Ezequiel
27 Tuku ni̱ka̱ʼa̱n Jehová xíʼi̱n ta ka̱chira: 2 “Yóʼó ta̱ kúú se̱ʼe ta̱a,* kata iin yaa ña̱ suchí-ini xa̱ʼa̱ ñuu Tiro. 3 Ña̱yóʼo ka̱ʼún xíʼin ñuu Tiro:
‘Yóʼó ñuu ña̱ íyo yuʼú mar,
ñuu ña̱ íxi̱íko* ña̱ʼa ta sátáña* ña̱ʼa nu̱ú ku̱a̱ʼání ñuu ña̱ íyo nu̱ú isla,
ña̱yóʼo kúú ña̱ káʼa̱n táta káʼnu Jehová:
“Ña̱yóʼo ni̱ka̱ʼa̱n yóʼó ñuu Tiro: ‘Liviníva náʼi̱’.
4 Nda̱a̱ ma̱ʼñú mar xáa̱ ñuʼún
ta ndiʼi na̱ i̱xava̱ʼa yóʼó, nda̱salivikana yóʼó.
5 Nda̱a̱ táki̱ʼva íxava̱ʼana tú barco,
xíʼin yitu̱n tú enebro tú íyo chí Senir, saá i̱xava̱ʼana tabla tú kúúmiíún,
xíʼin yitu̱n tú cedro tú íyo chí Líbano i̱xava̱ʼana yitu̱n tú níndichi iniún.
6 Xíʼin yitu̱n tú roble tú íyo chí Basán i̱xava̱ʼana remo tú kúúmiíún,
ta xíʼin yitu̱n tú naní ciprés i̱xava̱ʼana nu̱ún ta chí isla ña̱ Kitim ke̱e marfil ña̱ chi̱núuna nu̱ún.
7 Ta lino ña̱ ke̱e chí Egipto ña̱ kúúmií ku̱a̱ʼání color xi̱niñúʼuna ña̱ ke̱ʼéna tela ña̱ chindeétáʼan xíʼún kanda̱ún,
ta tela ña̱ sáʼvi xi̱níún ku̱vaʼaña xíʼin yi̱ʼva̱ azul ta saátu ixí* ndikachi* ña̱ nda̱kaʼyi̱ color ndíʼí* ña̱ ke̱e chí nu̱ú isla ña̱ Elisá.
8 Na̱ ndóo chí Sidón xíʼin na̱ ndóo chí Arvad kúú na̱ xi̱sakánda̱ yóʼó xíʼin remo.
Ta yóʼó ñuu Tiro, na̱ ta̱a na̱ xíni̱va̱ʼa kúú na̱ xíka xíʼún nu̱ú ti̱kui̱í.
9 Na̱ ta̱a na̱ xa̱a̱ chée na̱ xíni̱ní, na̱ ke̱e chí Guebal xi̱kixina ña̱ va̱ʼa ndakasina nu̱ú xi̱ndakutáʼan yitu̱n tú xi̱kuumiíún.
Ndiʼi tú barco tú xi̱xika nu̱ú mar xíʼin na̱ xi̱kavanú, xi̱kixina nu̱ún ña̱ va̱ʼa xi̱íkona ña̱ʼa nu̱ún.
10 Na̱ ta̱a ñuu Persia na̱ xi̱kee ñuu Lud xíʼin Put xi̱kitáʼanna xíʼin na̱ soldado na̱ xi̱kuumiíún, ta na̱yóʼo kúú na̱ xi̱xaʼa̱n nu̱ú ku̱a̱chi.
Xi̱katikaana escudo xíʼin ka̱a ña̱ ndási xi̱nína kándíka nama̱ ña̱ xi̱kuumiíún tasaá liviní xi̱naʼún.
11 Na̱ ta̱a na̱ ñuu Arvad kúú na̱ xi̱kitáʼan xíʼin na̱ soldado na̱ xi̱kuumiíún
ta xi̱nditana iníí nu̱ú nama̱ ña̱ xi̱kuumiíún,
ta na̱ ta̱a na̱ ndakúní kúú na̱ xi̱ndita chí veʼe ña̱ súkunní ña̱ xi̱kuumiíún.
Xi̱katikaana escudo iníí sa̱tá nama̱ ña̱ xi̱kuumiíún tasaá liviníka xi̱naʼún.
