1 Crónicas

15 Ta̱ David nda̱kundeéra i̱xava̱ʼara ku̱a̱ʼá veʼe chí ñuu nu̱ú ni̱xi̱yora ña̱ xi̱naní Ñuu ta̱ David. Ta saátu i̱xatu̱ʼvara nu̱ú kundichi iin veʼe loʼo nu̱ú kundikaa̱ Arca Ndióxi̱ ta̱ nda̱a̱. 2 Tasaá kúú ña̱ ni̱ka̱ʼa̱n ta̱ David ña̱yóʼo: “Nda̱a̱ ni iinna va̱ása xíniñúʼu kuiso Arca Ndióxi̱ ta̱ nda̱a̱ chi iinlá na̱ kivi keʼé ña̱yóʼo kúú na̱ levita, saáchi mií Jehová kúú ta̱ nda̱kaxin na̱yóʼo ña̱ kuisona Arca Jehová ta saátu ña̱ kachíñuna nu̱úra ndiʼi tiempo”. 3 Tándi̱ʼi, ta̱ David sa̱ndátakara ndiʼi na̱ ñuu Israel chí Jerusalén ña̱ va̱ʼa ku̱ʼu̱nna ndakiʼinna Arca Jehová ku̱ʼu̱n xíʼinna veʼe loʼo nu̱ú i̱xava̱ʼara kundikaa̱nú.

4 Ta̱ David sa̱ndákutáʼanra na̱ veʼe ta̱ Aarón xíʼin na̱ levita: 5 ta ti̱xin na̱ veʼe na̱ cohatita, ka̱nara ta̱ Uriel ta̱ xi̱niʼi yichi̱ nu̱úna xíʼin 120 na̱ ñanira; 6 ti̱xin na̱ veʼe na̱ merarita, ka̱nara ta̱ Asaya ta̱ xi̱niʼi yichi̱ nu̱úna xíʼin 220 na̱ ñanira; 7 ti̱xin na̱ veʼe ta̱ Guersom, ka̱nara ta̱ Joel ta̱ xi̱niʼi yichi̱ nu̱úna xíʼin 130 na̱ ñanira 8 ti̱xin na̱ veʼe ta̱ Elizafán, ka̱nara ta̱ Semaya ta̱ xi̱niʼi yichi̱ nu̱úna xíʼin 200 na̱ ñanira; 9 ti̱xin na̱ veʼe ta̱ Hebrón, ka̱nara ta̱ Eliel ta̱ xi̱niʼi yichi̱ nu̱úna xíʼin 80 na̱ ñanira; 10 ti̱xin na̱ veʼe ta̱ Uziel, ka̱nara ta̱ Aminadab ta̱ xi̱niʼi yichi̱ nu̱úna xíʼin 112 na̱ ñanira. 11 Ta̱ David ka̱natura ta̱ su̱tu̱ Sadoc xíʼin ta̱ Abiatar ta na̱ levita na̱ ka̱nara xi̱kuu ta̱ Uriel, ta̱ Asaya, ta̱ Joel, ta̱ Semaya, ta̱ Eliel xíʼin ta̱ Aminadab, 12 ta ni̱ka̱ʼa̱nra xíʼinna: “Ndóʼó kúú na̱ níʼi yichi̱ nu̱ú na̱ veʼe na̱ levita. Ndasayi̱i̱ndó miíndó xíʼin na̱ ñanindó ta kúáʼanndó ndakiʼinndó Arca Jehová Ndióxi̱ na̱ ñuu Israel, ta ná ku̱ʼu̱nnú xíʼinndó veʼe loʼo nu̱ú i̱xava̱ʼi̱ kundikaa̱nú. 13 Xa̱ʼa̱ ña̱ su̱ví ndóʼó níxi̱ndiso túyóʼo yichi̱ nu̱ú, ni̱sa̱a̱ní Jehová Ndióxi̱yó xíʼinyó saáchi va̱ása níkiʼin va̱ʼayó kuenta ndáa ki̱ʼva kúú ña̱ xi̱niñúʼu keʼéyó ña̱yóʼo”. 14 Ña̱kán, na̱ su̱tu̱ xíʼin na̱ levita nda̱sayi̱i̱na miína ña̱ va̱ʼa ku̱ʼu̱nna ndakiʼinna Arca Jehová Ndióxi̱ na̱ ñuu Israel.

15 Tasaá, na̱ levita xi̱niñúʼuna yitu̱n tú náni̱ ña̱ va̱ʼa kuiso so̱ko̱na Arca Ndióxi̱ ta̱ nda̱a̱, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés ña̱ ná ka̱ʼa̱nra xíʼinna. 16 Ta ta̱ David ni̱ka̱ʼa̱nra xíʼin na̱ xi̱niʼi yichi̱ nu̱ú na̱ levita ña̱ ná ka̱ʼa̱nna xíʼin na̱ ñanina na̱ xi̱xita ña̱ ná katana xíʼin ña̱ si̱í-ini, ta ná sakáʼana arpa, címbalo xíʼin inkaka instrumento tú kúúmií yi̱ʼva̱.

