Job
41 ”¿Á kuchiñún tiún tí Leviatán* xíʼin iin ka̱a loʼo ña̱ xi̱ín* nu̱ú?
¿Á kuchiñún katún yáa̱rí* xíʼin iin yoʼo̱?
2 ¿Á kuchiñún chika̱ún iin yoʼo̱ ya̱vi̱ si̱ti̱nrí?
¿Á kuchiñún kaún yuʼúrí xíʼin iin ka̱a ña̱ xi̱ín nu̱ú?
3 ¿Á kuakundáʼvirí nu̱ún ña̱ ná kundáʼvi-iniún kuniúnrí?
¿Á viíkaví ka̱ʼa̱nrí xíʼún?
4 ¿Á keʼún iin trato xíʼinrí
ña̱ va̱ʼa kachíñundáʼvirí nu̱ún ndiʼi tiempo?
5 ¿Á kusíkíún xíʼinrí nda̱a̱ táki̱ʼva sísikíún xíʼin iin saa loʼo?
¿Á katúnrí xíʼin iin yoʼo̱ ña̱ va̱ʼa kusíkí ná válí se̱ʼún xíʼinrí?
6 ¿Á xi̱íko* na̱ tíin ti̱a̱ká tíyóʼo?
¿Á ndataʼví na̱ íxi̱íko ña̱ʼa tíyóʼo?
7 ¿Á kuchiñún kaún sa̱tárí xíʼin iin ka̱a ña̱ xi̱ín nu̱ú?*
¿Á kuchiñún kaún xi̱nírí xíʼin lanza tú xíniñúʼuna ña̱ tíinna ti̱a̱ká?
8 Tá iin kuití yichi̱ ná tiúnrí,
ndakaʼún ndáa ki̱ʼva xa̱xírí* yóʼó,
ta nda̱a̱ ni iin yichi̱ va̱ása ndikóún tiúnrí.
9 Va̱ása ndakanixi̱níún ña̱ kuchiñún tiúnrí.
Yi̱ʼvíníún tá ná koto kuitíúnrí.
10 Nda̱a̱ ni iinna va̱ása xíínna keʼéchiñunarí.
Ña̱kán, ¿ndáana kuchiñu kanitáʼan xíʼi̱n?
11 ¿Ndáana ta̱xi iin ña̱ʼa ndaʼíi̱, ña̱kán xíniñúʼu taxii̱ iin ña̱ʼa ndaʼa̱na?
Kuenta miíi̱ kúú ndiʼi ña̱ íyo nu̱ú ñuʼú.
12 Ka̱ʼa̱nkavai̱ ndáa ki̱ʼva íyo xa̱ʼa̱rí, ndee̱rí,
ta saátu xa̱ʼa̱ ki̱ʼva ña̱ viíní ku̱vaʼarí.
13 ¿Ndáana xa̱a̱ ku̱chiñu ki̱ndaa ñii̱rí?
¿Ndáana kivi ki̱ʼvi ini yuʼúrí?
14 ¿Ndáana xa̱a̱ ku̱chiñu nda̱kuná yuʼúrí?
Yíʼviní na̱ yiví tá xítona nu̱ʼurí.
15 Iníí sa̱tárí ndásiña xíʼin nduchu,*
ta kútu̱ní tíi̱n ndiʼiña sa̱tárí.
16 Viíní kítáʼan iin tá iinña
ta nda̱a̱ ta̱chí va̱ása yáʼa iniña.
17 Iin tá iinña tíi̱ntáʼanña,
kútu̱ní kítáʼanña* ta va̱ása kívi ndataʼvínaña.
18 Tá káxanrí,* ndáye̱ʼe̱ ti̱kui̱í tá kée si̱ti̱nrí;
ta nduchúnu̱úrí, ndáye̱ʼe̱ña nda̱a̱ táki̱ʼva ndáye̱ʼe̱ tá xi̱ta̱a̱n.*
19 Nda̱a̱ táki̱ʼva íyo taxa saá íyo ña̱ kée yuʼúrí,
nda̱a̱ táki̱ʼva íyo ñuʼu̱ saá íyo ña̱ kée yuʼúrí.
