണ്ടാ​യി​രുന്ന ചിലർ ആ ജീവി​ത​രീ​തി വിട്ടു​ക​ള​ഞ്ഞി​രി​ക്കു​ന്നു. അവർ ക്രിസ്‌തു​യേ​ശു​വി​നെ അനുക​രിച്ച്‌ സമാധാ​ന​പ്രേ​മി​ക​ളായ ക്രിസ്‌ത്യാ​നി​കൾ ആയിത്തീർന്നി​രി​ക്കു​ന്നു. അവർ പത്രൊ​സി​ന്റെ ഉപദേശം മുഴു​ഹൃ​ദ​യ​ത്തോ​ടെ അനുസ​രി​ക്കു​ന്നു: “ജീവനെ ആഗ്രഹി​ക്ക​യും ശുഭകാ​ലം കാണ്മാൻ ഇച്ഛിക്ക​യും ചെയ്യു​ന്നവൻ ദോഷം ചെയ്യാതെ തന്റെ നാവി​നെ​യും വ്യാജം പറയാതെ അധര​ത്തെ​യും അടക്കി​ക്കൊ​ള്ളട്ടെ. അവൻ ദോഷം വിട്ടകന്നു ഗുണം ചെയ്‌ക​യും സമാധാ​നം അന്വേ​ഷി​ച്ചു പിന്തു​ട​രു​ക​യും ചെയ്യട്ടെ.”—1 പത്രൊസ്‌ 3:10, 11; എഫെസ്യർ 4:3.

സമാധാ​നം പിന്തു​ട​രു​ന്ന​വർ

7, 8. യുദ്ധം ഉപേക്ഷിച്ച്‌ യഥാർഥ സമാധാ​നം തേടു​ന്ന​വ​രാ​യി​ത്തീർന്ന​വ​രു​ടെ ഉദാഹ​ര​ണങ്ങൾ നൽകുക. (നിങ്ങൾക്ക​റി​യാ​വുന്ന മറ്റ്‌ ഉദാഹ​ര​ണങ്ങൾ പറയുക.)

⁷ ഉദാഹ​ര​ണ​മാ​യി, ഭീകര​പ്ര​വർത്ത​കരെ നേരി​ടു​ന്ന​തി​നുള്ള പ്രത്യേക പരിശീ​ലനം ലഭിച്ച സ്‌ക്വാ​ഡി​ലെ ഒരു മുൻ ഓഫീ​സ​റാ​യി​രുന്ന റാമി ഓവേ​ദി​ന്റെ കാര്യ​മെ​ടു​ക്കുക. ശത്രു​ക്കളെ കൊല്ലാ​നുള്ള പരിശീ​ലനം അദ്ദേഹ​ത്തി​നു ലഭിച്ചി​രു​ന്നു. പുറജാ​തീയ ഏഷ്യക്കാ​രി​യാ​യി​പ്പോ​യി എന്നതി​നാൽ താൻ സ്‌നേ​ഹിച്ച പെൺകു​ട്ടി​യെ വിവാഹം കഴിക്കു​ന്ന​തി​നു റബിമാർ അനുകൂ​ല​മ​ല്ലെന്നു മനസ്സി​ലാ​യ​തോ​ടെ ഇസ്രാ​യേലി ദേശീ​യ​ത​യിൽ അദ്ദേഹ​ത്തി​നു​ണ്ടാ​യി​രുന്ന ആഴമായ വിശ്വാ​സ​ത്തിന്‌ ഉലച്ചിൽ തട്ടി. അയാൾ ബൈബി​ളി​ലെ സത്യത്തി​നാ​യി അന്വേ​ഷണം ആരംഭി​ച്ചു. അങ്ങനെ യഹോ​വ​യു​ടെ സാക്ഷി​ക​ളു​മാ​യി ബന്ധപ്പെട്ടു. ഇനി​യൊ​രി​ക്ക​ലും തനി​ക്കൊ​രു ഭ്രാന്തൻ ദേശഭ​ക്ത​നാ​യി​രി​ക്കാൻ സാധ്യ​മ​ല്ലെന്നു സാക്ഷി​ക​ളു​മൊ​ത്തുള്ള ബൈബിൾ പഠനത്തിൽനിന്ന്‌ അദ്ദേഹ​ത്തി​നു ബോധ്യ​മാ​യി. യുദ്ധവും ആയുധ​വും ഉപേക്ഷിച്ച്‌ എല്ലാ വർഗത്തി​ലും​പെട്ട ആളുകളെ സ്‌നേ​ഹി​ക്കാൻ പഠിക്കുക എന്നതാ​യി​രു​ന്നു ക്രിസ്‌തീയ സ്‌നേ​ഹ​ത്തി​ന്റെ അർഥം. “എന്റെ റാമി സഹോ​ദ​രന്‌” എന്ന വാക്കു​ക​ളോ​ടെ ആരംഭി​ക്കുന്ന ദയാപൂർവ​ക​മായ ഒരു കത്തു ലഭിച്ച​പ്പോൾ അദ്ദേഹം ശരിക്കും അതിശ​യി​ച്ചു​പോ​യി! അതിനി​ത്ര പ്രത്യേ​ക​ത​യു​ണ്ടാ​യി​രു​ന്നത്‌ എന്തു​കൊണ്ട്‌? അത്‌ എഴുതിയ വ്യക്തി ഒരു പാലസ്‌തീ​നി​യൻ സാക്ഷി​യാ​യി​രു​ന്നു. “അത്‌ അവിശ്വ​സ​നീ​യ​മാ​യാണ്‌ എനിക്കു തോന്നി​യത്‌. കാരണം, പാലസ്‌തീൻകാർ എന്റെ ശത്രു​ക്ക​ളാ​യി​രു​ന്നു, ഇപ്പോ​ഴി​താ അവരി​ലൊ​രാൾ എന്നെ ‘എന്റെ സഹോ​ദരൻ’ എന്നു വിളി​ക്കു​ന്നു,” റാമി പറയുന്നു. അദ്ദേഹ​വും ഭാര്യ​യും ഇപ്പോൾ ദൈവ​ത്തി​ന്റേ​തായ വിധത്തിൽ സമാധാ​നം പിന്തു​ട​രു​ക​യാണ്‌.

