“വിശ്വാ​സ​ത്തി​നു​വേണ്ടി കഠിന​മാ​യി പോരാ​ടുക”!

‘വിശു​ദ്ധ​ന്മാർക്ക്‌ എന്നേക്കു​മാ​യി ഒരിക്കൽ ഏൽപ്പി​ച്ചു​കൊ​ടുത്ത വിശ്വാ​സ​ത്തി​നു​വേണ്ടി കഠിന​മാ​യി പോരാ​ടുക.”—യൂദാ 3, NW.

1. ഏത്‌ അർഥത്തി​ലാണ്‌ ക്രിസ്‌ത്യാ​നി​കൾ ഇന്ന്‌ യുദ്ധത്തിൽ ഏർപ്പെ​ട്ടി​രി​ക്കു​ന്നത്‌?

യുദ്ധത്തിൽ ഏർപ്പെ​ട്ടി​രി​ക്കുന്ന പടയാ​ളി​കൾക്ക്‌ എക്കാല​വും കഠിന​മായ ജീവി​ത​മാണ്‌ നയി​ക്കേണ്ടി വന്നിട്ടു​ള്ളത്‌. സകല യുദ്ധ ആയുധ​ങ്ങ​ളും ധരിച്ച്‌ എല്ലാത്തരം കാലാ​വ​സ്ഥ​യി​ലും അസംഖ്യം കിലോ​മീ​റ്റർ മാർച്ചു ചെയ്യു​ന്ന​തോ ആയുധങ്ങൾ ഉപയോ​ഗി​ക്കാ​നുള്ള ക്ഷീണി​പ്പി​ക്കുന്ന പരിശീ​ല​ന​ത്തി​നു വിധേ​യ​രാ​കു​ന്ന​തോ മരണമോ അംഗഹീ​ന​ത​യോ കൈവ​രു​ത്തി​യേ​ക്കാ​വുന്ന സകലതരം ഭീതിദ സാഹച​ര്യ​ങ്ങ​ളെ​യും ഒറ്റയ്‌ക്കു ചെറു​ത്തു​നിൽക്കു​ന്ന​തോ ഒന്നു വിഭാവന ചെയ്യൂ. എന്നാൽ, സത്യ​ക്രി​സ്‌ത്യാ​നി​കൾ രാഷ്‌ട്ര​ങ്ങ​ളു​ടെ യുദ്ധങ്ങ​ളിൽ പങ്കെടു​ക്കു​ന്നില്ല. (യെശയ്യാ​വു 2:2-4; യോഹ​ന്നാൻ 17:14) പക്ഷേ, നാമെ​ല്ലാ​വ​രും ആത്മീയ അർഥത്തി​ലുള്ള ഒരു യുദ്ധത്തി​ലാ​ണെന്ന്‌ ഒരിക്ക​ലും മറക്കരുത്‌. സാത്താൻ യേശു​ക്രി​സ്‌തു​വി​നോ​ടും ഭൂമി​യി​ലെ അവന്റെ അനുഗാ​മി​ക​ളോ​ടും കൊടിയ ശത്രു​ത​യി​ലാണ്‌. (വെളി​പ്പാ​ടു 12:17) യഹോ​വ​യാം ദൈവത്തെ സേവി​ക്കാൻ തീരു​മാ​നി​ക്കു​ന്നവർ എല്ലാവ​രും ഫലത്തിൽ, ആത്മീയ യുദ്ധം നടത്താ​നുള്ള പടയാ​ളി​ക​ളാ​യി പേർ ചാർത്തു​ക​യാണ്‌.—2 കൊരി​ന്ത്യർ 10:4.

2. ക്രിസ്‌തീയ പോരാ​ട്ടത്തെ യൂദാ വിവരി​ക്കു​ന്ന​തെ​ങ്ങനെ, ആ പോരാ​ട്ട​ത്തിൽ പിടി​ച്ചു​നിൽക്കാൻ അവന്റെ ലേഖന​ത്തിന്‌ നമ്മെ സഹായി​ക്കാൻ കഴിയു​ന്ന​തെ​ങ്ങനെ?

² യേശു​വി​ന്റെ അർധ സഹോ​ദ​ര​നായ യൂദാ ഉചിത​മാ​യി​ത്തന്നെ ഇങ്ങനെ എഴുതു​ന്നു: “പ്രിയരേ, നമുക്കു പൊതു​വി​ലുള്ള രക്ഷയെ​ക്കു​റി​ച്ചു നിങ്ങൾക്കു എഴുതു​വാൻ സകല​പ്ര​യ​ത്‌ന​വും ചെയ്‌ക​യിൽ വിശു​ദ്ധ​ന്മാർക്കു ഒരിക്ക​ലാ​യി​ട്ടു ഭരമേ​ല്‌പി​ച്ചി​രി​ക്കുന്ന വിശ്വാ​സ​ത്തി​ന്നു വേണ്ടി പോരാ​ടേ​ണ്ട​തി​ന്നു [“ഒരു കഠിന പോരാ​ട്ടം നടത്താൻ” NW] പ്രബോ​ധി​പ്പി​ച്ചെ​ഴു​തു​വാൻ ആവശ്യം എന്നു എനിക്കു തോന്നി.” (യൂദാ 3) “ഒരു കഠിന പോരാ​ട്ടം നടത്താൻ” യൂദാ ക്രിസ്‌ത്യാ​നി​കളെ പ്രബോ​ധി​പ്പി​ക്കു​മ്പോൾ “തീവ്ര​വേദന”യോടു ബന്ധപ്പെട്ട ഒരു പദപ്ര​യോ​ഗം അവൻ ഉപയോ​ഗി​ക്കു​ന്നു. അതേ, ഈ പോരാ​ട്ടം പ്രയാ​സ​ക​ര​വും അതി​വേ​ദ​നാ​ജ​ന​ക​വും ആയിരി​ക്കാ​വു​ന്ന​താണ്‌! ഈ യുദ്ധത്തിൽ പിടി​ച്ചു​നിൽക്കാൻ പ്രയാ​സ​മാ​ണെന്നു നിങ്ങൾ ചില​പ്പോ​ഴൊ​ക്കെ കണ്ടെത്തു​ന്നു​വോ? യൂദാ​യു​ടെ, ഹ്രസ്വ​മെ​ങ്കി​ലും ശക്തമായ ലേഖന​ത്തി​നു നമ്മെ സഹായി​ക്കാ​നാ​കും. അധാർമി​ക​തയെ ചെറു​ക്കാ​നും ദൈവ​നി​യ​മിത അധികാ​രത്തെ ആദരി​ക്കാ​നും നമ്മെത്തന്നെ ദൈവ​സ്‌നേ​ഹ​ത്തിൽ നിലനിർത്താ​നും അതു നമ്മെ ഉദ്‌ബോ​ധി​പ്പി​ക്കു​ന്നു. ഈ ബുദ്ധ്യു​പ​ദേശം എങ്ങനെ ബാധക​മാ​ക്കാ​മെന്നു നമുക്കു നോക്കാം.

അധാർമി​ക​തയെ ചെറു​ക്കു​ക

3. യൂദാ​യു​ടെ നാളിൽ ക്രിസ്‌തീയ സഭ ഏത്‌ അടിയ​ന്തിര സാഹച​ര്യ​ത്തെ അഭിമു​ഖീ​ക​രി​ച്ചു?

