Ezequiel
28 Tuku ni̱ka̱ʼa̱n Jehová xíʼi̱n ta ka̱chira: 2 “Yóʼó ta̱ kúú se̱ʼe ta̱a,* ña̱yóʼo ka̱ʼún xíʼin ta̱ níʼi yichi̱ nu̱ú na̱ ñuu Tiro:
‘Ña̱yóʼo kúú ña̱ káʼa̱n táta káʼnu Jehová:
“Ni̱nuní kúniún, ta xa̱ʼa̱ ña̱kán kǒo sándakoún ña̱ ka̱ʼún ‘Iin ndióxi̱ kúi̱.
Xíkundúʼi̱ nu̱ú trono iin ndióxi̱ chí ma̱ʼñú mar’.
Ni ndákanixi̱níún ña̱ kúún iin ndióxi̱ soo iin ta̱a kuitíva kúún.
3 Ndákanixi̱níún ña̱ ndíchikaún nu̱ú ta̱ Daniel.
Ta túviún ña̱ kǒo ni iin ña̱ʼa íyo se̱ʼé nu̱ún.
4 Ndu̱kúikáún xa̱ʼa̱ ña̱ ndíchiún ta saátu xa̱ʼa̱ ña̱ kúnda̱a̱-iniún xa̱ʼa̱ ku̱a̱ʼá ña̱ʼa,
ta ndákundeún ndátaánva̱ʼún* ku̱a̱ʼání oro xíʼin plata.
5 Xa̱ʼa̱ ña̱ xíni̱níún xi̱íkoún* ña̱ʼa, nda̱saku̱a̱ʼáníún ña̱ ku̱i̱ká ña̱ kúúmiíún,
ta ki̱xáʼún ni̱nuní kúniún xa̱ʼa̱ ña̱ ku̱i̱ká ña̱ kúúmiíún”’.
6 ”‘Xa̱ʼa̱ ña̱kán, ña̱yóʼo kúú ña̱ káʼa̱n táta káʼnu Jehová:
“Xa̱ʼa̱ ña̱ ndákanixi̱níún ña̱ kúún iin ndióxi̱,
7 chindaʼíi̱ na̱ kee inka ñuu nu̱ún, na̱ ndi̱va̱ʼaní-ini nu̱ú inkaka na̱ ñuu;
na̱yóʼo tavána espadana ta sandíʼi-xa̱ʼa̱na ndiʼi ña̱ livi ña̱ kúúmiíún xa̱ʼa̱ ña̱ ndíchiún,
ta sandíʼi-xa̱ʼa̱na ña̱ livi ña̱ kúúmiíún.
8 Na̱kán, kaʼnína yóʼó.
ta saxóʼvi̱na* yóʼó ma̱ʼñú tá mar.
9 Soo ni saá, ¿á ka̱ʼún xíʼin na̱ ná kaʼní yóʼó: ‘Iin ndióxi̱ kúi̱’?
Nu̱ú na̱ ixandi̱va̱ʼa xíʼún, iin ta̱a kuitíva koún ta su̱ví iin ndióxi̱ koún”’.
10 ‘Ta na̱ inka ñuu kaʼnína yóʼó nda̱a̱ táki̱ʼva xáʼnína na̱ va̱ása níta̱ʼnda̱ nu̱ú yi̱i̱,*
saáchi yi̱ʼi̱ kúú ta̱ ni̱ka̱ʼa̱nña’, káchi táta káʼnu Jehová”.
11 Tuku ni̱ka̱ʼa̱n Jehová xíʼi̱n ta ka̱chira: 12 “Yóʼó ta̱ kúú se̱ʼe ta̱a, kata iin yaa ña̱ suchí-ini xa̱ʼa̱ ta̱ rey ñuu Tiro. Ta kachiún xíʼinra: ‘Ña̱yóʼo kúú ña̱ káʼa̱n táta káʼnu Jehová:
“Yóʼó, ni loʼo ña̱ va̱ása va̱ʼa kǒo níxi̱kuumiíún,
ndíchiní ni̱xi̱yoún ta liviní xi̱naʼún.
13 Ni̱xi̱yoún chí Edén, ña̱ kúú jardín Ndióxi̱,
ta nu̱ú ti̱ko̱to̱ún xi̱tiin ndiʼi yu̱u̱ livi:
yu̱u̱ ña̱ naní rubí, topacio xíʼin jaspe; crisólito, ónice xíʼin jade; zafiro, turquesa xíʼin esmeralda;
ta ka̱a ña̱ xi̱tiin yu̱u̱ yóʼo, ña̱ oro xi̱kuuña.
Ndiʼi ña̱yóʼo ni̱xi̱yo tu̱ʼvaña ki̱vi̱ ña̱ ku̱vaʼún.
14 Ta̱xii̱ chiñu ndaʼún ña̱ kundaún nda̱a̱ táki̱ʼva ndáa iin ta̱ querubín ta̱ nda̱kaxii̱n.
Ni̱xi̱yoún nu̱ú yuku̱ yi̱i̱ Ndióxi̱, ni̱xi̱kaún ma̱ʼñú yu̱u̱ ña̱ xíxi̱.
