Jeremías
51 Ña̱yóʼo kúú ña̱ káʼa̱n Jehová:
“Chindaʼíi̱ iin ta̱chí ña̱ sandíʼi-xa̱ʼa̱
ñuu Babilonia ta saátu na̱ ndóo chí Leb-Camái.*
2 Chindaʼíi̱ na̱ ndativi ñuu Babilonia nda̱a̱ táki̱ʼva kéʼé ta̱chí tá ndániʼiña xe̱ʼe̱* trigo
ta kǒoka na̱ kindo̱o nu̱úña;
ndiʼi táʼví keena kixina kanitáʼanna xíʼinña
ki̱vi̱ tá ná kixaa̱ tu̱ndóʼo nu̱úña.
3 Na̱ ñuu Babilonia na̱ xíni̱ kuniñúʼu kuxu̱n* ná kǒo sandéena kuxu̱nna.
Nda̱a̱ ni iinna ná va̱ása ndakundichina xíʼin ka̱a ña̱ ndási kándíkana.
Kǒo kundáʼvi-iniún kuniún na̱ ta̱a na̱ válí na̱ íyo ñuu kán.
Kaʼní ndiʼi na̱ soldado na̱ íyo kán.
4 Ndeéní tukue̱ʼe̱ na̱ soldado kundoona chí calle ñuu Babilonia, kuvina chí nu̱ú ñuʼú na̱ caldeo.
5 Na̱ ñuu Israel xíʼin na̱ ñuu Judá va̱ása íyona nda̱a̱ táki̱ʼva íyo ná ñaʼá ná ni̱xi̱ʼi̱ yii̱, saáchi Jehová Ndióxi̱ ta̱ xáʼndachíñu nu̱ú na̱ ángel íyokavara xíʼinna.
Soo ku̱a̱ʼání ku̱a̱chi ni̱ki̱ʼvi ñuʼú na̱kán* nu̱ú Ndióxi̱ ta̱ yi̱i̱, Ndióxi̱ na̱ ñuu Israel.
6 Keendó ñuu Babilonia ta kunundó,
kunundó ña̱ va̱ʼa ka̱kundó.
Va̱ása kuvindó xa̱ʼa̱ ku̱a̱chi ña̱ ni̱ki̱ʼviña.
Saáchi xa̱a̱ ki̱xaa̱ ki̱vi̱ ña̱ ndatiin Jehová ku̱a̱chi xíʼinña.
Ta̱kán taxira castigo ndaʼa̱ña xa̱ʼa̱ ña̱ ke̱ʼéña.
7 Ñuu Babilonia ni̱xi̱yoña nda̱a̱ táki̱ʼva íyo iin copa ña̱ oro ña̱ xi̱ndikaa̱ ndaʼa̱ Jehová;
sa̱xíniiña iníísaá ñuʼú.
Ndiʼi na̱ ñuu xi̱ʼina vino tá xi̱ñuʼu iniña,
ta xa̱ʼa̱ ña̱kán sa̱nana.
8 Iin kama nda̱kava ñuu Babilonia ta cha̱chi ndiʼiña.
Kuakundó xa̱ʼa̱ña.
Ndukúndó bálsamo* ña̱ va̱ʼa ki̱ʼvirá nu̱ú kúʼvi̱ña; sana ndaʼavaña”.
9 “Xi̱kuni̱yó sandáʼayó ñuu Babilonia, soo va̱ása níkivi ndaʼaña.
Sandákoondóña ta ná ku̱ʼu̱nyó, iin tá iinyó ná ndikóyó nu̱ú ñuʼúyó.
Ku̱a̱chi ña̱ ni̱ki̱ʼviña ni̱xa̱a̱ña nda̱a̱ ndiví,
nda̱a̱ táki̱ʼva súkunní íyo vi̱kó.
10 Va̱ʼaní íyo ña̱ ke̱ʼé Jehová xa̱ʼa̱yó.
Naʼandó ta chí Sion ná ka̱ʼa̱nyó xa̱ʼa̱ ña̱ ke̱ʼé Jehová Ndióxi̱yó”.
