Jeremías

25 Tá xa̱a̱ ku̱mí ku̱i̱ya̱ xáʼndachíñu ta̱ Jehoiaquim se̱ʼe ta̱ Josías, ta̱ xi̱kuu rey ñuu Judá, ta xa̱a̱ iin ku̱i̱ya̱ xáʼndachíñu ta̱ rey Nabucodonosor* ta̱ ñuu Babilonia, ni̱ka̱ʼa̱nna ña̱yóʼo xíʼin ta̱ Jeremías xa̱ʼa̱ ndiʼi na̱ ñuu Judá. 2 Ña̱yóʼo kúú ña̱ ni̱ka̱ʼa̱n ta̱ profeta Jeremías xa̱ʼa̱ ndiʼi na̱ ñuu Judá xíʼin ndiʼi na̱ ndóo chí Jerusalén:

3 “Tá xa̱a̱ 13 ku̱i̱ya̱ xáʼndachíñu ta̱ rey Josías se̱ʼe ta̱ Amón, ta̱ xi̱kuu rey ñuu Judá, iinsaá nda̱a̱ ki̱vi̱ vitin (xa̱a̱ 23 ku̱i̱ya̱ kúúña) ndákundeé Jehová káʼa̱nra xíʼi̱n, ta tuku ta tuku káʼi̱n xíʼinndó xa̱ʼa̱ ña̱yóʼo; soo ndóʼó kǒo xíínndó kuniso̱ʼondó. 4 Tuku ta tuku xi̱chindaʼá Jehová na̱ profeta na̱ xi̱kachíñu nu̱úra ña̱ ku̱ʼu̱nna nu̱úndó, soo ndóʼó kǒo níkandíxandó ta ni kǒo níxiniso̱ʼondó ña̱ ni̱ka̱ʼa̱nna xíʼinndó. 5 Na̱yóʼo xi̱kaʼa̱nna xíʼinndó: ‘Ixandó ña̱ ma̱ní, iin tá iinndó sandákoondó yichi̱ ña̱ va̱ása va̱ʼa ku̱a̱ʼa̱nndó xíʼin ña̱ va̱ása va̱ʼa kéʼéndó; tasaá kúú ña̱ ndakundeéndó kundoondó nu̱ú ñuʼú ña̱ ta̱xi Jehová ndaʼa̱ndó xíʼin ndaʼa̱ na̱ táʼanndó na̱ xi̱ndoo xi̱naʼá xa̱a̱ íyo ku̱a̱ʼání tiempo. 6 Kǒo kundiku̱nndó inkaka ndióxi̱, kǒo kachíñundó nu̱úña ta ni kǒo kuxítíndó nu̱úña, tasaá sasáa̱ndó yi̱ʼi̱ xíʼin ña̱ʼa ña̱ i̱xava̱ʼandó xíʼin ndaʼa̱ndó, saáchi tá ná keʼéndó ña̱yóʼo chindaʼíi̱ iin tu̱ndóʼo nu̱úndó’.

7 ”‘Soo ndóʼó kǒo níxiinndó kuniso̱ʼondó yi̱ʼi̱, káchi Jehová, saáchi miíndó ndu̱kú tu̱ndóʼo ña̱ ndo̱ʼondó, chi sa̱sáa̱ndó yi̱ʼi̱ xíʼin ña̱ʼa ña̱ i̱xava̱ʼandó ndasakáʼnundó’.

