Jeremías

52 Ta̱ Sedequías xi̱kuumiíra 21 ku̱i̱ya̱ tá ni̱xa̱a̱ra ndu̱ura rey ta 11 ku̱i̱ya̱ xa̱ʼndachíñura chí ñuu Jerusalén. Siʼíra xi̱naníñá Hamutal ta xi̱kuuñá se̱ʼe ta̱ Jeremías ta̱ ñuu Libná. 2 Ta̱ Sedequías xi̱keʼéra ña̱ʼa ña̱ va̱ása va̱ʼa nu̱ú Jehová, nda̱a̱ táki̱ʼva ke̱ʼé ta̱ Jehoiaquim. 3 Ndiʼi ña̱ʼa yóʼo ku̱uña chí Jerusalén xíʼin Judá saáchi ni̱sa̱a̱ní Jehová xíʼinna ta chi̱ndaʼárana ku̱a̱ʼa̱n xíkána nu̱úra. Ta ta̱ Sedequías ni̱xa̱a̱ra ndu̱ura contra xíʼin ta̱ rey ñuu Babilonia. 4 Tá xa̱a̱ 9 ku̱i̱ya̱ xáʼndachíñu ta̱ Sedequías, ki̱vi̱ u̱xu̱ tí yo̱o̱ u̱xu̱, ta̱ rey Nabucodonosor* ta̱ ñuu Babilonia ni̱xa̱ʼa̱nra xíʼin ndiʼi na̱ soldado na̱ kítáʼan xíʼinra ña̱ kanitáʼanna xíʼin na̱ ñuu Jerusalén. Ta ni̱xa̱a̱na xi̱kundoona iníí sa̱tá ñuu yóʼo ta i̱xava̱ʼatuna iin nama̱* ña̱ va̱ʼa nda̱kasina iníísaá sa̱táña. 5 Ta tá xa̱a̱ 11 ku̱i̱ya̱ xáʼndachíñu ta̱ rey Sedequías, xi̱ndookavana sa̱tá ñuu yóʼo.

6 Tá ki̱vi̱ 9 tí yo̱o̱ ku̱mí, ndeéní xi̱ndikaa̱ so̱ko ñuu yóʼo ta kǒo ña̱ʼa níxi̱yo kuxu na̱ yiví. 7 Ta na̱ caldeo ka̱anna iin ya̱vi̱ kándíka nama̱ ñuu Jerusalén ña̱ va̱ʼa ki̱ʼvina, xa̱ʼa̱ ña̱kán tá ñuú ndiʼi na̱ soldado ñuu kán ke̱ena chí yéʼé ña̱ ni̱xi̱yo nu̱ú íyo u̱vi̱ nama̱ nu̱ú ni̱xi̱yo jardín ta̱ rey, ta na̱ caldeo xi̱ndoona iníí sa̱tá ñuu kán. Ta nda̱kiʼinna ku̱a̱ʼa̱nna chí yichi̱ ña̱ ku̱a̱ʼa̱n chí Arabá. 8 Soo na̱ soldado caldeo xi̱ndiku̱nna ni̱xa̱ʼa̱nna sa̱tá ta̱ rey Sedequías ta nda̱kutáʼanna xíʼinra chí yoso̱ yi̱chí ña̱ íyo chí Jericó. Ta ndiʼi na̱ soldado na̱ kítáʼan xíʼinra ni̱ta̱ni̱na* ku̱a̱ʼa̱nna. 9 Tasaá ti̱inna ta̱ rey ta nda̱kiʼinnara ku̱a̱ʼa̱n xíʼinna chí Riblá, ña̱ xi̱kindo̱o chí Hamat, ta ni̱xa̱ʼa̱nna xíʼinra nu̱ú ta̱ rey ñuu Babilonia ta ta̱yóʼo ni̱ka̱ʼa̱nra ndáaña keʼéna xíʼinra. 10 Ta nu̱ú saá ta̱ rey Sedequías xa̱ʼní ta̱ rey ñuu Babilonia na̱ se̱ʼera ta saátu xa̱ʼníra ndiʼi na̱ níʼi yichi̱ nu̱ú na̱ ñuu Judá chí Riblá. 11 Tándi̱ʼi, ta̱ rey ñuu Babilonia sa̱kúára nu̱ú ta̱ Sedequías ta ta̱ánra ka̱a ña̱ cobre ndaʼa̱ra ta nda̱kiʼinrara ku̱a̱ʼa̱n xíʼinra chí ñuu Babilonia, ta kán xi̱ndikaa̱ra veʼeka̱a nda̱a̱ tá ni̱xi̱ʼi̱ra.

