Jeremías
22 Ña̱yóʼo kúú ña̱ káʼa̱n Jehová: “Kúáʼan veʼe* ta̱ rey ñuu Judá ta ka̱ʼún xíʼinra. 2 Ña̱yóʼo ka̱ʼún xíʼinra: ‘Kuniso̱ʼo ña̱ káʼa̱n Jehová, yóʼó ta̱ rey ñuu Judá ta̱ íyo nu̱ú trono ta̱ David, ta saátu ná kuniso̱ʼo na̱ káchíñu nu̱ún xíʼin na̱ ñuún na̱ kíʼvi chí yéʼé yóʼo. 3 Ña̱yóʼo kúú ña̱ káʼa̱n Jehová: “Nda̱kúní ndatiinndó ku̱a̱chi ta keʼéndó ña̱ va̱ʼa. Sakǎkundó na̱ yiví nu̱ú na̱ kúni̱ ixakuíʼná ña̱ʼana. Va̱ása ixandi̱va̱ʼandó xíʼin na̱ ke̱e inka ñuu ta ni kǒo saxóʼvi̱ndó* na̱ ni̱xi̱ʼi̱ yivá ni ná ni̱xi̱ʼi̱ yii̱. Ta va̱ása kaʼníndó na̱ yiví na̱ kǒo ku̱a̱chi kúúmií lugar yóʼo. 4 Saáchi tá ná chikaa̱ndó ndee̱ ña̱ kundiku̱nndó ña̱ káʼi̱n xíʼinndó, na̱ rey na̱ ndóo nu̱ú trono ta̱ David kundósona sa̱tá carreta ta kosona* kuáyi̱ ki̱ʼvina chí yéʼé veʼe yóʼo, miína, na̱ káchíñu nu̱úna xíʼin na̱ ñuuna”’.
5 ”‘Soo tá ndóʼó kǒo kándíxandó ña̱ káʼi̱n xíʼinndó, chínaʼíi̱* xa̱ʼa̱ miíi̱, káchi Jehová, ña̱ ndiʼi-xa̱ʼa̱va veʼe yóʼo’.
6 ”Saáchi ña̱yóʼo kúú ña̱ káʼa̱n Jehová xa̱ʼa̱ veʼe ta̱ rey ñuu Judá:
‘Nda̱a̱ táki̱ʼva íyo Galaad saá íyoún nu̱úi̱,
nda̱a̱ táki̱ʼva íyo xi̱ní yuku̱ Líbano.
Soo ndasai̱ yóʼó iin ñuʼú yi̱chí;
ndiʼi ñuu ña̱ kúúmiíún kǒoka na̱ kundoo nu̱úña.
7 Ta ndaka̱xii̱n na̱ sandíʼi-xa̱ʼa̱ yóʼó,
iin tá iin na̱yóʼo kuniʼina ña̱ʼa ña̱ xíniñúʼuna ña̱ kánitáʼanna.
Na̱yóʼo kaʼndana tú cedro mií tú va̱ʼaka tú kúúmiíún
ta kaʼminanú.
8 ”’Ku̱a̱ʼání na̱ inka ñuu ya̱ʼana ñuu yóʼo ta ka̱ʼa̱nna xíʼin táʼanna: “¿Nda̱chun ke̱ʼé Jehová ña̱yóʼo xíʼin ñuu ña̱ káʼnuní yóʼo?”. 9 Ta ndakuiinna: “Saáchi sa̱ndákoona ña̱ kundiku̱nna trato ña̱ ke̱ʼé Jehová Ndióxi̱na xíʼinna, ta xi̱kuxítína nu̱ú inka ndióxi̱ ta nda̱sakáʼnunaña”’.
10 Va̱ása kuakundó xa̱ʼa̱ ta̱ rey ta̱ xa̱a̱ ni̱xi̱ʼi̱,
ni kǒo kusuchí-inindó xa̱ʼa̱ra.
Va̱ʼaka ndeéní kuakundó xa̱ʼa̱ ta̱ ku̱a̱ʼa̱n
saáchi va̱ása ndikókara ña̱ kotora ñuʼú nu̱ú ka̱kura.