8 ”Xa̱ʼa̱ ña̱kán, ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: ‘“Xa̱ʼa̱ ña̱ kǒo níxiinndó kuniso̱ʼondó ña̱ ni̱ka̱ʼi̱n xíʼinndó, 9 kanai̱ ndiʼi na̱ familia na̱ ndóo chí norte, káchi Jehová, kanai̱ ta̱ rey Nabucodonosor* ta̱ káchíñu nu̱úi̱, ta na̱yóʼo kixina kanitáʼanna xíʼin na̱ ndóo nu̱ú ñuʼú yóʼo ta saátu xíʼin ndiʼi na̱ ñuu na̱ ndóo yatin yóʼo. Sandíʼi-xa̱ʼíi̱ ndóʼó ta ndiʼi na̱ ná kunda̱a̱-ini xa̱ʼa̱ ña̱yóʼo kundasína kunina ndóʼó, kusi̱kindaana ndóʼó ta ndiʼi-xa̱ʼa̱ va̱ʼa ñuundó. 10 Kǒo kuniso̱ʼokana ña̱ ndáʼyi̱ kóʼó* na̱ yiví xa̱ʼa̱ ña̱ kúsi̱í-inina, ta ni kǒo kuniso̱ʼokana ta̱chí ta̱ ti̱ndaʼa̱ ni ñá ti̱ndaʼa̱, ni ña̱ níʼi ña̱ ndíkona xíʼin molino ndaʼa̱,* ta kǒo kutuu̱nka lámpara. 11 Ta ñuʼú yóʼo ndiʼi-xa̱ʼa̱ va̱ʼaña, ta na̱ ná kuniña yi̱ʼvínína, ta ndiʼi na̱ ñuu yóʼo 70 ku̱i̱ya̱ kachíñuna nu̱ú ta̱ rey ñuu Babilonia”’.

12 ”‘Soo tá ná xi̱nu 70 ku̱i̱ya̱, taxii̱ castigo ndaʼa̱ ta̱ rey ñuu Babilonia ta saátu ndaʼa̱ na̱ ñuu kán xa̱ʼa̱ ña̱ va̱ása va̱ʼa ke̱ʼéna, káchi Jehová, ta ndasai̱ ñuʼú na̱ caldeo iin ñuʼú yi̱chí nu̱ú kǒo nda̱a̱ ni iin ña̱ʼa, tasaá kooña ndiʼi tiempo. 13 Saxínui̱ ndiʼi ña̱ ni̱ka̱ʼi̱n kundoʼo ñuʼú yóʼo, ndiʼi ña̱ ni̱ka̱ʼyi̱ nu̱ú libro yóʼo ña̱ ni̱ka̱ʼa̱n ta̱ Jeremías kundoʼo ndiʼi na̱ ñuu. 14 Saáchi ku̱a̱ʼání na̱ ñuu xíʼin na̱ rey na̱ ndáyáʼviní, ndasanana na̱ káchíñundáʼvi nu̱úna; ta yi̱ʼi̱ taxii̱ castigo ndaʼa̱na xa̱ʼa̱ ña̱ʼa ña̱ va̱ása va̱ʼa kéʼéna ta saátu xa̱ʼa̱ ña̱ íxandi̱va̱ʼana xíʼin inkana’”.

15 Saáchi ña̱yóʼo kúú ña̱ ni̱ka̱ʼa̱n Jehová, Ndióxi̱ na̱ ñuu Israel xíʼi̱n: “Kiʼin copa vino ña̱ níʼii̱ yóʼo, nu̱ú ndíkaa̱ ña̱ sái̱ ta taxiña ná koʼo ndiʼi na̱ ñuu na̱ ná chindaʼíi̱ yóʼó ku̱ʼún nu̱ú. 16 Koʼona ta nda̱a̱ ndivandaana, ta keʼéna nda̱a̱ táki̱ʼva kéʼé na̱ sána tá ná chindaʼíi̱ na̱ sáa̱-ini xíniñaʼá ña̱ ku̱ʼu̱nna kanitáʼanna xíʼinna xíʼin espada”.

