1 Crónicas

4 Na̱ se̱ʼe ta̱ Judá xi̱kuu ta̱ Pérez, ta̱ Hezrón, ta̱ Carmí, ta̱ Hur xíʼin ta̱ Sobal. 2 Ta̱ Reayá se̱ʼe ta̱ Sobal xi̱kuu yivá ta̱ Jáhat; ta̱ Jáhat xi̱kuu yivá ta̱ Ahumái xíʼin ta̱ Lahad. Na̱yóʼo xi̱kuu na̱ veʼe na̱ zoratita. 3 Ta na̱yóʼo xi̱kuu na̱ se̱ʼe yivá* ta̱ Etam: ta̱ Jezreel, ta̱ Ismá ta̱ Idbás (ta ku̱ʼva na̱yóʼo xi̱naníñá Hazelelponí); 4 ta̱ Penuel xi̱kuura yivá ta̱ Guedor ta ta̱ Ézer xi̱kuura yivá ta̱ Husá. Na̱yóʼo xi̱kuu na̱ se̱ʼe ta̱ Hur, ta̱ xi̱kuu se̱ʼenu̱ú ñá Efrata ta xi̱kuutura yivá na̱ xi̱ndoo chí Belén. 5 Ta̱ Asjur yivá na̱ xi̱ndoo chí Tecoa ni̱xi̱yo u̱vi̱ ná síʼira: ñá Helá xíʼin ñá Naará. 6 Na̱ se̱ʼe ñá Naará xi̱kuu ta̱ Ahuzam, ta̱ Héfer, ta̱ Temení xíʼin ta̱ Haahastarí. Na̱yóʼo xi̱kuu na̱ se̱ʼe ñá Naará. 7 Ta na̱ se̱ʼe ñá Helá xi̱kuu ta̱ Zéret, ta̱ Izhar xíʼin ta̱ Etnán. 8 Ta̱ Coz xi̱kuura yivá ta̱ Anub ta saátu ta̱ Zobebá xíʼin na̱ veʼe ta̱ Aharhel, ta̱ xi̱kuu se̱ʼe ta̱ Harum.

9 Ta̱ Jabez kúú ta̱ xi̱ ixato̱ʼóníkana nu̱ú na̱ ñanira; ña̱kán siʼíra chi̱naníñára Jabez,* saáchi ka̱chiñá: “Ni̱xo̱ʼvi̱níi̱* tá ka̱kura”. 10 Ta̱ Jabez ni̱ka̱ʼa̱nra ña̱yóʼo xíʼin Ndióxi̱ na̱ ñuu Israel: “Ixaún ña̱ ma̱ní taxiún bendición ndaʼíi̱ ta taxiún ña̱ ku̱a̱ʼáka ná koo ñuʼíi̱. Ixaún ña̱ ma̱ní, koún xíʼi̱n ta kundaún yi̱ʼi̱ nu̱ú tu̱ndóʼo ña̱ ná kixi nu̱úi̱ ña̱ va̱ʼa ná kǒo xo̱ʼvi̱i̱”. Ta Ndióxi̱ ta̱xivara ña̱ ndu̱kúra nu̱úra.

11 Ta̱ Kelub ñani ta̱ Suha xi̱kuura yivá ta̱ Mehir, ta̱yóʼo xi̱kuura yivá ta̱ Estón. 12 Ta̱ Estón xi̱kuura yivá ta̱ Bet-Rafá, ta̱ Paséah xíʼin ta̱ Tehiná, ta ta̱ Tehiná xi̱kuura yivá na̱ xi̱ndoo chí Ir-Nahás. Na̱yóʼo kúú na̱ xi̱ndoo chí Recá. 13 Na̱ se̱ʼe ta̱ Quenaz xi̱kuu ta̱ Otniel xíʼin ta̱ Seraya, ta se̱ʼe ta̱ Otniel xi̱kuu ta̱ Hatat. 14 Ta̱ Meonotái xi̱kuura yivá ta̱ Ofrá. Ta̱ Seraya xi̱kuura yivá ta̱ Joab, ta̱yóʼo xi̱kuura yivá na̱ xi̱ndoo chí Gue-Harasim,* saá xi̱kaʼa̱nna xíʼin ñuu kán chi kán xi̱ndoo na̱ xi̱xini̱ní keʼé ku̱a̱ʼá ña̱ʼa.

