Jeremías
1 Ña̱yóʼo kúú ña̱ ni̱ka̱ʼa̱n ta̱ Jeremías* se̱ʼe ta̱ Hilquías, iin ta̱ xi̱kuu su̱tu̱ chí Anatot, ña̱ xi̱kindo̱o chí nu̱ú ñuʼú na̱ tribu ta̱ Benjamín. 2 Tá xa̱a̱ 13 ku̱i̱ya̱ xáʼndachíñu ta̱ Josías se̱ʼe ta̱ Amón, ta̱ xi̱kuu rey ñuu Judá, Jehová ni̱ka̱ʼa̱nra xíʼin ta̱ Jeremías. 3 Ta saátu ni̱ka̱ʼa̱nra xíʼinra tá tiempo ña̱ xi̱xaʼndachíñu ta̱ Jehoiaquim se̱ʼe ta̱ Josías, ta̱ xi̱kuu rey ñuu Judá, ta ke̱ʼéra ña̱yóʼo nda̱a̱ tá ni̱xi̱nu 11 ku̱i̱ya̱ ña̱ xáʼndachíñu ta̱ Sedequías se̱ʼe ta̱ Josías, ta̱ xi̱kuu rey ñuu Judá, nda̱a̱ tá nda̱kiʼinna na̱ ñuu Jerusalén ku̱a̱ʼa̱n xíʼinna kundoona inka ñuu tá yo̱o̱ u̱ʼu̱n.
4 Ña̱yóʼo kúú ña̱ ni̱ka̱ʼa̱n Jehová xíʼi̱n:
5 “Tá kúma̱níka ixava̱ʼi̱ yóʼó ti̱xin siʼún, xa̱a̱ xi̱xini̱vai̱ yóʼó;*
ta tá kúma̱níka kakún, xa̱a̱ nda̱sayi̱i̱vai̱ yóʼó.
Nda̱kaxii̱n yóʼó ña̱ koún profeta nu̱ú na̱ inka ñuu”.
6 Soo yi̱ʼi̱ ka̱chii̱: “Ndáʼviníi̱, táta káʼnu Jehová.
Kǒo xíni̱i̱ ndáaña ka̱ʼi̱n. Iin ta̱ loʼova kúi̱”.
7 Soo Jehová ni̱ka̱ʼa̱nra xíʼi̱n:
“Kǒo ka̱ʼún ‘Iin ta̱ loʼova kúi̱’.
Saáchi xíniñúʼu ku̱ʼún nu̱ú ndiʼi na̱ ka̱ʼi̱n xíʼún
ta ka̱ʼún xíʼinna ndiʼi ña̱ ná ka̱ʼi̱n xíʼún.
8 Va̱ása yi̱ʼvíún kuniúnna xa̱ʼa̱ ki̱ʼva ña̱ náʼa̱na,
saáchi ‘yi̱ʼi̱ íyoi̱ xíʼún ña̱ sakǎkui̱ yóʼó’, káchi Jehová”.
9 Tasaá sa̱káa Jehová ndaʼa̱ra ta ti̱inra yuʼíi̱. Ta Jehová ni̱ka̱ʼa̱nra xíʼi̱n: “Xa̱a̱ ta̱ánvai̱ tu̱ʼi̱n yuʼún. 10 Vitin kúú ña̱ ndáka̱xii̱n yóʼó ña̱ ku̱ʼún ka̱ʼún xíʼin na̱ ñuu ta saátu xíʼin na̱ chíñu, ña̱ tuʼún xíʼin ña̱ kaniún, ña̱ sandíʼi-xa̱ʼún xíʼin ña̱ sandúvaún, ña̱ ixava̱ʼún xíʼin ña̱ chiʼún”.
11 Ta ni̱ka̱ʼa̱n tuku Jehová xíʼi̱n, ta ni̱nda̱ka̱tu̱ʼunra yi̱ʼi̱: “¿Ndáaña xítoún Jeremías?”. Ta yi̱ʼi̱ nda̱kuii̱n: “Xítoi̱ ndaʼa̱ iin yitu̱n tú almendro”.
12 Jehová ni̱ka̱ʼa̱nra xíʼi̱n: “Va̱ʼava íyo ña̱ xi̱niún, saáchi yi̱ʼi̱ va̱ása kísi̱i̱ ta íyo tu̱ʼvai̱ ña̱ saxínui̱ tu̱ʼun ña̱ ni̱ka̱ʼi̱n”.
13 Tasaá ni̱ka̱ʼa̱n tuku Jehová xíʼi̱n, ta ka̱chira: “¿Ndáaña xítoún?”. Ta yi̱ʼi̱ nda̱kuii̱n: “Xítoi̱ iin ki̱si* ña̱ síso̱ní, ta nda̱kandúʼú síi̱nña ta yuʼúña xítoña chí norte”. 14 Tasaá Jehová ni̱ka̱ʼa̱nra xíʼi̱n:
“Tu̱ndóʼo ña̱ kundoʼo ndiʼi na̱ ñuu yóʼo
kixiña chí norte.
15 Saáchi ‘xa̱a̱ kánai̱ ndiʼi na̱ familia na̱ xáʼndachíñu chí norte, káchi Jehová,
ta ndiʼina kixina. Iin tá iinna kanindichina tronona
ndiʼi yéʼé ñuu Jerusalén,
ta sandíʼi-xa̱ʼa̱na ndiʼi nama̱ ña̱ kúúmiíña
ta saátu ndiʼi ñuu ña̱ íyo chí Judá.
16 Ta ka̱ʼi̱n ndáaña kundoʼona xa̱ʼa̱ ndiʼi ña̱ va̱ása va̱ʼa ke̱ʼéna
saáchi sa̱ndákoona yi̱ʼi̱
ta sóko̱na* ña̱ʼa ta xáʼminaña ña̱ va̱ʼa kana yi̱ʼma̱ña nu̱ú inkaka ndióxi̱
ta xíkuxítína nu̱ú ña̱ʼa ña̱ i̱xava̱ʼana xíʼin ndaʼa̱na’.
17 Soo yóʼó xíniñúʼu koo tu̱ʼvaún ña̱ keʼún ña̱yóʼo,
ta xíniñúʼu ku̱ʼún ka̱ʼún xíʼinna ndiʼi ña̱ ná ka̱ʼi̱n xíʼún.
Kǒo yi̱ʼvíún kuniúnna,
ña̱ va̱ʼa ná kǒo sayíʼvikai̱ yóʼó nu̱úna.
18 Saáchi nda̱sai̱ yóʼó nda̱a̱ táki̱ʼva íyo iin ñuu ña̱ kútu̱ní ndási,
iin nama̱* ña̱ hierro, iin nama̱ ña̱ cobre ña̱ va̱ʼa kuchiñún xíʼin ndiʼi na̱ ñuu,
xíʼin na̱ rey ñuu Judá, xíʼin na̱ níʼi yichi̱ nu̱ú na̱ ñuu
ta saátu xíʼin na̱ su̱tu̱ xíʼin ndiʼi na̱ yiví na̱ ndóo nu̱ú ñuʼú yóʼo.
19 Ta kanitáʼanvana xíʼún
soo kǒo kuchiñuna xíʼún,
saáchi ‘yi̱ʼi̱ íyoi̱ xíʼún ña̱ va̱ʼa sakǎkui̱ yóʼó’, káchi Jehová”.