Ezequiel

37 Nda̱kiʼii̱n espíritu santo Jehová, ta xíʼin ña̱yóʼo nda̱kiʼin Jehová yi̱ʼi̱ ta ni̱xa̱ʼa̱nra xíʼi̱n nda̱a̱ ma̱ʼñú yoso̱, ta iin chútú leke nu̱ú yoso̱ kán. 2 Sa̱yáʼara yi̱ʼi̱ ma̱ʼñú leke yóʼo ta xi̱nii̱ ña̱ ku̱a̱ʼáníña ndóo yoso̱ kán, ta yi̱chíníña. 3 Ta ni̱nda̱ka̱tu̱ʼunra yi̱ʼi̱: “Yóʼó ta̱ kúú se̱ʼe ta̱a,* ¿á kivi ndataku leke yóʼo?”. Tasaá nda̱kuii̱n yuʼúra: “Táta káʼnu Jehová, miíún kúú ta̱ xíni̱”. 4 Ta ni̱ka̱ʼa̱nra xíʼi̱n: “Ka̱ʼa̱n xa̱ʼa̱ ña̱ kundoʼo leke yóʼo ta kachiún: ‘Leke yi̱chí, kuniso̱ʼondó tu̱ʼun Jehová:

5 ”’Ña̱yóʼo kúú ña̱ káʼa̱n táta káʼnu Jehová xíʼin leke yóʼo: “Taxii̱ ná ndakiʼinndó ta̱chíndó ña̱ va̱ʼa kutakundó. 6 Chindósoi̱ tu̱chu xíʼin ku̱ñu sa̱tándó, ta ndakasii̱ ndóʼó xíʼin ñii̱; taxii̱ ná ndakiʼinndó ta̱chíndó ña̱ va̱ʼa kutakundó tasaá kunda̱a̱-inindó ña̱ yi̱ʼi̱ kúú Jehová”’”.

7 Tasaá ni̱ka̱ʼi̱n xa̱ʼa̱ ña̱ kundoʼoña nda̱a̱ táki̱ʼva ni̱ka̱ʼa̱nra xíʼi̱n. Ta tá ni̱ka̱ʼi̱n xa̱ʼa̱ ña̱ kundoʼoña xi̱niso̱ʼi̱ ña̱ ndeéní ki̱xáʼa káxan, ta ki̱xáʼa ndáku̱táʼan leke yóʼo. 8 Tasaá xi̱nii̱ ña̱ ki̱xáʼa kána tu̱chu xíʼin ku̱ñu sa̱táña, ta ki̱xáʼa ndásiña xíʼin ñii̱. Soo ta̱ʼán kutakuña.

9 Tándi̱ʼi, ni̱ka̱ʼa̱nra xíʼi̱n: “Ka̱ʼa̱n xa̱ʼa̱ ña̱ keʼé ta̱chí. Yóʼó ta̱ kúú se̱ʼe ta̱a, ka̱ʼa̱n xa̱ʼa̱ ña̱ keʼé ta̱chí, ta kachiún: ‘Ña̱yóʼo kúú ña̱ káʼa̱n táta káʼnu Jehová: “Ta̱chí, ku̱mí saá ti̱tu̱n ñuʼú keún kixiún ta tiviún sa̱tá na̱ xa̱ʼnína yóʼo, ña̱ va̱ʼa ndatakuna”’”.

10 Tasaá ni̱ka̱ʼi̱n xa̱ʼa̱ ña̱ kundoʼo leke yóʼo ta ki̱xáʼaña ndákiʼinña ta̱chíña ta ki̱xáʼaña tákuña; nda̱kunditaña ta ku̱a̱ʼání xi̱kuuña.

11 Tándi̱ʼi, ni̱ka̱ʼa̱nra xíʼi̱n: “Yóʼó ta̱ kúú se̱ʼe ta̱a, leke na̱ ñuu Israel kúú ndiʼi ña̱yóʼo. Ta ña̱yóʼo kúú ña̱ xíkana káʼa̱nna: ‘Ni̱yi̱chi̱ lekeyó ta kǒoka ña̱ va̱ʼa ndátuyó, sa̱ndíʼi-xa̱ʼa̱ va̱ʼana miíyó’. 12 Ña̱kán, ka̱ʼa̱n xa̱ʼa̱ ña̱ kundoʼona ta kachiún: ‘Ña̱yóʼo kúú ña̱ káʼa̱n táta káʼnu Jehová: “Ndakunái̱ ya̱vi̱ nu̱ú ni̱ndu̱xu̱nndó ta tavái̱ ndóʼó ini ya̱vi̱ nu̱ú ni̱ndu̱xu̱n ndóʼó na̱ ñuu miíi̱, ta kixindó xíʼi̱n nu̱ú ñuʼú na̱ ñuu Israel. 13 Tasaá kunda̱a̱-inindó ña̱ yi̱ʼi̱ kúú Jehová tá ná ndakunái̱ ya̱vi̱ nu̱ú ni̱ndu̱xu̱nndó, ta saátu tá ná tavái̱ ndóʼó ini ya̱vi̱ nu̱ú ni̱ndu̱xu̱n ndóʼó na̱ ñuu miíi̱”’. 14 ‘Taxii̱ espíritu santo ndaʼa̱ndó ta ndatakundó, ndachindoi̱ ndóʼó nu̱ú ñuʼúndó. Tasaá kunda̱a̱-inindó ña̱ yi̱ʼi̱ Jehová kúú ta̱ ni̱ka̱ʼa̱nña, ta yi̱ʼi̱ kúú ta̱ keʼéña’, káchi Jehová”.

