Ezequiel

12 Tuku ni̱ka̱ʼa̱n Jehová xíʼi̱n ta ka̱chira: 2 “Yóʼó ta̱ kúú se̱ʼe ta̱a,* íyoún ti̱xin iin ñuu na̱ so̱ʼoní. Íyo nduchúnu̱úna ña̱ kotona soo va̱ása xítona; íyo so̱ʼona ña̱ kuniso̱ʼona soo va̱ása xíniso̱ʼona, chi iin ñuu na̱ so̱ʼoní kúúna. 3 Yóʼó ta̱ kúú se̱ʼe ta̱a, ixatu̱ʼva ña̱ʼún ña̱ va̱ʼa ku̱ʼún koún inka ñuu. Ta tá káʼñu* saá kitaún ku̱ʼún, ta ná kunina ña̱ kitaún ku̱ʼún. Kita ti̱xin veʼún ta ku̱ʼún koún inka ñuu, ta ná kunina ña̱ kitaún ku̱ʼún. Chi sana kuniso̱ʼovana ni kúúna iin ñuu na̱ so̱ʼoní. 4 Tá kúúña káʼñu tavá ña̱ʼún ña̱ ku̱ʼu̱n xíʼún, ta ná kunina ña̱ keʼún ña̱yóʼo. Ta tá ñuú xíniñúʼu kitaún ku̱ʼún nda̱a̱ táki̱ʼva kée na̱ ndákiʼinna ku̱a̱ʼa̱n xíʼinna inka ñuu, ta ná kunina ña̱ keʼún ña̱yóʼo.

5 ”Kaan ya̱vi̱ kándíka nama̱ ta chí kán taváún ña̱ʼún, ta ná kunina keʼún ña̱yóʼo. 6 Ndakuiso ña̱ʼún ta taváúnña chí nu̱ú naa, ta ná kunina keʼún ña̱yóʼo. Ndakasi nu̱ún xíʼin iin ti̱ko̱to̱ ña̱ va̱ása kotoún nu̱ú ñuʼú, saáchi ndásai̱ yóʼó nda̱a̱ táki̱ʼva íyo iin señal nu̱ú na̱ ñuu Israel”.

7 Ta nda̱a̱ táki̱ʼva ni̱ka̱ʼa̱nra xíʼi̱n saá ke̱ʼíi̱. Tá káʼñu ta̱vái̱ ña̱ʼi̱, táki̱ʼva íyo ña̱ʼa ña̱ níʼi na̱ ndákiʼinna ku̱a̱ʼa̱n xíʼinna saá ni̱xi̱yoña. Ta tá xa̱a̱ ku̱a̱ʼa̱n kúáa, ka̱i̱n kándíka nama̱ xíʼin ndaʼíi̱. Ta tá xa̱a̱ ku̱ñuú nda̱kuisoi̱ ña̱ʼi̱ ta ta̱vái̱ña; ta xi̱nina tá ke̱ʼíi̱ ña̱yóʼo.

8 Tá xi̱ta̱a̱n* ni̱ka̱ʼa̱n tuku Jehová xíʼi̱n ta ka̱chira: 9 “Yóʼó ta̱ kúú se̱ʼe ta̱a, ¿á xa̱a̱ ni̱nda̱ka̱tu̱ʼun na̱ ñuu Israel na̱ so̱ʼoní, ‘¿Ndáaña kéʼún?’? 10 Ña̱yóʼo ka̱ʼún xíʼinna: ‘Ña̱yóʼo kúú ña̱ káʼa̱n táta káʼnu Jehová: “Káʼi̱n ña̱yóʼo xa̱ʼa̱ ta̱ níʼi yichi̱ nu̱ú na̱ ñuu Jerusalén, ta saátu xa̱ʼa̱ ndiʼi na̱ ñuu Israel na̱ ndóo ñuu yóʼo”’.

11 ”Kachiún: ‘Táki̱ʼva íyo iin señal saá íyoi̱ nu̱úndó. Táki̱ʼva ke̱ʼíi̱ saá keʼéna xíʼinna. Tiinnana ta ndakiʼinnana ku̱ʼu̱n xíʼinna. 12 Ta̱ níʼi yichi̱ nu̱úna ndakuisora ña̱ʼara ta kitara chí nu̱ú naa. Kaanra nama̱ ña̱ íyo sa̱tá ñuu ta kán tavára ña̱ʼara. Ndakasira iin ti̱ko̱to̱ nu̱úra ña̱ va̱ása kotora nu̱ú ñuʼú’. 13 Sakánai̱ ñunú* sa̱tára ta ti̱inra ini ñunú yóʼo. Tasaá kuniʼii̱ra ku̱ʼi̱n chí Babilonia chí nu̱ú ndóo na̱ caldeo, soo va̱ása kunira ñuu yóʼo ta kán kuvira. 14 Ta ndiʼi na̱ íyo xíʼinra, na̱ chíndeétáʼan xíʼinra ta saátu na̱ soldadora, taxíi̱nna ta xa̱a̱ síín síín nu̱ú ku̱ʼu̱nna; tavái̱ espadai̱ ta ku̱ʼi̱n sa̱tána. 15 Ta na̱kán kunda̱a̱-inina ña̱ yi̱ʼi̱ kúú Jehová tá ná taxíi̱nna ku̱ʼu̱nna kundoona inka ñuu ta xa̱a̱ síín síín ñuu kundoona. 16 Soo sakǎkui̱ savana ta va̱ása kuvina xíʼin espada, ta saátu va̱ása kuvina xíʼin so̱ko ni xíʼin kue̱ʼe̱, tasaá ka̱ʼa̱nna xa̱ʼa̱ ña̱ kini ña̱ kéʼéna xíʼin na̱ ñuu nu̱ú ku̱ʼu̱nna kundoona; tasaá kunda̱a̱-inina ña̱ yi̱ʼi̱ kúú Jehová”.

