Ezequiel

36 “Yóʼó ta̱ kúú se̱ʼe ta̱a,* ka̱ʼa̱n xa̱ʼa̱ ña̱ kundoʼo yuku̱ ña̱ ñuu Israel chí nu̱únínu ta kachiún: ‘Yuku̱ ñuu Israel, kuniso̱ʼondó ña̱ káʼa̱n Jehová. 2 Ña̱yóʼo kúú ña̱ káʼa̱n táta káʼnu Jehová: “Na̱ sáa̱-ini xíni ndóʼó káʼa̱nna ña̱yóʼo xa̱ʼa̱ndó: ‘Va̱ʼaní ku̱u. Saáchi nda̱a̱ xi̱kí súkun ña̱ íyo nda̱a̱ tá xi̱naʼá, kúúña kuentayó vitin’”’.

3 ”Ña̱kán ka̱ʼún xa̱ʼa̱ ña̱ kundoʼoña ta kachiún: ‘Ña̱yóʼo kúú ña̱ káʼa̱n táta káʼnu Jehová: “Xa̱ʼa̱ ña̱ sa̱ndíʼi-xa̱ʼa̱na ndóʼó ta iníí ke̱ena ka̱nitáʼanna xíʼinndó ta nda̱kiʼin na̱ inka ñuu ndóʼó ña̱ koondó kuentana, ta xa̱ʼa̱ ña̱ káʼa̱nka na̱ yiví tu̱ʼun síkí xa̱ʼa̱ndó, 4 xa̱ʼa̱ ña̱kán, yuku̱ ñuu Israel, kuniso̱ʼondó ña̱ káʼa̱n táta káʼnu Jehová. Ña̱yóʼo kúú ña̱ káʼa̱n táta káʼnu Jehová xíʼin yuku̱ ta saátu xi̱kí, xíʼin yu̱ta ta saátu yoso̱, xíʼin ñuu ña̱ ndi̱ʼi-xa̱ʼa̱ ta saátu ñuu ña̱ ki̱ndoo mií, nu̱ú ni̱ki̱ʼvi na̱ ñuu na̱ ni̱ka̱ku ta nda̱kiʼinna ña̱ʼa ku̱a̱ʼa̱n xíʼinna ta nda̱sanaña ña̱ʼa ña̱ kúsi̱kindaana; 5 ña̱yóʼo kúú ña̱ káʼa̱n táta káʼnu Jehová xíʼinna: ‘Ña̱ sái̱ íyoña nda̱a̱ táki̱ʼva íyo iin ñuʼu̱, xa̱ʼa̱ ña̱kán ka̱ʼi̱n xa̱ʼa̱ ña̱ va̱ása va̱ʼa ña̱ kundoʼo na̱ ni̱ka̱ku ti̱xin ndiʼi ñuu, ta saátu ka̱ʼi̱n xa̱ʼa̱ ña̱ va̱ása va̱ʼa ña̱ kundoʼo ndiʼi na̱ ndóo ñuu Edom, na̱ ndeéní kúsi̱í-ini ta ni̱nukaví kúni̱na ña̱ káʼa̱nna ña̱ kuenta miína kúú ñuʼíi̱, saáchi kúni̱na kindo̱ona xíʼin ñuʼú nu̱ú íyoní yita* ta va̱ása sandákoona nda̱a̱ ni iin ña̱ʼa nu̱úña’”’.

6 ”Ña̱kán, ka̱ʼa̱n xa̱ʼa̱ ña̱ kundoʼo ñuʼú ña̱ íyo chí Israel, ta ka̱ʼún ña̱yóʼo xíʼin yuku̱ ta saátu xi̱kí, xíʼin yu̱ta ta saátu yoso̱: ‘Ña̱yóʼo kúú ña̱ káʼa̱n táta káʼnu Jehová: “Kotondó. Na̱ inka ñuu ku̱ndasína xi̱nina ndóʼó, xa̱ʼa̱ ña̱kán sa̱a̱níi̱ ta ka̱ʼi̱n xa̱ʼa̱ ña̱ kundoʼona”’.

