Job
2 Tándi̱ʼi, ki̱xaa̱ ki̱vi̱ ña̱ ki̱ʼvi na̱ ángel* nu̱ú Jehová ña̱ va̱ʼa natúʼun-táʼanna xíʼinra ta saátu ni̱ki̱ʼvi ta̱ Ndi̱va̱ʼa xíʼin na̱yóʼo nu̱ú Jehová.
2 Tasaá Jehová ni̱nda̱ka̱tu̱ʼunra ta̱ Ndi̱va̱ʼa: “¿Míí ni̱xa̱ʼún?”. Ta nda̱kuiin ta̱ Ndi̱va̱ʼa yuʼú Jehová: “Iníí nu̱ú ñuʼú ni̱xa̱ʼi̱n xi̱toi̱”. 3 Ta ni̱ka̱ʼa̱n Jehová xíʼin ta̱ Ndi̱va̱ʼa: “¿Á xa̱a̱ xi̱niún ndáaña kéʼé ta̱ Job ta̱ káchíñu nu̱úi̱? Kǒo nda̱a̱ ni iinna íyo nda̱a̱ táki̱ʼva íyo ta̱yóʼo nu̱ú ñuʼú. Kǒo ku̱a̱chi kíʼvira ta kéʼéra ña̱ nda̱kú, íxato̱ʼóra Ndióxi̱ ta kǒo kéʼéra nda̱a̱ ni iin ña̱ va̱ása va̱ʼa. Soo yóʼó kúni̱ún sandíʼi-xa̱ʼíi̱ra ni kǒo ña̱ níkeʼéra, soo nda̱kúkava íyo ini ta̱yóʼo xíʼi̱n”. 4 Ta nda̱kuiin ta̱ Ndi̱va̱ʼa yuʼú Jehová: “Tá xa̱a̱ ku̱nu̱mí kuvi iin na̱ yiví, taxina ndiʼi ña̱ kúúmiína ña̱ va̱ʼa ka̱kuna. 5 Ña̱kán tá ná sandáka̱ún ndaʼún ta ná taxiún ña̱ kiʼinra kue̱ʼe̱, saá kuni nu̱ún ña̱ sakúisochiʼñavara* yóʼó”.
6 Tasaá ni̱ka̱ʼa̱n Jehová xíʼin ta̱ Ndi̱va̱ʼa: “Koto, miíún xíni̱ ndáaña keʼún xíʼinra. Soo va̱ása kaʼníúnra”. 7 Tasaá ki̱ta ta̱ Ndi̱va̱ʼa nu̱ú Jehová ta ku̱a̱ʼa̱nra, ta ta̱xi ta̱ Ndi̱va̱ʼa ná kana ndi̱ʼi náʼnu ña̱ táʼyi ñii̱ ta̱ Job, ka̱naña xa̱ʼa̱ra iinsaá nda̱a̱ xa̱ʼñura. 8 Tasaá xi̱koo* ta̱ Job nu̱ú ya̱a̱ ta ki̱ʼinra iin táʼví ki̱si ña̱ ni̱ta̱ʼví ña̱ ñiʼira* ñii̱ra.
9 Tándi̱ʼi, ñá síʼira ni̱ka̱ʼa̱nñá xíʼinra: “¿Nda̱chun nda̱kúka íyo iniún xíʼin Ndióxi̱? Va̱ʼaka sakúisochiʼña Ndióxi̱ tasaá kuviún”. 10 Soo ta̱yóʼo nda̱kuiinra yuʼúñá: “Ni va̱ása loʼo ndákanixi̱níún xíʼin ña̱ káʼún. Tá ndákiʼinyó ña̱ va̱ʼa ña̱ táxi Ndióxi̱ ndaʼa̱yó, ¿á va̱ása ndakiʼintuyó ña̱ va̱ása va̱ʼa táxira ndaʼa̱yó?”. Soo ni saá, kǒo níka̱ʼa̱n ta̱ Job nda̱a̱ ni iin ña̱ va̱ása va̱ʼa.
11 Tasaá ta̱ Elifaz ta̱ temanita, ta̱ Bildad ta̱ suhita xíʼin ta̱ Zofar ta̱ naamatita na̱ xi̱kuu migo ta̱ Job, ku̱ndaa̱-inina xa̱ʼa̱ tu̱ndóʼo ña̱ ndo̱ʼora, ña̱kán iin tá iinna ke̱ena chí ñuu nu̱ú xi̱ndoona ta chi̱kaa̱-inina ña̱ kutáʼanna ku̱ʼu̱nna kotona ta̱ Job ta sandíkona-inira. 12 Tá xíkáka va̱xina, xi̱ninara soo va̱ása níndakuninara. Tasaá ki̱xáʼana xáku kóʼóna, nda̱tána ti̱ko̱to̱na ta chi̱kaa̱na ya̱a̱ xi̱nína. 13 Xi̱ndoona xíʼinra nu̱ú ñuʼú u̱xa̱ ki̱vi̱ xíʼin u̱xa̱ ñuú. Nda̱a̱ ni iin na̱yóʼo va̱ása níka̱ʼa̱nna nda̱a̱ ni iin ña̱ʼa xíʼinra saáchi xi̱xitona ña̱ ndeéní xi̱xoʼvi̱ra.*