³ സഹക്രി​സ്‌ത്യാ​നി​ക​ളിൽ എല്ലാവ​രും സാത്താ​നെ​തി​രായ യുദ്ധത്തിൽ വിജയം വരിക്കു​ന്നി​ല്ലെന്നു യൂദാ മനസ്സി​ലാ​ക്കി. ആട്ടിൻകൂ​ട്ടം ഒരു അടിയ​ന്തിര സാഹച​ര്യ​ത്തെ അഭിമു​ഖീ​ക​രി​ച്ചു. ദുഷി​ച്ച​യാ​ളു​കൾ “നുഴഞ്ഞു വന്നിരി​ക്കു​ന്നു,” യൂദാ എഴുതു​ന്നു. ആ മനുഷ്യർ തന്ത്രപൂർവം അധാർമി​ക​തയെ പ്രോ​ത്സാ​ഹി​പ്പി​ക്കുക ആയിരു​ന്നു. “ദൈവ​ത്തി​ന്റെ കൃപയെ ദുഷ്‌കാ​മ​വൃ​ത്തി​ക്കു ഹേതു​വാ​ക്കി”ക്കൊണ്ട്‌ അവർ തങ്ങളുടെ പ്രവൃ​ത്തി​കളെ കൗശല​പൂർവം ന്യായീ​ക​രി​ച്ചു. (യൂദാ 4) ഒരുവൻ എത്രകണ്ട്‌ പാപം ചെയ്യു​ന്നു​വോ അത്രകണ്ട്‌ ദൈവ​ത്തി​ന്റെ അനർഹദയ സ്വീക​രി​ക്കാൻ ആകു​മെന്ന്‌ പുരാതന ജ്ഞാനവാ​ദി​ക​ളെ​പ്പോ​ലെ അവർ ന്യായ​വാ​ദം ചെയ്‌തി​രി​ക്കാം—അതു​കൊണ്ട്‌ ഫലത്തിൽ, കൂടുതൽ പാപം ചെയ്യു​ന്ന​താ​യി​രു​ന്നു മെച്ചം! ഇനി അതല്ലെ​ങ്കിൽ, ദയാലു​വായ ദൈവം തങ്ങളെ ഒരിക്ക​ലും ശിക്ഷി​ക്കി​ല്ലെന്ന്‌ അവർ നിഗമനം ചെയ്‌തി​രി​ക്കാം. സംഗതി എന്തായി​രു​ന്നാ​ലും, അവരുടെ വാദഗതി തെറ്റാ​യി​രു​ന്നു.—1 കൊരി​ന്ത്യർ 3:19.

4. യഹോ​വ​യു​ടെ മുൻകാല ന്യായ​വി​ധി​ക​ളു​ടെ ഏതു മൂന്നു ദൃഷ്ടാ​ന്ത​ങ്ങ​ളാണ്‌ യൂദാ ഉദ്ധരി​ക്കു​ന്നത്‌?

⁴ യഹോ​വ​യു​ടെ മുൻകാല ന്യായ​വി​ധി​ക​ളു​ടെ മൂന്നു ദൃഷ്ടാ​ന്തങ്ങൾ ഉദ്ധരി​ച്ചു​കൊണ്ട്‌ യൂദാ അവരുടെ ദുഷ്ട വാദഗ​തി​കളെ ഖണ്ഡിക്കു​ന്നു. “വിശ്വ​സി​ക്കാ”ഞ്ഞ ഇസ്രാ​യേ​ല്യർക്കും സ്‌ത്രീ​ക​ളു​മാ​യി പാപം ചെയ്യേ​ണ്ട​തിന്‌ “സ്വന്ത വാസസ്ഥലം വിട്ടു​പോയ ദൂതന്മാ”ർക്കും “ദുർന്ന​ടപ്പു ആചരിച്ചു അന്യജഡം മോഹി​ച്ചു നടന്ന” സോ​ദോം-ഗൊ​മോറ നിവാ​സി​കൾക്കും എതിരാ​യി നടന്ന ന്യായ​വി​ധി​ക​ളാണ്‌ അവൻ ഉദ്ധരി​ച്ചത്‌. (യൂദാ 5-7; ഉല്‌പത്തി 6:2-4; 19:4-25; സംഖ്യാ​പു​സ്‌തകം 14:35) അവയോ​രോ​ന്നി​ലും യഹോവ പാപി​കൾക്കെ​തി​രാ​യി മാറ്റൊ​ലി​കൊ​ള്ളുന്ന ന്യായ​വി​ധി നടപ്പാക്കി.

5. ഏത്‌ പുരാതന പ്രവാചക വാക്യ​മാണ്‌ യൂദാ ഉദ്ധരി​ക്കു​ന്നത്‌, ആ പ്രവചനം അതിന്റെ നിവൃ​ത്തി​യു​ടെ സമ്പൂർണ സുനി​ശ്ചി​ത​ത്വം പ്രകടി​പ്പി​ച്ച​തെ​ങ്ങനെ?

⁵ പിന്നീട്‌, കൂടുതൽ വ്യാപ​ക​മായ ഫലങ്ങൾ ഉളവാ​ക്കിയ ഒരു ന്യായ​വി​ധി​യെ യൂദാ പരാമർശി​ക്കു​ന്നു. അവൻ ഹാനോ​ക്കി​ന്റെ ഒരു പ്രവചനം ഉദ്ധരിക്കുന്നു—നിശ്വസ്‌ത തിരു​വെ​ഴു​ത്തു​ക​ളിൽ മറ്റൊ​രി​ട​ത്തും കാണ​പ്പെ​ടാത്ത ഒരു ഭാഗമാ​ണിത്‌.a (യൂദാ 14, 15) സകല ഭക്തി​കെ​ട്ട​വ​രെ​യും അവരുടെ ഭക്തികെട്ട പ്രവർത്ത​ന​ങ്ങ​ളെ​യും യഹോവ ന്യായം​വി​ധി​ക്കുന്ന ഒരു സമയ​ത്തെ​ക്കു​റിച്ച്‌ ഹാനോക്ക്‌ മുൻകൂ​ട്ടി​പ്പ​റഞ്ഞു. രസാവ​ഹ​മാ​യി, ഹാനോക്ക്‌ ഭൂതകാല ക്രിയ​യി​ലാണ്‌ സംസാ​രി​ച്ചത്‌, കാരണം യഹോ​വ​യു​ടെ ന്യായ​വി​ധി​കൾ അപ്പോൾത്തന്നെ സംഭവി​ച്ചു​ക​ഴി​ഞ്ഞാൽ എന്നവണ്ണം അത്ര സുനി​ശ്ചി​ത​മാ​യി​രു​ന്നു. ആളുകൾ ഹാനോ​ക്കി​നെ പുച്ഛി​ച്ചി​രി​ക്കാം, എന്നാൽ ആ പരിഹാ​സി​ക​ളെ​ല്ലാം ആഗോള ജലപ്ര​ള​യ​ത്തിൽ മുങ്ങി​മ​രി​ച്ചു.

6. (എ) യൂദാ​യു​ടെ നാളിലെ ക്രിസ്‌ത്യാ​നി​കളെ എന്തി​നെ​ക്കു​റി​ച്ചാ​യി​രു​ന്നു ഓർമ​പ്പെ​ടു​ത്തേ​ണ്ടി​യി​രു​ന്നത്‌? (ബി) യൂദാ​യു​ടെ ഓർമി​പ്പി​ക്ക​ലു​കൾക്കു നാം ശ്രദ്ധ കൊടു​ക്കേ​ണ്ടത്‌ എന്തു​കൊണ്ട്‌?