7 ”Ña̱kán, ña̱yóʼo kúú ña̱ káʼa̱n táta káʼnu Jehová: ‘Ndániʼii̱ ndaʼíi̱ ta chínaʼíi̱* ña̱ kukaʼan nu̱ú na̱ inka ñuu. 8 Soo ndóʼó yuku̱ ñuu Israel, koo yitu̱n nu̱úndó, kóʼo̱ní koo ndaʼa̱nú ta taxinú ku̱i̱ʼi kaxí na̱ ñui̱ Israel saáchi xa̱a̱ ku̱nu̱mí ndikóna. 9 Saáchi yi̱ʼi̱ íyoi̱ xíʼinndó, kiʼii̱n kuenta xíʼinndó ta chiʼina nu̱úndó. 10 Ku̱a̱ʼání ndasai̱ na̱ ñuu Israel, ndakundoona ndiʼi ñuu ta sandáʼana ndiʼi ñuu ña̱ ndi̱ʼi-xa̱ʼa̱. 11 Ku̱a̱ʼání ndasai̱na ta saátu ku̱a̱ʼání ndasai̱ kití sa̱na̱na; ku̱a̱ʼání xa̱a̱na nduuna. Kundoona nu̱úndó nda̱a̱ táki̱ʼva xi̱ndoona tá ya̱chi̱, ku̱a̱ʼáníka ña̱ʼa koo nu̱úndó nu̱úka ña̱ ni̱xi̱yo nu̱úndó xi̱naʼá; tasaá kunda̱a̱-inindó ña̱ yi̱ʼi̱ kúú Jehová Ndióxi̱ndó. 12 Taxii̱ ná kaka na̱ ñui̱ Israel nu̱úndó ta nduundó kuentana. Ndóʼó xa̱a̱ndó nduundó herenciana ta va̱ása kaʼníkandó se̱ʼena’”.

13 “Ña̱yóʼo kúú ña̱ káʼa̱n táta káʼnu Jehová: ‘Xa̱ʼa̱ ña̱ káʼa̱nna ña̱yóʼo xíʼinndó “Kúún iin ñuʼú ña̱ sándiʼi-xa̱ʼa̱ na̱ ndóo nu̱ú ñuʼú yóʼo ta xáʼníún se̱ʼe na̱ ñuu”’, 14 ‘xa̱ʼa̱ ña̱kán va̱ása sandíʼi-xa̱ʼa̱kaún na̱ ñui̱, ta ni va̱ása kaʼníkaún se̱ʼe na̱ inka ñuu, káchi táta káʼnu Jehová. 15 Va̱ása taxikai̱ ka̱ʼa̱n-ndi̱va̱ʼa na̱ inka ñuu xa̱ʼún, ni va̱ása kusi̱kindaaka na̱ yiví yóʼó ta va̱ása taxikai̱ sandíʼi-xa̱ʼún na̱ ñuún’, káchi táta káʼnu Jehová”.

