¿Ndáaña kúni̱ Ndióxi̱ taxira ndaʼa̱yó?

NINA tu̱ndóʼo káʼa̱nna xa̱ʼa̱ nu̱ú periódico, nu̱ú televisión, ti̱xin radio á nu̱ú Internet, tá kúú nu̱ú xáʼní-táʼanna, nu̱ú íyo guerra á ña̱ káʼa̱n xa̱ʼa̱ na̱ yiví na̱ kéʼé ña̱ kini ña̱ sáyi̱ʼvína inkana. Sana miíún xóʼvi̱ún xa̱ʼa̱ ña̱ kúúmiíún iin kue̱ʼe̱ á xa̱ʼa̱ ña̱ ni̱xi̱ʼi̱ iin na̱ veʼún na̱ kúni̱níún xíniún.

Iin na̱ familia xíniso̱ʼona noticia ña̱ yáʼa ini radio

Ndakanixi̱ní xa̱ʼa̱ ña̱yóʼo:

¿Á ña̱yóʼo kúú ña̱ kúni̱ Ndióxi̱ kundoʼi̱ ta saátu na̱ veʼi̱?
¿Ndáa míí va̱ʼa ndani̱ʼíi̱ ña̱ kivi chindeétáʼan xíʼi̱n ña̱ va̱ʼa ya̱ʼi̱ nu̱ú tu̱ndóʼo?
¿Á kixaa̱ iin ki̱vi̱ ña̱ kǒoka ku̱a̱chi koo nu̱ú ñuʼú yóʼo?

Ña̱ Biblia kúú ña̱ kivi chindeétáʼan xíʼinyó ña̱ kunda̱a̱-iniyó xa̱ʼa̱ ña̱yóʼo.

ÑA̱ BIBLIA KÁʼA̱NÑA XÍʼINYÓ ÑA̱ KU̱A̱ʼÁNÍ ÑA̱ʼA VA̱ʼA KEʼÉ NDIÓXI̱ XA̱ʼA̱YÓ

Na̱ yiví va̱ása xo̱ʼvi̱kana, ni va̱ása kuchéekana ta ni va̱ása kuvikana (Apocalipsis 21:4).
“Na̱ kǒo kívi kaka va̱ʼa kakana nda̱a̱ va̱ʼa kanditana táki̱ʼva íxaa tí yusu” (Isaías 35:6).
“Na̱ kǒo túvi nu̱ú va̱ʼa kutu̱vi nu̱úna” (Isaías 35:5).
Na̱ ni̱xi̱ʼi̱ ndatakuna (Juan 5:28, 29).
Nda̱a̱ ni iinna va̱ása kuumiíka kue̱ʼe̱ (Isaías 33:24).
Koo ña̱ kuxu ndiʼi na̱ yiví (Salmo 72:16).

ÑA̱ BIBLIA KIVI CHINDEÉTÁʼANÑA XÍʼÚN

Iin ta̱ testigo Jehová sánáʼa̱ra iin ta̱ ta̱a xa̱ʼa̱ Biblia

Sana ndákanixi̱níún ña̱ ka̱ʼviún nu̱ú kíxáʼa xa̱ʼa̱ ña̱ libro yóʼo su̱ví ña̱ nda̱a̱ kúúña á nda̱a̱ táki̱ʼva íyo iin cuento saá íyoña. Soo Ndióxi̱ káʼa̱nra ña̱ xa̱a̱ ku̱nu̱mí keʼéra ña̱yóʼo, ta ña̱ Biblia káʼa̱nña xíʼinyó nda̱saa keʼéraña.