12 ”’”Na̱ ñuu Tarsis xi̱taxina plata, hierro, estaño xíʼin plomo ndaʼún ña̱ va̱ʼa satána ña̱ʼa ña̱ xi̱kuumiíún. 13 Na̱ ñuu Javán, Tubal xíʼin Mesec xi̱taxina na̱ xi̱kachíñundáʼvi nu̱ún ta saátu ña̱ʼa ña̱ cobre ña̱ va̱ʼa satána ña̱ʼa ña̱ xi̱kuumiíún. 14 Na̱ se̱ʼe ta̱ Togarmá xi̱taxina kuáyi̱ xíʼin mula ndaʼún ña̱ va̱ʼa kiʼinna ña̱ʼa ña̱ kúúmiíún. 15 Ta xíʼin na̱ ñuu Dedán xi̱xi̱íkondó ña̱ʼa nu̱ú táʼanndó; ta ku̱a̱ʼání na̱ xi̱xi̱íko ña̱ʼa na̱ xi̱ndoo ku̱a̱ʼání isla xi̱kachíñuna nu̱ún; ta ña̱ va̱ʼa chaʼvina yóʼó, xi̱taxina marfil xíʼin yitu̱n tú ébano ndaʼún. 16 Ña̱ va̱ʼa kiʼin na̱ ñuu Edom ku̱a̱ʼání ña̱ʼa ña̱ xi̱kuumiíún, xi̱taxina yu̱u̱ ña̱ turquesa ndaʼún, ixí ndikachi ña̱ color ndíʼí, ti̱ko̱to̱ ña̱ liviní ni̱ku̱kuna* nu̱ú, ti̱ko̱to̱ ña̱ va̱ʼaní, yu̱u̱ ña̱ livi ña̱ ñúʼu ini mar xíʼin yu̱u̱ ña̱ rubí ña̱ va̱ʼa kiʼinna ña̱ʼa ña̱ xi̱kuumiíún.
17 ”’”Na̱ ñuu Judá xíʼin na̱ xi̱ndoo chí ñuu Israel xi̱xi̱íkona ña̱ʼa nu̱ún ta xi̱taxina trigo ña̱ ke̱e chí Minit ndaʼún, ta mií ña̱ va̱ʼaka kúú ña̱ xi̱taxina xi̱xixiún, xi̱taxina ñu̱ñú, aceite xíʼin bálsamo* ndaʼún ña̱ va̱ʼa kiʼinna ña̱ʼa ña̱ xi̱kuumiíún.
18 ”’”Na̱ ñuu Damasco xi̱xi̱íkona ña̱ʼa nu̱ún xa̱ʼa̱ ña̱ ku̱a̱ʼání ña̱ʼa xi̱kuumiíún ta saátu xa̱ʼa̱ ndiʼi ña̱ ku̱i̱ká ña̱ xi̱kuumiíún; xi̱taxina vino ndaʼún tá xi̱kee chí Helbón ta saátu ixí ndikachi ña̱ xi̱kee chí Sahar. 19 Na̱ ñuu Vedán, Javán xíʼin Uzal, xi̱taxina hierro ndaʼún, casia* ta saátu ndo̱o̱* xa̱ʼa̱ ña̱ʼa ña̱ xi̱kuumiíún. 20 Na̱ ñuu Dedán xi̱xi̱íkona ti̱ko̱to̱ nu̱ún, ña̱ xíniñúʼuna xíʼin tayi̱ tú yósóna* kuáyi̱. 21 Na̱ árabe xíʼin na̱ xi̱niʼi yichi̱ nu̱ú na̱ Quedar xi̱kachíñuna nu̱ún, na̱ xi̱xi̱íko ndikachi válí, ndikachi che̱e xíʼin ti̱xúʼú.* 22 Ta na̱ xi̱xi̱íko ña̱ʼa na̱ xi̱kee chí Saba* ta saátu chí Raamá, xi̱taxina ku̱a̱ʼá nu̱ú ña̱ʼa ndaʼún; tá kúú perfume tá yaʼvi, yu̱u̱ ña̱ liviní ta saátu oro xa̱ʼa̱ ña̱ʼa ña̱ xi̱kuumiíún. 23 Na̱ ñuu Harán, Cané, Edén ta saátu na̱ íxi̱íko ña̱ʼa na̱ xi̱kee chí Saba,* Asur xíʼin Kilmad xi̱xi̱íkona ña̱ʼa nu̱ún. 24 Nu̱ú ya̱ʼvi ña̱ xi̱kuumiíún, xi̱xi̱íkona ti̱ko̱to̱ ña̱ liviní, ti̱ko̱to̱ ña̱ ni̱ku̱kuna nu̱ú xíʼin yi̱ʼva̱ azul ta saátu ti̱ko̱to̱ ña̱ ku̱a̱ʼání color kúúmií, ta ndiʼi ña̱yóʼo va̱ʼaní xi̱nuʼniña.