11 “Ndasaxi̱ínndó* nu̱ú flecha; ndakiʼinndó escudo ña̱ ti̱ku̱i̱ta̱.*
Jehová chi̱kaa̱ra-ini na̱ kúú rey nu̱ú na̱ medo ña̱ keʼéna iin ña̱ʼa,
saáchi ña̱ kúni̱ra kúú ña̱ sandíʼi-xa̱ʼa̱ra ñuu Babilonia.
Jehová kúú ta̱ ndatiin ku̱a̱chi xíʼinna, ndatiinra ku̱a̱chi xíʼinna xa̱ʼa̱ templora.
12 Kanindichindó iin poste tú na̱ʼa̱ ña̱ xa̱a̱ ku̱ʼu̱nndó kanitáʼanndó xíʼin ñuu Babilonia.
Ndasaku̱a̱ʼákandó na̱ soldado, katandó na̱ kundaa nu̱ú xíniñúʼu kunditana.
Ixatu̱ʼvandó na̱ kundoose̱ʼé* ña̱ kanitáʼanna xíʼinna.
Saáchi Jehová kúú ta̱ ni̱ka̱ʼa̱n ndáa ki̱ʼva koo ña̱ kanitáʼanna,
ta saxínura ña̱ ni̱ka̱ʼa̱nra keʼéra xíʼin na̱ ndóo ñuu Babilonia”.
13 “Yóʼó ñaʼá ñá íyo nu̱ú ku̱a̱ʼání ti̱kui̱í
ta kúúmiíún ku̱a̱ʼání ña̱ ku̱i̱ká,
xa̱a̱ ki̱xaa̱ ki̱vi̱ ña̱ ndiʼi-xa̱ʼún ta kǒoka ña̱ ku̱i̱ká ndakiʼún.
14 Jehová ta̱ xáʼndachíñu nu̱ú na̱ ángel xa̱a̱ chi̱naʼára* ña̱yóʼo xa̱ʼa̱ miíra:
‘Nda̱a̱ táki̱ʼva ku̱a̱ʼání kúú ti̱ka náʼnu, saá ku̱a̱ʼání koo na̱ ta̱a ndakutú ñuu yóʼo
ta na̱yóʼo ndeéní nda̱ʼyi̱na xa̱ʼa̱ ña̱ ku̱chiñuna ka̱nitáʼanna xíʼún’.
15 Ndióxi̱ kúú ta̱ ke̱ʼé ñuʼú yóʼo, ke̱ʼéraña xíʼin ndee̱ ña̱ kúúmiíra,
xa̱ʼa̱ ña̱ ndíchiníra i̱xava̱ʼara ñuʼú nu̱ú kána ña̱ʼa
ta xa̱ʼa̱ ña̱ xíni̱níra i̱xava̱ʼara ndiví.
16 Tá káʼa̱nra,
ti̱kui̱í tá íyo chí ndiví kánda̱rá,
ta sándaara vi̱kó* nda̱a̱ chí táʼví ña̱ xíkáva̱ʼa kíndo̱o nu̱ú ñuʼú yóʼo.
Íxava̱ʼara taxa ña̱ va̱ʼa kuun sa̱vi̱,
íyo nu̱ú ndátaánva̱ʼara* ta̱chí ta kán táváraña.
17 Nda̱a̱ ni iin na̱ ta̱a va̱ása vií ndákanixi̱nína ta kǒo kúnda̱a̱-inina xa̱ʼa̱ nda̱a̱ ni iin ña̱ʼa.
Ndiʼi na̱ íxava̱ʼa ña̱ʼa xíʼin ka̱a kukaʼan nu̱úna xíʼin ña̱ʼa ña̱ i̱xava̱ʼana ña̱ ndasakáʼnuna,
saáchi ña̱ʼa ña̱ ka̱a ña̱ íxava̱ʼana ña̱ vatáva* kúúña,
ta ni kǒo kívi ndakiʼinña ta̱chíña.