12 Tá xa̱a̱ 19 ku̱i̱ya̱ xáʼndachíñu ta̱ rey Nabucodonosor* chí Babilonia, ki̱vi̱ u̱xu̱ tí yo̱o̱ u̱ʼu̱n ni̱xa̱a̱ ta̱ Nebuzaradán ta̱ níʼi yichi̱ nu̱ú na̱ soldado ta̱ rey ñuu Babilonia chí ñuu Jerusalén, ta̱yóʼo xi̱chindeétáʼanra xíʼin ta̱ rey ñuu Babilonia. 13 Ta̱yóʼo xa̱ʼmira veʼe Jehová, veʼe* ta̱ rey, ndiʼika veʼe ña̱ ni̱xi̱yo ñuu Jerusalén ta saátu ndiʼi veʼe ña̱ náʼnu. 14 Ndiʼi na̱ soldado caldeo na̱ xi̱kitáʼan xíʼin ta̱ Nebuzaradán, sa̱ndíʼi-xa̱ʼa̱na nama̱ ña̱ ni̱xi̱yo sa̱tá ñuu Jerusalén.

15 Ta̱ Nebuzaradán ta̱ níʼi yichi̱ nu̱ú na̱ soldado ta̱ rey Nabucodonosor, nda̱kiʼinra iin tiʼvi na̱ yiví na̱ ndáʼvi ku̱a̱ʼa̱n xíʼinra ta saátu ndiʼika na̱ yiví na̱ xi̱kindo̱o ñuu kán. Ta nda̱kiʼintura ndiʼi na̱ nda̱kutáʼan xíʼin ta̱ rey ñuu Babilonia, xíʼin ndiʼika na̱ xi̱kindo̱o ñuu kán na̱ xi̱xini̱ keʼé ku̱a̱ʼání ña̱ʼa. 16 Soo ta̱ Nebuzaradán ta̱ níʼi yichi̱ nu̱ú na̱ soldado ta̱ rey nda̱koora sava na̱ yiví na̱ ndáʼvi ñuu kán, ña̱ kundaana tú uva ta i̱xandúxara xíʼinna ña̱ kachíñundáʼvina nu̱ú ta̱ rey.

17 Ta na̱ caldeo sa̱kúachi válína nama̱* ña̱ cobre ña̱ ni̱xi̱yo veʼe Jehová saátu carro válí xíʼin Mar ña̱ cobre ña̱ ni̱xi̱yo veʼe Jehová, ta nda̱kiʼinna ndiʼi cobre yóʼo ku̱a̱ʼa̱n xíʼinna chí Babilonia. 18 Ta saátu nda̱kiʼinna cubeta, pala, ña̱ʼa ña̱ xi̱xiniñúʼuna ña̱ ndaʼvana ñuʼu̱, ko̱ʼo̱ ña̱ kúnú ini, copa xíʼin ndiʼika ña̱ʼa ña̱ cobre ña̱ xi̱xiniñúʼuna ini templo. 19 Ta ta̱ Nebuzaradán ta̱ níʼi yichi̱ nu̱ú na̱ soldado ta̱ rey, nda̱kiʼintura ndiʼi ndaʼáchíñu, ña̱ʼa nu̱ú xi̱ñuʼu ñuʼu̱, ko̱ʼo̱ ña̱ kúnú ini, cubeta, candelabro, copa xíʼin ko̱ʼo̱ ña̱ kúnú ini ña̱ ku̱vaʼa xíʼin nina oro ta saátu xíʼin plata. 20 Xa̱ʼa̱ ña̱ ku̱a̱ʼání cobre xi̱niñúʼu ta̱ rey Salomón ña̱ i̱xava̱ʼara u̱vi̱ saá nama̱, Mar ña̱ cobre, 12 saá si̱ndi̱ki̱ tí cobre tí xi̱ndiso Mar ña̱ cobre ta saátu carro válí tú xi̱xiniñúʼuna veʼe Jehová, va̱ása níkivi katanaña ña̱ va̱ʼa kunda̱a̱-inina nda̱saa ve̱eña.

21 Ta iin tá iin nama̱ yóʼo u̱na̱ metro* súkun ni̱xi̱yoña ta xi̱xiniñúʼuna iin yoʼo̱ ña̱ távána ki̱ʼva ña̱ u̱ʼu̱n metro* ña̱ va̱ʼa ka̱va̱nduuña sa̱tá iin tá iin nama̱ yóʼo; ki̱ʼva u̱xa̱ centímetro* kúkun* ni̱xi̱yoña, ta ni̱xi̱yo ya̱vi̱ ti̱xinña. 22 Ta capitel ña̱ xi̱ndóso nu̱úña ña̱ cobre xi̱kuuña ta u̱vi̱ metro sava* súkun ni̱xi̱yoña. Ta ti̱ndísi̱* xíʼin ñunú* ña̱ cadena válí ña̱ xi̱nundaa sa̱tá capitel yóʼo ña̱ cobre xi̱kuuña. Ta ki̱ʼva saátu ni̱xi̱yo nama̱ ña̱ u̱vi̱ xíʼin ti̱ndísi̱ tí xi̱kuumiíña. 23 Ni̱xi̱yo 96 ti̱ndísi̱ iin tá iin táʼví, ta ndiʼi ti̱ndísi̱ tí ni̱xi̱yo sa̱tá ñunú xi̱kuurí 100.

