Jeremías
2 Jehová ni̱ka̱ʼa̱nra ña̱yóʼo xíʼi̱n: 2 “Kúáʼan ta ka̱ʼún ña̱yóʼo xíʼin na̱ ñuu Jerusalén: ‘Ña̱yóʼo kúú ña̱ káʼa̱n Jehová:
“Ndákaʼíi̱n ña̱ ndixaní xi̱kuʼvi̱-iniún* xi̱xiniún yi̱ʼi̱ tá loʼún,
xi̱kuni̱níún xi̱xiniún yi̱ʼi̱ tá ki̱ndoún ña̱ tindaʼún xíʼi̱n,
ta xi̱ndiku̱nníún xi̱xikaún sa̱tái̱ chí nu̱ú ñuʼú yi̱chí,
nu̱ú iin ñuʼú nu̱ú kǒo ña̱ʼa níchiʼina.
3 Na̱ ñuu Israel ni̱xi̱yona na̱ yi̱i̱ nu̱ú Jehová, nda̱a̱ táki̱ʼva íyo ña̱ʼa ña̱ chi̱ʼina ña̱ nu̱ú va̱ʼa kána saá ni̱xi̱yona nu̱úra”’.
‘Ndiʼi na̱ xi̱ ixandi̱va̱ʼa xíʼinna xi̱kiʼvina ku̱a̱chi.
Xi̱kixi tu̱ndóʼo nu̱úna’, káchi Jehová”.
4 Kuniso̱ʼondó ña̱ káʼa̱n Jehová, ndóʼó na̱ veʼe ta̱ Jacob,
ta saátu ndiʼi ndóʼó na̱ ñuu Israel.
5 Ña̱yóʼo kúú ña̱ káʼa̱n Jehová:
“¿Ndáaña va̱ása va̱ʼa kúú ña̱ ke̱ʼíi̱ xíʼin na̱ táʼanndó na̱ xi̱ndoo xi̱naʼá
ña̱kán ku̱xíkánína nu̱úi̱,
ta nda̱kundiku̱nna ndióxi̱ ña̱ va̱ása ndáyáʼvi
ta nda̱a̱ miína ni̱xa̱a̱ ndu̱u na̱ kíʼví?
6 Kǒo nínda̱ka̱tu̱ʼunna: ‘¿Ndáa míí ku̱a̱ʼa̱n Jehová ta̱ ta̱vá miíyó chí ñuu Egipto,
ta̱ xi̱niʼi yichi̱ nu̱úyó ña̱ ni̱xi̱kayó chí nu̱ú ñuʼú yi̱chí,
nu̱ú ñuʼú yi̱chí nu̱ú ni̱xi̱yo ku̱a̱ʼání ya̱vi̱ ña̱ kúnúní,
nu̱ú iin ñuʼú ña̱ yi̱chíní ta naaní,
nu̱ú iin ñuʼú nu̱ú kǒo nda̱a̱ ni iinna xíka
ta kǒo nda̱a̱ ni iinna ndóo?’.
7 Tándi̱ʼi, nda̱kiʼii̱n ndóʼó ki̱xaa̱ xíʼi̱n nu̱ú ñuʼú nu̱ú íyoní yitu̱n
ña̱ va̱ʼa kaxíndó ku̱i̱ʼi ña̱ kána ndaʼa̱nú xíʼin ndiʼi ña̱ʼa ña̱ va̱ʼa ña̱ íyo nu̱úña.
Soo ndóʼó ni̱ki̱ʼvindó ta i̱xayaku̱a̱ndó ñuʼíi̱;
herencia ña̱ ta̱xii̱ ndaʼa̱ndó nda̱sandóña iin ña̱ʼa ña̱ va̱ása ndáyáʼvi.
8 Na̱ su̱tu̱ kǒo nínda̱ka̱tu̱ʼunna: ‘¿Ndáa míí ku̱a̱ʼa̱n Jehová?’.
Na̱ xi̱xini̱ xa̱ʼa̱ Ley va̱ása níxi̱kunda̱a̱-inina xa̱ʼíi̱,
na̱ xi̱ndaa ndikachi* sa̱na̱i̱ ndu̱una contra xíʼi̱n,
na̱ profeta ki̱xáʼana káʼa̱nna xa̱ʼa̱ ña̱ Baal
ta nda̱kundiku̱nna ndióxi̱ ña̱ kǒo kívi keʼé nda̱a̱ ni iin ña̱ʼa va̱ʼa xa̱ʼa̱na.
