Jeremías

26 Tá sa̱kán ki̱xáʼa xáʼndachíñu ta̱ Jehoiaquim se̱ʼe ta̱ Josías ta̱ rey ñuu Judá, Jehová ni̱ka̱ʼa̱nra ña̱yóʼo xíʼin ta̱ Jeremías: 2 “Ña̱yóʼo kúú ña̱ káʼa̱n Jehová: ‘Kúáʼan ta kundichiún chí yéʼé veʼe Jehová ta ka̱ʼún xíʼin* ndiʼi na̱ yiví na̱ ke̱e ndiʼi ñuu ña̱ íyo chí Judá, na̱ va̱xi chí veʼe Jehová ña̱ ndasakáʼnunara.* Ka̱ʼa̱n xíʼin ndiʼina xa̱ʼa̱ ña̱ ka̱ʼi̱n xíʼún; kǒo kasi yuʼún xa̱ʼa̱ nda̱a̱ ni iin tu̱ʼun. 3 Sana kuniso̱ʼovana ta iin tá iinna sandákoona yichi̱ ña̱ va̱ása va̱ʼa ña̱ ki̱ʼinna ku̱a̱ʼa̱nna, tasaá kǒo chindaʼákai̱ tu̱ndóʼo ña̱ nda̱kanixi̱níi̱ chindaʼíi̱ nu̱úna xa̱ʼa̱ ña̱ va̱ása va̱ʼa kéʼéna. 4 Ka̱ʼa̱n xíʼinna: “Ña̱yóʼo kúú ña̱ káʼa̱n Jehová: ‘Tá ndóʼó kǒo xíínndó kuniso̱ʼondó ña̱ káʼi̱n xíʼinndó ta ni kǒo ndíku̱nndó ley ña̱ xa̱a̱ ta̱xii̱ ndaʼa̱ndó, 5 ni va̱ása xíniso̱ʼondó tu̱ʼun ña̱ káʼa̱n na̱ profeta na̱ káchíñu nu̱úi̱, na̱ xa̱a̱ tuku ta tuku chíndaʼíi̱ nu̱úndó soo ni saá kǒo xíínndó kuniso̱ʼondó ña̱ káʼa̱nna, 6 saá kúú ña̱ nandóso-inii̱ xa̱ʼa̱ veʼe yóʼo nda̱a̱ táki̱ʼva ke̱ʼíi̱ xíʼin Siló, ta sandíʼi-xa̱ʼíi̱ ñuu yóʼo ta ndiʼi na̱ ñuu na̱ ndóo nu̱ú ñuʼú yóʼo ka̱ʼa̱nna xa̱ʼa̱ ña̱ ndo̱ʼoña tá ná chikaa̱na chiʼña inkana’”’”.

7 Na̱ su̱tu̱, na̱ profeta xíʼin ndiʼi na̱ ñuu xi̱niso̱ʼona ña̱ ni̱ka̱ʼa̱n ta̱ Jeremías ña̱yóʼo chí veʼe Jehová. 8 Tá sa̱ndíʼi ta̱ Jeremías ni̱ka̱ʼa̱nra ndiʼi ña̱ ni̱ka̱ʼa̱n Jehová xíʼinra ña̱ ka̱ʼa̱nra xíʼin ndiʼi na̱ ñuu, ndi̱ku̱n saá na̱ su̱tu̱, na̱ profeta xíʼin ndiʼi na̱ ñuu ti̱innara ta ni̱ka̱ʼa̱nna xíʼinra: “Ta̱ kuvi kúúvaún. 9 ¿Nda̱chun xi̱niñúʼún ki̱vi̱ Jehová ña̱ ni̱ka̱ʼún ‘Veʼe yóʼo kundoʼoña nda̱a̱ táki̱ʼva ndo̱ʼo Siló ta ñuu yóʼo ndiʼi-xa̱ʼa̱ña ta kǒoka na̱ kundoo nu̱úña’?”. Ta ndiʼi na̱ ñuu ni̱ka̱va̱nduuna ta̱ Jeremías chí veʼe Jehová.

10 Tá ku̱ndaa̱-ini na̱ níʼi yichi̱ nu̱ú na̱ ñuu Judá xa̱ʼa̱ tu̱ʼun yóʼo, ke̱ena chí veʼe* ta̱ rey ta ni̱xa̱ʼa̱nna chí veʼe Jehová ta xi̱kundoona chí nu̱ú íyo yéʼé xa̱á nu̱ú kíʼvina veʼe Jehová. 11 Na̱ su̱tu̱ xíʼin na̱ profeta ni̱ka̱ʼa̱nna xíʼin na̱ níʼi yichi̱ nu̱ú na̱ ñuu ta saátu xíʼin ndiʼi na̱ ñuu: “Ta̱ ta̱a yóʼo xíniñúʼu kuvira, saáchi nda̱a̱ táki̱ʼva xa̱a̱ xi̱niso̱ʼondó, ni̱ka̱ʼa̱nra ña̱ kixi iin tu̱ndóʼo káʼnu nu̱ú ñuu yóʼo”.