15 Nani tá ku̱vaʼún kǒo ni iin ña̱ va̱ása va̱ʼa níkeʼún
soo ki̱xaa̱ tiempo ña̱ ki̱xáʼún kéʼún ña̱ va̱ása va̱ʼa.
16 Xa̱ʼa̱ ña̱ ku̱a̱ʼání ña̱ʼa ki̱xáʼún íxi̱íkoún,
ki̱xáʼa íyo ku̱a̱ʼání ña̱ va̱ása va̱ʼa ñuún, tasaá ni̱ki̱ʼviún ku̱a̱chi.
Ña̱kán, tavái̱ yóʼó nu̱ú yuku̱ Ndióxi̱, nda̱a̱ táki̱ʼva kéʼéna xíʼin na̱ yaku̱a̱ ta sandíʼi-xa̱ʼíi̱ yóʼó,
kuxíkáún nu̱ú yu̱u̱ ña̱ xíxi̱, yóʼó querubín ta̱ ndáa.
17 Ki̱xáʼún ni̱nuní kúniún xa̱ʼa̱ ña̱ liviní náʼún.
Ta xa̱ʼa̱ ña̱ liviní náʼún, sa̱ndíʼi-xa̱ʼún ña̱ ndíchi ña̱ xi̱kuumiíún.
Sakánai̱ yóʼó nu̱ú na̱ rey.
Ña̱ va̱ʼa kunina ña̱ va̱ása va̱ʼa íyo tu̱ndóʼo ña̱ ndóʼún.
18 Xa̱ʼa̱ ña̱ ndeéní ku̱a̱chi ni̱ki̱ʼviún ta saátu xa̱ʼa̱ ña̱ sándaʼviún tá íxi̱íkoún, íxayaku̱a̱ún lugar ña̱ yi̱i̱.
Ma̱ʼñún chikai̱ iin ñuʼu̱ ta ña̱yóʼo kaʼmi ndiʼiña yóʼó.
Ya̱a̱ kuitíva nduún nu̱ú ñuʼú, nu̱ú ndiʼi na̱ xíto ña̱ kéʼún.
19 Ndiʼi na̱ ñuu na̱ xi̱xini̱ yóʼó, ndakanda̱ní-inina* kotona yóʼó.
Iin kama kixaa̱ ña̱ ndiʼi-xa̱ʼún ta i̱yoní kooña.
Ndiʼi-xa̱ʼa̱ va̱ʼún”’”.
20 Tuku ni̱ka̱ʼa̱n Jehová xíʼi̱n ta ka̱chira: 21 “Yóʼó ta̱ kúú se̱ʼe ta̱a, koto chí Sidón ta ka̱ʼa̱n xa̱ʼa̱ ña̱ kundoʼoña. 22 Ña̱yóʼo kachiún: ‘Ña̱yóʼo kúú ña̱ káʼa̱n táta káʼnu Jehová:
“Ndáʼviníún Sidón, yi̱ʼi̱ íyoi̱ contra xíʼún, ta xa̱ʼa̱ ña̱ keʼíi̱ xíʼún, ndasakáʼnuna yi̱ʼi̱.
Na̱ yiví kunda̱a̱-inina ña̱ yi̱ʼi̱ kúú Jehová tá ná ndatii̱n ku̱a̱chi xíʼún ta nduyi̱íi̱ xa̱ʼa̱ ña̱ keʼíi̱ xíʼún.
23 Chindaʼíi̱ kue̱ʼe̱ nu̱úna ta na̱ yiví kuvina kundoona chí calle.
Ku̱a̱ʼánína kuvi ini ñuu tá ná kixina kanitáʼanna xíʼinna, ta xa̱a̱ síín síín nu̱ú kixina;
tasaá kunda̱a̱-ini na̱yóʼo ña̱ yi̱ʼi̱ kúú Jehová.
24 ”’”Tasaá, na̱ ñuu Israel, va̱ása yatinka kundoona xíʼin na̱ xi̱kundasí xi̱xiniñaʼá, na̱ íyo nda̱a̱ táki̱ʼva íyo iñú ña̱ xi̱sandóʼo-inina, ña̱ xi̱saxóʼvi̱ní miína; tasaá, na̱ yiví kunda̱a̱-inina ña̱ yi̱ʼi̱ kúú táta káʼnu Jehová”’.
25 ”‘Ña̱yóʼo kúú ña̱ káʼa̱n táta káʼnu Jehová: “Tá ná sandátaka tukui̱ na̱ ñuu Israel nu̱ú ku̱a̱ʼa̱nna kundoona, saá nduyi̱íi̱ ma̱ʼñú na̱yóʼo, ta ndiʼi na̱ ñuu kuni ña̱yóʼo. Ta na̱yóʼo koona nu̱ú ñuʼú ña̱ ta̱xii̱ ndaʼa̱ ta̱ Jacob, ta̱ xi̱kachíñu nu̱úi̱. 26 Tá ná kundoona kán kǒo ña̱ kundoʼona; ixava̱ʼana veʼe ta chiʼina tú uva; va̱ʼaní kundoona tá ná ndatii̱n ku̱a̱chi xíʼin na̱ kúndasí xíniñaʼá, na̱ ndóo yatin xíʼinna; tasaá kúú ña̱ kunda̱a̱-inina ña̱ yi̱ʼi̱ kúú Jehová Ndióxi̱na”’”.