Job
42 Tasaá nda̱kuiin ta̱ Job yuʼú Jehová ta ni̱ka̱ʼa̱nra:
2 “Vitin kúnda̱a̱-inii̱ ña̱ íyoní ndeún ta kivi keʼún nda̱a̱ ndáaka ña̱ʼa,
ta tá chíkaa̱-iniún keʼún iin ña̱ʼa, kéʼévaúnña.
3 Yóʼó ka̱chiún: ‘¿Nda̱chun násamaún ña̱ nda̱kaxii̱n keʼíi̱ ta káʼún xa̱ʼa̱ ña̱ va̱ása xíni̱ún xa̱ʼa̱?’.
Ta ña̱ nda̱a̱ kúúvaña, chi ni̱ka̱ʼi̱n xa̱ʼa̱ ña̱ʼa ña̱ va̱ása níxi̱kunda̱a̱-inii̱ xa̱ʼa̱,
ni̱ka̱ʼi̱n xa̱ʼa̱ ña̱ʼa ña̱ ndákanda̱ní-inii̱* xíʼin, ña̱ va̱ása xíni̱i̱.
4 Yóʼó ni̱ka̱ʼún: ‘Ixaún ña̱ ma̱ní, kuniso̱ʼo ta ka̱ʼi̱n.
Nda̱ka̱tu̱ʼíi̱n yóʼó ta xíniñúʼu ndakuiún yuʼíi̱’.
5 Tá ya̱chi̱ xi̱xiniso̱ʼo kuitíi̱ xa̱ʼún,
soo vitin xi̱ninu̱úi̱ yóʼó.
7 Tá sa̱ndíʼi Jehová ni̱ka̱ʼa̱nra xíʼin ta̱ Job, ña̱yóʼo ni̱ka̱ʼa̱n Jehová xíʼin ta̱ Elifaz ta̱ temanita:
“Sáa̱níi̱ xíʼún ta saátu xíʼin u̱vi̱ saá na̱ kítáʼan xíʼún, saáchi va̱ása níka̱ʼa̱nndó ña̱ nda̱a̱ xa̱ʼíi̱ nda̱a̱ táki̱ʼva ni̱ka̱ʼa̱n ta̱ Job ta̱ káchíñu nu̱úi̱ ña̱ nda̱a̱ xa̱ʼíi̱. 8 Kiʼinndó u̱xa̱ si̱ndi̱ki̱ che̱e xíʼin u̱xa̱ ndikachi* che̱e ta kúáʼanndó nu̱ú ta̱ Job ta̱ káchíñu nu̱úi̱. Kaʼmindó tíyóʼo ta so̱kóndórí* xa̱ʼa̱ndó ta ta̱ Job ka̱ʼa̱nra xa̱ʼa̱ndó. Ta kuniso̱ʼovai̱ ña̱ ka̱ʼa̱nra xíʼi̱n xa̱ʼa̱ndó ta va̱ása taxii̱ castigo ndaʼa̱ndó xa̱ʼa̱ ndiʼi ña̱ kíʼví ña̱ ni̱ka̱ʼa̱nndó, saáchi va̱ása níka̱ʼa̱nndó ña̱ nda̱a̱ xa̱ʼíi̱ nda̱a̱ táki̱ʼva ni̱ka̱ʼa̱n ta̱ Job ta̱ káchíñu nu̱úi̱ ña̱ nda̱a̱ xa̱ʼíi̱”.
9 Ña̱kán ta̱ Elifaz ta̱ temanita, ta̱ Bildad ta̱ suhita xíʼin ta̱ Zofar ta̱ naamatita, ni̱xa̱ʼa̱nna ta ke̱ʼéna ña̱ ni̱ka̱ʼa̱n Jehová xíʼinna. Ta xi̱niso̱ʼova Jehová ña̱ ni̱ka̱ʼa̱n ta̱ Job.
10 Tá xa̱a̱ sa̱ndíʼi ta̱ Job ni̱ka̱ʼa̱nra xíʼin Ndióxi̱ xa̱ʼa̱ na̱ xi̱kitáʼan xíʼinra, va̱ása nítaxika Jehová xo̱ʼvi̱ra* ta ta̱xira ná kuumií tukura ña̱ ku̱i̱ká ña̱ xi̱kuumiíra tá ya̱chi̱. Ta nda̱a̱ u̱vi̱ yichi̱ka nda̱kunúu ña̱ ta̱xi Jehová ndaʼa̱ra nu̱úka ña̱ xi̱kuumiíra tá ya̱chi̱. 11 Ndiʼi na̱ ñanira xíʼin ku̱ʼvara ta saátu ndiʼi na̱ xi̱kitáʼan xíʼinra tá ya̱chi̱ ni̱xa̱ʼa̱nna veʼera ña̱ va̱ʼa kotonara ta xi̱xina xíʼinra. Ku̱ndáʼvi-inina xi̱ninara ta sa̱ndíkona-inira xa̱ʼa̱ ndiʼi tu̱ndóʼo ña̱ ki̱xi nu̱úra ña̱ va̱ása nísasi Jehová. Iin tá iinna ta̱xina xu̱ʼún ndaʼa̱ra ta ta̱xina iin seʼe̱* ña̱ oro ndaʼa̱ra.
12 Ku̱a̱ʼáka ña̱ va̱ʼa ta̱xi Jehová ndaʼa̱ ta̱ Job nu̱úka ña̱ ta̱xira ndaʼa̱ra tá ya̱chi̱. Ta̱ Job ni̱xa̱a̱ra xi̱kuumiíra 14,000 ndikachi, 6,000 camello, 2,000 si̱ndi̱ki̱ xíʼin 1,000 burro.* 13 Saátu ka̱ku inka u̱xa̱ka se̱ʼeta̱ara xíʼin u̱ni̱ se̱ʼe-síʼira. 14 Chi̱naníra ñá nu̱ú, Jemimá; ñá u̱vi̱, Quesías ta ñá u̱ni̱, Querén-Hapuc. 15 Ná se̱ʼe ta̱ Job kúú ná liviníka ni̱xi̱yo nu̱ú ndiʼika ná ñaʼá ná ni̱xi̱yo ñuu kán, ta̱xira herencia ndaʼa̱ná nda̱a̱ táki̱ʼva ta̱xiraña ndaʼa̱ na̱ se̱ʼeta̱ara.
16 Ta̱ Job xi̱takukara 140 ku̱i̱ya̱ tá ku̱u ña̱yóʼo, xi̱nira xa̱ʼnu na̱ se̱ʼera ta saátu xi̱nira nda̱a̱ na̱ se̱ʼe na̱ se̱ʼexíkúára.* 17 Ku̱si̱íní-ini ta̱ Job xa̱ʼa̱ ña̱ ku̱a̱ʼání ku̱i̱ya̱ xi̱takura ta ni̱xi̱ʼi̱ra tá xa̱a̱ ku̱chéeníra.