Iż-​Żjieda fost il-​Varjetà taʼ Nies fl-​Uganda

L-​UGANDA, li hi qrib il-​Great Rift Valley fin-​naħa tal-​lvant taʼ l-​Afrika u bl-​ekwatur għaddej minn ġo nofsha, hija mbierka bi sbuħija rimarkevoli. L-​art tagħha hija varjata ħafna, għandha veġitazzjoni rikka, u annimali interessanti. Tinsab fuq il-​pjanura għolja u kbira taʼ l-​Afrika, għandha klima moderata u pajsaġġ affaxxinanti t’għoljiet li jibqgħu sejrin għal mijiet taʼ kilometri.

Ftit hemm pajjiżi li għandhom is-​silġ u klima tropikali f’post mhux daqstant kbir, imma l-​Uganda għandha. Tibda mill-​qċaċet miksijin silġ tal-​Muntanji tal-​Qamar, il-​Muntanji Ruwenzori, fin-​naħa tal-​punent, u tibqaʼ sejra sa l-​art niexfa fin-​naħa tal-​lvant. Fuq il-​pjanura tagħha tistaʼ tara ljunfanti, bufli, u ljuni. Il-​muntanji u l-​foresti miksijin siġar huma abitati mill-​gurilla, ix-​ximpanzì, u iktar minn 1,000 speċi t’għasafar. Ħafna mill-​kontinent taʼ l-​Afrika jbati minn nixfa u ġuħ, imma l-​Uganda hija mbierka bi xmajjar u għadajjar, bħal Victoria, it-​tieni l-​akbar għadira taʼ l-​ilma ħelu fid-​dinja. Il-​fetħa fin-​naħa tat-​tramuntana taʼ Lake Victoria twassal għax-​Xmara Nil. Mhux taʼ b’xejn li Winston Churchill irrefera għal dan il-​pajjiż bħala “l-​perla taʼ l-​Afrika”!

“Il-​Perla” Tleqq Illum

Madankollu, l-​iktar ħaġa attraenti dwar lUganda hija n-​nies, li huma dħulin, ospitabbli, u differenti. Dan il-​pajjiż, li l-​maġġuranza min-​nies fih huma “Kristjani,” jistaʼ jiġi deskritt bħala taħlita taʼ diversi gruppi etniċi u kulturi. Saħansitra llum, dawn in-​nies differenti jistgħu jintgħarfu mit-​tradizzjonijiet u l-​ilbies tagħhom.

Dan l-​aħħar, għadd li dejjem qed jikber taʼ nies mill-​Uganda qed iwieġbu għall-​aħbar tajba tal-​Bibbja rigward iż-​żmien meta l-​paċi dejjiema se tkun mifruxa maʼ l-​art kollha. (Salm 37:11; Rivelazzjoni 21:4) Hija sfida biex il-​messaġġ jilħaq lil kulħadd, f’pajjiż li bejn wieħed u ieħor hu kbir daqs il-​Gran Britannja.

Minn bidu żgħir, meta saret l-​ewwel magħmudija taʼ resident lokali bħala Xhud dedikat taʼ Ġeħova f’Lake Victoria fl-​1955, ‘iż-​żgħir’ finalment sar elf fl-​1992. Mill-​1955 ’l hawn, kien hemm tkabbir kontinwu. Dan hu fi qbil mal-​kliem rassiguranti t’Alla: “Jien il-​Mulej, li nfittex nagħmel dan kollu f’waqtu.”​—Isaija 60:22.

Jingħelbu l-​Ostakli tal-​Lingwa

L-​Ingliż huwa l-​lingwa uffiċjali tal-​pajjiż u jintuża ħafna, speċjalment fl-​edukazzjoni, però m’huwiex ilsien il-​pajjiż tal-​maġġuranza min-​nies fl-​Uganda. B’hekk, biex jipprovaw jilħqu lin-​nies bl-​aħbar tajba, ix-​Xhieda taʼ Ġeħova jikkunsidraw ukoll lingwi maġġuri oħra. Dan wera li kien neċessarju għaliex iktar minn 80 fil-​mija mill-​25 miljun ruħ fil-​pajjiż jgħixu f’postijiet rurali jew bliet żgħar, fejn dawn in-​nies jiddependu ħafna minn ilsien pajjiżhom biex jikkomunikaw kuljum. Jirrikjedi sforz kbir biex jintlaħqu dawn il-​gruppi taʼ lingwi differenti u biex jiġu sodisfati l-​bżonnijiet spiritwali tan-​nies.

