Job

1 Chí ñuu Uz ni̱xi̱yo iin ta̱a ta̱ xi̱naní Job.* Ta̱yóʼo xi̱kuura iin ta̱a ta̱ kǒo ku̱a̱chi níxi̱kiʼvi ta xi̱keʼéra ña̱ nda̱kú, xi̱ ixato̱ʼóra Ndióxi̱ ta kǒo níxi̱keʼéra nda̱a̱ ni iin ña̱ va̱ása va̱ʼa. 2 Ni̱xi̱yo u̱xa̱ se̱ʼeta̱ara ta saátu u̱ni̱ se̱ʼe-síʼira. 3 Ndiʼi kití tí xi̱kuumiíra xi̱kuurí: 7,000 ndikachi,* 3,000 camello, 1,000 si̱ndi̱ki̱ ta saátu 500 burro;* saátu ni̱xi̱yo ku̱a̱ʼání na̱ xi̱kachíñu nu̱úra. Ña̱kán ndu̱ura iin ta̱a ta̱ ndáyáʼvika nu̱ú ndiʼika na̱ xi̱ndoo chí oriente.

4 Na̱ se̱ʼeta̱ara xi̱keʼéna vikó veʼena, ni̱xi̱yo ki̱vi̱ ña̱ xi̱keʼé iin tá iinna vikó yóʼo, xi̱kanana u̱ni̱ saá ná ku̱ʼvana ña̱ va̱ʼa kuxuná ta koʼoná vino xíʼinna. 5 Tá xi̱sandíʼi ndiʼina ña̱ keʼéna vikó yóʼo, ta̱ Job xi̱kanara na̱ se̱ʼera ña̱ va̱ʼa ndasandiirana* nu̱ú Ndióxi̱. Xi̱ta̱a̱nní* xi̱ndako̱ora ta xi̱xaʼmira kití* ña̱ va̱ʼa so̱kórarí* xa̱ʼa̱ iin tá iin na̱yóʼo, chi xi̱kachira: “Sana ni̱ki̱ʼvi na̱ se̱ʼi̱ ku̱a̱chi ta sa̱kúisochiʼñana* Ndióxi̱ xíʼin ña̱ ndákanixi̱nína”. Ña̱yóʼo kúú ña̱ xi̱keʼé ta̱ Job ndiʼi tiempo.

6 Ki̱xaa̱ ki̱vi̱ ña̱ ki̱ʼvi na̱ ángel* nu̱ú Jehová ña̱ va̱ʼa natúʼun-táʼanna xíʼinra ta saátu ni̱ki̱ʼvi ta̱ Ndi̱va̱ʼa xíʼin na̱yóʼo.

7 Tasaá, Jehová ni̱nda̱ka̱tu̱ʼunra ta̱ Ndi̱va̱ʼa: “¿Míí ni̱xa̱ʼún?”. Ta nda̱kuiin ta̱ Ndi̱va̱ʼa yuʼú Jehová: “Iníí nu̱ú ñuʼú ni̱xa̱ʼi̱n xi̱toi̱”. 8 Ta ni̱ka̱ʼa̱n Jehová xíʼin ta̱ Ndi̱va̱ʼa: “¿Á xa̱a̱ xi̱niún ndáaña kéʼé ta̱ Job ta̱ káchíñu nu̱úi̱? Kǒo nda̱a̱ ni iinna íyo nda̱a̱ táki̱ʼva íyo ta̱yóʼo nu̱ú ñuʼú. Kǒo ku̱a̱chi kíʼvira ta kéʼéra ña̱ nda̱kú, íxato̱ʼóra Ndióxi̱ ta kǒo kéʼéra nda̱a̱ ni iin ña̱ va̱ása va̱ʼa”. 9 Tasaá nda̱kuiin ta̱ Ndi̱va̱ʼa yuʼú Jehová ta ka̱chira: “¿Á ixato̱ʼó ta̱ Job yóʼó tá kǒo ña̱ʼa táxiún ndaʼa̱ra? 10 ¿Á su̱ví yóʼó kúú ta̱ ndáa ta̱yóʼo, na̱ veʼera ta saátu ndiʼi ña̱ kúúmiíra? Táxiún bendición ndaʼa̱ra ña̱ va̱ʼa vií kana ndiʼi chiñu ña̱ kéʼéra ta táxiún ña̱ ku̱a̱ʼání ná nduu kití sa̱na̱ra. 11 Soo sandákaa̱ ndaʼún ta kindaa ndiʼi ña̱ kúúmiíra, ta kuni nu̱ún ña̱ sakúisochiʼñavara yóʼó”. 12 Tasaá ni̱ka̱ʼa̱n Jehová xíʼin ta̱ Ndi̱va̱ʼa: “Koto, miíún xíni̱ ndáaña keʼún xíʼin ndiʼi ña̱ʼa ña̱ kúúmiíra, soo va̱ása keʼún nda̱a̱ ni iin ña̱ʼa xíʼin miíra”. Tasaá ki̱ta ta̱ Ndi̱va̱ʼa nu̱ú Jehová ta ku̱a̱ʼa̱nra.