⁶ ഈ ദിവ്യ​ന്യാ​യ​വി​ധി​ക​ളെ​ക്കു​റിച്ച്‌ യൂദാ എഴുതി​യത്‌ എന്തു​കൊ​ണ്ടാ​യി​രു​ന്നു? എന്തു​കൊ​ണ്ടെ​ന്നാൽ, അവന്റെ നാളിൽ ക്രിസ്‌തീയ സഭകളു​മാ​യി സഹവസി​ച്ചി​രുന്ന ചിലർ, മുൻകാ​ല​ങ്ങ​ളിൽ പ്രസ്‌തുത ന്യായ​വി​ധി​കൾക്ക്‌ ഇടയാ​ക്കിയ അതേ നികൃ​ഷ്ട​വും നിന്ദ്യ​വു​മായ പാപങ്ങൾ ചെയ്യു​ന്നു​ണ്ടെന്ന്‌ അവന്‌ അറിയാ​മാ​യി​രു​ന്നു. അതു​കൊണ്ട്‌, ചില അടിസ്ഥാന ആത്മീയ സത്യങ്ങ​ളെ​ക്കു​റിച്ച്‌ സഭകൾ ഓർമി​പ്പി​ക്ക​പ്പെ​ടേ​ണ്ട​തുണ്ട്‌ എന്ന്‌ യൂദാ എഴുതു​ന്നു. (യൂദാ 5) തങ്ങൾ ചെയ്‌തു​കൊ​ണ്ടി​രി​ക്കു​ന്നത്‌ യഹോ​വ​യാം ദൈവം കാണുന്നു എന്നത്‌ അവർ വ്യക്തമാ​യും മറന്നു​ക​ളഞ്ഞു. അതേ, തന്റെ ദാസന്മാർ തങ്ങളെ​ത്ത​ന്നെ​യും മറ്റുള്ള​വ​രെ​യും ദുഷി​പ്പി​ച്ചു​കൊണ്ട്‌ മനപ്പൂർവം തന്റെ നിയമങ്ങൾ ലംഘി​ക്കു​മ്പോൾ യഹോവ അതു കാണുന്നു. (സദൃശ​വാ​ക്യ​ങ്ങൾ 15:3) അത്തരം പ്രവർത്ത​നങ്ങൾ അവനെ ആഴമായി വ്രണ​പ്പെ​ടു​ത്തു​ന്നു. (ഉല്‌പത്തി 6:6; സങ്കീർത്തനം 78:40) വെറും മനുഷ്യ​രായ നമുക്കു പ്രപഞ്ച​ത്തി​ന്റെ പരമാ​ധി​കാര കർത്താ​വി​ന്റെ വികാ​ര​ങ്ങളെ ബാധി​ക്കാ​നാ​കും എന്നത്‌ ഭയാദ​ര​വു​ള​വാ​ക്കുന്ന ഒരു സംഗതി​യാണ്‌. അവൻ അനുദി​നം നമ്മെ നിരീ​ക്ഷി​ക്കു​ന്നു, അവന്റെ പുത്ര​നായ യേശു​ക്രി​സ്‌തു​വി​ന്റെ കാലടി​കളെ പിന്തു​ട​രാൻ നാം നമ്മുടെ പരമാ​വധി പ്രവർത്തി​ക്കു​മ്പോൾ നമ്മുടെ നടത്ത അവന്റെ ഹൃദയത്തെ സന്തോ​ഷി​പ്പി​ക്കു​ന്നു. അതു​കൊണ്ട്‌ യൂദാ നൽകുന്ന തരത്തി​ലുള്ള ഓർമി​പ്പി​ക്ക​ലു​ക​ളിൽ ഒരിക്ക​ലും അലോ​സ​ര​പ്പെ​ടാ​തെ നമുക്ക്‌ അവയ്‌ക്കു ശ്രദ്ധനൽകാം.—സദൃശ​വാ​ക്യ​ങ്ങൾ 27:11; 1 പത്രൊസ്‌ 2:21.

7. (എ) ഗുരു​ത​ര​മായ ദുഷ്‌പ്ര​വൃ​ത്തി​യിൽ ഉൾപ്പെ​ട്ടി​രി​ക്കു​ന്നവർ അടിയ​ന്തിര സഹായം തേടേ​ണ്ടതു നിർണാ​യ​ക​മാ​യി​രി​ക്കു​ന്നത്‌ എന്തു​കൊണ്ട്‌? (ബി) നമു​ക്കെ​ല്ലാം എങ്ങനെ അധാർമി​കത ഒഴിവാ​ക്കാൻ കഴിയും?

⁷ യഹോവ കാണുക മാത്രമല്ല ചെയ്യു​ന്നത്‌, അവൻ പ്രവർത്തി​ക്കു​ക​യും ചെയ്യുന്നു. നീതി​യു​ടെ ദൈവം എന്നനി​ല​യിൽ അവൻ ഉചിത​മായ സമയത്ത്‌ ദുഷ്‌പ്ര​വൃ​ത്തി​ക്കാ​രു​ടെ​മേൽ ശിക്ഷ നടപ്പാ​ക്കു​ന്നു. (1 തിമൊ​ഥെ​യൊസ്‌ 5:24) അവന്റെ ന്യായ​വി​ധി​കൾ വെറു​മൊ​രു കഴിഞ്ഞ​കാല ചരി​ത്ര​മാ​ണെ​ന്നും തങ്ങൾ ചെയ്യുന്ന ദുഷ്ടതയെ അവൻ കാര്യ​മാ​യെ​ടു​ക്കു​ന്നില്ല എന്നും വാദി​ക്കു​ന്നവർ സ്വയം വിഡ്‌ഢി​ക​ളാ​ക്കു​ക​യാണ്‌. ഇന്ന്‌ അധാർമി​ക​ത​യിൽ ഉൾപ്പെ​ട്ടി​രി​ക്കുന്ന ഏതൊ​രു​വ​നും ക്രിസ്‌തീയ മൂപ്പന്മാ​രിൽ നിന്ന്‌ അടിയ​ന്തി​ര​മാ​യി സഹായം തേടേ​ണ്ടത്‌ എത്ര നിർണാ​യ​ക​മാണ്‌! (യാക്കോബ്‌ 5:14, 15) നമ്മുടെ ആത്മീയ ക്ഷേമത്തിന്‌ അധാർമി​കത ഉയർത്തുന്ന ഭീഷണി​യെ​ക്കു​റി​ച്ചു നാമെ​ല്ലാം ഗൗരവ​പൂർവം ചിന്തി​ക്കേ​ണ്ട​താണ്‌. ഓരോ വർഷവും അത്യാ​ഹി​തങ്ങൾ സംഭവി​ക്കു​ന്നുണ്ട്‌, അതായത്‌ ആളുകൾ നമ്മുടെ ഇടയിൽനിന്ന്‌ പുറത്താ​ക്ക​പ്പെ​ടു​ന്നുണ്ട്‌. അവരിൽ ഭൂരി​പ​ക്ഷ​ത്തി​നും അപ്രകാ​രം സംഭവി​ക്കു​ന്നത്‌ അനുതാ​പ​മി​ല്ലാ​തെ അധാർമിക പ്രവൃ​ത്തി​കൾ ചെയ്യു​ന്നതു നിമി​ത്ത​മാണ്‌. അത്തര​മൊ​രു ഗതിയി​ലേക്കു നമ്മെ നയിക്കാൻ തുടങ്ങു​ക​യെ​ങ്കി​ലും ചെയ്യുന്ന ഏതൊരു പ്രലോ​ഭ​ന​ത്തെ​യും ചെറു​ക്കാൻ നാം ദൃഢനി​ശ്ചയം ചെയ്യണം.—മത്തായി 26:41 താരത​മ്യം ചെയ്യുക.

ദൈവ​നി​യ​മിത അധികാ​രത്തെ ആദരി​ക്കു​ക

8. യൂദാ 8-ൽ പരാമർശി​ച്ചി​രി​ക്കുന്ന ‘മഹിമ​യ​ണി​ഞ്ഞവർ’ ആരാണ്‌?