⁸ ജോർജ്‌ റൂട്ടർ ആണ്‌ മറ്റൊരു ഉദാഹ​രണം. രണ്ടാം ലോക​മ​ഹാ​യു​ദ്ധ​ത്തിൽ റഷ്യയെ ആക്രമിച്ച ജർമൻ സൈന്യ​ത്തിൽ അദ്ദേഹ​വു​മു​ണ്ടാ​യി​രു​ന്നു. ലോകാ​ധി​പ​ത്യം എന്ന ഹിറ്റ്‌ല​റി​ന്റെ മഹത്തായ പദ്ധതി​യു​ടെ മാസ്‌മ​ര​ത​യിൽനിന്ന്‌ പെട്ടെ​ന്നു​തന്നെ അദ്ദേഹം മുക്തനാ​യി. യുദ്ധം കഴിഞ്ഞ്‌ വീട്ടിൽ തിരി​ച്ചെ​ത്തിയ അദ്ദേഹം യഹോ​വ​യു​ടെ സാക്ഷി​ക​ളോ​ടൊ​ത്തു ബൈബിൾ പഠിക്കാൻ തുടങ്ങി. അദ്ദേഹം എഴുതി: “ഒടുവിൽ എനിക്കു കാര്യ​ങ്ങ​ളെ​ല്ലാം വ്യക്തമാ​കാൻ തുടങ്ങി. സകല രക്തച്ചൊ​രി​ച്ചി​ലി​നും കുറ്റ​പ്പെ​ടു​ത്തേ​ണ്ടതു ദൈവ​ത്തെ​യ​ല്ലെന്നു ഞാൻ മനസ്സി​ലാ​ക്കി. . . . അനുസ​ര​ണ​മുള്ള മനുഷ്യ​വർഗ​ത്തി​നു നിത്യാ​നു​ഗ്ര​ഹ​ങ്ങ​ളോ​ടെ, ഭൂവ്യാ​പ​ക​മാ​യി ഒരു പറുദീസ സ്ഥാപി​ക്കു​ക​യെ​ന്ന​താണ്‌ അവന്റെ ഉദ്ദേശ്യ​മെന്നു ഞാൻ മനസ്സി​ലാ​ക്കി. . . . തന്റെ ‘ആയിരം​വർഷ ഭരണ’ത്തെക്കു​റിച്ച്‌ ഹിറ്റ്‌ലർ വീമ്പി​ള​ക്കി​യി​രു​ന്നു. എന്നാൽ 12 [വർഷമേ] അദ്ദേഹം ഭരിച്ചു​ള്ളൂ—പരിണ​ത​ഫലം എത്ര ബീഭത്സ​മാ​യി​രു​ന്നു! ഭൂമി​യു​ടെ​മേൽ ആയിരം വർഷം ഭരിക്കാൻ കഴിയു​ന്ന​തും ഭരിക്കാൻ പോകു​ന്ന​തും . . . ഹിറ്റ്‌ലർ അല്ല, ക്രിസ്‌തു​വാണ്‌.” ഇപ്പോൾ ഏതാണ്ട്‌ 50 വർഷമാ​യി ജോർജ്‌ യഥാർഥ സമാധാ​ന​ത്തി​ന്റെ സന്ദേശ​വാ​ഹ​ക​നാ​യി മുഴു​സമയ ശുശ്രൂ​ഷ​യിൽ ഏർപ്പെ​ട്ടി​രി​ക്കു​ക​യാണ്‌.

9. നാസി ജർമനി​യി​ലെ യഹോ​വ​യു​ടെ സാക്ഷി​ക​ളു​ടെ അനുഭവം അവർ ധൈര്യ​ശാ​ലി​ക​ളെ​ങ്കി​ലും സമാധാ​ന​പ്രേ​മി​ക​ളാ​ണെന്നു തെളി​യി​ക്കു​ന്ന​തെ​ങ്ങനെ?

