Aħna Minn Dawk Li Għandhom Fidi

L-​ALTIPLANO jinsab bejn il-​Muntanji Andes, fejn jiltaqgħu flimkien il-​Bolivja u l-​Perù. L-​isem ifisser “wita għolja,” jew “medda t’art għolja u ċatta.” Fil-​biċċa l-​kbira, l-​Altiplano jagħmel parti mill-​Bolivja.

L-Altiplano, b’100 kilometru wisaʼ u iktar minn 1,000 kilometru tul, qiegħed f’għoli taʼ madwar 3,700 metru ’l fuq mil-​livell tal-​baħar. Meta tkun sejjer hemmhekk bl-​ajruplan u titlaq minn Lima, il-​belt kapitali li tinsab mal-​kosta tal-​Perù, tgħaddi minn fuq El Misti, vulkan miksi bis-​silġ. Dan jixref ’il fuq mis-​sħab f’għoli taʼ 5,822 metru. Fil-​bogħod, tistaʼ tara l-​qċaċet miksijin bis-​silġ taʼ Nevado Ampato u Nevado Coropuna, li jibqgħu telgħin sa 6,000 metru. Imbagħad, f’daqqa waħda, tfeġġ pjanura vasta—in-​naħa t’isfel taʼ l-​Altiplano Peruvjan.

Il-belt kapitali taʼ l-​Altiplano Peruvjan hija Puno, li qegħda fuq in-​naħa tal-​majjistral taʼ Lake Titicaca. Dan huwa l-​iktar lag li qiegħed fl-​għoli fid-​dinja u li jistgħu jbaħħru fih. Minħabba li din il-​parti qegħda f’għoli taʼ iktar minn 3 kilometri, min iżur il-​post irid jieħu daqsxejn taż-​żmien biex jidra l-​arja ħafifa u safja t’hemmhekk. Ħdejn Lake Titicaca jgħixu l-​Indjani Quechua u Aymara, li nistgħu narawhom jaħdmu fl-​irziezet żgħar tagħhom, jew chacras, libsin ilbies kulurit bl-​aħmar, bl-​aħdar, jew bil-​blu. Għalkemm l-​Ispanjol huwa l-​lingwa ewlenija tal-​Perù, fuq l-​Altiplano jitkellmu wkoll bil-​lingwi Quechua u Aymara.

Ix-​Xogħol taʼ l-​Ippridkar Jieħu Spinta ’l Quddiem

Dan l-​aħħar, ħafna min-​nies umli u ħabrieka li jitkellmu bil-​Quechua u Aymara ħadu għarfien eżatt tal-​verità tal-​Bibbja. Dan ċertament juri li Jehovah bierek bil-​kbir l-​isforzi tal-​proklamaturi żelużi tas-​Saltna li jaqdu full-time bħala pijunieri speċjali.

Per eżempju, José u Silvia li huma pijunieri speċjali, ġew inkarigati biex jaqdu fil-​belt taʼ Putina, madwar 50 kilometru ’l bogħod minn Lake Titicaca. F’xahrejn, Silvia kienet qed tikkonduċi 16-il studju tal-​Bibbja fid-​djar, u José 14. F’sitt xhur biss, in-​numru taʼ pubblikaturi fil-​kongregazzjoni żdied minn 23 għal 41. Sadattant, l-​attendenza għal-​laqgħat telgħet minn 48 għal quċċata taʼ 132 ruħ.

“Aħna sibna,” jgħid José, “li meta jibdew isiru l-​laqgħat tal-​kongregazzjoni f’dawn il-​komunitajiet iżolati, huwa iktar prattiku li nibdew bil-​Laqgħa Pubblika u l-​Istudju tal-​Ktieb tal-​Kongregazzjoni. Dan jagħmilha eħfef għal uħud ġodda li jkunu interessati biex jibdew jattendu l-​laqgħat.”