18 Ña̱ vatáva kúúña ta kúsi̱kindaanaña.
Tá ná kixaa̱ ki̱vi̱ ña̱ ndatiin Ndióxi̱ ku̱a̱chi, ndiʼi-xa̱ʼa̱vaña.
19 Soo Ndióxi̱ ta̱ Jacob su̱ví saáví íyora,
saáchi ta̱kán kúú ta̱ ke̱ʼé ndiʼi ña̱ʼa,
ta miítura kúú karroti* herenciara.
Jehová ta̱ xáʼndachíñu nu̱ú na̱ ángel kúú ki̱vi̱ra”.
20 “Yóʼó kúún yitu̱n tú kuniñúʼi̱ nu̱ú ku̱a̱chi, kuniñúʼi̱ yóʼó ña̱ kanitáʼi̱n,
saáchi kuniñúʼi̱ yóʼó ña̱ sandíʼi-xa̱ʼíi̱ ku̱a̱ʼá ñuu náʼnu.
Kuniñúʼi̱ yóʼó ña̱ sandíʼi-xa̱ʼíi̱ na̱ ñuu.
21 Kuniñúʼi̱ yóʼó ña̱ sandíʼi-xa̱ʼíi̱ kuáyi̱ xíʼin na̱ yósórí.*
Kuniñúʼi̱ yóʼó ña̱ sandíʼi-xa̱ʼíi̱ carreta tú xíka nu̱ú ku̱a̱chi ta saátu na̱ kávanú.
22 Kuniñúʼi̱ yóʼó ña̱ sandíʼi-xa̱ʼíi̱ na̱ ta̱a xíʼin ná ñaʼá.
Kuniñúʼi̱ yóʼó ña̱ sandíʼi-xa̱ʼíi̱ na̱ xi̱kuaʼa̱ xíʼin na̱ válí.
Kuniñúʼi̱ yóʼó ña̱ sandíʼi-xa̱ʼíi̱ ta̱ válí xíʼin ná válí.
23 Kuniñúʼi̱ yóʼó ña̱ sandíʼi-xa̱ʼíi̱ na̱ pastor ta saátu kití.
Kuniñúʼi̱ yóʼó ña̱ sandíʼi-xa̱ʼíi̱ na̱ chíʼi ta saátu kití tí táʼví.
Kuniñúʼi̱ yóʼó ña̱ sandíʼi-xa̱ʼíi̱ na̱ chíñu ta saátu na̱ kúúmií chiñu ña̱ ndáyáʼvi.
24 Taxii̱ castigo ndaʼa̱ ñuu Babilonia ta saátu ndaʼa̱ ndiʼi na̱ ndóo chí Caldea,
xa̱ʼa̱ ndiʼi ña̱ va̱ása va̱ʼa ke̱ʼéna nu̱úndó chí Sion”, káchi Jehová.
25 “Yi̱ʼi̱ íyoi̱ contra xíʼin yóʼó yuku̱ ña̱ sándiʼi-xa̱ʼa̱ iníí ñuʼú, káchi Jehová.
Sakái̱ ndaʼíi̱ ta taxii̱ castigo ndaʼún ta nda̱a̱ chí xi̱ní kavá keún tiviníʼniún* ku̱ʼún,
ta ndasai̱ yóʼó iin yuku̱ ña̱ ni̱xi̱xi̱”.
26 “Na̱ yiví va̱ása kuniñúʼukana yóʼó ña̱ tavána yu̱u̱ ña̱ ndáyáʼvi va̱ʼaka ni yu̱u̱ ña̱ xíniñúʼuna xa̱ʼa̱ veʼe,
saáchi ndiʼi tiempo kindo̱o miíún”, káchi Jehová.
27 “Kanindichindó iin poste tú koo señal chí ñuu.
Tivindó ndiki̱ ndiʼi ñuu.
Ndaka̱xinndó ñuu ña̱ ku̱ʼu̱n kanitáʼan xíʼinña.