⁹ ജർമനി​യി​ലെ യഹോ​വ​യു​ടെ സാക്ഷികൾ നാസി ഭരണകാ​ലത്തു പ്രകട​മാ​ക്കിയ നിർമ​ല​ത​യും നിഷ്‌പ​ക്ഷ​ത​യും 50-ലധികം വർഷങ്ങൾക്കു​ശേഷം ഇന്നും ദൈവ​ത്തോ​ടും സമാധാ​ന​ത്തോ​ടു​മുള്ള അവരുടെ സ്‌നേ​ഹ​ത്തി​നു സാക്ഷ്യ​മാ​യി തുടരു​ക​യാണ്‌. വാഷി​ങ്‌ടൺ ഡി.സി.-യിലെ യു​ണൈ​റ്റഡ്‌ സ്റ്റേറ്റ്‌സ്‌ ഹോ​ളോ​കോസ്റ്റ്‌ മെമ്മോ​റി​യൽ മ്യൂസി​യം പ്രസി​ദ്ധീ​ക​രിച്ച ഒരു ചെറു​പു​സ്‌തകം പ്രസ്‌താ​വി​ക്കു​ന്നു: “നാസി ഭരണകാ​ലത്ത്‌ യഹോ​വ​യു​ടെ സാക്ഷികൾ കടുത്ത പീഡനം സഹിച്ചു. . . . പീഡന​വും തടങ്കൽപ്പാ​ള​യ​ങ്ങ​ളി​ലെ ക്രൂര​മായ പെരു​മാ​റ്റ​വും ചില​പ്പോൾ വധനിർവ​ഹ​ണ​വും നേരി​ട്ട​പ്പോൾ [തങ്ങളുടെ മതത്തെ തള്ളിപ്പ​റ​യാൻ] വിസമ്മ​തി​ച്ചു​കൊണ്ട്‌ അവരിൽ ഭൂരി​പ​ക്ഷ​വും കാട്ടിയ ധൈര്യം അനേകം സമകാ​ലി​ക​രു​ടെ ആദരവു നേടി.” എന്നിട്ട്‌ അതിങ്ങനെ തുടരു​ന്നു: “പാളയ​ങ്ങ​ളിൽനി​ന്നു വിമോ​ചി​ത​രാ​യ​പ്പോൾ, യഹോ​വ​യു​ടെ സാക്ഷികൾ തങ്ങളുടെ വേല തുടർന്നു, അതിജീ​വ​ക​രു​ടെ ഇടയിൽ പ്രവർത്തിച്ച്‌ അനുയാ​യി​കളെ നേടി​ക്കൊ​ണ്ടി​രു​ന്നു.”

വളരെ മഹത്തര​മായ മാറ്റം

10. (എ) യഥാർഥ സമാധാ​നം വരുന്ന​തിന്‌ ഏതു മഹത്തായ മാറ്റം ആവശ്യ​മാണ്‌? (ബി) ഇതു ദാനീ​യേ​ലി​ന്റെ പുസ്‌ത​ക​ത്തിൽ എങ്ങനെ​യാ​ണു ചിത്രീ​ക​രി​ച്ചി​രി​ക്കു​ന്നത്‌?

¹⁰ ഏതെങ്കി​ലും തരത്തി​ലുള്ള കൂട്ട മതപരി​വർത്ത​ന​ത്തി​ലൂ​ടെ ക്രിസ്‌തീയ നിഷ്‌പ​ക്ഷ​ത​യിൽ വിശ്വ​സി​പ്പിച്ച്‌ ലോക​ത്തിൽ സമാധാ​നം കൈവ​രു​ത്താൻ കഴിയു​മെന്നു യഹോ​വ​യു​ടെ സാക്ഷികൾ വിശ്വ​സി​ക്കു​ന്നു​വെ​ന്നാ​ണോ ഇതി​ന്റെ​യർഥം? അല്ല! എന്തെന്നാൽ ഭൂമി​യിൽ സമാധാ​നം പുനഃ​സ്ഥാ​പി​ത​മാ​ക​ണ​മെ​ങ്കിൽ, അതി​നെ​ക്കാൾ വലിയ ഒരു മാറ്റം ആവശ്യ​മാണ്‌. എന്താണത്‌? ഭിന്നി​പ്പി​ക്കു​ന്ന​തും മർദക​വും അക്രമാ​സ​ക്ത​വു​മായ മനുഷ്യ​ഭ​രണം, യേശു ശിഷ്യ​ന്മാ​രെ പ്രാർഥി​ക്കാൻ പഠിപ്പിച്ച ദൈവ​രാ​ജ്യ​ത്താ​ലുള്ള ഭരണത്തി​നു വഴിമാ​റി​ക്കൊ​ടു​ക്കണം. (മത്തായി 6:9, 10) എന്നാൽ അതെങ്ങനെ സംഭവി​ക്കും? മനുഷ്യ​വർഗ​ത്തി​ന്റെ ഭൂമി​യി​ലെ രാഷ്‌ട്രീയ ഭരണാ​ധി​പ​ത്യ​ങ്ങളെ പ്രതി​നി​ധീ​ക​രി​ക്കുന്ന ഒരു ഭീമാ​കാര പ്രതി​മയെ അന്ത്യനാ​ളു​ക​ളിൽ ദൈവ​രാ​ജ്യം, ‘മനുഷ്യ​ക​ര​ങ്ങൾകൊണ്ട്‌ വെട്ടി​യെ​ടു​ക്ക​പ്പെ​ടാത്ത’ ഒരു വലിയ കല്ലു​പോ​ലെ, തകർത്തു നശിപ്പി​ക്കു​ന്ന​താ​യി ദാനീ​യേൽ പ്രവാ​ചകൻ ഒരു ദിവ്യ​നി​ശ്വസ്‌ത സ്വപ്‌ന​ത്തിൽ മനസ്സി​ലാ​ക്കു​ക​യു​ണ്ടാ​യി. പിന്നെ അവൻ ഇങ്ങനെ ഉദ്‌ഘോ​ഷി​ച്ചു: “ഈ രാജാ​ക്ക​ന്മാ​രു​ടെ കാലത്തു സ്വർഗ്ഗ​സ്ഥ​നായ ദൈവം ഒരുനാ​ളും നശിച്ചു​പോ​കാത്ത ഒരു രാജത്വം സ്ഥാപി​ക്കും; ആ രാജത്വം വേറെ ഒരു ജാതിക്കു ഏല്‌പി​ക്ക​പ്പെ​ടു​ക​യില്ല; അതു ഈ രാജത്വ​ങ്ങളെ ഒക്കെയും തകർത്തു നശിപ്പി​ക്ക​യും എന്നേക്കും നിലനി​ല്‌ക്ക​യും ചെയ്യും.”—ദാനീ​യേൽ 2:31-44.