15 Na̱ se̱ʼe ta̱ Caleb se̱ʼe ta̱ Jefuné xi̱kuu ta̱ Iru, ta̱ Elá xíʼin ta̱ Naam; se̱ʼe ta̱ Elá xi̱kuu ta̱ Quenaz. 16 Na̱ se̱ʼe ta̱ Jehalelel xi̱kuu ta̱ Zif, ta̱ Zifá, ta̱ Tiría xíʼin ta̱ Asarel. 17 Na̱ se̱ʼe ta̱ Ezrá xi̱kuu ta̱ Jéter, ta̱ Méred, ta̱ Éfer xíʼin ta̱ Jalón; ñáyóʼo* sa̱kákuñá ta̱ Míriam, ta̱ Samái xíʼin ta̱ Isbá, ta̱yóʼo xi̱kuura yivá na̱ xi̱ndoo chí Estemoa. 18 (Ta ñá síʼira ñá judía sa̱kákuñá ta̱ Jéred, ta̱yóʼo xi̱kuura yivá ta̱ Guedor, se̱ʼetuñá xi̱kuu ta̱ Héber, ta̱yóʼo xi̱kuura yivá na̱ xi̱ndoo chí Socó, se̱ʼetuñá xi̱kuu ta̱ Jecutiel, ta̱yóʼo xi̱kuura yivá na̱ xi̱ndoo chí Zanóah). Na̱yóʼo xi̱kuu se̱ʼe ñá Bitías se̱ʼe ta̱ faraón, ñá ti̱ndaʼa̱ xíʼin ta̱ Méred.

19 Na̱ se̱ʼe ñá síʼi ta̱ Hodías, ku̱ʼva ta̱ Náham, xi̱kuu yivá ta̱ Queilá ta̱ garmita xíʼin ta̱ Estemoa ta̱ maacatita. 20 Ta na̱ se̱ʼe ta̱ Shimón xi̱kuu ta̱ Amnón, ta̱ Riná, ta̱ Ben-Hanán xíʼin ta̱ Tilón. Ta na̱ se̱ʼe ta̱ Isí xi̱kuu ta̱ Zóhet xíʼin ta̱ Ben-Zóhet.

21 Se̱ʼe ta̱ Judá xi̱kuu ta̱ Selá ta ta̱yóʼo xi̱kuura yivá ta̱ Er xíʼin ta̱ Laadá. Ta̱ Er xi̱kuura yivá ta̱ Lecá ta ta̱ Laadá xi̱kuura yivá ta̱ Maresá. Ta saátu na̱ se̱ʼe ta̱ Asbea na̱ xi̱ ixava̱ʼa ti̱ko̱to̱ ña̱ va̱ʼaní, xi̱kuuna na̱ veʼe ta̱ Selá. 22 Ta na̱ veʼetura xi̱kuu na̱yóʼo: ta̱ Joquim, na̱ xi̱ndoo chí Cozebá, ta̱ Joás xíʼin ta̱ Saraf, na̱yóʼo kúú na̱ ti̱ndaʼa̱ xíʼin ná moabita, táʼantura xi̱kuu ta̱ Jasubí-Léhem. Ña̱yóʼo xa̱a̱ yatání ni̱ka̱ʼyi̱ña. 23 Sava na̱yóʼo xi̱ ixava̱ʼana ña̱ʼa xíʼin nda̱ʼyi̱ ta xi̱ndoona chí Netaim xíʼin Guederá. Kán xi̱ndoona ta xi̱kachíñuna nu̱ú ta̱ rey.

24 Na̱ se̱ʼe ta̱ Simeón xi̱kuu ta̱ Nemuel, ta̱ Jamín, ta̱ Jarib, ta̱ Zérah xíʼin ta̱ Shaúl. 25 Ta̱ Shaúl xi̱kuura yivá ta̱ Salum, ta̱ Salum xi̱kuura yivá ta̱ Mibsam, ta̱ Mibsam xi̱kuura yivá ta̱ Mismá. 26 Ta̱ Mismá xi̱kuura yivá ta̱ Hamuel, ta̱ Hamuel xi̱kuura yivá ta̱ Zacur ta ta̱ Zacur xi̱kuura yivá ta̱ Simeí. 27 Ni̱xi̱yo 16 ta̱a xíʼin i̱ñu̱ ñaʼá se̱ʼe ta̱ Simeí; soo na̱ ñanira kǒo ku̱a̱ʼá se̱ʼena níxi̱yo, iinlá ta̱yóʼo kúú ta̱ ni̱xi̱yo ku̱a̱ʼání se̱ʼe nu̱ú ndiʼika na̱ ta̱a na̱ tribu ta̱ Judá. 28 Na̱yóʼo xi̱ndoona chí ñuu Beer-Seba, Moladá, Hazar-Sual, 29 Bilhá, Ézem, Tolad, 30 Betuel, Hormá, Ziclag, 31 Bet-Marcabot, Hazar-Susim, Bet-Birí xíʼin Saaraim. Ñuu yóʼo kúú nu̱ú xi̱ndoona nda̱a̱ tá ki̱xáʼa xáʼndachíñu ta̱ rey David.