11 ”Ña̱yóʼo kúú ña̱ káʼa̱n Jehová xa̱ʼa̱ ta̱ Salum* ta̱ kúú rey chí Judá, ta̱ nda̱kiʼin xáʼndachíñu nu̱ú yivára ta̱ Josías, ta̱ nda̱kiʼinna ku̱a̱ʼa̱n inka lugar: ‘Nda̱a̱ ni loʼo va̱ása ndikókara. 12 Saáchi kuvira ñuu nu̱ú nda̱kiʼinnara ku̱a̱ʼa̱nra ta va̱ása ndikókara kunira ñuʼú yóʼo’.
13 Ndáʼviní na̱ va̱ása nda̱kú íyo ini tá íxava̱ʼana veʼena,
na̱ va̱ása nda̱kú íyo ini tá íxava̱ʼana cuarto ña̱ íyo chí xi̱ní veʼena,
saáchi ña̱ kéʼéna kúú ña̱ káchíñu inkana nu̱úna soo kǒo ña̱ʼa táxina ndaʼa̱na
ta ni va̱ása xíínna chaʼvinana;
14 na̱ káʼa̱n: ‘Ixava̱ʼi̱ iin veʼe ña̱ káʼnuní
ta cuarto ña̱ koo chí xi̱níña ndíka̱ní koo iniña.
Ixava̱ʼi̱ ventanaña
ta chikai̱ cedro sa̱tá nama̱ iniña ta ndakaʼyii̱ña xíʼin color kúáʼa’.
15 ¿Á ndakundeún kaʼndachíñún xa̱ʼa̱ ña̱ xíniñúʼún ku̱a̱ʼáka yitu̱n tú cedro nu̱ú inkana?
Saátu yiváún xi̱xira ta xi̱ʼira,
soo nda̱kúní íyo ña̱ ke̱ʼéra, va̱ʼaní ni̱xi̱yoña
ta va̱ʼaní ka̱na ña̱ ke̱ʼéra.
16 Ta̱kán nda̱kúní xi̱ndatiinra ku̱a̱chi xíʼin na̱ nda̱ʼví ta saátu xíʼin na̱ xóʼvi̱* tá xi̱taxina ku̱a̱chi,
ta va̱ʼaní ka̱na ndiʼi ña̱ ke̱ʼéra.
‘¿Á su̱ví ña̱yóʼo kúú ña̱ kúni̱ kachi ña̱ kunda̱a̱-inina xa̱ʼíi̱?’, káchi Jehová.
17 ‘Soo yóʼó ndiʼi tiempo ndákanixi̱níún ta ndúkún ki̱ʼva ña̱ sandáʼviún inkana ña̱ va̱ʼa kuumiíún ku̱a̱ʼáka ña̱ʼa,
ña̱ kaʼníún na̱ kǒo ku̱a̱chi kúúmiíi̱,
ña̱ ka̱ʼún ña̱ vatá* ta sandáʼviún’.
18 ”Xa̱ʼa̱ ña̱kán, ña̱yóʼo kúú ña̱ káʼa̱n Jehová xa̱ʼa̱ ta̱ Jehoiaquim se̱ʼe ta̱ Josías, ta̱ kúú rey ñuu Judá:
‘Kǒo kusuchí-inina xa̱ʼa̱ra ta ka̱ʼa̱nna:
“Ndáʼviníún ñani miíi̱. Ndáʼviníún ku̱ʼva miíi̱”.
Kǒo kusuchí-inina xa̱ʼa̱ra ta ka̱ʼa̱nna:
“Ndáʼviní ta̱ rey. Ña̱ xi̱ndayáʼvira ndi̱ʼi-xa̱ʼa̱vaña”.
19 Tá ná kuvira, nda̱a̱ táki̱ʼva keʼéna xíʼin iin burro tí ni̱xi̱ʼi̱ saá keʼéna xíʼinra,
kañuunara* ta sakánanara chí ke̱ʼe,*
sakánanara chí sa̱tá yéʼé ñuu Jerusalén’.
20 Kúáʼan chí yuku̱ Líbano ta kana kóʼún,
ndeéní ka̱ʼún chí Basán
ta kana kóʼún nda̱a̱ chí Abarim,
saáchi ndiʼi na̱ xi̱kuni̱ní xi̱xini yóʼó ndi̱ʼi-xa̱ʼa̱vana.
