Jeremías
23 “Ndáʼviní na̱ pastor na̱ sándiʼi-xa̱ʼa̱ ndikachi* tí ndái̱ ta táxínnarí ku̱a̱ʼa̱nrí”, káchi Jehová.
2 Saáchi ña̱yóʼo kúú ña̱ káʼa̱n Jehová Ndióxi̱ na̱ ñuu Israel contra na̱ pastor na̱ ndáa na̱ ñui̱: “Ndóʼó ta̱xín ndiʼindó ndikachi sa̱na̱i̱ ta ni̱ta̱ni̱* ndiʼirí ku̱a̱ʼa̱nrí ta kǒo níxindaandórí”.
“Xa̱ʼa̱ ña̱kán taxii̱ castigo ndaʼa̱ndó xa̱ʼa̱ ña̱ va̱ása va̱ʼa kéʼéndó”, káchi Jehová.
3 “Tasaá ndakayai̱ ndiʼi ndikachi sa̱na̱i̱ tí chi̱ndaʼíi̱ ku̱a̱ʼa̱n inka ñuu ta ndikórí kaxí tukurí yita* ña̱ xi̱xaxírí, ku̱i̱na̱rí ta ku̱a̱ʼání xa̱a̱rí koorí. 4 Ta taxii̱ na̱ pastor na̱ ndixa kundaarí. Va̱ása yi̱ʼvíkarí ta kǒo nda̱a̱ ni iin ña̱ʼa kuma̱ní nu̱úrí”, káchi Jehová.
5 “Kotondó, xa̱a̱ ku̱yatin ki̱vi̱, káchi Jehová, ña̱ ti̱xin veʼe ta̱ David taxii̱ ña̱ ná kana iin ta̱ xa̱a̱ koo rey ta nda̱kúní kaʼndachíñura. Kaʼndachíñu iin ta̱ rey, ndíchiní koora ta nina ña̱ nda̱kú keʼéra xíʼin ndiʼi na̱ ndóo nu̱ú ñuʼú. 6 Tá ná kaʼndachíñura ka̱ku na̱ ñuu Judá ta na̱ ñuu Israel va̱ʼaní kundoona. Ta siaʼa kúú ña̱ kunaníra: Jehová táxira ña̱ nda̱kú koo iniyó”.
7 “Xa̱ʼa̱ ña̱kán xa̱a̱ ku̱yatin kixaa̱ ki̱vi̱, káchi Jehová, ña̱ va̱ása ka̱ʼa̱nkana: ‘Chínaʼíi̱* xa̱ʼa̱ Jehová Ndióxi̱ ta̱ táku, ta̱ ta̱vá na̱ ñuu Israel chí Egipto’. 8 Nu̱úka ña̱yóʼo ka̱ʼa̱nna: ‘Chínaʼíi̱ xa̱ʼa̱ Jehová Ndióxi̱ ta̱ táku, ta̱ sa̱ndándikó na̱ se̱ʼe ta̱ Israel na̱ ni̱xa̱ʼa̱n xi̱ndoo nu̱ú ñuʼú ña̱ íyo chí norte ta saátu nu̱ú ndiʼika ñuʼú nu̱ú chi̱ndaʼíi̱na ni̱xa̱ʼa̱nna xi̱ndoona’. Ta na̱kán kundoona nu̱ú ñuʼúna”.
9 Ña̱yóʼo kúú ña̱ káʼa̱nra xíʼin na̱ profeta:
Cha̱chi ndiʼi níma̱i̱.
Kísi ndiʼi lekei̱.
Nda̱a̱ táki̱ʼva íyo iin ta̱a ta̱ ni̱xi̱nii saá íyoi̱,
nda̱a̱ táki̱ʼva íyo iin ta̱a ta̱ xíʼi ku̱a̱ʼání vino,
xa̱ʼa̱ Jehová kúú ña̱ íyoi̱ saá, ta saátu xa̱ʼa̱ tu̱ʼun yi̱i̱ ña̱ ni̱ka̱ʼa̱nra.
10 Saáchi nu̱ú ñuʼú yóʼo íyoní na̱ kísi̱ xíʼin na̱ kǒo níti̱ndaʼa̱ xíʼinna;
ñuʼú kúsuchíní-iniña xa̱ʼa̱ chiʼña ña̱ nda̱kiʼinña
ta yita ña̱ íyo chí nu̱ú ñuʼú yi̱chí ni̱yi̱chi̱ña.
