Ezequiel

45 ”‘Tá ná ndataʼvíndó ñuʼú ña̱ ndakiʼinndóña kooña herenciandó, taxindó iin táʼví ña̱yóʼo ndaʼa̱ Jehová ta ña̱ yi̱i̱ kooña. Ta 12,950 metro* káni̱ kooña ta 5,180* metro ndíka̱ kooña. Ndiʼi ñuʼú yóʼo ña̱ yi̱i̱ kooña. 2 Ini ñuʼú yóʼo ná koo iin táʼví ñuʼú ña̱ cuadrado ña̱ va̱ʼa kooña lugar Ña̱ yi̱i̱; ta iin tá iin síi̱nña,* 2,590 metro* kuumiíña, ta iin tá iin síi̱n ña̱yóʼo xíniñúʼu koo ki̱ʼva 26 metro* ñuʼú nu̱ú koo yita.* 3 Xíniñúʼu taváún ki̱ʼva ñuʼú yóʼo, 12,950 metro káni̱ kooña ta 5,180 metro ndíka̱ kooña; yóʼo kundichi templo ta ña̱ yi̱i̱ní koo ña̱yóʼo. 4 Ña̱yóʼo kúú ñuʼú ña̱ yi̱i̱ ña̱ ndakiʼin na̱ su̱tu̱, na̱ káchíñu ini templo na̱ kúyatin nu̱ú Jehová ña̱ va̱ʼa kachíñuna nu̱úra. Nu̱ú ñuʼú yóʼo koo veʼena ta ña̱ yi̱i̱ kooña ña̱ va̱ʼa koo templo nu̱úña.

5 ”’Ta saátu na̱ levita na̱ káchíñu ini templo, ndakiʼinna iin táʼví ñuʼú, 12,950 metro káni̱ kooña ta 5,180 metro ndíka̱ kooña ta koo 20 cuarto nu̱ú kuxuna, ña̱ koo kuenta miína.

6 ”’Ta saátu na̱ ñuu ndakiʼinna iin táʼví ñuʼú, 12,950 metro káni̱ kooña (nda̱a̱ táki̱ʼva káni̱ ñuʼú ña̱ yi̱i̱) ta 2,590 metro* ndíka̱ kooña. Ñuʼú yóʼo koo kuenta ndiʼi na̱ ñuu Israel.

7 ”’Ta u̱vi̱ saá síi̱n ñuʼú ña̱ yi̱i̱ ta saátu ñuʼú ña̱ ndakiʼin na̱ ñuu koo iin táʼví ñuʼú ña̱ ndakiʼin ta̱ níʼi yichi̱ nu̱ú na̱ ñuu. Ñuʼú yóʼo kooña síi̱n ñuʼú ña̱ yi̱i̱ ta saátu síi̱n ñuʼú ña̱ ndakiʼin na̱ ñuu. Kooña chí táʼví nu̱ú kíʼvi ñu̱ʼu* iinsaá nda̱a̱ chí táʼví nu̱ú kíta ñu̱ʼu. Inkáchi káni̱ koo ñuʼú yóʼo xíʼin ñuʼú ña̱ ndakiʼin iin tá iin na̱ tribu. Kixáʼaña chí táʼví nu̱ú kíʼvi ñu̱ʼu iinsaá nda̱a̱ nu̱ú kíta ñu̱ʼu. 8 Ña̱yóʼo kúú ñuʼú ña̱ ndakiʼinna chí ñuu Israel. Na̱ nda̱kaxii̱n ña̱ kuniʼina yichi̱ nu̱ú na̱ ñui̱ va̱ása ixandi̱va̱ʼakana xíʼinna, na̱yóʼo ndataʼvína ñuʼú ndaʼa̱ iin tá iin na̱ tribu, ña̱ xíniñúʼu ndakiʼinna’.

9 ”Ña̱yóʼo kúú ña̱ káʼa̱n táta káʼnu Jehová: ‘Xa̱a̱ ni̱ya̱ʼaní ña̱ kéʼé ndóʼó na̱ níʼi yichi̱ nu̱ú na̱ ñuu Israel’.

”‘Sandákoondó keʼéndó ña̱ va̱ása va̱ʼa, saátu ña̱ ixandi̱va̱ʼandó xíʼin na̱ yiví ta keʼéndó ña̱ va̱ʼa xíʼin ña̱ nda̱kú. Va̱ása kindaakandó ñuʼú ndaʼa̱ na̱ ñui̱, káchi táta káʼnu Jehová. 10 Viíní xíniñúʼu koo ki̱ʼva ña̱ʼa ña̱ kátandó, ta saátu viíní xíniñúʼu koo ña̱ʼa ña̱ chúʼunndó ña̱ʼa ña̱ yi̱chí xíʼin nduta̱. 11 Koo iin ña̱ʼa ña̱ chuʼunndó ña̱ʼa ña̱ yi̱chí ta ña̱yóʼo naníña efá* ta saátu koo ña̱ chuʼunndó nduta̱ ta ña̱yóʼo naníña bato.* Ña̱ efá xíʼin ña̱ bato xíniñúʼu kuumiíña iin táʼví ña̱ naní homer. Ña̱ naní homer kúú ki̱ʼva ña̱ chuʼunndó ndiʼi ña̱ʼa ta ña̱yóʼo kuumiíña 220 litro. 12 Iin siclo* kúú iin yu̱u̱ ña̱ plata ña̱ ve̱e 12 gramo.* Ta 60 siclo xa̱a̱ña kooña iin mina’.*