11. സമാധാ​ന​ത്തി​നു​വേണ്ടി ആവശ്യ​മായ മാറ്റം യഹോവ ഏത്‌ ഉപാധി​യി​ലൂ​ടെ കൈവ​രു​ത്തും?

¹¹ ലോകാ​വ​സ്ഥ​യിൽ ഈ സമൂല മാറ്റം നടക്കാൻ പോകു​ന്ന​തെ​ന്തു​കൊണ്ട്‌? എന്തെന്നാൽ ഭൂമിയെ മലീമ​സ​മാ​ക്കു​ക​യും അതിനെ നശിപ്പി​ക്കു​ക​യും ചെയ്യു​ന്ന​വരെ നീക്കി അതിനെ ശുദ്ധീ​ക​രി​ക്കു​മെന്നു യഹോവ വാഗ്‌ദാ​നം ചെയ്‌തി​രി​ക്കു​ന്നു. (വെളി​പ്പാ​ടു 11:18) സാത്താ​നും അവന്റെ ദുഷ്ട​ലോ​ക​ത്തി​നു​മെ​തി​രെ​യുള്ള യഹോ​വ​യു​ടെ നീതി​നി​ഷ്‌ഠ​മായ യുദ്ധത്തി​ലാ​യി​രി​ക്കും ഈ മാറ്റം സംഭവി​ക്കുക. വെളി​പ്പാ​ടു 16:14, 16-ൽ നാമി​ങ്ങനെ വായി​ക്കു​ന്നു: “ഇവ [അതായത്‌, അശുദ്ധ​മായ നിശ്വസ്‌ത മൊഴി​കൾ] സർവ്വഭൂ​ത​ല​ത്തി​ലും ഉള്ള രാജാ​ക്ക​ന്മാ​രെ [രാഷ്‌ട്രീയ ഭരണാ​ധി​പ​ന്മാ​രെ] സർവ്വശ​ക്ത​നായ ദൈവ​ത്തി​ന്റെ മഹാദി​വ​സ​ത്തി​ലെ യുദ്ധത്തി​ന്നു കൂട്ടി​ച്ചേർപ്പാൻ അത്ഭുതങ്ങൾ ചെയ്‌തു​കൊ​ണ്ടു അവരുടെ അടുക്ക​ലേക്കു പുറ​പ്പെ​ടുന്ന ഭൂതാ​ത്മാ​ക്കൾ തന്നേ—അവ അവരെ എബ്രാ​യ​ഭാ​ഷ​യിൽ ഹർമ്മ​ഗെ​ദ്ദോൻ എന്നു പേരുള്ള സ്ഥലത്തിൽ കൂട്ടി​ച്ചേർത്തു.”

12. അർമ​ഗെ​ദോൻ എങ്ങനെ​യാ​യി​രി​ക്കും?

¹² അർമ​ഗെ​ദോൻ എങ്ങനെ​യാ​യി​രി​ക്കും? അത്‌ ഏതെങ്കി​ലും അണ്വാ​യുധ കൊടും​വി​പ​ത്തു​പോ​ലെ​യോ മനുഷ്യൻ വരുത്തി​ക്കൂ​ട്ടുന്ന ദുരന്തം​പോ​ലെ​യോ ആയിരി​ക്കു​ക​യില്ല. അല്ല, സകല മനുഷ്യ​യു​ദ്ധ​ങ്ങ​ളെ​യും അവസാ​നി​പ്പി​ക്കു​ന്ന​തി​നും അത്തരം യുദ്ധങ്ങൾ പ്രോ​ത്സാ​ഹി​പ്പി​ക്കു​ന്ന​വരെ നശിപ്പി​ക്കു​ന്ന​തി​നു​മുള്ള ദൈവ​ത്തി​ന്റെ യുദ്ധമാ​യി​രി​ക്കും അത്‌. സമാധാ​നം ഇഷ്ടപ്പെ​ടു​ന്ന​വർക്കാ​യി യഥാർഥ സമാധാ​നം വരുത്തു​ന്ന​തി​നുള്ള ദൈവ​ത്തി​ന്റെ യുദ്ധമാ​യി​രി​ക്കും അത്‌. അതേ, യഹോവ ഉദ്ദേശി​ച്ചി​രി​ക്കു​ന്ന​തു​പോ​ലെ​തന്നെ അർമ​ഗെ​ദോൻ വരുക​യാണ്‌. അതു താമസി​ക്കു​ക​യില്ല. ഇപ്രകാ​രം എഴുതാൻ പ്രവാ​ച​ക​നായ ഹബക്കൂക്‌ നിശ്വ​സ്‌ത​നാ​ക്ക​പ്പെട്ടു: “ദർശന​ത്തി​ന്നു ഒരു അവധി​വെ​ച്ചി​രി​ക്കു​ന്നു; അതു സമാപ്‌തി​യി​ലേക്കു ബദ്ധപ്പെ​ടു​ന്നു; സമയം തെററു​ക​യു​മില്ല; അതു വൈകി​യാ​ലും അതിന്നാ​യി കാത്തി​രിക്ക; അതു വരും നിശ്ചയം; താമസി​ക്ക​യു​മില്ല.” (ഹബക്കൂക്‌ 2:3) നമ്മുടെ മാനു​ഷി​ക​മായ ചിന്ത നിമിത്തം അതു വൈകു​ന്ന​താ​യി തോന്നാം, എന്നാൽ യഹോവ തന്റെ സമയപ്പ​ട്ടിക പാലി​ക്കു​ന്നു. യഹോവ മുൻകൂ​ട്ടി നിശ്ചയി​ച്ചി​രി​ക്കുന്ന മണിക്കൂ​റിൽത്തന്നെ അർമ​ഗെ​ദോൻ പൊട്ടി​പ്പു​റ​പ്പെ​ടും.