15 Tuku ni̱ka̱ʼa̱n Jehová xíʼi̱n ta ka̱chira: 16 “Ta yóʼó ta̱ kúú se̱ʼe ta̱a, kiʼin iin yitu̱n ta kaʼyiún ña̱yóʼo sa̱tánú: ‘Yitu̱n tú kúú kuenta ta̱ Judá xíʼin na̱ ñuu Israel na̱ kítáʼan xíʼinra’. Tándi̱ʼi, kiʼin inka yitu̱n ta kaʼyiún ña̱yóʼo sa̱tánú: ‘Yitu̱n tú kúú kuenta ta̱ José ta saátu ta̱ Efraín xíʼin ndiʼika na̱ ñuu Israel na̱ kítáʼan xíʼinra’. 17 Tasaá ndachitáʼúnnú, ña̱ va̱ʼa iin kuití koonú kundikaa̱nú ini ndaʼún. 18 Tá ná ka̱ʼa̱n na̱ ñuún ña̱yóʼo xíʼún ‘¿Á va̱ása ka̱ʼún xíʼinndi̱ ndáaña kúni̱ kachi ña̱yóʼo?’, 19 ña̱yóʼo ndakuiún yuʼúna ‘Ña̱yóʼo kúú ña̱ káʼa̱n táta káʼnu Jehová: “Kiʼii̱n yitu̱n tú kúú kuenta ta̱ José tú ndíkaa̱ ndaʼa̱ ta̱ Efraín xíʼin na̱ ñuu Israel na̱ kítáʼan xíʼinra, ta ndachitáʼi̱nnú xíʼin yitu̱n ta̱ Judá. Iin kuití xa̱a̱nú koonú ta kundikaa̱nú ini ndaʼíi̱”’. 20 Yitu̱n tú ka̱ʼyiún sa̱tá xíniñúʼu kundikaa̱nú ini ndaʼún ña̱ va̱ʼa ná kuninanú.

21 ”Tasaá ka̱ʼún ña̱yóʼo xíʼinna: ‘Ña̱yóʼo kúú ña̱ káʼa̱n táta káʼnu Jehová: “Ndatavái̱ na̱ se̱ʼe na̱ ñuu Israel ma̱ʼñú na̱ ñuu nu̱ú ku̱a̱ʼa̱nna kundoona, iníí sandátakai̱na ta kixina xíʼi̱n nu̱ú ñuʼúna. 22 Iin kuití ñuu xa̱a̱na koona nu̱ú ñuʼú kán, iin kuití ñuu xa̱a̱na koona nu̱ú yuku̱ ñuu Israel, iin kuití koo ta̱ kaʼndachíñu nu̱ú ndiʼina; va̱ása kookana u̱vi̱ ñuu ta va̱ása ndata̱ʼvíkana, ta va̱ása kaʼndachíñuka u̱vi̱na nu̱úna. 23 Va̱ása kuyaku̱a̱kana xíʼin ña̱ʼa ña̱ kini ña̱ ndásakáʼnuna, ni va̱ása keʼékana ña̱ kini ta ni va̱ása ki̱ʼvikana ku̱a̱chi. Chindeétáʼi̱n xíʼinna ña̱ sandákoona ña̱ va̱ása va̱ʼa ke̱ʼéna ta ndasandii̱na.* Koona na̱ ñui̱ ta yi̱ʼi̱ koo Ndióxi̱na.

24 ”’”Ta̱ David ta̱ káchíñu nu̱úi̱ kúú ta̱ kaʼndachíñu nu̱úna, iin kuití koo pastorna. Kundiku̱nna ley ña̱ táxii̱ ta keʼéna chiñu ña̱ xáʼndai̱. 25 Kundoona nu̱ú ñuʼú ña̱ ta̱xii̱ ndaʼa̱ ta̱ Jacob ta̱ káchíñu nu̱úi̱, nu̱ú xi̱ndoo na̱ táʼanndó na̱ xi̱ndoo xi̱naʼá. Kundoona nu̱úña ndiʼi tiempo, miína, na̱ se̱ʼena xíʼin na̱ se̱ʼeñánina; ta ta̱ David ta̱ káchíñu nu̱úi̱ kúú ta̱ kuniʼi yichi̱ nu̱úna ndi’i tiempo.

26 ”’”Keʼíi̱ iin trato xíʼinna ña̱ vií kundoona; iin trato ña̱ koo ndiʼi tiempo. Taxii̱ nu̱ú kundoona ta ku̱a̱ʼání ndasai̱na, ta kanindichii̱ temploi̱ ma̱ʼñú nu̱ú kundoona ndiʼi tiempo. 27 Veʼi̱ kundichiña nu̱ú kundoona; yi̱ʼi̱ koo Ndióxi̱na ta na̱kán koona na̱ ñui̱. 28 Tá ndiʼi tiempo ná kundichi temploi̱ ma̱ʼñú nu̱ú ndóona, na̱ inka ñuu kunda̱a̱-inina ña̱ yi̱ʼi̱ Jehová kúú ta̱ ndásayi̱i̱ na̱ ñuu Israel”’”.