Enero

Ndiʼi miíyó na̱ ndásakáʼnu Ndióxi̱ xíniñúʼu saxínuyó chiñu ña̱ nda̱kiʼinyó (2 Tim. 4:5). Saáchi iin chiñu ña̱ ndáyáʼviní kúúña ta xíniñúʼu kama keʼéyóña. Soo sana kivi ixayo̱ʼvi̱ña xíʼinyó ña̱ taváyó tiempo ña̱ saxínuyóña táki̱ʼva kúni̱yó. Íyo inkaka chiñu ña̱ ndáyáʼvi ña̱ kéʼéyó, ta ku̱a̱ʼá tiempoyó xíʼin ndee̱yó xíniñúʼuyó xíʼinña. Sana xíniñúʼu kachíñuyó ku̱a̱ʼání hora ña̱ va̱ʼa taxiyó ña̱ xíniñúʼu na̱ veʼeyó. Á sanatu ndáayó na̱ veʼeyó, á ndeé ndóʼoyó, á xa̱ʼa̱ ña̱ kúsuchí-iniyó, á xa̱ʼa̱ ña̱ xa̱a̱ ku̱chéeyó. Va̱ása xíniñúʼu ndakava-iniyó tá va̱ása kívi kachíñuyó ku̱a̱ʼá tiempo nu̱ú Jehová. Ta̱ Jesús ku̱nda̱a̱-inira ña̱ su̱ví ndiʼina kuchiñu inkáchi kachíñu nu̱ú Ndióxi̱ (Mat. 13:23). Nu̱ú Jehová ndáyáʼviní ña̱ ná chika̱a̱yó ndee̱ ña̱ kachíñuyó nu̱úra (Heb. 6:10-12). w19.04 2 párr. 1-3

Ña̱ vatá ña̱ káʼa̱n ta̱ Ndi̱va̱ʼa xa̱ʼa̱ na̱ ni̱xi̱ʼi̱ íxayaku̱a̱ña ki̱vi̱ Jehová. Sava ña̱ vatá yóʼo kúú ña̱ káʼa̱nra ña̱ ku̱a̱ʼa̱n na̱ ni̱xi̱ʼi̱ chí ndayá á xi̱tu̱n. ¿Nda̱saa íxayaku̱a̱ ña̱yóʼo ki̱vi̱ Jehová? Saáchi ta̱ Ndi̱va̱ʼa káʼa̱nra xa̱ʼa̱ Jehová ta̱ kúʼvi̱ní-ini xíni miíyó, ña̱ kúúra iin Ndióxi̱ ta̱ ndi̱va̱ʼa-ini, táki̱ʼva íyo miíra (1 Juan 4:8). ¿Nda̱saa kúniyó xíʼinña? Ta, ¿nda̱saa kúni mií Jehová xíʼin ña̱yóʼo? Ná kǒo nandósóyó chi miíra kúndasí nu̱úra xínira ndiʼi ña̱ va̱ása va̱ʼa (Jer. 19:5). Ña̱ vatá ña̱ káʼa̱n ta̱ Ndi̱va̱ʼa xa̱ʼa̱ na̱ ni̱xi̱ʼi̱ sásiña nu̱ú na̱ yiví ña̱ kandíxana ña̱ ni̱xi̱ʼi̱ ta̱ Jesús xa̱ʼa̱na (Mat. 20:28). Inka ña̱ vatá ña̱ káʼa̱n ta̱ Ndi̱va̱ʼa kúú ña̱ tákukayó tá xa̱a̱ ni̱xi̱ʼi̱yó, tá ña̱ nda̱a̱ kúú ña̱yóʼo kúni̱ kachiña ña̱ xa̱a̱ ndiʼi tiempo tákuyó. Xa̱ʼa̱ ña̱yóʼo, va̱ása níxiniñúʼu kuvi ta̱ Jesús xa̱ʼa̱yó ña̱ kutakuyó ndiʼi tiempo. Ná ndakaʼányó chi xa̱ʼa̱ ña̱ kúʼvi̱ní-ini ta̱ Jesús xínira miíyó ni̱xi̱ʼi̱ra xa̱ʼa̱yó (Juan 3:16; 15:13). ¿Nda̱saa kúni Jehová xíʼin se̱ʼera, xa̱ʼa̱ ña̱ vatá ña̱ sási nu̱ú na̱ yiví ña̱ kandíxana ña̱ ni̱xi̱ʼi̱ ta̱ Jesús xa̱ʼa̱na? w19.04 14 párr. 1; 15, 16 párr. 8, 9

¿Ndáa míí ni̱ka̱ʼyi̱ ña̱ sa̱náʼa̱ ta̱ Jesús? Nu̱ú ku̱mí evangelio káʼa̱nña xa̱ʼa̱ ku̱a̱ʼá ña̱ʼa ña̱ ke̱ʼéra xíʼin ña̱ ni̱ka̱ʼa̱nra tá ni̱xi̱yora nu̱ú ñuʼú yóʼo. Saátu ña̱ Escrituras Griegas Cristianas chíndeétáʼanña xíʼinyó ña̱ kunda̱a̱ka-iniyó nda̱saa ndákanixi̱ní ta̱ Jesús, saáchi ndee̱ Ndióxi̱ chi̱ndeétáʼan xíʼin na̱ ka̱ʼyí ña̱yóʼo, ta na̱yóʼo nda̱kanixi̱nína táki̱ʼva ndákanixi̱ní ta̱ Cristo. Ña̱ sa̱náʼa̱ ta̱ Jesús chíndeétáʼanña xíʼinyó ndiʼi tiempo. Ña̱kán, ley ta̱ Cristo chíndeétáʼanña xíʼinyó ti̱xin veʼeyó, nu̱ú káchíñuyó, escuela ta saátu ti̱xin congregación (Gál. 6:2). Sákuaʼakayó ña̱yóʼo tá káʼviyó Escrituras Griegas ta ndákanixi̱níyó xa̱ʼa̱ña. Kándíxayó ley yóʼo tá sáxi̱nuyó chiñu ña̱ xáʼndaña nu̱úyó ta kéʼéyóña táki̱ʼva káʼa̱nña xíʼinyó, saátu tá ndíku̱nyó tu̱ʼun ña̱ táxi yichi̱ nu̱úyó. Tá ndíku̱nyó ley ta̱ Cristo náʼa̱yó ña̱ kándíxayó Jehová ta̱ kúʼvi̱ní-ini xíni miíyó, saáchi tu̱ʼunra kúú ndiʼi ña̱ sa̱náʼa̱ ta̱ Jesús (Juan 8:28). w19.05 3, 4 párr. 6, 7

Iin ña̱ suchí-ini kúúña soo íyo na̱ yiví na̱ kéʼé ña̱ kútóo ta̱ Ndi̱va̱ʼa. Soo Jehová íyoníka ndee̱ra nu̱ú ta̱ Ndi̱va̱ʼa xíʼin na̱ yiví na̱ kéʼé ña̱ kini. Saátu xíni̱ va̱ʼa Ndióxi̱ ndáaña kúú ña̱ kéʼé ta̱ Ndi̱va̱ʼa. Xa̱ʼa̱ ña̱yóʼo kúnda̱a̱-iniyó ña̱ kíʼinvara kuenta xa̱ʼa̱ ña̱ xóʼvi̱yó ta saátu ña̱ kivi sandíkora-iniyó. Kúsi̱íní-iniyó ña̱ ndásakáʼnuyó Ndióxi̱ “ta̱ sándi̱ko-iniyó, sándi̱kora-iniyó tá yáʼayó nu̱ú ku̱a̱ʼání tu̱ndóʼo tasaá va̱ʼatu sandi̱ko miíyó ini inka na̱ yáʼa nu̱ú nda̱a̱ ndáaka tu̱ndóʼo chi mií Ndióxi̱ chíndeé miíyó” (2 Cor. 1:3, 4). Na̱ va̱lí na̱ ke̱ʼéna ña̱ kini xíʼin chi na̱ yivána va̱ása níxindaana na̱yóʼo, á na̱ va̱lí na̱ xóʼvi̱ chi mií na̱ veʼena ke̱ʼé ña̱ kini xíʼinna, xíniñúʼunína ña̱ sandi̱koyó-inina. Ta̱ rey David, ku̱nda̱a̱-inira ña̱ mií Jehová kivi sandi̱ko-inina (Sal. 27:10). Ka̱ndíxara ña̱ mií Ndióxi̱ kíʼin kuenta xíʼin na̱ káchíñu nu̱úra chi na̱ veʼena sa̱ndákooñaʼána. ¿Ndáa ki̱ʼva kéʼéra ña̱yóʼo? Xíniñúʼura na̱ káchíñu nu̱úra. Na̱ congregación na̱ veʼeyó kúúna. Tá kúú ta̱ Jesús ni̱ka̱ʼa̱nra ña̱ na̱ ndásakáʼnu Ndióxi̱ xíʼinra kúúna ñanira, ku̱ʼvara á siʼíra (Mat. 12:48-50). w19.05 15, 16 párr. 8, 9