Kanandó na̱ ñuu Ararat, Miní xíʼin Askenaz ña̱ ná ku̱ʼu̱nna kanitáʼanna xíʼinña.
Ndaka̱xinndó iin ta̱ chiñu ta̱ ndakaya na̱ soldado na̱ ku̱ʼu̱n kanitáʼan xíʼinña.
Nda̱a̱ táki̱ʼva ku̱a̱ʼání kúú ti̱ka náʼnu tí yúta̱ka* saá ku̱a̱ʼání ná koo kuáyi̱ tí ku̱ʼu̱n xíʼinndó.
28 Ndaka̱xinndó na̱ ku̱ʼu̱n kanitáʼan xíʼinña:
Na̱ rey na̱ ñuu Media, na̱ chíñu, na̱ kúúmií chiñu ña̱ ndáyáʼvi
xíʼin ndiʼi na̱ ndóo nu̱ú ñuʼú nu̱ú xáʼndachíñuna.
29 Ñuʼú kanda̱ña ta yi̱ʼvíníña,
saáchi ña̱ ndákanixi̱ní Jehová keʼéra xíʼin ñuu Babilonia xi̱nuvaña
ña̱ va̱ʼa ndiʼi na̱ ná kuni ñuu Babilonia yi̱ʼvínína ta kǒoka na̱ kundoo nu̱úña.
30 Na̱ ta̱a na̱ ñuu Babilonia na̱ xíni̱ní kanitáʼan sa̱ndákoovana ña̱ kanitáʼanna.
Nda̱kundoona veʼe ña̱ kútu̱ní ku̱vaʼa ña̱ kúúmiína.
Ndi̱ʼiva ndee̱na.
Ni̱xa̱a̱na ndu̱una nda̱a̱ táki̱ʼva íyo ñaʼá.
Ni̱xi̱xi̱ veʼe ña̱ íyo kán.
Sa̱kúachina ña̱ʼa* ña̱ ndási yéʼéña.
31 Iin na̱ xínu ku̱a̱ʼa̱n natúʼun xa̱ʼa̱ ña̱ ku̱u ndákutáʼanna xíʼin inka na̱ ku̱a̱ʼa̱n natúʼun xa̱ʼa̱ ña̱ ku̱u,
tuku ta tukuna ndákutáʼan
saáchi ku̱a̱ʼa̱nna natúʼunna xíʼin ta̱ rey ñuu Babilonia ña̱ ndiʼi táʼví ni̱ki̱ʼvina nda̱kiʼinna ñuura,
32 nda̱kiʼinna chí nu̱ú yáʼa na̱ yiví yu̱ta,
xa̱ʼmina barco tú ku̱vaʼa xíʼin papiro
ta ndiʼi na̱ soldado yíʼvinína”.
33 Saáchi ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel:
“Ñuu Babilonia íyoña nda̱a̱ táki̱ʼva íyo iin ñuʼú nu̱ú ndátivina trigo.
Xa̱a̱ ki̱xaa̱ tiempo ña̱ ku̱a̱ñi̱naña* nda̱a̱ ná kindo̱o téʼéña.*
Si̱lóʼoní kúma̱ní ña̱ kixaa̱ tiempo ña̱ sakéena* ñuu Babilonia”.
34 “Ta̱ rey Nabucodonosor* ta̱ ñuu Babilonia sa̱ndíʼi-xa̱ʼa̱ra yi̱ʼi̱;
sa̱yíʼvíníra yi̱ʼi̱ ta ni va̱ása xíni̱kai̱ ndáaña keʼíi̱.
Xa̱ʼa̱ ña̱ ke̱ʼéra ki̱ndoi̱ ndáa táki̱ʼva íyo iin ki̱si ña̱ vichí.*
Ko̱kóra yi̱ʼi̱ nda̱a̱ táki̱ʼva kéʼé iin ko̱o̱ tí káʼnuní;
sa̱kútúra ti̱xinra xíʼin ña̱ʼa mií ña̱ va̱ʼaka ña̱ xi̱kuumiíi̱.