13 ”‘Ña̱yóʼo kúú ña̱ xíniñúʼu so̱kóndó:* ki̱ʼva u̱ni̱ kilo* ña̱ harina taxindó xa̱ʼa̱ 160 kiloña,* ta u̱vi̱ kilo* ña̱ cebada taxindó xa̱ʼa̱ 130 kiloña.* 14 Ña̱ va̱ʼa chuʼunndó aceite xíniñúʼu kuniñúʼundó ki̱ʼva ña̱ naní bato. Iin bato kúú iin táʼví loʼo ña̱ coro* ta saátu iin táʼví loʼo ña̱ homer, ta kúúmiíña 220 litro. 15 Xíniñúʼu so̱kóndó iin ndikachi* xa̱ʼa̱ 200 ndikachi sa̱na̱ na̱ ñuu Israel. Ndiʼi ña̱yóʼo so̱kóndó tá ná so̱kóndó harina, tá ná so̱kóndó kití tí kaʼmindó* ta saátu tá ná so̱kóndó ña̱ʼa xa̱ʼa̱ ña̱ kúni̱ndó ndakutáʼan viíndó xíʼi̱n tasaá ixakáʼnu-inii̱ xa̱ʼa̱ ku̱a̱chi na̱ ñuu’, káchi táta káʼnu Jehová.

16 ”‘Ndiʼi na̱ yiví na̱ íyo ñuu yóʼo, taxina ña̱yóʼo ndaʼa̱ ta̱ níʼi yichi̱ nu̱ú na̱ ñuu Israel. 17 Soo ta̱ níʼi yichi̱ nu̱ú na̱ ñuu kúú ta̱ taxi kití tí kaʼmina tí so̱kóna, taxira ña̱ʼa ña̱ sóko̱na ña̱ xíxina, nduta̱ tá sóko̱na tá xíyo vikó, taxira ña̱ kuniñúʼuna tá kíxáʼa iin tá iin yo̱o̱, ña̱ kuniñúʼuna ki̱vi̱ sábado ta saátu ña̱ kuniñúʼuna ndiʼika vikó ña̱ kéʼé na̱ ñuu Israel. Ta̱yóʼo kúú ta̱ taxi kití tí so̱kóna xa̱ʼa̱ ku̱a̱china, ña̱ xíxina ña̱ sóko̱na, kití tí kaʼmina ta so̱kóna, ña̱ʼa ña̱ sóko̱na ña̱ va̱ʼa ndakutáʼan viína xíʼi̱n tasaá ixakáʼnu-inii̱ xa̱ʼa̱ na̱ ñuu Israel’.

18 ”Ña̱yóʼo kúú ña̱ káʼa̱n táta káʼnu Jehová: ‘Ki̱vi̱ nu̱ú ña̱ yo̱o̱ nu̱ú, kiʼin iin si̱ndi̱ki̱ yúta̱* tí kǒo kue̱ʼe̱ kúúmií ña̱ va̱ʼa ndasandiún* templo. 19 Ta̱ su̱tu̱ kiʼinra loʼo ni̱i̱ kití tí so̱kóra xa̱ʼa̱ ku̱a̱china ta kakinraña sa̱tá poste yéʼé ña̱ templo, ku̱mí saá ti̱tu̱n plataforma nu̱ú kánuu altar ta saátu sa̱tá poste tú íyo chí yéʼé patio ña̱ íyo chí ini. 20 Saátu keʼún ki̱vi̱ u̱xa̱ ña̱ yo̱o̱ nu̱ú xa̱ʼa̱ na̱ yiví na̱ ni̱ki̱ʼvi ku̱a̱chi soo kǒo níkiʼinna kuenta á va̱ása níkunda̱a̱-inina ña̱ ni̱ki̱ʼvina ku̱a̱chi; ta xíniñúʼu ka̱ʼa̱n-ndáʼvindó xíʼi̱n xa̱ʼa̱ templo.

21 ”’Ki̱vi̱ 14 ña̱ yo̱o̱ nu̱ú, keʼún vikó ña̱ Pascua. U̱xa̱ ki̱vi̱ kuxundó si̱ta̱váʼa ña̱ kǒo yuxa̱n iyá* kúúmií. 22 Ki̱vi̱ saá, ta̱ níʼi yichi̱ nu̱ú na̱ ñuu taxira iin si̱ndi̱ki̱ yúta̱ xa̱ʼa̱ ku̱a̱chi miíra ta saátu xa̱ʼa̱ ndiʼi na̱ yiví na̱ íyo ñuu kán. 23 U̱xa̱ saá ki̱vi̱ ña̱ koo vikó yóʼo, iin tá iin ki̱vi̱ yóʼo taxira u̱xa̱ si̱ndi̱ki̱ yúta̱ tí kǒo kue̱ʼe̱ kúúmií xíʼin u̱xa̱ ndikachi che̱e tí kǒo kue̱ʼe̱ kúúmií ña̱ va̱ʼa kaʼminarí ta so̱kónarí nu̱ú Jehová, ta saátu taxira iin ti̱xúʼú* che̱e tí so̱kóna xa̱ʼa̱ ku̱a̱china iin tá iin ki̱vi̱. 24 Saátu taxira 11 kilo* ña̱ harina xa̱ʼa̱ iin tá iin si̱ndi̱ki̱ yúta̱, taxira 11 kilo ña̱ harina xa̱ʼa̱ iin tá iin tí ndikachi che̱e ta taxira u̱ni̱ litro sava* tá aceite xa̱ʼa̱ 11 kilo ña̱ harina ña̱ ná taxira.

25 ”’Ki̱vi̱ 15 ña̱ yo̱o̱ u̱xa̱, u̱xa̱ ki̱vi̱ ña̱ koo vikó yóʼo, inkáchi koo ña̱ʼa ña̱ taxira: kití tí so̱kóna xa̱ʼa̱ ku̱a̱china, kití tí kaʼmina ta so̱kóna, ña̱ʼa ña̱ kuxuna ta saátu aceite’”.