¿Ndáaña xíniñúʼu kundi̱ʼi̱ka-iniyó xa̱ʼa̱? Kúnda̱a̱ káxi iniyó ña̱ xíniñúʼu taváyó tiempo ña̱ kaʼviyó ta ndakanixi̱níyó xa̱ʼa̱ tu̱ʼun Ndióxi̱ ndiʼi ki̱vi̱. Tá kúú programa ña̱ káʼviyó Biblia ti̱xin congregación semana tá semana na̱samaña ta loʼo capítulo kúú ña̱ kaʼviyó vitin. Ña̱kán kúúmiíkayó tiempo ña̱ nandukú va̱ʼayó xa̱ʼa̱ ña̱ káʼa̱nña ta ndakanixi̱níyó xa̱ʼa̱ña. Va̱ása kaʼvi kuitíyó capítulo ña̱ iin semana, chi xíniñúʼu ndakanixi̱níyó xa̱ʼa̱ña ña̱ va̱ʼa xa̱a̱ña nda̱a̱ níma̱yó tasaá kuyatinkayó nu̱ú Jehová (Sal. 19:14). Ña̱ káʼviyó nu̱ú Tutu Ña̱ Nátúʼun xíʼinyó ña̱ va̱xi nu̱ú Biblia kúúña. Ña̱kán xíniñúʼu kiʼinníyó kuenta xíʼin texto ña̱ va̱xi nu̱úña, tá kúú ña̱ kaʼvina tá xa̱a̱ káʼviyó ña̱ artículo yóʼo ti̱xin congregación. Ná kiʼinníyó kuenta xíʼin tu̱ʼun ña̱ ndáyáʼvi ña̱ va̱xi nu̱úña ña̱ kítáʼan xíʼin ña̱ káʼa̱n párrafo. Saátu ná taváyó tiempo ña̱ ndakanixi̱níyó xa̱ʼa̱ ña̱ káʼa̱n texto yóʼo ta ndáa ki̱ʼva keʼéyó ña̱ káʼa̱nña (Jos. 1:8). w19.05 27 párr. 5, 9

Ta̱ Jesús va̱ʼaní yichi̱ sa̱ndákoora nu̱úyó xa̱ʼa̱ ña̱ va̱ʼaní ke̱ʼéra chiñu nu̱ú Ndióxi̱. Ña̱ xi̱ndayáʼvika nu̱úra kúú ña̱ natúʼunra xa̱ʼa̱ reino Ndióxi̱. Káni̱ní ni̱xa̱ʼa̱nra ña̱ va̱ʼa na̱túʼunra xíʼin ku̱a̱ʼání na̱ yiví. Ndiʼina na̱túʼunra xíʼin, veʼe tá veʼe xíʼin nu̱ú ya̱ʼvi. Tá ni̱xi̱yora nu̱ú ñuʼú yóʼo, chiñu Ndióxi̱ kúú ña̱ ni̱ndi̱ʼi̱ka-inira xa̱ʼa̱. Ná chika̱a̱yó ndee̱ ña̱ kundiku̱nyó yichi̱ ta̱ Jesús ta ka̱ʼa̱nyó xíʼin na̱ yiví xa̱ʼa̱ Ndióxi̱ nda̱a̱ ndáaka nu̱ú íyona ta nda̱a̱ ndáaka hora kúúña. Ná ka̱ʼnu̱-iniyó xíʼin ña̱ kúni̱ miíyó ña̱ va̱ʼaka keʼéyó chiñu ña̱ ta̱xi Ndióxi̱ ndaʼa̱yó (Mar. 6:31-34; 1 Ped. 2:21). Sava na̱ hermano ti̱xin congregación kivi koona precursor especial, regular á auxiliar. Inkatuna sákuaʼana inka tu̱ʼun á inkatuna ku̱a̱ʼa̱nna nu̱ú xíniñúʼukana na̱ natúʼun xa̱ʼa̱ Ndióxi̱. Ta saátu íyo na̱ publicador na̱ ndeéní chíka̱a̱ ndee̱ ña̱ sánáʼa̱na na̱ yiví. Nda̱a̱ ndáaka chiñu kúú ña̱ kúúmiíyó, Jehová va̱ása ndúkúra nu̱úyó ña̱ keʼéyó iin ña̱ va̱ása kuchiñuyó xíʼin. w19.04 4 párr. 7, 8

Nda̱ka̱tu̱ʼun xíʼin miíún: “¿Á sáa̱-inii̱ xínii̱ inkana xa̱ʼa̱ ña̱ʼa ña̱ kúúmiína?” (1 Ped. 2:1). “¿Á ni̱nuní kúnii̱ xa̱ʼa̱ ña̱ ka̱ʼvi va̱ʼi̱ á xa̱ʼa̱ ña̱ íyoní xu̱ʼíi̱n?” (Prov. 16:5). “¿Á ndákanixi̱níi̱ ña̱ ndáyáʼvikai̱ nu̱ú na̱ kǒo ku̱a̱ʼá ña̱ʼa á nu̱ú na̱ inka ñuu?” (Sant. 2:2-4). “¿Á kútói̱ ña̱ʼa ña̱ íyo nu̱ú ñuyǐví ta̱ Ndi̱va̱ʼa?” (1 Juan 2:15-17). “¿Á kútói̱ kotonde̱ʼíi̱ nu̱ú kána na̱ kéʼé ña̱ kini á na̱ kanitáʼan?” (Sal. 97:10; 101:3; Amós 5:15). Sana ña̱ ndáka̱tu̱ʼun yóʼo náʼa̱ña nu̱úyó ndáaña xíniñúʼu nasamayó. Ni kúnda̱a̱-iniyó á va̱ása, kivi sakuaʼayó keʼéyó nda̱a̱ táki̱ʼva kéʼé na̱ kítáʼan xíʼinyó (Prov. 13:20). Escuela nu̱ú káʼviyó á nu̱ú káchíñuyó, íyo nina na̱ yiví na̱ va̱ása chíndeétáʼan xíʼinyó ña̱ ndakanixi̱níyó táki̱ʼva ndákanixi̱ní Jehová. Soo tá xáʼa̱nyó reunión, kán kivi ndani̱ʼíyó na̱ koo migoyó, na̱ kivi chindeétáʼan xíʼinyó ña̱ kuʼvi̱ka-iniyó kunitáʼanyó ta saátu ña̱ keʼéyó nina ña̱ va̱ʼa (Heb. 10:24, 25). w19.06 12 párr. 13, 14

