1 Crónicas
14 Ta̱ rey Hiram ta̱ ni̱xi̱yo chí Tiro chi̱ndaʼára na̱ ku̱a̱ʼa̱n ka̱ʼa̱n xíʼin ta̱ David. Chi̱ndaʼátura yitu̱n tú cedro, na̱ albañil* xíʼin na̱ carpintero ña̱ va̱ʼa ixava̱ʼana iin veʼe* nu̱ú koo ta̱ David. 2 Ta ta̱ David ku̱ndaa̱-inira ña̱ mií Jehová kúú ta̱ ta̱xi ña̱ iinlá miíra ná xa̱a̱ koo rey nu̱ú na̱ ñuu Israel, saáchi ta̱xira ña̱ ná kundayáʼviní ña̱ xáʼndachíñura ta xa̱ʼa̱ ña̱ va̱ʼa na̱ ñuura* Israel kúú ña̱ ke̱ʼéra ña̱yóʼo.
3 Ni̱xi̱yo ku̱a̱ʼáka ná síʼi ta̱ David chí Jerusalén ta ka̱ku se̱ʼeta̱ara xíʼin se̱ʼe-síʼira xíʼin náyóʼo. 4 Na̱yóʼo kúú na̱ se̱ʼe ta̱ David na̱ ka̱ku chí Jerusalén: ta̱ Samúa, ta̱ Sobab, ta̱ Natán, ta̱ Salomón, 5 ta̱ Ibhar, ta̱ Elisúa, ta̱ Elpélet, 6 ta̱ Noga, ta̱ Néfeg, ta̱ Jafía, 7 ta̱ Elisamá, ta̱ Beeliadá xíʼin ta̱ Elifélet.
8 Tá ku̱ndaa̱-ini na̱ filisteo ña̱ nda̱kaxinna ta̱ David ña̱ koora rey nu̱ú na̱ ñuu Israel, ndiʼina ku̱a̱ʼa̱nna nandukúnara. Tá ku̱ndaa̱-ini ta̱ David xa̱ʼa̱ ña̱yóʼo, ki̱tara ku̱a̱ʼa̱nra kanitáʼanra xíʼinna. 9 Tasaá ki̱xáʼa na̱ filisteo kánitáʼanna xíʼin na̱ yiví na̱ ndóo chí yoso̱ ña̱ Refaím. 10 Ta̱ David ni̱nda̱ka̱tu̱ʼunra Ndióxi̱: “¿Á ku̱ʼi̱n kanitáʼi̱n xíʼin na̱ filisteo? ¿Á ndataxiúnna ndaʼíi̱?”. Ta Jehová nda̱kuiinra yuʼúra: “Va̱ʼa ku̱ʼu̱nvaún, saáchi na̱ ndataxii̱ ndaʼún kúúvana”. 11 Ña̱kán nda̱kiʼin ta̱ David ku̱a̱ʼa̱nra chí Baal-Perazim ta kán ku̱chiñura ka̱nitáʼanra xíʼinna. Ta ni̱ka̱ʼa̱nra: “Mií Ndióxi̱ ta̱ nda̱a̱ kúú ta̱ sa̱ndíʼi-xa̱ʼa̱ na̱ sáa̱-ini xíni yi̱ʼi̱, nda̱a̱ táki̱ʼva sándiʼi-xa̱ʼa̱ ti̱kui̱í nama̱ ña̱ sási nu̱úrá”. Xa̱ʼa̱ ña̱kán, chi̱nanína lugar kán Baal-Perazim. 12 Ta kán sa̱ndákoo na̱ filisteo ndióxi̱ ña̱ ndásakáʼnuna, ta ta̱ David xa̱ʼndara chiñu ña̱ ná kaʼmina ña̱yóʼo.
13 Tá ni̱ya̱ʼa loʼo tiempo, na̱ filisteo ndi̱kó tukuna ka̱nitáʼanna xíʼinna chí yoso̱ kán. 14 Ta̱ David tuku ni̱nda̱ka̱tu̱ʼunra Ndióxi̱ ta̱ nda̱a̱ soo ta̱yóʼo ni̱ka̱ʼa̱nra xíʼinra: “Va̱ása ku̱ʼu̱n nda̱kúkaún chí nu̱úna ña̱ kanitáʼún xíʼinna va̱ʼaka chí sa̱tána ka̱va̱nduún, chí nu̱ú íyo yitu̱n tú bacá.* 15 Tá ná kuniso̱ʼún ña̱ táku̱ níʼi ndaʼa̱ yitu̱n tú bacá nda̱a̱ táki̱ʼva níʼi tá ku̱a̱ʼa̱n na̱ yiví, saá kúú ña̱ kunda̱a̱-iniún ña̱ Ndióxi̱ ta̱ nda̱a̱ kúú ta̱ kánuu ku̱a̱ʼa̱n nu̱ún ña̱ kanitáʼún xíʼin na̱ filisteo, tasaá kúú ña̱ xíniñúʼu kitaún ku̱ʼún kanitáʼún xíʼinna”. 16 Ña̱kán, ta̱ David ke̱ʼéra ndiʼi ña̱ ni̱ka̱ʼa̱n Ndióxi̱ ta̱ nda̱a̱ xíʼinra, ta ku̱chiñura ka̱nitáʼanra xíʼin na̱ filisteo chí Gabaón iinsaá nda̱a̱ Guézer. 17 Ndiʼi na̱ ñuu ni̱xa̱a̱na ku̱ndaa̱-inina xa̱ʼa̱ ña̱ xi̱keʼé ta̱ David, ta Jehová ta̱xira ña̱ ná yi̱ʼvínína kuninara.