13. യഥാർഥ കുറ്റവാ​ളി​യായ പിശാ​ചായ സാത്താനെ ദൈവം എങ്ങനെ കൈകാ​ര്യം ചെയ്യും?

¹³ ഈ നിർണാ​യക നടപടി യഥാർഥ സമാധാ​ന​ത്തി​നുള്ള വഴി​യൊ​രു​ക്കും! എന്നാൽ യഥാർഥ സമാധാ​നം ഉറപ്പായി സ്ഥാപി​ത​മാ​കു​ന്ന​തിന്‌, മറ്റൊന്നു കൂടി ചെയ്യേ​ണ്ട​തുണ്ട്‌—ഭിന്നത​യും വിദ്വേ​ഷ​വും കലഹവും ഉണ്ടാക്കു​ന്ന​വനെ നീക്കം ചെയ്യണം. ഉടനെ സംഭവി​ക്കു​മെന്നു ബൈബിൾ പ്രവചി​ക്കു​ന്ന​തും അതുതന്നെ—യുദ്ധം ഇളക്കി​വി​ടു​ന്ന​വ​നും വ്യാജ​ങ്ങ​ളു​ടെ പിതാ​വു​മായ സാത്താനെ പെട്ടെ​ന്നു​തന്നെ അഗാധ​ത്തിൽ തളയ്‌ക്കു​മെന്ന്‌ അതു പ്രവചി​ക്കു​ന്നു. വെളി​പ്പാ​ടു 20:1-3-ൽ രേഖ​പ്പെ​ടു​ത്തി​യി​രി​ക്കു​ന്ന​തു​പോ​ലെ, അപ്പോ​സ്‌ത​ല​നായ യോഹ​ന്നാൻ ആ സംഭവത്തെ പ്രാവ​ച​നിക ദർശന​ത്തിൽ കണ്ടു: “അനന്തരം ഒരു ദൂതൻ അഗാധ​ത്തി​ന്റെ താക്കോ​ലും ഒരു വലിയ ചങ്ങലയും കയ്യിൽ പിടി​ച്ചു​കൊ​ണ്ടു സ്വർഗ്ഗ​ത്തിൽനി​ന്നു ഇറങ്ങു​ന്നതു ഞാൻ കണ്ടു. അവൻ പിശാ​ചും സാത്താ​നും എന്നുള്ള പഴയ പാമ്പായ മഹാസർപ്പത്തെ പിടിച്ചു ആയിരം ആണ്ടേക്കു ചങ്ങലയി​ട്ടു. ആയിരം ആണ്ടു കഴിയു​വോ​ളം ജാതി​കളെ വഞ്ചിക്കാ​തി​രി​പ്പാൻ അവനെ അഗാധ​ത്തിൽ തള്ളിയി​ട്ടു അടെച്ചു​പൂ​ട്ടു​ക​യും മീതെ മുദ്ര​യി​ടു​ക​യും ചെയ്‌തു. അതിന്റെ ശേഷം അവനെ അല്‌പ​കാ​ല​ത്തേക്കു അഴിച്ചു വിടേ​ണ്ട​താ​കു​ന്നു.”

14. സാത്താ​നെ​തി​രെ​യുള്ള യഹോ​വ​യു​ടെ വിജയ​ക​ര​മായ നടപടി​യെ എങ്ങനെ വർണി​ക്കാം?

¹⁴ ഇതു സ്വപ്‌നമല്ല; അതു ദൈവ​ത്തി​ന്റെ വാഗ്‌ദാ​ന​മാണ്‌—“ദൈവ​ത്തി​നു നുണ പറയുക അസാധ്യ​മാണ്‌” എന്നു ബൈബിൾ പറയുന്നു. (എബ്രായർ 6:18, NW) അതു​കൊണ്ട്‌, പ്രവാ​ച​ക​നായ യിരെ​മ്യാ​വി​ലൂ​ടെ യഹോ​വ​യ്‌ക്ക്‌ ഇങ്ങനെ പറയാൻ കഴിഞ്ഞു: “യഹോ​വ​യായ ഞാൻ ഭൂമി​യിൽ ദയയും ന്യായ​വും നീതി​യും പ്രവർത്തി​ക്കു​ന്നു . . . ഇതിൽ അല്ലോ എനിക്കു പ്രസാ​ദ​മു​ള്ളതു എന്നു യഹോ​വ​യു​ടെ അരുള​പ്പാ​ടു.” (യിരെ​മ്യാ​വു 9:24) അതേ, യഹോവ നീതി​യി​ലും ന്യായ​ത്തി​ലും പ്രവർത്തി​ക്കു​ന്നു, അവൻ ഭൂമി​യിൽ കൈവ​രു​ത്താൻ പോകുന്ന സമാധാ​ന​ത്തിൽ അവന്‌ ആനന്ദമുണ്ട്‌.