Ta̱vára yi̱ʼi̱ xíʼin ti̱kui̱í.
35 Na̱ ndóo chí Sion káchina ‘Nda̱a̱ táki̱ʼva i̱xandi̱va̱ʼana xíʼi̱n saá ná kundoʼo ñuu Babilonia’.
Na̱ ndóo chí Jerusalén káchina ‘Na̱ yiví na̱ ndóo chí Caldea ná kuumiína ku̱a̱chi xa̱ʼa̱ ni̱íi̱’”.
36 Xa̱ʼa̱ ña̱kán, ña̱yóʼo kúú ña̱ káʼa̱n Jehová:
“Yi̱ʼi̱ viíní ndatii̱n ku̱a̱chi xa̱ʼún ta taxii̱ castigo ndaʼa̱ na̱ i̱xandi̱va̱ʼa xíʼún.
Sayíchi̱i̱ mar ta saátu pozo ña̱ íyo kán.
37 Iin koʼndo yu̱u̱ xa̱a̱ ñuu Babilonia nduuña,
iin ya̱vi̱ nu̱ú ñúʼu ti̱na* yukú,*
ndiʼi na̱ ná kuniña kundasína kuninaña ta kusi̱kindaanaña;
kǒoka na̱ kundoo nu̱úña.
38 Ndiʼina inkáchi kutáʼanna nda̱ʼyi̱na nda̱a̱ táki̱ʼva kéʼé ndikaʼa* yúta̱.
Nda̱ʼyi̱na nda̱a̱ táki̱ʼva kéʼé ndikaʼa válí”.
39 “Tá xa̱a̱ ná kuni̱nína keʼéna iin vikó, keʼíi̱ iin vikó ña̱ va̱ʼa kuxuna ta saxínii̱na,
ña̱ va̱ʼa ná kusi̱í-inina;
tasaá naʼání ku̱su̱nna ta va̱ása ndako̱okana”, káchi Jehová.
40 “Nda̱a̱ táki̱ʼva kéʼéna xíʼin ndikachi* válí, ndikachi che̱e xíʼin ti̱xúʼú* tá ku̱a̱ʼa̱nna kaʼnínarí, saá keʼíi̱ xíʼinna”.
41 “Koto ndáa ki̱ʼva nda̱kiʼinna ñuu Sesac.*
Ndáa ki̱ʼva nda̱kiʼinna ñuu ña̱ va̱ʼaní xi̱kaʼa̱nna xa̱ʼa̱ iníísaá nu̱ú ñuʼú.
Vitin ndiʼi na̱ ñuu yíʼvinína tá xítona ña̱ ndo̱ʼo ñuu Babilonia.
42 Ti̱kui̱í nda̱kutúrá ñuu Babilonia.
Ni̱sa̱ʼvi ndiʼiña xa̱ʼa̱ ña̱ ndeéní kánda̱ nu̱úrá.
43 Yíʼvinína tá xítona ndiʼi ñuu ña̱ kúúmiíña, kǒoka ti̱kui̱í kúúmiíña, ndu̱uña iin ñuʼú yi̱chí;
ndu̱uña iin ñuʼú nu̱ú kǒoka na̱ kundoo ta ni kǒoka nda̱a̱ ni iin na̱ yiví ya̱ʼa.
44 Taxii̱ castigo ndaʼa̱ ndióxi̱ ña̱ naní Bel xa̱ʼa̱ ña̱ ke̱ʼéña chí Babilonia
ta ndatavái̱ ndiʼi ña̱ ko̱kóña.
Nda̱a̱ ni iinka ñuu va̱ása ku̱ʼu̱n nu̱úña,
ta nduvava nama̱ ñuu Babilonia.
45 Keendó ti̱xinña na̱ ñuu miíi̱.
Kunundó ña̱ va̱ʼa ka̱kundó, saáchi yi̱ʼi̱ Jehová ndeéní sái̱.