20 Kée yi̱ʼma̱ si̱ti̱nrí
nda̱a̱ táki̱ʼva kée yi̱ʼma̱ yuʼú iin horno* ña̱ xíxi̱.
21 Ndeéní tívirí ta̱chí yuʼúrí ta nda̱a̱ kivi ndakaʼmirí ti̱ka̱yi̱,
ta nda̱a̱ táki̱ʼva íyo ñuʼu̱ saá íyo ña̱ kée yuʼúrí.
22 Ndakúní su̱kúnrí
ta tá ná kuni na̱ yiví ña̱yóʼo, yi̱ʼvínína.
23 Ndakúní ñii̱ ti̱xinrí;
nda̱a̱ táki̱ʼva íyo ka̱a ña̱ va̱ása kívi ku̱taʼa saá íyoña.
24 Téʼéní* níma̱rí nda̱a̱ táki̱ʼva téʼéní yu̱u̱,
nda̱a̱ táki̱ʼva téʼé yu̱u̱ molino saá téʼéña.
25 Tá ndákundichirí, nda̱a̱ na̱ ndakúní yíʼvina;
tá ndeéní kánda̱rí, sáyi̱ʼvírína.
26 Va̱ása kuchiñuna kanitáʼanna xíʼinrí xíʼin espada,
ni lanza ni flecha.
27 Nu̱ú tíyóʼo nda̱a̱ táki̱ʼva íyo xe̱ʼe̱* saá íyo ka̱a ña̱ hierro;
nda̱a̱ táki̱ʼva íyo yitu̱n tú ni̱ta̱ʼyi̱ saá íyo cobre nu̱úrí.
28 Va̱ása yíʼvirí tá sákanana flecha sa̱tárí;
nu̱ú tíyóʼo nda̱a̱ táki̱ʼva íyo ku̱ʼu̱ yi̱chí saá íyo yu̱u̱* ña̱ sákanana sa̱tárí.
29 Nu̱ú tíyóʼo, nda̱a̱ táki̱ʼva íyo ku̱ʼu̱ yi̱chí saá íyo yitu̱n nduʼú,
nda̱a̱ táki̱ʼva íyo tí xáku̱ndaa na̱ yiví tá sákanana jabalina sa̱tárí saá íyorí.
30 Ti̱xinrí íyoña nda̱a̱ táki̱ʼva íyo ko̱ʼo̱ ña̱ ni̱ta̱ʼví ña̱ xi̱ín nu̱ú;
tá ku̱a̱ʼa̱nrí nu̱ú nda̱ʼyi̱, nána ti̱xinrí nda̱a̱ táki̱ʼva nána yitu̱n tú sákuachina trigo.
31 Tá kíʼvirí ini mar nda̱a̱ síso̱ nu̱úrá;
nda̱a̱ táki̱ʼva síso̱ aceite ini ki̱si.
32 Tá ku̱a̱ʼa̱nrí nu̱ú ti̱kui̱í, kána chi̱ki̱ñu̱* nu̱úrá
nda̱a̱ ndúyaa nu̱ú ti̱kui̱í tá kúnúní tá ku̱a̱ʼa̱nrí;
táki̱ʼva náʼa̱ ixí* yaa saá náʼa̱rá.
33 Kǒo nda̱a̱ ni iin kití íyo nda̱a̱ táki̱ʼva íyo tíyóʼo nu̱ú ñuʼú,
saáchi Ndióxi̱ i̱xava̱ʼara tíyóʼo ña̱ va̱ása yi̱ʼvírí.
34 Xíto kue̱ʼe̱rí nu̱ú kití tí ni̱nuní kúni.
Xáʼndachíñurí nu̱ú ndiʼi kití yukú tí náʼnuní”.