സമാധാ​ന​പ്ര​ഭു​വി​നാ​ലുള്ള ഭരണം

15, 16. (എ) രാജാ​വാ​യി ഭരിക്കു​ന്ന​തി​നു യഹോവ തിര​ഞ്ഞെ​ടു​ത്തി​രി​ക്കു​ന്നത്‌ ആരെ? (ബി) ആ ഭരണത്തെ വർണി​ച്ചി​രി​ക്കു​ന്ന​തെ​ങ്ങനെ, അതിൽ ആർ പങ്കുപ​റ്റും?

¹⁵ രാജ്യ​ക്ര​മീ​ക​ര​ണ​ത്തിൻകീ​ഴിൽ ജീവി​ക്കുന്ന എല്ലാവർക്കും യഥാർഥ സമാധാ​ന​മു​ണ്ടാ​യി​രി​ക്കു​മെന്ന്‌ ഉറപ്പാ​ക്കാൻ, യഹോവ ഭരണാ​ധി​പ​ത്യം നൽകി​യി​രി​ക്കു​ന്നത്‌ യെശയ്യാ​വു 9:6, 7-ൽ മുൻകൂ​ട്ടി​പ്പ​റ​ഞ്ഞി​രി​ക്കു​ന്ന​തു​പോ​ലെ, യഥാർഥ സമാധാ​ന​പ്ര​ഭു​വായ യേശു​ക്രി​സ്‌തു​വി​നാണ്‌: “നമുക്കു ഒരു ശിശു ജനിച്ചി​രി​ക്കു​ന്നു; നമുക്കു ഒരു മകൻ നല്‌ക​പ്പെ​ട്ടി​രി​ക്കു​ന്നു; ആധിപ​ത്യം അവന്റെ തോളിൽ ഇരിക്കും; അവന്നു അത്ഭുത​മ​ന്ത്രി, വീരനാം ദൈവം, നിത്യ​പി​താ​വു, സമാധാന പ്രഭു എന്നു പേർ വിളി​ക്ക​പ്പെ​ടും. അവന്റെ ആധിപ​ത്യ​ത്തി​ന്റെ വർദ്ധ​നെ​ക്കും സമാധാ​ന​ത്തി​ന്നും അവസാനം ഉണ്ടാക​യില്ല; . . . സൈന്യ​ങ്ങ​ളു​ടെ യഹോ​വ​യു​ടെ തീക്ഷ്‌ണത അതിനെ നിവർത്തി​ക്കും.” മിശി​ഹാ​യു​ടെ സമാധാ​ന​പൂർണ​മായ ഭരണ​ത്തെ​ക്കു​റിച്ച്‌ സങ്കീർത്ത​ന​ക്കാ​ര​നും പ്രാവ​ച​നി​ക​മാ​യി എഴുതി: “അവന്റെ കാലത്തു നീതി​മാ​ന്മാർ തഴെക്കട്ടെ; ചന്ദ്രനു​ള്ളേ​ട​ത്തോ​ളം സമാധാ​ന​സ​മൃ​ദ്ധി ഉണ്ടാകട്ടെ.”—സങ്കീർത്തനം 72:7.

¹⁶ മാത്രമല്ല, ക്രിസ്‌തു​വി​ന്റെ 1,44,000 ആത്മാഭി​ഷിക്ത സഹോ​ദ​ര​ന്മാർ സ്വർഗ​ത്തിൽ അവനോ​ടൊ​പ്പം ഭരിക്കും. അവർ ക്രിസ്‌തു​വി​ന്റെ കൂട്ടവ​കാ​ശി​കൾ ആയിരി​ക്കും. അവരെ​ക്കു​റി​ച്ചു പൗലൊസ്‌ പ്രസ്‌താ​വി​ച്ചു: “സമാധാ​ന​ത്തി​ന്റെ ദൈവ​മോ വേഗത്തിൽ സാത്താനെ നിങ്ങളു​ടെ കാല്‌ക്കീ​ഴെ ചതെച്ചു​ക​ള​യും. നമ്മുടെ കർത്താ​വായ യേശു​ക്രി​സ്‌തു​വി​ന്റെ കൃപ നിങ്ങ​ളോ​ടു​കൂ​ടെ ഇരിക്കു​മാ​റാ​കട്ടെ.” (റോമർ 16:20) അതേ, ഇവർ യുദ്ധ​ക്കൊ​തി​യ​നായ പിശാ​ചായ സാത്താ​ന്റെ​മേ​ലുള്ള ക്രിസ്‌തു​വി​ന്റെ വിജയ​ത്തിൽ സ്വർഗ​ത്തിൽനി​ന്നു പങ്കെടു​ക്കും!

17. യഥാർഥ സമാധാ​നം നേടു​ന്ന​തി​നു നാം എന്തു ചെയ്യണം?