16 Tuku ni̱ka̱ʼa̱n Jehová xíʼi̱n ta ka̱chira: 17 “Yóʼó ta̱ kúú se̱ʼe ta̱a, tá xi̱ndoo na̱ ñuu Israel nu̱ú ñuʼúna, i̱xayaku̱a̱naña xíʼin ña̱ xi̱keʼéna. Ña̱ xi̱keʼéna, táki̱ʼva íyo ña̱ kúyaku̱a̱ iin ñaʼá tá núu ni̱i̱ñá saá ni̱xi̱yoña nu̱úi̱. 18 Ña̱kán ni̱sa̱a̱níi̱ xíʼinna chi xa̱ʼnína ku̱a̱ʼánína nu̱ú ñuʼú ta i̱xayaku̱a̱na nu̱ú ñuʼú xíʼin ña̱ kini ña̱ xi̱ndasakáʼnuna. 19 Ña̱kán, xa̱a̱ síín síín ñuu ta̱xii̱ ná ku̱ʼu̱nna kundoona ta xa̱a̱ síín síín país kundoona. Nda̱tii̱n ku̱a̱chi xíʼinna nda̱a̱ táki̱ʼva íyo ña̱ ke̱ʼéna. 20 Soo tá ni̱xa̱a̱na ñuu kán, na̱ yiví na̱ ndóo kán ni̱ka̱ʼa̱n-ndi̱va̱ʼana xa̱ʼa̱ ki̱víi̱ ña̱ yi̱i̱, chi ka̱china: ‘Na̱yóʼo kúú na̱ ñuu Jehová soo ke̱ena nu̱ú ñuʼú ña̱ ta̱xira ndaʼa̱na’. 21 Ña̱kán keʼíi̱ iin ña̱ʼa xa̱ʼa̱ ki̱víi̱ ña̱ yi̱i̱, ña̱ kǒo ní ixato̱ʼó na̱ ñuu Israel ma̱ʼñú na̱ ñuu nu̱ú ku̱a̱ʼa̱nna kundoona”.

22 “Ña̱kán, ka̱ʼa̱n ña̱yóʼo xíʼin na̱ ñuu Israel: ‘Ña̱yóʼo kúú ña̱ káʼa̱n táta káʼnu Jehová: “Su̱ví xa̱ʼa̱ ndóʼó na̱ ñuu Israel kúú ña̱ kéʼíi̱ña, chi xa̱ʼa̱ ki̱víi̱ ña̱ yi̱i̱ kúú ña̱ kéʼíi̱ña, ki̱víi̱ ña̱ va̱ása ní ixato̱ʼóndó ma̱ʼñú na̱ ñuu nu̱ú ku̱a̱ʼa̱nndó kundoondó”’. 23 ‘Ndasayi̱íi̱ ki̱víi̱ ña̱ ndáyáʼviní ña̱ va̱ása ní ixato̱ʼó na̱ inka ñuu, ña̱ va̱ása ní ixato̱ʼóndó ma̱ʼñú na̱ ñuu nu̱ú xi̱ndoondó; ta na̱ inka ñuu kunda̱a̱-inina ña̱ yi̱ʼi̱ kúú Jehová tá ná kotona ña̱ nduyi̱íi̱, káchi táta káʼnu Jehová. 24 Ndatavái̱ ndóʼó ma̱ʼñú na̱ inka ñuu, sandátaka tukui̱ ndóʼó ta ku̱ʼi̱n xíʼinndó nu̱ú ñuʼúndó. 25 Chikai̱ ti̱kui̱í tá va̱ása yaku̱a̱ sa̱tándó ta ndundiindó;* ndasandii̱ ndóʼó ta va̱ása kookandó na̱ yaku̱a̱ ta sandíʼi-xa̱ʼíi̱ ndiʼi ndióxi̱ndó ña̱ kini. 26 Taxii̱ iin níma̱ xa̱á ndaʼa̱ndó ta ndasaxa̱íi̱ ña̱ ndákanixi̱níndó. Tavái̱ níma̱ndó ña̱ téʼéní* táki̱ʼva téʼé yu̱u̱ ta taxii̱ iin níma̱ vitá ndaʼa̱ndó, ña̱ vitá nda̱a̱ táki̱ʼva vitá ku̱ñu.* 27 Taxii̱ espíritu santoi̱ ndaʼa̱ndó ta keʼéndó chiñu ña̱ xáʼndai̱ nu̱úndó, kundiku̱nndó ley ña̱ táxii̱ ta saxínundóña. 28 Tasaá kundoondó nu̱ú ñuʼú ña̱ ta̱xii̱ ndaʼa̱ na̱ táʼanndó na̱ xi̱ndoo xi̱naʼá. Ndóʼó koondó na̱ ñui̱ ta yi̱ʼi̱ koi̱ Ndióxi̱ndó’.