Jehová va̱ása níkuni̱ra ña̱ ndoʼo na̱ yiví tu̱ndóʼo á ña̱ ndi̱ʼi̱ní-inina (Job 6:2, 3). Ña̱kán kúnda̱a̱-iniyó ña̱ kivi ka̱ʼa̱n iin na̱ hermano ña̱ va̱ása va̱ʼa, saáchi na̱ xóʼvi̱ kúúna. Ni tá ná ka̱ʼa̱nna iin ña̱ʼa ña̱ va̱ása va̱ʼa xa̱ʼa̱ Jehová á xa̱ʼa̱ miíyó, ná va̱ása sa̱a̱yó xíʼinna á ka̱ʼa̱n kúáchiyó xíʼinna. Sava yichi̱, iin na̱ hermano na̱ yáʼa nu̱ú tu̱ndóʼo, xíniñúʼu taxina consejo ndaʼa̱na (Gál. 6:1). ¿Nda̱saa kivi chindeétáʼan na̱ anciano xíʼinna? Xíniñúʼu kundiku̱nna yichi̱ ta̱ Elihú, ta̱ va̱ʼaní xi̱niso̱ʼo ndiʼi ña̱ ni̱ka̱ʼa̱n ta̱ Job ta na̱kunda̱a̱-inira xíʼin ña̱ ndóʼora (Job 33:6, 7). Tá kúma̱ní taxi ta̱ Elihú consejo ndaʼa̱ ta̱ Job siʼna na̱kunda̱a̱-inira xíʼin ña̱ ndákanixi̱níra. Na̱ anciano kivi kundiku̱nna yichi̱ ta̱ Elihú tá xíniso̱ʼona ña̱ káʼa̱n na̱ xóʼvi̱ xíʼinna ta kúnda̱a̱-inina xíʼin ña̱ ndóʼona. Tá saá kéʼéna, consejo ña̱ táxina ndaʼa̱na nda̱a̱ níma̱na xa̱a̱ña. w19.06 22, 23 párr. 10, 11

¿Nda̱saa kivi ndasakáʼnukayó Jehová tá ná kasina nu̱úyó? Na̱ Betel kúú na̱ ka̱ʼa̱n xíʼin na̱ anciano ndáa ki̱ʼva keʼéyó ña̱ sakuaʼayó xa̱ʼa̱ Jehová. Soo tá va̱ása kívi ka̱ʼa̱n na̱ Betel xíʼin na̱ anciano, ¿ndáaña keʼéna? Na̱yóʼo kuniñúʼuna ña̱ káʼa̱n Biblia xíʼin ña̱ káʼa̱n tutu ña̱ tává na̱ ñuu Ndióxi̱ ña̱ chindeétáʼanna xíʼinyó ña̱ chika̱a̱yó ndee̱ ña̱ ndasakáʼnuyó Jehová (Mat. 28:19, 20; Heb. 10:24, 25). Jehová ni̱ka̱ʼa̱nra ña̱ nda̱a̱ ni iin yichi̱ va̱ása kuma̱ní ña̱ sakuaʼayó xa̱ʼa̱ra (Is. 65:13, 14; Luc. 12:42-44). Ña̱kán kándíxayó ña̱ chindeétáʼanva na̱ ñuura xíʼinyó ña̱ taxina ña̱ xíniñúʼuyó ña̱ va̱ʼa ndakú koo iniyó. Soo miíyó íyotu ña̱ kivi keʼéyó. Tá ná kasina nu̱úyó, ná ndukúyó iin nu̱ú kivi chise̱ʼéyó Biblia xíʼin tutu ña̱ tává na̱ ñuu Ndióxi̱ ña̱kán va̱ása kindaanaña ndaʼa̱yó, ni kúúña ña̱ va̱xi nu̱ú celular á tableta á ña̱ va̱xi nu̱ú tutu. Ndiʼiyó xíniñúʼu koto ndáaña keʼéyó ña̱kán va̱ása ndiʼi-xa̱ʼa̱ ña̱ ndakú íyo iniyó xíʼin Ndióxi̱. w19.07 10 párr. 10, 11

Tá xi̱naʼá, ku̱a̱ʼání na̱ yiví xi̱kuumiína iin religión, soo sa̱kán na̱sama ña̱yóʼo. Vitin íyoníka na̱ yiví na̱ kǒo xáʼa̱n ni iin veʼe-ñu̱ʼu xíʼin na̱ va̱ása kándíxa Ndióxi̱. Sava país ku̱a̱ʼánína káʼa̱nna ña̱ va̱ása ndíku̱nna nda̱a̱ ni iin veʼe-ñu̱ʼu (Mat. 24:12). Savana sana ndíʼi̱ka-inina xa̱ʼa̱ ña̱ keʼéna ña̱ kúni̱ miína (Luc. 8:14). Inkatuna sa̱ndákoona ña̱ kándíxana ña̱ íyo Ndióxi̱. Saátu íyo na̱ kándíxa Ndióxi̱, soo ndákanixi̱nína ña̱ va̱ása xíniñúʼu ku̱ʼu̱nna iin veʼe-ñu̱ʼu chi va̱ása ndáyáʼviña ta va̱ása kítáʼanña xíʼin ña̱ káʼa̱n na̱ científico. Sana xíniso̱ʼona nu̱ú televisión á Internet ña̱ ti̱xin ña̱ evolución ka̱na ndiʼi ña̱ íyo nu̱ú ñuʼú yóʼo, ta saátu káʼa̱n na̱ maestrona xíʼin na̱ migona. Soo loʼo kúú na̱ ka̱ʼa̱n nda̱chun kúú ña̱ kivi kandíxana Ndióxi̱. Inkatu na̱ yiví sáa̱na chi na̱ níʼi yichi̱ nu̱ú na̱ veʼe-ñu̱ʼu kútóona kiʼinna xu̱ʼún á ña̱ kuumiína iin chiñu ti̱xin veʼe-ñu̱ʼu. Ta savatu ñuu va̱ása táxi na̱ chíñu ña̱ ndasakáʼnu na̱ yiví Ndióxi̱. w19.07 20 párr. 1, 2

Va̱ása xíniñúʼu kuumiíyó ndee̱ ña̱ va̱ʼa ndakiʼinyó ña̱ kutakuyó. Ku̱a̱ʼání na̱ kǒoka ndee̱ kúúmií nda̱a̱ táki̱ʼva ni̱xi̱yona tá ya̱chi̱ chíka̱a̱na ndee̱ ña̱ ndasakáʼnuna Jehová (2 Cor. 4:16). ¿Á xa̱a̱ ku̱a̱ʼání ku̱i̱ya̱ ndásakáʼnuyó Jehová, ta vitin xa̱ʼa̱ ña̱ ndeé ndóʼoyó va̱ása kívika keʼéyóña? Tá saá ndóʼoyó ná va̱ása ndakava-iniyó. Chi nu̱ú Jehová ndáyáʼviní ndiʼi ña̱ ke̱ʼéyó tá ya̱chi̱ (Heb. 6:10). Soo ná ndakaʼányó, Jehová kíʼinra kuenta xa̱ʼa̱ ña̱ kúʼvi̱-iniyó xíniyóra ta su̱ví xa̱ʼa̱ ña̱ ku̱a̱ʼá chiñu kéʼéyó nu̱úra. Chi náʼa̱yó ña̱ kúʼvi̱-iniyó xíniyóra tá si̱í íyo iniyó ta kéʼéyó nda̱a̱ ndáaka ña̱ kuchiñuyó (Col. 3:23). Ta̱kán kúnda̱a̱-inira xíʼin ña̱ ndóʼoyó ta va̱ása ndúkúra nu̱úyó keʼéyó ña̱ va̱ása kuchiñuyó xíʼin (Mar. 12:43, 44). w19.08 3 párr. 6; 5 párr. 11, 12

Jehová xíniñúʼura ña̱ va̱ʼa ña̱ kéʼé na̱ káchíñu nu̱úra ña̱ chindeétáʼanra xíʼin inkana ña̱ kuyatinna nu̱úra (Mat. 5:14,15; 1 Ped. 2:12). Tá na̱ ti̱ndaʼa̱ xíʼún su̱ví testigo Jehová kúúna, ¿á xíni̱na na̱ congregación? Na̱ ka̱ʼa̱nyó xíʼinna ña̱ ku̱ʼu̱nna reunión xíʼinyó (1 Cor. 14:24, 25). Kúni̱yó ña̱ ná kixaa̱ iin ki̱vi̱ ña̱ ndiʼi na̱ veʼeyó ndasakáʼnuna Jehová. Soo kúnda̱a̱-iniyó ña̱ ni ná chika̱a̱yó ndee̱ ña̱ chindeétáʼanyó xíʼinna, sana va̱ása xa̱a̱na ndasakáʼnuna Ndióxi̱. Tá saá íyoña ná va̱ása chika̱a̱yó ku̱a̱chi miíyó xa̱ʼa̱ ña̱ nda̱ka̱xinna. Saáchi va̱ása kivi ixandúxayó xíʼin ni iinna ña̱ kandíxana Ndióxi̱. Soo ná va̱ása ndakava-iniyó chi tá ná kunina ña̱ si̱í íyo iniyó ña̱ ndásakáʼnuyó Jehová kivi chindeétáʼanña xíʼinna. Ná ka̱ʼa̱nyó xíʼin Ndióxi̱ xa̱ʼa̱na, to̱ʼó ná ka̱ʼa̱nyó xíʼinna xa̱ʼa̱ ña̱ nda̱a̱ ta ná chika̱a̱yó ndee̱ ña̱ chindeétáʼanyó xíʼinna (Hech. 20:20). Ná kandíxayó ña̱ chindeétáʼan Jehová xíʼinyó. Ta tá ná kuniso̱ʼo na̱ veʼeyó ña̱ káʼa̱nyó, kivi ka̱kuna. w19.08 18, 19 párr. 15-17