Kéʼéna ña̱ va̱ása va̱ʼa ta xíniñúʼuna ndee̱ ña̱ kúúmiína ña̱ ixandi̱va̱ʼana xíʼin inkana.
11 “Na̱ profeta ta saátu na̱ su̱tu̱ ku̱yaku̱a̱na.*
Ta nda̱a̱ ini veʼi̱ nda̱ni̱ʼíi̱ ña̱ va̱ása va̱ʼa kéʼéna”, káchi Jehová.
12 “Xa̱ʼa̱ ña̱kán, yichi̱ nu̱ú ku̱a̱ʼa̱nna ndiʼvíní* kooña ta naaní kooña;
chindaʼánana ta ko̱yona.
Chindaʼíi̱ iin tu̱ndóʼo nu̱úna ku̱i̱ya̱ ña̱ ná ndatii̱n ku̱a̱chi xíʼinna”, káchi Jehová.
13 “Saáchi xi̱nii̱ ña̱ kininí íyo ña̱ kéʼé na̱ profeta na̱ ñuu Samaria.
Ña̱ káʼa̱nna xa̱ʼa̱, kuenta ña̱ Baal kúúña
ta sákuxíkana na̱ ñui̱ Israel.
14 Xi̱nii̱ ña̱ kininí íyo ña̱ kéʼé na̱ profeta ñuu Jerusalén.
Kísi̱na xíʼin na̱ kǒo níti̱ndaʼa̱ xíʼinna ta nina ña̱ vatá* káʼa̱nna.
Chíndeétáʼanna xíʼin na̱ ndi̱va̱ʼa-ini ta kǒo ndíkó-inina xa̱ʼa̱ ña̱ va̱ása va̱ʼa kéʼéna.
Nu̱ú yi̱ʼi̱ nda̱a̱ táki̱ʼva íyo na̱ xi̱ndoo ñuu Sodoma saá íyona,
ta na̱ ndóo ñuu yóʼo nda̱a̱ táki̱ʼva íyo na̱ xi̱ndoo ñuu Gomorra saá íyona”.
15 Xa̱ʼa̱ ña̱kán, ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel contra na̱ profeta:
“Taxii̱ ña̱ ná kaxína yu̱ku̱ o̱va̱
ta koʼona ti̱kui̱í tá kúúmií veneno.
Saáchi na̱ profeta ñuu Jerusalén, iníí ñuu yóʼo sánáʼa̱na ña̱ vatá”.*
16 Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel:
“Kǒo kuniso̱ʼondó ña̱ káʼa̱n na̱ profeta xíʼinndó.
Na̱ sándaʼvi ndóʼóva kúúna.
Visión ña̱ káʼa̱nna xíʼinndó níma̱ miívana kánaña
ta su̱ví Jehová níka̱ʼa̱nña xíʼinna.
17 Ndákundeéna káʼa̱nna ña̱yóʼo xíʼin na̱ kǒo íxato̱ʼó yi̱ʼi̱:
‘Jehová káʼa̱nra: “Va̱ʼaní kundoondó ta kǒo kundi̱ʼi-inindó”’.
Ta káʼa̱nna xíʼin ndiʼi na̱ so̱ʼoní:*
‘Kǒo ni iin tu̱ndóʼo kixi nu̱úndó’.
18 ¿Ndáana kúú na̱ xa̱a̱ nda̱kutáʼan xíʼin na̱ migo Jehová na̱ va̱ʼaní kítáʼan xíʼinra ña̱ va̱ʼa kunina ta kuniso̱ʼona tu̱ʼunra?
¿Ndáana kúú na̱ va̱ʼaní xíniso̱ʼo ña̱ káʼa̱nra?
19 Kotondó, ña̱ sáa̱ Jehová kooña nda̱a̱ táki̱ʼva íyo ta̱chí ña̱ ndeéní káni;
nda̱a̱ táki̱ʼva kéʼé ta̱chí ña̱ káva̱ saá keʼéña nuuña xi̱ní na̱ ndi̱va̱ʼaní-ini.
20 Nda̱a̱ ná xi̱nu ña̱ kúni̱ Jehová keʼéra xíʼin ndiʼi níma̱ra ta saátu nda̱a̱ tá ná sandíʼira keʼéraña, saá kúú ña̱ va̱ása sa̱a̱kara.