⁸ യൂദാ ചർച്ച ചെയ്യുന്ന മറ്റൊരു പ്രശ്‌നം ദൈവ​നി​യ​മിത അധികാ​ര​ത്തോ​ടുള്ള ആദരവി​ല്ലാ​യ്‌മ​യാണ്‌. ദൃഷ്ടാ​ന്ത​ത്തിന്‌ 8-ാം വാക്യ​ത്തിൽ, [പി.ഒ.സി. ബൈബിൾ] അവൻ അതേ ദുഷ്‌പ്ര​വൃ​ത്തി​ക്കാ​രു​ടെ​മേൽ ‘മഹിമ​യ​ണി​ഞ്ഞ​വരെ നിന്ദി​ക്കു​ന്നു’ എന്ന കുറ്റം ചുമത്തു​ന്നു. ആരായി​രു​ന്നു ഈ ‘മഹിമ​യ​ണി​ഞ്ഞവർ’? അപൂർണ​രെ​ങ്കി​ലും, യഹോ​വ​യു​ടെ പരിശു​ദ്ധാ​ത്മാ​വി​നാൽ ഉത്തരവാ​ദി​ത്വ​ങ്ങൾ ഭരമേൽപ്പി​ക്ക​പ്പെട്ട പുരു​ഷ​ന്മാ​രാ​യി​രു​ന്നു അവർ. ദൃഷ്ടാ​ന്ത​ത്തിന്‌, ദൈവ​ത്തി​ന്റെ ആട്ടിൻകൂ​ട്ടത്തെ മേയ്‌ക്കാൻ അധികാ​ര​പ്പെ​ടു​ത്ത​പ്പെട്ട മൂപ്പന്മാർ സഭകളിൽ ഉണ്ടായി​രു​ന്നു. (1 പത്രൊസ്‌ 5:2) പൗലൊസ്‌ അപ്പോ​സ്‌ത​ല​നെ​പ്പോ​ലുള്ള സഞ്ചാര​മേൽവി​ചാ​ര​ക​ന്മാ​രും ഉണ്ടായി​രു​ന്നു. ക്രിസ്‌തീയ സഭയെ മൊത്ത​ത്തിൽ ബാധി​ക്കുന്ന തീരു​മാ​നങ്ങൾ എടുത്തു​കൊണ്ട്‌ മൂപ്പൻമാ​രു​ടെ ഒരു സംഘം യെരൂ​ശ​ലേ​മിൽ ഭരണസം​ഘ​മാ​യി വർത്തി​ച്ചി​രു​ന്നു. (പ്രവൃ​ത്തി​കൾ 15:6) സഭകളി​ലെ ചിലർ അത്തരം പുരു​ഷ​ന്മാ​രെ നിന്ദി​ച്ചി​രു​ന്നത്‌, അഥവാ അവരെ​ക്കു​റിച്ച്‌ അനാദ​ര​വോ​ടെ സംസാ​രി​ച്ചി​രു​ന്നത്‌ യൂദായെ വളരെ​യേറെ ഉത്‌ക​ണ്‌ഠാ​കു​ല​നാ​ക്കി.

9. അധികാ​ര​ത്തോ​ടുള്ള അനാദ​ര​വി​ന്റെ ഏതു ദൃഷ്ടാ​ന്തങ്ങൾ യൂദാ ഉദ്ധരി​ക്കു​ന്നു?

⁹ അത്തരം അനാദ​ര​പൂർവ​ക​മായ സംസാ​രത്തെ അപലപി​ക്കാൻ ഓർമി​പ്പി​ക്ക​ലു​കൾ എന്നനി​ല​യിൽ യൂദാ 11-ാം വാക്യ​ത്തിൽ മൂന്നു ദൃഷ്ടാ​ന്ത​ങ്ങൾകൂ​ടി ഉദ്ധരി​ക്കു​ന്നു: കയീൻ, ബാലാക്ക്‌, കോരഹ്‌. കയീൻ യഹോ​വ​യു​ടെ സ്‌നേ​ഹ​പൂർവ​ക​മായ ബുദ്ധ്യു​പ​ദേശം അവഗണിച്ച്‌ ഹിംസാ​ത്മക വിദ്വേ​ഷ​ത്തി​ന്റെ സ്വന്തം മാർഗം മനപ്പൂർവം പിന്തു​ടർന്നു. (ഉല്‌പത്തി 4:4-8) നിസ്സം​ശ​യ​മാ​യും പ്രകൃ​ത്യ​തീത ഉറവിൽനി​ന്നു വന്ന ആവർത്തി​ച്ചുള്ള മുന്നറി​യി​പ്പു​കൾ ബാലാ​ക്കി​നു ലഭിച്ചു—അവന്റെ പെൺക​ഴു​ത​പോ​ലും അവനോ​ടു സംസാ​രി​ച്ചു! എന്നാൽ, ബാലാക്ക്‌ സ്വാർഥ​പൂർവം ദൈവ​ജ​ന​ത്തിന്‌ എതിരെ ഗൂഢാ​ലോ​ചന തുടർന്നു. (സംഖ്യാ​പു​സ്‌തകം 22:28, 32-34; ആവർത്ത​ന​പു​സ്‌തകം 23:5) കോരഹ്‌ തന്നെ ഒരു ഉത്തരവാ​ദി​ത്വ സ്ഥാനത്താ​യി​രു​ന്നു, എന്നാൽ അവനതു പോരാ​യി​രു​ന്നു. ഭൂമി​യി​ലെ ഏറ്റവും സൗമ്യ​നാ​യി​രുന്ന മോശ​യ്‌ക്കെ​തി​രെ അവൻ മത്സരം ഇളക്കി​വി​ട്ടു.—സംഖ്യാ​പു​സ്‌തകം 12:3; 16:1-3, 32.

10. ചിലർ ഇന്നു ‘മഹിമ​യ​ണി​ഞ്ഞ​വരെ നിന്ദിച്ചു’ സംസാ​രി​ക്കു​ന്ന​തി​ന്റെ കെണി​യിൽ അകപ്പെ​ട്ടേ​ക്കാ​വു​ന്നത്‌ എങ്ങനെ, അത്തരം സംസാരം ഒഴിവാ​ക്കേ​ണ്ടത്‌ എന്തു​കൊണ്ട്‌?