25 Ta iin yiku̱n xi̱kee barco tú xi̱kixi chí Tarsis, tú xi̱xi̱íko ña̱ʼa ña̱ xi̱kuumiíún;
ña̱kán chútúkaviún ni̱xa̱ʼún chí nu̱ú mar ta ku̱a̱ʼákaví ña̱ʼa xi̱ndisoún.
26 Ta na̱ sáka̱nda̱ remo ña̱ kúúmiíún ni̱xa̱ʼa̱nna xíʼún nu̱ú mar tá ndeéní kánda̱ nu̱ú;
ta ta̱chí ña̱ va̱xi chí nu̱ú kíta ñu̱ʼu* sa̱ndíʼi-xa̱ʼa̱ña yóʼó nu̱ú mar.
27 Ndiʼi ña̱ ku̱i̱ká ña̱ xi̱kuumiíún, ndiʼi ña̱ʼa ña̱ xi̱kuumiíún ta saátu ndiʼi ña̱ʼa ña̱ xi̱xi̱íkoún, xíʼin ndiʼi na̱ ta̱a na̱ xi̱xika xíʼún nu̱ú ti̱kui̱í,
na̱ xi̱ndakasi nu̱ú xi̱ndakutáʼan yitu̱n tú xi̱kuumiíún, na̱ xi̱xi̱íkoún ña̱ʼa nu̱ú ta saátu ndiʼi na̱ ta̱a na̱ xi̱xaʼa̱n nu̱ú ku̱a̱chi
(xíʼin ndiʼika na̱ xi̱ñuʼu iniún),
ndiʼi na̱yóʼo ko̱yona ini tá mar tá ná ndiʼi-xa̱ʼún.
28 Xa̱ʼa̱ ña̱ ndeéní nda̱ʼyi̱ na̱ ta̱a na̱ xíka xíʼún nu̱ú ti̱kui̱í, ndeéní kanda̱ ñuʼú ña̱ íyo yuʼú tá mar.
29 Ndiʼi na̱ sáka̱nda̱ remo tú kúúmiíún, na̱ káchíñu iniún ta saátu na̱ ta̱a na̱ xíni̱ kaka nu̱ú mar,
sandákoona barcona ta ku̱ʼu̱nna chí nu̱ú ñuʼú.
30 Tá sákaana ñuʼú xi̱nína ta tíviníʼnina* nu̱ú ya̱a̱,
ndeéní nda̱ʼyi̱ kóʼóna* ta ndeéní kuakuna xa̱ʼún.
31 Xa̱tá chálána ixí xi̱nína ta ndakundixina ti̱ko̱to̱ ndayí;*
kusuchíní-inina kuakuna xa̱ʼún ta ndeéní tanana.
32 Ta nani ndeéní xákuna xa̱ʼún, katana iin yaa ña̱ suchí-ini ta ku̱a̱ʼá yichi̱ kachina:
‘¿Ndáaña íyo nda̱a̱ táki̱ʼva íyo ñuu Tiro ña̱ ndi̱ʼi-xa̱ʼa̱ chí nu̱ú mar?
33 Nda̱a̱ nu̱ú mar xi̱kee ña̱ʼa ña̱ xi̱xiniñúʼún ta xi̱sakúsi̱íún-ini ku̱a̱ʼání na̱ ñuu xíʼin ña̱yóʼo.
Xa̱ʼa̱ ña̱ ku̱a̱ʼání ña̱ ku̱i̱ká xi̱kuumiíún ta saátu ña̱ʼa ña̱ xi̱xi̱íkoún, nda̱sakúikáún na̱ rey na̱ íyo nu̱ú ñuʼú.
34 Vitin ndi̱ʼi-xa̱ʼún nu̱ú mar nu̱ú íyo ti̱kui̱í tá kúnúní;
ta ndiʼi ña̱ʼa ña̱ xi̱kuumiíún ta saátu na̱ yiví na̱ xi̱kitáʼan xíʼún, ni̱sa̱ʼvina xíʼún.
35 Ndiʼi na̱ ndóo chí isla, iin ku̱ʼu̱n-inina tá ná kunina ña̱ ndo̱ʼún
ta na̱ kúú rey nu̱úna, ndeéní yi̱ʼvína ta kunaʼa̱ nu̱úna ña̱ ndeéní ndíʼi̱-inina.
36 Ta na̱ inka ñuu na̱ íxi̱íko ña̱ʼa ndakanda̱ní-inina* xa̱ʼa̱ ña̱ ndo̱ʼún.
Iin kama kixaa̱ ña̱ ndiʼi-xa̱ʼún ta i̱yoní kooña.
Ndiʼi-xa̱ʼa̱ va̱ʼún’”’”.