Saátu káʼa̱n ña̱ Biblia xíʼinyó ndáa ña̱ xíniñúʼu keʼéyó ña̱ va̱ʼa si̱í kooyó tiempo vitin. Ndakanixi̱ní xa̱ʼa̱ ña̱ʼa ña̱ sándi̱ʼi̱-iniún. Sana íyo tu̱ndóʼo nu̱ún xíʼin na̱ veʼún, sana kúma̱ní xu̱ʼún nu̱úndó á kúúmiíndó kue̱ʼe̱. Sanatu kúsuchí-iniún xa̱ʼa̱ ña̱ ni̱xi̱ʼi̱ iin na̱ veʼún. Ña̱ Biblia kivi chindeétáʼanña xíʼún ña̱ ya̱ʼún nu̱ú tu̱ndóʼo ña̱ kúúmiíún. Ta kivitu sandíkoña-iniún, chi káʼa̱nña xa̱ʼa̱ pregunta ña̱ va̱xi yóʼo:

¿Nda̱chun xóʼvi̱yó?
¿Ndáa ki̱ʼva ya̱ʼayó nu̱ú tu̱ndóʼo ña̱ kúúmiíyó?
¿Ndáaña kivi keʼéyó ña̱ va̱ʼa si̱í kooyó xíʼin na̱ veʼeyó?
¿Ndáaña ndóʼoyó tá xíʼi̱yó?
¿Á ndikó tukuyó kuniyó na̱ veʼeyó na̱ xa̱a̱ ni̱xi̱ʼi̱?
¿Nda̱chun va̱ʼa kúnda̱a̱-iniyó ña̱ saxínu Ndióxi̱ ndiʼi ña̱ káʼa̱nra?

Xa̱ʼa̱ ña̱ xa̱a̱ ki̱xáʼún káʼviún ña̱ libro yóʼo, kúni̱ kachiña ña̱ kúni̱ún kunda̱a̱-iniún xa̱ʼa̱ ña̱ sánáʼa̱ Biblia. Ña̱ libro yóʼo chindeétáʼanña xíʼún ña̱ kuchiñún sakuaʼún xa̱ʼa̱ña. Chí xa̱ʼa̱ párrafo va̱xi pregunta ña̱ kivi chindeétáʼan xíʼún ña̱ sakuaʼakaún xa̱ʼa̱ Biblia. Ku̱a̱ʼání na̱ yiví kútóonína natúʼunna xa̱ʼa̱ Biblia xíʼin na̱ testigo Jehová. Kúni̱ndi̱ ña̱ saátu miíún ná kutóún natúʼún xa̱ʼa̱ ña̱yóʼo. Mií Ndióxi̱ ná chindeétáʼan xíʼún ña̱ va̱ʼa xa̱ún kunda̱a̱ka-iniún xa̱ʼa̱ ña̱ sánáʼa̱ Biblia.

SAKUAʼA KUNIÑÚʼÚN BIBLIA

NU̱Ú Biblia va̱xi 66 libro, ta va̱xi capítulo xíʼin versículo ña̱ va̱ʼa kama ndani̱ʼíyó texto. Tá va̱xi iin texto nu̱ú ña̱ libro yóʼo, siʼna ki̱vi̱ iin libro ña̱ va̱xi nu̱ú Biblia va̱xi nu̱úña. Tasaá va̱xi iin número ña̱ káʼa̱nna xíʼin capítulo, tándi̱ʼi va̱xi u̱vi̱ punto nu̱úña, saá va̱xi inka número ña̱ káʼa̱nna xíʼin versículo. Tá kúú, “2 Timoteo 3:16” kúni̱ kachiña carta u̱vi̱ ña̱ Timoteo, capítulo 3, versículo 16.

Tá ná nandukún texto ña̱ va̱xi yóʼo, va̱ʼaní kama sakuaʼún kuniñúʼún Biblia. Ta saátu kivi kixáʼún kaʼviún Biblia ndiʼi ki̱vi̱. Tá ná kaʼviún u̱ni̱ á u̱ʼu̱n capítulo ndiʼi ki̱vi̱, ti̱xin ña̱ iin ku̱i̱ya̱ sandíʼún kaʼviún iníísaá Biblia.