9 ‘Xa̱ʼa̱ ña̱kán ndakundeíi̱ ka̱ʼi̱n ña̱ kúúmiíndó ku̱a̱chi, káchi Jehová,
ta saátu ka̱ʼi̱n ña̱ kúúmií na̱ se̱ʼeñánindó ku̱a̱chi’.
10 ‘Soo kúáʼanndó chí nu̱ú ñuʼú* na̱ kitim ta kotondó.
Chindaʼándó na̱ ná ku̱ʼu̱n koto chí ñuu Quedar ta koto va̱ʼandó;
koto va̱ʼandó á xa̱a̱ kúu ña̱yóʼo ñuuna.
11 ¿Á xa̱a̱ íyo iin na̱ ñuu na̱ násama ndióxi̱na xíʼin inka na̱ su̱ví ndixa kúú ndióxi̱?
Soo na̱ ñuu miíi̱ na̱samana yi̱ʼi̱ ta̱ kúú Ndióxi̱ ta̱ kúúmiíní ndee̱ xíʼin ña̱ʼa ña̱ ni loʼo va̱ása ndáyáʼvi.
12 Ná ndakanda̱-ini* ndiví kotoña ña̱yóʼo;
ta ná kisini̱nuña xa̱ʼa̱ ña̱ yíʼviña, káchi Jehová,
13 saáchi na̱ ñui̱ ke̱ʼéna u̱vi̱ ña̱ʼa ña̱ va̱ása va̱ʼa:
sa̱ndákoona yi̱ʼi̱ ta̱ táxi ti̱kui̱í tá taxi ña̱ kutakuna,
ta ka̱anna cisterna* nu̱ú kuñuʼu ti̱kui̱í
soo ni̱ndu̱va̱vaña ta kǒo kívi kuñuʼu ti̱kui̱í iniña’.
14 ‘¿Á ta̱ káchíñundáʼvi kúú ta̱ Israel?
¿Á se̱ʼe na̱ káchíñundáʼvi nu̱ú inkana kúúra ta ka̱kura veʼe na̱ káchíñuna nu̱ú?
Tá saá, ¿nda̱chun ki̱ndaana ña̱ʼa ña̱ kúúmiíra?
15 Tí ndikaʼa* válí ndáʼyi̱ndaaríra;
ndeéní ndáʼyi̱rí.
Kininí ke̱ʼéna xíʼin ñuʼúra ta iin ndákanda̱-ini inkana tá xíninaña.
Xa̱ʼmina ñuura ta kǒoka nda̱a̱ ni iinna ndóo nu̱úña.
16 Na̱ yiví na̱ ndóo chí Nof* xíʼin Tahpanés xáxi ndiʼina xa̱ʼñún.
17 ¿Á su̱ví miíún ndu̱kú ña̱ ndo̱ʼún
xa̱ʼa̱ ña̱ sa̱ndákoún Jehová Ndióxi̱ún
nani tá xi̱niʼira yichi̱ nu̱ún?
18 Ta vitin, ¿nda̱chun kúni̱ún ku̱ʼún yichi̱ ña̱ ku̱a̱ʼa̱n chí Egipto
ta koʼún ti̱kui̱í tá yáʼa chí Sihor?*
¿Nda̱chun kúni̱ún ku̱ʼún yichi̱ ña̱ ku̱a̱ʼa̱n chí Asiria
ta koʼún ti̱kui̱í tá yáʼa yu̱ta Éufrates?
19 Xíniñúʼu sakúaʼún xíʼin ña̱ va̱ása va̱ʼa ke̱ʼún,
ta xa̱ʼa̱ ña̱ va̱ása nda̱kú níxi̱yo iniún
xíniñúʼu ndatiinna ku̱a̱chi xíʼún.