Ndóʼó kunda̱a̱ va̱ʼa inindó xa̱ʼa̱ ña̱yóʼo ki̱vi̱ so̱ndíʼi.
21 Yi̱ʼi̱ kǒo níchindaʼíi̱ na̱ profeta, soo na̱kán xínuna ni̱xa̱ʼa̱nna.
Kǒo níka̱ʼi̱n xíʼinna, soo na̱kán ni̱ka̱ʼa̱nna xa̱ʼa̱ ña̱ kuu.
22 Soo tá níxi̱kitáʼanna xíʼin na̱ migoi̱ na̱ va̱ʼaní kítáʼan xíʼi̱n,
chindeétáʼanvana xíʼin na̱ ñui̱ ña̱ kuniso̱ʼona ña̱ káʼi̱n
ta sandákoona yichi̱ ña̱ va̱ása va̱ʼa ki̱ʼinna ku̱a̱ʼa̱nna xíʼin ña̱ʼa ña̱ va̱ása va̱ʼa kéʼéna”.
23 “Yi̱ʼi̱ kúi̱ Ndióxi̱ ta̱ xíto ña̱ʼa ña̱ kúu yatin xíʼin ña̱ kúu xíkání”, káchi Jehová.
24 “¿Á íyo iin nu̱ú kivi koose̱ʼé* iin ta̱a nu̱ú kǒo kivi kunii̱ra?”, káchi Jehová.
“¿Á su̱ví yi̱ʼi̱ kúú ta̱ xíto ndiʼi ña̱ʼa ña̱ íyo chí ndiví xíʼin ña̱ íyo nu̱ú ñuʼú yóʼo?”, káchi Jehová.
25 “Na̱ profeta na̱ xíniñúʼu ki̱víi̱ ña̱ ka̱ʼa̱nna ña̱ vatá, xi̱niso̱ʼi̱ ña̱ káʼa̱nna ‘Íyo iin ña̱ ni̱xa̱níi̱, íyo iin ña̱ ni̱xa̱níi̱’. 26 ¿Nda̱a̱ ama sandákoo na̱ profeta yóʼo ka̱ʼa̱nna xa̱ʼa̱ ña̱ vatá? Na̱ profeta yóʼo káʼa̱nna xa̱ʼa̱ ña̱ vatá ña̱ ñúʼu níma̱na. 27 Xa̱ʼa̱ ña̱ nátúʼunna xa̱ʼa̱ xa̱ni ña̱ ni̱xa̱nína xíʼin inkana, kúni̱na ña̱ ná nandóso-ini na̱ ñui̱ xa̱ʼa̱ ki̱víi̱, nda̱a̱ táki̱ʼva na̱ndóso-ini na̱ yivána xa̱ʼa̱ ki̱víi̱ ku̱a̱chi ña̱ Baal. 28 Na̱ profeta na̱ kúúmií iin xa̱ni, ná natúʼunna xa̱ʼa̱ña; soo na̱ kúúmií tu̱ʼi̱n, viíní ná ka̱ʼa̱nna xa̱ʼa̱ ña̱ ni̱ka̱ʼi̱n”.
“Saáchi, ¿á inkáchi íyo xe̱ʼe̱* xíʼin trigo?”, káchi Jehová.
29 “¿Á su̱ví nda̱a̱ táki̱ʼva íyo ñuʼu̱ saá íyo tu̱ʼi̱n, ta íyotuña nda̱a̱ táki̱ʼva íyo martillo ña̱ sándiʼi-xa̱ʼa̱ kavá?”, káchi Jehová.
30 “Xa̱ʼa̱ ña̱kán, yi̱ʼi̱ taxii̱ castigo ndaʼa̱ na̱ profeta na̱ násama tu̱ʼi̱n ña̱ va̱ʼa ka̱ʼa̱nna xíʼin na̱ ñui̱ xa̱ʼa̱ ña̱ kúni̱ miína”, káchi Jehová.
31 “Yi̱ʼi̱ taxii̱ castigo ndaʼa̱ na̱ profeta, káchi Jehová, na̱ xíniñúʼu yáa̱na* ña̱ ka̱ʼa̱nna ‘Ta̱kán káchira’”.