12 Tasaá ni̱ka̱ʼa̱n ta̱ Jeremías xíʼin na̱ níʼi yichi̱ nu̱ú na̱ ñuu ta saátu xíʼin ndiʼi na̱ ñuu: “Jehová kúú ta̱ chi̱ndaʼá yi̱ʼi̱ ña̱ ka̱ʼi̱n xa̱ʼa̱ tu̱ndóʼo ña̱ kixi nu̱ú veʼe yóʼo ta saátu nu̱ú ñuu yóʼo, nda̱a̱ táki̱ʼva íyo ña̱ xa̱a̱ xi̱niso̱ʼondó. 13 Ña̱kán, vitin nasamandó ki̱ʼva ña̱ íyondó xíʼin ña̱ kéʼéndó ta kandíxandó ña̱ káʼa̱n Jehová Ndióxi̱yó, tasaá kǒo chindaʼáka Jehová tu̱ndóʼo ña̱ ni̱ka̱ʼa̱nra kixi nu̱úndó. 14 Soo yi̱ʼi̱, ndaʼa̱vandó íyoi̱ ta kivi keʼéndó xíʼi̱n nda̱a̱ ndáaka ña̱ va̱ʼa túvi miívandó. 15 Soo kǒo kaka-inindó ña̱ tá ná kaʼníndó yi̱ʼi̱, miíndó, ñuu yóʼo xíʼin na̱ yiví na̱ ndóo yóʼo kuumiíndó ku̱a̱chi xa̱ʼa̱ ni̱íi̱ chi kǒo ku̱a̱chi kúúmiíi̱, saáchi mií Jehová kúú ta̱ chi̱ndaʼá yi̱ʼi̱ ña̱ ka̱ʼi̱n ndiʼi ña̱ xa̱a̱ xi̱niso̱ʼondó”.

16 Tasaá, na̱ níʼi yichi̱ nu̱ú na̱ ñuu xíʼin ndiʼi na̱ ñuu ni̱ka̱ʼa̱nna xíʼin na̱ su̱tu̱ ta saátu xíʼin na̱ profeta: “Kǒo xíniñúʼu kuviví ta̱ ta̱a yóʼo xa̱ʼa̱ ña̱ ke̱ʼéra, saáchi xíʼin ki̱vi̱ Jehová Ndióxi̱yó kúú ña̱ ni̱ka̱ʼa̱nra xíʼinyó”.

17 Ta saátu sava na̱ níʼi yichi̱ nu̱ú na̱ ñuu* nda̱kunditana ta ki̱xáʼana káʼa̱nna xíʼin na̱ ñuu na̱ nda̱kutáʼan kán: 18 “Ta̱ Miqueas ta̱ ñuu Moréset, ta̱ xi̱kuu profeta tá tiempo ña̱ ni̱xi̱yo ta̱ rey Ezequías ta̱ ñuu Judá, ni̱ka̱ʼa̱nra xíʼin ndiʼi na̱ ñuu Judá: ‘Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel:

19 ”¿Á xa̱ʼní ta̱ rey Ezequías ta̱ ñuu Judá xíʼin ndiʼi na̱ ñuu kán ta̱ profeta Miqueas? ¿Á su̱ví ña̱ ke̱ʼéra kúú ña̱ ni̱yi̱ʼvíra xi̱nira Jehová ta ni̱ka̱ʼa̱n-ndáʼvira xíʼin Jehová, ta Jehová kǒo níchindaʼákara tu̱ndóʼo ña̱ nda̱kanixi̱níra chindaʼára nu̱úna? Soo miíyó kúni̱yó chikaa̱yó miíyó nu̱ú iin tu̱ndóʼo káʼnu.

20 ”Ta saátu ni̱xi̱yo inka ta̱a ta̱ xi̱kuu profeta ta xi̱xiniñúʼura ki̱vi̱ Jehová ña̱ ka̱ʼa̱nra, ta̱yóʼo xi̱kuu ta̱ Uriya se̱ʼe ta̱ Semaya ta̱ ñuu Quiryat-Jearim, ta nda̱a̱ táki̱ʼva íyo ña̱ ni̱ka̱ʼa̱n ta̱ Jeremías saátu íyo ña̱ ni̱ka̱ʼa̱nra kundoʼo ñuu yóʼo xíʼin iníísaá país yóʼo. 21 Tá xi̱niso̱ʼo ta̱ rey Jehoiaquim, ndiʼi na̱ ta̱a na̱ ndakúní na̱ kítáʼan xíʼinra ta saátu ndiʼi na̱ níʼi yichi̱ nu̱ú na̱ ñuu xa̱ʼa̱ ña̱ ni̱ka̱ʼa̱nra, ta̱ rey Jehoiaquim nda̱kaxinra ña̱ kaʼníra ta̱ Uriya. Tá ku̱ndaa̱-ini ta̱ Uriya xa̱ʼa̱ ña̱yóʼo, ni̱yi̱ʼvíra ta xi̱nura ku̱a̱ʼa̱nra chí Egipto. 22 Soo ta̱ rey Jehoiaquim chi̱ndaʼára ta̱ Elnatán se̱ʼe ta̱ Acbor xíʼin inkaka na̱ ta̱a ña̱ ku̱a̱ʼa̱nna sa̱tára chí ñuu Egipto. 23 Na̱yóʼo ta̱vána ta̱ Uriya chí ñuu Egipto ta ni̱xa̱ʼa̱nna xíʼinra nu̱ú ta̱ rey Jehoiaquim, ta ta̱yóʼo xa̱ʼnírara xíʼin espada ta sa̱ndúxu̱nnara nu̱ú ndúxu̱n na̱ nda̱ʼví”.

24 Soo ta̱ Ahicam se̱ʼe ta̱ Safán chi̱ndeétáʼanra xíʼin ta̱ Jeremías ta kǒo nítaxira ña̱ ndataxinara ndaʼa̱ na̱ ñuu ña̱ kaʼnínara.