F’Muñani, komunità iżolata madwar 20 kilometru ’l bogħod minn Putina, l-​aħbar tajba twasslet għall-​ewwel darba minn żewġ aħwa nisa, li waħda minnhom kienet pijuniera. Hemmhekk, huma bdew studju tal-​Bibbja maʼ wieħed raġel agħma jismu Lucio.a Dan stieden lil ħuh, Miguel, li kien missjunarju Kattoliku lajk u mexxej taʼ waħda mill-​komunitajiet fil-​viċin. Meta l-​ħabib taʼ Miguel staqsieh għala kien qed imur Muñani kull ġimgħa, dan wieġbu li hemmhekk kien qed jitgħallem dwar Jehovah u l-​Kelma tiegħu. Imbagħad qamet il-​mistoqsija: “Għala ma nistudjawx il-​Bibbja hawnhekk stess?” Minħabba l-​interess li wrew in-​nies fil-​komunità taʼ Miguel, ix-​Xhieda rranġaw biex fi żmien qasir jibdew isiru l-​laqgħat f’dak il-​post.

Miguel beda jaqsam dak li kien qed jitgħallem m’oħrajn. Imma x’kien se jagħmel dwar il-​pożizzjoni tiegħu bħala missjunarju Kattoliku lajk u viċi-gvernatur? F’waħda mil-​laqgħat tal-​komunità, hu ħabbar li kien se jirriżenja minn missjunarju Kattoliku. Kien issa se jinħatar xi ħaddieħor floku? Wieħed fl-​udjenza qal: “Xi bżonn għandna taʼ missjunarju ieħor meta qegħdin nitgħallmu l-​verità?” M’għandniex xi ngħidu, din kienet referenza għat-​tagħlim tax-​Xhieda taʼ Jehovah. Xi ħaddieħor żied: “Ma naqblux li tirriżenja int biss. Għala ma nirriżenjawx aħna lkoll?” L-​udjenza kollha għajtet flimkien: “Aħna lkoll nirriżenjaw!”

Wara ftit taż-​żmien, f’laqgħa oħra tal-​komunità, ġew diskussi l-​idoli u l-​kurċifissi. Wieħed raġel staqsa lil kulmin kien preżenti biex jaqra Dewteronomju 7:25, li jgħid: “Ix-​xbihat taʼ l-​allat tagħhom taħraqhom bin-​nar, la tiklibx għall-​fidda u d-​deheb taʼ fuqhom u teħodhom għalik, inkella taqaʼ fix-​xibka, għax dawk il-​ħwejjeġ jistkerrahhom il-​Mulej, Alla tiegħek.”

Ir-raġel imbagħad staqsa lil kulmin kien jaqbel li jaħarqu l-​idoli biex jgħolli idu. Kulħadd għolla idu mill-​ewwel. (Atti 19:​19, 20) Issa, mill-​25 familja fil-​komunità hemm 23 li qed jistudjaw il-​Kelma t’Alla. Żewġ persuni qed jaqdu bħala pubblikaturi mhux mgħammdin, u ħames koppji qed jippjanaw biex jagħmlu ż-​żwieġ tagħhom legali biex ikollhom waqfa nadifa quddiem Jehovah.—Titu 3:1; Lhud 13:4.

Jgħallmu b’Kasett Rikordings

Fuq l-​Altiplano hemm ħafna nies li la jafu jaqraw u lanqas jiktbu. Għalhekk, il-​vidjos tal-​Watch Tower kif ukoll il-​kasett rikordings bil-​lingwi lokali huma t’għajnuna kbira, anki biex isiru studji tal-​Bibbja fid-​djar. Billi tuża awdjo kasett, waħda pijuniera speċjali jisimha Dora tikkonduċi studji bil-​browxer Alla X’Jirrikjedi Minna? Hi ssemmaʼ lill-​istudent tal-​Bibbja paragrafu wieħed, imbagħad tistaqsi xi mistoqsijiet fuq dak l-​istess materjal.

Stazzjon tar-​radju lokali jxandar regolarment partijiet mill-​browxer X’Jirrikjedi bil-​lingwa Quechua kif ukoll partijiet mir-​rivista Stenbaħ! bl-​Ispanjol. Għaldaqstant, ħafna nies jagħrfu l-​messaġġ tas-​Saltna u jkunu jridu jitgħallmu iktar meta x-​Xhieda taʼ Jehovah jmorru jħabbtulhom.

L-Altiplano huwa maqtugħ għalih mill-​biċċa l-​kbira tad-​dinja imma mhux għal Alla. Grazzi għall-​imħabba li Jehovah għandu għall-​bnedmin, ħafna nies li jgħixu fl-​għoli fuq l-​Altiplano fl-​Andes qed isiru parti mill-​ġemgħa kbira li qed tigglorifika d-​dar maestuża tiegħu taʼ qima pura.—Ħaggaj 2:7.

[Nota taʼ taħt]