1 Crónicas

5 Na̱yóʼo xi̱kuu na̱ se̱ʼe ta̱ Rubén, ta̱ xi̱kuu se̱ʼenu̱ú ta̱ Israel. Ta̱yóʼo xi̱kuu se̱ʼenu̱úra, soo xa̱ʼa̱ ña̱ ni̱ki̱si̱ra xíʼin ñá ni̱xi̱yo xíʼin yivára,* na̱ se̱ʼe ta̱ José kúú na̱ nda̱kiʼin derecho ña̱ xi̱kuumií ta̱ Rubén xa̱ʼa̱ ña̱ xi̱kuura se̱ʼenu̱ú ta̱ Israel. Xa̱ʼa̱ ña̱kán nu̱ú va̱xi ki̱vi̱ ndiʼina va̱ása káʼa̱nña xa̱ʼa̱ra ña̱ kúúra se̱ʼenu̱ú ta̱ Israel. 2 Ni ta̱ káʼnuka xi̱kuu ta̱ Judá nu̱ú na̱ ñanira, ta ti̱xin veʼe ta̱yóʼo ki̱xi ta̱ kuniʼi yichi̱ nu̱úna, soo ta̱ José kúú ta̱ nda̱kiʼin derecho ña̱ xi̱ndakiʼin na̱ kúú se̱ʼenu̱ú. 3 Na̱ se̱ʼe ta̱ Rubén ta̱ xi̱kuu se̱ʼenu̱ú ta̱ Israel, xi̱kuu ta̱ Hanok, ta̱ Palú, ta̱ Hezrón xíʼin ta̱ Carmí. 4 Na̱ se̱ʼe ta̱ Joel xi̱kuu ta̱ Semaya, ta̱ Gog, ta̱ Simeí, 5 ta̱ Miqueas, ta̱ Reayá, ta̱ Baal 6 xíʼin ta̱ Beerá,* ta̱yóʼo kúú ta̱ nda̱kiʼin ta̱ rey Tilgat-Pilnéser ta̱ ñuu Asiria ku̱a̱ʼa̱n xíʼinra; ta̱yóʼo kúú ta̱ xi̱niʼi yichi̱ nu̱ú na̱ rubenita. 7 Ta nda̱a̱ táki̱ʼva ni̱ka̱ʼyi̱ña nu̱ú va̱xi ki̱vi̱ na̱ veʼera, ñanira xi̱kuu ta̱ Jeiel (ta̱ xi̱niʼi yichi̱ nu̱úna), ta̱ Zacarías 8 xíʼin ta̱ Bela se̱ʼe ta̱ Azaz, se̱ʼe ta̱ Sema, se̱ʼe ta̱ Joel, ta̱ ni̱xi̱yo chí nu̱ú ñuʼú ña̱ íyo chí Aroer iinsaá nda̱a̱ Nebo xíʼin Baal-Meón. 9 Ta chí táʼví este,* ni̱xa̱a̱na xi̱kundoona chí nu̱ú ñuʼú ña̱ íyo chí nu̱ú kíxáʼa ñuʼú yi̱chí ña̱ íyo yatin yu̱ta Éufrates, saáchi tá xi̱ndoona chí Galaad ku̱a̱ʼání ndu̱u kití sa̱na̱na. 10 Tá tiempo ña̱ ni̱xi̱yo ta̱ Saúl, na̱yóʼo ka̱nitáʼanna xíʼin na̱ hagrita ta ku̱chiñuvana xíʼinna, ta nda̱kiʼinna veʼe válí ña̱ xi̱kuumiína ña̱ ni̱xi̱yo iníí nu̱ú ñuʼú ña̱ ni̱xi̱yo chí táʼví este ña̱ Galaad.

11 Na̱ se̱ʼe ta̱ Gad xi̱ndoona chí inka táʼví nu̱ú xi̱ndoo na̱yóʼo, chí nu̱ú ñuʼú ña̱ íyo chí Basán iinsaá nda̱a̱ Salecá. 12 Ta chí Basán, ta̱ Joel kúú ta̱ xi̱niʼi yichi̱ nu̱úna, ta̱ Safam xi̱kuu ta̱ u̱vi̱, ta chiñu yóʼotu xi̱kuumií ta̱ Janái xíʼin ta̱ Safat. 13 Ta táʼantuna xi̱kuu ta̱ Miguel, ta̱ Mesulam, ta̱ Seba, ta̱ Jorái, ta̱ Jacán, ta̱ Zía xíʼin ta̱ Éber, u̱xa̱ xi̱kuu na̱yóʼo. 14 Na̱yóʼo xi̱kuu se̱ʼe ta̱ Abihail, se̱ʼe ta̱ Hurí, se̱ʼe ta̱ Jaróah, se̱ʼe ta̱ Galaad, se̱ʼe ta̱ Miguel, se̱ʼe ta̱ Jesisái, se̱ʼe ta̱ Jahdó, se̱ʼe ta̱ Buz. 15 Ta̱ xi̱niʼi yichi̱ nu̱ú na̱ veʼe na̱yóʼo xi̱kuu ta̱ Ahí, se̱ʼe ta̱ Abdiel, se̱ʼe ta̱ Guní. 16 Na̱yóʼo xi̱ndoona chí Galaad xíʼin Basán ta saátu ñuu ña̱ ni̱xi̱yo yatin kán, ta kuentatuna xi̱kuu ndiʼi ñuʼú nu̱ú ni̱xi̱yo ku̱ʼu̱ ña̱ xi̱kindo̱o chí Sarón, iinsaá nda̱a̱ nu̱ú xi̱ndiʼi ñuʼú yóʼo. 17 Ndiʼi na̱yóʼo ni̱ka̱ʼyi̱ ki̱vi̱na nu̱ú va̱xi ña̱ káʼa̱n ndáana kúú na̱ veʼena, tá tiempo ña̱ ni̱xi̱yo ta̱ Jotán ta̱ rey ñuu Judá ta saátu tá tiempo ña̱ ni̱xi̱yo ta̱ Jeroboán* ta̱ rey ñuu Israel.