21 Yi̱ʼi̱ ni̱ka̱ʼa̱nvai̱ xíʼún tá xi̱ndakanixi̱níún ña̱ va̱ʼaní íyoún.
Soo yóʼó ni̱ka̱ʼún xíʼi̱n: ‘Va̱ása kuniso̱ʼi̱’.
Saá kéʼún nda̱a̱ tá loʼovíún,
nda̱a̱ ni iin yichi̱ kǒo kándíxaún ña̱ káʼi̱n.
22 Kixi ta̱chí ndakiʼinña ndiʼi na̱ pastor na̱ kúúmiíún,
ta na̱ ta̱ni̱ún na̱ xi̱kuni̱níún xi̱xiniún ndakiʼinnana ku̱ʼu̱nna inka ñuu.
Tasaá kukaʼanní nu̱ún ta ndakava-iniún xa̱ʼa̱ ndiʼi tu̱ndóʼo ña̱ kixi nu̱ún.
23 Yóʼó ñá íyo chí Líbano,
ñá íyo chi̱ʼyo̱ tañu tú cedro,
ndeéní tanaún tá ná kixaa̱ tu̱ndóʼo nu̱ún,
xo̱ʼvi̱níún nda̱a̱ táki̱ʼva xóʼvi̱ iin ñaʼá ñá káku se̱ʼe”.
24 “‘Chínaʼíi̱ xa̱ʼa̱ miíi̱, káchi Jehová, ni yóʼó ta̱ Conías* se̱ʼe ta̱ Jehoiaquim, ta̱ kúú rey chí Judá ná koún nda̱a̱ táki̱ʼva íyo seʼe̱* ña̱ xíniñúʼi̱ ña̱ chikai̱ sello ña̱ ndíkaa̱ chí ndaʼa̱ kúaʼi̱, tavávai̱ yóʼó ndaʼíi̱. 25 Ndataxii̱ yóʼó ndaʼa̱ na̱ kúni̱ kaʼní yóʼó, ndataxii̱ yóʼó ndaʼa̱ na̱ yíʼviún xíniún, ndaʼa̱ ta̱ rey Nabucodonosor* ta̱ ñuu Babilonia ta saátu ndaʼa̱ na̱ caldeo. 26 Chindaʼíi̱ yóʼó xíʼin siʼún ñá sa̱káku yóʼó nu̱ú iin ñuʼú nu̱ú kǒo níkakundó ta kán kuvindó. 27 Ta na̱yóʼo nda̱a̱ ni loʼo va̱ása ndikókana nu̱ú ñuʼú ña̱ kúni̱na ndikóna nu̱ú.
28 ¿Á nda̱a̱ táki̱ʼva íyo iin ki̱si láʼví ña̱ nda̱a̱ ni loʼo va̱ása ndáyáʼvi saá íyo ta̱ Conías,
iin ki̱si ña̱ kǒo kúni̱na?
¿Nda̱chun sa̱kánanara chí ni̱nu xíʼin ndiʼi na̱ se̱ʼera
ta chi̱ndaʼánana ku̱a̱ʼa̱nna nu̱ú iin ñuʼú ña̱ va̱ása xíni̱na?’.
29 Ndóʼó na̱ yiví na̱ ndóo nu̱ú ñuʼú, kuniso̱ʼondó* ña̱ káʼa̱n Jehová.
30 Ña̱yóʼo kúú ña̱ káʼa̱n Jehová:
‘Ndakaʼyindó ki̱vi̱ ta̱ ta̱a yóʼo nda̱a̱ táki̱ʼva íyo iin ta̱ kǒo se̱ʼe,
ta koora nda̱a̱ táki̱ʼva íyo iin ta̱a ta̱ kǒo kana vií ña̱ kéʼé ndiʼi tiempo ña̱ kutakura;
saáchi nda̱a̱ ni iin na̱ se̱ʼera va̱ása kuchiñuna
kundoona nu̱ú trono ta̱ David ta kaʼndachíñu tukuna nu̱ú na̱ ñuu Judá’”.