¹⁷ അതു​കൊണ്ട്‌, ഇപ്പോൾ ചോദ്യ​മി​താണ്‌: യഥാർഥ സമാധാ​നം നേടാൻ നാം എന്തു ചെയ്യണം? ദൈവ​ത്തി​ന്റെ വിധത്തിൽ മാത്രമേ യഥാർഥ സമാധാ​നം വരുക​യു​ള്ളൂ. അതു നേടാൻ നിങ്ങൾ ക്രിയാ​ത്മക നടപടി​കൾ എടുക്കണം. നിങ്ങൾ സമാധാ​ന​പ്ര​ഭു​വി​നെ സ്വീക​രിച്ച്‌ അവനി​ലേക്കു തിരി​യണം. അതിനർഥം പാപി​ക​ളായ മനുഷ്യ​വർഗ​ത്തി​ന്റെ വീണ്ടെ​ടു​പ്പു​കാ​ര​നും മറുവി​ല​ക്കാ​ര​നും എന്നനി​ല​യി​ലുള്ള അവന്റെ റോളിൽ നാം ക്രിസ്‌തു​വി​നെ സ്വീക​രി​ക്ക​ണ​മെ​ന്നാണ്‌. യേശു​തന്നെ ഈ വിഖ്യാ​ത​മായ വാക്കുകൾ പറയു​ക​യു​ണ്ടാ​യി: “തന്റെ ഏകജാ​ത​നായ പുത്ര​നിൽ വിശ്വ​സി​ക്കുന്ന ഏവനും നശിച്ചു​പോ​കാ​തെ നിത്യ​ജീ​വൻ പ്രാപി​ക്കേ​ണ്ട​തി​ന്നു ദൈവം അവനെ നല്‌കു​വാൻ തക്കവണ്ണം ലോകത്തെ സ്‌നേ​ഹി​ച്ചു.” (യോഹ​ന്നാൻ 3:16) യഥാർഥ സമാധാ​ന​ത്തി​നും രക്ഷയ്‌ക്കു​മുള്ള ദൈവ​ത്തി​ന്റെ കാര്യസ്ഥൻ എന്നനി​ല​യിൽ ക്രിസ്‌തു​യേ​ശു​വിൽ വിശ്വാ​സം പ്രകട​മാ​ക്കാൻ നാം മനസ്സൊ​രു​ക്ക​മു​ള്ള​വ​രാ​ണോ? സമാധാ​നം വരുത്താ​നും അത്‌ ഉറപ്പാ​ക്കാ​നും കഴിയുന്ന മറ്റൊരു നാമവും ആകാശ​ത്തിൻ കീഴി​ലില്ല. (ഫിലി​പ്പി​യർ 2:8-11) എന്തു​കൊണ്ട്‌? എന്തെന്നാൽ ദൈവം തിര​ഞ്ഞെ​ടു​ത്തി​രി​ക്കു​ന്നത്‌ യേശു​വി​നെ​യാണ്‌. ഭൂമി​യിൽ ജീവി​ച്ചി​രു​ന്നി​ട്ടുള്ള ഏറ്റവും വലിയ സമാധാന സന്ദേശ​വാ​ഹ​ക​നാണ്‌ അവൻ. നിങ്ങൾ യേശു​വി​നെ ശ്രദ്ധി​ക്കു​ക​യും അവന്റെ മാതൃക പിൻപ​റ്റു​ക​യും ചെയ്യു​മോ?

18. യോഹ​ന്നാൻ 17:3-ൽ രേഖ​പ്പെ​ടു​ത്തി​യി​രി​ക്കുന്ന യേശു​വി​ന്റെ വാക്കു​ക​ളോ​ടുള്ള പ്രതി​ക​ര​ണ​മാ​യി നാം എന്തു ചെയ്യണം?

¹⁸ “ഏകസത്യ​ദൈ​വ​മായ നിന്നെ​യും നീ അയച്ചി​രി​ക്കുന്ന യേശു​ക്രി​സ്‌തു​വി​നെ​യും അറിയു​ന്നതു തന്നേ നിത്യ​ജീ​വൻ ആകുന്നു” എന്ന്‌ യേശു പറയു​ക​യു​ണ്ടാ​യി. (യോഹ​ന്നാൻ 17:3) രാജ്യ​ഹാ​ളിൽ യഹോ​വ​യു​ടെ സാക്ഷി​ക​ളു​ടെ യോഗ​ങ്ങ​ളിൽ പതിവാ​യി സംബന്ധി​ച്ചു​കൊണ്ട്‌ സൂക്ഷ്‌മ​പ​രി​ജ്ഞാ​നം നേടു​ന്ന​തി​നുള്ള സമയമാ​ണിത്‌. വിദ്യാ​ഭ്യാ​സ​പ​ര​മായ ഈ യോഗങ്ങൾ നിങ്ങളു​ടെ പരിജ്ഞാ​ന​വും പ്രത്യാ​ശ​യും മറ്റുള്ള​വ​രു​മാ​യി പങ്കു​വെ​ക്കു​ന്ന​തി​നു നിങ്ങളെ പ്രേരി​പ്പി​ക്കും. നിങ്ങൾക്കും ദൈവ​സ​മാ​ധാ​ന​ത്തി​ന്റെ ഒരു സന്ദേശ​വാ​ഹകൻ ആയിരി​ക്കാൻ കഴിയും. ന്യൂ ഇൻറർനാ​ഷണൽ വേർഷൻ അനുസ​രിച്ച്‌ “ദൃഢമാ​ന​സനെ നീ സമ്പൂർണ സമാധാ​ന​ത്തിൽ കാത്തു​കൊ​ള്ളും, എന്തെന്നാൽ അവൻ നിന്നിൽ ആശ്രയി​ക്കു​ന്നു” എന്നു യെശയ്യാ​വു 26:3-ൽ പ്രസ്‌താ​വി​ച്ചി​രി​ക്കു​ന്ന​തു​പോ​ലെ, യഹോ​വ​യാം ദൈവ​ത്തിൽ ആശ്രയി​ച്ചു​കൊണ്ട്‌ നിങ്ങൾക്കി​പ്പോൾ സമാധാ​നം ആസ്വദി​ക്കാൻ കഴിയും. നാം ആരിൽ ആശ്രയി​ക്കണം? “യഹോ​വ​യാം യാഹിൽ ശാശ്വ​ത​മാ​യോ​രു പാറ ഉള്ളതി​നാൽ യഹോ​വ​യിൽ എന്നേക്കും ആശ്രയി​പ്പിൻ.”—യെശയ്യാ​വു 26:4.