¹⁰ ഉത്തരവാ​ദി​ത്വ സ്ഥാനങ്ങ​ളിൽ യഹോവ ഉപയോ​ഗി​ക്കു​ന്ന​വ​രു​ടെ ബുദ്ധ്യു​പ​ദേശം ശ്രദ്ധി​ക്കാ​നും അവരെ ആദരി​ക്കാ​നും ഈ ദൃഷ്ടാ​ന്തങ്ങൾ നമ്മെ എത്ര സ്‌പഷ്ട​മാ​യി പഠിപ്പി​ക്കു​ന്നു! (എബ്രായർ 13:17) നിയമിത മൂപ്പന്മാ​രിൽ കുറ്റം കണ്ടുപി​ടി​ക്കാൻ വളരെ എളുപ്പ​മാണ്‌, കാരണം അവർ നമ്മെ​പ്പോ​ലെ​തന്നെ അപൂർണ​രാണ്‌. എന്നാൽ നാം അവരുടെ കുറവു​ക​ളിൽ ശ്രദ്ധ കേന്ദ്രീ​ക​രി​ച്ചു​കൊ​ണ്ടി​രുന്ന്‌ അവരോ​ടുള്ള ആദരവി​നു തുരങ്കം​വെ​ച്ചാൽ നാം ‘മഹിമ​യ​ണി​ഞ്ഞ​വരെ നിന്ദി​ക്കുക’യായി​രി​ക്കി​ല്ലേ ചെയ്യു​ന്നത്‌? 10-ാം വാക്യ​ത്തിൽ, “തങ്ങൾ അറിയാ​ത്തതു എല്ലാം ദുഷി​ക്കുന്ന [“ദുഷി​ച്ചു​സം​സാ​രി​ക്കുന്ന,” NW]” ആളുകളെ യൂദാ പരാമർശി​ക്കു​ന്നു. മൂപ്പൻമാ​രു​ടെ സംഘമോ നീതി​ന്യാ​യ കമ്മിറ്റി​യോ എടുത്ത തീരു​മാ​നത്തെ ചില​പ്പോൾ ചിലർ വിമർശി​ക്കും. എന്നാൽ, തീരു​മാ​ന​ത്തിൽ എത്തി​ച്ചേ​രാ​നാ​യി മൂപ്പന്മാർ പരിഗ​ണി​ക്കേ​ണ്ടി​യി​രുന്ന എല്ലാ വിശദാം​ശ​ങ്ങ​ളും സംബന്ധിച്ച്‌ അവർക്ക്‌ അറിവില്ല. അതു​കൊണ്ട്‌, അവർക്കു ശരിക്കും അറിയി​ല്ലാത്ത കാര്യ​ങ്ങ​ളെ​ക്കു​റി​ച്ചു ദുഷിച്ചു സംസാ​രി​ക്കു​ന്നത്‌ എന്തിന്‌? (സദൃശ​വാ​ക്യ​ങ്ങൾ 18:13) അത്തരം നിഷേ​ധാ​ത്മക സംസാരം തുടരു​ന്നവർ സഭയിൽ വിഭാ​ഗീ​യത ഉളവാ​ക്കി​യേ​ക്കാം. സഹവി​ശ്വാ​സി​ക​ളു​ടെ കൂടി​വ​ര​വു​ക​ളി​ലെ, “വെള്ളത്തി​ന​ടി​യിൽ മറഞ്ഞു​കി​ട​ക്കുന്ന” അപകട​ക​ര​മായ “പാറക”ളോടു​പോ​ലും അവരെ ഉപമി​ക്കാൻ കഴി​ഞ്ഞേ​ക്കും. (യൂദാ 12 NW, 16, 19) മറ്റുള്ള​വർക്ക്‌ ആത്മീയ അപകടം ഉളവാ​ക്കാൻ നാമൊ​രി​ക്ക​ലും ആഗ്രഹി​ക്കില്ല. മറിച്ച്‌, ദൈവ​ത്തി​ന്റെ ആട്ടിൻകൂ​ട്ട​ത്തി​നു​വേണ്ടി ഉത്തരവാ​ദി​ത്വ​പ്പെട്ട പുരു​ഷ​ന്മാർ ചെയ്യുന്ന കഠിനാ​ധ്വാ​ന​ത്തെ​യും അവരുടെ അർപ്പണ​ബോ​ധ​ത്തെ​യും പ്രതി അവരെ വിലമ​തി​ക്കാൻ നമുക്ക്‌ ഓരോ​രു​ത്തർക്കും ദൃഢനി​ശ്ചയം ചെയ്യാം.—1 തിമൊ​ഥെ​യൊസ്‌ 5:17.

11. മീഖാ​യേൽ സാത്താ​നെ​തി​രെ ദൂഷണ​വി​ധി ഉച്ചരി​ക്കാ​തി​രു​ന്നത്‌ എന്തു​കൊണ്ട്‌?

¹¹ ഉചിത​മാ​യി സ്ഥാപി​ക്ക​പ്പെട്ട അധികാ​രത്തെ ആദരിച്ച ഒരുവന്റെ ദൃഷ്ടാന്തം യൂദാ പരാമർശി​ക്കു​ന്നു. അവൻ എഴുതു​ന്നു: “പ്രധാ​ന​ദൂ​ത​നായ മീഖാ​യേൽ മോ​ശെ​യു​ടെ ശരീര​ത്തെ​ക്കു​റി​ച്ചു പിശാ​ചി​നോ​ടു തർക്കിച്ചു വാദി​ക്കു​മ്പോൾ ഒരു ദൂഷണ​വി​ധി ഉച്ചരി​പ്പാൻ തുനി​യാ​തെ: കർത്താവു നിന്നെ ഭർത്സി​ക്കട്ടെ എന്നു പറഞ്ഞതേ ഉള്ളു.” (യൂദാ 9) നിശ്വസ്‌ത തിരു​വെ​ഴു​ത്തു​ക​ളിൽ യൂദാ മാത്രം രേഖ​പ്പെ​ടു​ത്തിയ ഈ രസകര​മായ വിവരണം രണ്ട്‌ വ്യത്യസ്‌ത പാഠങ്ങൾ പഠിപ്പി​ക്കു​ന്നു. ഒരു വശത്ത്‌, ന്യായ​വി​ധി യഹോ​വ​യ്‌ക്കു വിടാൻ അതു നമ്മെ പഠിപ്പി​ക്കു​ന്നു. വ്യക്തമാ​യും, വ്യാജാ​രാ​ധ​നയെ ഉന്നമി​പ്പി​ക്കാ​നാ​യി വിശ്വസ്‌ത മനുഷ്യ​നായ മോശ​യു​ടെ ശരീരം ദുരു​പ​യോ​ഗി​ക്കാൻ സാത്താൻ ആഗ്രഹി​ച്ചു. എന്തൊരു ദുഷ്ടത! എന്നിട്ടും, മീഖാ​യേൽ ഒരു ന്യായ​വി​ധി ഉച്ചരി​ക്കു​ന്ന​തിൽനി​ന്നു സവിനയം വിട്ടു​നി​ന്നു, കാരണം യഹോ​വ​യ്‌ക്കു മാത്രമേ അതിന്‌ അധികാ​രം ഉണ്ടായി​രു​ന്നു​ള്ളൂ. യഹോ​വയെ സേവി​ക്കാൻ ശ്രമി​ക്കുന്ന വിശ്വ​സ്‌ത​രായ പുരു​ഷ​ന്മാ​രെ വിധി​ക്കു​ന്ന​തിൽനിന്ന്‌ നാം അപ്പോൾ എത്രകൂ​ടു​തൽ വിട്ടു​നിൽക്കണം.

12. ക്രിസ്‌തീയ സഭയിൽ ഉത്തരവാ​ദി​ത്വ സ്ഥാനങ്ങ​ളു​ള്ള​വർക്ക്‌ മീഖാ​യേ​ലി​ന്റെ ദൃഷ്ടാ​ന്ത​ത്തിൽനിന്ന്‌ എന്തു പഠിക്കാ​വു​ന്ന​താണ്‌?