13 Tá ni̱ya̱ʼa loʼo, iin ki̱vi̱ tá xíxi na̱ se̱ʼeta̱ara xíʼin ná se̱ʼe-síʼira ta saátu xíʼina vino veʼe se̱ʼera ta̱ nu̱ú, 14 ni̱xa̱a̱ iin ta̱ káchíñu nu̱ú ta̱ Job ta ni̱ka̱ʼa̱nra xíʼinra: “Tá táʼví si̱ndi̱ki̱ nu̱ú ñuʼú ta yatin kán ñúʼu burro xíxáʼanrí,* 15 ki̱xaa̱ na̱ sabeo, ka̱nitáʼanna xíʼinndi̱ ta nda̱kiʼinna kití yóʼo ku̱a̱ʼa̱n xíʼinna, ta xa̱ʼnína na̱ káchíñu nu̱ún xíʼin espada. Iinlá yi̱ʼi̱ kúú ta̱ ni̱ka̱ku, ña̱kán ki̱xai̱ yóʼo ña̱ va̱ʼa natúʼi̱n xíʼún xa̱ʼa̱ ña̱ ku̱u”.

16 Tá káʼa̱nka ta̱yóʼo, ki̱xaa̱ inkara ta ka̱chira: “Chí ndiví sa̱kóyo Ndióxi̱ ñuʼu̱* ta xa̱ʼmiña ndikachi xíʼin na̱ káchíñu nu̱ún. Iinlá yi̱ʼi̱ kúú ta̱ ni̱ka̱ku, ña̱kán ki̱xai̱ yóʼo ña̱ va̱ʼa natúʼi̱n xíʼún xa̱ʼa̱ ña̱ ku̱u”.

17 Tá káʼa̱nka ta̱yóʼo, ki̱xaa̱ inkara ta ka̱chira: “U̱ni̱ nda̱taʼví na̱ caldeo, ti̱inna tí camello ta nda̱kiʼinnarí ku̱a̱ʼa̱n xíʼinna; saátu xa̱ʼnína na̱ káchíñu nu̱ún xíʼin espada. Iinlá yi̱ʼi̱ kúú ta̱ ni̱ka̱ku, ña̱kán ki̱xai̱ yóʼo ña̱ va̱ʼa natúʼi̱n xíʼún xa̱ʼa̱ ña̱ ku̱u”.

18 Tá káʼa̱nka ta̱yóʼo, ki̱xaa̱ inkara ta ka̱chira: “Tá ndóo na̱ se̱ʼeta̱ún xíʼin ná se̱ʼe-síʼún xíxina ta xíʼina vino veʼe se̱ʼún ta̱ nu̱ú. 19 Iin kama ndeéní ka̱ni ta̱chí ña̱ ki̱xi chí nu̱ú ñuʼú yi̱chí ta sa̱ndúvaña veʼe sa̱tá na̱ se̱ʼún ta ni̱xi̱ʼi̱na. Iinlá yi̱ʼi̱ kúú ta̱ ni̱ka̱ku, ña̱kán ki̱xai̱ yóʼo ña̱ va̱ʼa natúʼi̱n xíʼún xa̱ʼa̱ ña̱ ku̱u”.

20 Xa̱ʼa̱ ña̱yóʼo nda̱kundichi ta̱ Job, nda̱tára ti̱ko̱to̱ra ta xa̱ʼndara ixí* xi̱níra; ku̱xítíra ta nda̱kundeera* nu̱ú ñuʼú 21 ta ka̱chira:

Jehová kúú ta̱ ta̱xiña ndaʼíi̱, ta Jehová kúú ta̱ ki̱ndaaña.

Ná ndukáʼnuka ki̱vi̱ Jehová”.

22 Ni ndo̱ʼo ta̱ Job ndiʼi ña̱yóʼo kǒo níki̱ʼvira ku̱a̱chi, ta va̱ása níchikaa̱ra ku̱a̱chi Ndióxi̱ ña̱ kéʼéra ña̱ va̱ása va̱ʼa.