¿Ndáaña xi̱kuni̱ kachi ta Jesús xíʼin ña̱yóʼo? Ña̱ va̱ása ndi̱ʼiní-iniyó xa̱ʼa̱ ña̱ koo ku̱a̱ʼá ña̱ʼayó, chi iinlá ña̱ ndáyáʼvika kundi̱ʼi̱-iniyó xa̱ʼa̱ kúú ña̱ keʼéyó ña̱ kúni̱ Ndióxi̱, ta va̱ása taxiyó kasi inka ña̱ʼa nu̱úyó. Saá ke̱ʼé ta̱ Jesús ta sa̱náʼa̱ra na̱ xi̱ndiku̱nñaʼá ña̱ ná ndi̱ʼi̱-inina xa̱ʼa̱ chiñu Jehová. Ndíku̱nyó yichi̱ ta̱ Jesús tá siʼnaka reino Ndióxi̱ nándukúyó, ta kéʼéyó ña̱ kúni̱ra (Mat. 6:33). Iin ña̱ kivi keʼéyó kúú ña̱ kuumiíyó loʼo ña̱ʼa, tasaá va̱ʼaka chindeétáʼanyó xíʼin inkana ña̱ ná xa̱a̱na sakuaʼana xa̱ʼa̱ Jehová. ¿Á kivi loʼo hora kachíñuyó tasaá ku̱a̱ʼáka tiempo ku̱ʼu̱nyó natúʼunyó xíʼin na̱ yiví? ¿Á kivi sandákooyó sava ña̱ʼa ña̱ sásikiyó ña̱ kíndaa ku̱a̱ʼá tiempoyó? w19.04 5, 6 párr. 12, 13

Sa̱kán vitin ku̱a̱ʼání na̱ hermano na̱ xa̱a̱ ku̱a̱ʼání ku̱i̱ya̱ káchíñu nu̱ú Jehová na̱sama chiñu ña̱ kúúmiína. I̱xayo̱ʼvi̱níña xíʼin na̱ hermano yóʼo tá na̱sama chiñuna, chi na̱yóʼo xi̱kutóonína chiñu ña̱ xi̱keʼéna. Ku̱a̱ʼánína xa̱a̱ ku̱a̱ʼá ku̱i̱ya̱ xi̱keʼéna ña̱ chiñu yóʼo, ta savana ku̱suchíní-inina, soo tá ni̱ya̱ʼa tiempo ni̱ka̱anvana. ¿Nda̱chun? Xa̱ʼa̱ ña̱ kúʼvi̱-inina xínina Jehová kúúña. Xi̱kunda̱a̱-inina ña̱ nda̱taxi xíʼin miína ndaʼa̱ Jehová, ta su̱ví xa̱ʼa̱ iin chiñu níkeʼénaña (Col. 3:23). Kúsi̱íní-inina kéʼéna nda̱a̱ ndáaka chiñu nu̱ú Jehová xíʼin ña̱ vitá-ini. Na̱ hermano yóʼo sándakoona ndiʼi ña̱ sándi̱ʼi̱-inina ndaʼa̱ra chi kúnda̱a̱-inina ña̱ ndíʼi̱-inira xa̱ʼa̱na (1 Ped. 5:6, 7). Tá vitá íyo iniyó ndákiʼinyó ña̱ va̱ʼa ta saátu inkana. Tíxa̱ʼvi ña̱yóʼo, va̱ʼa yáʼayó nu̱ú ña̱ íxayo̱ʼvi̱ xíʼinyó, ta saátu va̱ʼaka kúyatinyó nu̱ú yiváyó Jehová. w19.09 6, 7 párr. 15-17

Jehová su̱ví kuití nítaxira chiñu ndaʼa̱ ta̱ David ña̱ kuniʼira yichi̱ nu̱ú na̱ veʼera, chi saátu nu̱ú ndiʼi na̱ ñuu Israel. Xa̱ʼa̱ ña̱ xi̱kuura rey xi̱kuumiíra ku̱a̱ʼání ndee̱. Soo sava yichi̱ va̱ása níxiniñúʼu viíraña ta ke̱ʼéra ña̱ va̱ása va̱ʼa (2 Sam. 11:14, 15). Soo ni saá, ni̱na̱ʼa̱ra ña̱ ndíku̱nra ña̱ káʼa̱n Jehová tá nda̱ndikó-inira xa̱ʼa̱ ña̱ ke̱ʼéra. Xíʼin ndiʼi níma̱ra ni̱ka̱ʼa̱nra xíʼin Ndióxi̱ ta chi̱ka̱a̱ra ndee̱ ña̱ kundiku̱nra yichi̱ra (Sal. 51:1-4). Saátu vitání ni̱xi̱yo inira chi xi̱niso̱ʼora consejo ña̱ ta̱xi na̱ ta̱a xíʼin ná ñaʼá ndaʼa̱ra (1 Sam. 19:11, 12; 25:32, 33). Ta chi̱ka̱a̱ra ndee̱ ña̱ ka̱chíñura nu̱ú Jehová. Ta̱ David xi̱kunda̱a̱-inira ña̱ xi̱ndakiʼinra ña̱ va̱ʼa xa̱ʼa̱ ña̱ xi̱ndiku̱nra Jehová. Tiempo vitin, kíʼinyó kuenta ña̱ xa̱a̱ síín íyo na̱ ndíku̱n ña̱ káʼa̱n Jehová nu̱ú na̱ va̱ása xíín kundiku̱n ña̱ káʼa̱nra. Na̱ ndíku̱n Jehová si̱íní íyona xa̱ʼa̱ ña̱ va̱ʼa íyo inina (Is. 65:13, 14). w19.09 17 párr. 15; 19 párr. 21

Tá ku̱i̱ya̱ 1935, na̱ testigo Jehová ku̱nda̱a̱-inina ña̱ va̱ása xíniñúʼu ku̱ʼu̱nví na̱ yiví yóʼo chí ndiví, ña̱ va̱ʼa kunditana nu̱ú trono xíʼin nu̱ú ta̱ íyo táki̱ʼva íyo ndikachi, chi ña̱ tu̱ʼun yóʼo iin ña̱ náʼa̱ kuití nu̱úyó kúúña. Ni nu̱ú ñuʼú yóʼo ndóo na̱ gran muchedumbre, tá íyo na̱ ndíta nu̱ú trono saá íyona tá kándíxana ña̱ mií Jehová kúú ta̱ kúúmií yichi̱ ña̱ kaʼndachíñura, ta ndíku̱nna ña̱ káʼa̱nra (Is. 66:1). Ta ndítana nu̱ú ta̱ íyo táki̱ʼva íyo ndikachi tá kándíxana ña̱ ni̱xi̱ʼi̱ra xa̱ʼa̱na. Ki̱ʼva saátu íyo ña̱ va̱xi nu̱ú Mateo 25:31, 32. Yóʼo káʼa̱nña ña̱ ndiʼi na̱ ñuu ndakutáʼanna nu̱ú ta̱ Jesús xíʼin nu̱ú tronora, ta saátu nda̱a̱ na̱ kéʼé ña̱ va̱ása va̱ʼa. Ña̱yóʼo náʼa̱ña nu̱úyó ña̱ ndiʼi na̱ ñuu yóʼo íyona nu̱ú ñuʼú yóʼo, ta su̱ví chí ndiví. Káxiní íyo ña̱ ku̱nda̱a̱-inina tá ku̱i̱ya̱ 1935. Ku̱nda̱a̱-inina nda̱chun kúú ña̱ va̱ása káʼa̱n ña̱ Biblia ña̱ ku̱ʼu̱n na̱ gran muchedumbre chí ndiví. Chi nda̱saa kuití na̱ 144,000 kúú na̱ kutaku ndiʼi tiempo chí ndiví ta kaʼndachíñuna xíʼin ta̱ Jesús (Rev. 5:10). w19.09 28 párr. 9