Xa̱ʼa̱ ña̱ sa̱ndákoún Jehová Ndióxi̱ún
kundoʼún ña̱ va̱ása va̱ʼa ta xo̱ʼvi̱níún* xíʼin ña̱yóʼo;
nda̱a̱ ni loʼo va̱ása náʼún ña̱ yíʼviún* xíniún yi̱ʼi̱’, káchi táta káʼnu Jehová, ta̱ xáʼndachíñu nu̱ú na̱ ángel.
20 ‘Saáchi xa̱a̱ íyo ku̱a̱ʼání tiempo sa̱ndíʼi-xa̱ʼíi̱ yókó* tú xi̱núu si̱kíún*
ta tu̱ʼii̱n cadena ña̱ xi̱nuʼniún.
Soo yóʼó ka̱chiún: “Va̱ása kachíñui̱ nu̱ún”;
nda̱ndika̱ xa̱ʼún xi̱ndúʼún ta xi̱kisi̱ún xíʼin ku̱a̱ʼání ta̱a
ndiʼi nu̱ú xi̱kí ta saátu xa̱ʼa̱ yitu̱n tú ndokoní ndaʼa̱.
21 Tá chi̱ʼii̱ yóʼó nina uva tí kúáʼa tí va̱ʼaní xi̱kuún, xíʼin si̱ʼva̱ tí va̱ʼaní ni̱ndu̱ta̱ún.
Ña̱kán, ¿nda̱chun na̱samaún ta ndu̱ún iin tú uva yukú?’.
22 ‘Ni ná ndakataníún miíún xíʼin ñi̱i̱* ta kuniñúʼún ku̱a̱ʼání na̱ma̱,
soo ku̱a̱chi ña̱ ni̱ki̱ʼviún ndakundeévaña kooña iin ña̱ yaku̱a̱ nu̱úi̱’, káchi táta káʼnu Jehová.
23 ¿Nda̱chun káʼún ‘Va̱ása níkuyaku̱a̱i̱;
kǒo níxindiku̱i̱n ña̱ Baal’?
Koto va̱ʼún ña̱ ke̱ʼún chí yoso̱.
Kiʼin va̱ʼún kuenta xíʼin ña̱ ke̱ʼún.
Íyoún nda̱a̱ táki̱ʼva íyo iin camello síʼi tí loʼo tí ndeéní xínu,
ta iin xínu sánaún xíkaún,
24 nda̱a̱ táki̱ʼva íyo iin burro síʼi yukú tí xa̱a̱ ni̱ka̱an xíka chí nu̱ú ñuʼú yi̱chí saá íyoún,
xíkarí kíʼinrí xiko̱ chi kúni̱rí ku̱i̱nrí.
¿Ndáana kuchiñu kasi nu̱úrí tá kúni̱rí ku̱i̱nrí?
Nda̱a̱ ni iin burro che̱e kǒo kunaarí ña̱ nandukúrírí.
Ndani̱ʼívarírí tiempo* ña̱ xíi̱nrí.
25 Kiʼinníún kuenta ña̱ kǒo kindo̱o chálá xa̱ʼún ta yi̱chi̱ su̱kún.
Soo yóʼó ka̱chiún: ‘Kǒo kivika keʼíi̱ ña̱yóʼo.
Saáchi kúni̱níi̱ xínii̱ inkana*
ta ku̱ʼu̱nvai̱ sa̱tána’.
26 Nda̱a̱ táki̱ʼva kúkaʼan nu̱ú iin ta̱ kui̱ʼná tá ndáni̱ʼínara,
saá ku̱kaʼan nu̱ú na̱ israelita,
miína, na̱ rey, na̱ níʼi yichi̱ nu̱úna,
na̱ su̱tu̱ xíʼin na̱ profeta.
27 Káʼa̱nndó xíʼin iin yitu̱n ‘Yóʼó kúú yivándi̱’,
ta káʼa̱nndó xíʼin iin yu̱u̱ ‘Yóʼó sa̱kǎku ndi̱ʼi̱’.
Nu̱úka ña̱ ndikóna nu̱úi̱, na̱ ku̱xíkava kúúna nu̱úi̱.
Soo tá ná kixi tu̱ndóʼo nu̱úna kachina
‘Naʼa ta sakǎkún ndi̱ʼi̱’.
28 ¿Ta vitin ndáa míí ku̱a̱ʼa̱n ndióxi̱ na̱ i̱xava̱ʼún?