18 Na̱ rubenita, na̱ gadita xíʼin iin táʼví na̱ tribu ta̱ Manasés xi̱kuumiína 44,760 ta̱a na̱ ndakúní ta xi̱xini̱nína kanitáʼanna, na̱yóʼo xi̱kuumiína escudo, espada xíʼin kuxu̱n;* ta ndiʼi na̱yóʼo na̱ xa̱a̱ xi̱xini̱ ku̱ʼu̱n nu̱ú ku̱a̱chi xi̱kuuna. 19 Ka̱nitáʼanna xíʼin na̱ hagrita, na̱ tribu ta̱ Jetur, na̱ tribu ta̱ Nafís xíʼin na̱ tribu ta̱ Nodab. 20 Ta ni̱ka̱ʼa̱nna xíʼin Ndióxi̱ ña̱ ná chindeétáʼanra xíʼinna ña̱ kuchiñuna kanitáʼanna nu̱ú ku̱a̱chi, ta chi̱ndeétáʼanvara xíʼinna chi xi̱ndaa-ininara. Xa̱ʼa̱ ña̱kán ku̱chiñuvana ka̱nitáʼanna xíʼin na̱ hagrita ta saátu xíʼin ndiʼika na̱ xi̱kitáʼan xíʼinna. 21 Nda̱kiʼinna ndiʼi kití sa̱na̱ na̱yóʼo: nda̱kiʼinna 50,000 camello, 250,000 ndikachi* xíʼin 2,000 burro ta saátu nda̱kiʼinna 100,000 na̱ yiví. 22 Ku̱a̱ʼání na̱ yiví ni̱xi̱ʼi̱, saáchi mií Ndióxi̱ ta̱ nda̱a̱ kúú ta̱ ka̱nitáʼan xíʼinna. Ta xi̱ndoona nu̱ú ñuʼú na̱ yiví kán nda̱a̱ tá nda̱kiʼinnana ku̱a̱ʼa̱n xíʼinna inka ñuu.

23 Na̱ se̱ʼe iin táʼví na̱ tribu ta̱ Manasés xi̱ndoona nu̱ú ñuʼú ña̱ ni̱xi̱yo chí Basán iinsaá nda̱a̱ Baal-Hermón, Senir xíʼin yuku̱ Hermón. Ku̱a̱ʼání xi̱kuu na̱yóʼo. 24 Na̱yóʼo kúú na̱ xi̱niʼi yichi̱ nu̱ú na̱ veʼena: ta̱ Éfer, ta̱ Isí, ta̱ Eliel, ta̱ Azriel, ta̱ Jeremías, ta̱ Hodavías xíʼin ta̱ Jahdiel; na̱yóʼo xi̱kuuna ta̱a na̱ ndakúní ta xi̱xini̱nína kanitáʼanna, ku̱a̱ʼánína xi̱xini̱ñaʼá ta mií na̱yóʼo kúú na̱ xi̱niʼi yichi̱ nu̱ú na̱ veʼena. 25 Soo va̱ása nda̱kú níxi̱yo inina xíʼin Ndióxi̱ na̱ táʼanna na̱ xi̱ndoo xi̱naʼá ta nda̱sakáʼnuna ndióxi̱ na̱ ñuu na̱ xi̱ndoo kán,* na̱ xa̱a̱ sa̱ndíʼi-xa̱ʼa̱ Ndióxi̱ ta̱ nda̱a̱ ña̱ va̱ʼa ndakiʼinna ñuʼúna. 26 Xa̱ʼa̱ ña̱kán, Ndióxi̱ na̱ ñuu Israel xi̱niñúʼura ta̱ rey Pul ta̱ ñuu Asiria (ta̱yóʼo xi̱kuu ta̱ rey Tilgat-Pilnéser ta̱ ñuu Asiria) ña̱ nda̱kiʼinra na̱ rubenita, na̱ gadita xíʼin iin táʼví na̱ tribu ta̱ Manasés ku̱a̱ʼa̱n xíʼinra, ta chi̱ndaʼárana ku̱a̱ʼa̱nna kundoona chí Halá, Habor, Hará xíʼin yatin yu̱ta Gozán, ta kán ndóona nda̱a̱ ki̱vi̱ vitin.*