Jehová kúni̱ra ña̱ ni loʼo ná va̱ása kitáʼanyó xíʼin Babilonia ña̱ káʼnu. Soo íyo inka ña̱ xíniñúʼu keʼéyó. Ná ndakundeéyó ndasakáʼnuyó Jehová. Ná kotoyó u̱vi̱ ki̱ʼva ña̱ kivi keʼéyóña. Ña̱ nu̱ú, xíniñúʼu kandíxayó ndiʼi ña̱ káʼa̱n Jehová xíʼinyó. Va̱ása xíniñúʼu keʼéyó táʼan ña̱ kéʼé na̱ ñuyǐví yóʼo. Tá kúú, ña̱ kini va̱ása va̱ʼaña nu̱úyó, ña̱ tíndaʼa̱ iin ta̱a xíʼin inka ta̱a á ñaʼá xíʼin ñaʼá, á inkaka ña̱ kini ña̱ kéʼéna (Mat. 19:4, 5; Rom. 1:26, 27). Ña̱ u̱vi̱, xíniñúʼu ndakundeéyó ndasakáʼnuyó Ndióxi̱ xíʼin na̱ hermanoyó. Ta kéʼéyóña nda̱a̱ ndáaka nu̱ú kivi, kúúña ti̱xin Salón, á inkaka veʼe ta saátu nda̱a̱ nu̱ú se̱ʼé. Nda̱a̱ ndáaka ña̱ ná kuu, va̱ása sandákooyó ña̱ ndakutáʼanyó ña̱ ndasakáʼnuyó Ndióxi̱yó. Ta xíniñúʼuníka keʼéyó ña̱yóʼo vitin, saáchi xa̱a̱ ku̱yatin kixaa̱ ki̱vi̱ Jehová (Heb. 10:24, 25). w19.10 15, 16 párr. 6, 7

Jehová kúni̱ra ña̱ si̱í ná kooyó, ta ña̱ xítonde̱ʼéyó á ña̱ sísikíyó kúú ña̱ sákusi̱í-iniyó. Ta ña̱ Biblia káchiña ña̱ “kǒoka inka ña̱ va̱ʼa nu̱ú na̱ yiví chi ña̱ va̱ʼaníka kúú ña̱ kuxuna, koʼona ta ndakiʼinna ña̱ va̱ʼa xa̱ʼa̱ ña̱ ndeéní káchíñuna” (Ecl. 2:24). Soo vitin, ku̱a̱ʼání ña̱ xítonde̱ʼé na̱ ñuyǐví á ña̱ sísikína va̱ása va̱ʼaña, soo nu̱ú na̱ yiví ña̱ va̱ʼava kúúña, ta ña̱yóʼo chíndaʼáñana ña̱ xa̱a̱na kutóona ña̱ʼa ña̱ káʼa̱n tu̱ʼun Ndióxi̱ va̱ása va̱ʼa. Miíyó kúni̱yó ndasakáʼnuyó iinlá mií Jehová, xa̱ʼa̱ ña̱kán va̱ása kivi kuxuyó mesa Jehová ta kuxuyó mesa na̱ ta̱chí ndi̱va̱ʼa (1 Cor. 10:21, 22). Tá xíxiyó xíʼin iinna náʼa̱ña ña̱ kítáʼanyó xíʼinna. Tá ndáka̱xinyó ña̱ kotonde̱ʼéyó á ña̱ kusíkíyó nu̱ú kána na̱ kánitáʼan, na̱ kéʼé ndiʼi ña̱ kúú kuenta ta̱ Ndi̱va̱ʼa, na̱ kéʼé ña̱ kini, na̱ kéʼé ña̱ kúni̱ miína, íyoyó nda̱a̱ táki̱ʼva íyo iin na̱ xíxi xíʼin na̱ sáa̱-ini xíni Ndióxi̱. Tá ná keʼéyó ña̱yóʼo, va̱ása va̱ʼa kuniyó ta saátu ña̱ kítáʼanyó xíʼin Jehová va̱ása va̱ʼaka kooña. w19.10 26 párr. 2; 29 párr. 11, 12

Tá iin ta̱ xíka xíʼin barco nu̱ú ti̱kui̱í kúni̱ra kuniñúʼu viíra ta̱chí, xíniñúʼu keʼéra u̱vi̱ ña̱ʼa. Ña̱ nu̱ú, xíniñúʼu ku̱ʼu̱nra xíʼin tú barco nda̱a̱ nu̱ú káni va̱ʼa ta̱chí, saáchi túyóʼo va̱ása kanda̱nú tá ná kundichinú nda̱a̱ yuʼú tá mar. Ña̱ u̱vi̱, xíniñúʼu ndaniʼira ña̱ vela ta ndandika va̱ʼaraña, saáchi tá kíʼvi ta̱chí ti̱xin ña̱ vela, saá kúú ña̱ kivi ku̱ʼu̱n tú barco. Ki̱ʼva saá íyo miíyó, kivi ndakundeékayó ndasakáʼnuyó Jehová tá chíndeétáʼan espíritu santo xíʼinyó. Xa̱ʼa̱ ña̱yóʼo, íyo u̱vi̱ ña̱ xíniñúʼu keʼéyó. Ña̱ nu̱ú, nda̱a̱ táki̱ʼva kéʼéna xíʼin tú barco, saá xíniñúʼu kundichiyó nu̱ú káni va̱ʼa ta̱chí á ña̱ espíritu santo, ña̱ va̱ʼa chindeétáʼanña xíʼinyó ña̱ keʼéyó chiñu Ndióxi̱. Ña̱ u̱vi̱, nda̱a̱ táki̱ʼva kéʼéna xíʼin vela tú barco ña̱ va̱ʼa ku̱ʼu̱nnú, saá xíniñúʼu chika̱a̱yó ndee̱ ña̱ keʼéyó nda̱a̱ ndáaka chiñu ña̱ kivi (Sal. 119:32). Espíritu santo chindaʼáña miíyó ña̱ ndakundeéyó ndasakáʼnuyó Jehová, ni íyo tu̱ndóʼo á ña̱ sási nu̱úyó. w19.11 9 párr. 8; 10 párr. 11

Ñuú tá kúma̱níka ña̱ kuvi ta̱ Jesús, ndeéní ni̱ndi̱ʼi̱-inira. Ku̱nda̱a̱-inira ña̱ si̱lóʼo kúma̱ní ña̱ ixandi̱va̱ʼana xíʼinra ta nda̱a̱ kaʼnínara. Soo ni̱xi̱yo inka ña̱ ni̱ndi̱ʼi̱ka-inira xa̱ʼa̱. Xi̱kuni̱ra sakusi̱íra-ini yivára chi xi̱kuni̱nírara. Ta xi̱kunda̱a̱-inira ña̱ tá nda̱kú ná koo inira xíʼin yivára, saá ndakiʼinra tu̱ʼunra ta ndasakáʼnura ki̱vi̱ra. Saátu xi̱kuʼvi̱ní-inira xi̱xinira na̱ yiví, ta ku̱nda̱a̱-inira ña̱ kivi kutakuna ndiʼi tiempo, tá ná koo nda̱kú-inira xíʼin yivára nda̱a̱ ná kuvira. Ni ni̱xi̱yo ña̱ sa̱ndíʼiní-ini ta̱ Jesús, táxinva ni̱xi̱yo inira. Ndióxi̱ ta̱xi ña̱ táxin ni̱xi̱yo inira, táʼan ña̱ kúúmií na̱ kítáʼan va̱ʼa xíʼin Jehová. Ña̱yóʼo kúú ña̱ xi̱kuumií ta̱ Jesús, ña̱ ni̱xi̱yo níma̱ra xíʼin xi̱níra (Filip. 4:6, 7). Ni iin miíyó va̱ása ndoʼoyó táʼan ña̱ ndo̱ʼo ta̱ Jesús, ña̱ ndeéní ni̱ndi̱ʼi̱-inira. Soo ndiʼiyó na̱ ndíku̱nñaʼá ya̱ʼavayó nu̱ú ku̱a̱chi (Mat. 16:24, 25; Juan 15:20). Ta sana táki̱ʼva ndo̱ʼora, saátu miíyó, koo ña̱ sandi̱ʼi̱-iniyó. w19.04 8 párr. 1-3

