Ezequiel
24 Tá ki̱vi̱ u̱xu̱, ña̱ yo̱o̱ u̱xu̱, ña̱ ku̱i̱ya̱ i̱i̱n, tuku ni̱ka̱ʼa̱n Jehová xíʼi̱n ta ka̱chira: 2 “Yóʼó ta̱ kúú se̱ʼe ta̱a,* kaʼyi ki̱vi̱ yóʼo, saáchi ki̱vi̱ yóʼo kúú ña̱ ki̱xáʼa ta̱ rey ñuu Babilonia kánitáʼanra xíʼin ñuu Jerusalén. 3 Ka̱ʼa̱n ña̱yóʼo xa̱ʼa̱ na̱ ñuu na̱ so̱ʼoní:
”‘Ña̱yóʼo kúú ña̱ káʼa̱n táta káʼnu Jehová:
“Chinúu ki̱si,* chinúuña nu̱ú ñuʼu̱ ta taán ti̱kui̱í iniña.
4 Taán ku̱ñu iniña, ndiʼi ku̱ñu ña̱ va̱ʼa,
taán xa̱ʼa̱-si̱ʼinrí xíʼin so̱ko̱rí; sakútúña xíʼin leke mií ña̱ va̱ʼaka.
5 Ndaka̱xin tí ndikachi* tí va̱ʼaka; tándi̱ʼi, taán titu̱n kaʼa̱ ki̱si.
Sachíʼyo̱* ku̱ñu xíʼin leke ini ña̱yóʼo”’.
6 ”Ña̱kán, ña̱yóʼo kúú ña̱ káʼa̱n táta káʼnu Jehová:
‘Ndáʼviní ñuu ña̱ xáʼní, ña̱ íyo nda̱a̱ táki̱ʼva íyo ki̱si ña̱ ni̱ku̱su,* ña̱ ta̱ʼán tavána kusu ini.
Tavá iin tá iin ku̱ñu ña̱ ñúʼu iniña nda̱a̱ ná kuvichíña* ta va̱ása ndaka̱xiún ndáaña taváún.
7 Saáchi ku̱a̱ʼání kúú na̱ yiví na̱ xa̱ʼnína ñuu yóʼo; ta ni̱i̱ na̱yóʼo ni̱xi̱ta̱ña sa̱tá yu̱u̱ káʼnu ña̱ kǒo ña̱ʼa sa̱tá.
Va̱ása níxi̱ta̱ña nu̱ú ñuʼú ña̱ va̱ʼa ndakasina sa̱táña.
8 Tasaá sa̱íi̱ ta taxii̱ castigo ndaʼa̱na,
ña̱kán xa̱tai̱ ni̱i̱ na̱yóʼo sa̱tá yu̱u̱ ña̱ yéʼe̱
tasaá va̱ása kivi ndakasina sa̱tá ña̱yóʼo’.
9 ”Ña̱kán, ña̱yóʼo kúú ña̱ káʼa̱n táta káʼnu Jehová:
‘Ndáʼviní ñuu ña̱ xáʼní.
Chindoi̱ ku̱a̱ʼání titu̱n.
10 Chindoo ku̱a̱ʼání titu̱n ta ndakaʼmiún ñuʼu̱ xíʼinnú.
Ná chi̱ʼyo̱ va̱ʼa ku̱ñu, tavá nduta̱ña tá ná koko* leke iniña.
11 Chinúu ki̱si ña̱ va̱ása ñúʼu ña̱ʼa ini nu̱ú ñuʼu̱ ña̱ va̱ʼa ná ndasaa̱ña,
nda̱a̱ ná ndukúáʼa ki̱si ña̱ ku̱vaʼa xíʼin cobre.
Tasaá nduta ndiʼi yaku̱a̱ ña̱ íyo iniña ta koko kusu ña̱ íyo iniña.
12 Xuxanva kooña ta kunaavaún, chi ku̱a̱ʼání kusu íyo iniña ta va̱ása xíínña keeña.
Saá ná koo kusu iniña ta chika̱únña nu̱ú ñuʼu̱’.
13 ”‘Ku̱yaku̱a̱ún xa̱ʼa̱ ña̱ kini ña̱ ke̱ʼún. Nda̱sandii̱* yóʼó soo va̱ása níndundiún. Ta nda̱a̱ ná ya̱ʼa ña̱ sái̱ xíʼún saá ndundiún. 14 Yi̱ʼi̱ Jehová kúú ta̱ ni̱ka̱ʼa̱nña ta xi̱nuvaña. Ña̱ keʼíi̱ kúúvaña. Ta va̱ása ndandikó-inii̱ ta ni va̱ása kusuchí-inii̱ tá ná keʼíi̱ña. Nda̱a̱ táki̱ʼva íyo ña̱ ke̱ʼún saá ndatiinna ku̱a̱chi xíʼún’, káchi táta káʼnu Jehová”.