29 ”‘Chindeétáʼi̱n xíʼinndó ña̱ va̱ása keʼékandó ña̱ yaku̱a̱. Taxii̱ ná kuaʼnu ña̱ kuxundó ta ku̱a̱ʼání kooña ta va̱ása taxii̱ kuvindó so̱ko. 30 Taxii̱ ná kooní ku̱i̱ʼi ndaʼa̱ yitu̱n ta taxii̱ ná kuaʼnu ña̱ʼa nu̱ú ñuʼú tasaá va̱ása kuvikandó so̱ko ta va̱ása kukaʼanka nu̱úndó nu̱ú na̱ inka ñuu. 31 Tasaá ndakaʼánndó xa̱ʼa̱ ki̱ʼva ña̱ ni̱xi̱yondó ta saátu xa̱ʼa̱ ña̱ va̱ása va̱ʼa ke̱ʼéndó, ta kukini-inindó kunindó miíndó xa̱ʼa̱ ku̱a̱chi ña̱ ni̱ki̱ʼvindó ta saátu xa̱ʼa̱ ña̱ kini ña̱ ke̱ʼéndó. 32 Soo kúni̱i̱ ná kunda̱a̱-inindó xa̱ʼa̱ ña̱yóʼo: su̱ví xa̱ʼa̱ ndóʼó kéʼíi̱ña, káchi táta káʼnu Jehová. Chi kúni̱i̱ ná kukaʼan nu̱úndó xa̱ʼa̱ ña̱ ke̱ʼé ndóʼó na̱ ñuu Israel’.

33 ”Ña̱yóʼo kúú ña̱ káʼa̱n táta káʼnu Jehová: ‘Ki̱vi̱ ña̱ ná ndasandii̱ ndóʼó xa̱ʼa̱ ndiʼi ku̱a̱chi ña̱ ni̱ki̱ʼvindó, taxii̱ ña̱ ndakundoondó ndiʼi ñuu ta sandáʼandó ñuu ña̱ ndi̱ʼi-xa̱ʼa̱. 34 Chiʼi tukundó nu̱ú ñuʼú ña̱ ni̱ndo̱o-ndaʼa̱, ña̱ xi̱xito ndiʼi na̱ xi̱yaʼa kán. 35 Na̱ yiví kachina: “Ñuʼú ña̱ ni̱ndo̱o-ndaʼa̱, vitin íyoña nda̱a̱ táki̱ʼva ni̱xi̱yo jardín ña̱ Edén, ta ndiʼi ñuu ña̱ ki̱ndoo mií ña̱ ndi̱ʼi-xa̱ʼa̱, xa̱a̱ ndóona nu̱úña ta kútu̱ní ndásiña”. 36 Ta na̱ ñuu na̱ ndóo yatin xíʼinndó kunda̱a̱-inina ña̱ yi̱ʼi̱ kúú Jehová, nda̱sava̱ʼii̱ ña̱ ndi̱ʼi-xa̱ʼa̱ ta nda̱chiʼii̱ nu̱ú ñuʼú ña̱ ni̱ndo̱o-ndaʼa̱. Yi̱ʼi̱ Jehová kúú ta̱ ni̱ka̱ʼa̱nña ta yi̱ʼi̱ kúú ta̱ ke̱ʼéña’.

37 ”Ña̱yóʼo kúú ña̱ káʼa̱n táta káʼnu Jehová: ‘Taxii̱ ná ndukú na̱ ñuu Israel ña̱yóʼo nu̱úi̱, ku̱a̱ʼání ndasai̱ na̱ ñuuna nda̱a̱ táki̱ʼva ku̱a̱ʼání kúú ndikachi.* 38 Tasaá xa̱a̱na koona nda̱a̱ táki̱ʼva íyo iin tiʼvi na̱ yiví na̱ yi̱i̱, nda̱a̱ táki̱ʼva íyo ndikachi chí Jerusalén tá xíyo vikó: ndakutú na̱ yiví ini ñuu ña̱ ndi̱ʼi-xa̱ʼa̱; tasaá kunda̱a̱-inina ña̱ yi̱ʼi̱ kúú Jehová’”.