Ná nda̱ka̱tu̱ʼun xíʼin miíyó: “¿Á kúsi̱í-inii̱ xa̱ʼa̱ ña̱ kítáʼi̱n xíʼin na̱ ñuu Ndióxi̱?”. Ku̱a̱ʼání kúú ña̱ náʼa̱ nu̱úyó ña̱ táxi Jehová ku̱a̱ʼání bendición ndaʼa̱ na̱ ñuura tiempo vitin. Ña̱kán íyo ku̱a̱ʼání xa̱ʼa̱ kúú ña̱ xíniñúʼu taxiyó tíxa̱ʼvi (1 Tes. 5:18). ¿Ndáa ki̱ʼva náʼa̱yó ña̱ chíndeétáʼanyó xíʼin na̱ ñuu Jehová? Ña̱ keʼéyó ndiʼi ña̱ káʼa̱n consejo ña̱ va̱xi nu̱ú publicación, reunión xíʼin ña̱ asamblea, ta chika̱a̱níyó ndee̱ ña̱ ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱ ña̱ koona discípulo (1 Cor. 15:58). Ta saátu xíniñúʼu chika̱a̱yó ndee̱ ña̱ sakusi̱íyó-ini Jehová xíʼin ña̱ kéʼéyó, ña̱ va̱ʼa ndakiʼinra ndiʼi ña̱ táxiyó ndaʼa̱ra. Ndásakáʼnuyó Ndióxi̱ saáchi táxiyó tíxa̱ʼvi ndaʼa̱ra. Ná ndakundeéyó taxiyó ndiʼi ña̱ va̱ʼa ña̱ kúúmiíyó ndaʼa̱ra xa̱ʼa̱ ña̱ kúʼvi̱-iniyó xíniyóra xíʼin ndiʼi níma̱yó. Ta saátu xíʼin ndiʼi níma̱yó ná chindeétáʼanyó xíʼin na̱ ñuura. Tá ná keʼéyó ndiʼi ña̱yóʼo, náʼa̱yó nu̱ú Jehová ña̱ táxiyó tíxa̱ʼvi ndaʼa̱ra xa̱ʼa̱ ña̱ káchíñuyó nu̱úra. w19.11 25 párr. 17, 18

Va̱ása ni̱ka̱ʼa̱n ta̱ Jesús ña̱ keʼéyó milagro nda̱a̱ táki̱ʼva ke̱ʼéra, chi ña̱ ni̱ka̱ʼa̱nra kúú ña̱ ku̱a̱ʼáníka na̱ yiví natúʼunyó xíʼin ta sanáʼa̱yóna, ta ku̱a̱ʼáka tiempo keʼéyó chiñu yóʼo. Tá kúúmiíyó iin chiñu, ná nda̱ka̱tu̱ʼun xíʼin miíyó: “¿Á xíto inkana ña̱ kúi̱ iin na̱ va̱ʼaní káchíñu? ¿Á kama kéʼíi̱ chiñui̱, ta á vií kéʼíi̱ña?”. Tá va̱ʼa íyo ña̱ nda̱kuiinyó, sana na̱ káchíñuyó nu̱ú kúsi̱í-inina xíʼinyó, ta na̱ káchíñu xíʼinyó va̱ʼa kuniso̱ʼona tá ná natúʼunyó xíʼinna xa̱ʼa̱ Ndióxi̱. Soo, tá ku̱a̱ʼa̱nyó natúʼunyó xa̱ʼa̱ Ndióxi̱ ná nda̱ka̱tu̱ʼun xíʼin miíyó: “¿Á xíto inkana ña̱ chíka̱a̱níi̱ ndee̱ ña̱ natúʼi̱n xa̱ʼa̱ Ndióxi̱? ¿Á sákuaʼa kúei̱ xa̱ʼa̱ ña̱ ka̱ʼi̱n yichi̱ nu̱ú? ¿Á kama ndíkói̱ nu̱ú iin na̱ yiví na̱ va̱ʼaní xi̱niso̱ʼo xa̱ʼa̱ Ndióxi̱? Ta, ¿á chíka̱i̱ ndee̱ ña̱ keʼíi̱ nda̱a̱ ndáaka chiñu?”. Tá va̱ʼa íyo ña̱ nda̱kuiinyó, kúni̱ kachiña ña̱ kúsi̱íní-iniyó kéʼéyó chiñuyó. w19.12 5, 7 párr. 14, 15

Tá iin na̱ xa̱a̱ ti̱ndaʼa̱ nda̱kaxinna ña̱ koo se̱ʼena, xíniñúʼu ka̱ʼa̱nna xa̱ʼa̱ u̱vi̱ ña̱ ndáyáʼviní: ña̱ nu̱ú, ama kúni̱na koo se̱ʼena, ta ña̱ u̱vi̱, nda̱saa se̱ʼena kúni̱na koo. Ta, ¿ama kúú ña̱ xíniñúʼu ka̱ʼa̱nna xa̱ʼa̱ ña̱yóʼo? Ta, ¿nda̱chun ndáyáʼviníña? Na̱ novio tá kúma̱níka tindaʼa̱na xíniñúʼu ka̱ʼa̱n táʼanna xa̱ʼa̱ á koo se̱ʼena á va̱ása, chi ndáyáʼviní ña̱ inkáchi ndakanixi̱nína xa̱ʼa̱ ña̱yóʼo. Ta saátu, xíniñúʼu kotona á xa̱a̱ íyo tu̱ʼvana ña̱ kundaana se̱ʼena. Sava na̱ sa̱kán tíndaʼa̱, túvina ña̱ va̱ʼaka tá ná ya̱ʼa iin á u̱vi̱ ku̱i̱ya̱ saáví koo se̱ʼena, chi tá ná koo se̱ʼena kuniñúʼuna ku̱a̱ʼá tiempo xíʼin ndee̱. Tá ná keʼéna ña̱yóʼo táxiña tiempo ndaʼa̱na, ña̱ va̱ʼa ka̱anna koona xíʼin na̱ ti̱ndaʼa̱ xíʼinna, ta vií kutáʼanna tá kúma̱níka koo se̱ʼena. w19.12 23 párr. 4, 5

Iníísaá ñuyǐví ku̱a̱ʼání na̱ ndásakáʼnu Ndióxi̱ yáʼana nu̱ú ku̱a̱ʼání tu̱ndóʼo. Ku̱a̱ʼání na̱ hermanoyó xóʼvi̱na xa̱ʼa̱ ña̱ ndeé ndóʼona á ña̱ ni̱xi̱ʼi̱ iin na̱ veʼena. Savatuna, xóʼvi̱na xa̱ʼa̱ ña̱ xítona sándakoo na̱ veʼena á na̱ migona ña̱ ndasakáʼnuna Ndióxi̱. Ta savatuna, xóʼvi̱na xa̱ʼa̱ ña̱ ndeéní kóon sa̱vi̱ á xa̱ʼa̱ inkaka ña̱ kúu. Ta ndiʼi na̱ hermano yóʼo xíniñúʼuna ña̱ sandíkoyó-inina. ¿Nda̱saa kivi chindeétáʼanyó xíʼinna? Na̱ migo na̱ nda̱kú íyo ini kéʼéna nda̱a̱ ndáaka ña̱ʼa ña̱ chindeétáʼanna xíʼin na̱ hermanona. Ná kotoyó ña̱ ndo̱ʼo iin ta̱ hermano ta̱ naní Peter, ta̱ ni̱ka̱ʼa̱nna xíʼin ña̱ kúúmiíra iin kue̱ʼe̱ ña̱ va̱ása kivi ndaʼara xíʼin. Ñá síʼíra ñá Kathryn, káchiñá: “Iin na̱ matrimonio na̱ íyo ti̱xin congregación ni̱xa̱ʼa̱nna xíʼinndi̱ nu̱ú na̱ doctor, tá ni̱ka̱ʼa̱nna ña̱ kúúmií ta̱ Peter kue̱ʼe̱. Tá ku̱nda̱a̱-inina xa̱ʼa̱ ña̱yóʼo, chi̱ka̱a̱-inina ña̱ va̱ása sandákoona ndi̱ʼi̱ ña̱ ya̱ʼa miíndi̱ nu̱ú ña̱yóʼo, ta ndiʼi tiempo chíndeétáʼanna xíʼinndi̱”. ¿Á su̱ví va̱ʼaní kúniyó xa̱ʼa̱ ña̱ chíndeétáʼan na̱ migoyó xíʼinyó, tá yáʼayó nu̱ú tu̱ndóʼo? w20.01 8 párr. 1; 9 párr. 5, 6