32 Ñuuna xi̱kuu Etam, Ain, Rimón, Token xíʼin Asán, u̱ʼu̱n xi̱kuu ñuu yóʼo, 33 ta saátu ndiʼi ñuu válí ña̱ ni̱xi̱yo sa̱tá ñuu yóʼo iinsaá nda̱a̱ Baal. Na̱yóʼo xi̱kuu na̱ veʼena ta saátu ñuu nu̱ú xi̱ndoona. 34 Ta̱ Mesobab, ta̱ Jamlec, ta̱ Josá se̱ʼe ta̱ Amasías, 35 ta̱ Joel, ta̱ Jehú se̱ʼe ta̱ Josibías, se̱ʼe ta̱ Seraya, se̱ʼe ta̱ Asiel, 36 ta̱ Elioenái, ta̱ Jaacoba, ta̱ Jesohaya, ta̱ Asaya, ta̱ Adiel, ta̱ Jesimiel, ta̱ Benaya 37 xíʼin ta̱ Zizá se̱ʼe ta̱ Sifí, se̱ʼe ta̱ Alón, se̱ʼe ta̱ Jedayá, se̱ʼe ta̱ Simrí, se̱ʼe ta̱ Semaya; 38 na̱ va̱xi ki̱vi̱ yóʼo kúú na̱ xi̱niʼi yichi̱ nu̱ú na̱ veʼena, ta na̱ veʼe na̱ táʼanna na̱ xi̱ndoo xi̱naʼá ku̱a̱ʼáka ndu̱una. 39 Ta ke̱ena ku̱a̱ʼa̱nna chí Guedor, chí táʼví este* ña̱ yoso̱ yóʼo, ña̱ ndukúna ku̱ʼu̱ ña̱ kixáʼan* kití sa̱na̱na. 40 Ta kán xi̱nina ña̱ íyoní ku̱ʼu̱ ña̱ va̱ʼaní, ndíka̱ní ni̱xi̱yo ñuʼú kán ta táxi̱nní ni̱xi̱yo nu̱úña. Ta na̱ xi̱ndoo kán tá ya̱chi̱ xi̱kuu na̱ camita. 41 Sava na̱ va̱xi ki̱vi̱ yóʼo kúú na̱ ni̱xa̱ʼa̱n ka̱nitáʼan xíʼin na̱ camita ta saátu xíʼin na̱ meunim na̱ xi̱ndoo kán, ta sa̱ndíʼi-xa̱ʼa̱na veʼe válína tá tiempo ña̱ xi̱xaʼndachíñu ta̱ rey Ezequías ta̱ ñuu Judá. Xa̱ʼnína ndiʼina, ta kǒoka ni iinna ndóo kán nda̱a̱ ki̱vi̱ vitin;* ta miína nda̱kundoo kán saáchi ni̱xi̱yoní ku̱ʼu̱ ña̱ kixáʼan kití sa̱na̱na.

42 Ta 500 na̱ ta̱a na̱ xi̱kuu simeonita nda̱kiʼinna ku̱a̱ʼa̱nna chí yuku̱ Seír. Ta na̱ xi̱niʼi yichi̱ nu̱ú na̱yóʼo xi̱kuu ta̱ Pelatías, ta̱ Nearías, ta̱ Refayá xíʼin ta̱ Uziel, ta se̱ʼe ta̱ Isí xi̱kuu na̱yóʼo. 43 Ta xa̱ʼnína ndiʼi na̱ amalequita na̱ xi̱nu, ta kán nda̱kundoona nda̱a̱ ki̱vi̱ vitin.