Job
17 ”Kǒoka ndeíi̱ ta xa̱a̱ ku̱nu̱mí kuvii̱,
xa̱a̱ íyo tu̱ʼva iin ya̱vi̱ nu̱ú ndu̱xu̱i̱n.
2 Na̱ kúsi̱kindaa yi̱ʼi̱, ni̱ka̱va̱nduuna yi̱ʼi̱
ta xítoi̱ ña̱ va̱ása va̱ʼa kéʼéna.
3 Ixaún ña̱ ma̱ní, chinaʼá* ña̱ chindeétáʼún xíʼi̱n.
Chi kǒo inkaka na̱ chindeétáʼan xíʼi̱n.
4 Saáchi chi̱se̱ʼún ña̱ ndíchi nu̱ú na̱ ta̱a yóʼó.
Xa̱ʼa̱ ña̱kán kúú ña̱ va̱ása táxiún ña̱ ixato̱ʼónana.
5 Sana kúni̱ iin na̱ yiví taxina loʼo ña̱ kúúmiína ndaʼa̱ na̱ kítáʼan xíʼinna,
soo na̱ se̱ʼena va̱ása kívi koto káxina chi xíʼi̱na so̱ko.
7 Nda̱a̱ ku̱naa nduchúnu̱úi̱ xa̱ʼa̱ ña̱ ndíʼi̱ní-inii̱
ta ku̱leke ndaʼíi̱ xíʼin xa̱ʼíi̱.
8 Ndákanda̱ní-ini* na̱ yiví na̱ kéʼé ña̱ nda̱kú tá xítona ña̱yóʼo,
ta iin ku̱a̱ʼa̱n-ini na̱ kǒo ku̱a̱chi kúúmií xa̱ʼa̱ ña̱ kéʼé na̱ ndi̱va̱ʼa-ini.
9 Na̱ kéʼé ña̱ nda̱kú, kǒo sándakoona keʼéna ña̱yóʼo
ta na̱ kǒo ku̱a̱chi kúúmií, chíkaa̱na ndee̱ ña̱ keʼéna ña̱ va̱ʼa.
10 Soo naʼa ndiʼi ndóʼó ta ka̱ʼa̱nkandó,
saáchi nda̱a̱ vitin, nda̱a̱ ni iin ndóʼó ta̱ʼán ka̱ʼa̱nndó ña̱ʼa ña̱ ndíchi.
11 Ndáa si̱lóʼo ki̱vi̱ tákui̱;
ña̱ kúni̱i̱ keʼíi̱ á ña̱ nda̱kani-inii̱ keʼíi̱, ndi̱ʼi-xa̱ʼa̱vaña.
12 Na̱ kítáʼan xíʼi̱n káʼa̱nna ña̱ vatá* nu̱úka ña̱ ka̱ʼa̱nna ña̱ nda̱a̱;
na̱yóʼo káchina: ‘Sana xa̱a̱ ndaye̱ʼe̱va chi naaní’.
13 Tá ná ya̱ʼa loʼoka tiempo, Ya̱vi̱* nu̱ú ñúʼu na̱ ni̱xi̱ʼi̱ kooña nda̱a̱ táki̱ʼva íyo veʼi̱;
kán ku̱su̱i̱n nu̱ú naa.
14 Ndeéní ka̱ʼi̱n ña̱yóʼo xíʼin ya̱vi̱ nu̱ú ñúʼu na̱ ni̱xi̱ʼi̱: ‘Yóʼó kúú yivái̱’.
Xíʼin ti̱kuxí* ka̱ʼi̱n ña̱yóʼo: ‘Ndóʼó kúú siʼíi̱ xíʼin ku̱ʼvai̱’.
15 Kǒo miíví ña̱ ndátui̱ ndakiʼii̱n.
¿Ndáana kivi ka̱ʼa̱n xíʼi̱n ña̱ si̱íní kutakui̱?