Job
24 ”¿Nda̱chun va̱ása chíndúʼú Ndióxi̱ ta̱ kúúmií ndiʼi ndee̱ iin ki̱vi̱ ña̱ ndatiinra ku̱a̱chi?
¿Nda̱chun va̱ása kúnda̱a̱-ini na̱ xíni̱ñaʼá xa̱ʼa̱ ki̱vi̱ kán?*
2 Na̱ yiví sáka̱nda̱na ña̱ʼa ña̱ ndíta xáʼñu* ñuʼú inkana;
íxakuíʼnána ndikachi* ta ndáchitáʼannarí xíʼin kití sa̱na̱ miína.
3 Íxakuíʼnána burro sa̱na̱ na̱ ni̱xi̱ʼi̱ yivá.
Ta ndákiʼinna si̱ndi̱ki̱ sa̱na̱ ñá ni̱xi̱ʼi̱ yi̱i̱, xa̱ʼa̱ ña̱ ta̱xitóona* iin ña̱ʼa ndaʼa̱ñá.
4 Ni va̱ása táxina ña̱ kaka na̱ nda̱ʼví yichi̱;
íxandúxana xíʼinna ña̱ kununa xa̱ʼa̱ ña̱ yíʼvina.
5 Nda̱a̱ táki̱ʼva kéʼé burro yukú tí íyo chí nu̱ú ñuʼú yi̱chí
saá kéʼé na̱ nda̱ʼví tá xíkana ndúkúna ña̱ kuxuna;
xíkana chí nu̱ú ñuʼú yi̱chí ña̱ ndukúna ña̱ kuxu na̱ va̱lí se̱ʼena.
6 Nu̱ú ñuʼú inkana xíniñúʼu sakéena*
ta nu̱ú ndíta tú uva na̱ ndi̱va̱ʼa-ini xíniñúʼu ndakayana tí uva.
7 Kǒo ti̱ko̱to̱ kunúu sa̱tána tá ñuú
ta kǒo ña̱ kundixina tá vi̱xin.
8 Ndáxina* xíʼin sa̱vi̱ tá kúun chí yuku̱;
xíko̱o sávína ti̱xin yu̱u̱ náʼnu chi kǒo veʼena.
9 Na̱ ndi̱va̱ʼa-ini, kíndaana na̱ va̱lí na̱ ni̱xi̱ʼi̱ yivá tá sáchichín siʼínana,
ta kíndaana ti̱ko̱to̱ na̱ nda̱ʼví xa̱ʼa̱ ña̱ ta̱xitóona iin ña̱ʼa ndaʼa̱na.
10 Kǒo miíví ti̱ko̱to̱na ta íxandúxana xíʼinna ña̱ saá koona kakana,
ta va̱ása táxina ña̱ kuxuna tá ndísona trigo.
11 Tá niʼní, ndeéní káchíñuna yatin nu̱ú íyo nama̱ nu̱ú chi̱ʼina;
12 Na̱ xa̱a̱ ku̱nu̱mí kuvi xákuna chí ñuu,
na̱ ndeéní tu̱kue̱ʼe̱, kána kóʼóna* ña̱ ná chindeétáʼanna xíʼinna,
soo ni va̱ása ndíʼi̱-ini Ndióxi̱ xa̱ʼa̱ na̱yóʼo.
13 Íyo na̱ kúndasí ña̱ yéʼe̱;
va̱ása xíínna ku̱ʼu̱nna yichi̱ nu̱ú ndáye̱ʼe̱ña.
14 Tá xi̱ta̱a̱n* ndáko̱o na̱ xáʼní,
xáʼnína na̱ kǒo ku̱a̱chi ta saátu na̱ nda̱ʼví,
ta tá ñuú ku̱a̱ʼa̱nna ixakuíʼnána.
15 Na̱ kísi̱ xíʼin na̱ kǒo nítindaʼa̱ xíʼinna ndátuna ná kuñuú;
káchina ‘Kǒoví na̱ kuni yi̱ʼi̱’,
ta ndákasina nu̱úna.
16 Tá naa, kíʼvina veʼe inkana;
tá káʼñu* ndákasina miína ini veʼena.
Va̱ása kéena tá yéʼe̱.
17 Yíʼvina tá xi̱ta̱a̱n nda̱a̱ táki̱ʼva yíʼvi inka na̱ yiví tá naa;
soo xa̱a̱ ni̱ka̱anvana ña̱ sáyi̱ʼví na̱ yiví tá naa.
18 Iin kama káñuu* ti̱kui̱í miína ku̱a̱ʼa̱nna.
Ta ñuʼúna ndakiʼinña chiʼña.
Va̱ása ndikókana nu̱ú íyo tú uvana.
19 Nda̱a̱ táki̱ʼva ndúta nieve tá kúúña tiempo yi̱chí ta ndíʼi-xa̱ʼa̱ña tá niʼní,
saá ndíʼi-xa̱ʼa̱ na̱ kíʼvi ku̱a̱chi ini Ya̱vi̱* nu̱ú ñúʼu na̱ ni̱xi̱ʼi̱.
20 Nandóso-ini siʼína xa̱ʼa̱na;
kaxí ndiʼi ti̱kuxí* na̱yóʼo.
Nda̱a̱ ni iin ki̱vi̱ va̱ása ndakaʼánkana xa̱ʼa̱na.
Nda̱a̱ táki̱ʼva xáʼndana iin yitu̱n saá keʼéna xíʼin na̱ va̱ása kéʼé ña̱ nda̱kú.
21 Íxandi̱va̱ʼana xíʼin ñaʼá ñá núma̱
ta saátu íxandi̱va̱ʼana xíʼin ñaʼá ñá ni̱xi̱ʼi̱ yii̱.
22 Ndióxi̱ kuniñúʼura ndee̱ra ña̱ sandíʼi-xa̱ʼa̱ra na̱ ndakúní;
ni ná ndakiʼin tukuna chiñu ña̱ ndáyáʼvi, va̱ása kutakukavína.
23 Ndióxi̱ táxira ña̱ va̱ása kundi̱ʼi-inina xa̱ʼa̱ nda̱a̱ ni iin ña̱ʼa,
soo xítora ndiʼi ña̱ kéʼéna.
24 Loʼova tiempo ndúkáʼnuna soo tándi̱ʼi ndíʼi-xa̱ʼa̱na.
Kúkaʼan nu̱úna ta xíʼi̱na nda̱a̱ táki̱ʼva xíʼi̱ inkana,
íyona nda̱a̱ táki̱ʼva íyo trigo ña̱ xáʼndana ta ndákayanaña.
25 Tá su̱ví saá íyoña,
¿ndáana kivi na̱ʼa̱ ña̱ káʼi̱n ña̱ vatá?,*
¿á ndáana kivi ka̱ʼa̱n ña̱ su̱ví ña̱ nda̱a̱ kúú ña̱ káʼi̱n?”.