Ná kixina tá kuchiñuna sakǎkuna yóʼó nu̱ú tu̱ndóʼo ña̱ kixi nu̱ún.
Saáchi yóʼó Judá, ku̱a̱ʼání ni̱xa̱a̱ na̱ ndióxi̱ún ku̱una
nda̱a̱ táki̱ʼva ku̱a̱ʼání kúú ñuu kúúmiíún.
29 ‘¿Nda̱chun ndákundeéndó chíkaa̱ndó ku̱a̱chi yi̱ʼi̱?
¿Nda̱chun ndu̱u ndiʼindó contra xíʼi̱n?’, káchi Jehová.
30 Ni ka̱nivai̱ na̱ se̱ʼendó,
soo na̱yóʼo kǒo níxiinna sakúaʼana xíʼin ña̱ ni̱ka̱ʼi̱n xíʼinna.
Espada miíndó xa̱ʼníña na̱ profetandó
nda̱a̱ táki̱ʼva kéʼé iin ndikaʼa tí kue̱ʼe̱ní.
31 Ndóʼó na̱ ndóo vitin, kuniso̱ʼo va̱ʼandó ña̱ káʼa̱n Jehová.
¿Á iin ñuʼú yi̱chíva ni̱xa̱i̱ ndu̱i̱ nu̱ú na̱ ñuu Israel?
¿Á ni̱xa̱i̱ ndu̱i̱ iin ñuʼú ña̱ naaní ña̱ sákunaaní miína?
Ndóʼó na̱ ñui̱, ¿nda̱chun káʼa̱nndó, ‘Xa̱a̱ ni̱sa̱ñávandi̱; kǒo ndikókandi̱ nu̱ún’?
32 ¿Á kivi nandóso-ini iin ñaʼá ñá kúa̱an xa̱ʼa̱ ña̱ʼa livi ña̱ xíniñúʼuñá?
¿Á kivi nandóso-ini iin ñaʼá xa̱ʼa̱ ti̱ko̱to̱ ña̱ kundasi kándíkañá ki̱vi̱ tá ná tindaʼa̱ñá?
Soo na̱ ñui̱ xa̱a̱ ku̱a̱ʼáníva tiempo kúú ña̱ na̱ndóso-inina xa̱ʼíi̱.
33 Yóʼó ñá ñaʼá, ku̱a̱ʼákaví ña̱ kéʼún ña̱ va̱ʼa ku̱ʼún nandukún na̱ ta̱a na̱ na̱ʼa̱ ña̱ kúni̱na xínina yóʼó.
Va̱ʼaní sa̱kúaʼún kéʼún ña̱ʼa ña̱ va̱ása va̱ʼa.
34 Nda̱a̱ ti̱ko̱to̱ún* ni̱ka̱ʼyi̱ña xíʼin ni̱i̱ na̱ nda̱ʼví ta saátu na̱ kǒo ku̱a̱chi kúúmií,
ni kǒo níxinii̱ ña̱ xi̱kuni̱na ki̱ʼvina xíʼin ña̱ nduxa̱ veʼún;
soo ni saá ni̱ka̱ʼyi̱ ndiʼi ti̱ko̱to̱ún xíʼin ni̱i̱na.
35 Soo yóʼó káchiún ‘Kǒo ku̱a̱chi kúúmiíi̱.
Sana xa̱a̱ ni̱ya̱ʼava ña̱ sáa̱ra xíʼi̱n’.
Soo vitin ndatii̱n ku̱a̱chi xíʼún
chi káchiún ‘Kǒo ku̱a̱chi níki̱ʼvii̱’.
36 ¿Nda̱chun kamaní násamaún ña̱ kéʼún?
Na̱ ñuu Egipto sakúkaʼanna nu̱ún
nda̱a̱ táki̱ʼva sa̱kúkaʼan na̱ ñuu Asiria nu̱ún.
37 Tiún xi̱níún kitaún xa̱ʼa̱ ña̱ kúkaʼan nu̱ún,
saáchi Jehová ku̱ndasíra xi̱nira na̱ ndáa-iniún;
na̱kán kǒo kuchiñuna chindeétáʼanna xíʼún ña̱ vií kana ña̱ kúni̱ún keʼún”.