¹² മറുവ​ശത്ത്‌, സഭയിൽ ഒരളവിൽ അധികാ​ര​മു​ള്ള​വർക്കും മീഖാ​യേ​ലിൽനിന്ന്‌ ഒരു പാഠം പഠിക്കാം. മീഖാ​യേൽ ‘പ്രധാ​ന​ദൂ​തൻ,’ എല്ലാ ദൂതന്മാ​രി​ലും മുഖ്യൻ, ആയിരു​ന്നെ​ങ്കി​ലും പ്രകോ​പ​ന​ത്തിൻ കീഴിൽപ്പോ​ലും അവൻ തന്റെ അധികാ​ര​സ്ഥാ​നം ദുർവി​നി​യോ​ഗം ചെയ്‌തില്ല. തങ്ങളുടെ അധികാ​ര​ത്തി​ന്റെ ദുർവി​നി​യോ​ഗം യഹോ​വ​യു​ടെ പരമാ​ധി​കാ​ര​ത്തോ​ടുള്ള അനാദ​ര​വാ​ണെന്നു മനസ്സി​ലാ​ക്കി​ക്കൊണ്ട്‌ വിശ്വ​സ്‌ത​രായ മൂപ്പന്മാർ ആ ദൃഷ്ടാന്തം അടുത്തു പിൻപ​റ്റു​ന്നു. സഭകളിൽ ആദരണീയ സ്ഥാനങ്ങൾ ഉള്ളവ​രെ​ങ്കി​ലും തങ്ങളുടെ അധികാ​രം ദുർവി​നി​യോ​ഗം ചെയ്‌ത​വരെ സംബന്ധിച്ച്‌ യൂദാ​യു​ടെ ലേഖന​ത്തിന്‌ ധാരാളം പറയാ​നു​ണ്ടാ​യി​രു​ന്നു. ദൃഷ്ടാ​ന്ത​ത്തിന്‌, ‘ഭയംകൂ​ടാ​തെ തങ്ങളെ​ത്തന്നേ തീറ്റുന്ന’ ഇടയന്മാ​രെ​ക്കു​റിച്ച്‌ 12 മുതൽ 14 വരെയുള്ള വാക്യ​ങ്ങ​ളിൽ യൂദാ നിശി​ത​മാ​യൊ​രു അപലപനം നടത്തുന്നു. (യെഹെ​സ്‌കേൽ 34:7-10 താരത​മ്യം ചെയ്യുക.) മറ്റു വാക്കു​ക​ളിൽ പറഞ്ഞാൽ, യഹോ​വ​യു​ടെ ആട്ടിൻകൂ​ട്ട​ത്തി​നല്ല, മറിച്ച്‌ തങ്ങൾക്കു​തന്നെ പ്രയോ​ജനം ചെയ്യു​ന്ന​തിൽ ആയിരു​ന്നു അവർക്ക്‌ ഒന്നാമതു താത്‌പ​ര്യം. അത്തരം നിഷേ​ധാ​ത്മക ദൃഷ്ടാ​ന്ത​ങ്ങ​ളിൽനിന്ന്‌ ഇന്നു മൂപ്പന്മാർക്കു ധാരാളം പഠിക്കാൻ കഴിയും. വാസ്‌ത​വ​ത്തിൽ യൂദാ​യു​ടെ വാക്കുകൾ, നാം ആയിത്തീ​രാൻ ആഗ്രഹി​ക്ക​രു​താ​ത്ത​തി​ന്റെ വിശദ​മാ​യൊ​രു ചിത്രം ഇവിടെ വരച്ചു​കാ​ട്ടു​ന്നു. സ്വാർഥ​ത​യ്‌ക്കു വശംവ​ദ​രാ​കു​മ്പോൾ നമുക്കു ക്രിസ്‌തു​വി​ന്റെ പടയാ​ളി​ക​ളാ​കാൻ കഴിയില്ല; സ്വന്തം കാര്യ​ത്തി​നു​വേണ്ടി പോരാ​ടാ​നുള്ള വല്ലാത്ത തിരക്കി​ലാ​യി​രി​ക്കും നാം. മറിച്ച്‌, നമു​ക്കെ​ല്ലാം യേശു​വി​ന്റെ വാക്കു​കൾക്കു ചേർച്ച​യിൽ ജീവി​ക്കാം: “സ്വീക​രി​ക്കു​ന്ന​തിൽ ഉള്ളതി​നെ​ക്കാൾ സന്തോഷം കൊടു​ക്കു​ന്ന​തി​ലുണ്ട്‌.”—പ്രവൃ​ത്തി​കൾ 20:35, NW.

“ദൈവ​സ്‌നേ​ഹ​ത്തിൽ നിങ്ങ​ളെ​ത്തന്നേ സൂക്ഷി​ച്ചു​കൊൾവിൻ”

13. ദൈവ​സ്‌നേ​ഹ​ത്തിൽ നിലനിൽക്കാൻ നാം എല്ലാവ​രും ഉത്‌ക​ട​മാ​യി ആഗ്രഹി​ക്കേ​ണ്ടത്‌ എന്തു​കൊണ്ട്‌?

¹³ തന്റെ ലേഖന​ത്തി​ന്റെ അവസാന ഭാഗത്ത്‌ യൂദാ ഹൃദ​യോ​ഷ്‌മ​ള​മായ ഈ ബുദ്ധ്യു​പ​ദേശം തരുന്നു: “ദൈവ​സ്‌നേ​ഹ​ത്തിൽ നിങ്ങ​ളെ​ത്തന്നേ സൂക്ഷി​ച്ചു​കൊൾവിൻ.” (യൂദാ 21) യഹോ​വ​യാം ദൈവ​ത്തി​ന്റെ സ്‌നേ​ഹ​ത്തി​ന്റെ പാത്ര​മാ​യി തുടരുക. കാരണം, ക്രിസ്‌തീയ പോരാ​ട്ട​ത്തിൽ അതി​നെ​ക്കാൾ ഉപരി​യാ​യി മറ്റൊ​ന്നി​നും നമ്മെ സഹായി​ക്കാ​നാ​കില്ല. യഹോ​വ​യു​ടെ ഏറ്റം പ്രമുഖ ഗുണമാ​ണ​ല്ലോ സ്‌നേഹം. (1 യോഹ​ന്നാൻ 4:8) റോമി​ലെ ക്രിസ്‌ത്യാ​നി​കൾക്ക്‌ പൗലൊസ്‌ ഇപ്രകാ​രം എഴുതി: “മരണത്തി​ന്നോ ജീവന്നോ ദൂതന്മാർക്കോ വാഴ്‌ച​കൾക്കോ അധികാ​ര​ങ്ങൾക്കോ ഇപ്പോ​ഴു​ള്ള​തി​ന്നോ വരുവാ​നു​ള്ള​തി​ന്നോ ഉയരത്തി​ന്നോ ആഴത്തി​ന്നോ മററു യാതൊ​രു സൃഷ്ടി​ക്കോ നമ്മുടെ കർത്താ​വായ യേശു​ക്രി​സ്‌തു​വി​ലുള്ള ദൈവ​സ്‌നേ​ഹ​ത്തിൽനി​ന്നു നമ്മെ വേറു​പി​രി​പ്പാൻ കഴിക​യില്ല എന്നു ഞാൻ ഉറെച്ചി​രി​ക്കു​ന്നു.” (റോമർ 8:38, 39) എന്നാൽ നാം ആ സ്‌നേ​ഹ​ത്തിൽ തുടരു​ന്ന​തെ​ങ്ങനെ? യൂദാ പറയു​ന്ന​പ്ര​കാ​രം നമുക്കു സ്വീക​രി​ക്കാൻ കഴിയുന്ന മൂന്നു മാർഗങ്ങൾ പരിചി​ന്തി​ക്കുക.

14, 15. (എ) “അതിവി​ശുദ്ധ വിശ്വാസ”ത്തിൽ നമ്മെത്തന്നെ പണിതു​യർത്തുക എന്നാൽ അർഥ​മെന്ത്‌? (ബി) നമ്മുടെ ആത്മീയ പടച്ചട്ട​യു​ടെ അവസ്ഥ നമുക്കു പരി​ശോ​ധി​ക്കാ​വു​ന്ന​തെ​ങ്ങനെ?

