Job
16 Ta̱ Job nda̱kuiinra ta ni̱ka̱ʼa̱nra ña̱yóʼo:
2 “Xa̱a̱ xi̱niso̱ʼi̱ ku̱a̱ʼání tu̱ʼun táʼan ña̱yóʼo.
Nu̱úka ña̱ sandíkondó-inii̱, na̱ sáxo̱ʼvi̱kava kúúndó yi̱ʼi̱.*
3 Elifaz, ¿amaví sandákoún ka̱ʼún tu̱ʼun ña̱ va̱ása ndáyáʼvi?,
¿nda̱chun kúú ña̱ káʼún saá xíʼi̱n?
4 Kivitu ka̱ʼa̱n yi̱ʼi̱ nda̱a̱ táki̱ʼva káʼa̱n ndóʼó.
Tá níndoʼondó nda̱a̱ táki̱ʼva ndóʼo yi̱ʼi̱,
kiviva ka̱ʼi̱n ña̱ va̱ása va̱ʼa xa̱ʼa̱ndó,
ta nda̱a̱ sakúikói̱ xi̱níi̱* ña̱ na̱ʼi̱ ña̱ kúndasíi̱ ndóʼó.
5 Soo va̱ása keʼévíi̱ ña̱yóʼo; chi ña̱ keʼíi̱ kúú ña̱ chikai̱ ndee̱ xíʼinndó xíʼin tu̱ʼun ña̱ ka̱ʼi̱n,
ta tu̱ʼun ña̱ ka̱ʼi̱n xíʼinndó sandíkoña-inindó.
6 Ni ná ka̱ʼi̱n, xo̱ʼvi̱kavai̱,
ta ni ná va̱ása ka̱ʼi̱n, va̱ása ndiʼiví ña̱ sáxo̱ʼvi̱ yi̱ʼi̱.
7 Soo vitin, sa̱kúnaa Ndióxi̱ yi̱ʼi̱;
sa̱ndíʼi-xa̱ʼa̱ra ndiʼi na̱ se̱ʼi̱ ta saátu na̱ xi̱kachíñu nu̱úi̱.
8 Xíto na̱ yiví ña̱ xóʼvi̱i̱ ndíka̱i̱ ndaʼa̱ra,*
ku̱lekeníi̱ ta na̱ yiví ndákanixi̱nína ña̱ yi̱ʼi̱ kúú ta̱ kúúmiíi̱ ku̱a̱chi.
9 Xa̱ʼa̱ ña̱ sáa̱níra xíʼi̱n nda̱a̱ táki̱ʼva íyo ta̱ sa̱kúachi va̱lí yi̱ʼi̱ saá íyora,
ta sáa̱ní-inira xínira yi̱ʼi̱;
tá xítora yi̱ʼi̱ nda̱a̱ ndákaxí nu̱ʼura.
Na̱ sáa̱-ini xíni yi̱ʼi̱, kue̱ʼe̱ní xítona nu̱úi̱ ta kúni̱na saxóʼvi̱na yi̱ʼi̱.
10 Na̱ yiví kúsi̱kindaana yi̱ʼi̱,
kánina xa̱ʼnda̱ nu̱úi̱ ta sákukaʼanna nu̱úi̱;
ku̱a̱ʼánína ndátaka nu̱úi̱ ña̱ keʼéna ña̱ va̱ása va̱ʼa xíʼi̱n.
11 Ndióxi̱ táxira ña̱ kánitáʼan ta̱ va̱lí xíʼi̱n,
ta táxira ña̱ ixandi̱va̱ʼa na̱ ndi̱va̱ʼa-ini xíʼi̱n.
12 Kǒoví tu̱ndóʼo níxi̱yo nu̱úi̱ soo iin kama ta̱xira ku̱a̱ʼání tu̱ndóʼo ndaʼíi̱;
nda̱a̱ táki̱ʼva ke̱ʼé ta̱ iin kama ti̱in si̱kíi̱* saá ke̱ʼéra ta ka̱tavira yi̱ʼi̱ nu̱ú ñuʼú,
iinlá xíʼin yi̱ʼi̱ sáa̱níra.
13 Nda̱a̱ táki̱ʼva íyo ta̱ ni̱ka̱va̱nduu na̱ kíni kuxu̱n* saá íyoi̱;
va̱ása kúndáʼvi-inira xínira yi̱ʼi̱ ta flechara ka̱annú nda̱a̱ nu̱ú ñúʼu nduchu̱ inii̱,
ta nda̱a̱ nu̱ú ñuʼú ni̱xi̱ta nduta̱ tá ñúʼu ini ka̱va̱i̱.
14 Íyoi̱ nda̱a̱ táki̱ʼva íyo iin nama̱ ña̱ tuku ta tuku táʼvíra;
xínura va̱xira kanitáʼanra xíʼi̱n nda̱a̱ táki̱ʼva kéʼé iin ta̱ xíni̱ní kanitáʼan.
16 Nda̱a̱ ku̱kúáʼa nu̱úi̱ xa̱ʼa̱ ña̱ xákuníi̱,
ta nda̱nañu nduchúnu̱úi̱ xa̱ʼa̱ ña̱ xákuníi̱,
17 ni ta̱ʼán keʼíi̱ ña̱ va̱ása va̱ʼa xíʼin nda̱a̱ ni iinna,
ta xíʼin ndinuʼu-inii̱ káʼi̱n xíʼin Ndióxi̱.
18 Yóʼó ñuʼú, va̱ása chise̱ʼún ni̱íi̱.
Ta nda̱a̱ táki̱ʼva ná koo ña̱ kuaku xa̱ʼíi̱ saá koún.
19 Íyo iinna chí ndiví na̱ kivi ka̱ʼa̱n xa̱ʼíi̱ ña̱ kǒo ku̱a̱chi kúúmiíi̱,
íyo iinna chí ndiví na̱ kivi ndakiʼin tu̱ʼi̱n.
20 Na̱ xi̱kitáʼan xíʼi̱n kúsi̱kindaana yi̱ʼi̱
nani xákui̱ nu̱ú Ndióxi̱.
21 Ná koo iin na̱ ka̱ʼa̱n va̱ʼa xa̱ʼíi̱ nu̱ú Ndióxi̱,
nda̱a̱ táki̱ʼva kéʼé iin na̱ yiví tá káʼa̱n va̱ʼana xa̱ʼa̱ na̱ kítáʼan xíʼinna nu̱ú inkana.
22 Saáchi si̱lóʼo kuití ku̱i̱ya̱ kíndo̱o nu̱úi̱,
tasaá ku̱ʼi̱n ta va̱ása ndikókai̱.