19, 20. ഇന്നു സമാധാ​നം അന്വേ​ഷിച്ച്‌ പിന്തു​ട​രു​ന്ന​വർക്ക്‌ എന്തു പ്രതീ​ക്ഷി​ക്കാം?

¹⁹ ദൈവ​ത്തി​ന്റെ സമാധാ​ന​പൂർണ​മായ പുതിയ ലോക​ത്തി​ലെ നിത്യ​ജീ​വ​നു​വേണ്ടി ഇപ്പോൾ നിലപാ​ടു സ്വീക​രി​ക്കുക. വെളി​പ്പാ​ടു 21:3-5-ൽ ദൈവ​വ​ചനം നമുക്ക്‌ ഉറപ്പു നൽകുന്നു: “സിംഹാ​സ​ന​ത്തിൽനി​ന്നു ഒരു മഹാശബ്ദം പറയു​ന്ന​താ​യി ഞാൻ കേട്ടതു: ഇതാ, മനുഷ്യ​രോ​ടു​കൂ​ടെ ദൈവ​ത്തി​ന്റെ കൂടാരം; അവൻ അവരോ​ടു​കൂ​ടെ വസിക്കും; അവർ അവന്റെ ജനമാ​യി​രി​ക്കും; ദൈവം താൻ അവരുടെ ദൈവ​മാ​യി അവരോ​ടു​കൂ​ടെ ഇരിക്കും. അവൻ അവരുടെ കണ്ണിൽനി​ന്നു കണ്ണുനീർ എല്ലാം തുടെ​ച്ചു​ക​ള​യും. ഇനി മരണം ഉണ്ടാക​യില്ല; ദുഃഖ​വും മുറവി​ളി​യും കഷ്ടതയും ഇനി ഉണ്ടാക​യില്ല; ഒന്നാമ​ത്തേതു കഴിഞ്ഞു​പോ​യി.” അതല്ലേ നിങ്ങൾ ആഗ്രഹി​ക്കുന്ന സമാധാ​ന​പൂർണ​മായ ഭാവി?

²⁰ എങ്കിൽ ദൈവം വാഗ്‌ദാ​നം ചെയ്‌തി​രി​ക്കു​ന്നത്‌ എന്തെന്ന്‌ ഓർമി​ക്കുക. “സൗമ്യ​ത​യു​ള്ള​വർതന്നെ ഭൂമിയെ കൈവ​ശ​മാ​ക്കും, അവർ നിശ്ചയ​മാ​യും സമാധാ​ന​സ​മൃ​ദ്ധി​യിൽ പരമാ​നന്ദം കണ്ടെത്തും.” “കുറ്റമി​ല്ലാ​ത്ത​വനെ ശ്രദ്ധി​ക്കു​ക​യും പരമാർഥി​യെ നോക്കു​ക​യും ചെയ്യുക, എന്തെന്നാൽ ആ മമനു​ഷ്യ​ന്റെ ഭാവി സമാധാ​ന​പൂർണ​മാ​യി​രി​ക്കും.” (സങ്കീർത്തനം 37:11, 37, NW) ആ സുദിനം വന്നെത്തു​മ്പോൾ, കൃതജ്ഞ​ത​യോ​ടെ നമുക്കു പറയാം, “യഥാർഥ സമാധാ​ന​ത്തി​ന്റെ ഉറവായ യഹോ​വ​യാം ദൈവം ഹേതു​വാ​യി ഒടുവി​ലി​താ യഥാർഥ സമാധാ​നം!”

നിങ്ങൾക്കു വിശദീ​ക​രി​ക്കാ​മോ?

□ ചിന്തയ്‌ക്കും പ്രവൃ​ത്തി​ക്കും മാറ്റം വരുത്താൻ ഒരുവനെ എന്തു സഹായി​ക്കും?

□ യഹോ​വ​യു​ടെ സാക്ഷികൾ യഥാർഥ സമാധാ​ന​ത്തോ​ടുള്ള സ്‌നേഹം വ്യക്തി​പ​ര​മാ​യും കൂട്ടമാ​യും പ്രകട​മാ​ക്കി​യി​രി​ക്കു​ന്ന​തെ​ങ്ങനെ?

□ വിദ്വേ​ഷ​വും യുദ്ധവും പ്രോ​ത്സാ​ഹി​പ്പി​ക്കു​ന്ന​വരെ യഹോവ എങ്ങനെ കൈകാ​ര്യം ചെയ്യും?

□ സമാധാ​ന​പ്ര​ഭു​വി​നാ​ലുള്ള ഭരണം മനുഷ്യ​വർഗ​ത്തിന്‌ എന്തു കൈവ​രു​ത്തും?

[14-ാം പേജിലെ ചിത്രം]

യെശയ്യാവിന്റെ വാക്കുകൾ നിവർത്തി​ക്കു​ന്നത്‌ യുഎൻ അല്ല, യഹോ​വ​യു​ടെ പഠിപ്പി​ക്ക​ലി​നോ​ടു പ്രതി​ക​രി​ക്കു​ന്ന​വ​രാണ്‌

[15-ാം പേജിലെ ചിത്രം]

ഈ രണ്ടു പുരു​ഷ​ന്മാർ സമാധാ​നം പിന്തു​ട​രാൻ മാറ്റങ്ങൾ വരുത്തി

റാമി ഓവേദ്‌

ജോർജ്‌ റൂട്ടർ

[16-ാം പേജിലെ ചിത്രം]

സമാധാനപ്രഭുവിന്റെ ഭരണത്തിൻകീ​ഴിൽ സമാധാ​നം കളിയാ​ടും