¹⁴ ഒന്നാമ​താ​യി, നമ്മുടെ “അതിവി​ശുദ്ധ വിശ്വാസ”ത്തിന്മേൽ നമ്മെത്തന്നെ പണിതു​യർത്തു​ന്ന​തിൽ തുടരാൻ യൂദാ നമ്മോടു പറയുന്നു. (യൂദാ 20) നാം കഴിഞ്ഞ ലേഖന​ത്തിൽ കണ്ടതു​പോ​ലെ ഇതൊരു തുടർച്ച​യായ പ്രക്രി​യ​യാണ്‌. പ്രകൃ​തി​ശ​ക്തി​ക​ളു​ടെ ദുർബ​ലീ​ക​രി​ക്കുന്ന ആക്രമ​ണ​ത്തിന്‌ എതിരാ​യി അധിക​മ​ധി​കം ശക്തി​പ്പെ​ടു​ത്തേ​ണ്ടി​യി​രി​ക്കുന്ന കെട്ടി​ട​ങ്ങ​ളെ​പ്പോ​ലെ​യാണ്‌ നാം. (മത്തായി 7:24, 25 താരത​മ്യം ചെയ്യുക.) അതു​കൊണ്ട്‌ നമു​ക്കൊ​രി​ക്ക​ലും അമിത ആത്മവി​ശ്വാ​സം ഉള്ളവർ ആകാതി​രി​ക്കാം. പകരം, വിശ്വാ​സ​മാ​കുന്ന അടിത്ത​റ​യി​ന്മേൽ നമുക്ക്‌ ഇനിയും സ്വയം പണിതു​യർത്താ​നുള്ള വശങ്ങ​ളേ​വ​യെന്നു നാം നോക്കണം. അങ്ങനെ നമുക്ക്‌ ക്രിസ്‌തു​വി​ന്റെ കൂടുതൽ ശക്തരും വിശ്വ​സ്‌ത​രു​മായ പടയാ​ളി​ക​ളാ​യി​ത്തീ​രാം. ദൃഷ്ടാ​ന്ത​ത്തിന്‌, എഫെസ്യർ 6:11-18-ൽ വിവരി​ച്ചി​രി​ക്കുന്ന ആത്മീയ പടച്ചട്ട​യു​ടെ ഘടകങ്ങ​ളെ​ക്കു​റിച്ച്‌ നമുക്കു വിചി​ന്തനം ചെയ്യാ​വു​ന്ന​താണ്‌.

¹⁵ നമ്മുടെ സ്വന്തം ആത്മീയ പടച്ചട്ട​യു​ടെ അവസ്ഥ എന്താണ്‌? നമ്മുടെ “വിശ്വാ​സം എന്ന പരിച” വേണ്ടത്ര ശക്തമാ​ണോ? കഴിഞ്ഞ ഏതാനും വർഷങ്ങ​ളി​ലേക്കു പിന്തി​രി​ഞ്ഞു നോക്കു​മ്പോൾ, യോഗ​ഹാ​ജർ കുറയൽ, ശുശ്രൂ​ഷ​യിൽ തീക്ഷ്‌ണ​ത​യി​ല്ലായ്‌മ, വ്യക്തി​പ​ര​മായ പഠന​ത്തോ​ടുള്ള താത്‌പ​ര്യം നഷ്ടപ്പെടൽ എന്നിങ്ങ​നെ​യുള്ള അലംഭാ​വ​ത്തി​ന്റെ ചില ലക്ഷണങ്ങൾ നാം കാണു​ന്നു​ണ്ടോ? അത്തരം ലക്ഷണങ്ങൾ അപകട​ക​ര​മാണ്‌! വിശ്വാ​സ​ത്തിൽ നമ്മെത്തന്നെ പണിതു​യർത്താ​നും ശക്തീക​രി​ക്കാ​നു​മാ​യി നാമി​പ്പോൾ പ്രവർത്തി​ക്കണം.—1 തിമൊ​ഥെ​യൊസ്‌ 4:15; 2 തിമൊ​ഥെ​യൊസ്‌ 4:2; എബ്രായർ 10:24, 25.

16. പരിശു​ദ്ധാ​ത്മാ​വിൽ പ്രാർഥി​ക്കു​ക​യെ​ന്നാൽ അർഥ​മെന്ത്‌, യഹോ​വ​യോട്‌ നാം പതിവാ​യി യാചി​ക്കേണ്ട ഒരു സംഗതി​യെന്ത്‌?

¹⁶ ദൈവ​സ്‌നേ​ഹ​ത്തിൽ നിലനിൽക്കാ​നുള്ള രണ്ടാമത്തെ മാർഗം “പരിശു​ദ്ധാ​ത്മാ​വിൽ പ്രാർത്ഥി”ക്കുന്നതു തുടരുക എന്നതാണ്‌. (യൂദാ 20) യഹോ​വ​യു​ടെ ആത്മാവി​ന്റെ സ്വാധീ​ന​ത്തിൻകീ​ഴി​ലും അവന്റെ ആത്മനി​ശ്വസ്‌ത വചനത്തി​നു ചേർച്ച​യി​ലും പ്രാർഥി​ക്കുക എന്നാണ്‌ അതിന്റെ അർഥം. യഹോ​വ​യോ​ടു വ്യക്തി​പ​ര​മാ​യി അടുത്തു​വ​രാ​നും അവനോ​ടുള്ള നമ്മുടെ ഭക്തി പ്രകടി​പ്പി​ക്കാ​നു​മുള്ള ഒരു മർമ​പ്ര​ധാന മാർഗ​മാണ്‌ പ്രാർഥന. ഈ അതിശ​യ​ക​ര​മായ പദവി നാമൊ​രി​ക്ക​ലും അവഗണി​ക്ക​രുത്‌! പ്രാർഥി​ക്കു​മ്പോൾ നമുക്കു പരിശു​ദ്ധാ​ത്മാ​വി​നാ​യി യാചി​ക്കാ​വു​ന്ന​താണ്‌, വാസ്‌ത​വ​ത്തിൽ യാചി​ച്ചു​കൊ​ണ്ടേ​യി​രി​ക്കാ​വു​ന്ന​താണ്‌. (ലൂക്കൊസ്‌ 11:13) നമുക്കു ലഭ്യമാ​യി​രി​ക്കുന്ന ഏറ്റവും വലിയ ശക്തി അതാണ്‌. അത്തരം സഹായ​ത്താൽ നമുക്ക്‌ എല്ലായ്‌പോ​ഴും ദൈവ​സ്‌നേ​ഹ​ത്തിൽ നിലനിൽക്കാ​നും ക്രിസ്‌തു​വി​ന്റെ പടയാ​ളി​കൾ എന്നനി​ല​യിൽ തുടരാ​നും കഴിയും.

17. (എ) കരുണ​യു​ടെ കാര്യ​ത്തിൽ യൂദാ​യു​ടെ ദൃഷ്ടാന്തം വളരെ ശ്രദ്ധേ​യ​മാ​യി​രി​ക്കു​ന്നത്‌ എന്തു​കൊണ്ട്‌? (ബി) നമുക്ക്‌ ഓരോ​രു​ത്തർക്കും കരുണ കാണി​ക്കു​ന്ന​തിൽ തുടരാ​വു​ന്നത്‌ എങ്ങനെ?