17 Xa̱ʼa̱ ña̱kán, ki̱ʼii̱n copa ña̱ níʼi Jehová ta ta̱xii̱ña xi̱ʼi ndiʼi na̱ ñuu na̱ chi̱ndaʼá Jehová yi̱ʼi̱ nu̱ú: 18 na̱ siʼna xi̱ʼi copa yóʼo kúú na̱ ñuu Jerusalén, ndiʼi ñuu ña̱ íyo chí Judá, na̱ rey xíʼin na̱ níʼi yichi̱ nu̱ú na̱ ñuu, ña̱ va̱ʼa ná ndiʼi-xa̱ʼa̱ ñuuna ta na̱ ná kuni ña̱yóʼo yi̱ʼvínína, kusi̱kindaanana ta sakúisochiʼñanana,* nda̱a̱ táki̱ʼva xa̱a̱ kúu vitin; 19 ta tándi̱ʼi xi̱ʼi ta̱ faraón ta̱ rey ñuu Egipto ña̱yóʼo, ta saátu ndiʼi na̱ ñuu, na̱ káchíñu nu̱úra, na̱ níʼi yichi̱ nu̱ú na̱ ñuu, 20 ta saátu ndiʼika na̱ ñuu na̱ nda̱kutáʼan ndóo kán; ndiʼi na̱ xáʼndachíñu nu̱ú ñuʼú ña̱ íyo chí Uz; ndiʼi na̱ xáʼndachíñu nu̱ú ñuʼú na̱ filisteo, Asquelón, Gaza, Ecrón, ta saátu ndiʼi na̱ xi̱ndoo chí Asdod; 21 Edom, Moab xíʼin na̱ ammonita; 22 ndiʼi na̱ xáʼndachíñu chí Tiro, ndiʼi na̱ xáʼndachíñu chí Sidón xíʼin ndiʼi na̱ xáʼndachíñu chí isla ña̱ íyo chí mar; 23 na̱ ndóo chí Dedán, Temá, Buz ta saátu ndiʼi na̱ xáʼnda ixí* xa̱ʼa̱-sóʼo; 24 ndiʼi na̱ xáʼndachíñu nu̱ú na̱ árabe xíʼin na̱ xáʼndachíñu nu̱ú ndiʼi na̱ nda̱kutáʼan ndóo chí nu̱ú ñuʼú yi̱chí; 25 ta saátu ndiʼi na̱ xáʼndachíñu nu̱ú na̱ ndóo chí Zimrí, ndiʼi na̱ xáʼndachíñu nu̱ú na̱ ndóo chí Elam xíʼin ndiʼi na̱ xáʼndachíñu nu̱ú na̱ medo; 26 ndiʼi na̱ xáʼndachíñu chí norte, na̱ ndóo yatin xíʼin na̱ ndóo xíká, iin tá iin na̱yóʼo xi̱ʼi copa, ta saátu ndiʼika na̱ ñuu na̱ ndóo nu̱ú ñuʼú yóʼo; ta ta̱ rey ñuu Sesac* kúú ta̱ koʼo copa yóʼo tá xa̱a̱ ndi̱ʼi xi̱ʼi ndiʼi na̱yóʼo.

27 “Ta xíniñúʼu ka̱ʼún xíʼinna: ‘Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: “Koʼondó, xi̱niindó, nduxanndó, nduvandó ta va̱ása ndako̱okandó saáchi chindaʼíi̱ na̱ sáa̱-ini xíni ndóʼó ña̱ kanitáʼanna xíʼinndó”’. 28 Soo tá kǒo xíínna ndakiʼinna copa ña̱ táxiún koʼona, xíniñúʼu ka̱ʼún xíʼinna: ‘Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: “Xíniñúʼu koʼovandóña. 29 Saáchi tá siʼnaka nu̱ú ñuu ña̱ níʼi ki̱víi̱ ná chindaʼíi̱ tu̱ndóʼo, ¿á ka̱ku ndóʼó ta va̱ása ndakiʼinndó castigo?”’.

”‘Ndakiʼinvandó castigo, saáchi chindaʼíi̱ na̱ kuniʼi espada ña̱ ku̱ʼu̱nna kanitáʼanna xíʼin ndiʼi na̱ ndóo nu̱ú ñuʼú’, káchi Jehová ta̱ xáʼndachíñu nu̱ú na̱ ángel.

Ndeéní nda̱ʼyi̱ra contra lugar nu̱ú ni̱xi̱yora.

Miíra ndatiin ku̱a̱chi xíʼin ndiʼi na̱ ndóo nu̱ú ñuʼú.

Ta ndataxira ndiʼi na̱ kéʼé ña̱ va̱ása va̱ʼa ña̱ kaʼnínana xíʼin espada’, káchi Jehová.

32 Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel:

33 ”’Ta na̱ ná kuvi ixaa Jehová ki̱vi̱ kán, kundoona iníísaá nu̱ú ñuʼú. Kǒo ni iin na̱ kusuchí-ini xa̱ʼa̱na, va̱ása ndakayanana ta ni va̱ása sandúxu̱nnana. Xa̱a̱na koona nda̱a̱ táki̱ʼva íyo si̱ʼví ña̱ ndóo nu̱ú ñuʼú’.

34 Ndóʼó na̱ pastor, kuakundó ta nda̱ʼyi̱ kóʼóndó.