17 Ta na̱ levita ni̱ka̱ʼa̱nna xíʼin ta̱ Hemán se̱ʼe ta̱ Joel ña̱ ná keʼéra chiñu yóʼo, saátu ni̱ka̱ʼa̱nna xíʼin ta̱ Asaf se̱ʼe ta̱ Berekías ta saátu xíʼin ta̱ Etán se̱ʼe ta̱ Cusayá, ta̱ ki̱xi ti̱xin na̱ veʼe na̱ merarita. 18 Ta inka na̱ táʼanna na̱ nda̱kaxinna ña̱ keʼéna chiñu yóʼo xi̱kuu ta̱ Zacarías, ta̱ Ben, ta̱ Jaaziel, ta̱ Semiramot, ta̱ Jehiel, ta̱ Uní, ta̱ Eliab, ta̱ Benaya, ta̱ Maaseya, ta̱ Matitías, ta̱ Elifelehu, ta̱ Micneyá ta saátu nda̱kaxinna ta̱ Obed-Edom xíʼin ta̱ Jeiel, na̱yóʼo xi̱kuumiína chiñu ña̱ kundaana yéʼé. 19 Ta̱ Hemán, ta̱ Asaf xíʼin ta̱ Etán kúú na̱ xi̱xita ta saátu xi̱sakáʼana címbalo ña̱ cobre; 20 ta̱ Zacarías, ta̱ Aziel, ta̱ Semiramot, ta̱ Jehiel, ta̱ Uní, ta̱ Eliab, ta̱ Maaseya xíʼin ta̱ Benaya xi̱sakáʼana instrumento tú kúúmií yi̱ʼva̱, ta nota ña̱ alamot* kúú ña̱ xi̱sakáʼana; 21 ta̱ Matitías, ta̱ Elifelehu, ta̱ Micneyá, ta̱ Obed-Edom, ta̱ Jeiel xíʼin ta̱ Azazías xi̱sakáʼana arpa, ta nota ña̱ xi̱sakáʼana kúú ña̱ seminit* ña̱ va̱ʼa kuniʼina yichi̱ nu̱ú inka na̱ sákaʼa. 22 Ta̱ Kenanías ta̱ xi̱niʼi yichi̱ nu̱ú na̱ levita kúú ta̱ xi̱kiʼin kuenta ndáa ki̱ʼva kundisona Arca ku̱ʼu̱nna saáchi xi̱xini̱ní ta̱yóʼo, 23 ta ta̱ Berekías xíʼin ta̱ Elcaná kúú na̱ xi̱ndaa yéʼé veʼe loʼo nu̱ú xi̱ndikaa̱ Arca. 24 Ta ta̱ su̱tu̱ Sebanías, ta̱ Josafat, ta̱ Netanel, ta̱ Amasái, ta̱ Zacarías, ta̱ Benaya xíʼin ta̱ Eliezer kúú na̱ ndeéní xi̱tivi trompeta nu̱ú Arca Ndióxi̱ ta̱ nda̱a̱, ta inkaka na̱ xi̱ndaa yéʼé veʼe loʼo nu̱ú xi̱ndikaa̱ Arca xi̱kuu ta̱ Obed-Edom xíʼin ta̱ Jehías.

25 Ta̱ David xíʼin na̱ xi̱niʼi yichi̱ nu̱ú na̱ ñuu Israel ta saátu na̱ xi̱niʼi yichi̱ nu̱ú mil na̱ yiví, kúsi̱íkaví-inina ku̱a̱ʼa̱nna chí veʼe ta̱ Obed-Edom ña̱ ndakiʼinna arca ña̱ trato tú kúú kuenta Jehová. 26 Xa̱ʼa̱ ña̱ chi̱ndeétáʼan Jehová Ndióxi̱ ta̱ nda̱a̱ xíʼin na̱ levita ña̱ va̱ʼa kundisona arca ña̱ trato tú kúú kuentara, na̱yóʼo ni̱so̱kóna u̱xa̱ si̱ndi̱ki̱ yúta̱* nu̱úra* ta saátu u̱xa̱ ndikachi* che̱e. 27 Ta̱ David xi̱ndixira iin ti̱ko̱to̱ káni̱ ña̱ va̱ʼaní ña̱ kǒo ndaʼa̱ ta saátu ni̱xi̱yo ña̱ xi̱ndixi na̱ levita na̱ xi̱ndiso Arca, na̱ xi̱xita ta saátu ta̱ Kenanías ta̱ xi̱niʼi yichi̱ nu̱ú na̱ xi̱ndiso Arca xíʼin na̱ xi̱xita; saátu xi̱ndixi ta̱ David iin efod* ña̱ lino. 28 Ndiʼi na̱ ñuu Israel na̱ ni̱xa̱ʼa̱n nda̱kiʼin arca ña̱ trato tú kúú kuenta Jehová xi̱ndaʼyi̱ kóʼóna* xa̱ʼa̱ ña̱ kúsi̱í-inina ta ndeéní xi̱tivina ndiki̱, trompeta ta saátu ndeéní xi̱sakáʼana címbalo, arpa xíʼin inkaka instrumento tú kúúmií yi̱ʼva̱.

29 Soo tá ni̱ki̱ʼvi arca ña̱ trato tú kúú kuenta Jehová chí Ñuu ta̱ David, ñá Mical se̱ʼe ta̱ Saúl xi̱kundichiñá xítoñá chí ventana. Tá nda̱kotoñá chí ni̱nu̱ ta xi̱niñá ña̱ ndáva ta̱ rey David ta tíxáʼara xa̱ʼa̱ ña̱ kúsi̱í-inira, ki̱xáʼañá sáa̱-iniñá xíniñára xa̱ʼa̱ ña̱yóʼo.