46 Ndakú koo inindó ta va̱ása yi̱ʼvíndó xa̱ʼa̱ ña̱ kuniso̱ʼondó chí ñuu.
Ti̱xin ña̱ iin ku̱i̱ya̱ kunda̱a̱-inindó xa̱ʼa̱ iin ña̱ʼa,
ta ti̱xin inka ku̱i̱ya̱ kunda̱a̱-inindó xa̱ʼa̱ inkaña,
kooní ku̱a̱chi ñuu yóʼo ta kanitáʼan iin na̱ chíñu xíʼin inka na̱ chíñu.
47 Xa̱ʼa̱ ña̱kán, kotondó, xa̱a̱ ku̱yatin ki̱vi̱
ña̱ sandíʼi-xa̱ʼíi̱ ña̱ʼa ña̱ ndásakáʼnuna chí ñuu Babilonia.
Sakúkaʼi̱n nu̱ú ñuʼú ña̱ kúúmiína,
ta ndiʼi na̱ ná kuvi, kuvina ma̱ʼñú ñuu kán.
48 Ndiví xíʼin ñuʼú ta saátu ndiʼi ña̱ íyo nu̱úña
ndeéní kusi̱í-iniña nda̱ʼyi̱ña xa̱ʼa̱ ña̱ ndo̱ʼo ñuu Babilonia,
saáchi nda̱a̱ chí norte kixi na̱ sandíʼi-xa̱ʼa̱ña”, káchi Jehová.
49 “Ñuu Babilonia va̱ása níxaʼní kuitíña na̱ ñuu Israel,
saáchi chí ñuu Babilonia ni̱xi̱ʼi̱tu ku̱a̱ʼání na̱ yiví na̱ íyo iníísaá nu̱ú ñuʼú.
50 Ndóʼó na̱ ka̱ku nu̱ú espada, ndakundeéndó ku̱ʼu̱nndó. Kǒo kundatundó.
Ni xíkání ku̱a̱ʼa̱nndó, ndakaʼánndó xa̱ʼa̱ Jehová ta saátu xa̱ʼa̱ ñuu Jerusalén xíʼin ndiʼi níma̱ndó”.
51 “Ku̱kaʼanní nu̱úndi̱ saáchi xi̱niso̱ʼondi̱ ña̱ ku̱sikindaana ndi̱ʼi̱.
Ku̱kaʼanní nu̱úndi̱ saáchi na̱ ki̱xi inka ñuu sa̱ndíʼi-xa̱ʼa̱na lugar ña̱ yi̱i̱ ña̱ íyo veʼe Jehová”.
52 “Xa̱ʼa̱ ña̱kán, kotondó, xa̱a̱ ku̱yatin ki̱vi̱, káchi Jehová,
ña̱ sandíʼi-xa̱ʼíi̱ ña̱ʼa ña̱ ndásakáʼnuna kán,
iníí nu̱ú ñuʼú kán ndeéní tana na̱ tu̱kue̱ʼe̱”.
53 “Ni ná xa̱a̱ ñuu Babilonia nda̱a̱ ndiví,
ni kútu̱níka ná ndasana veʼe ña̱ kútu̱ní ku̱vaʼa ña̱ kúúmiíña,
xa̱a̱va na̱ chindaʼíi̱ ña̱ sandíʼi-xa̱ʼa̱naña”, káchi Jehová.
54 “Kuniso̱ʼondó, táku̱ ña̱ ndáʼyi̱ kóʼóna* chí ñuu Babilonia,
ndeéní níʼi xa̱ʼa̱ ña̱ ku̱u iin tu̱ndóʼo chí nu̱ú ñuʼú na̱ caldeo,
55 saáchi Jehová kúú ta̱ sándiʼi-xa̱ʼa̱ ñuu Babilonia;
ni ndeéní káʼa̱nña, sayáa̱vara yuʼúña.
Nda̱a̱ táki̱ʼva ndeéní níʼi ti̱kui̱í nu̱ú mar saá ndeéní ni̱ʼi kixi na̱ kanitáʼan xíʼinña,
ta ndeéní kutaku̱ ña̱ ka̱ʼa̱nna.