15 Tuku ni̱ka̱ʼa̱n Jehová xíʼi̱n ta ka̱chira: 16 “Yóʼó ta̱ kúú se̱ʼe ta̱a, iin kama kuití sandíʼi-xa̱ʼíi̱ ñá síʼún ñá kúʼvi̱ní-iniún xíniún. Va̱ása kusuchí-iniún* ta ni va̱ása kuakún xa̱ʼa̱ñá. 17 Ya̱a̱ ya̱a̱ kuakún, ni va̱ása kundiku̱ún costumbre ña̱ kéʼéna tá xíʼi̱ iin na̱ yiví. Chinúu ti̱ko̱to̱ xi̱níún ta chikaa̱ ndu̱xa̱n xa̱ʼún. Va̱ása ndakasiún yuʼún ta va̱ása kuxún si̱ta̱váʼa ña̱ ná taxi inkana ndaʼún”.
18 Tá xi̱ta̱a̱n* ni̱ka̱ʼi̱n xíʼin na̱ ñuu, ta xi̱kuaá ni̱xi̱ʼi̱ ñá síʼi̱. Ta tá xi̱ta̱a̱n ña̱ inka ki̱vi̱, ke̱ʼíi̱ nda̱a̱ táki̱ʼva ni̱ka̱ʼa̱n Ndióxi̱ xíʼi̱n. 19 Ta na̱ ñuu xi̱kaʼa̱nna xíʼi̱n: “¿Á va̱ása natúʼún xíʼinndi̱ ndáaña kúni̱ kachi ndiʼi ña̱ kéʼún yóʼo?”. 20 Ta ni̱ka̱ʼi̱n xíʼinna: “Ña̱yóʼo kúú ña̱ ni̱ka̱ʼa̱n Jehová xíʼi̱n: 21 ‘Ka̱ʼa̱n xíʼin na̱ ñuu Israel: “Ña̱yóʼo kúú ña̱ káʼa̱n táta káʼnu Jehová: ‘Va̱ása ixato̱ʼíi̱ temploi̱ ña̱ ni̱nuní kúnindó xíʼin, ña̱ kúʼvi̱-inindó xínindó, ña̱ kúni̱níndó xínindó. Se̱ʼe-síʼindó xíʼin se̱ʼeta̱andó na̱ sa̱ndákoondó ñuu Jerusalén, kuvina xíʼin espada. 22 Tasaá keʼéndó nda̱a̱ táki̱ʼva ke̱ʼé yi̱ʼi̱. Va̱ása ndakasindó yuʼúndó ta ni va̱ása kuxundó si̱ta̱váʼa ña̱ ná taxi inkana ndaʼa̱ndó. 23 Kunúuka ti̱ko̱to̱ xi̱níndó ta kuñuʼu ndu̱xa̱n xa̱ʼa̱ndó. Va̱ása kusuchí-inindó ta ni va̱ása kuakundó. Nu̱úka ña̱ keʼéndó ña̱yóʼo, xo̱ʼvi̱ndó* xa̱ʼa̱ ku̱a̱chi ña̱ ni̱ki̱ʼvindó, ta ya̱a̱ ya̱a̱ kuakundó. 24 Nda̱a̱ táki̱ʼva íyo iin señal saá koo ta̱ Ezequiel nu̱úndó. Táki̱ʼva ke̱ʼéra saá keʼéndó. Tá ná kuu ndiʼi ña̱yóʼo, kunda̱a̱-inindó ña̱ yi̱ʼi̱ kúú táta káʼnu Jehová’”’”.
25 “Yóʼó ta̱ kúú se̱ʼe ta̱a, ki̱vi̱ ña̱ ná sandíʼi-xa̱ʼíi̱ templo ña̱ ndáaní-inina, ña̱ kúsi̱íní-inina xíʼin, ña̱ kúni̱nína xínina, ta saátu tá ná sandíʼi-xa̱ʼíi̱ se̱ʼeta̱ana xíʼin se̱ʼe-síʼina, 26 iin na̱ ná ka̱ku kúú na̱ natúʼun xa̱ʼa̱ña xíʼún. 27 Ki̱vi̱ saá ka̱ʼún xíʼin na̱ ná ka̱ku, chi xa̱a̱ kiviva ka̱ʼún xíʼinna. Nda̱a̱ táki̱ʼva íyo iin señal saá koún nu̱ú na̱yóʼo, ta kunda̱a̱-inina ña̱ yi̱ʼi̱ kúú Jehová”.