Job
23 Ta̱ Job nda̱kuiinra ta ni̱ka̱ʼa̱nra ña̱yóʼo:
2 “Saátu vitin, kúni̱i̱ ka̱ʼi̱n xa̱ʼa̱ ña̱ ndóʼi̱ chi va̱ása kíndo̱o-inii̱;
xa̱a̱ ku̱nai̱ xa̱ʼa̱ ña̱ xákuníi̱.
3 Á va̱ʼaví ná kunda̱a̱-inii̱ ndáa míí íyo Ndióxi̱.
Tasaá kivi ku̱ʼi̱n nda̱a̱ nu̱ú íyora.
4 Nu̱ú Ndióxi̱ ka̱ʼi̱n ña̱ va̱ása kúúmiíi̱ ku̱a̱chi
ta ku̱a̱ʼání ña̱ʼa ka̱ʼi̱n ña̱ va̱ʼa ndakiʼii̱n tu̱ʼi̱n;
5 saá kivi kunda̱a̱-inii̱ ndáaña ndakuiinra yuʼíi̱
ta viíní kuniso̱ʼi̱ ña̱ ka̱ʼa̱nra xíʼi̱n.
6 ¿Á kuniñúʼu Ndióxi̱ ndee̱ra ña̱ koora contrai̱?
Va̱ásaví, chi viíníva kuniso̱ʼora ña̱ ka̱ʼi̱n.
7 Kán kúú nu̱ú kivi ndasavií na̱ yiví na̱ kéʼé ña̱ nda̱kú ku̱a̱chi xíʼinra,
ta ta̱ ndátiin ku̱a̱chi xíʼi̱n, ixakáʼnu-inira xa̱ʼíi̱ ndiʼi tiempo.
8 Soo tá ná ku̱ʼi̱n chí nu̱ú kíta ñu̱ʼu* kǒora íyo kán;
ta tá ná ndikói̱ va̱ása kívi ndaniʼíi̱ra.
9 Tá káchíñura chí ndaʼa̱ yitin, va̱ása kívi kotoi̱ra;
ta saátu tá káva̱ra chí ndaʼa̱ kúáʼa va̱ása kívi kotoi̱ra.
10 Soo xíni̱vara ndáaña ke̱ʼíi̱.
Tá ná sandíʼira kotondosóra yi̱ʼi̱, koi̱ nda̱a̱ táki̱ʼva íyo oro mií ña̱ va̱ʼaka.
11 Ndíku̱i̱n yichi̱ra;
xíniso̱ʼi̱ ña̱ káʼa̱nra ta va̱ása kítai̱ yichi̱ra.
12 Va̱ása níkuxíkái̱ nu̱ú chiñu ña̱ xa̱ʼndara nu̱úi̱;
ndáyáʼviní tu̱ʼunra nu̱úi̱ ta ke̱ʼíi̱ ku̱a̱ʼáníka ña̱ʼa nu̱úka ña̱ ndu̱kúra nu̱úi̱.
13 Tá chíkaa̱-inira keʼéra iin ña̱ʼa, ¿ndáana kivi kasi nu̱úra ña̱ keʼéraña?
Tá kúni̱ra keʼéra iin ña̱ʼa, kéʼévaraña.
14 Saxínura ndiʼi ña̱ chi̱kaa̱-inira keʼéra xa̱ʼíi̱,
ta ku̱a̱ʼání táʼan ña̱yóʼo ndákanixi̱níra keʼéra xa̱ʼíi̱.
15 Xa̱ʼa̱ ña̱kán ndíʼi̱ní-inii̱ tá ndákanixi̱níi̱ xa̱ʼa̱ ña̱ keʼé Ndióxi̱ xíʼi̱n;
tá ndákanixi̱níi̱ xa̱ʼa̱ra, yíʼviníkai̱.
16 Yíʼviníi̱ xínii̱ Ndióxi̱,
Ndióxi̱ ta̱ kúúmií ndiʼi ndee̱ sa̱yíʼviníra yi̱ʼi̱.
17 Ni va̱ása kívi kotoi̱ xa̱ʼa̱ ña̱ naa,
soo ni saá ka̱ʼa̱nvai̱.