Tá yóʼó níxi̱yo táʼan na̱ discípulo na̱ nda̱kutáʼan ini iin cuarto ña̱ kánuu chí xi̱ní veʼe tá ki̱vi̱ ña̱ Pentecostés ña̱ ku̱i̱ya̱ 33 ni va̱ása kaka-iniún ña̱ nda̱kaxin Ndióxi̱ yóʼó xíʼin espíritu santora (Hech. 2:5-12). Soo, ¿á iin ki̱ʼva ndáka̱xin Ndióxi̱ na̱ ku̱ʼu̱n chí ndiví ta á inkáchi ki̱vi̱ kéʼéraña? Va̱ása. ¿Nda̱chun káʼa̱nyó ña̱yóʼo? Ná ka̱ʼa̱nyó xa̱ʼa̱ ama kúú ña̱ ndáka̱xin Ndióxi̱ na̱ ku̱ʼu̱n chí ndiví xíʼin espíritu santora. Su̱ví nda̱saa na̱ 120 cristiano kúú na̱ níndaka̱xin Ndióxi̱ xíʼin espíritu santora ki̱vi̱ saá, chi saátu mií ki̱vi̱ kán nda̱kiʼin inka 3,000 na̱ yiví espíritu santo ña̱ ni̱ka̱ʼa̱n ta̱ Jesús xa̱ʼa̱. Ta na̱yóʼo nda̱kaxinrana tá nda̱kuchina (Hech. 2:37, 38, 41). Soo tá ni̱ya̱ʼaka ku̱i̱ya̱, su̱ví ndiʼi na̱ nda̱kaxinra níkanara ku̱ʼu̱n chí ndiví tá ki̱vi̱ nda̱kuchina. Chi tá kúú, na̱ ñuu Samaria tá ni̱ya̱ʼa loʼo tiempo ña̱ nda̱kuchina, saáví kúú ña̱ nda̱kaxinrana (Hech. 8:14-17). Ta ta̱ Cornelio xíʼin na̱ veʼera, Ndióxi̱ nda̱kaxinrana tá kúma̱níka ndakuchina, ta ña̱yóʼo iin yichi̱ kuití ku̱uña (Hech. 10:44-48). w20.01 20, 21 párr. 2-4

Nu̱ú ku̱mí saá Evangelio ki̱ʼva 165 yichi̱ ni̱ka̱ʼa̱n ta̱ Jesús yivá xíʼin Jehová. ¿Nda̱chun ni̱ka̱ʼa̱nníra xa̱ʼa̱ Jehová? Saáchi xi̱kuni̱ra ña̱ ná kunda̱a̱-ini na̱ yiví ña̱ Jehová kúúra iin yivá ta̱ kúʼvi̱ní-ini xíni miíyó (Juan 17:25). Ná kotoyó ndáa ki̱ʼva ke̱ʼé Jehová xíʼin se̱ʼera ta̱ Jesús, ta ndáa ña̱ sánáʼa̱ ña̱yóʼo miíyó xa̱ʼa̱ra. Ndiʼi tiempo xi̱xiniso̱ʼo Ndióxi̱ ña̱ xi̱ka̱ʼa̱n se̱ʼera xíʼinra, ta xi̱ndakuiinra yuʼúra (Juan 11:41, 42). Ta̱ Jesús ndiʼi tiempo xi̱kunda̱a̱-inira ña̱ kúʼvi̱ní-ini yivára xínirara, ta xi̱chindeétáʼanra xíʼinra tá xi̱yaʼara nu̱ú nda̱a̱ ndáaka tu̱ndóʼo (Luc. 22:42, 43). Jehová ni̱na̱ʼa̱ra ña̱ kúúra iin yivá ta̱ va̱ʼaní-ini, ta xi̱kuni̱ra ña̱ ná kunda̱a̱-ini ta̱ Jesús ña̱ chindeétáʼanra xíʼinra (Mat. 26:53; Juan 8:16). Ña̱ nda̱a̱ kúú ña̱ va̱ása níxindaarara nu̱ú ndiʼi tu̱ndóʼo, soo chi̱ndeétáʼanra xíʼinra ña̱ ku̱ndeé-inira nu̱ú tu̱ndóʼo yóʼo. Ta̱ Jesús xi̱kunda̱a̱-inira ña̱ nda̱a̱ ndáaka tu̱ndóʼo ná ya̱ʼara nu̱ú su̱ví ndiʼi tiempo xoʼvi̱ra xíʼinña (Heb. 12:2). Jehová ni̱na̱ʼa̱ra ña̱ xi̱ndaara se̱ʼera tá xi̱xiniso̱ʼorara, tá xi̱taxira ña̱ xíniñúʼura, tá xi̱sanáʼa̱rara ta xi̱chindeétáʼanra xíʼinra (Juan 5:20; 8:28). w20.02 3 párr. 6, 7, 9

Tá ná ndaka̱xinyó á kundiku̱nyó iin costumbre á keʼéyó iin vikó, siʼna ná ndakanixi̱níyó nda̱saa kundoʼo na̱ hermano á inkana xíʼin ña̱yóʼo. Va̱ása kúni̱yó sandákavayó-ini inkana (Mar. 9:42). Saátu va̱ása kúni̱yó ka̱ʼa̱n ndi̱va̱ʼayó xíʼin na̱ va̱ása kúú testigo Jehová. Xa̱ʼa̱ ña̱ kúʼvi̱-iniyó xíniyóna, to̱ʼó ka̱ʼa̱nyó xíʼinna, saáchi xíʼin ña̱yóʼo ndásakáʼnuyó Jehová. Ta ni va̱ása ka̱ʼa̱n kúáchiyó xíʼinna ni va̱ása kusi̱kindaayó vikó ña̱ kéʼéna. Ná ndakaʼányó chi tá to̱ʼó íyoyó xíʼinna ta kúʼvi̱-iniyó xíniyóna, sana nda̱a̱ kivi chindeétáʼanyó xíʼin na̱ sáa̱-ini xíni miíyó ña̱ nasa̱mana. Ná ka̱ʼa̱nyó xíʼin na̱ táʼanyó á na̱ íyo yatin xíʼinyó ña̱ kúúyó testigo Jehová (Is. 43:10). Tá ya̱chi̱ka ná keʼéyó ña̱yóʼo, saá kivi ka̱ʼa̱nyó xíʼinna ña̱ va̱ása kúni̱yó kutáʼanyó xíʼinna ña̱ keʼéna iin ña̱ʼa. Xa̱ʼa̱ ña̱yóʼo ná va̱ása kukaʼan nu̱úyó ña̱ ka̱ʼa̱nyó xíʼin na̱ yiví ña̱ nda̱a̱ ña̱ sánáʼa̱ Biblia xa̱ʼa̱ na̱ ni̱xi̱ʼi̱ (Rom. 1:16). w19.04 17, 18 párr. 14-16