24 Ta ta̱ Nebuzaradán ta̱ níʼi yichi̱ nu̱ú na̱ soldado ta̱ rey, nda̱kiʼinra ta̱ su̱tu̱ Seraya ku̱a̱ʼa̱n xíʼinra, saátu ta̱ Sofonías (inka ta̱ xi̱kuu su̱tu̱) xíʼin u̱ni̱ na̱ ndáa yéʼé. 25 Ta nda̱kiʼinra iin ta̱ chíñu ta̱ kúú comandante nu̱ú na̱ soldado ku̱a̱ʼa̱n xíʼinra, nda̱kiʼintura u̱xa̱ na̱ xi̱taxi consejo ndaʼa̱ ta̱ rey na̱ xi̱ndoo ñuu kán, saátu ta̱ secretario ta̱ níʼi yichi̱ nu̱ú na̱ soldado (ta̱yóʼo kúú ta̱ xi̱ndaka̱xin na̱ ku̱ʼu̱n nu̱ú ku̱a̱chi) ta nda̱kiʼintura 60 na̱ ta̱a na̱ xi̱kindo̱oka ñuu kán. 26 Ta̱ Nebuzaradán ta̱ níʼi yichi̱ nu̱ú na̱ soldado ta̱ rey, nda̱kiʼinrana ku̱a̱ʼa̱n xíʼinra nu̱ú ta̱ rey ñuu Babilonia chí Riblá. 27 Ta̱ rey ñuu Babilonia xa̱ʼnírana chí Riblá ña̱ kíndo̱o chí Hamat. Saá kúú ña̱ ta̱vána na̱ ñuu Judá nu̱ú ñuʼú nu̱ú xi̱ndoona ta nda̱kiʼinnana ku̱a̱ʼa̱n xíʼinna inka ñuu.

28 Siaʼa kúú na̱ yiví na̱ nda̱kiʼin ta̱ Nabucodonosor* ku̱a̱ʼa̱n xíʼinra: tá xa̱a̱ u̱xa̱ ku̱i̱ya̱ xáʼndachíñura saá kúú ña̱ nda̱kiʼinra 3,023 na̱ judío ku̱a̱ʼa̱n xíʼinra.

29 Tá xa̱a̱ 18 ku̱i̱ya̱ xáʼndachíñu ta̱ Nabucodonosor,* nda̱kiʼinna 832 na̱ yiví chí ñuu Jerusalén ku̱a̱ʼa̱n xíʼinna.

30 Tá xa̱a̱ 23 ku̱i̱ya̱ xáʼndachíñu ta̱ Nabucodonosor,* ta̱ Nebuzaradán ta̱ níʼi yichi̱ nu̱ú na̱ soldado ta̱ rey, nda̱kiʼinra 745 na̱ judío ku̱a̱ʼa̱n xíʼinra.

Ndiʼi na̱ yiví na̱ nda̱kiʼinna ku̱a̱ʼa̱n xíʼinna xi̱kuuna 4,600.

31 Tasaá, tá xa̱a̱ ni̱ya̱ʼa 37 ku̱i̱ya̱ ña̱ nda̱kiʼinna ta̱ Joaquín ta̱ rey ñuu Judá ku̱a̱ʼa̱n xíʼinna, ki̱vi̱ 25 tí yo̱o̱ 12 ni̱xa̱a̱ ta̱ Evil-Merodac ndu̱ura rey chí Babilonia, ta ku̱i̱ya̱ saá ta̱vára ta̱ rey Joaquín veʼeka̱a. 32 Va̱ʼaní ni̱xi̱yo inira xíʼin ta̱ rey Joaquín ta ta̱xira ña̱ ná kundayáʼvika ta̱yóʼo nu̱ú ndiʼi na̱ rey na̱ ni̱xi̱yo xíʼinra chí Babilonia. 33 Ta̱ Joaquín va̱ása níxi̱ndixikara ti̱ko̱to̱ ña̱ ndíxi na̱ ñúʼu veʼeka̱a, ta ndiʼi tiempo ña̱ xi̱takura xi̱xira nu̱ú mesa ta̱ rey ñuu Babilonia. 34 Ki̱vi̱ tá ki̱vi̱ xi̱xixira táʼan ña̱ xi̱xixi ta̱ rey ñuu Babilonia, iinsaá nda̱a̱ tá ni̱xi̱ʼi̱ra.