Minkejja dan, ix-​Xhieda taʼ Ġeħova jistinkaw biex jilħqu dawn il-​bżonnijiet billi jippridkaw lin-​nies bil-​lingwa tagħhom stess u billi jippreparaw letteratura Biblika b’varjetà taʼ lingwi. Fl-​uffiċċju tal-​fergħa fil-​belt kapitali, Kampala, timijiet tat-​traduzzjoni jieħdu ħsieb erbaʼ gruppi taʼ lingwi differenti: Acholi, Lhukonzo, Luganda, u Runyankore. Barra minn hekk, l-​assembleat Kristjani li jinżammu b’diversi lingwi madwar il-​pajjiż kellhom attendenzi eċċellenti, iktar mid-​doppju tax-​Xhieda taʼ Ġeħova fl-​Uganda. Dan juri biċ-​ċar li l-​isforzi biex jintlaħqu diversi gruppi taʼ lingwi differenti qed jikkontribwixxu għal tkabbir spiritwali mgħaġġel. Imma dan mhux kollox.

Il-​Pijunieri Jagħtu Spinta lix-​Xogħol

Il-​kongregazzjonijiet bil-​ferħ jappoġġaw kampanji taʼ madwar tliet xhur li jsiru kull sena, li permezz tagħhom qed jintlaħqu territorji iżolati. (Atti 16:9) Għadd li dejjem qed jikber taʼ pijunieri żgħażagħ żelużi, jew evanġelizzaturi full-time, huma minn taʼ quddiem f’dan ix-​xogħol. Huma jivvjaġġaw lejn postijiet imwarrbin fejn, f’xi każijiet, l-​aħbar tajba qatt ma tkun instemgħet qabel.

Żewġ Xhieda ġew inkarigati bħala pijunieri speċjali għal perijodu taʼ tliet xhur f’Bushenyi, belt żgħira fil-​punent taʼ l-​Uganda. Huma ngħaqdu fl-​ippridkar maʼ l-​uniku Xhud taʼ Ġeħova f’dak il-​post u għenu biex jorganizzaw il-​laqgħat Kristjani. Fi żmien xahar, iż-​żewġ pijunieri kienu qed jikkonduċu diskussjonijiet Bibliċi regulari maʼ 40 individwu, u 17 minnhom bdew jattendu l-​laqgħat tax-​Xhieda taʼ Ġeħova. Il-​pijunieri jirrakkontaw: “Xi wħud li konna ħallejnielhom il-​browxer Alla X’Jirrikjedi Minna?a ġew id-​dar tagħna ftit jiem wara b’diversi paġni fejn kienu kitbu t-​tweġibiet għall-​mistoqsijiet fil-​browxer. Riedu jkunu jafu jekk it-​tweġibiet tagħhom kinux tajbin.” Illum, f’din il-​belt hemm kongregazzjoni li għandha Sala tas-​Saltna.

Żewġ pijunieri vvjaġġaw lejn territorju fl-​Uganda tal-​punent fejn l-​aħbar tajba qatt ma kienet ġiet pridkata. Huma kitbu: “In-​nies tassew huma għatxana għall-​verità tal-​Bibbja. Matul it-​tliet xhur li ilna hawn, irnexxielna nibdew u nikkonduċu 86 studju tal-​Bibbja.” Ma damx ma ġie stabbilit formalment grupp taʼ Xhieda f’dan il-​post.

