1 Crónicas

20 Tá xi̱kixáʼa ku̱i̱ya̱,* tá xi̱kee na̱ rey ña̱ va̱ʼa ku̱ʼu̱nna nu̱ú ku̱a̱chi, ta̱ Joab kúú ta̱ xi̱niʼi yichi̱ nu̱ú na̱ soldado tá ni̱xa̱ʼa̱nna nda̱kiʼinna ñuʼú na̱ ammonita; ta̱yóʼo ni̱xa̱ʼa̱nra ta xi̱koora sa̱tá ñuu Rabá, soo ta̱ David ki̱ndoora chí ñuu Jerusalén. Ta̱ Joab ka̱nitáʼanra xíʼin na̱ ndóo chí Rabá ta ku̱chiñura sa̱ndíʼi-xa̱ʼa̱ra ñuu kán. 2 Tasaá ta̱ David nda̱kiʼinra corona ña̱ xi̱núu xi̱ní ta̱ Malcam.* Ta ki̱ʼinra kuenta ña̱ 34 kilo* ve̱e ña̱ corona yóʼo ta ku̱vaʼaña xíʼin oro ta saátu xíʼin yu̱u̱ ña̱ liviní, ta chi̱núunaña xi̱ní ta̱ David. Ta nda̱kiʼintura ku̱a̱ʼání ña̱ʼa ña̱ ndáyáʼvi ñuu kán ku̱a̱ʼa̱n xíʼinra. 3 Ta saátu ta̱vára na̱ yiví ñuu kán ña̱ va̱ʼa kachíñuna ña̱ kaʼndana yu̱u̱, ña̱ kuniñúʼuna ña̱ʼa ña̱ ka̱a ña̱ xi̱ín* nu̱ú xíʼin yácha. Ña̱yóʼo kúú ña̱ ke̱ʼé ta̱ David xíʼin ndiʼi ñuu na̱ ammonita. Tándi̱ʼi, ta̱ David xíʼin na̱ soldadora ndi̱kóna chí ñuu Jerusalén.

4 Tándi̱ʼi ku̱u ña̱yóʼo, saá ki̱xáʼa tuku na̱ filisteo kánitáʼanna xíʼinna chí Guézer. Tasaá ta̱ Sibecái ta̱ husatita xa̱ʼníra ta̱ Sipái ta̱ xi̱kuu se̱ʼe na̱ refaím, ta na̱ ñuu Israel ku̱chiñuna ka̱nitáʼanna xíʼin na̱ filisteo.

5 Tuku ki̱xáʼana kánitáʼanna xíʼin na̱ filisteo, ta ta̱ Elhanán se̱ʼe ta̱ Jaír xa̱ʼníra ta̱ Lahmí ñani ta̱ Goliat ta̱ guitita ta̱ xi̱kuumií iin lanza ta yitu̱n xa̱ʼa̱ túyóʼo káʼnuní ni̱xi̱yonú nda̱a̱ táki̱ʼva káʼnu yitu̱n tú xíniñúʼuna ña̱ kúnuna.

6 Ta tuku ki̱xáʼa ku̱a̱chi chí Gat, nu̱ú ni̱xi̱yo iin ta̱a ta̱ káʼnuní, i̱ñu̱ xi̱kuu nu̱ú ndaʼa̱ra* ta i̱ñu̱ xi̱kuu nu̱ú xa̱ʼa̱ra ta ndiʼi ña̱yóʼo 24 xi̱kuuña. Ta saátu ta̱yóʼo xi̱kuura se̱ʼe na̱ refaím. 7 Ta xa̱ʼa̱ ña̱ kǒo nísandákoora ña̱ kusi̱kindaara na̱ ñuu Israel, ta̱ Jonatán se̱ʼe ta̱ Simeá ñani ta̱ David xa̱ʼnírara.

8 Na̱yóʼo xi̱kuuna se̱ʼe na̱ refaím na̱ xi̱ndoo chí Gat, ta ta̱ David xíʼin na̱ xi̱kachíñu nu̱úra kúú na̱ ku̱chiñu xa̱ʼní na̱yóʼo.