32 “Yi̱ʼi̱ taxii̱ castigo ndaʼa̱ na̱ profeta na̱ káʼa̱n xa̱ʼa̱ xa̱ni ña̱ vatá, káchi Jehová, na̱ nátúʼun xa̱ʼa̱ ña̱ ni̱xa̱nína ta sákuxíkana na̱ ñui̱ xíʼin ña̱ vatá ña̱ káʼa̱nna ta saátu xa̱ʼa̱ ña̱ ni̱nuní kúnina”.
“Soo su̱ví yi̱ʼi̱ kúú ta̱ níchindaʼána ta kǒo chiñu níxaʼndai̱ nu̱úna. Xa̱ʼa̱ ña̱kán kǒo nda̱a̱ ni iin ña̱ va̱ʼa keʼéna xíʼin na̱ ñuu yóʼo”, káchi Jehová.
33 “Tá iin na̱ ñuu, iin na̱ profeta á iin na̱ su̱tu̱ ná nda̱ka̱tu̱ʼunna yóʼó ‘¿Ndáaña kúú ña̱ ni̱ka̱ʼa̱n Jehová ña̱ íyo nda̱a̱ táki̱ʼva íyo iin ña̱ʼa ña̱ ve̱ení?’,* yóʼó xíniñúʼu ka̱ʼún xíʼinna ‘“Ndóʼó kúú ña̱ʼa ña̱ ve̱ení yóʼo, ta sandákoovai̱ ndóʼó”, káchi Jehová’. 34 Tá iin na̱ profeta, iin na̱ su̱tu̱ á iin na̱ ñuu ná ka̱ʼa̱nna ‘Ña̱yóʼo kúú tu̱ʼun Jehová ña̱ íyo nda̱a̱ táki̱ʼva íyo iin ña̱ʼa ña̱ ve̱ení’, taxii̱ castigo ndaʼa̱ na̱ yiví kán xíʼin na̱ veʼena. 35 Ña̱yóʼo kúú ña̱ káʼa̱n iin tá iin ndóʼó xíʼin na̱ ñanindó ta saátu xíʼin na̱ táʼanndó: ‘¿Ndáaña nda̱kuiin Jehová? ¿Ndáaña ni̱ka̱ʼa̱n Jehová?’. 36 Soo va̱ása ka̱ʼa̱nkandó xa̱ʼa̱ tu̱ʼun Jehová ña̱ íyo nda̱a̱ táki̱ʼva íyo iin ña̱ʼa ña̱ ve̱ení, saáchi ña̱ káʼa̱n miíndó kúú ña̱ʼa ña̱ ve̱ení, ta ndóʼó na̱samandó tu̱ʼun Ndióxi̱ ta̱ táku, Jehová ta̱ xáʼndachíñu nu̱ú na̱ ángel ta̱ kúú Ndióxi̱yó.
37 ”Ña̱yóʼo kúú ña̱ ka̱ʼún xíʼin ta̱ profeta: ‘¿Ndáaña ni̱ka̱ʼa̱n Jehová xíʼún? ¿Ndáaña nda̱kuiin Jehová? 38 Tá ndóʼó ndákundeéndó káʼa̱nndó “Tu̱ʼun Jehová íyoña nda̱a̱ táki̱ʼva íyo iin ña̱ʼa ña̱ ve̱ení”, ña̱yóʼo kúú ña̱ káʼa̱n Jehová: “Xa̱ʼa̱ ña̱ ndákundeéndó káʼa̱nndó ‘Tu̱ʼun Jehová íyoña nda̱a̱ táki̱ʼva íyo iin ña̱ʼa ña̱ ve̱ení’ ni xa̱a̱ ni̱ka̱ʼi̱n xíʼinndó ‘Va̱ása ka̱ʼa̱nkandó “Tu̱ʼun Jehová íyoña nda̱a̱ táki̱ʼva íyo iin ña̱ʼa ña̱ ve̱ení”’. 39 Xa̱ʼa̱ ña̱kán, ndaniʼii̱ ndóʼó ta xíkání katai̱ ndóʼó ku̱ʼu̱nndó nu̱úi̱, miíndó ta saátu ñuu ña̱ ta̱xii̱ ndaʼa̱ndó xíʼin na̱ táʼanndó na̱ xi̱ndoo xi̱naʼá. 40 Ta yi̱ʼi̱ taxii̱ ña̱ ná kixi tu̱ndóʼo nu̱úndó ta kukaʼanní nu̱úndó ndiʼi tiempo, ta kǒo na̱ nandóso-ini xa̱ʼa̱ ña̱yóʼo”’”.