Jeremías

24 Tasaá ni̱na̱ʼa̱ Jehová u̱vi̱ canasta tí higo nu̱úi̱ ta ndítaña chí nu̱ú templo Jehová. Ña̱yóʼo ku̱uña tá xa̱a̱ nda̱kiʼin ta̱ rey Nabucodonosor* ta̱ ñuu Babilonia ta̱ Jeconías* se̱ʼe ta̱ Jehoiaquim ta̱ xi̱kuu rey ñuu Judá ku̱a̱ʼa̱n xíʼinra, ta saátu ndiʼi na̱ xi̱niʼi yichi̱ nu̱ú na̱ ñuu Judá, na̱ xi̱xini̱ ixava̱ʼa ku̱a̱ʼá ña̱ʼa xíʼin na̱ xi̱keʼé ña̱ʼa xíʼin ka̱a; nda̱kiʼinrana chí ñuu Jerusalén ku̱a̱ʼa̱n xíʼinra chí ñuu Babilonia. 2 Ini iin canasta xi̱ñuʼu higo tí va̱ʼaní, nda̱a̱ táki̱ʼva íyo higo tí nu̱ú kána saá ni̱xi̱yorí; soo ini inka canasta xi̱ñuʼu higo tí ni loʼo va̱ása va̱ʼa, tí kǒo kívi kaxína.

3 Tasaá ni̱nda̱ka̱tu̱ʼun Jehová yi̱ʼi̱: “Jeremías, ¿ndáaña xítoún?”. Ta yi̱ʼi̱ ni̱ka̱ʼi̱n xíʼinra: “Ku̱a̱ʼání higo xítoi̱; higo tí va̱ʼa, va̱ʼanívarí. Soo higo tí va̱ása va̱ʼa, ni loʼo va̱ása va̱ʼarí, xa̱ʼa̱ ña̱kán kǒo kívi kaxínarí”.

4 Tasaá ni̱ka̱ʼa̱n Jehová xíʼi̱n: 5 “Ña̱yóʼo kúú ña̱ káʼa̱n Jehová, Ndióxi̱ na̱ ñuu Israel: ‘Nda̱a̱ táki̱ʼva íyo higo tí va̱ʼaní yóʼo, saá koo na̱ xi̱ndoo ñuu Judá nu̱úi̱, na̱ chi̱ndaʼíi̱ ku̱a̱ʼa̱n kundoo nu̱ú ñuʼú na̱ caldeo. 6 Kiʼin va̱ʼi̱ kuenta xíʼin ña̱ kéʼéna xa̱ʼa̱ ña̱ va̱ʼa miína, ta taxii̱ ña̱ ná ndikóna nu̱ú ñuʼú yóʼo. Sakúaʼnui̱na ta va̱ása sandúvai̱na; chiʼii̱na ta va̱ása tuʼi̱nna. 7 Chikai̱ níma̱na ña̱ ná kuni̱na kuxini̱na yi̱ʼi̱, ta ná kunda̱a̱-inina ña̱ yi̱ʼi̱ kúú Jehová. Na̱kán koona na̱ ñui̱ ta yi̱ʼi̱ koi̱ Ndióxi̱na, saáchi ndikóna nu̱úi̱ xíʼin ndiʼi níma̱na.

8 ”’Soo ña̱yóʼo kúú ña̱ káʼa̱n Jehová xa̱ʼa̱ higo tí nda̱a̱ ni loʼo va̱ása va̱ʼa, tí kǒo kívi kaxína: “Nda̱a̱ táki̱ʼva íyo tíyóʼo saá koo ta̱ rey Sedequías ta̱ ñuu Judá nu̱úi̱, saátu na̱ níʼi yichi̱ nu̱ú na̱ ñuu xíʼin ndiʼika na̱ ñuu Jerusalén na̱ ni̱ndo̱o ndóo ñuu yóʼo ta saátu ndiʼi na̱ ndóo chí ñuu Egipto. 9 Ndiʼi na̱ ñuu na̱ ndóo nu̱ú ñuʼú yóʼo kundasína kuninana xa̱ʼa̱ tu̱ndóʼo ña̱ chindaʼíi̱ nu̱úna, ka̱ʼa̱n-ndi̱va̱ʼana xíʼinna, kuniñúʼuna tu̱ndóʼo ña̱ ndo̱ʼona tá ná ka̱ʼa̱nna xíʼin inkana, kusi̱kindaanana ta sakúisochiʼñanana* ndiʼi lugar nu̱ú ná chindaʼíi̱na ku̱ʼu̱nna. 10 Ta chindaʼíi̱ na̱ kuniʼi espada ku̱ʼu̱n sa̱tána, saátu koo kue̱ʼe̱ xíʼin so̱ko nu̱úna, nda̱a̱ ná kǒo kindo̱oka nda̱a̱ ni iinna nu̱ú ñuʼú ña̱ ta̱xii̱ ndaʼa̱na ta saátu ndaʼa̱ na̱ táʼanna na̱ xi̱ndoo xi̱naʼá”’”.