Ħaddiema Żelużi Oħra fl-​Għalqa

Fost il-​pijunieri żelużi hemm xi wħud li ilhom jaqdu għal għadd taʼ snin. Qabel ma sar wieħed mix-​Xhieda taʼ Ġeħova, Patrick kien idoqq il-​klarinett fil-​banda tal-​forza taʼ l-​ajru tal-​ħakkiem taʼ l-​Uganda, Idi Amin. Sitt xhur wara li Patrick tgħammed fl-​1983, hu sar ministru full-time. Illum hu jaqdi bħala indokratur li jivvjaġġa, iżur u jinkuraġġixxi lill-​kongregazzjonijiet.

Margaret tgħammdet fl-​1962. Minkejja li għandha qrib it-​80 sena u għandha problema f’ġenbejha li tillimita l-​moviment tagħha, hi tqattaʼ xi 70 siegħa kull xahar taqsam it-​tama tagħha bbażata fuq il-​Bibbja mal-​ġirien tagħha. Hi tifrex il-​letteratura fuq banketta quddiem id-​dar tagħha u tibda konversazzjonijiet maʼ kull min jgħaddi u jkun jixtieq jismaʼ l-​aħbar tajba dwar dinja ġdida taʼ paċi.

Simon, bidwi min-​naħa tal-​lvant taʼ l-​Uganda, kien ilu jfittex il-​verità għal 16-il sena meta, fl-​1995, hu sab xi letteratura pubblikata mix-​Xhieda taʼ Ġeħova. Dak li qara qanqallu l-​kurżità biex isir jaf iktar dwar is-​Saltna t’Alla u l-​iskop glorjuż taʼ Ġeħova għall-​art. Ma kienx hemm Xhieda f’Kamuli, il-​post fejn kien jgħix, u għalhekk Simon ivvjaġġa xi 140 kilometru lejn Kampala biex ifittixhom. Illum, hemm kongregazzjoni fir-​raħal tiegħu.

“Ix-​Xhieda taʼ Ġeħova Se Jibqgħu Hawn”

Bħalma jiġri f’postijiet oħrajn fl-​Afrika, ħafna nies jistennew li grupp reliġjuż ikollu post xieraq taʼ qima. Dan qajjem problema li donnha ma setgħetx tingħeleb għal xi wħud mill-​kongregazzjonijiet tax-​Xhieda taʼ Ġeħova, għaliex ma kellhomx il-​finanzi biex jibnu Sala tas-​Saltna adattata. Il-​kliem ma jistax jiddeskrivi l-​gratitudni taʼ l-​aħwa meta, lejn l-​aħħar taʼ l-​1999, fi żmien qasir inbeda programm għall-​bini tas-​Swali tas-​Saltna madwar id-​dinja. Matul il-​ħames snin taʼ wara, inbnew 40 Sala tas-​Saltna ġdida fl-​Uganda. Illum, kważi l-​kongregazzjonijiet kollha għandhom is-​Sala tas-​Saltna modesta u preżentabbli tagħhom. Il-​messaġġ li ħadu l-​komunitajiet lokali minn din l-​attività tal-​bini kien, “Ix-​Xhieda taʼ Ġeħova se jibqgħu hawn.” Dan ikkontribwixxa għaż-​żjieda.

Kongregazzjoni żgħira fit-​tramuntana taʼ l-​Uganda kienet iżżomm il-​laqgħat taħt xi siġar tal-​mangu li kellhom ħafna weraq li jipprovdu d-​dell. Meta nkisbet biċċa art, kollox mexa ’l quddiem b’rata mgħaġġla. L-​aħwa fit-​tim tal-​kostruzzjoni, flimkien max-​Xhieda lokali, bdew jibnu Sala tas-​Saltna. Wieħed li fil-​passat kien politikant prominenti f’dawk l-​inħawi baqaʼ impressjonat bix-​xogħol. Hu offra biex il-​garaxx tiegħu jintuża għal-​laqgħat tagħhom sakemm titlesta s-​Sala tas-​Saltna. Hu aċċetta wkoll studju tal-​Bibbja maʼ wieħed mill-​volontieri tal-​kostruzzjoni. Issa hu pubblikatur mgħammed żeluż, ferħan li jistaʼ jqim lil Ġeħova f’dik is-​Sala tas-​Saltna ġdida tant sabiħa!