56 Saáchi ta̱ sandíʼi-xa̱ʼa̱ ñuu Babilonia kixivara sandíʼi-xa̱ʼa̱raña;
na̱ ta̱a na̱ ndakúní na̱ íyo ñuu kán tiinnana ku̱ʼu̱n xíʼinna,
sakúachi válína kuxu̱nna,
saáchi Jehová kúúra iin Ndióxi̱ ta̱ táxi castigo ndaʼa̱ na̱ xíniñúʼu ndakiʼinña.
Chaʼvivaña xa̱ʼa̱ ña̱ ke̱ʼéña.
57 Saxínii̱ na̱ níʼi yichi̱ nu̱ú na̱ ñuu kán ta saátu na̱ ndíchi na̱ íyo kán,
na̱ chíñu, na̱ kúúmií chiñu ña̱ ndáyáʼvi ta saátu na̱ xíni̱ní kanitáʼan,
tasaá naʼání ku̱su̱nna ta va̱ása ndako̱okana”, káchi ta̱ Rey, ta̱ naní Jehová ta̱ xáʼndachíñu nu̱ú na̱ ángel.
58 Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel:
“Ni ndíka̱ní nama̱ ñuu Babilonia, ndiʼi-xa̱ʼa̱ ndiʼivaña,
ni súkunní yéʼéña, kokovaña.*
Ku̱a̱ʼání na̱ ñuu ndeéní kachíñuna, soo kǒo ña̱ʼa ndakiʼinna;
ku̱a̱ʼání na̱ ñuu kunaanína kachíñuna, soo ña̱ kokova kúú ña̱ kachíñuna xa̱ʼa̱”.
59 Ña̱yóʼo kúú chiñu ña̱ xa̱ʼnda ta̱ profeta Jeremías nu̱ú ta̱ Seraya se̱ʼe ta̱ Nerías, se̱ʼe ta̱ Mahseya, tá ni̱xa̱ʼa̱nra chí ñuu Babilonia xíʼin ta̱ rey Sedequías ta̱ ñuu Judá, tá xa̱a̱ ku̱mí ku̱i̱ya̱ xáʼndachíñura; ta̱ Seraya kúú ta̱ xi̱kuumií iin chiñu ña̱ ndáyáʼvi nu̱ú ta̱ rey. 60 Nu̱ú iin libro ka̱ʼyi ta̱ Jeremías ndiʼi tu̱ndóʼo ña̱ kixi nu̱ú ñuu Babilonia, ndiʼi tu̱ʼun yóʼo ni̱ka̱ʼyi̱ña contra ñuu Babilonia. 61 Ta saátu ni̱ka̱ʼa̱n ta̱ Jeremías xíʼin ta̱ Seraya: “Ndi̱ku̱n tá ná xa̱ún ñuu Babilonia ta kotoúnña, ndeéní kaʼviún tu̱ʼun yóʼo nu̱ú na̱ ndóo kán. 62 Tándi̱ʼi ka̱ʼún: ‘Jehová, yóʼó ni̱ka̱ʼún ña̱ ndiʼi-xa̱ʼa̱ ñuu yóʼo ta kǒoka na̱ kundoo nu̱úña, ni na̱ yiví ni kití, ta ndiʼi tiempo kindo̱o miíña’. 63 Tá ná sandíʼún kaʼviún libro yóʼo, katuúnña xíʼin iin yu̱u̱ ta sakánaúnña ma̱ʼñú yu̱ta Éufrates. 64 Tasaá ka̱ʼún: ‘Nda̱a̱ táki̱ʼva ni̱sa̱ʼvi ña̱yóʼo, saá sa̱ʼvi ñuu Babilonia ta va̱ása ndikókaña kooña xa̱ʼa̱ tu̱ndóʼo ña̱ chindaʼíi̱ nu̱úña; kǒoka ndee̱na koo’”.
Yóʼo ndi̱ʼi tu̱ʼun ña̱ ni̱ka̱ʼa̱n ta̱ Jeremías.