¹⁷ മൂന്നാ​മത്‌, കരുണ കാണി​ക്കു​ന്ന​തിൽ തുടരാൻ യൂദാ നമ്മെ ഉദ്‌ബോ​ധി​പ്പി​ക്കു​ന്നു. (യൂദാ 22) ഈ സംഗതി​യിൽ അവന്റെ​തന്നെ ദൃഷ്ടാന്തം ശ്രദ്ധേ​യ​മാണ്‌. ദുഷിപ്പ്‌, അധാർമി​കത, വിശ്വാ​സ​ത്യാ​ഗം എന്നിവ ക്രിസ്‌തീയ സഭയി​ലേക്കു നുഴഞ്ഞു കടക്കു​ന്ന​തിൽ അവൻ അസ്വസ്ഥ​നാ​യത്‌ ഉചിതം തന്നെയാ​യി​രു​ന്നു. എന്നിരു​ന്നാ​ലും, കരുണ പോലുള്ള “മൃദുല” വികാ​രങ്ങൾ പ്രകട​മാ​ക്കി​ക്കൂ​ടാത്ത വിധം സാഹച​ര്യം അത്ര വളരെ അപകട​കരം ആയിരി​ക്കു​ന്നു​വെന്നു ചിന്തി​ച്ചു​കൊണ്ട്‌ അവൻ സംഭ്രാ​ന്തി​ക്കു വഴി​പ്പെ​ട്ടില്ല. ഇല്ല, സംശയ​ങ്ങ​ളാൽ വലയു​ന്ന​വ​രു​മാ​യി ദയാപൂർവം ന്യായ​വാ​ദം ചെയ്‌തു​കൊണ്ട്‌ സാധ്യ​മാ​യി​രി​ക്കു​ന്നി​ട​ത്തെ​ല്ലാം കരുണ കാണി​ക്കു​ന്ന​തിൽ തുടരാ​നും ഗുരു​ത​ര​മായ പാപത്തി​ന്റെ വക്കിൽ നിൽക്കു​ന്ന​വരെ “തീയിൽനി​ന്നു വലി​ച്ചെടു”ക്കാനും പോലും അവൻ തന്റെ സഹോ​ദ​ര​ന്മാ​രെ ഉദ്‌ബോ​ധി​പ്പി​ച്ചു. (യൂദാ 23; ഗലാത്യർ 6:1) ഈ പ്രക്ഷുബ്ധ നാളിൽ മൂപ്പന്മാർക്ക്‌ എത്ര നല്ല ഉദ്‌ബോ​ധനം! ആവശ്യ​മാ​യി​രി​ക്കു​മ്പോൾ ഒരു ഉറച്ചനി​ല​പാട്‌ സ്വീക​രി​ക്കു​ന്നു​വെ​ങ്കി​ലും, കരുണ കാണി​ക്കാൻ അടിസ്ഥാ​ന​മു​ള്ള​പ്പോ​ഴെ​ല്ലാം അതു പ്രകട​മാ​ക്കാൻ അവർ ശ്രമി​ക്കു​ന്നു. സമാന​മാ​യി നാമെ​ല്ലാ​വ​രും അന്യോ​ന്യം കരുണ കാണി​ക്കണം. ദൃഷ്ടാ​ന്ത​ത്തിന്‌, ചെറിയ കാര്യ​ങ്ങ​ളെ​പ്രതി നീരസം വെച്ചു​കൊ​ണ്ടി​രി​ക്കു​ന്ന​തി​നു പകരം നമുക്ക്‌ ക്ഷമിക്കു​ന്ന​തിൽ ഔദാ​ര്യ​മു​ള്ളവർ ആയിരി​ക്കാം.—കൊ​ലൊ​സ്സ്യർ 3:13.

18. നമ്മുടെ ആത്മീയ പോരാ​ട്ട​ത്തിൽ വിജയം സംബന്ധിച്ച്‌ നമുക്ക്‌ ഉറപ്പു​ണ്ടാ​യി​രി​ക്കാ​വു​ന്ന​തെ​ങ്ങനെ?

¹⁸ നാം ചെയ്യുന്ന യുദ്ധം എളുപ്പ​മുള്ള ഒന്നല്ല. യൂദാ പറയു​ന്ന​തു​പോ​ലെ അത്‌ “ഒരു കഠിന പോരാട്ട”മാണ്‌. (യൂദാ 3, NW) നമ്മുടെ ശത്രുക്കൾ ശക്തരാണ്‌. സാത്താൻ മാത്രമല്ല മറിച്ച്‌, അവന്റെ ലോക​വും നമ്മു​ടെ​തന്നെ അപൂർണ​ത​ക​ളു​മെ​ല്ലാം നമു​ക്കെ​തി​രെ അണിനി​ര​ക്കു​ന്നു. എങ്കിലും, വിജയം സംബന്ധിച്ച്‌ നമുക്ക്‌ പൂർണ​മായ ഉറപ്പു​ണ്ടാ​യി​രി​ക്കാ​വു​ന്ന​താണ്‌! എന്തു​കൊണ്ട്‌? എന്തു​കൊ​ണ്ടെ​ന്നാൽ നാം യഹോ​വ​യു​ടെ പക്ഷത്താണ്‌. “സർവ്വകാ​ല​ത്തി​ന്നു​മു​മ്പും ഇപ്പോ​ഴും സദാകാ​ല​ത്തോ​ള​വും തേജസ്സും മഹിമ​യും ബലവും അധികാ​ര​വും” ഉണ്ടായി​രി​ക്കാൻ യഹോവ അർഹനാ​ണെ​ന്നുള്ള ഓർമി​പ്പി​ക്ക​ലോ​ടെ യൂദാ തന്റെ ലേഖനം ഉപസം​ഹ​രി​ക്കു​ന്നു. (യൂദാ 25) ഭയാദ​രവ്‌ ഉണർത്തുന്ന ഒരു ആശയമല്ലേ അത്‌? “വീഴാ​ത​വണ്ണം നിങ്ങളെ സൂക്ഷി”ക്കാൻ ഇതേ ദൈവ​ത്തിന്‌ “ശക്തിയു”ണ്ടെന്നു​ള്ള​തിന്‌ അപ്പോൾപ്പി​ന്നെ എന്തെങ്കി​ലും സംശയ​മു​ണ്ടോ? (യൂദാ 24, 25) തീർച്ച​യാ​യു​മില്ല! അധാർമി​ക​തയെ ചെറു​ക്കു​ക​യും ദിവ്യ നിയമിത അധികാ​രത്തെ ആദരി​ക്കു​ക​യും നമ്മെത്തന്നെ ദൈവ​ത്തി​ന്റെ സ്‌നേ​ഹ​ത്തിൽ നിലനിർത്തു​ക​യും ചെയ്യു​ന്ന​തിൽ തുടരാൻ നാമോ​രോ​രു​ത്ത​രും ദൃഢനി​ശ്ച​യ​മു​ള്ളവർ ആയിരി​ക്കട്ടെ. അങ്ങനെ ഒരു മഹത്തായ വിജയം നാമെ​ല്ലാം ഒരുമിച്ച്‌ ആസ്വദി​ക്കും.

[അടിക്കു​റിപ്പ്‌]

പുനര​വ​ലോ​ക​ന​ത്തി​നുള്ള ചോദ്യ​ങ്ങൾ

□ അധാർമി​ക​തയെ ചെറു​ക്കാൻ യൂദാ​യു​ടെ ലേഖനം നമ്മെ പഠിപ്പി​ക്കു​ന്നത്‌ എങ്ങനെ?

□ ദിവ്യ​നി​യ​മിത അധികാ​രത്തെ ആദരി​ക്കു​ന്നത്‌ വളരെ പ്രധാനം ആയിരി​ക്കു​ന്നത്‌ എന്തു​കൊണ്ട്‌?

□ സഭാപ​ര​മായ അധികാ​രം ദുർവി​നി​യോ​ഗം ചെയ്യു​ന്നത്‌ വളരെ ഗൗരവ​മു​ള്ള​താ​യി​രി​ക്കു​ന്നത്‌ എന്തു​കൊണ്ട്‌?

□ ദൈവ​സ്‌നേ​ഹ​ത്തിൽ നിലനിൽക്കാ​നാ​യി നമുക്കു പ്രവർത്തി​ക്കാ​വു​ന്നത്‌ എങ്ങനെ?

[15-ാം പേജിലെ ചിത്രം]

റോമൻ പടയാ​ളി​ക​ളിൽനി​ന്നു വ്യത്യ​സ്‌ത​രാ​യി ക്രിസ്‌ത്യാ​നി​കൾ ഒരു ആത്മീയ യുദ്ധം ചെയ്യുന്നു

18-ാം പേജിലെ ചിത്രം]

ക്രിസ്‌തീയ ഇടയന്മാർ സേവി​ക്കു​ന്നത്‌ സ്വാർഥത നിമി​ത്തമല്ല മറിച്ച്‌ സ്‌നേഹം നിമി​ത്ത​മാണ്‌