Fi proġett tal-​bini taʼ Sala tas-​Saltna fix-​xlokk tal-​pajjiż, bennej lokali tant tqanqal mill-​ispirtu taʼ ħbiberija, imħabba, u kooperazzjoni li ra fost l-​aħwa li offra biex jgħin fix-​xogħol. Meta l-​proġett wasal fi tmiemu, hu saħansitra ħadem lejl sħiħ sabiex l-​aħwa jkunu jistgħu jlestu s-​Sala tas-​Saltna għad-​dedikazzjoni li kienet se ssir l-​għada fil-​għodu. Hu qal: “Intom l-​uniċi nies li verament tħobbu lil xulxin, mhux bil-​kliem biss.”

Tkompli ż-​Żjieda Minkejja l-​Inkwiet

Minħabba li qed jintlaħqu territorji ġodda fl-​Uganda, hemm żjieda kontinwa fl-​għadd taʼ Xhieda, u ħafna wħud interessati qed jissieħbu mal-​kongregazzjonijiet. Madankollu, hemm ħafna tħassib minħabba l-​għadd kbir taʼ refuġjati li daħlu fl-​Uganda. Il-​gwerer ċivili f’pajjiżi fil-​viċin kellhom effett fuq il-​poplu taʼ Ġeħova wkoll. Ix-​Xhieda fil-​kampijiet tar-​refuġjati wrew fiduċja li tispikka f’Ġeħova. Wieħed li qabel kien uffiċjal għoli minn pajjiż fil-​viċin u li darba kellu sehem fil-​persekuzzjoni tax-​Xhieda meta kien hemm projbizzjoni f’dak il-​pajjiż, jiftakar fil-​ħajja komda li kellu. Wara li studja l-​Bibbja f’wieħed mill-​kampijiet tar-​refuġjati u sar Xhud, hu qal: “Prosperità materjali u pożizzjoni għolja f’din id-​dinja m’għandhom l-​ebda valur. Għalkemm jien issa fqir u marid, ħajti hija ħafna aħjar milli qatt kienet. Naf lil Ġeħova, u napprezza l-​privileġġ tat-​talb. Filwaqt li għandi tama soda għall-​futur, naf għala rridu nissaportu l-​problemi llum. Għalhekk, għandi paċi ġewwinija li qatt ma esperjenzajt bħalha qabel.”

Ġieli ntqal li jekk iddaħħal zokk fil-​ħamrija fertili taʼ l-​Uganda fil-​għaxija, sa fil-​għodu jkollu l-​għeruq. It-​tkabbir spiritwali li qed iseħħ fil-​pajjiż juri li l-​ħamrija spiritwali wkoll hija fertili ħafna. Nirringrazzjaw lil Alla Ġeħova talli ħalla ż-​żmien biex saħansitra iktar mill-​varjetà taʼ nies fl-​Uganda jitgħallmu dwar is-​Saltna tiegħu. Ġesù wera kemm hi prezzjuża s-​Saltna fit-​tixbiha taʼ “perla waħda taʼ valur kbir.” Iktar u iktar uħud fl-​Uganda qed jaslu biex jifhmuh dan.​—Mattew 13:​45, 46.

[Nota taʼ taħt]

[Mappep f’paġna 8]

(Għall-formazzjoni sħiħa tat-test, ara pubblikazzjoni)

SUDAN

UGANDA

Ix-​Xmara Nil

Kamuli

Tororo

Kampala

Bushenyi

Lake Victoria

KENJA

TANZANIJA

RWANDA

[Stampa f’paġna 9]

Tlieta mill-​ħafna pijunieri żelużi

[Stampa f’paġna 10]

Patrick

[Stampa f’paġna 10]

Margaret

[Stampa f’paġna 10]

Simon

[Stampa f’paġna 10]

Konvenzjoni distrettwali f’Tororo

[Sors tal-Istampa f’paġna 8]

L-​istampa fl-​isfond: © Uganda Tourist Board