17 Tuku ni̱ka̱ʼa̱n Jehová xíʼi̱n ta ka̱chira: 18 “Yóʼó ta̱ kúú se̱ʼe ta̱a, kuxu si̱ta̱váʼún ta kisiún xa̱ʼa̱ ña̱ yíʼviún, koʼo ti̱kui̱í ta yi̱ʼvíníún ta ndi̱ʼiní-iniún tá ná koʼúnrá. 19 Ka̱ʼa̱n xíʼin na̱ yiví na̱ ndóo ñuu yóʼo: ‘Ña̱yóʼo kúú ña̱ káʼa̱n táta káʼnu Jehová xíʼin na̱ yiví na̱ ndóo ñuu Jerusalén, na̱ ndóo nu̱ú ñuʼú na̱ ñuu Israel: “Ndi̱ʼiní-inindó kuxundó si̱ta̱váʼa, ta yi̱ʼvíníndó koʼondó ti̱kui̱í, saáchi kǒoka ña̱ʼa koo nu̱ú ñuʼúndó xa̱ʼa̱ ña̱ ndi̱va̱ʼaní-ini na̱ ndóo nu̱úña. 20 Ndiʼi-xa̱ʼa̱ ñuu nu̱ú ndóo na̱ yiví ta kǒoka na̱ kundoo nu̱ú ñuʼú yóʼo; tasaá kunda̱a̱-inindó ña̱ yi̱ʼi̱ kúú Jehová”’”.

21 Tuku ni̱ka̱ʼa̱n Jehová xíʼi̱n ta ka̱chira: 22 “Yóʼó ta̱ kúú se̱ʼe ta̱a, ¿nda̱chun kúú ña̱ káʼa̱nna tu̱ʼun yóʼo chí ñuu Israel: ‘Yáʼa ki̱vi̱ ta ni va̱ása xínuví visión’? 23 Xa̱ʼa̱ ña̱kán, ña̱yóʼo kúú ña̱ ka̱ʼún xíʼinna: ‘Ña̱yóʼo kúú ña̱ káʼa̱n táta káʼnu Jehová: “Sandíʼi-xa̱ʼíi̱ tu̱ʼun yóʼo ta va̱ása ka̱ʼa̱nkanaña ti̱xin ñuu Israel tá kúsi̱kindaana”’. Soo ña̱yóʼo ka̱ʼún xíʼinna: ‘Xa̱a̱ va̱xi kúyatin ki̱vi̱, ta xi̱nu ndiʼi visión’. 24 Saáchi ni va̱ása kooka nda̱a̱ ni iin visión ña̱ vatá,* ta ni va̱ása kooka na̱ ndáku* na̱ sándaʼvi ti̱xin ñuu Israel. 25 ‘“Saáchi yi̱ʼi̱ Jehová kúú ta̱ ka̱ʼa̱nña. Nda̱a̱ ndáaka ña̱ ná ka̱ʼi̱n xi̱nuvaña ta va̱ása kukuachi̱ña. Tá tákuka ndóʼó na̱ ñuu na̱ so̱ʼoní, ka̱ʼi̱n tu̱ʼun yóʼo ta saxínuvai̱ña”, káchi táta káʼnu Jehová’”.

26 Tuku ni̱ka̱ʼa̱n Jehová xíʼi̱n, ta ka̱chira: 27 “Yóʼó ta̱ kúú se̱ʼe ta̱a, ña̱yóʼo kúú ña̱ káʼa̱n na̱ ñuu Israel: ‘Kúma̱ní ku̱a̱ʼáva tiempo xi̱nu visión ña̱ káʼa̱nra, ta xa̱ʼa̱ profecía ña̱ kuu chí nu̱únínuví káʼa̱nra’. 28 Xa̱ʼa̱ ña̱kán, ña̱yóʼo ka̱ʼún xíʼinna: ‘Ña̱yóʼo kúú ña̱ káʼa̱n táta káʼnu Jehová: “‘Nda̱a̱ ni iin tu̱ʼun ña̱ ka̱ʼi̱n va̱ása kukuachi̱ña; nda̱a̱ ndáaka ña̱ ná ka̱ʼi̱n xi̱nuvaña’, káchi táta káʼnu Jehová”’”.