Na̱ 12 apóstol, ni̱xi̱yona xíʼin ta̱ Jesús tá ni̱xi̱kara na̱túʼunra xa̱ʼa̱ Ndióxi̱ nu̱ú ñuʼú yóʼo, soo ta̱ apóstol Pablo, ndu̱ura cristiano tándi̱ʼi ni̱xi̱ʼi̱ ta̱ Jesús ta nda̱takura. Ta tá ni̱ya̱ʼa tiempo, ndu̱ura apóstol nu̱ú ndiʼi na̱ ñuu, soo va̱ása níxa̱a̱ra koora táʼan na̱ 12 apóstol (Rom. 11:13; Hech. 1:21-26). Soo ku̱si̱í-inira xíʼin ña̱ xi̱kuumiíra, ta va̱ása níkukúini̱-inira kunira na̱ 12 apóstol xa̱ʼa̱ ña̱ va̱ʼaní xi̱táʼanna xíʼin ta̱ Jesús. Tá vitá íyo iniyó ta kúsi̱í-iniyó xíʼin ña̱ kúúmiíyó, xa̱a̱yó kooyó nda̱a̱ táki̱ʼva ni̱xi̱yo ta̱ Pablo, ta ixato̱ʼóyó na̱ hermano na̱ ta̱xi Jehová chiñu ndaʼa̱ (Hech. 21:20-26). Jehová nda̱kaxinra na̱ anciano ña̱ kuniʼina yichi̱ nu̱ú na̱ congregación. Ni kúúna na̱ ku̱a̱chi, nu̱ú Jehová iin regalo na̱ ta̱xira ndaʼa̱yó kúúna (Efes. 4:8, 11). Tá íxato̱ʼóyóna ta xíʼin ña̱ vitá-ini ndíku̱nyó ña̱ káʼa̱nna, kúúyó migo Jehová ta vií kítáʼanyó xíʼin na̱ hermanoyó. w20.02 17 párr. 13, 14

Tá kúma̱níka kixáʼún kaʼviún Biblia xíʼin na̱ testigo Jehová, xa̱a̱ kúʼvi̱va-iniún xíniún Ndióxi̱, ta saátu kúʼvi̱-iniún xíniún ta̱ Jesús. Ta vitin kúsi̱íní-iniún ña̱ kítáʼún xíʼin na̱ testigo Jehová. Soo ña̱yóʼo va̱ása kivi chindaʼáña yóʼó, ña̱ ndataxi xíʼin miíún ndaʼa̱ Jehová ta ndakuchiún. Chi ña̱ chindaʼá yóʼó ña̱ xa̱ún ndakuchiún kúú ña̱ kúʼvi̱-iniún xíniún Ndióxi̱. Tá ná xa̱ún kuʼvi̱ka-iniún kuniúnra nu̱ú nda̱a̱ ndáaka ña̱ʼa, va̱ása taxiún ña̱ kasi nda̱a̱ ni iin ña̱ʼa nu̱ún ña̱ ndasakáʼnúnra. Ña̱ kúʼvi̱-iniyó xíniyó Jehová su̱ví nda̱saa chíndaʼáña miíyó ña̱ xa̱a̱yó ndakuchiyó, chi saátu chíndeétáʼanña xíʼinyó ña̱ nda̱kú koo iniyó xíʼinra ndiʼi tiempo. Ta̱ Jesús ni̱ka̱ʼa̱nra ña̱ xíniñúʼu kuʼvi̱-iniyó kuniyó Jehová xíʼin ndiʼi níma̱yó, xíʼin ndiʼi ña̱ tákuyó, xíʼin ndiʼi xi̱níyó xíʼin ndiʼi ndee̱yó (Mar. 12:30). ¿Ndáa ki̱ʼva kivi sakuaʼún kuʼvi̱-iniún kuniún Jehová ta ixato̱ʼúnra? Ña̱ ndakanixi̱níún xa̱ʼa̱ ña̱ kúʼvi̱ní-inira xínira miíyó. w20.03 4 párr. 4, 5

¿Ndáaña kúni̱ kachi ña̱ saxínuyó ndiʼi chiñu ña̱ ta̱xi Ndióxi̱ ndaʼa̱yó? Ña̱ saxínuyó ndiʼi chiñu ña̱ ta̱xi Ndióxi̱ ndaʼa̱yó kúni̱ kachiña ña̱ chika̱a̱yó ndee̱ ña̱ natúʼunyó xíʼin ndiʼi na̱ yiví ta vií sanáʼa̱yóna. Soo Jehová va̱ása ndíʼi̱-inira xa̱ʼa̱ nda̱saa tiempo káchíñuyó nu̱úra, chi ña̱ ndíʼi̱ka-inira xa̱ʼa̱ kúú ña̱ nda̱chun kéʼéyóña. Tá kúʼvi̱-iniyó xíniyóra ta saátu kúʼvi̱-iniyó xíniyó na̱ yiví, saá kúú ña̱ chika̱a̱níkayó ndee̱ ña̱ saxínuyó ndiʼi chiñu ña̱ ta̱xira ndaʼa̱yó (Mar. 12:30, 31; Col. 3:23). Xa̱ʼa̱ ña̱yóʼo kuniñúʼuyó ndiʼi ndee̱yó ña̱ keʼéyó chiñu yóʼo. Tá ndáyáʼvi chiñu Ndióxi̱ nu̱úyó, saá kúú ña̱ chika̱a̱yó ndee̱ ña̱ sanáʼa̱yó ndiʼi na̱ yiví. Sana va̱ása kívi kuniñúʼuyó ndiʼi tiempo ña̱ kúni̱yó ña̱ sanáʼa̱yó na̱ yiví. Soo ña̱yóʼo kúú ña̱ kútóoníkayó keʼéyó. Chíka̱a̱níyó ndee̱ ña̱ vií sánáʼa̱yóna xa̱ʼa̱ Ndióxi̱. Ta saxínuyó ndiʼi chiñu ña̱ ta̱xira ndaʼa̱yó. w19.04 2 párr. 3; 3 párr. 4, 6

Ña̱ vatá ña̱ káʼa̱n ta̱ Ndi̱va̱ʼa xa̱ʼa̱ na̱ ni̱xi̱ʼi̱ sáxo̱ʼvi̱níña na̱ yiví. Tá kúú na̱ ni̱xi̱ʼi̱ se̱ʼe, sana káʼa̱nna xíʼinna ña̱ mií Ndióxi̱ nda̱kiʼin se̱ʼena ku̱a̱ʼa̱nna chí ndiví. ¿Á sándi̱ko ña̱yóʼo ini na̱ ni̱xi̱ʼi̱ se̱ʼe, á sáxo̱ʼvi̱kavaña-inina? Inka ña̱ sáxo̱ʼvi̱ na̱ yiví kúú ña̱ káʼa̱n ta̱ Ndi̱va̱ʼa xa̱ʼa̱ ndayá á xi̱tu̱n, na̱ yiví xi̱niñúʼuna ña̱yóʼo xi̱naʼá ña̱ kaʼmina sava na̱ yiví na̱ va̱ása níxiin kandíxa ña̱ sánáʼa̱ na̱ veʼe-ñu̱ʼu. Táki̱ʼva káʼa̱n iin libro xa̱ʼa̱ ña̱ ku̱u xi̱naʼá chí España, na̱ xi̱xaʼmi na̱ yiví yóʼo xi̱ndakanixi̱nína ña̱ va̱ʼava kúú ña̱ kéʼéna saá, ña̱kán va̱ʼa ndandikó-ini na̱ va̱ása kándíxa, tasaá tá ná kuvina va̱ása ku̱ʼu̱nkana ndayá á xi̱tu̱n. Saátu íyo sava ñuu nu̱ú távána vikó ndi̱i ña̱ ndásakáʼnuna na̱ táʼanna na̱ ni̱xi̱ʼi̱ á ña̱ va̱ʼa taxi na̱yóʼo bendición ndaʼa̱na, á ña̱ ná kǒo keʼéna ña̱ va̱ása va̱ʼa xíʼinna. Soo ña̱ vatá yóʼo va̱ása sándi̱koña-ini na̱ yiví. Saáchi ndeéka sáxo̱ʼvi̱ñana á sáyíʼviñana. w19.04 14 párr. 1; 16 párr. 10